Jump to content
hOuSsAm

ماهى اسباب الاتجاه للتدخين؟ وماهى اسباب عدم التدخين؟

Recommended Posts

انا عارف ان الموضوع ده اتقتل كلام وبحث وكل الناس سواء بيدخنوا او مبيدخنوش عارفين راى الدين والصحة والاقتصاد فى الموضوع ده

طب ايه الجديد؟

مع محولات شخصية كتيرة فاشلة لاقناع ناس كتيرة بالاقلاع عن التدخين (تقريبا نسبة النجاح كانت صفر %) بدات افكر فى اسلوب مختلف لحل المشكلة

وهو اذا كان عدد المدخنين فى العالم بلغ 1.1 مليار شخص على مستوى العالم

وكمان لما نعرف ان عدد المدخنين فى مصر يزداد بمعدل 8-9 % سنويا

ولما نعرف ان المصريين بينفقوا خمسة مليار جنيه مصرى سنويا عالتدخين (طبعا ده قبل تعديل الضرايب المفروضة عالسجاير والاسمنت) وطبعا غير الانفاق عالمخدرات

ده غير ان التدخين اصلا يتسبب في 30% من كل حالات السرطان، وهو سبب 90% من حالات الوفاة بسرطان الرئة، وأكثر من 80% من حالات الالتهاب الشعبي المزمن والانتفاخ الرئوي.

انا سامع واحد من بعيد بيقول ياعم انت مالك (قول يا باسط) سيب اللى يدخن يدخن.... مش هو اللى صحته بتتعب وهو اللى بياخد ذنوب وهو اللى بيضيع فلوسه

اقوله لاء يا سيدى .... احنا كلنا فى مركب واحدة ويوم مهتغرق هنغرق كلنا ودى اسبابى

1- التلوث الناتج عن التدخين يصيب الجميع وليس المدخن وحده ولاسيما الاكثر تضررا المحيطين به. (ومين فى الايام دى مفيش حد قريب منه مش مدخ؟)

2- الانفاق عالتدخين (وهو انفاق ليس من ورائه عائد) يؤثر بالسلب على المجتمع ككل ولا سيما فهو يعمل على تجميع الاموال فى اماكن لاتهتم بصرفها بما يدر بالعائد او النفع عالاخرين

3- يقول سبحانه وتعالى : " الم يروا كم اهلكنا من قبلهم من قرن مكناهم في الارض مالم نمكن لكم وارسلنا السماء عليهم مدرارا وجعلنا الانهار تجري من تحتهم فاهلكناهم بذنوبهم وانشانا من بعدهم قرنا اخرين . "

انا بدات افكر بدل منشتغل على تقليل عدد المدخنين واللى فشلنا فيه........ عالاقل نثبتهم (يعنى ميزدوش اكتر من كدة وده ممكن يكون اللى فى ايدينا)

طيب ايه الفكر الجديد فى كدة

فكرت اننا نعمل منهجية للتعامل مع النشأ او الطفل الجديد (والمتوقع انه يكون اكثر ذكائا وجرأة من الاجيال السابقة له) بحيث يكون عنده من المقومات الشخصية والسلوكيات اللى تبعده عن ممارسة التدخين وبكدة هنضمن عالاقل ان الاجيال الجديدة يوصلوا لبر الامان بعدم التدخين

طيب ايه المطلوب؟

المطلوب ان لو حضرتك مش بتدخن تقولنا:

1- ايه الاسباب الرئيسية اللى مخلتكش تدخن (يعنى وازع دينى - حفاظ عالصحة - تربة بشكل معين - اسباب اقتصادية - قدوة حسنة - رياضى - .........)

2- من وجهة نظرك ايه الحل فى مشكلة التدخين؟

3- ايه القصص الغريبة اللى شوفتها فى موضوع التدخين؟

4- لو عايز تزود حاجة زود

طيب لو حضرتك بتدخن قولنا :

1- ايه الاسباب الرئيسية اللى خلتك تدخن (يعنى نقص الوازع الدينى - اصحابك - قدوتك كانت بتدخن - ...........)

2- حضرتك بتفكر تبطل ولا مبتفكرش ولو ناوى تبطل ايه اللى معطلك او مستنى ايه؟

3- حضرتك لو دخلت البيت فى يوم من الايام ووجدت زوجتك او احد اولادك بيدخنوا هيكون رد فعلك ازاى.......... (وانت عارف كويس انه هيترد عليك ويقولوا اشمعنى انت)

الفكرة هتكون اننا نشوف ايه اكتر المؤثرات اللى بتاثر عالنشئ فى اتخاذ او عدم اتخاذ قرار التدخين وبالتالى هتتكون لدينا منهجية فى توجيه النشئ لسلوك حياتى معين نضمن به (بنسبة كبيرة طبعا ولكن هتكون اقل من 100% ) ابتعاد النشئ عن التدخين

بمعنى ان لو الناس اجمعت ان اهم حاجة فى ابتعادهم عن التدخين هى الرياضة و الوازع الدينى او الصبحة الصالحة فهنركز عالحجات دى بترتيب اولويات ذكرها فى مشاركات الاعضاء

طبعا الموضوع مفتوح للجميع للمناقشة واظن ان كل مكانت التجارب مع التدخين اكتر كل مكانت الاستفادة اكبر

واحد تانى هيقولى ياعم انت عايزنا نعمل جهر بالمعصية والمكان مش مناسب عشان ادخل اقول للناس انى مدخن (اقوله يا سيدى الفاضل المفروض اننا هنا اشخاص اعتباريون ومعظمنا لا يعرف بعضهم البعض الا القليل جدا وبالتالى ستكون المناقشة من اجل الاستفادة ومساعدة الاخرين بتزويدهم بالاسباب وراء التدخين)

