اذهب الي المحتوي
إنشاء باب جديد بعنوان سد النهضة الإثيوبي لكل الموضوعات المتعلقة بسد النهضة ×

مغامرات عصابة "حساس"


Recommended Posts

انت يا جدع انت يا ابن مصر .. انتا سايبني كده واقف من ساعتها لما رجلي السليمة نمِّلت.... ايه يا ابني هي كلكعت معاك لما جيبت سيرتي ... ايه اللي حصل بعد كده ... اخلص.. فاتورة الكهربا اللي اتسرقت الكوبانية بعتته علي عنواني .. هو انت بس فالح تخبطلي عنوان كبير زي ده و بعدن تفلسع...

ياللا يا بابا .. اشرب بق مية و خلصنا ابوس ايدك ...

بقية الحلقات سواء بتاعت سي السيد و الا بتاعتي خلصت و مش عارفين ننزلها السوق قبل ما الكهربا ترجع... حط الفيوز بقي و خليك جدع ...

ومن هنا ومن قاعة محكمة زنانيري للاحوال الشخصية أنا بأمنكم امانة .. لو حصل لي أي حاجة حتى لو جالي شوية كُحه او اختفيت ولو لخمس دقايق وماشوفتونيش آون لاين في المحاورات .. على طول تروحوا تقولوا لأمي وبلغوها إن إبن مصر حفيد عائلة النجعاوي خلص علي ...

ودمي هايبقى في رقبت كل بتوع المحاورات ..

ودمي هايبقى في رقبت كل بتوع المحاورات

ودمي هايبقى في رقبت كل بتوع المحاورات

اللي يحب النبي يسقف ...

سي السيد .. انت في الكوميدي ... بجد بجد... مالكش حل

رابط المشاركه
شارك
  • الردود 253
  • Created
  • اخر رد

Top Posters In This Topic

Top Posters In This Topic

Popular Posts

حبيب قلبى سكوب. انتظر فى القريب العاجل تكمله سرقه مركز التجميل تتبعها دره تاج عصابه حساس وهى... سرقه مطار القاهره .. علشان خاطر عيونك الى وحشتنى ضحكتها....  

يا حلاوو يا جودعاااااااااااااااااااااااااااااااااااااااااااااااااااااااااااااااااااان ....  حنرجع لأيام الشقاوة .... لأ و النية حتبقي علي مطار القاهرة بعد كده ... البيه جاييلي بعد 11 سنة و يخططلي

Posted Images

سي السيد .. انت في الكوميدي ... بجد بجد... مالكش حل

يا عم الله يكرمك .. ده بعض ما عندكم ..

تصدق بالله يا سكوب ... بقى لي فترة مجهز أحداث قصة من قصص العصابة إسمها " عصابة سرقة الحمير " وإنت بطلها الرئيسي لإنها بتدور في إيطاليا والجُزر التابعة لها .. لكن نفسي مسدودة زي الست الحامل كده ومش قادر أكتب حرف واحد فيها ....

يالله ربنا يزيح عننا .... قول آمين ..

رابط المشاركه
شارك

بلاش تبقوا ظلمه كلكوا يعنى انا ما فوقتش من صدمه الحادثه الى حصلت بجد لسكوب خفت لحسن الشيخه صافيناز الكاسحه تكون صدقت فعلا وخلت كلامى يتحقق فخفت عليكوا والله.... عموما انتم احرار.....

حشيش : لا حول ولا قوه الا بالله .. امال اصحاب وشله ومافكرتش تسال عليه فى المصيبه الى حصلتله..

سى السيد : تلاته بالله العظيم لو ما نطقتش ايه الى حصل... لاكون فاتح دماغك........الله ما تتكلم كتك قطر يلهفك ويفرمل فوقيك يسحلك ما يقطعكش وميعرفوش يخلصوك من القطر علشان هاتتلف هلى العجل وتتلعبك مع الكامات.....( يلتقط انفاسه ويكمل ) وبعد ما يخلصوك ....

حشيش : ايييييييييييييييييييييه حيلك حيلك هو برنامج رغبات دفيئه ...

سى السيد : اسمها دفينه يا مثأف ..وخلصنى سكوب حصله ايه.

حشيش : ابدا يا سيدى .. بعد ما ربنا نجانا انا وابن مصر من علقه الفندق فاكرها العلقه الى انت وسكوب خدتوها فاكرها هه هه..فاكرها ....

سى السيد : ايوه يا سى زفت فاكرها ولسه ليها علامات مضيئه على جسمى ....

حشيش : ايوه ايوه ازرق واحمر المهم بعد ما ربنا نجانى انا و...

سى السيد يمسك بزجاجه مياه غازيه زجاجيه ويقفز على حشيش : انت بتحكى لى عن الهكسوس ماتخلص فى يومك الاغبر ..

حشيش وقد احس ان سى السيد قد يفعلها : ماشى ماشى ... سكوب جاتله حاله نفسيه من اى حاجه تمت للبوليس بصله وكسر كل عربيات البوليس الى جايبها للواد جونيور وفى يوم اغبر كان فيه حادثه فى اول الشارع جت عربيات الاسعاف وفتحت السرينه افتكرهم جايينله قام ناطط من البلكونه ......

