اذهب الي المحتوي
إنشاء باب جديد بعنوان سد النهضة الإثيوبي لكل الموضوعات المتعلقة بسد النهضة ×

مغامرات عصابة "حساس"


Recommended Posts

أقٌتيد الجميع إلى قسم شرطة الساحل وما إن وقفوا جميعاً أمام ضابط الشرطة حتى صاح سكوربيون أنا " عايز القنصل بتاعي " أنا عايز أكلم السفير الإيطالي " إنتوا فاكريني إيه وراح مطلع لهم البازابورت الطلياني ، فأصيب ضابط الشركة بالهلع وتفادياً للمشاكل الدبلوماسية تم الإفراج عنه في الحال .

:)

الموضوع ده حصل فعلآ من كام سنة ... ايه يا جدع .. انت نظامك ايييييييه بالظبط.... و بعدين فين الجزء التاني .. فين يتبع ؟

عالعموم لغاية ما تخلص كوي الجزء التاني .. دور شكر قبل ما ننسي ...

العزيز سقراط ... ربنا يخليك يا رب... ده أطراء كبير قوي ..

نفس الشيء لفريدة... سيناريوم مرة واحدة .. ده انا علي قد حالي يا فريدة.. طب طلي كده علي باب الأدب و أنت حتلاقي فعلآ عمالقة في الكتابة هناك... عالعموم ربنا يجبر بخاطرك...

ما تحطولنا وش واحد مكسوف يا أخواننا .. و الا أقولكم .. نرجع لأختراع شعنونة و لا الحوجة ...

( وش واحد مكسوف .. و مناخيره حمرا )

فيروز .. لأ يا ستي انا مش محتاج كشافين .. آخر مرة جالي واحد خلاني ادفع فواتير الكهربا بتاعت العمارة كلها ..انا كل اللي محتاجه ناس حلوة زيكم كده يقروا اللي انا بكتبه...و بعدين لما يغيروا الموضوع تكون فيه أبتسامة علي وشهم ..

أمير...

صدقني و انا بكتب معهد الدقهلية بتاع الكومبيوتر كان في فكري الصورة دي .. بس ما كنتش فاكر في انهي موضوع انت كنت حطتها... بس شوف يا أخي توارد الأفكار... :)

و بعد هذا الفاصل من الأعلانات نواصل الحلقة الخامسة من مغامرات عصابة حساس و التي تدور حول المافيا ... و ربنا يستر...

رابط المشاركه
شارك
  • الردود 253
  • Created
  • اخر رد

Top Posters In This Topic

Top Posters In This Topic

Popular Posts

حبيب قلبى سكوب. انتظر فى القريب العاجل تكمله سرقه مركز التجميل تتبعها دره تاج عصابه حساس وهى... سرقه مطار القاهره .. علشان خاطر عيونك الى وحشتنى ضحكتها....  

يا حلاوو يا جودعاااااااااااااااااااااااااااااااااااااااااااااااااااااااااااااااااااان ....  حنرجع لأيام الشقاوة .... لأ و النية حتبقي علي مطار القاهرة بعد كده ... البيه جاييلي بعد 11 سنة و يخططلي

Posted Images

الجزء الثاني :

سكوب : بقى أحنا يا رجالة شكلنا كده معمول لنا عمل في البلد دي ومالناش فيها أكل عيش

إبن مصر :عندك حق . ده احنا ولا اللي ماسكين ديل قطة سودا في ليلة شتوية غير مقمرة وملبدة بالغيوم .

حشيش : مش وقت أشعار دلوقت يابو نواس .. سيب الرجال يكمل ويخلص .. بالمرة عشان س س يروح يستحمى ويغير هدومه اللي بالتأكيد مليانة براغيت من بتاعت اللمان .

سكوب : أنا خلال الـ 3 شهور اللي كان فيهم س س في الأوبرج مابطلتش تكتكة وتخطيط وتفكير في مستقبلنا المظلم .. وهداني تفكيري الجهنمي إن إنتم تسافروا إيطاليا معايا نجرب حظنا هناك .

حشيش : الله .. وبالمرة كمان أدور لي على عروسه هناك حاكم الطلاينة دول صواريخ .

إبن مصر : بطل طفاسة يا حشيش ياللي فاضحنا مع كل الجنسيات وإسمع وإنت ساكت .

