اذهب إلى المحتوى
إنشاء باب جديد بعنوان سد النهضة الإثيوبي لكل الموضوعات المتعلقة بسد النهضة ×

للأهلاوية فقط ... حسام البدري وسنينه اللي مالهاش لون


Recommended Posts

ربنا أبتلانا بمدرب مالوش في البطيخ ... ومصيبته إن جه بعد الساحر جوزيه صانع المعجزات .... فمن الطبيعي أن نُقارن بين إتنين في نفس الموقع .. لكن هيهات ..

لكن إدارة الأهلي لها أفعال كده بتبقى عاملة زي أفعال الحكومة المصرية ... برود في ردود الأفعال .... وتصنُع العقل والحكمة في حين الدنيا بتكون مولعه حواليه ... بالإضافة إلى فعل عكس ما تريده الأغلبية ..

وأنا كتبت العام الماضي عن الاخ حسام البدري ذو القدرات المحدودة واللي اخره يبقى مساعد مدير فني .... لإنه لا فكر ولا شخصية ولا قيادة ولا حاجه أبداً ..

بالرغم إن اللي في سنة دلوقت بيقودوا منتخبات .. زي حسن شحاته ومختار مختار وفاروق جعفر حتى اللي أصغر منه ويمكن حسام البدري دربه وهو أسامه عرابي ... أدينا شايفينه دلوقت مع طلائع الجيش .....

لكن ده أخره كده وقدراته كده ...

وأرفض تماماً مقولة : ما هو ماشي كويس وكسب الدوري السنة اللي فاتت ... وكمان طلع بينا في المربع الذهبي لبطولة أفريقيا أهو ...

فهذا كلام مردود عليه لإن الأهلي طول عُمره كده .. فريق بطولات ولازم كل سنة ياخد بطولة .... أما عن العام الماضي فقد كانت كل الفرق في غير حالتها ... الزمالك في دوامة الهبوط وحقق المركز الـ 13 في بعض الأوقات ... والأسماعيلي عنده مشاكل للصبح ... والباقي كومبارس بيناوشوا من بعيد ..

وشوفنا لما الزمالك شد حيله مع حسام حسن صعد من الـ 13 إلى المركز الثاني وكان قاب قوسين أو ادنى إنه ينافس ... بسبب غباء الاخ اللي عندنا اللي مالهوش فيها

وتعرف المدرب البطيخه منين ؟

لما تلاقيه بيحارب المواهب ويكره الحريفة اللي ممكن يقلبوا لك الدنيا في لحظه ... أنظر الكتاب صفحة أمير سعيود اللي حمض عندنا بقى له سنتين وعقده قرب يخلص والدنيا كلها بتتكلم عنه إلا حسام البدري اللي بيكرهه كره العمى .... ومش عارف كان موقفه إيه لما شافه في المباراة الودية الأخيرة اللي أقيمت أول أمس بين الأهلي وبين فريق الإعلاميين

عشان خاطري إتفرجوا واحكموا على لاعب فذ زي ده لا يقل عن ميسي أو شيكابالا .. لكن للأسف حمض وما لمسش الكرة في الأهلي بقى له سنتين .. بل بالعكس .. البدري أفندي اللي لسه عليه بدري بيحارب عشان يمشيه في أقرب فرصة

http://www.youtube.com/watch?v=k1g1vDER-Xk&feature=player_embedded

وكل الدنيا شافت إزاي أستغنى عن حسين ياسر المحمدي ببلاش وبدون مقابل زي الحلاوه .. والزمالك لقطه أهو وفارق معاهم كتير .

وكل الدنيا شايفه وأصحابي الخليجيين اللي بيفهموا في الكوره منقوطين إزاي لاعب زي " عفروتو " ما بيلمسش الكورة ؟

وتعرف المدرب البطيخة لما تلاقية بيخاف من اللعيبة الكبار ويترعب منهم عشان يعيش وياكل عيش ... أنظر الكتاب صفحة أبو تريكة في أسوء حالاته أو أحمد حسن في توهانه أو الأخ اللي كإنهم جايبينه من مصحة مدمنين " محمد شوقي " اللي ما بقاش له أي لازمه في الدنيا ... ومع ذلك بيترعب منهم وما يقدرش يقول لواحد فيهم إخص عليك مستواك زي الزفت ...