سى السيد : يا نهار اسود يا نهار اسود ده ساكن فى الدور التالت...!!!!!!!

حشيش : لا ما هو كان فاكر انه فى فى بيت ابوه ابو دور واحد ....

سى السيد: نعم .... وبعدين ....

حشيش : ولا قابلين كان ابن مصر بيعدى عليه زى عوايده .. بص لاقاه وقع على كبوت العربيه ....اتنفض ونط من العربيه وهو بيصرخ انا ما خبطش حد والله ما خبطت حد ده وقع عليا من السما ..... وبص لاقاه سكوب ... فصرخ بصوت اعلى ....الحقونا يا ناس .. صاحبى بيتهمنى فى نفسه.

سى السيد: يعنى ايه !!!! هو جاله لوثه هو كمان ؟؟؟؟؟؟

حشيش : لا انت عارف انه حساس شويه من نحيه الحوادث المهم انه بسرعه خد سكوب وقال يجرى بيه على المستشفى لانه كان فاقد النطق وعنده سدمه..المهم انه ركن امتثال قدام المستشفى ونزل بسكوب على الطوارىء .....

وفى هاتوكا اللحظه كان فيه لودر بيرجع بضهره على نفس الرصيف الى راكن عليه ابن مصر امتثال ..وتقريبا ماكنش شايف فا...... منظر فظيع ... فظيع ..

سى السيد: ايه داس عليهم رد ... رد...

حشيش : لا ده ساوى امتثال بالارض.....عدى عليها وافتكرها مطب صناعى ...

وكان ابن مصر ينظر الى هذا الموقف فسقط سكوب من يده على سلم المستشفى وتقريبا رجله التانيه اتكسرت من الوقعه..... وابن مصر جرى على الى فضل من العربيه ...و..... لا حول ولا قوه الا بالله لو شوفت منظره يا سى السيد وهو بيطبطب عليها ويبكى ..

سى السيد : لا حول ولا قوه الا بالله..... معقوله.....عليه العوض.

حشيش : ايوه ما هو تقريبا قعد شهرين بعدها ما يقولش الا كلمتين... (جاى رايح منه له ),,

سى السيد: وبعدين الشله اتفركشت كده والا ايه.

حشيش : لا ياعم لا اتفركشت ولا حاجه سكوب قرب يفك الجبس وابن مصر .. الحمد لله بقى يشاور دلوقتى ...

سى السيد: يشاور هو كان اتخرس ...

حشبش : لا اكتر احنا كنا فين وبقينا فين .. الحمد لله ..

سى السيد: طيب انت عليك تجيب ابن مصر وتقابلنى عند اسكوب الساعه 8 منها نطمن عليهم ونواسيهم ونجمع تانى .

حشيش : ماشى ولو انى مقلق ... من قوى ابن مصر العقليه اليومين دول ... بس ماشى ..نتقابل الساعه 8.

سى السيد : الساعه 8

يتبع..

رابط المشاركه
شارك

رائع

فظيع

مدهش

خرافي

أنا مش قادر أمسك نفسي من الضحك

إيه ده يا إبن مصر ...... دانت مشكلة بجد

(جاي رايح منه له) ...... واضح إن إمتثال كانت غالية عليك قوي

لأ بجد ...... ربنا يكرمك علي قد الضحك اللي ضحكتهولي

كمل والنبي بسررررررررررررررررررعة

رابط المشاركه
شارك

ده مش إنت اللي إتشليت ... ده انت جبت شلل للمتتفرجين ..

يا عم فين الكهربا ؟ وفين العصابة ؟

إنت دخلت لي في فيلم جعلوني مجرماً ...

من أصول الأدب يا أديب إنك تحشي الاحداث دي في قلب القصة ... يعني بالظبط زي ماتكون جايب كبشة ورق عنب وبتحشيهم رز ... ينفع تجيب الرز وتحشيه ورق عنب ؟

اهو إنت بتعمل كده يابن مصر ..

بالله عليك خلص الاكل بسرعة أحسن جعان ..

رابط المشاركه
شارك

سى السيد

ان اساوبك الممركز فى اصدار مساوىء النقد الادبى للفن القصصى بتحامل على المبدعين ليضعك فى خانه انصاف المثقفين الذين بمعاول هدم المواهب وأدوا العديد من الفطاحل الذين ذخرت بهم اوطاننا وذلك لاحساسهم بالنقص تجاه تلك المواهب المتفجره والتى لن يستطيعوا ان يجاروها فى ما تمخضت به افكارهم من معانى واماثيل لا ترقى الا لمن يمتلكوا حسا ملائكيا بمكنون الكلمات والتعبيرات ذات المدلولات المتناثره كزخات من امطار الصيف فى جو من اللاشعور المتولد من حالات الاعجاب الكامل بما تبنته ضمائرهم من وجهات نظر تعبر بمنتهى العنف فى اسقاطات بليغه عما يقصدونه فى نقدهم لذاتهم فى جلد خفيف للذات بسياط من حرير تمر على مسامع وعيون المتلقى كمناظر ربيعيه تحمل فى طياتها هدوء نفسى لا تصفه كلماتك العنيفه.