تقبلوا تحياتى

Share this post


Link to post
Share on other sites

لى عودة باذن الله فى وقت لاحق

وساتكلم عن تجربتى فى اسباب عدم التدخين

عن نفسى لا ادخن واكره التدخين والمدخنين لا اطيق روائحهم بأختنق لما بأشم رائحة السجاير

الحمد لله لا يوجد احد فى عائلتى يدخن - لا اخى ولا ابى ولا اخوالى ولا اولادهم ممكن نقول 35 فرد منهم واحد فقط يدخن و بصورة متقطعة جدا

اتمنى فى يوم من الأيام يكون هناك احترام لحرية الأخرين فى الحصول على الهواء النقى ( اى نعم الهوا مليان عوادم سيارات ودخان بس مش سجاير ) فى مصر وان فكرة ان السجاير للجدعان والرجالة فقط تنتهى

عمى حسام كل عام وانت بالف خير

ورزقنا الله واياكم ليلة القدر بإذن الله

Share this post


Link to post
Share on other sites

بصراحه انا داخله هنا وقعده مستربعه لحد ما يجي شخص مدخن ويقلي ليه بيدخن وليه عايز يموت نفسه واعز الناس عنده وكل اللى حوليه ؟؟؟؟؟؟؟؟؟؟

وايه احساسه وهو بيدخن وبيأذي نفسه

وهل ........... الصحه ببلاش كده عنده ولا ايه ؟؟؟؟؟؟؟

ومن موقعي وتجربتى مع خالى الله يرحمه ومن واحد اعرفه اللى عامل عمليه قلب مفتوح والتدخين هيموته وبرضه بيدخن من ورا اهله ومراته هتتجنن منه وبعيط عليه من دلوقتى

ومن واحد اعرفه شال فص من فصوص الرئه بسبب التدخين

والله هتجنن

ليه كده بس يا حسام فوقتنى بالموضوع ده

انارايحه اجهز الفطار وراجعه علشان اعرف رأى المدخن ؟؟؟؟؟؟؟؟؟؟؟؟؟؟؟؟؟؟ وربنا يشفيه ويعافيه يارب

Share this post


Link to post
Share on other sites

انا ليه مش بدخن؟

1- الوازع الدينى .... (بصراحة كان فيه ضغط كبير من كل حد حواليا ان التدخين حرام سواء من اهلى فى البيت او جيرانى او المدرسين حتى وانا رايح اصلى فى فتوى شرعية من الازهر بحرمانية التدخين كانت على باب الجامع بالاضافة انى فى الاعدادى سمعت شريط اسمه حرب التدخين)

2- الرياضة ...... كنت بلعب رياضة كتير وانا صغير يمكن لحد بعد الجامعة بشوية فمكنش ممكن اضيع مجهودى فى الرياضة بموضوع التدخين

3- ثقة الاهل بى (طبعا كنت دايما حابب ان احافظ على ثقة والدى فيا وكمية الحرية اللى واخدها واللى بسببها بعمل كل حاجة فى حياتى...... مكنتش عايز فى يوم من الايام يسحب الثقة دى منى ويشوفنى وانا بعمل حاجة غلط او حتى يسمع من حد.... والحمد لله بسبب محافظتى عالثقة دى كانت بتزيد يوم بعد يوم)

4- الرائحة الكريهة للسجاير وعدم فايدتها (منا مش عارف هستفيد ايه لما ادخن واضيع فلوسى عليها)

-5- مفيش حد سواء والدى ووالدتى واخواتى واعمامى واخوالى محدش فيهم بيدخن (الا كان والدى قبل متولد وهحكى قصته فى مداخلة لاحقة) وبالتالى البيئة من حولى كانت نضيفة

تقريبا دى كانت اكتر اسباب ابتعادى عن التدخين ولحد دلوقتى بنصح اى حد يتخذها نهج فى تربية اطفقاله

هرجع تانى باذن الله وهتكلم عن المواقف الغريبة اللى شوفتها فى التدخين

Share this post


Link to post
Share on other sites
aimen

مرسلة 02 September 2010 - 04:48 PM

HOSAM ABDELFATAH, on 02 September 2010 - 04:28 PM, said:

لى عودة باذن الله فى وقت لاحق

وساتكلم عن تجربتى فى اسباب عدم التدخين

عمى حسام كل عام وانت بالف خير

ورزقنا الله واياكم ليلة القدر بإذن الله

امين يارب العالمين

pocy

مرسلة 02 September 2010 - 04:53 PM

بصراحه انا داخله هنا وقعده مستربعه لحد ما يجي شخص مدخن ويقلي ليه بيدخن وليه عايز يموت نفسه واعز الناس عنده وكل اللى حوليه ؟؟؟؟؟؟؟؟؟؟

وايه احساسه وهو بيدخن وبيأذي نفسه

وهل ........... الصحه ببلاش كده عنده ولا ايه ؟؟؟؟؟؟؟

مستربعة يبقى كدة محدش هيجى يقول هو بيدخن ليه

يموت نفسه واعز الناس حواليه..... كتير من الناس مش معترفين باضرار التدخين لانهم ببساطة بيشوفوا ناس عندهم 70 سنة وبيدخنوا بقالهم خمسين سنة ولسه عايشين ولما ابراهيم سعيد ياخد الملعب بطوله خمسين مرة رايح جاى ويطلع والكاميرا تجيب عليه وهو بيدخن يبقى اكيد نص الشباب هيقولوا التدخين ده عادى

ليه كده بس يا حسام فوقتنى بالموضوع ده

ماهو لازم نفوق عشان عمر وياسين ومصطفى وكل اطفالنا يطلعوا منتجين غير مدخنين ويكون برغبتهم واختيارهم مش حد فارض عليهم اختيار شكل الحياة ويكونوا قدوة لغيرهم