لكن في نفس الوقت بيعمل راجل على اللعيبة الصغيرة وبيبقى عايش في دور سبع السباع ... عشان يحس برجولته برضوا من نفسه

وتعرف المدرب البطيخة منين ... لما كل ماتشاته الخارجية يحقق فيها نتايج زي وشه ... أنظر الكتاب صفحة هارتلاند .... وشبيبة القبائل ... حتى الأسماعيلي اللي فركت كعب من القاهرة

وتعرف المدرب البطيخة منين لما يفتكر إن الجدية هي قلبة الوش وعدم الإبتسام والتجهم أو شتم اللعيبة الصغيرين أثناء المباريات

وتعرف المدرب البطيخة منين .... من نظرتة في إختيار اللعيبة خصوصاً الأجانب ... فرانسيس اللي شل اللي جابونا بقى له سنتين وأصغر عيل في حاره سد في مصر بيعرف كوره عنه ومع ذلك البدري بيقول ده فلته ولعيب مالهوش حل ... وأنظر الكتاب صفحة محمد غدار اللي البدري حارب الدنيا عشانه ومع ذلك ما لمسهاش السنة دي ... وها هو محطوط على الرن واي في إستغناءات يناير ... على اساس إن الأهلي فلوسه حرام نجيب لعيبه ما يلمسوهاش ونستغنى عنهم ... في حين إنه في منتهى السهولة يستغنى عن جيلبرتو بدون مقابل لمجرد إن الراجل قال عاوز أمشي .. عشان حد يتكلم معاه في زيادة عقد بسيطة أو حاجه .... وها هو يتألق مع ليرس البلجيكي ومع منتخب بلده ... في حين إن سيد معوق راقد في السرير من أول الموسم ... والأهلي ما فيهوش خيال بيلعب ناحية الشمال ...

وتعرف المدرب البطيخة منين ..... لما ما يقدمش جُملة تكتيكة أو فنية واحده .... ولما تلاقي الماتشات الصعبة كلها محسومة للمنافسين .... ولما تلاقيه يقول لك أنا اهم حاجه عندي الـ 3 نقاط ... ومش مهم بقى الفريق يلعب رجبي أو هوكي جليد أو يلعبوا صلطح حتى ...

بامانة شديدة البدري خلاني أكره كره القدم واللي عملوها ...

وبامانة تمنيت أن يخرج الأهلي من دول الـ 8 أمام الإتحاد الليبي في مباراة العودة .. لكن هدف شهاب أحمد هو اللي عمل منه مدرب ..

وبامانة خايف من فضيحة بجلاجل يوم الأحد القادم في تونس أمام الترجي لإننا عندنا مدب بطيخه ... وقرعه كمان

رابط المشاركة
شارك
  • الردود 90
  • Created
  • اخر رد

Top Posters In This Topic

Top Posters In This Topic

Popular Posts

أثبتت إدارة الأهلي بقيادة حسن حمدي ومساعدة الخطيب إنهما دخلا مرحلة التهليس والتهييس والتهجيص الكروي أينعم هم كانوا نجوم لامعة في الماضي وأينعم حققوا إنجازات غير مسبوقة للنادي الأهلي في السنوات الأ

المهندسة كل سنة وانتى طيبة طول عمر الاهلى بيتهزم دى رياضة وليس هناك فائز دائم بها متخافيش الضغط والسكر والزهايمر دى امراض لا تصيب الاهلوية الشماتة ليس من شيم العقلاء ودة ليس من عاداتنا البدرى

>ه مقال خالد طلعت في موقع " في الجون " على فكره مش غرور .. أنا المفروض أطلع المطار وأقف أستقبل السياح الاجانب اللي بيفهوا رياضه هههههههههههه لان كل كلامه أنا قلته من السنة اللي فاتت قبل بدراوي أب

بالرغم إن اللي في سنة دلوقت بيقودوا منتخبات .. زي حسن شحاته ومختار مختار وفاروق جعفر حتى اللي أصغر منه ويمكن حسام البدري دربه وهو أسامه عرابي ... أدينا شايفينه دلوقت مع طلائع الجيش .....

وأرفض تماماً مقولة : ما هو ماشي كويس وكسب الدوري السنة اللي فاتت ... وكمان طلع بينا في المربع الذهبي لبطولة أفريقيا أهو ...

وبامانة خايف من فضيحة بجلاجل يوم الأحد القادم في تونس أمام الترجي لإننا عندنا مدب بطيخه ... وقرعه كمان

حرام عليك يا سي السيد البدري أصغر من حسن شحاته ومختار بكثير ودول بقالهم زمن مديرين فنيين مش لسه ماسكين مدير فنى السنة اللى فاتت وسنه كمان أصغر منهم, وتصحيحاً لمعلومة فقط اسامة عرابي مدرب الإنتاج الحربي مش طلائع الجيش, روقة هو مدرب الطلائع , بس بأمانة اسامة عرابي وطلعت يوسف ومختار مختار عاملين شغل جامد السنة دي.

