توتة....توتة....مخلصتشي الحدوتة

[لماضة مصرية جدا]

السلام عليكم و رحمة الله و بركاته

هو انا بفكر في الموضوع دوت من فترة

لاني بفكر هحكي ازاي لاولادي اخويا عن الثورة اللي حصلت في مصر

هما سنهم 9 سنين و 5 سنين و عايشين بره مصر

و نفسي احكيلهم عن الثورة و اللي حصل و كده

بس مش عارفة اعملها ازاي

سؤالي

بتحكوا لاولادكم عن الثورة ازاي؟؟

طب فيه حدوتة معينة بتقدروا توصلوا بيها اللي انتو عايزينه

طب نخترع مثلا شخصية معينة...؟؟؟

مش عارفة؟؟

بس قولت افكر معاكم

و توتة.....توتة....مخلصتشي الحدوتة

[rewsha]

عن نفسي .بناتي عندهم 13 سنه و10 سنوات واخر العنقود عندها 8 شهور.

كنت اثناء الثوره ,دايما انده لهم علشان يشوفوا ويسمعوا ويفهموا

وكمان علشان يساْلوا

لما يساْلوا وانا اجاوب...هايعرفوا

لاني مش باعرف احكي حواديت

انتي بقى ممكن تتفاهمي مع البنوته اللي عندها 9 سنوات

لكن اللي عندها 5 دي ..لسه صغيره ومش هاتستوعب قوي.استني عليها لما تكبر شويه .

ممكن مثلا تقولي للي عندها 9 سنوات .انتي لو عندك مدرسه بتضرب وبتظلم والفصل كله متضايق منها هاتعملوا ايه؟

هاتشتكوها للناظره او المديره .

طيب لو الناظره ماعملتش حاجه هيه كمانلان المدرسه دي تبقى بنت خالتها مثلا وهمه قرايب او اصحاب ؟

يبقى هانشتكي للي اكبر منها (الاداره التعليميه)

وهكذا .

طب لو كل دول ماعملوش حاجه علشان همه زمايل واصحاب وبيجاملوا بعض؟

يبقى كل الاهالي هاتتجمع وتعمل ثوره .علشان مصلحة الطلبه .

اعتقد دي اقرب حاجه ممكن تفهميها بيها

[م تيمور المراغي]

كان فيه بلد جميلة اوي اسمها مصر

البلد دي كانت فيه اشجار جميله ,,

وعصافير خضرا صوتها جميل ,,

وبحر ازرق بيسبح فيه الاطفال ,,

وحصان ابيض سريع و بيجري

بس فجاة !

جم اشرار و حراميه ووحشين دخلوا البلد !

الناس كلها خافت منهم ,,!

ودخلوا بسرعه استخبوا جوه البيوت ,,

العصافير بطلت تغني

والشجر اوراقه وقعت على الارض

والبحر بقى لونه اسود ومابقاش حد بينزله

والاشرار دول سرقوا الحصان الابيض الجميل وحبسوه جوه بيت قديم ومكسر

بقت الناس اللي في البيوت زعلانه وبتعيط

كل ماتسمع صوت الحصان

كل ليله وهو بينادي عليهم

عشان ينقذوه ,,

الناس قعدت تفكر

تفكر ,,

في فكره ,,

ازاي تنقذ الحصان الصغير و تطرد كل الاشرار الوحشين اللي دخلوا البلد وسرقوا حصانهم الجميل ,,

يتبع ,,

[aimen]

بسيطة

اسمعوا حكاية نجوى وليلى

وحكاية تزويد المصروف :closedeyes:

نوجى والعصير ايد واحدة

http://www.youtube.com/watch?v=mLecRDZo_n0

[لماضة مصرية جدا]

السلام عليكم و رحمة الله و بركاته

اولا اسفة جدا علي التاخير في الرد استاذة روشة...استاذي اركتيكت و استاذي ايمن

و جزاكم الله كل خير علي الافكار الجميلة اوي دي

بالنسبة لولاد اخويا هما الفكرة انهم عايشين بره مصر و الحياة عندهم يا مذاكرة يا لعب مافيش اي تواصل اوي مع اللي بيحصل في مصر و ان شاء الله لما انزل مصر هجرب اعمل معاهم الافكار الجاية"

1- صحيح انا عايزاهم يعرفوا عن الثورة بس صغر سنهم مش راح يخليهم يعرفوا او يتابعوا اوي التفاصيل دي...بس بفكر ان احكيلهم حواديت انهم يقدروا يحلموا...يحلموا بمصر...يحلموا ببيتهم في مصر ممكن يكون شكله ايه....و يرسموا ده كمان لان العيلة عندنا فنية اوي الحقيقة...نجيب الوان و وورق كانوسن و نفرش في الارض و نرسم احلامنا

هعلق الرسومات اللي هيعملوها علي حيكان الطرقة عندنا و لما يسافروا هخليهم ياخدوها معاهم

عايزياهم يصدقوا انهم ممكن يحلموا...و ان مصر لازم تكون في حلمهم...يمكن هما بعيد...بس لازم يتعودوا يحلموا بيها عشان ميبقوش غريبين و هما جواها

2- هشتري ليهم علم صغير....ملاحظة انهم عارفين علم الدولة اللي عايشين فيها...و حافظين النشيد اوي...بس يعني العلم بتاع مصر...معندهومش...هشترليهم ستيكرز و دبابيس كده للعلم و الولد الصغير بيموت في البواريك الملونة...:)

3- هنغني مع بعض اغاني الثورة....انا بحبك يا بلادي....صوت الحرية بينادي

يمكن ده اللي بفكر فيه دلوقتي...و برضه بحاول افكر معاكم

بس بفكر فكرة صغننتة

ليه معندناش فيلم كارتون...يحكي حكاية الثورة بشكل مبسط كده

افتكر فيلم كان بتوزعه اليونسيف عن عمالة الاطفال و كان قصته حلوة اوي و بسيطة اوي...و كان معاه كتاب ملون لازم تحس انك بتتوحد مع شخصية الطفل اللي في القصة

متعرفوش حد ممكن يتطوع و نعمل ورشة عمل و نفكر سوا في الموضوع ده

انا ممكن اعمل الستوري بورد....بس التنفيذ ماليش فيه؟؟؟

برضه ليه منعملشي قصص صغيرة باسماء الشهداء....الشباب اللي ماتت اكيد كان ليها حياة...ليه منعملشي ده في قصص صغيرة

بدل ما العيال بتطلع متوحدة مع لاعبين الكورة...علي الاقل يبقي عندهم حاجة حقيقية اوي تساعدهم في حياتهم؟؟؟

بفكر في اتجاهات كتير

و تعبتكم معايا

بس اصلي بحبهم

و مفتقداهم و بحس انهم حلمي اللي بيربطني بمصر

مساكم......توتة...توتة...مخلصتشي الحدوتة....(انا مصدقة ان الثورة لسه مخلصتشي)

[م تيمور المراغي]

بدل ما العيال بتطلع متوحدة مع لاعبين الكورة...علي الاقل يبقي عندهم حاجة حقيقية اوي تساعدهم في حياتهم؟؟؟

اقول لك على فكره تخليهم ثورجية طول عمرهم ! :happy: