اذهب الي المحتوي
إنشاء باب جديد بعنوان سد النهضة الإثيوبي لكل الموضوعات المتعلقة بسد النهضة ×
se_ Elsyed

أتهم علانيةً المجلس العسكري والنائب العام بالتواطء

Recommended Posts

لا يُمكن أن نظل خجولين ومسكوفين من الحديث عن نزاهة المجلس العسكري وعن نزاهة النائب العام

فما يحدث منذ شهرين يجعل الشبهات تحوم حولهم ...

وذلك فيما يخص كل شيء بمبارك وعائلته والعصابة المقربة له مثل زكريا عزمي وصفوت الشريف وفتحي سرور ..

على سبيل المثال

لماذا تم إلقاء القبض على أنس الفقي الذي أستلم 5 الاف ج ذهب من يوسف بطرس غالي لتسليمها إلى سوزان مبارك وتم ضبط المسروقات عند انس الفقي في البيت ؟

أين دور سوزان مبارك هنا ؟

- حساب مكتبة الإسكندرية .... بالله عليكم هل يستغرق إستخراج كشف حساب من البنك أكثر من 5 ثواني .. لمعرفة الرصيد ومعرفة العمليات التي تم عليه منذ تأسسيه ؟

الحساب مُفوض بإسم مبارك الأن .. وزوجته هي التي فوضتة بناء على تفويض يوسف بطرس غالي .... أين دور مبارك وزوجته هنا ؟

وما هذا التسويف والتأجيل ؟

وكيف لم توجه لمبارك وزوجته والمجرم إبنه جمال أي تهمة حتى الأن ؟

وما هو دور زكرياعزمي وصفوت وسرور في هذا كله ؟

ما هذا العبث والتهريج أيها السادة المطرمخون ؟

وما هو الغرض من بالونات الإختبار التي يطلقها يحي الجمل من حين لأخر عن طرح فكرة التوصل لتسوية مالية مع بعض رجال الأعمال المقوبض عليهم لإطلاق سراحهم وتردد إن أحمد عز هايدفع 500 مليون ويخرج طاهر وبريء وصفحته بيضا يا بلاش .. يعني ثمن إنتاج يوم واحد من مصانع الحديد المسروقة من البلد ؟

أعتقد أننا نحتاج وبشدة لثورة أخرى للتطهير .... وثورة أخرى للمواجهة مع المجلس العسكري

لأ أقصد هنا مواجهة عسكرية أو عنيفة ..

ولكن اريد مظاهرات مليونية بميادن التحرير لحسم هذا التسويف المقلق والمريب

شارك هذه المشاركه


رابط المشاركه
شارك

كلاهما يريدان الضغط من الشعب

لكى يقولوا للرئيس السابق الشعب عايز كده

يريدوا تأخير التحقيق لابعد وقت حتى تهدأ الاوضاع

والله اعلم جايز يكونوا بيحضروا نفسهم الان عشان لو فى مظاهرات جديدة هنفضها ازاى

شارك هذه المشاركه


رابط المشاركه
شارك

أنا بستغرب من محاكمة وزير الداخلية من غير ما نحاكم رئيس المجلس الأعلى للشرطة اللي ساب الشرطة تواجه الشعب في مسألة سياسية وليست أمنية

حتى لو هو عدل بطيء فالعدل البطيء ظلم

دا قربت أقول إن مبارك مازال رئيس المجلس الأعلى للقوات المسلحة

الشيطان بيقولي إن مبارك لم يتنحي ولكن أجبر على التنحي ولذلك لا يراد التحقيق معه حتى لا ندخل في حكاية تانية اسمها انقلاب أو أي تفسيرات وجدالات طويلة تعطل المسيرة

عموما المعنى في بطن الشاعر لحد دلوقتي

تم تعديل بواسطة tarek hassan

شارك هذه المشاركه


رابط المشاركه
شارك

لن تحدث اي مظاهرات مليونية بدون وجود االأخوان المسلمين

والأخوان اكتفوا بما حققوه حتي الآن

ليه يا سبما .... وهما الأخوان نزلوا 8 مليون مصري في الشارع في نفس الوقت ؟

لأ يا عزيزي ... الشباب مازال بخير .... والأخوان ليسوا بهذه القوة ....