طب ايه اللى مطلوب منه أكثر من كده , راجل خد الدوري وفي المربع الذهبي لأفريقيا وفيه إحتمال انه يوصل النهائي , عاوزينه يعمل ايه تانى , مفيش بطولات ياخدها غير دول , بلاش التحامل ده على الراجل , وانت شفت بنفسك لاعيبة الأهلى مع المنتخب واقعيين وعجزوا وكفاية عليهم كده بصراحة.

الفضيحة مش هتحصل يوم الأحد , هنتغلبوا اه واحتمال كبير تخرجوا من البطولة لكن مش بفضيحة واحد أو اثنيين بالكثير, ودول كفاية :rolleyes:

وبما انى زملكاوي وانت كاتب للأهلوية فقط , فأحب أهني الكابتن حسام البدري وأقوله إستمر يا كوتش ربنا يوفقك يا كبير:P

رابط المشاركة
شارك

بغض النظر عن رأيى فى حسام البدرى...

يوم 17/10/2010 مش بعيد والماتش قرب

وان غدا لناظره قريب..وبكره تقعد ع الحيطة ونسمع الزيطة

وان كسب البطولة وصعد كاس العالم فى الامارات

لن يتذكر التاريخ الا ان حسام البدرى كسب بطولة افريقيا...حتى لو كان بطيخة زى ما بتقول

رابط المشاركة
شارك

قولي كده بقى

ده يوم التجديد له يا راجل الزملكاوية دبحوا خمس عجول وأربغ خرفان و6 أرانب

يا عم نايت العملية مش بالسن ... على فكره ده ماشي في الـ 51 سنة دلوقت .. تخيل ؟

يعني هايبقى مدرب عنده فكر إمتي ؟ لما يعدي الثمانين ؟

بُص على العيال اللي قد ولاده .. جراديولا .... ريكارد ... كومان ... طارق العشري ... طارق يحي وأسماعيل يوسف ...

بيبان يا ريس ..... بتتفرج على تحركات اللعيبة في أي مباراة بتعرف مدربهم قُله ولا بيفهم ...

رابط المشاركة
شارك

بغض النظر عن رأيى فى حسام البدرى...

يوم 17/10/2010 مش بعيد والماتش قرب

وان غدا لناظره قريب..وبكره تقعد ع الحيطة ونسمع الزيطة

وان كسب البطولة وصعد كاس العالم فى الامارات

لن يتذكر التاريخ الا ان حسام البدرى كسب بطولة افريقيا...حتى لو كان بطيخة زى ما بتقول

أسف يا ميدو ... يبقى كده إحنا عاملين زي إتنين ماشيين على قضبان السكة الحديد ولن نلتقي إلا في محطة باب الحديد :lol: ..

لإن الفوز ببطولة ليس معناه كفاءة مدرب أو إننا نقول عليه بيفهم ...

خلي بالك ... كره طائشة ممكن تكسبك ماتش ..

وتهور لاعب في الفريق المنافس وينطرد او يدخل هدف في نفسه ممكن يكسبك بطولة ..

لكن يظل في النهاية الحكم على كفاءة مدرب ما بتكون بجملة ما أداء من مباريات مع فرقته

وزي ما ضربت مثل .. كنا خلاص هانودع البطولة على إيد الإتحاد الليبي لولا هدف في أخر ثانية من شهاب أحمد ...

وساعتها البدري عمل فيها أمينة رزق وبكى للصبح لإنه كان خلاص مجهز شنطته وهايروح عند خالتي أم بدري يترمي في حضنها ويكمل عياط ...

رابط المشاركة
شارك

انا عارف والله , كلامك صح , هو الراجل بدأ متأخر وما كنش عنده طموح انه يبقي مدير فنى ففضل قاعد جنب جوزيه 6 سنين

انا بقولها وبتمناها من قلبي انها تتحقق , نفسي أشوف مختار مختار ماسك الأهلي وطلعت يوسف ماسك الزمالك

مش عارف هما الناس دول مغضوب عليهم والا ايه , فكر جامد , مختار مختار صنع من المصري فريق بيلعب كورة بجد وطلعت يوسف مدرسة تكتيكية وفنية رائعة.

مع تحياتي :roseop:

رابط المشاركة
شارك

, مختار مختار صنع من المصري فريق بيلعب كورة

ونسيت بتروجيت ؟

لأ مختار فاهم فعلاً وعنده طموح

وطلعت يوسف وطارق العشري ما يتخيروش عن بعض ...

عشان أثبت لكم كِبر إدارة الاهلي وتمسكها بتقاليد عفى عليها الزمان ...