ولذلك فان ما يعتريك الان من شعور انما هو من نتاج هذه.... هذه.....

وكده يعنى يا اسطى!!!!!!!!!!!!

ابن مصر

اديب وكاتب

بكالريوس اداب قسم طباعه وتغليف جامعه دنفر بمسطرد

رابط المشاركه
شارك
قولت لك قبل كدا .. كبيرك .. المحشى والرز .. مالك انت ومال الكلام الكبير دا؟  h):

مبسوط أديك زعلت الكاتب ونفسه قامت عليه وبقى يخرف ..  rs:

إستريحت؟  rs:

هوببببببببببببببببببببا.....

ليه كده يا اسطى انا خبطلك عربيه ولا كحتلك باب!!!!!!

ماشى يا هندزه.

مقبوله منك.....

رابط المشاركه
شارك
ان اساوبك الممركز فى اصدار مساوىء النقد الادبى للفن القصصى بتحامل على المبدعين ليضعك فى خانه انصاف المثقفين الذين بمعاول هدم المواهب وأدوا العديد من الفطاحل الذين ذخرت بهم اوطاننا وذلك لاحساسهم بالنقص تجاه تلك المواهب المتفجره والتى لن يستطيعوا ان يجاروها فى ما تمخضت به افكارهم من معانى واماثيل لا ترقى الا لمن يمتلكوا حسا ملائكيا بمكنون الكلمات والتعبيرات ذات المدلولات المتناثره كزخات من امطار الصيف فى جو من اللاشعور المتولد من حالات الاعجاب الكامل بما تبنته ضمائرهم من وجهات نظر تعبر بمنتهى العنف فى اسقاطات بليغه عما يقصدونه فى نقدهم لذاتهم فى جلد خفيف للذات بسياط من حرير تمر على مسامع وعيون المتلقى كمناظر ربيعيه تحمل فى طياتها هدوء نفسى لا تصفه كلماتك العنيفه

والله فهمتها rs: h):

سقراط

رابط المشاركه
شارك

خليك في حالك يا سي السيد و سيب ابن مصر يكتب براحته .. ده مزاجه عالي قوي قوي قوي في الحلقة دي ... و خلاني ييجيلي زغطة من كتر الضحك.. لما يبقي الدو.. الدو... الدور عليك ابقي احشي الحلقة رز... مكسرات .. فريك .. زي ما أنت عا.. عا... عايز.... دلوقتي هو الدو.. الدو.. الدور عليه و يعمل فينا اللي هو عاوزه...

ابن مصر.. سر في طريقك و لا تلتفت الي من يريد ايقاف مستقبلك الفني كعجلاتي ... بس بجد بجد بجد روعة...

cl: rs: rs: rs: rs: rs:

رابط المشاركه
شارك
خليك في حالك يا سي السيد و سيب ابن مصر يكتب براحته ..

حاضر يا معلم سكوب ... طاعة أولي الأمر وخصوصاً المرضى منهم ( واخدلي بالك ) واجب علينا ....

ده بس لحد ما يخفوا وبعد كده نطلع على جتتهم اللي كلوه بط بط

بس قبل مالم هدومي وأمشي في كلمتين حازين في نفسي ومسببين لي حزازاية ونفسي أرميهم لإبن مصر ...

الأخ إبن مصر .. إنت كاتب في توقيعك الشخصي في نهاية كل مداخلة لك البؤين دول

إذا كان كل العالم مجنون وانا الوحيد العاقل......فهل من العقل ان اكون مجنونا ومن الجنون ان اظل عاقل ؟؟؟؟؟

وبعدين روحت كاتب إسم اللي قايلهم

وهو أحمد محمود

والسؤال هنا بقى ... : مين أحمد محمود؟

يعني كان حارس مرمى الإتحاد السكندري .. ولا عضو مجلس محلي محافظة كفر الشيخ ؟

وعشان كده مشهور واول ما تكتب إسمه الناس هاتعرفه ؟

أرجو التوضيح وليكن ذلك في موضوع مستقل بعيد عن العصابة ، نقول مثلاً في باب المناقشات تحت إسم " شخصيات تاريخية ... أحمد محمود قائد معركة المعيز في جزيرة فوكلاند "

وخلص بقى ولم سلوك الكهربا بتعاتك اللي إنت مبعترها في كل حته عشان عايز أنشر القصقوصة بتاعتي اللي سميتها " عصابة سرقة الحمير "

والمعنى في بطن الشاعر( جنب المعدة كده ) .... فالحمير هنا إما حمير بحق وحقيق .. او دول ناس بس إحنا أستحمرناهم وسرقناهم زي ما في ناس بتعمل في الشعب المصري كده دلوقت ... ودي ممكن نصنفها على إنها قصة من الأدب السياسي ذائع الصيت اللي من أعلامه " ديسكوفيسكي " و " نورمان تشيرسكوف " و " جون أشتروف "

رابط المشاركه
شارك

الزميل الفاضل سى السيد وشهرته عبده محاشى .. rs:

أرجوا التزام الجدية والموضوعية فى نقد العمل الفنى محور الموضوع .. والابتعاد عن استخدام الألفاظ التى تسبب زيادة إفراز اللعاب من عينة محشى .. وشوربة .. rs: واضعا فى اعتبارك أن محاولاتك الدؤوبة للنيل من شخوص محاوريك rs: ستبوء حتما بالفشل

كما ارجوا عدم الخروج عن الموضوع مرة أخرى .. وان تعتبر هذا هو التحذير الذى يسبق الإنذار .. vmp:

لم تعابينك وسيب الناس تبدع .. cl:

الإدارة

إسو

رابط المشاركه
شارك

والنبى ما ترد انت يا سى السيد......

