اذهب الي المحتوي
إنشاء باب جديد بعنوان سد النهضة الإثيوبي لكل الموضوعات المتعلقة بسد النهضة ×

مغامرات كليو هانم أفنظيم فى إسطنبول


Recommended Posts

السفر للخارج متعة حقيقية... و خاصة لو كان من أجل السياحة و الفسحة و قضاء وقت ممتع...

فعنما تسافر للخارج للسياحة... يجب أن تحدد هدفك من زيارة البلد.. يعنى شوبنج؟؟ ولا sight seeing?? ولا سباحة و استجمام؟؟

أنا كإيجيبشان مدمنة Sight seeing و أعشق السفر للخارج خاصة لو كان فى بلاد بحر متوسطية حيث أشعر أن روحى تنتمى للبحر المتوسط و ليس للعرب أو الفراعنة...

ولقد من الله على بزيارة أربعة دول للسياحة (عقبال الحج اللهم آمين)... و هى فرنسا.. إيطاليا.. إسبانيا و أخيرا تركيا.

و كل دولة من هذه الدول كانت ذات طابع خاص و مذاق خاص... ولها متعة خاصة..

ومع ذلك... لم تصادفنى فى أى منها مفارقات تذكر كتلك التى صادفتنى فى إسطنبول...

للأخوة المصابين بضغط الدم و السكر و قرحة المعدة و المرارة الامتناع عن قراءة الموضوع..

الأخوات الحوامل... هذا الموضوع له مضاعفات جانبية تضر الأم و الجنين..

برجاء ربط الأحزمة و الامتناع عن التدخين...

توكلنا على الله.. n2&(

رابط المشاركه
شارك
  • الردود 148
  • Created
  • اخر رد

Top Posters In This Topic

منذ حوالى عامين.. أعلنت الشركة عن تقديم رحلة ترفيهية "كنوع من الحوافز" للعاملين فى بعض الأقسام منه القسم الذى أعمل به..

و كانت رحلة لمدة 5 أيام فى أسطنبول..

كنت قد قرأت كثيرا عن إسطنبول و سمعت عنها النوادر و الحكايات ممن زاروها... و خاصة من شقيقتى التى قضت بها شهر العسل و ترددت عليها غير مرة..

هذا إلى جانب ما تحمله إسطنبول فى عقل ىالباطن من عبق التاريخ و روح الشرق و ذكريات الإمبراطورة العثمانية...

فمنيت نفسى بسفرية العمر... و الsight seeing و زيارة المساجد الأسطورية الشهيرة مثل السلطان أحمد و أيا صوفيا و قصر السلطان العثمانى "التوب كابه"

و أخذت أحلم بالشوبنج الرائع... و قلت لنفسى خلاص يا بت هاتتكسى و تبان عليكى النعمة بدل الهلاهيل اللى الواحده بتجيبها من هنا و بالشىء الفلانى..

و أخيرا جاء اليوم المشئوم.... قصدى الموعود....

رابط المشاركه
شارك

كان المففروض إن الطيارة تقوم يوم الأرع (يوم الأربع ده عادة يوم النحس العالمى بالنسبة لى)... يعنى كان لازم أكون فى المطار فجر الأربع حوالى الساعة 5:30 . يعنى لازم أنزل من البيت حولى الساعة 5:00... و ده معناه إنى لازم أكون صاحية من حوالى الساعة 3:00.

و بما إنى إستحالة أنام قبل الساعة 12:00 فده معناه معناه إنى أدخل أنام 12:00 على ما يكبس على النوم تبقى 12:30 يبقى يااا دوب هانام ساعتين و نص و ده شىء متعب جدا و هاقوم تعبانة و مقريفة و خصوصا إنى مبعرفش أنام فى الطيارات... و معنديش استعداد أضيع اليوم الأول من سفرية العمر فى النوم... ده هم كللهم 5 أيام... الواحدج يلحق يشوف فيهم إيه؟؟؟ n2&(

قلت يا بت يا كليو... مافيش فايدة.. لازم تطبقى (يعنى أوصل يومين ببعض من غير نوم)

و طبعا بما إن التلات يوم عمل ... و بما إنه كان آخر يوم قبل السفرية... فكان يوم مشحون جدا و حاجات كتير لازم تخلص قبل ما نمشى....