لو حسن شحاته إتكحرت الماتش الجاي ولبسوه الجلابية وقعد في بيتهم

تفتكروا إدارة الأهلي تفكر تستعين به كمدرب عالمي ذو خبرة ؟

مستحيل طبعاً والناس تاكل وشنا وإزاي نستعين بحد من معسكر الاعداء

رابط المشاركة
شارك

أنا مؤمن جدا أن حسام البدري مدرب بطيخة

بس بصرااحة هو مناسب جدا للفترة دي

أقصد فترة إنتقالية للأهلي يقدر يخرج فيها لاعيبة أشبال كتير ويشتري لاعيبة بالفلوس اللي هيوفرها في راتب البدري

ويحسب لحسام البدري أنه تقريبا هيعدي الأهلي من الفترة دي بأقل خسائر ممكنة وبأعلى مكاسب ممكنة

أقل خسائر ممكنة أننا مشيين في الدوري كويس وممكن نحققه وكمان وصلنا للدور الأربعة في أفريقيا وممكن ناخد البطولة

أعلى مكاسب ممكنة أن في لاعبية ظهرت من الناشئين أي نعم مش كتير بس متهيألي أن عددهم كويس في ظل وفرة النجوم الكبيرة ، ومن المكاسب بردو المحافظة على النجوم دون إثارة مشكلات اللهم إلا اللي بيثيروا الإعلام الحاقد

رابط المشاركة
شارك

أنا مؤمن جدا أن حسام البدري مدرب بطيخة

بس بصرااحة هو مناسب جدا للفترة دي

أقصد فترة إنتقالية للأهلي يقدر يخرج فيها لاعيبة أشبال كتير ويشتري لاعيبة بالفلوس اللي هيوفرها في راتب البدري

ويحسب لحسام البدري أنه تقريبا هيعدي الأهلي من الفترة دي بأقل خسائر ممكنة وبأعلى مكاسب ممكنة

أقل خسائر ممكنة أننا مشيين في الدوري كويس وممكن نحققه وكمان وصلنا للدور الأربعة في أفريقيا وممكن ناخد البطولة

أعلى مكاسب ممكنة أن في لاعبية ظهرت من الناشئين أي نعم مش كتير بس متهيألي أن عددهم كويس في ظل وفرة النجوم الكبيرة ، ومن المكاسب بردو المحافظة على النجوم دون إثارة مشكلات اللهم إلا اللي بيثيروا الإعلام الحاقد

أسف يا غريب ..

انا أصلي فاضي لكم النهاردة :lol:

الاهلي مش بقالة أو بيت محدود الدخل هايوفر في المصاريف وينام من غير عشا عشان التوفير

وبعدين هو مافيش وسط ؟

يعني يا ندفع لجوزية 75 الف يورو

يعني أكتر من نص مليون جنيه شهرياً

يا نجيب واحد كحول ونديله 120 الف في الشهر ويخلي منظرنا ولا فريق درجة ثانية ؟

وبعدين أوفر عشان اشتري لعيبه ليه إذا كنت بايع فلافيو بمبلغ 20 مليون جنيه عداً ونقداً على الترابيزة السنة اللي فاتت ؟

ومشهور عن الإهلي إنه الأسوء في شرا اللعيبة الاجانب ( بص على لعيبة الإنتاج الحربي وأنبي وبتروجيت بل وسموحه الاجانب ... حاجه تفرس

أعد لك 50 دلوقت في خلال 7 أو 8 سنين قلل أشتراها الأهلي بملايين الدولارات ... ماكي وأفيلينو وبينيو وغدار ومكار وفرانسيس و في واحد جه السنة دي خد 125 الف دولار وما عرفناش إسمه ولا رسمه . نيجيري أعتقد ...

غير الاف المحليين اللي بيندفع فيها ملايين الملايين ومنهم حسين علي ومحمد سمير بتاع الترسانة وهاني العجيزي وأحمد حسن دروجبا وعبد الحميد شبانة و و و و و و و

يا راجل يا مؤمن ده في واد إشتريناه السنة اللي فاتت من نادي في مرسى مطروح إسمه " الحمام " أيوه النادي إسمه كده .. الواد إسمه علاء شعبان ... مالوش حل وقالوا أبو تريكه الجديد .. أنا شوفته ... مش ممكن .. حدوته وحكاية .... ده السنة الي فاتت ...