يا معلم اسو ... المعلم مبسوط منك قوى وبيقولك لما يحب يفرد جنحاته مش هايجيب هدهد يفردها وهوا الى مربى حدا وغربان فى قفص صدره .. والى بين المعلمين تحله المعلمين.......

والى يخش عندنا نشيلوه فى قلبنا ...ويلاش صوتك يعلا على الكبير لا يتاويك فى بطن الزير..

والى بيحينا ما يضربش نار..

مبسوط منى يا سى السيد...

ممكن تسيبنى افتكس بقا وخد الباب فى ايدك وانت خارج....

صحيييييييييييييح بشر ......مرض وانتشر

رابط المشاركه
شارك

يعني كل ما واحد من الادباء يكتب مداخله يخليني ارجع اقراء الموضوع من اوله !!!

في ايه دخلتونا في حواري وشوارع وبلاد تشيلنا وبلاد تحطنا وناس تيجي وناس تروح وعيال تتولد وعيال تكبر وبنات تتجوز وبنات تولد في ايه يا جماعه انا تهت هو مين كتب ايه على اي موضوع

رابط المشاركه
شارك

وفى الساعه الثامنه تقابل سى السيد مع حشيش عند سكوب .

سى السيد : سكووب حبيبى ازيك ( ويقفز على السرير ويحضنه بعنف )

سكوب : أااااااااااااااى ايه يا جدع انت انت مفترى حتى فى حنيتك ...

سى السيد: ماشى ماشى امال فين شوماخر بتاعنا.... ابن مصر فين ..

حشيش : اصل ............ اصل........

سكوب : ابن مصر انتم جبتوه هنا ... لا لا .. لا .. خبونى والنبى .... كل ما يشوفنى يفتكرنى امتثال ويصمم يركب العربيه ...

سى السيد : هاهاها وفيها ايه يا سكوب .....

سكوب :با تكلم جد كله كوم ولما يصمم بعد ما يركب يقفل الباب كوم تانى والنبى يا حشيش ...خبينى

حشيش: ما تخافش .... هوا احسن دلوقتى وبقى بيتكلم خلاص بس انا مستغرب هو قالى رايح مشوار وجاى ..

( فجأه يدخل ابن مصر وفى يده لفه )

ابن مصر : حبايبى ... وحشتونى ( ينظر الى سكوب : سلامتك يا صاحبى جبتلك معايا هديه علشان البرد والمطره وانت راكن ... قصدى واقف فى الشارع .

( يفك ما فى يده ويخرج غطاء قماش للسياره ويبدأ فى تغطيه سكوب )

سكوب : الحقونيييييييييييييييييي مش قوللتلكو ...

سى السيد: ايه يا ابن مصر امسك نفسك يا راجل لا انت اول ولا اخر الى ... استغفر الله العظيم ...استهدى بالله

حشيش وقد فتح عيناه بشده : الله اكبر كبرله يا سى السيد..

سى السيد: الله اكبر

ابن مصروقد انخرط فى بكاء عنيف: مخدتش فرصه تدافع عن نفسها .. ده ظلم ظلم..

حشيش: استغفر الله يا ابنى انت ها تعترض على قضائه..

ابن مصر : استغفر الله العظيم سامحنى يا رب ..

سكوب : يخرب بيوتكو كلكوا اييييييييه هو فيه حد مات دى حيالله عربيه ..

ابن مصر: ما تقولش عربيه ..

سى السيد : استهدوا بالله وخلاص احنا بقالنا كتير ما تجمعناش .... خلونا نفرفش شويه

ابن مصر وقد نظر الى سكوب : كله منك .. كله منك ....

حشيش: اخبار اللارجانات ايه يا برنسات .....

سى السيد: لارجنات !!!!!! بتتكلم لغات !!!! بسم الله ما شاء الله الله يرحم... ماكنتش بتعرف تقرا وبتتكلم عربى مكسر....

سكوب: يا بنى احنا بقينا تحت الصفر ... انا بافكر اروح الصعيد عند بيت ابويا اقعد هناك شويه..

حشيش: الصعيد كويس انك فتحت الموضوع ده,, انا عندى فكره ..

سى السيد : ايه فكره انت من امتى بتفكر انت اخر مره فكرت فقدت الذاكره ؟؟؟؟

سكوب : سيبه يا سى السيد انت هارش ملحته ليه ...

ابن مصر: هارش.. هارش يا جاهل .. اسمها قارش ملحته .. قارش .. قارش ..( ويقفز عليه فجأه )

سكوب: شيلوه من فوقيا لاقتله ... الحقونى ...