وخلي بالك .. لو الأخوان بيفكروا كده ... يبقى أحسن لنا نرجع لعصر مبارك

لإنه كان عصر بيتسم بإن الحياة عبارة عن " سبوبة "

وأديك شوفت أهي إتطربقت على دماغ الكل ..

كذلك سيحدث للاخوان لو فكروا في أنفسهم فقط وفي مكاسبهم فقط

شارك هذه المشاركه


رابط المشاركه
شارك

مليون فى الميه .. قيادات كتيره من الصف الاول فى الجيش المصرى ((ملطوطه)) مع مبارك .. ومعروف للجميع مقدار ولاء وحب الجيش لمبارك ((كان مروقهم بجد خصوصا الرؤوس الكبيره))

انا أؤكد لكم من مصدر موثوق به .. وهو أحد أفراد عائلتى ((من بعيد شويه)) .. وهو رجل ملتزم اخلاقيا وعسكريا ...وكان رتبة كبيره جدا (من الصف الاول)) وهو على المعاش المبكر حاليا بعد خلاف مع طنطاوى شخصيا .. هذا الرجل كان ومازال حزين جدا مما حدث مع مبارك .. ويقول بالنص تعليقا على الثوره ((ايه اللى عملوه شوية العيال دول .. دا مبارك ده ممتاز)) ..

الخلاصه الناس ((الملطوطه )) دى اللى على راس قيادة الجيش مشكله كبيره لامن واستقرار ونمو مصر بعد الثوره ميقدرش عليهم الا (((((إنقلاب عسكرى)))))) من قيادات من الصف الثانى او الثالث ((حاجه كده زى انقلاب 52)) .. عشان يتم تطهير الجيش المصرى منهم .. واتفرجوا بعد كده على السحل اللى حيحصل واللى ممكن يطول طنطاوى ذات نفسه قبل مبارك وعصابته

يااااااااااااااااارب .. بدعى كل يوم تحصل المعجزه دى .. والاقى فى نشر ات الاخبار البيان الاول لقادة الانقلاب فى الجيش

رغم ده كله اقول بكل اسف مجبرٌ اخاك لا بطل .. والجيش حاااااااااااليا مهما كان حجم الفساد فى قياداته .. يظل الورقه الاخيره فى يدنا .. وهو صمام الامان اللى حمى ومازال يحمى مصر من الفوضى والانهياااااااااار

تم تعديل بواسطة التونسى

شارك هذه المشاركه


رابط المشاركه
شارك

لا أتهم المجلس العسكري بالخيانة

وأعتقد أن عليه ضغوط

وأظن أنه يوازن بين المنافع والمضار في التحقيق مع آل مبارك

وهذا طبعا ليس مبررا

ولكني أحس أنه مقصر في ذلك

شارك هذه المشاركه


رابط المشاركه
شارك

دي حاجة كلنا متأكدين منها ......... قيادات كبيرة وكتيرة ف الجيش المصري ولاءها لمبارك

والبطء ف الاجراءات دة بيشككنا ف كل الناس .......... وكمان المجرمون اللي بيتحاكموا محاكمة مدنية وليست عسكرية ؟؟؟؟؟؟

بس للاسف الشديد ماينفعش دلوقتي بالذات ننقلب علي الجيش المصري لأنه دلوقتي هو فعلاً صمام الأمان لينا زي ماقال الفاضل التونسي

وحتى الانقلاب العسكري ف الوقت دة شيء مقلق ولا نستطيع تقدير عواقبه ف الوقت الحالي

هيبقي انقلاب مدني وبعده عسكري ؟؟؟؟

طيب ومين اللي هيحمي البلد ويخلي باله من اليد الخبيثة اللي بتحاول تدمر اي وكل شيء ؟؟؟؟

يبقي دلوقتي لازم نستني لما اوضاع البلد تتحسن وتستقر تماماً وبعد كدة بالتبعية هنلاقي كل الاوضاع المايلة اتحسنت

ونرجع تاني نقول ان ازاي الاوضاع هتتحسن واحنا شايفين البطء دة وحاسين بمحاولات لتبرئة ساحات ناس معينة ومحاولات اخري لتهريب اشياء معينة ومحاولات ثالثة للتخريب وصرف الانتباه عن اشياء معينة

بيفكروني بالافلام القديمة لما الحرامي يحب يسرق يقوم يفتعل خناقة يصرف بيها انتباه الناس عنه ويشغلهم علشان يعرف يسرقهم ويخلع

دة بالظبط اللي بيحصل معانا النهاردة وعلي اوسع بقي ..........

