وائل غنيم يفوز بجائزة جون كينيدى الأمريكية للشجاعة السياسية

[se_ Elsyed]

ذكرت العديد من وسائل الإعلام الأمريكية أن وائل غنيم مدير التسويق بشركة جوجل فى الشرق الأوسط، والذى أصبح وجه ثورة 25 يناير فاز بجائزة جون كينيدى السنوية للشجاعة بعد الدور الذى قام به فى الإصلاح الديمقراطى، ودوره فى إلهام حركات مماثلة فى الشرق الأوسط.

وأشار موقع "نيوز داى" إلى أن غنيم سيحظى بهذه الجائزة هو والشعب المصرى، وستقوم كارولين كينيدى أصغر بنات الرئيس الأمريكى الأسبق الذى تحمل الجائزة اسمه بتسليمه الجائزة التى تكرم الشجاعة السياسية فى مكتبة ومتحف كينيدى الرئاسى فى 23 مايو المقبل.

وسيحصل على هذه الجائزة أيضا شخصية أمريكية حاربت الفصل العنصرى، وهى إليزابيث ريدينباو، عضو مجلس إدارة بمدرسة فى ولاية شمال كارولينا.

وجاء فى بيان مؤسسة جون كينيدى: "من مدرسة صغيرة فى ولاية نورث كارولينا إلى ميدان التحرير فى القاهرة، فإن جائزة الشجاعة هذا العام تظهر أهمية أعمال الضمير الفردية، وسواء فازا أو خسرا، فإن غنيم وريدينباو قد نهضا عندما تطلب الأمر ذلك".

وقالت المؤسسة إن غنيم ورفاقه المصريين مكنوا جيلاً جديداً من النشطاء والمواطنين فى جميع أنحاء العالم من اقتناص الحرية، وسيحصل غنيم على هذه الجائزة باسم شعب مصر.

[se_ Elsyed]

طبعاً فجأة سيل من التعليقات الببغائية ..

أه ما هو عشان أمريكي ماسوني

ما هو ابو نسب

في حد أمن الدولة يقبض عليه ويطلع من غير ما ينضرب ولا يتعذب ؟

دي لعبة يابا وده عميل أساساً متدرب في أمريكا دي سي أخت واشنطن دي سي

------------

أول لقاء لي بزملئاي في فرع مصر ... كان من حوالي شهر مثلاً ... وكان يملأني الفخر إني أقابل أبطال ممن شاركوا في الثورة بشكل فعال زيهم زي ملايين المصريين ...

وطبعاً وائل كان زميلنا ... وموتنا كلنا من الضحك على الماسونية وعلى علامة الأسد الماسوني بتاعت ماركة ملابس جواردينو ..

ملحوظة .... من زملائي هؤلاء من ينتمي لجماعة الأخوان ... وأكلوا ضرب بالذات يوم موقعة الجمل .. ومنهم من أصيب بطلقات نارية حية في جسدة ...

يعني لو كان وائل أو غيره ماسوني .. كانوا أول ناس تعرف وتتبرا منه ...

-------

عامةً فعلاً .. لا يضُر السحاب نبح الكلاب ...

لإن زي ما قولنا حتى لو كان وائل ماسوني .. وكان البرادعي مُلحد وعميل لأمريكا وفولتا العُليا .. فيكفي إنهم كانوا من محركي الثورة ....

[hOuSsAm]

الف مبروك لوائل غنيم

وده فخر لمصر ومصريين

واتمنى له التوفيق فى حياته

--------------------------

سؤال كدة يا رياسة على جنب

هو ايه المعايير التى تم عليها الاختيار

بالبلدى اشمعنى وائل غنيم (مش تقليلا منه بالعكس انا بحبه جدا) ولكن بس عشان نفهم الدنيا ماشية ازاى

وهل كان فيه اسماء مرشحة مع وائل ولا ده كان الاسم الاوحد

سؤال كمان هل جاء ترشيح وائل من اى جهة مصرية ولا الجماعة الامريكان اختاروه بذاته

ومرة تانية مبروك لوائل ومن نجاح لنجاح

[hOuSsAm]

أول لقاء لي بزملئاي في فرع مصر ... كان من حوالي شهر مثلاً ... وكان يملأني الفخر إني أقابل أبطال ممن شاركوا في الثورة بشكل فعال زيهم زي ملايين المصريين ...

وطبعاً وائل كان زميلنا ... وموتنا كلنا من الضحك على الماسونية وعلى علامة الأسد الماسوني بتاعت ماركة ملابس جواردينو ..

ملحوظة .... من زملائي هؤلاء من ينتمي لجماعة الأخوان ... وأكلوا ضرب بالذات يوم موقعة الجمل .. ومنهم من أصيب بطلقات نارية حية في جسدة ...

يعني لو كان وائل أو غيره ماسوني .. كانوا أول ناس تعرف وتتبرا منه ...