Share this post


Link to post
Share on other sites

من حجات الغريبة جدا كنت اعرف واحد بيرتب على احدى كليات التربية وكان بيسافر بعثات لاوربا وكان طول الكلية عادى مش بيدخن ولا اى حاجة وبعد متخرج بسنتين لاقيته بيدخن فسالته مش انت كنت ايام الكلية مش بتدخن قالى انا بدات ادخن بعد مخلصت (استغرابى بسبب ان معظم المدخنين بيبداوا التدخين فى سن الثانوى او الكلية ولكن بعدها ده صعب)

طيب السؤال انت ليه دخنت؟ قال مفيش كنت مرة قاعد مع دكتور عندنا فى الكلية واذا به بيعزم عليا بسجارة فاتحرجت ارد ايده واخدتها وولعت وبدات ادخن وكل مرة اقعد معاه يعزم عليا بسجارة وتوالت الحكاية لحد مبقيت مدخن

نفس القصة شفتها مع واحد تانى بيقولى كنت كل يوم اروح اقابل مديرى عالقهوة ومعايا اللاب بتاعى اساله على حجات واخد من خبرته واشرب معاه الشيشة وده من الاسباب اللى بتخليه يقيمنى كويس ويرقينى عالطول

-----------------------

اتعلمت من الحجات دى اننا نزرع فى الطفل الثقة فى النفس والاعتماد عالذات وميكونش وصولى ويعرف ان رزقه بايد ربنا ومحدش من البشر ليه فضل عليه

بالاضافة انه يتعلم ازاى يقول لاء لانه لو تساهل مع كل واحد كدة هيخسر نفسه

ولى عودة

Share this post


Link to post
Share on other sites

قرات مرة ان للمدخن استعداد وراثى للتدخين بمعنى لديه جينات من اثر تدخين والده تحفزه

للتدخين

فى عندنا عيب خطير ان كثير من الاهل سواء اب او عم او خال يرسل طفلا صغيرا لشراء السجائر

ومرة على مرة تصبح شئ عادى وطبيعى عند الطفل وبعد كده يصبح مدخن المستقبل

شئ خطير اخر لاحظته وجود اكشاك تبيع حلويات وطبعا معها السجائر وده الشئ الاساسى له بجوار المدارس

ويبيحون لانفسهم بيعها لاطفال المدارس دون ادنى مراعاة لصغر سن المشترى ولما سألت واحد منهم

ليه بتبيع لولد صغير سجاير برر انها حد ارسله لشرائها ولما قلته ممكن تكون له ولاصحابه كان

الرد لو انا مابعتش حيروح يشترى من حد تانى منطق غريب لكن لو الحكومة اصدرت قرار بمنع بيع

دخان لاقل من 18 سنة مثلا ولو كل بائع راعى ضميره ورفض البيع لصغار السن حيكون حل جذرى

للمشكلة من اساسهالان اعلى نسبة فى التدخين اصبحت لاقل من 18 سنة وخاصة طلاب المدارس

Share this post


Link to post
Share on other sites

ازيك يا حوسام

شوف باختصار شديد - اسباب التدخين - مقارنة بين الرجل والمراه

عند الرجال -

السبب الفراغ والزهق ثم الفراغ ثم الزهق اول سبب واهم سبب

الزهقان يأفأف - يعنى يقول اوفون ثم اوفون ومن هنا جات اف افة السجاير

عند الستات -

انها تكون فى مركز مهم ومسؤولية شديدة عليها - داه بجد

امراة مسؤولة عن شركة او وزارة او برنامج تلفزيونى شهير

او حتى معلمة فى قهوة بلدى او صاحبة كشك وبتصرف على ايتام

كلهن يتجهن للتدخين لنفس السبب المسؤولية الشديدة

- يبقى فى تناقض بين الرجل والمراة

هو فاضي علشان كدا بيدخن

وهى مشغولة جدا وعلشان كدا بتدخن

اسباب عدم التدخين -

بالنسبة للرجال

الصحة طبعا اهم حاجة وصحة اولادهم

بالنسبة للستات

المجتمع انت عارف منظر الست اللى بتشرب شيشية او سجاير بيبقى غير لائق بالمره

بالاضافة ان المجتمع بيرفض كدا لكن مش مسالة صحة اطلاقا

:lol:

يبقى السبب عند الاتنين ومن المقارنة اللى فاتت - مختلف تماما بين الرجل والمراة

كلمة اخيرة و نصيحة للكل وانا اولكم

:lol:

ابعدو عن التدخين لانه السبب الاول والرئيسي لامراض سرطان الرئة

ربنا يحفظكم ويحفظنا جميعا ويشفى جميع مرضانا - امين

اغابي

:roseop:

Edited by اغابي

Share this post


Link to post
Share on other sites

طبعا انا كمدخن ومن كبار المدخنين المستثمرين اموالهم في ضياع صحتهم مش هينفع ادخل ادافع عن المدخنين ولا ابرر اتجاهم للتدخين

المعروف طبعا ان المشروب الرسمي لاي صوان عزاء وخصوصا في المناطق الشعبية هو السجاير تلاقي واحد قام فارد صدره كده وبكل ثقة طلع علبة السجاير الكليوباترا وماشي يعزم علي السادة المعزيين بس ما عرفش بعد ما السجاير غليت العادة دي لسه موجودة ولا ايه

عموما انا حكايتي مع التدخين بترجع للعصور الغابرة في سن 13 او 14 سنة كانت حاجات تفاريحي وطياري كده علي سبيل التجربة والفضول ليس الا وفي مرة من المرات وانا لسه برضه بجربها يعني كان ممكن كل 4 شهور سيجارة ولا حاجة واحد صاحبي ابن حلال قال ايه ده السجاير مش بتتشرب كده قولت له ازاي يا سيدي قالي اسحب علي صدرك كده وطلعها من مناخيرك كده