ولإنه حريف ومش جحلوف بيجري ورا الكروة وخلاص مثل الأخرين ... الأخ البدري أستغنى عنه .. وهايسرحوه ويدوه إعارة لنادي سموحه عشان ينسى شوية الكورة اللي عنده

أعلى مكاسب ممكنة أن في لاعبية ظهرت من الناشئين أي نعم مش كتير بس متهيألي أن عددهم كويس في ظل وفرة النجوم الكبيرة

كابتن .. يا كابتشن غريب

تعرف إن شهاب وشكري وعفروتو عقودهم هاتخلص السنة دي والعيال عاوزه تمشي من الأهلي

لإنك بتبعتر مليارات على لعيبه معفنه ما تستاهلش تعريفة .... أمثال محمد شوقي أبو 15 مليون و غالي أبو مش عارف كام مليون ... حتى لا مؤخذه محمد بركات وهو نجم كبير ما قولناش حاجه لكن أنبوبته خلصت .. تروح تجدد له 3 سنين !!!!!!!!!!!!!!! .. 3سنين بـ 9 مليون في حين إن أخره سنه لإنه بيُصاب وهو نايم على السرير ... وكتاب الله بأقول لواحد صاحبي من كتر إصابات محمد بركات في الحوض من غير ما حد ييجي جنبه عاوز أبعت لإدارة الأهلي يشتروا له حوض من سيراميكا كليوباترا .. حاجه متينة وعليها ضمان ...

كل ده وييجوا على النجوم اللي المستقبل لهم وممكن يستغنوا عنهم عشان 35 جنيه .... أه حاكم ماحدش يلووي دراع الأهلي ... والعيل من دول طالما جاي على فيزة قرد يبقى هايفضل طول عمره ياكل موز حتى لو بقى اسد ...

يا راجل بلا قرف

رابط المشاركة
شارك
الاهلي مش بقالة أو بيت محدود الدخل هايوفر في المصاريف وينام من غير عشا عشان التوفير

لا معلش يا س س

مع انى اهلاوى والاهلى مش بقالة

بس له برده ظروف والتزامات معلشى بقى يعنى..لانه تادى اجتماعى وفيه العاب تانية بيتصرف عليها

وافكرك بجوزيه ومرتبه اللى وصل اخر حاجة 83 الف يورو شكرااااااااا

واللى كان بيدفعهم ياسين منصور رجل الاعمال المشهور

ولما مش عارف مين زعله اتقمص وقال مش لاعب وساب لهم المجلس الموقر....وبدأوا يدوروا ع المدربين الكسر زى فينجادا

على قد فلوسهم لان اللى بيمول باعهم ومشى

ولما اتزنقوا ولقوا ان فلوسهم وامكانيتهم متعرفش تجيب مدرب كبير

قال اوفر نجيب البدرى واهو مش غريب ع الفرقة

وابننا...وان كسب ابننا وحبيبنا

وان اتغلب اهو كان بيتعلم

اتفق مع الغريب

رابط المشاركة
شارك

وهو أسامه عرابي ... أدينا شايفينه دلوقت مع طلائع الجيش .....

بما ان الموضوع للاهلوية فقط

فأسامة عرابى مدرب الانتاج الحربى مش طلائع الجيش

آدى الاهلوية :P

رابط المشاركة
شارك

هوا ليه عيوب منها إنه قتل روح الفانلة الحمراء

لأول مرة أتفرج علي الأهلي و أحس إنه الماتش خلاص خلص

داميا اتفرج علي الأهلي و أحس إن حتي في الدقيقة 94 الأهلي ممكن يخلص الماتش

بحس إن اللاعيبة مش بتحبه و لا بتخاف منه و مبيقتلوش نفسهم في الملعب عشانه

عادة الأهلاوية

علاقته باللعيبة الكبار

بحس إنه بيجيي في الماتشات الكبيرة و يصدرهم و خلاص

كأنه بيقول أدي ابو تريكة و بركات و أحمد حسن و وائل جمعة

أعمل أيه تاني أكتر من كده

مبحسش إن فيه تشكيل ثابت للأهلي

و من مميزاته تصعيده للعيبة الناشئين

بس برده مش فاهم ليه مثبتشي منهم اتنين تلاته ،،، يجي منهم

ركنهم عالطول بعد عودة النجوم

و في الآخر أنا متفق مع الإدارة في النهاية

و شايف إنه ياخد فرصته كاملة لحد آخر الموسم و أي تغيير مش في صالح الأهلي

خصوصا إن الأهلي مبينفعشي معاه غير المدربين الأجانب

و دوول مش بسهولة لما تلاقي حد معقول و بفلوس معقولة

بعدين الراجل يا عيني رامي مراته و عياله و شاري بيت في كندا

و يفتقد الاستقرار العائلي

أنتوا بلغوا عنه منتدي الهجرة إلي كندا ،،، يعملوله استدعا ،،، نخلص منه لو مضايقين أووي

