fatfouta بتاريخ: 23 فبراير 2011 تقديم بلاغ مشاركة بتاريخ: 23 فبراير 2011 بعد سقوط النظام ومن اول يوم بعد مبارك ونظامه لقينا الشباب فى منتهى الجدية والحماس والكل كان واقف ينظف الميدان ويهتم بيه و انشأ الشباب حملات كثيرة عالفيس بوك مثل معا ننظف القاهرة حملة تنظيف امبابة حملة تنظيف الظاهر وغيرها من الحملات مثلا فى كفر الشيخ قاموا شباب وفتيات المدينة بتنظيف الشوارع والميادين واعادة تلوينها سمعت علاء الاسوانى بيحكى لمحمود سعد ويقوله كنت واقف فى ميدان التحرير ايام التظاهرات كان معايا علبة سجاير فى ايدى وفضيت قومت راميها فى الشارع جمبى وبعد دقيقتين لقيت سيدة عجوز عمرها يتعدى السبعين عاما بتقولى...حضرتك استاذ علاء؟؟ رد عليها قالها وهو بيبتسم ايوه انا وبيقول بعد مارحبت بيا وخلصت الكلام قالت لى....ممكن تودى علبة السجاير دى هناك كده وشاورت بايدها...لان احنا عاملين سلة مهملات كبيرة للحاجات دى!!! بيقول اتكسفت من نفسى وقلت لها حاضر واخدت العلبة ورميتها فى السلة رواية تانية من خالد يوسف بيقول فيها ساعة حريق المتحف المصرى قعدت اصرخ على كل المحطات واقول الحقوا المتحف بيولع وفجأة بعد نص ساعة لقيت الشباب والرجال بيكونوا لجان لحماية المتحف من السرقة بأجسادهم وهما عُزل من غير سلاح ضد البلطجية بيكمل ويقول...بعدها اطمنت ولما خلصنا قولت اروح بقى واخدتها مشى من ميدان التحرير لبيتى فى المهندسين وانا ماشى فى طريقى عند الاوبرا كده لقيت واحد جاى بيجرى جااااامد وبينهج ووقف ادامى وقالى انت خالد يوسف؟؟ ابتسمت وقلت ايوه سألته وقلتله مالك بتجرى كده ليه فى بلطجية بيجروا وراك رد الراجل قال لأ ده انا جاى عشان احمى المتحف المصرى قلتله...ياعم ما خلاص البركة فى الشباب رد الراجل... قالوا معلش اصلى جاى باجرى من الهرم بيقول مشيت وسيبته وانا مش مصدق وبقول ياااااااااه يعنى انا مستبعد المسافة للمهندسين اومال ده بقى اللى جاى جرى من الهرم عشان يحمى بلده المهم النهاردة شوفت صورة جميلة جداااا كانت تاهت عننا فى الزحمة وهى الطابور المنظم للناس اللى عاوزين يركبوا الميكوباصات زمان وانا بشتغل كنت بشوف الطابور ده عند موقف ميكروباصات الهرم فى عبد المنعم رياض لكن مع زحمة القاهرة والفساد اللى حل علينا من النظام الساقط الناس كلها نسيت الحاجات دى والكل بقى يخبط فى بعضه عشان يلحق ويقول ياللا نفسى وخلاص الصورة اهى شوفوا المنظر الجميل بجد والله فرحت جدا ان احنا بقينا ايد واحدة وان فعلا معدننا اصيل بس كان عاوز يصقل شويتين من تراب النظام الفاسد أنا عملت التوبيك ده عشان كل ماهنشوف سلوك جميل من سلوكياتنا بعد الثورة نجيبه ونشوفه مع بعض ونفرح كمان مع بعض وهحاول اجيب لكم صور حملات النظافة فى محافظات مصر المختلفة وياريت تساعدونى عشان نوثق ثورتنا وسلوكياتها ومابعدها من سلوكيات جميلة ان شاء الله رابط هذا التعليق شارك المزيد من خيارات المشاركة