يبقي لازم نفضل مصحصين ليهم اوي واي حد نحس انه هيأخرنا ولا بيحاول يشتت انتباهنا نقفله ونشد ودنه او نقطعها علشان نقدر نواصل

شارك هذه المشاركه


رابط المشاركه
شارك

ولكن اريد مظاهرات مليونية بميادن التحرير لحسم هذا التسويف المقلق والمريب

انا مع الرأي ده وبشدة ودلوقتي قبل ما الناس همتها تفتر

لن تحدث اي مظاهرات مليونية بدون وجود االأخوان المسلمين

والأخوان اكتفوا بما حققوه حتي الآن

انا سمعت ان مظاهرة امبارح كان فيها البلتاجي من الاخوان ،وبعدين مظاهرة امبارح ما تمش الحشد ليها مظبوط يعني المفروض كان يتنبه عليها من قبل الجمعة ب4 او 5 ايام لكن الائتلاف نزل الدعوة ليها الخميس تقريبا ، الائتلاف هو اللي لازم يحشد الناس، صفحة خالد سعيد والصفحات اللي بيدخلها مليون او اكثر ما حصلش كدة امبارح ليه؟

واحنا مش عايزين انقلاب علي الجيش ولا حاجة ، لكن مظاهرة مليونية عادية نحدد فيها مطالبنا ،ويكون منها اقالة النائب العام وييجي حد بداله افضل

تم تعديل بواسطة ام سلمي

شارك هذه المشاركه


رابط المشاركه
شارك

الكلام ده أعتقد إن أغلبنا بيقوله بينه وبين نفسه, لأنه إذا كان حقيقة يبقى كارثة مرعبة.

وفى موضوع حساس مثل هذا يجب أن تكون هناك أدلة قوية عليه, وإذا تواجدت هذه الأدلة فلازم نقاوم الفساد ده تقديراًً لدماء الشهداء وحماية لمستقبل مصر.

شارك هذه المشاركه


رابط المشاركه
شارك

الموضوع أكبر من المجلس العسكري وعصام شرف ..

فالحق والنزاهة من غير قوة تحميهما .... لا فرق بينهما وبين الفساد إذن .

فإذا كان الحزب اللي رجعنا لورا 100 سنة .. لسه موجود بأعضاءة بمقراته بسلطاته ببانا غنوجه

وإذا كان مبارك لسه معزز مكرم هو ومرات وعياله ..

وإذا كان 55 الف فاسد هم أعضاء المحليات مازالوا موجودين

وإذا كان المحافظين المجرمين لسه موجودين

يبقى ما فائدة الثورة وما فائدة دم الشهداء ؟

شارك هذه المشاركه


رابط المشاركه
شارك

يا سيادة المشير.........أنت جزء من النظام.........إرحل

http://www.youtube.com/watch?v=-oqjjSJ0wwE

برافو عليكى يا فتفوته:clappingrose: .. انتى معايا على الخط تمام .. انا بعد ما كتبت مداخلتى افتكرت احمد شومان واللى قاله عن طنطاوى .. وكنت عايز اضيفه الفيديو ده لتاكيد وجهة نظرى .. وانتى سبقتينى ..

اللى زى احمد شومان فى الجيش هما اللى ممكن يحققوا المستحيل .. هما دول الامل فى جيش خالى من اشباح الماضى الفاسده ..رغم انه اكيد هو واللى زيه محطوطين حاليا تحت المراقبه والنظر .. لكن الامل فى ربنا كبير يتمم ثورتنا على اكمل وجه باذن الله

شارك هذه المشاركه


رابط المشاركه
شارك

علشان كدة أنا قولت نعم للتعديلات الدستورية

الثورة أزالت أصنام هامة وهي مبارك وأعوانه وتركت لنا الجيش ويحيى الجمل

لابد الآن الدفع نحو السلطة المدنية المنتخبة

لابد من التعجيل من انتخابات مجلس الشعب والشورى ورئيس جديد ليتمالسيطرة سريعا على الفساد وعلى الجيش