فعشان توصلله باليوم اللى وراه... كان فعلا كتير أوى...

رابط المشاركه
شارك

طبعا كان المفروض أفضل سهرانة لحد ما ييجى وقت الرحيل... فقعدت على الإنترنت أتشات مع بعض أصدقائى من أمريكا اللاتينية لأن فرق التوقيت بيخلليهم أونلاين فى الأوقات المتأخرة هنا..

فى نص الليل جعت.... shn::

تاكلى إيه يا كليو.... تاكلى إيه يا كليو...

قمت قليت بيضة و حضيت عليها حتة جبنة شيدر فى نص رغيف شامى... و حااااااااااااجة إييييييييه.... هنا

(للعلم... أعانى من القولون العصبى و كتر البيض مش كويس عشانى) smk:

أخيرا اقتربت الساعة المنتظرة وحان وقت الرحيل.... راجعت على شنطتى قبل ما أقفلها و إحساس غريب إنى ناسية "حاجة مهمة"...

أراجع شنطة الهندوم.... تمام

أراجع شنطة إيدى.... تمامين

بس فيه حاجة ناقصة...!!! n2&(

- ماما... فيه حاجة ناقصة...

(ماما راجعت عالشنطة... كله تمام)

- لأ... مفيش حاجة ناقصة توكلى على الله كله تمام

- ماما.... حاسة إنى هايجيلى مغص

- لأ لأ... بيتهيألك... ده قلق قبل السفر... توكلى على الله

- يعنى خلاص؟؟؟ أقفل الشنطة و أنده بابا ييجى يشيل؟؟

- توكلى على الله

أشحت بوجهى ناحية باب الغرفة و فتحت فمى من الودن دى للودن دى عشان أنده بابا ييجى يشيل الشنطة......

قبل ما أنطق حرف واااااااااااااااااااااااااحد......

النور اتقطع...!!!! shn::

تم تعديل بواسطة Cleo
رابط المشاركه
شارك

الأخت كليو,

يبدوا أن الأسطوانة كانت مشروخة,

و طلت تردد, و تردد, و تردد.

ثم عادالإرسال, و لكن توقف مرة أخرى لإنقطاع التيار الكهربائئ.

ماذا فعلت فى دنياك, لكى يحدث ذلك لك فى ليلة سفرك؟

سنجد الرد على ذلك فى الحلقة التالية.

و الآن..... إعلان .. كيف تسافر و أنت مستريح؟؟ n2&( shn::shn::

رابط المشاركه
شارك

قلت بس.... هى سفرية باينة من أولها...

- أستنى النور لما ييجى يا ماما عشان ننزل فى الأسانسير ؟؟

- لأ لأ ... لإرضى النور فضل مقطوع ساعة مثلا؟؟؟ تت أخرى على ميعاد الطيارة؟؟؟ توكلى على الله

- بابا.... ياللا ننزل... ممكن لو سمحت تيجى تشيل معايا الشنطة ؟؟

(بابا قعد "يتمتم" بحاجات كدة مفهمتهاش نظام العيش و العيشة و اللى عايشينها)

و بينى و بينى الراجل عنده حق...

المهم أبويا المسكين شال الشنطة و أنا ماشية وراه ماسكة شمعة فى مهب الريح... و نزلنا عالسلم...

تسعة أدوار...

لحد ما وصلنا الشارع....

أول ما وصلنا الشارع....

النوووووووور جه...!!! n2&(

رابط المشاركه
شارك

المهم..

ركبنا العربية... و احنا فى الطريق...

النبوءة اتحققت...

حسيت بمغص (فاكرين البيضة؟؟)

و بدأ المغص يتزايد...

- بابا.... شهل شوية..!!!!

- يعنى أشهل يعنى أعمل إيه؟؟؟ أطير؟؟ n2&(

(المغص يتزايد....)