pink rose بتاريخ: 23 فبراير 2011 تقديم بلاغ مشاركة بتاريخ: 23 فبراير 2011 فكرة التوبيك جميلة يا فتفوتة احييكي عليها رابط هذا التعليق شارك المزيد من خيارات المشاركة
fatfouta بتاريخ: 23 فبراير 2011 كاتب الموضوع تقديم بلاغ مشاركة بتاريخ: 23 فبراير 2011 فكرة التوبيك جميلة يا فتفوتة احييكي عليها ربنا يخليكى يا ام مريومة ايدك معانا بقى هاتى الحملات من عالفيس بوك بما انك خبيرة فيه هاتى لنا الصور والحملات المختلفة هنا عجبتنى جداااا حملة شباب امبابة لانهم كمان جابوهم فى التليفزيون وكان منظرهم جميل فعلا يعنى فيه شارع اسمه شارع الجامع ده كانوا بيصورا فيه والله مش ممكن بجد اللى الشباب عاملينه فعلا احنا محتاجين مشروع قومى لشبابنا وياريت يكون هو انه نتطور وننطف مصر رابط هذا التعليق شارك المزيد من خيارات المشاركة
fatfouta بتاريخ: 23 فبراير 2011 كاتب الموضوع تقديم بلاغ مشاركة بتاريخ: 23 فبراير 2011 حملة إبدأ بنفسك وبنات الحملة اللى بينظفوا الشوارع بعد الثورة هو مين الرئيس اللى قال اول مرة اشوف شعب يعمل ثورة وبعد ماتنجح......تانى يوم ينظف الشوارع ؟؟؟ رابط هذا التعليق شارك المزيد من خيارات المشاركة
fatfouta بتاريخ: 23 فبراير 2011 كاتب الموضوع تقديم بلاغ مشاركة بتاريخ: 23 فبراير 2011 شباب محافظة الشرقية يستيبوا لحملات تنظيف المدينة وده كان يوم 14 فبراير عملوها لمدة اسبوع عشان ينظفوا المدينة بأكملها وهيجددوها تانى ان شاء الله رابط هذا التعليق شارك المزيد من خيارات المشاركة
تامر مصطفى بتاريخ: 23 فبراير 2011 تقديم بلاغ مشاركة بتاريخ: 23 فبراير 2011 بنتي فرح عمرها 8 سنوات اتولدت واتربت في الكويت كانت كل صيف لما نروح مصر تفضل تكرر عليا مجموعة اسئلة هي ليه الناس في مصر مش بتحب النظافة؟ وليه مش بيحطوا صناديق الناس ترمي فيها؟ بصراحة مكانش بيبقى عندي رد يقنعها فطول الوقت احكي لها عن مصر وحضارتها وجمالها وعن كل شيء جميل فيها ولكن مجرد نزولنا نتمشى في وسط البلد احس ان كل اللي قلته ليها فقد مصداقيته عندها بعد ثورة 25 يناير وشافت الناس بتنظف الشوارع اول حاجة نطقت بيها انا فرحانه اوي يا بابا انا استغربت قالت لي علشان الناس هتبقى نضيفه ومصر هتبقى حلوة ومش هتكسف من صحباتي اللي دايما يعيبوا على مصر ويقولوا شوارعها مش نضيفة كنت عايز اقولها اني اتمنى ان ارى النظافة في كل سلوكيات الشعب المصري النظافة في الاخلاق والسلوكيات هي اللي توصلنا للرقي هي اللي تخلينا نخرج من عصور التخلف والجهل ونرجع تاني رواد في كل حاجة رابط هذا التعليق شارك المزيد من خيارات المشاركة