و يسيب السبوبة اللي في الأهلي

رابط المشاركة
شارك

أيوه كده يا أبو السيد فتحت نفسنا للكلام

فيه نظرية بتقول ان ال shadow man أو الرجل الثانى أذا ما عمل

لفترات طويلة مع الرجل الاول بتتمسح شخصيته ويتوه بعد رحيل رئيسه

وهذا ما عاناه كيروش البرتغالى مساعد السير الكس فيرجسون مدرب

مانشستر يونايتيد لمدة تتجاوز العشرون عاما وفيرجسون دائما ما

يثنى عليه ويمدحه ، ولكن كيروش أحب ان يشم نفسه قليلا وقبل تدريب

منتخب البرتغال الأول وكانت كارثة بحق فلقد تدهورت نتائج المنتخب

بشكل كبير وعاد كيروش مرة أخرى فى ظل فيرجسون ،ولم يكررها بعد ذلك

وهذا ماحدث فى الاهلى مع حسام البدرى وجوزيه ، لقد تصورت أدارة النادى

أنه ظل مايزيد عن 5 سنوات معه فهذا كافى ويمكن للبدرى الانطلاق لوحده

وسيتم مساندة المجلس له حتى نصنع مدربا محليا متميزا ، غير عابئين

بالفروق الواضحة فى تركيبة الشخصين والابداع الشخصى لكل منهما

وحزم جوزيه مع اللاعبين الكبار قبل الصغار منهم ، والبدرى حاول

ان يكون حازما بأظهار الغضب والسباب ولكن ليس هذا هو الحزم

فالحزم لابد أن يكون مترافقا مع الأقناع والاقتناع ، بمعنى لو حاولت

ان تصرخ وتسب فى ولدك بدون ان تكون مقنعا له فسيفعل مايراه صائبا

من وجهة نظره ويضرب عرض الحائط بصراخك وتهليلك ، والأقناع ياتى اولا

بالمساواة بين اللا عبين والكفؤ والجاهز منهم ياخذ فرصته فى اللعب بدون

أعتبارات شخصيةولا أحتساب لشهرة ، وثانيها هو مدى احساس اللا عب بجدوى

الطريقة والتكتيك الذى يمرنه عليه المدرب ونجاحها فى المباريات

وثالثها اصرار المدرب على الالتزام الحرفى بكل ما لقنه لهم فى التدريبات

ويحضرنى هنا اللاعب محمد عبد الوهاب - رحمه الله - عندما سحبه جوزيه من الملعب

مرتين بعد 20 دقيقة من بداية المباراة لانه لم يلتزم بالواجب الدفاعى له

والرجوع لمكانه فى الجناح الايسر فى حالات الهجوم المعاكس للفريق المنافس

ووقتها أمتعض كثير من المعلقين والمحللين أزاى يكسر نفس اللعيب ويسحبه

بالشكل المهين ده ، ولكن ماذا كانت النتيجة اللاعب بذل مجهود مضاعف فى

التدريب وارتفع مستوى لياقته واصبح ينفذ ماهو مطلوب منه وفيما بعد اصبح

وفى نفس العام باك شمال المنتخب المصرى فى 2006

ويقول بعض من يكرهون الاهلى وبالتالى جوزيه ، البدرى زج بالناشئين ضمن

الفريق وهذا ما لم يفعله جوزيه ويتعمدون عدم ذكر بقية العبارة وهى أن

مدرب منتخب الناشئين التشيكى سكوب حبس وقفل على كل الناشئين لكل الاندية

لمدة تزيد عن عام ونصف وحرمت أنديتهم منهم ولم يفرج عنهم الأ بعد الانتهاء

من كأس العالم الذى أقيم فى مصر منذ فترة ، وطبعا بقية النقاط غطاها سى السيد

الحصول على الدورى والسوبر وضعف المنافسة

يتبقى شئ أخير ألا وهو أن النادى الاهلى وضع الوصول للعالمية شعاره فى الألفية

الجديدة وليست القضية الحصول على بطولات محلية وسط منافسين لايتمتعوا بمثل مميزاته

وأدارته العملية والممنهجة وجماهيره الغفيره ، فلا يصح التراجع عن الهدف ولابد من

مدرب اجنبى كفؤ فى حجم جوزيه لتكملة المسيرة ولايقل أحدا هذه عقدة الخواجة

فنحن نستورد كل شئ ونحضر كافة الخبراء الاجانب فى شتى المجالات ويقبضون مرتبات

خيالية بالعملة الصعبة ولايدرى أحدا عنهم شيئا ، ولابد لنا بالاعتراف بأن اوروبا

حاليا هى مصنع ومطبخ الخطط والتكتيكات الجديدة فى كرة القدم وجميع مدربى العالم

يتعلمون منهم بدون حساسية على الاطلاق..