سكوب : وزي ما إنتوا عارفين إن كان عندي محل بيتزا زمان والضرايب حجزت عليه .. وكان في عيال من المافيا بييجوا ياكلوا عندي ساعات يدفعوا وساعات يبلطجوا ..

س س : قصر وهات من الأخر .

سكوب : حاضر .. فأتصلت بالعيال دي اليومين اللي فاتوا عشان يدبرولنا شغل في إيطاليا ونجرب حظنا معاهم ... وبعد شد وجذب وسؤالات وإختبارات هيئة .. وافقوا أخيراً ولقوا لنا شغل إحنا الأربعة .

حشيش : ياريت يا سيكو بيكو تكون شغلانات محترمة ونكسب ونقب على وش الدنيا بقى انا قشفت من الفقر يا جدعان .

إبن مصر : إفهم يا حيشش وركز اومال .. سكوب بيقولك مافيا .. يعني الإحترام هاييجي منين فمتوقع إنهم هايخلوك تبيع سبح ؟

سكوب : خلوني اكمل ... فالمهم بعد عناء دبروا لي شغلانه مناسبة حيث إني بأتقن اللغة الإيطالية وبعض الفرنسية على طراطيش أسباني .. فهاشتغل معاهم في قسم النصب على السياح الاجانب اللي بييجوا يصيفوا في إيطاليا وهايخدوا مني نص الغلة ، اما حشيش فإسمه سابق جسمه وماكنش في صعوبة إنهم يلاقوله شغلانه بسيطة وهو إنه هايقعد بترابيزة على أي ناصية في جزيرة صقلية ويبيع الصنف للزباين ، وقولت لهم إن إبن مصر فنان ومرهف الإحساس ده زائد إن خطه حلو فعينوه في قسم التزوير وضرب المستندات والجوازات وخلافه .. اما صديقي اللدود س س فنظراً لنزعته الإجرامية فقرروا إنهم يشغلوه بودي جارد .

س س : يا سلام ياخويا يعني إشمعنى انا اللي شغلانتي فيها بهدله وبودي ضرب وحاجات من دي ؟

سكوب : والله مؤهلاتك كده .. يعني سيادتك مثلاً مامعاكش بكالوريوس طب ولا دبلون صنايع حتى كنا نشغلك في مخرطة .

إبن مصر : إيه التخطيط العالي ده يابو جنيور ، بس إنت نسيت نقطة .. بالنسبة للباسبورتات والفيزا وكده يعني .

سكوب : تعجبني دماغك الصاحية يابو إنجي يا كُمل ، قدرت بدهائي ومكري ودحلبتي إني أسلك حتتين السيغة اللي عند حماتي وأبيعهم عشان نقدر نطلع بيهم الباسبورتات ونقدم على الفيزا الطلياني ، لكن في مشكلة واجهتني وهي ان س س مابقاش يقدر يطلع باسبور عشان آ .. يعني .. أصل ..

س س : قولها .. قولها يا سكوب مادي أخرة الجدعنة .. عشان بقى سوابق ولسه تحت المراقبة .. ومانفعش أطلع فيش وتشبيه ... ربنا يكرم أصلك يا سيدي .

سكوب : لأ والله يا س س انا مش قصدي أنا باتكلم بواقعية ، المهم دي محلولة برضوا إن شاء الله فما أسهل إننا نضربلك جواز مبلول .

حشيش : طب والتأشيرات يا كبير .. يعني هاندخل إيطاليا إزاي وانا بأسمع طراطيش كلام اليومين دول عن أوروبا الموحدة واليورو وكده يعني واروبا كلها بقوا مضياقين على العالم السكرتة اللي زي حالاتنا .

سكوب : يا باشا كله هنا في الطاسة ... العيال بتوع المافيا ليهم رجالة في كل حتة حتى في سفارتهم في مصر وهايخلصوا لنا المسائل زي الحلاوة .

إبن مصر : نيجي بقى لموضوع السفر ... حلها لنا يابو مخ قشطة على مربى .