عبد الله غريب بتاريخ: 23 فبراير 2011 تقديم بلاغ مشاركة بتاريخ: 23 فبراير 2011 الله .. جميل بجد ربنا يديم الحماس ده عليهم .. و علينا .. آمين يا رب نفس الحماس ده يتنقل لكل القطاعات زي التعليم و غيره، و كل شئ ينضف و يبقى منظم و ترجع مصر أحسن بلد. http://www.youtube.com/watch?v=zenFkWcy4Os http://www.youtube.com/watch?v=PUhHj8it2Pk&feature=player_embedded رابط هذا التعليق شارك المزيد من خيارات المشاركة
Ahmed Anwer بتاريخ: 23 فبراير 2011 تقديم بلاغ مشاركة بتاريخ: 23 فبراير 2011 فعلا ،،، موضوع الشباب اللي بينضفوا القاهرة بقي منتشر جدا و ملحوظ لولا الإحراج كنت وقفت صورت و نزلت الصور بس حسيت لو صورتهم هأحسسهم إنهم فرجة مدينة نصر بالذات ،،،،، أعداد كبيرة جدا و كل يوم و منطقة النزهة الجديدة ،،، الشباب فيها برده نفس النظام رابط هذا التعليق شارك المزيد من خيارات المشاركة
pink rose بتاريخ: 23 فبراير 2011 تقديم بلاغ مشاركة بتاريخ: 23 فبراير 2011 فعلا ،،، موضوع الشباب اللي بينضفوا القاهرة بقي منتشر جدا و ملحوظ لولا الإحراج كنت وقفت صورت و نزلت الصور بس حسيت لو صورتهم هأحسسهم إنهم فرجة مدينة نصر بالذات ،،،،، أعداد كبيرة جدا و كل يوم و منطقة النزهة الجديدة ،،، الشباب فيها برده نفس النظام بالعكس يا استاذ احمد يا ريت حضرتك تتكلم معاهم و تستأذنهم انك تصورهم عشان تنشر صورهم عشان العالم كله يعرف اد ايه شباب مصر بيحبوها و عاوزينها جميلة هما مش فرجة هما فرحة كبيرة لينا كلنا رابط هذا التعليق شارك المزيد من خيارات المشاركة
fatfouta بتاريخ: 23 فبراير 2011 كاتب الموضوع تقديم بلاغ مشاركة بتاريخ: 23 فبراير 2011 رابط هذا التعليق شارك المزيد من خيارات المشاركة
Simba بتاريخ: 23 فبراير 2011 تقديم بلاغ مشاركة بتاريخ: 23 فبراير 2011 الحملات دي كويسة وكل حاجة ومحدش يقدر يعترض عليها وصورة جميلة لشباب البلد بس لحد امتي احنا عادة بياخدنا الحماس شوية لشئ وبعدين بيقل بسبب مشاغل الحياة الشباب لسه في نشوة النصر ونشوة التغيير طيب بعد سنة هنلاقي برضه الشباب بتنزل وتتنضف ولا الحماس هيقل بصراحة مع احترامي الشديد جدا وتقديري لكل حاجة بيعملوها علشان خاطر البلد بس نضافة البلد دي مسئولية اساسية من الدولة احنا دورنا اننا ما نرميش ونبهدل الشوارع وعلي قد ما نقدر نحافظ عليها لكن الدولة دورها اهم في توفير كل حاجة من عمال نظافة وصناديق قمامة في كل شارع حتي الاحياء الشعبية والقري ويكون فيه اشراف حقيقي ومحاسبة اي تقصير وشكل البلد عمره ما هيكون حضاري وفيه عربيات من اربعين سنة ماشية فيها هما مش هيرفعوا الجمارك بتاعتها بقي كلام حسام follow me رابط هذا التعليق شارك المزيد من خيارات المشاركة
Ahmed Anwer بتاريخ: 23 فبراير 2011 تقديم بلاغ مشاركة بتاريخ: 23 فبراير 2011 هيا الفكرة بس عايز أوضح للأخوة المغتربين إن المنظر ده بقه مألوف فعلا في القاهرة علي الأقل اللي عايش فيها مش مجرد صفحة علي الفيس بووك أو تصوير في أغنية أو لقطة في قناة فضائية لأ ده بقه منظر بنشوفه كل يوم رابط هذا التعليق شارك المزيد من خيارات المشاركة