رابط المشاركة
شارك

ينفع كده يابو السيد ... تلم علينا الناس كده .. وتدي للزملكاوية الفرصة الذهبية دي

انت مش قلت الأهلوية بس !!! .. المفروض تعمل فلترة للموضوع ... هيا دي الديموقراطية

ندخل في الجد بقي

احنا أكيد متفقين ان مستوي حسام البدري مش هو اللي نتمناه للأهلي

ولا هو ده مستوي الأهلي اللي اتعودنا عليه

لكن برضه لازم منظلمش الراجل ... ومش هاقول مينفعش نقارنه بجوزيه

الأصح اني أقول مينفعش نقارن الفترة اللي مسك فيها حسام .. بالفترة اللي مسك فيها جوزيه

جوزيه شخصيته قوية أه وله كاركتر .. بس متنساش انه كان معاه أفضل نجوم مصر وكانوا فعزهم

لكن من يوم حسام ما مسك .. وكأنه دايس علي ديل قطة .. اللعيبة اتكحورت .. وكبرت ... وسافرت

وطبعا مافيش بديل ع المستوي المطلوب ... يعني مكنتش شطارة من جوزيه أد ما كانت مستوي عالي للعيبة

والدليل علي كلامي لما راح ومسك منتخب أنجولا .. راح فين السحر بتاعه .. لا سحر ولا يحزنون

ومستوي كلنا شفناه .. أقل من مستوي أي نادي عادي في مصر

يعني المسألة مش في المدرب بس ... الأهم هو المدرب ده بيدرب مين

صباح الفل يابو الاسياد

تم تعديل بواسطة INVESTOR
رابط المشاركة
شارك

الأصح اني أقول مينفعش نقارن الفترة اللي مسك فيها حسام .. بالفترة اللي مسك فيها جوزيه

طب ما الزمالك فيه أفضل نجوم مصر ومع ذلك مش عارف ياخد دورة رمضانية حتى ؟

هي منظومة يا صديقي .... ومن يقود الدفة هو المدرب

يعني مكنتش شطارة من جوزيه أد ما كانت مستوي عالي للعيبة

والدليل علي كلامي لما راح ومسك منتخب أنجولا .. راح فين السحر بتاعه .. لا سحر ولا يحزنون

كده أزعل منك بجد ..

تدريب المنتخبات غير .... لإنك ممكن ما تشوفش اللعية الا كل سنة مره خصوصاً لو كانوا محترفين ... وبعدين هو لحق يعمل حاجه معاهم ... وهانروح بعيد ليه ... مش انت في السعودية ويمكن بتتابع أخبار الكرة السعودية ؟

عارف عامل إيه مع إتحاد جده ؟

دول قربوا يعملوا له تمثال عالكورنيش هناك من الشغل اللي عمله مع الإتحاد .. 7 مباريات في الدوري ... 100 % .. 21 نقطة .. أداء مُرعب .....

عاوز إيه اكتر من كده ؟

وأستنى ...

البدري له سنتين مع الاهلي دلوقت .... فين الناشيء اللي قدمه ولمعه زي ما بيعمل حسام حسن مع عمر جابر ومحمد إبراهيم على سبيل المثال في فترة وجيزة ....

بلاش كده

شوف توظيف اللاعبين الحاليين ؟ نيله طبعاً

الأهم هو المدرب ده بيدرب مين

مين دي بتاعت المُدرب .. بدليل إن المفروض إن المدرب المحترم .. وأسف لكلمة محترم هو المسئول عن إختيار اللعيبة وأعطاء الرأي النهائي في الصفقات التي يعقدها النادي ...

تقدر تكلمني علن الصفقات اللي عملها الاهلي السنة اللي فاتت والسنة دي وغيرت شكل النادي ؟

إحنا بنصرف ملايين بس ... لكن إيه المردود؟

اقول لك

المردود في شريف إكرامي .. وحسام غالي ... ومحمد شوكي .... وعبد الحميد شبانة ... وإبن خالة البدري " فرانسيس " أصل البدري له جذور ليبيرية وفرانسيس يعتبر إبن خالته عشان كده بيحبة وبيشربوهولنا زي شربة زيت الخروع ...

رابط المشاركة
شارك

معلش يا سي السيد انت أأرش ملحة حسام البدري من يوم ما مسك الاهلي..... ايه غرضك تكنش ناوي تمسك الاهلي

لو الموضوع كده يبقي توكل علي الله

بس في ملاحظة مش هو مختار واسامة عرابي كانوا مساعدين لجوزية ولما جتلهم الفرصة انطلقوا

وطارق العشري كان بيحضر تدريبات الاهلي ايام جوزية

طبعا البدري له فكر وبينفذه ... يمكن الجمله دي متعجبش بعض الناس

بالنسبة لياسر المحمدي علي فكرة الاهلي له حق انه يسيبه ده لعيب اناني موت واخر حاجة

وسعيود الصراحة لازم يخس شويه هو لعيب جامد صح بس المستقبل ليه (علي فكرة ده لعيب مزاجي)

فرانسيس من اول ما جه الاهلي والكل بشكر فيه .. فاكرين فلافيو لما جه الاهلي كانت رجليه الاتنين شمال ...