وان ما حييت مش هنسي اليوم ده وكانه لسه امبارح انجاز عظيم وسحبت اول نفسي في حياتي علي صدري ورغم انه كان دخان مالوش معني بس حسيت اني منتشي والحياة شفتشي والسيجارة دي اخر حلاويات والناس بتظلمها

بدأت بقي مرحلة اني اشتري من مصروفي كلما تيسر ولاني اتوظفت في سن 18 سنة بقيت اقدر اشتري السجاير بانتظام وجربت الاجنبي صحيح مش يومي يمكن مرة في الاسبوع بس حسيت بفرق كبير بين الاجنبي والمصري حسيت اني كنت بشرب شواشي درة زي صلاح السعدني في فيلم الأرض

واهو بقالي اكتر من عشرين سنة مدخن مبدئي صحتك في العلبة دي

ومش بفكر ابطل تدخين في الوقت الحالي

لاني بصراحة بحب السجاير smk:

Share this post


Link to post
Share on other sites

طيب ايه المطلوب؟

طيب لو حضرتك بتدخن قولنا :

1- ايه الاسباب الرئيسية اللى خلتك تدخن (يعنى نقص الوازع الدينى - اصحابك - قدوتك كانت بتدخن - ...........)

2- حضرتك بتفكر تبطل ولا مبتفكرش ولو ناوى تبطل ايه اللى معطلك او مستنى ايه؟

3- حضرتك لو دخلت البيت فى يوم من الايام ووجدت زوجتك او احد اولادك بيدخنوا هيكون رد فعلك ازاى.......... (وانت عارف كويس انه هيترد عليك ويقولوا اشمعنى انت)

تقبلوا تحياتى

لك كل تحياتي أولاً لإثارة هذا الموضوع

انا واحد من الناس اللى ربنا عز وجل إبتلاهم بالتدخين , نشأت وسط عائلة معظمها مدخنيين , والدي وأخوالى وحتى أخويا الصغير كان بيدخن قبلى , وعمري أبداً ما خطر في بالى انى ممكن أدخن في يوم من الأيام ولغاية لما خلصت الثانوية العامة ودخلت الجامعة ما كنتش جربت حتى انى امسك سيجارة وكنت برفض كمان انى اروح اشتريها لوالدى. طب ايه اللى حصل

لما دخلنا الجامعة كان لى ابنة خالة أكبر منى بسنة واخد شقة إيجار بالقرب من الجامعة مع بعض زملائه , وواحد منهم خلع من السكن واقترح على ابن خالتى انى اسكن معاهم بدل منه , ووافقت طبعاً , فرصة بدل ما دور على سكن , وقعدت مع ابن خالتى في الغرفة وهو من المدخنيين الشرهيين جداً لدرجة انه كان ممكن يخلص علبة سجاير في اقل من 5 ساعات مثلاً , وكنت الاحظ انهم جميعاً بعد العشاء او الغداء لاننا كنا بناكل مع بعض انهم يقوموا يعملوا الشاي وهاتك يا تدخيين , وانا كنت اقعد اتفرج عليهم وهما في حالة انبساط وضحك واسأل نفسي هو ليه لازم السيجارة بعد الغداء مباشرة او بعد العشاء مباشرة , وليه لازم معاها كباية شاي هيا ما تنفعش من غيره , لان نفس التصرفات دي كان والدي بيعملها برضه , لازم الشاي مع السيجارة , لازم السيجارة وهو داخل الحمام, فبدأت أسأل كل واحد فيهم بتحس بإيه يعني وانتا بتشرب السيجارة مع الشاي , وليه ما بنفعش تذاكر الا لازم جنبك علبة السجايروليه السيجارة في الحمام , الأسئلة دي كان نفسى اسألها لوالدي لكن ما كنتش أقدر ولا أجرؤا .

المهم , بعد البحث لم أصل إلى إجابة مقنعة او منطقية منهم , فقلت خلاص أنا لازم أجرب بنفسي وأشوف إيه القصة دي ومش قضية هتخلص التجربة وأرميها على طول , وفعلاً إشتريت علبة سجاير وبدأت أشرب نظام تنفيخ كده , وقعدت شهرين أعتقد على الموضوع ده , وبعد كده جيت قلتلهم في مرة وكلهم متجمعين إنتوا بتخدعوا نفسكوا السيجارة دي ولا ليها لازمة انا بقالى شهرين ولا اى شعور بحاجة ولا بتأثر في اصلاً لدرجة انى بقعد باليومين ثلاثة من غير سجاير عادي وبعرف أذاكر كويس جداً , قام واحد فيهم قالى طب ورينا بتدخن ازاى , ورتهم طبعاً , قالى لأ هيا بتتشرب كده خد على صدرك كده يا معلم , وربنا يبعد عندكم احساس غريب جسمى كله مخدر , حاسس انى مش في الدنيا , طاير في السما ... ما تفهموش ايه اللى حصل , عجبنى الاحساس ده صراحة واستمريت فترة على كده , ودي كانت البداية وللأسف الشديد

يعني الموضوع كله كان حب فضول مميت ومدمر , وعلى فكرة من ساعتها وبعد اللى حصل ما بقاش عندي حب فضول بالشكل ده لاى حاجة , حتى لما بشوف حاجة ونفسي اعرفها وفضولى قاتلنى افتكر ان الفضول ده كان السبب في انى مدخن فبهدي وممكن اتغاضي عن الحاجة دي خالص.وكمان اللى ساعدنى ان لما والدى عرف ولأول مرة في حياته كنت متخيل انه هيضربنى مثلاً او يزعق ودى طبيعته لكن فوجئت به يسألنى طب انتا بتشرب نوع ايه , قلتله كوكو الضعيف "كليوبترا" قالى لأ وحشة اشرب أجنبي احسن وانظف :blink: وزود مصرفى اللى يكفي لشراء علبة أجنبي كل يوم.