سى السيد: اهدا بقا يا ابن مصر

حشيش: انا عندى فكره هايله... تجاريه معنويه .. وكده يعنى ..

ابن مصر: فكره ايه يا فالح ما هى نقصاك انت كمان ...

حشيش : احنا ها نعمل شركه كهربا ......

( لم يرد احد ونظروا اليه جميعا وقد فتحم افواههم )حشيش : ايه فى ايه .. هانعمل شركه كهربا ...

( ينظروا الى بعضم ويثبوا عليه كلهم فجأه وينهالوا عليه بالضرب ..

حشيش : أى اى .. طب اسمعونى .. أى اشمعنى انا سمعت كلامكم ...

سكوب : عنده حق يا جماعه ...

سى السيد: ماشى ...

ابن مصريتظر الى حشيش بتركيز ...: ممكن اغير لك الفوانيس انا شايف انها ..

سى السيد فى اذن ابن مصر : الله اكبر .. الله اكبر ..

ابن مصر : لا حول ولا قوه الا بالله..

حشيش : انا باتكلم جد انت يا سكوب عندكم كهربا فى البلد؟

سكوب : فى البلد؟؟؟؟؟؟ ايوه بس فيه بلد جنبنا فى بطن الجبل ما عندهمش حتى جاز يولعو بيه رغم انهم بينهم وبين ابراج الضغط العالى مفيش .....ليه ؟؟؟؟

حشيش : هى دى .. احنا نروح هناك ونقتبس المولد الى عند ابوك فى المزرعه يا سى السيد.. و...

سى السيد : ايييييييييييييييه ليه يا حيلتها ان شاء الله قالولك انى خلاص بقيت محترف لحد ما اسرق ابويا .......ومع مين معاكم يا رمم..

ابن مصر يتناول القله من جانب سكوب ويقذفها على راس سى السيد فيصمت ثانيه وينظر الى ابن مصر فى ذهول ثم يسقط مغشيا عليه )

ابن مصر : كمل يا حشبش وبعدين سى السيد هاينام شويه ..

حشيش يبلع ريقه وينظر برعب لابن مصر : حاااااضر....احنا ها ناخد المولد ونحمله على عربيه نقل ونسافر على البلد الى بيقول عليها اسكوب ولما نوصل ....

سكوب مقاطعا : استنى شويه بس وهانوصل ازاى حد فيكم معاه فلوس للعربيه النقل ؟؟؟؟

سى السيد بعد ان افاق وهو يمسك برأسه من الالم : فلوس ايه ما هو لو فيه فلوس كان ده بقى حالنا ...

حشيش وقد قام من مكانه واختبأ خلف سكوب : ما اهو لو ابن مصر يبيع بقايا امتثال ممكن ناجر العربيه النقل بالى هاتجيبه ..

سى السيد: هاهاها ودى هاتجييب ايه دى كبيرها تجيب سندوتشين طعميه ومن غير سلطه كمان ........

ابن مصر يمسك بالقله الثانيه ويخبط بها سى السيد مره اخرى فينظر اليه بمنتهى الذهول مره اخرى ويغشى عليه .

ابن مصر : ما تخافش يا حشيش انا موافق واهو تبقى امتثال شاركتنا المره دى كمان ... وبعدين ... انا احتراما لصاج التربه بس ما اتصرفتش فيها ....( تنهال دموعه ) بس انتم عندى اغلى من ...... سامحنى يا رب...

حشيش .: تمام يبقى احنا ناخد المولد وهناك نعمل وصله مشترك كبيره ونأجر لكل بيت فيشه ولمبه والفيشه بجنيه واللمبه ب2 جنيه والبليه تجرى ونبقى اقطاعيين و.....

سى السيد: فيشه ايه وزفت ايه على دماغك... وهو المولد هايشتغل بالهوا ...

سكوب: ما احنا هانقتبسه بجازه....

ابن مصر: فكره لحد الان ما فيهاش سرقه... بس كويسه ليه لا...

حشيش يحدث عقله الباطن .. بس استنوا لما نوصل وعاتشوفوا العبقريه )

واتفق الجميع على التحرك فى الصباح الباكر الى الصعيد فى قريه مجهول الجبل ...

يتبع الجزء الاخير

رابط المشاركه
شارك

الطيارة كمان كام ساعة و انا هنا مش قادر امشي قبل ما تفوتني حلقة... لكن بجانب التسلسل الكوميدي الرهيب لأبن مصر ... مش قادر امشي قبل ما اقول لسي السيد... والله انت حكاية يا جدع انت.. تعليقاتك بجد رهيبة.... و لوحدها تعمل حلقة كاملة ...

هيييييييه ... الله يمسيك بالخير يا حشيش.. يا تري انت فين دلوقتي يا ابني.. نايم و لا صاحي .. متغطي و لا عريان ... جلبي انفطر عليك ..

رابط المشاركه
شارك
  • 2 weeks later...

والله عال.... ان غاب القط العب يا فار...

يعني اغيبلي اسبوع ارجع الاقي اللخبطة دي في المغامرات بتاعتنا...