سكوب : أنا طبعاً هاسبقكم على هناك بالطيارة وإنتوا بقى ونظراً لأن الفلوس مقصرة فهاتاخدوا مركب من ليبيا لحد إيطالي وانا برضوا مرتب لكم كل حاجة مع واد مراكبي إسمه سعدون إنما إيه ولا أجدعها قبطان ... معليش ياخوانا ده توفيراً في التكاليف أولاً .. وثانياً عشان التفتيش والحاجات دي وعشان ماحدش يشك في جواز سفر س س .

س س : آه يا أناني !!!! طب ماحجزتلناش طيران ليه إحنا كمان ، ولا لازم نتعذب في السفر بالبحر ونواجه مخاطر الحيتان والدرافيل .. وبعدين انا بيجيلي دوار بحر ولا بيحوق معايا زنجبيل ولا شاي على بوستة حتى .

سكوب : والله الغاوي ينقط بطقيته يا سي س س وبعدين أنا بعت اللي ورايا واللي قدامي عشانكم .

حشيش : ولو فيها سقالة يعني يا سكوب .. ما تسلك كمان حتتين سيغة من الحاجة حماتك وأهو كله بثوابة عشن نقدر نسافر طيران ونوصل بسرعة نستلم الشغل ... وأنا اول ما شتغل ليك عليه والله العظيم هاجيبلها كردان إيطالي يحلف بيه فيرساتشي نفسه .

سكوب : إيه يابني إنت فاكرني مناسب عيلة السرجاني ؟ دي الولية كل اللي كان حيليتها غويشتيين متبقيين من شبكتها اللي كانت من 50 سنة .. لدرجة إن السايغ أول ما شافهم قالي إنت جايب الحاجات دي من أنهي مقبرة فرعونية ؟ وكل اللي كانوا في المحل إستلموني تريقة .

إبن مصر : خلاص بقى يا جماعة بحر بحر اهو منها الواحد يشوف قرص الشمس الذهبي وهو يغيب في كبد السماء ساعة الغروب بين الإطلال يا حبيبي ، أذكريني .. وحيث الطبيعة الام والهواء العليل اللي يرد الروح .. وبالمناسبة دي أنا كتبت قصيدة مطلعها بيقول ... حلاوة شمسنا وخفة ضلنا .. الجو عندنا ربيع طول السنة ... الحمد لله ماعندناش لا صيف ولا رطوبة ولا شتا ولا خريف بتوقع فيه أوراق الشجر .

سكوب : الفاتحة بقى يا رجالة إن السفرية تتم على الخير .. وعشان أقوم انا أدبر حالي وأتكل عالله وأسبقكم .

يُتبع

رابط المشاركه
شارك

الجزء الثالث والأخير

إجتمع الأصدقاء الثلاثة ليلة السفر وتوجهوا من موقف أحمد حلمي إلى الإسكندرية ومنها إلى السلوم ومن ثم إلى طرابلس حيث إتصلوا بالقبطان سعدون الذي أصطحبهم إلى المركب المُعَدة للسفر وما إن شاهدوها حتى صاح س س :

س س : إيه يا عم سعدون دي مركب دي ولا فلوكه من اللي بنركبها قدام ماسبيرو واللفه بخمسة جنية .

حشيش : أيوه صح دي شكلها ولا نورماندي تو بتاعت القصري.

إبن مصر : يا كابتن سعدون إنت متأكد إن البعكوكة دي بتمشي في البحر ؟.

سعدون : إيه يا فندي منك له مش عايز تريقه واللي مش عجباه " تيتانك " يروح يدور على مواصلة تانية تاخدوا لإيطاليا ولا تاخدوا في داهية حتى.

س س : تيتانيك !!!!!!!!! قشطه بالهبل ويا محاسن الصدف .

إبن مصر : عجبانة ... عجبانه يا عم جاك دوسون .. ما هو المضطر يركب تيتانك .

حشيش : ثواني بس يابو إنجي انا عايز أقول ملاحظة .. الموتور بتاع البتاعة دي شكل موتور الغسالة بالظبط .. صح ولا أنا غلطان ؟ .

سعدون : غسالة إيه وتلاجة إيه يا أفندي يا ساقع إنت ؟ ... ده موتورها بعون الله يفوت في الحديد وبأفتح به في أعالي البحار والمحيطات .

س س : يا خوفي يا سعدون اعالي البحار دي تجيبنا في القاع ونبقى عشا فاخر لأسماك السلمون .

إبن مصر : إتوكل عالله يا عم سعدون خليني نوصل في الليلة الغبرا دي .