ولكن ما أخشاه وضع دستور يجعل الجيش المصري كالجيش التركي

شارك هذه المشاركه


رابط المشاركه
شارك
قالك النائب العام يعتزم تجميد ارصدة صفوت الشريف وزكريا عزمي خلال ساعات

الكلام ده كان من 3 ايام، وزي ما احنا عارفين كلنا يا اولاد ان خلال ساعات دي عادة بتبقى مش اقل من خمسة وتلاتين الف ساعة زي الاعلان الدستوري اللي كان حيعلن في خلال ساعات من اسبوع

وعنها وعاديك.. ده كان اخر مرة النائب العام يقول حاجمد ارصدة حد وراح سبحان الله، ولا اله الا الله، ولا حول ولا قوة الا بالله، البنك المركزي، اللي لازم يتم الرجوع اليه في عملية تجميد الارصدة، اتحرق بماس كهربائي في التكييفات

ههههههههههههههههههههههههههههههههههه

حبايب قلبي.. والله باحبكم، احب انا اللي ما يعرفش يكدب ولما يحاول يكدب وشه يحمر ده، تكييف في مارس؟ وكمان عليه ضغط لدرجة انه يعمل ماس كهربائي؟ وفين؟ في البنك المركزي؟ ليه؟ البنك المركزي ما بيعملش صيانة؟

انتوا خفتوا ولا ايه؟

طيب ما احنا عارفين ان الثلاثي المرح لهم ميليشيات ومسلحين كمان، هو احنا بنخاف؟ ما تخافوش

اذا كانوا هددوا بأنهم حيولعوا لكم في البلد كلها لو هوبتوا ناحيتهم

ما تخافوش

اذا كانوا هددوا بانهم حيعملوا فتنة طائفية ويعملوا تفجيرات شبه تفجيرات كنيسة القديسين

ما تخافوش

اذا كانوا هددوا بأنهم حيخربوا البلد

ما تخافوش

احنا واقفين جنبكم... والله العظيم تلاتة احنا واقفين جنبكم.. قسما بالله العظيم احنا واقفين جنبكم

بس ادونا فرصة نقف جنبكم بقى، احنا مش الحيطة المايلة، وجودنا جنبكم هو الضامن الوحيد

انا لو مكانكم اعمل ايه؟

انا لو مكانكم اطلع بيان اقول فيه ان مطالب الشعب على العين والراس، واحنا عارفينها واحدة واحدة، وعايزين نحققها، وبيتم ممارسة ضغوط علينا من قبل كبار الفاسدين، ومن قبل المتضررين من ملاحقة الفاسدين، وبيهددوا امن البلد وشعب مصر، ومحتاجين في هذه الظروف الحرجة وقفة الشعب المصري جنبنا، فيه ناس عايزة تعمل فتن طائفية، وناس عايزة تعمل بلبلة وتخريب، وعايزين جهود الشعب المصري تساندنا

واتفرجوا علينا

اتفرجوا على الشعب ده حيعمل ايه؟ قبل ما البيان ده يخلص حتلاقوا الدنيا كلها لجان شعبية محاوطة كل المصالح والكنايس والجوامع، وفجأتن المسيحيين والمسلمين اللي مسكوا في شعر بعض دول حينزلوا بوس في بعض واحضان تاني، والبلد حتتنظم وتبقى ولا السويد في زمانها

احنا اصلنا لما بنبقى فاضيين بنهبل، لما بيبقى فيه ازمة وعندنا هدف بنبقى زي الساعة.. حتى في الماتشات، ما بنجيبش الجون غير في الوقت بدل الضائع

ده شعبي وانا عارفاه... كان شعبك انت يا كابتن؟ انا اللي لقيته

ما تعملوناش الحيطة المايلة واسمعونا احنا ناس كويسة والله العظيم

مش عارفة... قلبي حاسس كده ان فيه ضغوط عليكم عشان ما تطلعوش الاعلان الدستوري وتسقطوا 71، فيه ناس عايزة دستور 71 وانتوا مش عايزينه، صح؟

وقلبي حاسس كده ان الثلاثي المرح بيهددوكوا بخراب ودمار وحرقوا البنك المركزي بالطريقة الواضحة دي عشان يهتوكوا