بالنسبة للتبطيل فنفسي وبعمل المستحيل وجربت أكثر من مرة وعندي كتب وشرائط واسطوانات , لكن مش عارف حاسس ان فيه حاجة بتشدنى للتدخين تانى, وكل اما ابطل واكسر علبة السجاير واقول خلاص مش هرجع ليها تانى ابص الاقي الدنيا كلها فوق دماغى والدى تعبان ومحتاج كام عملية ومشاكل في الشغل وقصص تخلينى ارجع تانى وأسوء من الأول, ومن أول رمضان بحاول وكل اما الاقي نفسي سايق في التدخين قوي افتح الفيديو ده وأشوفه "تشريح رئة مدخن", وأدعى ربنا إنه يزيح البلاء ده عني وعن كل المسلمين , ودعواتكم لى ولكل المبتلين امثالى

http://www.youtube.com/watch?v=M5GKGgXPlwQ&feature=related

انا بحاول ابطل لأسباب كثير من ضمنها لما بفكر ان لما يبقي عندي اسرة واتجوز , إيه ذنب مراتى وايه ذنب أولادي , مش إنى أعرضهم لخطر التدخين وبس , ايه ذنبهم انى ادمر نفسي ويحصلى حاجة بسبب التدخين وهما أكيد هيكونوا محتاجين لى وأنا أسبهم وأرحل, خالى مات بسبب التدخين "سرطان في الرئة" , ووالدي العمليات اللى بيعملها كل شوية بسبب التدخين "دوالى المريء" , وابن عم والدي مات بسببها بعد ما غير أكثر من شريان في القلب.

ربنا يحفظ كل الناس ويبعد عنا البلاء ده , انا بكره التدخين وان شاء الله هبطل في يوم من الأيام وأرجو أن يكون قريباً.

Edited by nightmare

Share this post


Link to post
Share on other sites

اعتقد ان السينما المصرية ساهمت كثيرا فى نشر ثقافة التدخين عندنا وخاصة بالنسبه للشباب .. ففى كل الافلام خاصة القديمه نجد ان السيجاره هى الرفيق والمنقذ السريع فى حالة المشاكل والهموم ، كما انها دليل على الرجوله ومن مكملات المظهر الانيق فى الحفلات والمناسبات السعيده بالنسبه للرجل والمراه على السواء

وانا اعرف فتاه تدخن وتقول انه رغم كل المحاذير على التدخين الا انها تجد فيه ميزه كبيره لا تستطيع التخلى عنها ..هذه الميزه هى انها تمارس فيه حريتها التى تفتقدها فى كل شئ .. فحياتها كلها روتينيه ممله تكرهها لكنها مرغمه على ممارستهاابتداء من ذهابها لعملها فى الصباح ومرورا بكل ما تفعله حتى المساء ، اما التدخين فلا احد يرغمها عليه انما هى تمارسه بكامل رغبتها وحريتها

اى انه مجرد فرصة لممارسة الحريه ولا دخل له بالطب او الدين

شكرى وتحياتى

Share this post


Link to post
Share on other sites

اعتقد ان السينما المصرية ساهمت كثيرا فى نشر ثقافة التدخين عندنا وخاصة بالنسبه للشباب .. ففى كل الافلام خاصة القديمه نجد ان السيجاره هى الرفيق والمنقذ السريع فى حالة المشاكل والهموم ، كما انها دليل على الرجوله ومن مكملات المظهر الانيق فى الحفلات والمناسبات السعيده بالنسبه للرجل والمراه على السواء

وانا اعرف فتاه تدخن وتقول انه رغم كل المحاذير على التدخين الا انها تجد فيه ميزه كبيره لا تستطيع التخلى عنها ..هذه الميزه هى انها تمارس فيه حريتها التى تفتقدها فى كل شئ .. فحياتها كلها روتينيه ممله تكرهها لكنها مرغمه على ممارستهاابتداء من ذهابها لعملها فى الصباح ومرورا بكل ما تفعله حتى المساء ، اما التدخين فلا احد يرغمها عليه انما هى تمارسه بكامل رغبتها وحريتها

اى انه مجرد فرصة لممارسة الحريه ولا دخل له بالطب او الدين

شكرى وتحياتى

[/quot

يا جماعة ان عندى رأى ممكن يكون مختلف شوية عن الآراء السابقة أولا: عدم التدخين دى نعمة كبيرة جدا وكل شخص مش بيدخن او لم يشرب سيجارة فى حياته يبقى هو فى نعمة كبيرة جدا جدا

ثانيا الأشخاص المدخنين ممكن نقسمهم الى قسمين : القسم الأول وهما الناس الشرهون فى التدخين يعنى ممكن يشربوا 40 سيجارة فى اليوم او 20 سيجارة ودول طبعا بينهوا انفسهم بإديهم وبيقضوا على صحتهم ولو دخلت دماغ اى شخص منهم وسألته انت بتدخن كل السجاير دى ليه والله ما هايلاقى اجابة عشان هو بس اتعود على كدة

والقسم الثانى : مدخنين بس بالمعقول يعنى ممكن يشرب سيجارة الى 5 او 6 سجاير فى اليوم واحب اقولكم انى من الناس الى بتعمل كدة والحمد لله قدرت اخفض معدل السجار الى ان انعم الله عليا وامتنعت عن السجاير وبقالى دلوقتى اكتر من سنة ما بشربشى سجاير

عارفين ليه ؟ عشان انا من الأول مش متعود عليها

الخلاصة يا جماعة انا بنصح الناس الى شرهة فى التدخين ممكن يمسكوا العصايا من النص ويحاولوا انهم يخففوا عدد السجاير الى بيشربوها والله عن تجربة ممكن يبطلوا خالص وحتى لو ما بطلوش التدخين هايحسوا بفرق كبير لما يمشوا على معدل ثابت فى التدخين وجربوا وقولولى وربنا يارب يبعد اى حد من هذا الصديق اللعين وهى السيجارة