وبالفعل بدأت الفلوكة تمخر عباب البحر وما إن إبتعدوا مسافة 30 كيلو عن الشاطئ حتى بدأت المياة تتسرب إلى المركب .

س س : إلحق يا عم القبطان ... السفينة بتاعتك طلعت منفثة يابا والميه غرقت الدنيا .

سعدون : أنا هنا القبطان ومش عايز غلبه وكتر كلام .. شايفين الجرادل اللي قدامكوا دي ؟.

حشيش : شايفينها يا كاتبن كوك .

سعدون : كل واحد يمسك جردل وينزح ميه على قد ما يقدر

وظل الجميع يعملون على إخراج المياة من المركب حتى عادت الأمور لطبيعتها وأنهكهم التعب فنام الثلاثة كالقتلى .. وأستيقظوا على نسمات وأشعة شمس صباح اليوم التالي ..

إبن مصر : حشيش .. س س إصحى يا مافياوي إنت وهو ...

س س : صباح الخير يابو إنجي .. الفطار جاهز .

إبن مصر : فطار !!!!! إنت فاكر نفسك نايم في الميريديان ... مافيش فطار .... في مصيبه .

حشيش : يا ساتر يارب ... مصايب كده على الصبح .. طب إستنى اما اعمل الإصطباحة طيب

إبن مصر : صحيت الصبح أدور على الكابتن سعدون ولكنه فص ملح وداب وما فيش له أثر .

س س : أحسن .. ياكش يارب يكون في حوت غتت طلعله وبلعه وخلصنا من غلاسته .

إبن مصر : ده اللي همك يا فالح ... ومين هايسوق البعكوكة دي .

س س : إيه يعني هي كيميا طب ماحنا ياما سوقنا عربيات وعجل 28 .

حشيش : عربيات وعجل إيه يا عم مايكل شوماخر .. دي مركب يابا يعني دفة ومجاديف وموتور وبوصلة وبلاوي متلتلة .

إبن مصر : صاحبك سعدون شكله خد الفلوس ومشي بينا شوية وكانت في مركب تاني مستنياه ولا حاجة وسابنا وقال يا فاكيك ... لازم نتعاون مع بعض يا جماعة ونهبل أي حاجة لحد مانوصل وبعدين نتصرف مع سكوربيون اللي رمانا الرمية السودا دي.

س س : ماشي نوزع الادوار ... أنا طبعاً القبطان وإنت يا أبن مصر مساعد القبطان ... وحشيش ده شكله نوتي .

حشيش : يا عم مش ناقصة مريسة وحياة أبوك .. وخلينا في المصيبة دي .

وظل ثلاثتهم يصارعون الموت والموج العاتي لعدة ساعات .. حتى صاح إبن مصر

إبن مصر : أرض أرض أرض .. أنا شايف الأرض أهناك أهي .. وفي كمان مركب بتقرب ناحيتنا

حشيش : الله أكبر تحيا مصر .. عاش الرئيس مبارك .... عاش الرئيس بيرلسكوني ... أحبك يا توتي .. إيطاليا .. إيطاليا .... جايلك يا سينيوريتا .

س س : طب ماتيجي ننده على المركي الطلياني اللي هناك دي يا جدعان عشان يسحبونا لحد الشط .

إبن مصر : بتعرف تتكلم طلياني ؟

س س : لأ ....... ليه ؟

حشيش : طب أنا ممكن أتفاهم معاهم بالإنجليزي .. أنا لسه حافظ كام فيرب على جملتين تلاتة من حصة أبلة سامية بتاعت الإنجليزي وأنا في ثانية ثانوي .

إبن مصر : طب يالا ورينا شطارة أبلة سامية يا شيشو .... إنده عليهم وبدع يا مبدع .

حشيش : سنيوري .. سنيوري ... كان يو هيليب أند ترمي الهلب تو دراج المركب بتاعتنا يا سنيور.

س س : يا سلام على جمال أبلة سامية ويا حلاوة الإنجليزي المُطعم بالفيومي ... مانت عشان كده فشلت وطلعت من تانية ثانوي يا بتاع سامية .

حشيش : وحياة أبوك سيبني أركز وأفتكر لي كلمتين يا س س .