طب واحنا رحنا فين؟ ما احنا اهو.. يا ريت يبقى عندكم ثقة فينا شوية

مش انا دلوقت باحب الجيش من طرف واحد؟ بس انا مش حاعرف ادافع لو استمرت سياسة التكتم دي؟ انا مش مصدقة شكوك الناس اللي ابتدت تعلا، لكن مش حاقدر اقولهم مالكوش حق او اسكتوا، لأن الوحيد اللي بايده يطمنهم ويخزي الشيطان هو الجيش المصري فقط لا غير

دلوقت فيه اجهزة، بتحريك من امريكا، عايزين يقعدوا الجيش سنتين تلاتة لحد ما يحضروا البديل الامريكاني، والجيش مش عايز يقعد، فبيحاولوا يقعدوه غصب عنه بأن في نفس اليوم اللي فتحي سرور يتملق فيه الجيش والمشير يندس في مظاهرة ماسبيرو ناس تشتمهم

طب وبرضه انتوا يخيل عليكم الكلام ده؟

احنا شعب مصر.. مافيش احسن من الصراحة معانا، تعالوا لنا بشفافية وتشوفوا وقفتنا جنبكم شكلها ايه، وبعدين كام بلطجي قال كلام فارغ على المشير واساسا ما كانوش جزء من المظاهرة، دول يترنوا علقة بمنتهى السهولة لو جيتوا لنا دوغري وصارحتونا وطلبتوا مساعدتنا في اننا نحقق اهداف الثورة، بدل ما تقعدوا تبعتوا على كل واحد فينا واحد يطقس ورانا عشان يعرف احنا عملاء لمين

احنا مش عملاء ولا حاجة، واللي بنعرفه مش بنعرفه من العمالة، بنعرفه بالاستنتاج، معلش، ربنا فاتح علينا في مخنا شوية عشان الترنت وكده بتعلي مستوى الذكاء، وبعد كده لما تبعتوا حد ورانا يطقس ما تخليهوش يسألنا اسئلة هابلة تكشفه من اول لحظة عشان حتى اهبل ناس فينا فقسوهم، والله العظيم دي مجرد نباهة، والله العظيم كمان مرة احنا ما بنعمل اي حاجة غلط ولا ماشيين في البطال وكلنا عذراوات سوا مدامات ولا انسات ولا حتى رجالة، انتوا شاكين فينا ليه؟ طب لما ناس منا بتشك معذورين عشان هم ما عندهمش مصادر معلومات وكل واحد بيفسر على قد مخه، لكن اصول انت انتوا يبقى عندكم مصادر كويسة تعرفكوا اننا بنحب بلدنا بس، ثقوا في الشعب وما تخافوش علينا

ايه صفوت وزكريا اللي يهددوا دول؟ يروحوا يتوكسوا على خيبتهم، لو عرفوا يعملوا حاجة يوم معركة الجمل يبقى يعرفوا يعملوا حاجة دلوقت، وحرق البنك المركزي مش قصة يعني، والاحداث الطائفية البلهاء بتاعة اطفيح وقطع ودن واحد برضه مش قصة، عادي، احنا اتعاملنا مع حاجات انيل من كده بكتير وقت ما كنتوا في الصحرا، زي ما اتدربتوا هناك ما تخافوش من التعابين والعقارب احنا اتدربنا ما نخافش من صفوت الشريف وزكريا عزمي وفتحي سرور وسوزان مبارك وجمال مبارك، بس ثقوا فينا شوية

ثقوا فينا شوية.. او بلاش.. خلوا بينا وبينهم

يا اما انا مش حاعرف ادافع تاني بقى

واحنا مستمرين في حملتنا لحد ما نجيب الثلاثي عشان يبقوا يعرفوا يحطوا ايدهم في الكوبس وياكلوا ماس كهربائي يا كلوا جاتوه ياكلوا كل اللي يحبوه

هوبا يا شباب؟

للي بيجمع توقيعات في اسوان

0122375490

ده رقم مالك عدلي للي عايز ينسق معاه من المحافظات

0101044264

للي بيجمع في دمياط يتصل برقم

0111179793

اللي بيجمع توقيعات في الاسماعيلية يتصل على

0122526411

اللي بيجمع توقيعات في طنطا يتصل على

0124544946

واللي بيجمع توقيعات في اسكندرية يتصل على

0111860593

اللي عايز يوقع في سوهاج يتصل على

0146075050

اللي بيجمع توقيعات في بورسعيد

0120522209

اللي بيجمع توقيعات في المنصورة

0101176127

اللي بيجمع توقيعات في المنوفية

0171009042

لارسال مجموعات التوقيعات داخل او خارج مصر عبر البريد الالكتروني

[email protected]