Share this post


Link to post
Share on other sites

اكمل موضوع التدخين بعد فترة توقف فى اجازة العيد

بجد يا جماعة المشاركات عجبتنى اوى وكلها مفيدة

ولازم اعلق عليها عشان نستفيد بوجهات النظر المختلفة

Hend ali

مرسلة 05 September 2010 - 11:57 PM

قرات مرة ان للمدخن استعداد وراثى للتدخين بمعنى لديه جينات من اثر تدخين والده تحفزه

للتدخين

فى عندنا عيب خطير ان كثير من الاهل سواء اب او عم او خال يرسل طفلا صغيرا لشراء السجائر

ومرة على مرة تصبح شئ عادى وطبيعى عند الطفل وبعد كده يصبح مدخن المستقبل

شئ خطير اخر لاحظته وجود اكشاك تبيع حلويات وطبعا معها السجائر وده الشئ الاساسى له بجوار المدارس

ويبيحون لانفسهم بيعها لاطفال المدارس دون ادنى مراعاة لصغر سن المشترى ولما سألت واحد منهم

ليه بتبيع لولد صغير سجاير برر انها حد ارسله لشرائها ولما قلته ممكن تكون له ولاصحابه كان

الرد لو انا مابعتش حيروح يشترى من حد تانى منطق غريب لكن لو الحكومة اصدرت قرار بمنع بيع

دخان لاقل من 18 سنة مثلا ولو كل بائع راعى ضميره ورفض البيع لصغار السن حيكون حل جذرى

للمشكلة من اساسهالان اعلى نسبة فى التدخين اصبحت لاقل من 18 سنة وخاصة طلاب المدارس

مدام هند مساء الخير

موضوع الوراثة اظن انه مش لازم لان انا وكتير من اصحابى كانوا ابائنا مدخنين ومحدش فينا طلع مدخن

بالنسبة ان الطفل يروح يشترى علبة السجاير كان واحد صحبى كل يوم ينزل بالليل يشترى العشا وعلبة السجاير لبباه (وكانت علبة سوبر كمان) الكلام ده من واحنا فى 3 ابتدائى يمكن لحد الجامعة ولحد مشتغلنا واحنا متربيين سوا وكل يوم ينزل يشترى العشا وعلبة السوبر لبباه بس بردوا مش مدخن

طبعا انا عارف ان لكل قاعدة شواز بس دى الحالات اللى شوفتها بعنيا وان كنت اؤيدك اننا ناخد بعين الاعتبار موضوع نبعد مصادر التدخين عن ولادنا

بالنسبة ان التجار بيبعيوا للاطفال السجاير فعلا دى مشكلة كبيرة واذكر ان احد التجار اللى كان فى شارعنا قال لوالدى ان حسام وصاحبه كل يوم بيجى ياخد علبة سجاير ومينفعش فى السن ده ولما والدى سالنى شرحتله الموقف....... بس عجبنى التاجر شعوره بالمسئولية انه قال لوالدى

Share this post


Link to post
Share on other sites
عند الستات -

انها تكون فى مركز مهم ومسؤولية شديدة عليها - داه بجد

امراة مسؤولة عن شركة او وزارة او برنامج تلفزيونى شهير

او حتى معلمة فى قهوة بلدى او صاحبة كشك وبتصرف على ايتام

كلهن يتجهن للتدخين لنفس السبب المسؤولية الشديدة

- يبقى فى تناقض بين الرجل والمراة

هو فاضي علشان كدا بيدخن

وهى مشغولة جدا وعلشان كدا بتدخن

اسباب عدم التدخين -

بالنسبة للرجال

الصحة طبعا اهم حاجة وصحة اولادهم

بالنسبة للستات

المجتمع انت عارف منظر الست اللى بتشرب شيشية او سجاير بيبقى غير لائق بالمره

بالاضافة ان المجتمع بيرفض كدا لكن مش مسالة صحة اطلاقا

يبقى السبب عند الاتنين ومن المقارنة اللى فاتت - مختلف تماما بين الرجل والمراة

كلمة اخيرة و نصيحة للكل وانا اولكم

ابعدو عن التدخين لانه السبب الاول والرئيسي لامراض سرطان الرئة

ربنا يحفظكم ويحفظنا جميعا ويشفى جميع مرضانا - امين

اغابي

مدام اغابى مساء الخير

طبعا اسباب التدخين عند المراة دى مش مبرر ليها وان كانت رؤيتك صحيحة

فعلا اكتر السيدات اللى لاقتهم بيدخنوا كانوا فى مراكز مرموقة

وان كانوا منتشرين فى القاهرة والاسمكندرية اكتر من الاقاليم (وطبعا دى ليها اسبابها الكتيرة مث الثقافة والمستوى الاجتماعى والتدين والوسط المحيط والوسط المادى والمستوى الوظيفى)

بس بردوا ده ميمنعش ان موضوع التدخين بدا ينتشر بين طالبات الجامعات والثانوى وفى رايي ده سببه الرئيسى عدم متابعة الاهل واصدقاء السوء وعدم وجود الوازع الدينى

Share this post


Link to post
Share on other sites

الفاضلان سمبا ونايت مار

بجد عجبتنى مداخلتكوا وشجاعتكوا ويمكن يكون فى كلامكوا علاج لكتير من مشاكل التدخين

بس مش هقدر اعلق عليهم دلوقتى

هعلق باذن الله عليهم فى وقت اخر

تقبلوا تحياتى

Share this post


Link to post
Share on other sites

الحل الجذري لمشكلة التدخين في مصر ‏

طالعتنا جريد المصري اليوم بالخبر التالي:‏

‏10 ملايين مدخن في مصر ينفقون 110 جنيهات شهريا على السجائر ‏

كشفت مناقشات ندوة «ثورة ضد المخدرات» التي نظمها الجهاز المركزي للتعبئة العامة والإحصاء، ‏الأحد، عن أن النسبة الأولية للمدخنين في مصر تبلغ 9% من السكان، وأن 10 ملايين مواطن ‏ينفقون 110 جنيهات شهريا في المتوسط على التدخين........‏