وهنا أقتربت المركب الأخرى أكثر لسماع ما يحاول أن يقوله من في مركب الثلاثة وقال أحد البحارة للأخر : أيـــــــــوه ولا يا حمو .. إلحق يا ولا دول جماعة خواجات بيرطنوا وشكلهم بيغرقوا ...

حشيش : بليز سنيور بليز ... وير أر وي في إيطاليا ناو ؟

حمو : إيطاليت مين يا جدع ... إنت بالصلاتو عالنبي في أبو قير يعني إسكندرية يعني الشقاوة والجدعنة وعفاريت البحر الأحمر المتوسط .

تمت

رابط المشاركه
شارك
ممكن سؤال يا س.س.

ليه دايما إنتاج الإبداع و العبقرية الأدبية بيحدف ناحية الإجرام و المجرمين ؟

لا أشك فى سلامة النية من المبدع المؤلف ولكن هل يكفى حسن النية ؟

أقول لك يا دكتور صابر

طبيعة القصة كده ... فمتوقع إيه من عصابة ؟

ومع ذلك كان في قصص تانية ماكنش فيها إجرام خالص ..

بس انا مش مجرم والله ... بس الفنان لازم يؤدي جميع الادوار المطلوبة منه fty::

رابط المشاركه
شارك

طيب ياريت تعلق يافطة على كل مداخلة فى موضوع حكايات العصابات زى اللى على علب السجاير

أيه رأيك فى :

"السرقة حرام و الحرامى بيروح النار"

وممكن نعمل مسابقة لأجمل تعليق

وأكيد هتكسبها يا انت يا حشيش

رابط المشاركه
شارك

لا لا لا الموضوع كده بقى صعب عليا جدا ؟؟؟؟

ايه الحلاوه دى يا سى السيد وايه الروعه دى يا سكوب....

صعبتوا الامور عليا جدا!!!!!!!!

المهم الدور عليا الان فى اكمال القصه.....

انتظروا رائعه بن مصر.......

سرقه الكازينو

سرقه الكازينو

يتبع..

رابط المشاركه
شارك

سي السييييد ............

آخر حلاوة ... آخر حلاوة ....... من ساعة ما طلعوا من ليبيا لغاية ما وصلوا أبو قير و انا عمال أضحك... بس مش مجدعة ترجعوا كلكم مصر و تسيبني مزنوق في سيشيليا ... و العالم هنا مستنيين تيجوا تستلموا وظايفكم... و ابتدوا يتنرفزوا !!!!! واخدلي بالك... و لما بيتنرفزوا هنا مش حيبقي كويس علشاني.. رجعني أبوس ايدك ....

أبن مصر ..........

هيييييييييييييييييييييييييييييييييه ......... هيييييييييه...

الشلة حتتلم من جديد يا جدعااااااااااااااااااان... fty::

رابط المشاركه
شارك

ملحوظة صغيرة الي الجميع... إذا أعمل البعض عقله و لو للحظة واحدة... لأكتشف أنه لم تنجح أي محاولة لأصدقائنا... و لن تنجح أبدآ.. لأنها ببساطة ليست دعوة الي السرقة أو الأجرام.. بل أنها أكبر دليل أن الجريمة لا تفيد أبدآ... بدون أعلانات تحذيرية و لا دياولو.... فارجو أن نترك علي الأقل هذا الموضوع في اطاره الكوميدي بدون التلويح بالكروت المعتادة ... شكرآ ...

رابط المشاركه
شارك

بعد ان وجد الجميع انفسهم فى ابو قير جن جنونهم على ما اصابهم من نصبه محكمه وتوعد الجميع لسكوب ولكنهم تذكروا انه فى ايطاليا فزاد جنونهم .

وبعد ان عادوا الى القاهره توجهوا وهم يجرون اذيال الخيبه الى مكانهم المعتاد وتسمروا فى مكانهم عندما وجدوا سكوب يجلس على القهوه يبكى بحرقه وقد تمزقت ملابسه وانشر اللون الازرق القاتم فى اماكن متفرقه من وجهه وجسده.

حشيش: ايووووه ربنا عالم بينا بصوا يا جماعه مش ده سكوب الى قاعد هناك؟

سى السيد: اه والله ... جيت لقضاك يا بتاع ايطاليا.

ابن مصر: هوا فين .. هوا فين ..