المهم وصلنا الباركنج بتاع المطار... بابا كالعادة ينقى أبعد حتة و يركن فيها..

(هاموت shn:: )

نزلنا من السيارة و أنا بجرى عايزة ألحق أوصل المطار smk:

دخلنا صالة المغادرة... مالقيناش أى حد من زمايلى..!!!

حاجة غريبة..!!! 300 بنى أدم أنا أول واحدة أوصل فيهم؟؟

بصيت على اللوحة اللى بتبين الرحلات.. مالقيتش رحلتنا..

(المغص بيقطع فى بطنى...)

رحت الاستعلامات..

- لو سمحت الطيارة AMC اللى رايحة اسطنبول ميعادها إمتى؟؟

- أسطنبول؟؟؟ مفيش طيارات هنا بتطلع إسطنبول.. إنتى متأكدة إنه المطار الجديد مش القديم؟؟

shn::

رابط المشاركه
شارك

بابا قعد يتمتم بكلمات يحاسب عليها الشرع و القانون (ربنا يغفرله) n2&(

ركبنا العربية تانى متجهين ناحية المطار القديم

(فعلا كنت هايغمى على من شدة المغص)

وصلنا المطار القديم...

مش عارفين نركن فين؟؟؟ هو الاتجاه ده صح ولا مخالف؟؟ نركن صف تانى

(طبعا بابا ولا على باله و لا حاسس باللى أنا فيه... cbyb: )

أخيرا... لقينا مكان نركن..

نزلنا الشنطة و دخلنا المطار..

فى صالة المغادرة لقيت ييجى 50 من زمايلى..

بابايا حبيبى و أنا بنته حبيبته و هاسافر و أسيبه 5 أيام فى الغربة..

قعد ماسك فيا و يدينى نصايح و يودعنى...

أول ما لقيت زميلتى اللى هاتقعد جنبى فى الطيارة... فللت إيديى من إيد بابا و سبته بيكلمنى و جريت على زميلتى رميتلها شنطتى و رحت جرى عال... shn::

المهم.. بعت واحد كير سيرفس من المطار يروح الصيدلية و يجيبلى علبى فلاجنتيل... و كلله بقى تمام

رابط المشاركه
شارك

المهم... بدأ الزملاء فى التوافد... الصالة ضاقت علينا جدا...

زهقت...

أنا بكره الزحمة موت...

قلت خلاص... أعمل بوردنج.. n2&(

عملنا بوردنج و أصبحنا خارج حدود مصر... يعنى ما ينفعش نرجع تانى..

قلنا الطيار كان ميعاده الساعة 7..

الساعة 7... 7:30.... 8:00....

- الله... فيه إيه؟؟؟ احنا مش هانسافر وللا إيه؟؟

- أصل فيه زملاء عندهم مشاكل فى السفر

- مشاكل إيه كفى الله الشر؟؟

- أصل فيه 5 من زمايلنا نسيول تصاريح السفر الخاصة بهم فى شنط سفرهم اللى اتشحنت بالفعل على الطيارة.. و هانضطر نستنى لما ينزلو كلللللللللل الشنط من عالطيارة و يشوفوا شنطهم فيه و يفتحوها و يطلعوا منها التصاريح و كدة...

(وش واحد هايغمى عليه من التعب)

رابط المشاركه
شارك

الساعة 11:00 الطيارة بدأت تتحرك...

طبعا بعد كل التاريخ الأسود ده للسفرية... طبيعى الواحد حط إيده على قلبه و ندم إنه ماكتبش الوصية قبل ما يسافر...

و قعد أتخيل ماما... و بابا.. و بنات أختى... و أختى... و بيتنا...

و أحاول أغمض عينى على صورهم عشان يمكن تبقى أخر حاجة أشوفها..