فرانسيس لما حس ان الاهلي هيستغني عنه الواد بيقطع نفسه في الملعب راجع ماتش الترجي و الانتاج الحربي

شكري وعفرتو و شهاب هم اكتشاف البدري

اتفق معكم ان البدري في بعض الماتشات بيبقي عامل زي الشبشب بصباع والصباع اتقطع

ادعوا ربنا يكرم يوم ماتش الترجي  

رابط المشاركة
شارك

انشئ حساب جديد او قم بتسجيل دخولك لتتمكن من إضافة تعليق جديد

يجب ان تكون عضوا لدينا لتتمكن من التعليق

انشئ حساب جديد

سجل حسابك الجديد لدينا في الموقع بمنتهي السهوله .

سجل حساب جديد

تسجيل دخول

هل تمتلك حساب بالفعل؟ سجل دخولك من هنا.

سجل دخولك الان
  • المتواجدون الآن   0 أعضاء متواجدين الان

    لايوجد أعضاء مسجلون يتصفحون هذه الصفحة

  • محاورات مشابهه

    • [مجلة صباح الخير]الشهر العقارى .. وسنينه

      عندما تصدت الحكومة ومجلس النواب لمسألة عزوف المواطنين عن تسجيل عقاراتهم وأراضيهم فى الشهر العقارى وما ترتب على عرض الصفحة

      في مختارات من الصحف

    • البلاك بيري وسنينه!!!

      إلي كل محبي البلاك بيري

      في دعوة للأبتسام

    • رجعنا للمواضيع اللي مالهاش لازمة..غير حرق الدم و خلاص

      طبعا الموضوع باين من عنوانه..وهو اننا رجعنا تاني لحرقة الدم..و الناس اللي عاوزة شهرة علي الفاضي و خلاص قرأت منذ قليل هذا الخبر إنذار للنائب العام لوقف محاكمة مبارك وأعوانه آسف لو كان الخبر طويل حبتين...الخبر من موقع مصراوي هي الناس دي غاوية شهرة؟؟..ولا غاوية تحرق دمنا و خلاص؟؟ أنا عارف ان فيه كتير هيقولولي لا عليك من الاخبار دي..لكن المشكلة ان الراجل بيتكلم بحكم قضائي..يعني ممكن فعلا يوقف محاكمة مبارك أو بمعني أدق..يعطلها شوية حتي يتمكنوا من تسوية الأمور اللي ما قدروش يسووها الفترة اللي

      في محاربة الفساد

    • النت وسنينه

      منذ دخول النت حياتنا لاحظت انه وصل مع بعض الناس لحد الادمان لدرجة تثير حنق شركاء الحياة كما اختلفت اهتمامات الناس وهوياتهم بعد اقتحام النت حياتهم فمثلا تخلى الكثير عن الكتاب الورقى واستبدله بالكتاب الرقمى او اكتفى بقراءة مايقع تحت يده على النت دون محاولة البحث عن جديد كما فى السابق بزيارة المكتبات ومتابعة احدث الاصدارات ( وكذلك ادمان العاب النت ) كذلك تكون لكثير منا صداقات جديدة واشخاص جديدة بفكر جديد جعلتنا نتناسى ولو لفترات اصدقائنا القدامى ولكن مضمون هذا التوبيك هو تأثير النت على حي

      في موضوعات خفيفة

    • التشطيب وسنينه

      الأخوه الأفاضل . لقيت مواضيع كتير بتتكلم عن التشطيب وما ادراك عن التشطيب لواحد مغترب موضوع قمة الأرق والقلق . المهم ان شاء الله ناوى اشطب شقه فى الصيف ده . انا خبرتى فى التشطيب = صفر كبير . طبعا انا مقتنع تماما برأى بعض الأعضاء والأخ سى السيد بضرورة الأستعانه بمكتب ديكور . انا دلوقتى فى مرحلة البحث عن المواد المستخدمه فى التشطيب . واول استفسار عندى بخصوص البلاط . ايهما افضل الرخام او البورسلين او السيراميك او الباركيه او DHFاو سيراميك الباركيه . انا مش بتكلم فى المطلق لأن فى المطلق

      في موضوعات شخصية


×
×
  • أضف...