وامسك كل منهم بما طالته يداه من عصى وجروا اليه ولكنهم تسمروا عندما رأوه يبتسم ويقفز اليهم والدموع تجرى من عينيه ويصرخ..

سكوب : الحمد لله .. الحمد لله ... الحمد لله انكم بخير .. اشكرك يا رب اشكرك يا رب.

سى السيد: ايه يا عمنا انتى هاتخدنا فى دوكه سيب رقبتى يا ندل.

حشيش : ( وقد فتح عينيه فى دهشه بعد ان لاحظ اللون الازرق على جسد سكوب ) الله الله الله هو فيه ايه ؟؟؟ انت بقيت تكنى كلر ليه يا سكوب... اهدا اهدا ..

ابن مصر: سيبونى عليه .. سيبونى عليه انا .. انا تعمل فيا كده .. انا .. والله ل.....( ثم نظر الى دموع سكوب )

الله الله انت بتعيط بجد يا سكوب؟ فى ايه.. خلاص يا جدع .. خلاص بقى..

سكوب: والله يا جماعه انتم ما تعرفوش انا كنت قلقان عليكم قد ايه...وخصوصا عليك يا سى السيد.

سى السيد: ليه ان شاء الله... هاتوه والا انا القاصر الى فيكم ..

ابن مصر: اتكتم بقى يا سى السيد وخلينا نعرف فى ايه..( ثم نظر شزرا الى سكوب ) وبعدين نبقى نتحاسب.

حشيش: انا عايز افهم ايه اللون الازرق ده ( وبحركه لا اراديه امسك بوججه متذكرا ما حدث لهم فى الكليه)

سكوب : اصلى وانا فى المطار ... منك لله يا جنيور .....

ابن مصر: جونيور؟؟؟ وابنك ماله ومالك .. فى ايه لحسن والله اخلى كل حته فيك مستقله بذاتها..

سكوب: اصلى قبل السفر طلبت من جونيور انه يوضب الورق الى هاخده معايا وقلتله سيب الباسبور بتاعى وحط الباقى فى الشنطه ..

سى السيد: ها كمل.......

سكوب : الواد حط الباسبور بتاعى مع باسبور سى السيد .. ولما وصلت المطار طلعت الباسبور....واديتوه للظابط..

ابن مصر ( وفى صوت هادىء وكثير من التركيز ): وبعدين؟

سكوب : الظابط بصلى قوى وبص للباسبور ... وبعدين بصلى اوى وبص للباسبور ......

حشيش : وبعدين......

سكوب : وبعدين.. قعد يضضضضححححك وندا على كل زمايله..

ابن مصر: ليه انت باسبورك بيزغزغ والا بيقول بابا وماما ؟؟؟؟؟

سكوب : لا اصلى اديته الباسبور المضروب بتاع سى السيد!!!!!!!! وبص للصوره وفقس الباسبور .. وعرف انى ضارب الباسبور.....

ودى الحاجه الوحيده الى ضربتها فى الليله السوده دى ..

سى السيد: ( وقد بدأ يضحك فى هستيريه ) والله ... والله .. يا سلام اهو انا كده نارى بردت..

ابن مصر: بردت ايه وشاطت ايه يا غبى ما هم زمانهم هايدوروا عليك علشان يعرفوا هوا ضرب اسمك ليه؟؟؟؟

وما تنساش انك ولا مؤاخذه يعنى ... زبون قديم.

سى السيد: الله يخرب بيتك يا سكوب يعنى وانا معاك مش نافع وبعيد عنك برضه مش نافع لازم ...

حشيش : الحمد لله ان انا وابن مصر ما لناش فى الليله دى..

سكوب: استنوا اصلى ... اصلى...

ابن مصر : اصل اييييييييييييييييييه؟؟؟

سكوب : اصلهم سالوا عن كل شركاءى .. ف.... ف....

ابن مصر : فا ايههههههههههههه؟

سكوب: فقلت لهم عليكم....ايه انتم ما فيش فى قلبكم رحمه .... هوا يعنى كان ينفع اقولهم لأ؟؟؟؟

حشيش: سيبونى عليه هاكله.. لا ... هاضحضحه .... ليه .. ليه..

سى السيد: متجمعين دايما يا قلل....