بعد ساعة و 25 دقيقة أعلنوا إن الطيارة وصلت مطار صبيحة (صبيحة دى تبقى بنت كمال أتاتورك بالتبنى و أول تركية تحصل على شهادة فى الطيران... الأول كنت فاكرة إنه اسم واحد قاعدة على صينية جبنة قريش فى ميدان الجامع)

رابط المشاركه
شارك

ماصدقتش إن إحنا وصلنا إسطنبول من غير مشاكل... خلصت إجراءات الدخول و خنك الباسبور و كدة و دخلت على السير أستنى الشنطة بتاعتى..

1/2 ساعة... شايفة كل زملائى بيستلموا شنطهم و ينطوا فى الأوتوبيس...

لحد لما المطار ماعادش فيه غير أنا و ييجى كمان 10 زمايلنا من أصل 300..

بدأت أقلق... الشنطة فين؟؟

المهم أخيرا لقيت حاجة لونها رمادى نازلة من عالسير فى حالة مزرية..!!!!

شنطتى...!!!! shn::

الشنطة كانت كفتة... و فيها شق فى الخياطة بتاعتها داير مايدور تلتين الشنطة...

أتارى البهوات فى مطار القاهرة لما جم ينزلوا شنط زمايلنا اللى نسيوا التصريحات من الطيارة.. مانزلوش الشنط على سيور...

حدفوها من فوق الطيارة فوق بعض... n2&(

المهم المرشد اللى معانا قاللى روحى مكتب الأمن و اعملى محضر...

رحت أعمل محضر.. عملولى المحضر...

و قالولى... بس خللى بالك إنتى جاية على طيارة تشارتر.. و الطيارات التشارتر مش بيكونوا مأمنين على الأمتعة...

(يعنى أبل المحضر و أشرب ميته) shn::

رابط المشاركه
شارك

طلعنا الأوتوبيس... و فضل المرشد يكلمنا عن أهم معالم أسطنبول..و العملة و تغيير العملة... إلخ.

أخيرا وصلنا الأوتيل و أنا و صديقتى استلمنا غرفتنا...

شوية و لقيت أفواج من زمايلناالسواح جايينمن كل فج عميق يتفرجوا على شنطتى...!!!

(و أنا بغبائى مجاش فى بالى أخد منهم تذاكر و أستغلها فى شراء شنطة جديدة..)

المهم بعد فترة قررت أنا و زميلتى إننا ننزل و مانضيعش وقت.

هى قعدت تفهمنى إنها لهلوبة و مقطعة إسطنبول زيارات...

نزلنا وقفنا تاكسى...

- جود مورنينج.... عسمان بيه بليز (يعنى عايزين نروح منطقة عسمان بيه)

المهم السواق فضل ماااااااشى ماااااااااشى مااااااااشى ولا بيده... لحد ما حدفنا فى منطقة كدة... كويسة و بنت ناس و كل حاجة . و قام منزلنا و قعد يكلمنا تركى و يشاور بإيديه يمين و شمال و يقول عسمان بيه.

فهمنا من الموقف إن الشارع ده مش عسمان بيه و إن إحنا حسب الإشارات اللى قعد يعملها و مافهمناش منها حاجة "نقدر" نروح عسمان بيه.

أخد فى المشوار ده حوالى خمسين جنيه :lol:

المهم نمشى يمين و نمشى شمال و صاحبتى تقوللى..

- الله... بس ده مش عسمان بيه..!!!

المهم قعدنا نلف و ندخل فى محلات و كل ما نيجى نشترى البياعين يقولولنا (جوملة... جوملة) بتعطيش الجيم أى نبيع بالجملة و ليس بالقطاعى..

ولا محل رضى يبيعلنا..!!

المهم إن إسطنبول بلد جبلية... يعنى ملايانة مطالع و منازل... فلما تنزل شارع هابط... يبقى أصعب شىء هو إنك تمشيه تانى فى الراجع... خصوصا إن الجو كان حار و الرطوبة فى إسطنبول عالية جدا... :lol:

المهم و احنا ماشيين.... إتحريت... فبدخل لإيدى فى شنطتى أطلع منديل...

طلعت فى إيديى عدسة النضارة... :lol:

نضارة Vogue زى الفل جايباها بالشىء الفلانى و بعاملها أحسن معاملة و بحطها فى عينيه..