Ahmed Anwer بتاريخ: 23 فبراير 2011 تقديم بلاغ مشاركة بتاريخ: 23 فبراير 2011 هيا الفكرة بس عايز أوضح للأخوة المغتربين إن المنظر ده بقه مألوف فعلا في القاهرة علي الأقل اللي عايش فيها مش مجرد صفحة علي الفيس بووك أو تصوير في أغنية أو لقطة في قناة فضائية لأ ده بقه منظر بنشوفه كل يوم بنات و أولاد زي الورد للأمانة معظهم في سن المراهقة و الطفولة أكثر منهم في سن الشباب رابط هذا التعليق شارك المزيد من خيارات المشاركة
لماضة مصرية جدا بتاريخ: 23 فبراير 2011 تقديم بلاغ مشاركة بتاريخ: 23 فبراير 2011 السلام عليكم و رحمة الله و بركاته عارفة يا فتافيتو....فيه ناس كتيرة قالت دي ولادة جديدة....و ده المصري الجديد و انا جوايا كنت دايما بقول احنا كده من زمان.....من زمان اوي لو فتشتي جوه كل حد فينا هتلاقي مين فينا مكنشي نفسه انه ينزل و ينضف الشارع اللي ساكن فيه مين فينا مكنشي جواه مشروع...حلم صغير بيحلم بيه....بس اللي حواليه دايما يقولوه انت بتتكلم في ايه.....و فوقي من دنيا الاحلام...و انزلي للواقع مين فينا.....مهما سافر و شاف في الغربة....مكنتش مصر بتوحشه...بتوحشه اوي....بكل قسوتها...بكل وجعها....برضه بتوحشه احنا متولدناش من جديد...و لا احنا المصريين الجداد احنا كنا بطلنا نحلم.....نحلم الاحلام الصغيرة اوي....المشروعة اوي.... كنا بطلنا نصدق كنا بطلنا....نتصالح مع روحنا التلوث مكنشي هوا و لا ميه....دي كان قلب اتلوث لانه بطل يحلم...و بطل يصدق يسمع صوت ضميره في لحظة....الايدين اتشدت....و الروح اتصالحت....و رجعنا نحلم تاني اعرف اصدقاء كتير بيحكولي علي موضوع النضافة ده..... اللي مصدقاه جوايا....مش بس انهم نضفوا الشوارع.....هما ابتدوا يحسوا ان مصر بقت بيتنا....بتاعتنا....الحتة الحلوة اللي هتفضل و تكبر بينا موضوعك حلو يا فتفتوتة.....زي طاقة النور....اللي هنبص منها علي كل خير و جمال و يوم ما نتوه....و لا نشك...و لا نبطل نحلم هنيجي هنا نشحن بطارية قلوبنا....و نرجع نكمل تاني مسااااكي و صباحك...قلب مصري نضيف....اوي رابط هذا التعليق شارك المزيد من خيارات المشاركة
fatfouta بتاريخ: 23 فبراير 2011 كاتب الموضوع تقديم بلاغ مشاركة بتاريخ: 23 فبراير 2011 شباب المحلة الكبرى يستجيبوا لحملات النظافة رابط هذا التعليق شارك المزيد من خيارات المشاركة