الميل ده للي بيجمع توقيعات كتير وياخدها سكان ويبعتها بالميل، ما تبعتليش توقيعك لوحدك، لو توقيعك لوحدك يبقى حطه على التوقيع الالكتروني

وللارسال بالبريد او التسليم يدا بيد

1 ش سوق التوفيقية

ودي صفحة التوقيعات الالكترونية

ودي صفحة الفيك بوس على رأي امين الشرطة اسم الله

وعموما لو هم ما صارحوناش او اتحرجوا منا يقولوا لنا الكلام ده، ادي احنا عرفنا، ماهو الثلاثي المرح دول اساسا هم اللي خربوها على دماغ مبارك بنباهتهم، يحرقوا البنك المركزي يعني فاكرينا مختومين على قفانا؟

بلدنا وحنجيبهم يعني حنجيبهم

وبنحضر ملف مبارك واسرته كمان.. هو احنا بنخاف؟ اللي يخاف يروح

واذا كانت التوقيعات بتخضهم كده وبتخليهم يحرقوا بنوك.. قشطة جدا.. اللي ما وقعش يبقى خايف زيهم، وما يلزمناش الخوافين.. عيب يا جدع احنا من زمان.. من زمان قوي.. من ايام مينا موحد القطرين

تم تعديل بواسطة aimen

شارك هذه المشاركه


رابط المشاركه
شارك

قبل تفجر ثورة 25 يناير ، كانت كتابات المراقبين والمحللين الاجانب عن مايحدث فى مصر هو

مدى تقدم مشروع توريث الحكم وأنتشار رجال جمال مبارك فى الحزب الحاكم وكل الأجهزة التنفيذية

والوزارات ، ولكنهم كانوا دائما يختتمون تقاريرهم بأن هناك معارضة لذلك السيناريو من قيادات

الجيش والذين يرفضون خروج الحكم من دائرة العسكر ، وبالرغم من أننا فى مصر كنا نشاهد الجزء

الاول من سيناريو التوريث ولكننا لم نرى ذلك الجانب الخفى والمظلم من تلك النظرة الفاحصة من

الخارج ودائما ما كانوا يقولون من هو خارج الصورة يستطيع رؤيتها بشكل افضل و أعمق .

والحديث الدائر الآن ان ما يحدث فى وقتنا الراهن هو سيناريو الجيش والذى كان معد سلفا فى حالة

ما تم الشروع فى تنفيذ عملية توريث السلطة الى مبارك الأبن ، وذلك بأن يقوم الجيش بانقلابه

على السلطة و القبض على رجال جمال مبارك فقط وتقديمهم للمحاكمة دونما المساس بمبارك الاب

ولارجاله المخلصين أمثال صفوت الشريف وفتحى سرور وزكريا عزمى ، ودفع عمر سليمان ليتولى الحكم

بشكل مؤقت حتى تتضح الصورة ، أى انقلاب محدود غير موسع ، أنقلاب قصر كما درج على تسميته

ولايمس جوهر سياسات الدولة ولاعلاقاتها ولا أرتباطاتها الداخلية والخارجية ولاحتى قضايا المجتمع

الحساسة كالعدالة الاجتماعية ولا الحريات العامة وخلافه .

ولكن عدالة السماء حلت فى ميدان التحرير وكل ميادين مصر وأضطر الجيش وقتها لقبول ما قامت به

جماهير الشعب الثائرة وضغطت على مبارك خوفا من تفاقم الاوضاع فى البلد وخروجها عن السيطرة

وتتحول الثورة الى حرب صدامية بين الشعب والجيش وهذا هو السيناريو الاسود الذى لم ولن يرغب

به أحد لامن ناحية الشعب وكذلك من ناحية الجيش .