ابن مصر اللي بيكتب بالقطارة و مش عايز يلم الأسلاك اللي متبعترة في كل حتة زي ما طلب منه اخونا و حبيبنا سي السيد...

و بعدين بدال ما تساعد اخوك يا سي السيد و ترتب معاه و ترجعله الفيوز اللي ضرب ...تقوم تتحمق و تكعبللي الدنيا كلها و تفتحللي الزريبة و تخللي الحمير حتسرح في كل حتة ...

ابن مصر ... انجز بقي دي ولادة ايه القيصرية بتاعتك دي...

سي السيد ... لو ما قفلش محل الكهربا بتاعه في ظرف يومين ..خلي الحمير تسرح زي ما هي عايزة.. حاكم المغامرة الجديدة باين عليها قنبلة ...

رابط المشاركه
شارك

الله الله الله ... هو الواحد مش من حقه يعيا ولا ايه ..

ايه النداله دى ..

ماشى يا شى السيد اقول ايه.... اوكيه اوكيه... مردوده وصرصار مش دوده بس....

وفى الصباح تجمعوا جميعا ونزل سكوب وهو يسير متعكزا على عكاز وابن مصر يسنده وذهب حشيش بحصيله بيع بقايا امتثال ليؤجر السياره النقل فى الفحر واتى بالمولد محمولا عليها ....

سى السيد: مين الى هايسوق ؟؟؟؟؟

حشيش : انا انا ......انا والنبى ..

سكوب: انا رجلى تعبانى يا سى السيد انت عارف ..

حشيش : انا نانا يا سى السيد انا ( يقفز اما سى السيد ليراه وهو متجاهله تماما)

ابن مصر: سوق انت يا سى السيد انا اعصابى لسه تعبانى .....

حشيش : انا انا ... ايييييييييييييييييييييييييييييييه انت مطنشنى ليه ؟؟؟؟؟؟؟؟؟

سى السيد بمنتهى الهدوء: انت بتعرف تسوق يا حشيش ؟

حشيش: لأ ...... ليه؟

سى السيد : ولا حاجه اركب ورا مع المولد ...

حشيش : اشمعنى انا ..

سكوب: ما هى الفكره فكرتك وانت الى مفروض بتفهم فى الكهربا فينا ..

ابن مصر: متأكد من المعلومه دى يا سكوب ... انا بدأت اتوغوش!!!!!

حشيش: ماشى بكره تشوفوا يا جبنا عبقريتى.....

سى السيد: توكلت على الله....

سكوب : استننننننننننننننننننننى... !!!!!!!!

سى السيد: ايه في ايه؟؟؟؟؟؟؟

سكوب : جعان نفسى فى سندوتش كرشه بالبيض!!!!!!!!!!!

ابن مصر يخرج قله من شانطته ويخبط سكوب بها على رأسه فينظر له فى ذهول ثم يفقد الوعى ..)

ابن مصر : خلاص يا سى السيد اتوكل على الله سكوب هينام شويه......

طوال الطريق كان حشيش يعيد حساباته ويصمم كيف سيدخل فى كل بيت فيشه ولمبه ووصله ريسيفر .... ويخطط لخطته الشيطانيه )

ويعد 22 ساعه وصلوا جميعا الى المنفى ..

سكوب: حمدلله على السلامه مرحبا بكم فى مجهول الجبل......

سى السيد وهو ينظر الى الصحراء المتراميه ولابراج الكهرباء العملاقه التى تظلل على قريه صغيره جافه من حراره الشمس: يا سلام ..... ياسلام....ربنا يستر ..

ابن مصر: استر يا رب .... ايه المنفى ده .. هو فيه ناس هنا !!!!!!!!!!!

سكوب : قصدك ايه يا ابن مصر؟؟؟؟؟؟؟؟؟؟ اتلم..

حشيش: مكان ممتاز ( يتظر الى اعلى وتزداد ابتسامته .....وهو ينظر الى خطوط الضغط العالى)

بعد ان انزل الجميع المولد التف اهل القريه وهم ينظرون اليهم بغرابه وكل منهم يحمل شومته واتى العمده وسال ..

العمده : انتم مين .....؟؟

حشيش: احنا ... من وزاره الكهربا.. احنا الى هانولع لكم البلد

ابن مصر هامسا لسى السيد: الحق دول بيتكلموا زينا .....

سكوب : والله لو ما اتلميت يا زفت لاوريك..

العمده: جهربا!!!!! جهربت ايييييييه....

حشيش : يا حج انا هاقول لك...احنا جايين علشان ندخل الكهربا فى بيوتكم باسعار رمزيه وكمان......

العمده : رمزيه؟؟؟؟ رمزيه مين الى عاتدخلها بيوتنا؟؟؟؟؟؟

ابن مصر وقد نظر الى سى السيد : مش ممكن... دا المفروض انه الذكى الى فيهم..

سكوب يفتح حقيبه ابن مصر وياتى بقله ويخبطه بها بعنف فينظر اليه مذهولا ثم يغمى عليه..

سكوب: بس هه انا قولتله يا سى السيد وبلاش تبصلى ببلاهه كده..

سى السيد: قادر يولع فيكم كلكم بجااااااااااززززز.