باهى الطائر الحزين بتاريخ: 23 فبراير 2011 تقديم بلاغ مشاركة بتاريخ: 23 فبراير 2011 صوره مضيئه لشباب مصر الجميل كنت فى حى الزمالك بجوار برج ام كلثوم،وتوقفت بسيارتى فى مكان عليه لافته ممنوع الانتظار وما كدت ابطل المحرك واغلق النوافذ،حتى وجدت شاب جميل فى العقد الثانى من عمره،حيانى بأدب ثم قال لى (ماتجى مانركنش فى الممنوع علشان ما نعملش زحمه ونعطل غيرنا،وكمان بلدنا تبقى جميله) بادلته التحيه بأبتسامه،ثم اشعلت محرك سيارتى ورحت ابحث عن مكان للانتظار،ولم اتكلف شئ سوى اننى مشيت على قدمى 200 متر بعد ان ركنت فى المكان الصحيح. واليوم وانا عائدا من مدينه 6 اكتوبر بالتحديد فى ميدان الرمايه اول الهرم،وجدت ثلاث شباب جمال كلٌ منهم يحمل لافته لا تتعدى 30 سم طولا وعرضا،وقد كتب عليها عباره جميله ويلوح بها للماره احدهم كتب (المصرى مايدفعش رشوه)والثانى كتب (مش حنرمى حاجه على الارض صح)،والثالث كتب عبارة (لو بتحب مصر خلى سلوكك بحجم حضارتها) كم اسعدنى ان ارى مثل هؤلاء الشباب،لوحت لكلٌ منهم بالابهام مبتسما،وبادلونى التلويح والابتسام،كم انا سعيدا بهم جدا جدا جدا.حد السماء حد الاعتراف بالجميل هؤلاء هم اصحاب الثوره البيضاء الذين دفعوا دمائهم الطاهره الذكيه ثمناً لها،ونحن نشاركهم شرف لا نستحقه اقصد جيل العقدين من الستون وحتى نهاية السبعون،بل كنا نتهمهم بعدم المبالاه والسطحيه. من هنا،ومن حيث اكون،اعظم لهم تقديراً واحتراماً وعرفانا بالجميل،فلو ان هناك شئ يدعى راية الحريه فمن زرع قطنها ثم فتل خيوطها ثم نسجها ثم صبغها ثم حاكها ثم رفعها،فهم شباب مصر العظماء،تحيه لهم وكل الشرفاء وكالريح لا يركن إلي جهه إلا وهيأ لأخري راحله ... رابط هذا التعليق شارك المزيد من خيارات المشاركة
raouf بتاريخ: 23 فبراير 2011 تقديم بلاغ مشاركة بتاريخ: 23 فبراير 2011 دى احلى صورة شوفتها فى مصر بعد الثورة يا ترى ممكن نتعود ان نشوف صورة زى دى ؟ قولوا يا رب طبعا اللى مش واخد باله فيه ايه فى الصورة الميكروباص مش واقف فى الشارع الناس واقفة طابور علشان يركبوا بالدور الصورة فى موقف حلوان المرج إذا مــات الـسـيـد فـأقـتــل حـتـى كـلبــه لأنــه لــن يــكـون وفيـا لـغير سـيـده الأول اذا جالست الجهال فانصت لهم واذا جالست العلماء فانصت لهم فان فى انصاتك للجهال زيادة فى الحلم وفى انصاتك للعلماء زيادة فى العلم رابط هذا التعليق شارك المزيد من خيارات المشاركة
se_ Elsyed بتاريخ: 23 فبراير 2011 تقديم بلاغ مشاركة بتاريخ: 23 فبراير 2011 وفجأة بعد نص ساعة لقيت الشباب والرجال بيكونوا لجان لحماية المتحف من السرقة بأجسادهم وهما عُزل من غير سلاح ضد البلطجية لسه عارف أول أمس إن زملاءنا في فرع مصر كانوا في المظاهرات م أول يوم .. وأول ما سمعوا الهجوم على المتحف ... سارع البعض منهم لحماتيه باجسادهم .... وأصيب واحد مهندس بطل وأسد برصاصة في قدمه وبسكينة في وجهه ... ملحوظة : كتير من مهندسينا هناك بيعملوا في الدعم الفني لموقع إسلامي شهير تملكه شركتنا كصدقة جاريه .. وما شاء الله عليهم متدينين يعني وحاجه محترمة ... تخيلوا بقى لا حد فيهم قال متحف إيه يا عم دول كفره ولا دي أصنام أو خليني للتقيلة وسيبك من