يبختك باصحابك يعم

مش قولتلنا قبل كدة هجيبلكوا وائل هنا نتعرف عليه ونسلم عليه

ونباركله بالمرة

انا بتكلم بجد ........ فينه ياعم سين سين

[الغريب]

على فكرة هناك كلام غير مؤكد -أكرر- غير مؤكد

أن وائل غنيم هو مؤسس موقع طريق الإسلام islamway

[se_ Elsyed]

بُص يا حسام

أنا ما أعرفش على أي أساس بيمنحوا الجايزة دي

لكن أقرا كده في الخبر

وأشار موقع "نيوز داى" إلى أن غنيم سيحظى بهذه الجائزة هو والشعب المصرى،

وهانروح بعيد ليه ... مش وكالة ناسا للفضاء إختار إسم الشهيدة سالي زهران لتطلقة على أحد مركبات الفاضء التابعة لها

هانيجي نسألهم إشمعنى هي ؟

---------

مش قولتلنا قبل كدة هجيبلكوا وائل هنا نتعرف عليه ونسلم عليه

عرضت عليه يا حسام ورفض للاسف

لإن فعلاً الناس دي لا محتاجه دعاية ولا تلميع ولا حد من الشرفاء اللي بيضحوا من أجل الوطن فقط بيبحث عن شُهرة أو إن الناس تتكلم عنه وعن إنجازاته

هل تتخيل إن حد نازل في ثورة بجد قدام جحافل الأمن والمدرعات .. كان بيفكر في التليفزيون والأخبار ومواقع الإنترنت و و و ؟

لا أعتقد

[ozoozo]

على فكرة هناك كلام غير مؤكد -أكرر- غير مؤكد

أن وائل غنيم هو مؤسس موقع طريق الإسلام islamway

لايفتي وسين سين في الموضوع

هو قال قبل كده ان شركته عندها موقع اسلامي يدار من مصر

هو صاحب وائل

دلوفتي بيقول انه كان شغال في شركته في مصر

اممممممممممممممم؟

[amh]

لا أؤمن بالاتهامات التي ليس لها دليل

حتى و إن وجدت دليلا فلابد أن تتحرى أكثر من مرة حتى تتأكد أن دليلك صحيح

لا أدرى لماذا نحاول التقليل من شأننا وتصغير أدوارنا

إن وائل غنيم وأمثاله الكثر من الشرفاء الذين كانوا سببا بعد توفيق الله فيما نحن فيه الآن

لنا الحق أن يفخر كل مصري بل وكل عربي و لا أبالع إن قلت وكل العالم

أجزم أن القلة القليلة هم أعداء كل نجاح

وأرجو أن تتلاشي هذه الفئة وأن تجلس مع نفسها لحظة صدق وتراجع نفسها

وأدعو أن يكثر الله من أمثال الشرفاء شبابا وشيوخا في بلادنا العظيمة

عاشت مصر حرة .......وعاش شعبها العظيم

[hOuSsAm]

بُص يا حسام

أنا ما أعرفش على أي أساس بيمنحوا الجايزة دي

لكن أقرا كده في الخبر

وأشار موقع "نيوز داى" إلى أن غنيم سيحظى بهذه الجائزة هو والشعب المصرى،

وهانروح بعيد ليه ... مش وكالة ناسا للفضاء إختار إسم الشهيدة سالي زهران لتطلقة على أحد مركبات الفاضء التابعة لها

هانيجي نسألهم إشمعنى هي ؟

---------

مش قولتلنا قبل كدة هجيبلكوا وائل هنا نتعرف عليه ونسلم عليه

عرضت عليه يا حسام ورفض للاسف

لإن فعلاً الناس دي لا محتاجه دعاية ولا تلميع ولا حد من الشرفاء اللي بيضحوا من أجل الوطن فقط بيبحث عن شُهرة أو إن الناس تتكلم عنه وعن إنجازاته

هل تتخيل إن حد نازل في ثورة بجد قدام جحافل الأمن والمدرعات .. كان بيفكر في التليفزيون والأخبار ومواقع الإنترنت و و و ؟

لا أعتقد

طبعا الموضوع مش محتاج ندخل فى جدال عقيم واشمعنى والحجات اللى ملهاش لازمة دى (عن نفس مبسوط انه اخدها) لانه ابسط من كدة بكتير

وطبعا انت فاهم قصد سؤالى ان هو كان ممكن اى حد تانى شارك فى الميدان

بس فى النهاية اللى اقدر اقوله اننا كلنا واحد وسواء وائل غنيم او اسماء محفوظ او احمد ماهر او تيمور او محمد او عيسى او احمد او اى حد اخد الجايزة هنبقى مبسوطين بيه وفخورين ان اسم مصر بيترفع فوق

وبقيت مبسوط اننا بناخد جوايز على اساس الحرية والسياسة والكرامة والعدالة بعد مكنا مزنوقين فى جوايز السينما والكورة

-------------------------

توضيح

بالنسبة لسالى ده كان ترشيح فاروق الباز لانها البنت الوحيدة اللى استشهدت (وده كان تكريم للشهداء كلهم باسم سالى)

[tarek hassan]

الخوف ليس من وائل غنيم

ولكن الخوف من جوائز أمريكا

ورصدها ملايين الدولارات تحت مسمى دعم الديمقراطية

الخوف من المؤتمرات المدعمة من أمريكا وأجنداتها

الخوف من الاستقطابات

إن لم نتنبه

وإن لم يتنبه وائل غنيم أو غيره

عما قليل سيصبح بوقا وستتغير صورته

وطبيعي نظرتنا إليه ستتغير

قالثورة كانت رغم أنف أمريكا التي دعمت النظام السابق وجعلته جاثما على صدورنا 30 عاما

ووائل غنيم يعتبر قليل الخبرة وكان هذا ظاهرا في تصريحاته أثناء الثورة فلابد من الحذر

وطيب ليه مثلا لم تخصص الجائزة لشهداء الثورة

هم أولى إن كانوا صادقين

تم تعديل 23 مارس 2011 بواسطة tarek hassan

[se_ Elsyed]

مش موقع إسلام واي

لكن موقعنا هو

نداء الإيمان

[أحمد سيف]

عامةً فعلاً .. لا يضُر السحاب نبح الكلاب ...

لإن زي ما قولنا حتى لو كان وائل ماسوني .. وكان البرادعي مُلحد وعميل لأمريكا وفولتا العُليا .. فيكفي إنهم كانوا من محركي الثورة ....

انت كده جبت الخلاصه