صاحبتى ابتدت تتشائم منى...!!! قالتلى... كليو... لأ.... أنا بكرة مش هاخرج معاكى... دى حاجة قلق..!!

بعد كدة قلتلها بصى... واضح إن المنطقة دى مافيهاش حاجة..

رابط المشاركه
شارك

طبعا صعب علينا اليوم يطير مننا كدة عالفاضى.. قلتلها بصى... أختى حكيتلى عن مكان اسمه بيازيت و إنه فيه حاجات حلوة و رخيصة جدا... و فيه زى خان الخليلى كدة...

فعلا أخدنا تاكسى تااااااااااانى و رحنا بيازيت.. مكان عامل زى خان الخليلى بالظبط... بس مقفول... يعنى مش شوارع... لأ.. ده سوق كبير و له سقف منتجات زى بتاعت خان الخليلى بالظبط و فيه شوية إزاز تركى و عين زرقا و كدة... و حتى فيه تى شيرتات فرعونى..

المهم إحنا كإيجيبشانز... ماحسيناش بفرق كبير بينه و بين خان الخليلى... فمطولناش...

قعدنا ندور على الباب اللى دخلنا منه عشان نخرج منه... معرفناش نوصلله... المكان كبير جدا فعلا و أبوابه و مداخله و مخارجه كتير...

رابط المشاركه
شارك

الله يخرب بيت نقط البروزولين الزنك اللي عمالة تحكيلنا بيها مغامراتك يا افنظم :lol: .. يا بنت الحلال اتوصي شوية .. و ما تخليش قلمك .. اقصد كيبوردك ناشف كده....

فضفي يا ماما .. فضفضي ....

رابط المشاركه
شارك

خرجنا من باب... لقينا نفسنا فى حتة tipical الموسكى عندنا... tipical و حتى الناس هناك سمر و شكلهم مصرى و يدلقوا المية عالأرض و الدبان على الكل المكشوف...

عرفنا إن ده إسمه السوق المصرى..

فاكرين سليم خان لما فتح مصر أيام العثمانلية... و سحب منها العمال المهرة و شحنهم على هناك؟؟ أهم دول أحفادهم و كدة.

المهم دخلنا كام دكان من دول... و بعدين فى فترينة من الفتارين... شفت طقم عجبنى جدا و كان سعره مناسب.. دخلنا أنا اشتريته، و صاحبتى قعدت تجب و تقيس و تشترى..

المهم... كنت مبسوطة جدا (!!!!!) من الحاجة اللى أنا جبتها و فضلت أنا و صاحبتى ماشيين عايزين نطلع لأى شارع عمومى عشان ناخد تاكسى و نرجع الأوتيل.

الساعة كانت داخلة على 7:00 و المغرب دخلت..

واحنا ماشيين... جالى هاجس...

قمت فتحت شنطى و بصيت فيها و دورت كويس..

- شيرين.... هى الكاميرا بتاعتى معاكى؟؟

- لأ ... ليه ؟؟

:lol:

رابط المشاركه
شارك
الله يخرب بيت نقط البروزولين الزنك اللي عمالة تحكيلنا بيها مغامراتك يا افنظم  :lol: .. يا بنت الحلال اتوصي شوية .. و ما تخليش قلمك .. اقصد كيبوردك ناشف كده....

فضفي يا ماما .. فضفضي ....

يعنى إيه؟؟؟ :lol:

رابط المشاركه
شارك

انشئ حساب جديد او قم بتسجيل دخولك لتتمكن من اضافه تعليق جديد

يجب ان تكون عضوا لدينا لتتمكن من التعليق

انشئ حساب جديد

سجل حسابك الجديد لدينا في الموقع بمنتهي السهوله .

سجل حساب جديد

تسجيل دخول

هل تمتلك حساب بالفعل ؟ سجل دخولك من هنا.