ولكن بعد هدوء الأوضاع وعودة الثوار لمنازلهم - بعد ماراثون طويل طوال 18 يوم متواصلة دون أنقطاع -

بدأ فى تنفيذ ما كان موجودا فى الاصل وهو الدوران حول مبارك و عائلته دونما تماس حقيقى ومباشر

وحتى فى قضية تغيب رجال الامن - وحتى الآن - والذى يعتبر حسب القوانين العسكرية تمردا وخروج على

النظام لم نجد ردا سريعا ولا حتى بطيئا على ذلك التمرد و أكتفوا بوضع المدرعات الثقيلة فى الميادين

والشوارع وتركوا خفافيش الليل تعبث بأمن المواطنين غير عابئين .وأن تدخلوا فى بعض الحالات المحدودة

الأ أن ذلك لم يستمر طويلا ولاحتى القوة المفرطة التى أستعمالها فى بعض الاحيان لم تفلح فى القضاء على

مسلسل أرعاب وتخويف المواطنين والذى يقوم به أفراد جهاز أمن الدولة المنحل وبتخطيط واضح المعالم

وقصده أشاعة الفوضى والخوف فى نفوس الناس من الكتلة الكبيرة الصامته من شعب مصر

و أخيرا رأينا ذلك المرسوم بقانون والذى يحظر التظاهر والاعتصام والوقفات الاحتجاجية وبرغم كل الشروحات

والتطمينات والتبريرات التى تم سوقها لنا الا انه فى النهاية فهو قانون معيب وغاشم وضد أعراف الثورات

ولا يمكن الضحك على الشعب بانه لايمكن تطبيقه الا فى حالات محددة ، وأول من سيطبق عليهم هذا القانون هم

الثوار انفسهم - تذكروا قانون الطوارئ القديم عندما قيل بأنه لن يطبق الأ فى حالات الارهاب والمخدرات -

والبدايات من يوم 9 مارس وأعتقال وتعذيب شباب وشابات التحرير بشكل وحشى ، وكذلك ما حدث فى كلية الأعلام -

كل هذا مؤشرات على تصميم الجيش على تنفيذ ما يريده قادته فقط وليس ما يريده الشعب

وان كافة اللقاءات والتشاورات مع الشباب والاحزاب وغيرهم ما هو الا مرحلة لبث الطمأنينة والهدوء

ولكن مانريده سيكون !!! ، والا لماذا تم رفض تكوين مجلس رئاسى أو أستشارى موسع ويترك له الحكم فى تلك

الفترة الانتقالية وينسحب الجيش بشكل مؤقت ، وأيضا لماذا ذلك البطء المتعمد فى ملاحقة رموز الفساد

أو على الاقل تجميد حركتهم و اتصالاتهم ، ويندرج الأمر نفسه على النائب العام والذى يتضح يوما بعد يوم

بأنه يلبى تعليمات المجلس العسكرى الحاكم ولا يستطيع وكذلك لايرغب فى تجاوزها .

الثورة ملك الشعب وكذلك الارض والوطن وخيراته ملك الشعب ، وأن كان الجيش طلبناه ليكون مؤتمننا على

ثورتنا أذن فليعطى الامانة حق قدرها ، ومن أعطى توكيلا لينوب عنه بأمكانه أن يطالب بألغاء هذا التوكيل

فى حالة ما أذا قام الوكيل بأعمال تضر بمصالح الموكل عنه .

شارك هذه المشاركه


رابط المشاركه
شارك

المرحله القادمه البلد مقبله على فتره صعبه جدا جدا

الرئيس حسني مبارك خارج المساءله القانونيه في كل تصرفاته .

مفروض توقف الحاكمات لحين اعاده الاستقرار بالبلد .

المجلس العسكري امامه مسؤوليات كبيره . وجسيمه .

رئيس الوزرار يلحق علي مين ولا مين

مئات المفات مفتوحــه

بالنسبه للرئيس حسني مبارك فهو خارج المساءله القانونيه في كل تصرفاته .

اخشي ان تنزلق البلد الى المجهول . حفظ الله مصــر

شارك هذه المشاركه


رابط المشاركه
شارك

Join the conversation

You can post now and register later. If you have an account, sign in now to post with your account.
Note: Your post will require moderator approval before it will be visible.

زوار
اضف رد علي هذا الموضوع....

×   Pasted as rich text.   Paste as plain text instead

  Only 75 emoji are allowed.

×   Your link has been automatically embedded.   Display as a link instead

×   Your previous content has been restored.   Clear editor

×   You cannot paste images directly. Upload or insert images from URL.


×
×
  • اضف...