الحاجات الهايفه دي ... طبعاً كنت متلهف أجلس مع بعض من شاركوا منهم في الثورة ..... وحدث بالفعل أول أمس أثناء زيارتهم للسعودية وهم 3 ... رئيس مجلس الادارة وإتنين دكاترة في كلية الهندسة وشغالين معانا شيء يا جماعة مُشرف وشيء يدعو للفخر .. ناس برضوا لا محتاجه ولا بيعانوا من مشاكل مادية ولا إقتصادية ولا ولا ولا ... ومع ذلك كانوا هناك من أول يوم بيحكوا لي بقى عن أولادهم وعن مشاركاتهم في تنظيف شووارع مصر ... بالله عليكم . فاكرين انا حكيت إيه عن زيارتي لمصر قبل الثورة بإسبوع بالظبط وإتضايقت إني اجد حوالين شركتنا اللي في مدينة نصر اكوام زبالة مالهاش حل و و و بياكدوا لي الان إن الدنيا إتغيرت .. وباختصار الناس بقت حسه إن دي بلدهم وإنه لما بينضف الشارع بيبقى كأنه بينضف بيته ----------- بصوا المكافاة بقى والله والله هذا حدث بالحرف .... اول أمس . بنتعشا سوا في مطعم بشارع التحلية .. وخارجين من المطعم احنا الاربعة .. إلا وسيارة أمام المطعم فيها شباب سعوديين وشكلهم سمعونا بنتكلم وعرفوا إننا مصريين من اللهجة .. وفجأة .... هتاف باعلى صوت مع كلكسات السيارة : المصريين أهما .. الرجالة أهم وحاجه كده شبه الزفه امس كنا معزومين عند صاحب الشركة .... ومش عاوز اقول لكم .. جمع عائلته كلها عشان يحتفي بينا ويسمع مهم ... وحجم حفاوة غير مسبوق بالرغم من إننا مع بعض من سنوات طويلة ... لكن هذه المره مختلفة تماماً الأحـــرار يؤمنون بمن معه الحق .. و العبيــد يؤمنون بمن معه القوة .. فلا تعجب من دفاع الأحرار عن الضحية دائماً .. و دفاع العبيد عن الجلاد دائماً رابط هذا التعليق شارك المزيد من خيارات المشاركة
fatfouta بتاريخ: 23 فبراير 2011 كاتب الموضوع تقديم بلاغ مشاركة بتاريخ: 23 فبراير 2011 سمبا..... ردا على كلامك قريت امبارح لشخص عزيز عليا تعليق لذيذ جدااا بيقول مالبلد ماشية اخر حلاوة اهى من غير ريس...هو احنا ناقصين مصاريف وخلاص :) طبعا هظار يعنى مش كلام حقيقى رابط هذا التعليق شارك المزيد من خيارات المشاركة
تامر مصطفى بتاريخ: 23 فبراير 2011 تقديم بلاغ مشاركة بتاريخ: 23 فبراير 2011 سمبا..... ردا على كلامك قريت امبارح لشخص عزيز عليا تعليق لذيذ جدااا بيقول مالبلد ماشية اخر حلاوة اهى من غير ريس...هو احنا ناقصين مصاريف وخلاص :) طبعا هظار يعنى مش كلام حقيقى احنا بس محتاجين ريس في حاجة واحدة بس لما نحب نبعت حد يجيب لنا اي حاجة من برة مصر نلاقي واحد فاضي رابط هذا التعليق شارك المزيد من خيارات المشاركة
Recommended Posts
انشئ حساب جديد أو قم بتسجيل دخولك لتتمكن من إضافة تعليق جديد
يجب ان تكون عضوا لدينا لتتمكن من التعليق
انشئ حساب جديد
سجل حسابك الجديد لدينا في الموقع بمنتهي السهوله .
سجل حساب جديدتسجيل دخول
هل تمتلك حساب بالفعل؟ سجل دخولك من هنا.
سجل دخولك الان