وياسادة كل الحلول التى تطبقها الحكومة من رفع الأسعار ورفع الحمارك هي حلول ليست بجذرية ‏وليست بشافية والحل الجذري بيد المدخنين وبمساعدة الإعلام المصري والتوعية بالمساجد ودور ‏العبادة ولكن للأسف هذا الحل الجذري سيغضب كثير من الأطباء ومراكز معالجة المدمنين من ‏مدخنى كل أنواع المدخنات من سجائر وشيشة وجوزة وغيرهم مما يستلزم إشعال النار لكي تتم عملية ‏التدخين وليست الشرب حيث تعود المدخن المصري على الجملة الخاطئة "خد إشرب سيجارة " وكأن ‏المدخن يضع الدخان في كوب ويشرب الدخان بالهنا والشفا خادعا نفسه بعد أن وسوس له الشيطان ‏والعياذ بالله بأن "شربه" للدخان ينطبق تحت قول الله سبحانه وتعالى: ( وَكُلُوا وَاشْرَبُوا وَلا تُسْرِفُوا إِنَّهُ ‏لا يُحِبُّ الْمُسْرِفِينَ ) الأعراف/31 وقوله: (كلوا واشربوا هنيئا بما أسلفتم( [الحاقة/24] وقوله: (كلوا ‏واشربوا هنيئا بما كنتم تعملون( [المرسلات/43] حيث أنه يشرب السجاير والمدخنات وأنه لا يدخنها ‏بينما المدخن بتدخينه مقارنة بغير المدخن يعتبر من المسرفين والمبذرين وفي هذا الشأن يقول الله ‏سبحانه وتعالى: وَآتِ ذَا الْقُرْبَىٰ حَقَّهُ وَالْمِسْكِينَ وَابْنَ السَّبِيلِ وَلَا تُبَذِّرْ تَبْذِيرًا ﴿٢٦﴾ إِنَّ الْمُبَذِّرِينَ كَانُوا ‏إِخْوَانَ الشَّيَاطِينِ وَكَانَ الشَّيْطَانُ لِرَبِّهِ كَفُورًا ﴿٢٧﴾ "سورة الإسراء" ويقول الرسول صلى الله عليه ‏وسلم: "لا ضرر ولا ضرار" حيث "الضرر" يقع على المدخن نفسه و"الضرار" يقع على المحيطين ‏به من زوجته وأطفاله وبالتأكيد هو لا يعى ويجهل بأمر هذا "الضرر والضرار " فسيرد عليك المدخن ‏مجادلا وقائلا أنا لا أقصد أن أضرهم فأنا نفسي أدخن وصحتي زي البمب فأين الضرر والضرار ‏هنا...ويضحك علينا الغرب الذي يدخن السجاير ولا يشربها ويقول علينا هاهي أمة "إقرأ" إذا قرأت لا ‏تفهم ما قرأته وإذا فهمت فهي لا تطبق ما فهمته !....‏

وإليكم أحباب الله العلاج الشافي بإذن الله "عليكم بالإكثار من شرب الماء بعد قراءة البسملة عليه ‏بصوت مسموع ‏

وهنا تتجلى رحمة الله بعباده عندما يقول‎: ‎‏ أَفَرَأَيْتُمُ الْمَاءَ الَّذِي ‏تَشْرَبُونَ * أَأَنْتُمْ أَنْزَلْتُمُوهُ مِنَ الْمُزْنِ أَمْ نَحْنُ الْمُنْزِلُونَ * لَوْ نَشَاءُ ‏جَعَلْنَاهُ أُجَاجًا فَلَوْلَا تَشْكُرُونَ)‏‎ ‎الواقعة: 68-70‏‎ ‎‏ ‏

‏ أنتم لن تروا بأعينكم موجات الصوت الصادرة منكم ولن تروا ماذا ستفعله تلك الموجات الصوتية من ‏تغيير جوهري للماء الذي خلقه أحسن الخالقين الله (أبحاث علمية يابانية مؤكدة) والذي أكدت أن هناك ‏فروق ملحوظة بين الماء الذى يسمع موسيقى هادئة والماء الذى تسبه وتشتمه ولكم أن تبحثوا في ‏الإنترنت عن ‏The secret of Water‏ لتتأكدوا بأنفسكم من مصداقية هذا الأمر والذى تم ‏التأكد منه عمليا بمداومة شرب الماء مع البسملة بصوت مسموع ‏مما جعلنى أستغني عن العلاج الكيميائى الصيدلي التقليدي بالعلاج ‏بالماء والغذاء الصحي بعيدا عن الغذاء المصري التقليدى من مسبكات ومقليات ومشويات ‏على الفحم وتفاصيل ذلك تأتى في موضوع آخر ونعود لطريقة العلاج بالماء للتخلص من آفة التدخين ‏‏(الحرام شرعا وعقلا وأيضا تجدونه محرما في كتاب الله القرآن الكريم ولكن بطريقة غير مباشرة ) ‏‏….‏