سجل دخولك الان
  • محاورات مشابهه

    • مغامرات عصابة "حساس"

      قريبآ علي هذه الشاشة.. رائعة الأدب العالمي الكوني اليونيفيرسي الفظيعة... مغامرات عصابة "حساس" ملخص ما سبق بعد استيلاء الجامعة الأمريكية علي"كلية بهية الخاصة" و القبض علي بعض الطلاب بتهمة الشيوعية الهمبكية… و القبض علي الباقي منهم في المحاولة الفاشلة التي حاولوا بها القيام بأنقلاب في دولة"نفاقستان" المجاورة…تركت شلة الأصدقاء الدراسة و قرروا القيام بأول مشروع عملي… فأنشأوا شركة "حساس أعلانات ليميتد" للأعلانات…. و حاولوا تسويق غسالة فول أوتوماتيك تعمل بالمانافيللة.. و لكن فكرة اعلا

      في دعوة للأبتسام

    • مغامرات فريق التواصل " الإلكتروني الأمريكي " في بلاد العرب

      بسم الله الرحمن الرحيم تحية طيبة لكم اخواني واخواتي الكرام ,,, ربما الكثير منا قد سبق له وان سمع او قراء لــــ فريق التواصل الإلكتروني التــــابع ,,, لوزارة الخارجية الأمريكية ؟؟ وبــــ التأكيد قد تبادر الى ذهن كل من سمع أو قراء عن هذا الفريق الكثير من الأسئلة المشروعة . ؟؟؟...... اليكم بحث مهم جداً يـــــــ تحدث عن هذا الموضوع ,,, يــــ سعدني ويــــشرفني أن أضع هذا البحث المهم بين يدي القاريء الكريم , للــــعلم والطلاع والمعرفة . --------------------------------- في 2005 عين جور

      في سياسة دولية

    • مغامرات س س فى الشقق المصرية؟؟؟

      انا كنت قريت من فترة موضوع عن مغامرات الاستاذ الكبير س س وقال ان الموضوع هيكملة فى رمضان ورمضان قرب على المنتصف ومفيش لا حس ولا خبر الموضوع تم الغاءة من خريطة رمضان ولا اية انت فين يا س س انت وخبراتك فى موضوع الشقق والعقارات ؟؟؟؟؟؟؟؟؟؟؟ اوعى تقول كسلت بعد ما اكلت المانجا

      في مسائل إقتصادية - economic issues

    • صور البابا وهو يصلى صامتا تجاه مكة فى محراب قبلة جامع إسطنبول ... !!!!

      توصل إمام الجامع فى إسطنبول الى ما لم تتوصل اليه المظاهرات .... !!! توصل إمام الجامع فى إسطنبول الى ما لم تتوصل اليه المظاهرات .... !!! "البابا يصلى صلاته الصامته فى محراب القبلة وفى إتجاه الكعبة الأسلامية " فقد وقف مع البابا فى المحراب أمام القبلة متجهان الى الكعبة وقرأ الأمام التركى الفاتحة ... بينما تعمق "البابا" فى صلاة صامتة دامت "دقيقتين" ... وكان يقف وقد تعاقدت يداه أمام صدره .... نشرت صور هذه اللحظات فى أنحاء العالم وأذاعتها محطات التلفزيون العالمية ... كيف بدأت الق

      في معرض الصور

    • مغامرات نونو وبيبي (الحلقة العاشرةوالاخيرة)

      في الحقيقة وفي الواقع هو المفروض انزل الموضوع ده بعد اسبوعين او شهريييييييين يعني اريحكو شوية من الشخابيط الى عمالة ترف عليكو يادي الكسوووووووووف :blush: mfb: بس بما اني مش ضامنة اني اقدر اكتب بعد كده جايز لفترة او بمعنى اصح احتمال ما اقدرش ادخل نت اهئ اهئ اهئئئئئئئئئئئئئ حدش عنده كليوووووووونكسسسسسس ماعلينا ....................... وبناء عليه ........ عسل الكلمة دي تقلش سيباويه ياخيييييييييي اجري كده وبلاش غلبة عايزة تقولي ايه يابت ياشهد اجري اروح فيييييييين ماما قالت لي ما ت

      في أدب و شعر و قراءات


×
×
  • اضف...