حشيش : يا عمده احنا كمان هانعمل وصله ريسيفر لكم وتتفرجو على الدش كمان!!!!

ينظر حشيش الى اهل البلد الذين لم تتغير تعبيرات وجوههم اطلاقا لما قال وهو ينظرون اليه ...

العمده : يعنى من الاخر انتم حكومه ولا لا؟؟؟

حشيش : ايوه يا عمده حكومه حكومه....

العمده : يبقى اتفضلوا...

وبعد ان امضوا جميعا 3 ايام فى توصيل الفيش بكل بيوت القريه صعدوا الى التبه العاليه التى عليها المولد...كى يقوموا بتشغيله ولكنهم لم يجدوا حشيش..

ابن مصر : الله امال فين حشيش يا سكوب؟؟؟

سكوب : واللله ما عرف .. كان معايا وقالى انه رايح مشوار ..

سى السيد : ايوه يبقى عملها هيا دى خطته الندل .. يلم الفلوس من الناس الغلابا ويكت وبسينا احنا هنا نحاسب على المشاريب .. انما لااااا هو فاكر ايه ... طب تلاته بالله ........

حشيش: حيلك حيلك لا تلاته ولا خمسه .... اخص عليكم كده تخونونى عند اول ناصيه..

ابن مصر: ما انت بتختفى فى ظروف غامضه يا شوشو ...... انت كنت فين

سكوب: ايوه يا شوشو كنت فين :

حشيش: دلوقتى بقيت شوشو يا رمم...

سى السيد: انا لا يا معفن كنت فين يا زفت..

حشيش: ايوه يا معلمى هدى نفسك انا كنت بكمل التوصيلات.

ابن مصر: توصيلات ايه.. ما كل حاجه اتوصلت مش فاضل الا اننا نشغل المولد..

حشيش: لا يا أور.... هو انا برضه هاضحى بالجاز بتاع ابو سى السيد؟؟؟

سى السيد امال هاتعمل ايه....؟؟

حشيش وهو ينظر الى سلك كهربائى غليظ وهو يمتد من المولد الى اقرب برج من ابراج الضغط العالى..: طبعا انتم عارفين ان كل بيت هايحتاج 220 فولت وعندنا هنا 55 بيت يعنى محاجين 12100 فولت والابراج بتاعه الضغط العالى بتنقل فى كل سلك 20 الف فولت ولو عملنا توصيلتين على التوازى بين سلكين يبقى 40 الف فولت ممكن ننور بيهم 10 قرى ودا الى انا هاعمله ووصلت الكهربا الى فى البرج على المولد وهاوريكم ازاى هاولع البلد من غير ما نتكلف مليم واييييه كهربا بكر من السد على هنا علطول .

كان الجميع ينظرون اليه وقد سقط الفك السفلى لكل منهم فى ذهول مما يقول حشيش وكانت يده قد امسكت بسكينه التوصيل وهو يجذبها..

ابن مصر: استنى ياحفيد المجانييييييييييين..

وعندما انزل حشيش سكينه الكهرباء سمع الجميع زمجره عنيفه من الاسلاك ثم انفجر المولد وسرت كهرباء كالصاعقه فى الاسلاك الموصله بالمنازل التى لم تتحمل كل ها الجهد فبدأت فى الشتعال السريع وبينما كان الجميع ينظر الى القريه التى احترقت بالكامل والنار تنشر من بيت الى بيت نظر الجميع الم المكان الذى كان يقف فيه حشيش فلم يجدوا الا بقايا حذاء متفحم واثار نيران فنظروا الى السماء ليرو خط رفيع من الدخان كالصاروخ ناتج عن ارتفاع حشبيش الى السماءامتد عبر البصر .

ابن مصر: هوا قال هايولع البلد واهو عملها..

سكوب: يا نهار اسود مين الى خلى المجنون ده يلعب بالكهربا .. البلد ولعت

سى السيد: مش ده المهم قولوا لنا هانعمل ايه فى الجرمأ الى جاى هناك ده..

ونظر الجميع الى اهل القريه وقد تسلحوا وبدأوا فى مطادتهم.

ابن مصر: اجرى يا واد منك له.....

سكوب: طب وحشيش؟؟؟؟

سى السيد: ربنا معاه زمانه فى كولالاكبور .......ربنا يهدك يالى فى بالى..

وحمل ابن مصر سكوب والقى به فى السياره وقفز سى السيد فى السياره وانطلقوا جميعا فى محاوله للهرب .....وبعد ان ابتعدوا عن القريه سقط حشيش فى السياره وقد تمزقت وتفحمت ملابسه ويخرج الدخان من كل ثنايا جسده مع بعض زخات الكهرباء المتقطعه عندما يسعل

حشيش: يا ثلاام المنثر من فوق جميل ددا ايه الى حثل!!!!!!!!!!

فرمل سى السيد يعنف ونظر سكوب وابن مصر سى سى السيد لبعضهم ..

اخرج ابن مصر 3 قلل واعطاهم لهم

حشيش: ايه فى ايه..........

وفى الصباح كتبت الجرائد.