ابن مصر: الله طب ما قلتش ليه انك ايطالى زى كل مره؟؟

سكوب وقد تحسس قفاه : ما انا قلت بس الباسبور كان فى الشنطه.......قلتلهم كلموا البيت.

ابن مصر: اه حماتك طليانيه والواد كمان يعنى اثبات ايه اكتر من كده؟

سكوب : ما هى دى المصيبه؟

سى السيد: ليه يا خويا.......

سكوب : اصلى قبل ما اروح المطار خفت عليهم من المصيبه الى هانعملها فقلتلهم اى حد يتصل يسال عليا قولوا.....

ابن مصر: قولوا ايه؟؟؟؟؟

سكوب : قولوا .... ما نعرفش حد بالاسم ده.....

( وانفجر سكوب فى بكاء عنيف وافنجر الاخرون فى موجه ضحك هستيريه )

حشيش : طول عمى باقول عليك اذكى اخواتك....يالله حصل خير ...المهم مشيت ازاى؟؟؟

سكوب :ما هم بعد ما زهقوا منى وانا مصمم على انى ايطالى كلموا السفاره فبعتت واحد ومعاه صوره الباسبور بتاعى ...قاموا اعتذروا لى وسابونى ......

ابن مصر: اعتذرولك؟؟؟؟؟ ما هو باين على كل ملامحك.. انا من الاول قلت ان احنا نحس.....مافيا يا سى السيد....

حشيش : نفسى فى كبايه شاى وبقصماته..

سى السيد: قولوا انتم لأمشير اصلوا واخد منى موقف....

ابن مصر : بس لازم نتصرف ... انا طول الطريق يا جماعه وانا بفكر بجد......

سكوب: لا يا عم انا صلاحيتى انتهت ..... خلاص فنيتو...غير صالح للاستهلاك الادمى..ربنا يسامحهم هما ايه .... ما عندهمش اخوات ولاد!!!!!!

ابن مصر : لا المره دى حاجه جديده خالص .....وما فيهاش تعب...

حشيش : تانى انتم ... واحد يقولى نسرق بالكمبيوتر وانت ايه بقى هانسرق التليفزيون؟؟؟ هانفتحه وهما نايمين وبيوش ونقلب المذيع وهوا نايم؟؟؟

سى السيد: اصبر يا شيشو خلينا نسمع...

ابن مصر وقد نظر اليهم جميع : هانسرق كازينو القمار الى فى الفندق الى فى اخر الشارع ..( ونظر الجميع اليه وقد فتحوا افواههم من الدهشه )

يتبع...

رابط المشاركه
شارك

ده ايه الهنا ده ....

مالحقتش امسح عينيا من دموعي اللي كانت بترغرغ من الضحك علي موضوع المافيا... الا و مسكتني الزغطة برضه من كتر الضحك علي معالجة ابن مصر لبداية القصة الجديدة... و بالذات علي حتة تبادل البازابورتات ... ملعوبة بحرفنة... خشوا عالكازينو .. مع اني عارف اني انا اللي حلبسها في الآخر .. و شامم ريحة غدر ..

رابط المشاركه
شارك

يا كوميدى

هى الكوميديا ما تكونش الا بالسرقة و الاجرام ؟

السؤال لا يزال مطروحاً لذوى الألباب فقط

ما الذى يسعدك أو يضطرك لمجارة هذا العبث ؟

خدوا عندكم السطرين دول ..زى الفل

"لدنو الهمة أسباب عدة، وهي تختلف من إنسان إلى إنسان آخر ولعلها تنحصر في أسباب ثلات وهي

1- دونية الاهتمامات الشخصية لكل فرد، فأي إنسان لا بد أن يكون لديه مبتغى في هذه الحياة وطبيعي أن النفوس الضعيفة اهتماماتها بسيطة جداً لا ترتقي إلى المستوى العالي.

2- مخالطة أصحاب الأهواء والشهوات والذين وصلوا إلى درجة من دونية الأهداف عظيمة فحسبهم لهو يقضون به وقت فراغهم، أو مطلب دنيوي زائل !! فهؤلاء إنما يعيشون عيشة هامشية .

3- الخواء الروحي الذي يعيش في داخلهم.. فحينما تركوا لتلك السخافات أن تحتل مساحة كبيرة من اهتماماتهم غابت الأهداف العالية، والآمال السامية".