شدوا السيفون على ما بداخلكم

كما تتوضأون ظاهريا (خارجيا) بغسل الأيدى والوجه والقدمين خمس مرات يوميا فلماذا لا نتوضأ ‏داخليا بشد السيفون على ما بداخلنا على الريق ولا تنسوا أن السيفون يحتوي والله العظيم على كثير ‏من الماء الصالح للشرب ونحن نهدر هذا الماء للتخلص من مخلفاتنا من بول وبراز فمن باب أولى أن ‏نتخلص من مخلفات التدخين المتواجدة والمعششة داخل أجسامنا بشد السيفون عليهم غير ناسين أن ‏الماء يكون 75% من وزن جسم الإنسان فما بالكم لو كان هذا الماء هو الماء الذي ‏سمع "بسم الله الرحمن الرحيم" ويقول الله سبحانه وتعالي: "وَجَعَلْنَا ‏مِنَ الْمَاء كُلَّ شَيْءٍ حَيٍّ أَفَلَا يُؤْمِنُونَ" الأنبياء 30 ‏

دكتور مهندس جمال الشربيني

خبير تحليل المشاكل من جذورها

للإستشارة ولمزيد من المعلومات لوجه الله سبحانه وتعالى

برجاء مراسلتي على ايميلي في صفحتي الشخصية

Edited by عبير الشرقاوي
حذف ايميل و موبايل

Share this post


Link to post
Share on other sites

ينهار أبيض وجميل

دكتور مهندس جمال الشربينى منورنا في المحاورات ،، يادي النور والبنور

نورتنا فعلا يا دكتور

وبمناسبة الموضوع أحب أضيف صورة للتدخين في مطاعم اليابان

423562_302019709858219_148362335223958_844005_1312094147_n.jpg

Share this post


Link to post
Share on other sites

Join the conversation

You are posting as a guest. If you have an account, sign in now to post with your account.
Note: Your post will require moderator approval before it will be visible.

Guest
Reply to this topic...

×   Pasted as rich text.   Paste as plain text instead

  Only 75 emoji are allowed.

×   Your link has been automatically embedded.   Display as a link instead

×   Your previous content has been restored.   Clear editor

×   You cannot paste images directly. Upload or insert images from URL.


  • Similar Topics

    • قطع العلاقات مع قطر ... اسباب ونتائج

      رسمياً . مصر والسعودية والإمارات والبحرين وليبيا واليمن والأردن يقطعان العلاقات الدبلوماسية مع قطر . وقد اعلنت جمهورية مصر العربية غلق أجواءها وموانئها البحرية امام كافة وسائل النقل القطرية حرصاً على الامن القومي المصري، وستتقدم بالاجراءات اللازمة لمخاطبة الدول الصديقة والشقيقة والشركات العربية والدولية للعمل بذات الاجراء الخاص بوسائل نقلهم المتجهة الى الدوحه. ... اليوم وفي ذكرى العاشر من رمضان  تشجيعها الإرهاب وأيوائها للمطلوبين ومؤامراتها على الدول العربية وعلاقاتها بإيران وتصريحات أمير

      in سياسة دولية

    • التدخين  ... نصائح للتوقف عنه - هل يوجد نظام يمكن أتباعه؟

      أحاول التوقف عن التدخين ولكن أشتاق للسجائر خصوصا وأنا شغال على الكمبيوتر هل يوجد بديل يلهى عن السجارة وما هى الخطوات التى يجب أتبعها؟ هل الغضب السريع عادى عند وقف التدخين؟ وهل من الأفضل النوم الكثير أم محاولة السهر؟ غير كده لا أقدر أن أتخيل الشاى أو القهوة من غير سجارة جزاكم الله كل خير

      in استشارات طبية و نفسية

    • فضفضة..(2)أخطار التدخين, و طرق الحماية منها.

      أخطار التدخين, و طرق الحماية منها. الزملاء الأعزاء, كنت مدخنا شرها, و لم يقل عدد السجائر التى كنت أدخنّها ( و ليس "أشربها" ما يقول البعض), إلى درجة أن لسانى كان دائما ملسوعا, أصفر اللون مهما غسلت الفم بالفرشاة, كما أن أسنانى أكتسبت طبقة من النيكوتين لم تنفع فيها الصنفرة, فضلا عن احتقان حلقى الملتهب دائما, و ضيق فى التنفس فى نهاية اليوم, ثم عدم القدرة على النوم بسبب " الكحة". و فى يوم مفترج, قررت أن أتوقف عن التدخين, رغم أنى كنت قد اشتريت " خرطوشوة سجائر" فى ذلك اليوم. و عندما زار

      in موضوعات جادة

    • لماذا اغلق موضوعى دون ابداء اى اسباب

      http://www.egyptiantalks.org/invb/index.php?showtopic=142866 ممكن استفسار هل تغلق المواضيع التى توضع فيما سمي بالصالون الثقافى لارضاء بعض المشرفين لان الموضوع لم يكن على هواه فقط ؟ او لمجرد الاختلاف فى الاراء ؟ واذا كان الموضوع مخالفا لقوانين المنتدى لما تركتموه اسبوعا كاملا على صفحات المحاورات ؟ فما هى الاسباب التى ادت الى غلقه والتى تتفق مع قوانين المنتدى ؟

      in شئون المحاورات

    • اسباب مشاكل مصر وكيفية حلها

      النهاردة قريت مقالة عجبتنى وراى كاتبها قريب من رايى فى حال مصر والوضع الحالى انا من زمان رايى انى مش مبارك وعصابته بس هما السبب الوحيد فى الا احنا فيه احنا كلنا كمصريين عامل كبير وسبب سبب من اسباب المشاكل ده ولازم نعترف بكده ونصصح اخطاءنا قبل فوات الاوان ياسادة كم منا فى حاجة لتغيير اخلاقه كم منا فى حاجة لتغيير ثقافته كم منا فى حاجة لاحترام اقل القيم الا تخلينا فى مصاف الدول المتقدمة ومنها احترام الوقت على سبيل المثال ربنا يصلح احوالنا جميعا ويجعلنا جيل مفيد لمصر المقال يخطي

      in موضوعات جادة

×
×
  • Create New...