نيران مجهوله تحرق قرى الصعيد....تمت

رابط المشاركه
شارك

يا ابن مصر حرام عليك كل القلل دي...

حلوة و ملعوبة و كل سطر فيها بيشر كوميديا....و بالذات و انا بتخيل كل موقف علي حدة... حشيش و هو عمال يتنطط... و هو عامل منحني 180 درجة في سماء البلد من ساعة ما ساب جزمته لحد ما لقيناه في العربية تاني.. عسل ... بس لو ما كنتش اتأخرت فيها كده كانت حتبقي احلي و احنا قارينها سخنة و ملهلبة...

بس بجد يا جماعة .. احنا مش ممكن نبيع المغامرات دي يعملوا بيها فيلم كوميدي ؟؟؟

الدور عليك يا ابو السيد... لم حميرك ..... cl:

رابط المشاركه
شارك

إيها السيدات والسادة .. يُسعد دار سين سين للنشر والكوي بالبخار أن تقد لكم باكورة إنتاجها الأدبي للعام الجديد ( وعندنا كمان اجندات وتقاويم وحاجات حلوه هاتعجبكم )

مغامرة " عصابة سرقية الحمير "

نما إلى علم العصابة إن سكوربيون موجود في مصر ولكنه متخفي في زي واحد صعيدي من جرجا .. وادي صورته اهي وقاعد حاطط إيده على خده وبيتحسر على الحاجات اللي ضاعت منه بعد الحادثة الأخيرة ومأجر اوضة فوق سطوح أحد المباني القديمة في منطقة كامب شيزار ... فعقدوا إجتماعاً طارئاً لبحث أخر مستجدات العصابة ..

av-1917.jpg

س س : قوم يابن مصر اوصل لإستنجرية وجرجرلي سكوربيون من قفاه وهاتوا هنا حالاً .

إبن مصر : يؤسفني إني أقولك إني مارديتش أقول لك يا معلم إن سكوربيون بعث لي رسالة خاصة وقالي إنه تاب ورجع عن شغل العصابات .

حشيش : يعني إيه تاب ... هو كان بيرقص وهايتحجب ؟

س س : إهدى يا حشيش ... سكوب ما يقدرش ينفذ الأفكار المسمومة اللي في دماغه دي .. ده تلاقيه بس إتهف في نافوخه من الحادثة وحصلت له تربنه بسيطة وصماويل مخه فوتت .. لكن بعون الله مفتاح 14 موجود وهانظبطها له .

حشيش : أيوه أنا بأقول كده .. وإذا كان نسي اللي حصل للولا سعيد سراييفو قدام عينه .. فأحنا ممكن نفكروه تاني .

إبن مصر : يا نهار إسود .. يا نهار إسود ... هي حصلت سعيد سراييفو ؟

س س : اومال إنت فاكر إننا بنلعب حاوريني يا طيطه ؟ .. يابني ده مستقبلنا وأسرارانا معاه .. والولا سعيد عشان إتحجج مره بس إن عنده مغص ومش هايقدر يطلع معانا طلعه من ساعتها وهو راقد في القصر العيني ومش لاقيين في حته سليمه يخيطوها ، بالمناسبة انا غيرت الخطه .. قوموا بينا نروح له كلنا ونتقابل معاه بكره على قهوة بحري في الأنفوشي الساعة 9 بالليل ..

وعلى فكره انا محضر لكم مفاجاة مُذهلة .

حشيش : إيه هاتعزمنا على اكلة سمك من عند أبو أشرف ؟

إبن مصر : سمك إيه وزفارة إيه ؟ لأ سين سين هايعزمنا على أيس كريم بالمكسرات في خالد بن الوليد ... صح ؟

س س : تصدقوا بالله ؟ إنتوا أخركم تبقوا حرامية غسيل .. وانا غلطان إني لمتكم من شوارع عزبة القرود ... سمك ومكسرات ... ده إيه العالم الجعانة دي ... إتفضل يافندي إنت وهو وميعادنا بكره ..

وفي الميعاد المحدد .. حضر الجميع بالكامل :

حشيش : إيه يا معلم سكوب .. سمعت إنك إتعاركت مع المدام وإيدها كانت تقيله حبتين وحصل اللي حصل .

سكوب : إسكت يا شيشو ده اللي جرى لا ينكتب ولا ينقرا ... بعيد عنك كانت حادثة عربية جامده قوي ... رقدت فيها شهرين في السرير .. شالولي فيها الطحال وحته من الكبده وربع الكلاوي وفقرتين من العامود الفقري و ..

س س : بـــــــــــــــــــــس أبوس إيدك ما تقولش على الحاجات التانية اللي إتشالت ... سيب كل حاجة بخيرها ...

يتبع

رابط المشاركه
شارك

انشئ حساب جديد او قم بتسجيل دخولك لتتمكن من اضافه تعليق جديد

يجب ان تكون عضوا لدينا لتتمكن من التعليق

انشئ حساب جديد

سجل حسابك الجديد لدينا في الموقع بمنتهي السهوله .

سجل حساب جديد

تسجيل دخول

هل تمتلك حساب بالفعل ؟ سجل دخولك من هنا.

سجل دخولك الان

×
×
  • اضف...