رابط المشاركه
شارك

س س ، ابن مصر ، سكوب...............من روائع الادب العربي.

وطبعاً حشيش السباق ................عميد الكوميديا

.............

د صابر

من فضلك سبنا نضحك.

لو حضرتك عاوز نكد او مناقشه ، افتح لينك بعيد وانا هاروح هناك اقعد اعيط معاك واناقشك لعند الصبح.

بلاش حكم ومواعظ هنا من فضلك.

ولكل مقام مقال.

سقراط non:: s-: clp::

رابط المشاركه
شارك

مش عارف ليه جه في بالي فريد شوقي و هو ماسك عود و لابس طربوش و عمال يغني : والله زمان .. زمان والله..

و يعيد .. و يقول .. و يعيد.. و يعييييييييييد ...

و في الآخر مسك كرسي و ضربه في الكلوب ....

يا أستاذ صابر ...

مثلما حدث في بعض المداخلات في موضوع الموسيقي .. و فصله في باب هدي الأسلام عن أرائكم فيها .. و ووضع رابط في الموضوع الأساسي... فرجاء وضع رأيك في موضوع منفصل و لتسميه( رأي دكتور صابر في عصابة "حساس").. مع إضافة توبيك هنا ... ليعلم جميع الذين وقعوا في مصيدتي بحسن نية.. ما هو مصير من يشارك أو يقرأ أو يضحك علي هذه النوعية من المواضيع ..

رابط المشاركه
شارك

اولا انا اشيد بالتلات فصول اللى الفهم سى السيد الحريف و لا ابو انجى بجد هايل بس مش خايف من كازينو القمار خليه كازينو الشجره احسن القمار حرام ....كلكم بتتنافسوا فى ادخال البهجه و التخفيف من همومنا فاضل الدور على حشيش ....

الأستاذ صابر مش فاهمه ايه الغرض من مداخلة حضرتك ...الباب اسمه باب الأبتسامات و كلنا و الحمد لله عاقلين و راشدين و حضرتك جانبك الصواب فى نصحنا احنا كلنا عاقلين بالغين راشدين و عارفين القصص من الحقيقه و بعدين لو ليك رغبه نقفل باب الأبتسامات لأنها كلها لهو... ممكن تطلب كده من الإدارة ما كان فيه موضوع للنكت وصل لسبع صفحات ما سمعناش صوت حضرتك ليه ؟؟؟

قبل كده كان فيه حدوته طويله عريضه عن رحله اتوبيس و الحبكه الدراميه كانت تستلزم وجود اعضاء و عضوات فى رحله فى الصحراء ,,,,,هو مش برضه الخلوة حرام و ساعتها حضرتك ما سألتش ليه عن المحارم اللى كانوا مع العضوات :) :) .......هو فيه ايه دى قصص زيها زى قصص حشيش و غيره ......اسمح لى وفر وقت حضرتك الثمين فيما هو اجدى و افيد ....و حضرتك نصحت مره و شكرا

تم تعديل بواسطة Farida
رابط المشاركه
شارك

بلاغ هام إلى أفراد عصابة "حساس":

خلو بالكم العضو س س اشترى عربية جديده مكسبويشى لانسم وشكله بيقلب رزقه من وراكم ... أو دى رشوة علشان يبلغ عنكم وتتمسكوا متلبسين فى الكازينو ... انا قلت بس انبهكم ... احنا جايين نهدى النفوس.

رابط المشاركه
شارك

يا كوميدى

أنا سألت سؤال فى أساس الموضوع ..

ليه الابداع بتاع حضرتك تخصص إجرام و سرقة ؟

إن كان عندك رد هاته

تم حذف الجملة الأخيرة .. ومرة آخرى يا أخ يا دكتور صابر أُذكرك ونفسي بأدب الحوار ...

سي السيد

رابط المشاركه
شارك

انشئ حساب جديد او قم بتسجيل دخولك لتتمكن من اضافه تعليق جديد

يجب ان تكون عضوا لدينا لتتمكن من التعليق

انشئ حساب جديد

سجل حسابك الجديد لدينا في الموقع بمنتهي السهوله .

سجل حساب جديد

تسجيل دخول

هل تمتلك حساب بالفعل ؟ سجل دخولك من هنا.

سجل دخولك الان

×
×
  • اضف...