اذهب الي المحتوي
إنشاء باب جديد بعنوان سد النهضة الإثيوبي لكل الموضوعات المتعلقة بسد النهضة ×

مغامرات عصابة "حساس"


Recommended Posts

بينما مازل ابن مصر مغشياً عليه تحت تأثير ضربة سي السيد، ينتبه أفراد العصابة إلى موديست الذي اعتدل في جلسته و وضع رجل على رجل

موديست: حد فيكم يطلب لي سحلب

سي السيد (و قد احمر وجهه من الغضب) : وله .. خلَّص في يومك اللي مش فايت .. مش ناقصينك

موديست: مش ناقصينّي؟!! و انا اللي كنت مجهز لك دور مدير التربية و التعليم ؟!!! ..

سكوب: دور مدير التربية و التعليم ده مرسوم عليّا ياض يا موديست .. انت عارف إن عندي عقدة من يوم ما خرجوني من المدرسة في تانية إعدادي لما اكتشفوا إني مش باعرف اكتب اسمي.

موديست : مايغلاش عليك يا سكوب يا حبيبي .. بس حد يفوّق لنا ابن مصر علشان يسمع الخطة

عصام: سيبوهولي .. انا فاكر كان المخبرين بيفوقوني ازاي بعد الضرب .. دي شغلانة بسيطة جداً بس حد منكم يقرّب شرابُه منه و يخليه يشمُّه و هو هايقوم زي الرهوان

سكوب (و هو يشاور على شبشب الحمام الذي يرتديه): شراب؟!! ماكانش يتعز

موديست: مش بالبس شرابات علشان بتجيب لي حساسية .. قصدي علشان الدنيا برد .. أقصد علشان الدنيا حر .. قصدي يعني علشا...

سي السيد: برد ايه و حر ايه .. احنا عمرنا ما شفناك لابس شراب من أصله .. قول بصراحة علشان ماعندكش شرابات.

موديست (باكياً): كان عندي شرابات ياما .. كان عندي .. بس آخر شراب بعتُه مع الأنتريه الأسبوع اللي فات علشان ادفع قسط مدرسة الوله ابني.. (و ينخرط في بكاء شديد)

سكوب : خلاص بلاش موضوع الشرابات ده .. ياض يا أمشير شوف لنا فحل بصل بسرعة

أمشير : بصل؟!! طاب اشوف لكم فحل بصل و تغوروا من هنا؟

سكوب (غاضباً) : هات ياض فحل البصل و انت ساكت .. الرجل مفيّص مننا

يقذف لهم أمشير من بعيد بفحل بصل أتى به من صفيحة الزبالة

يمسك عصام فحل البصل و يقرّبه من أنف ابن مصر الذي بدا على وجهه السكينة و الهدوء و هو يستفيق من غيبوبته ، و كانت أول كلمة ينطق بها بمجرد ما فتح عيناه: مفيش طبق فول و رغيفين مع فحل البصل ده؟

موديست: هايكون فيه كباب و كفتة .. هايكون فيه فراخ بالماوانيز كمان يا ابن مصر ياخويا .. هايكون فيه اللي عمرك ما شفته بس صحصح معانا علشان تفهم العملية اللي هاتأكلنا الشهد.

ابن مصر ( و قد فغر فاه من الدهشة محاولاً تذكُّر معنى كلمة فراخ): فراخ؟ فراااخ آآه عارفها .. أتذكر إني كتبت عنها كلمتين في مساجلة شعرية مع داروين بعنوان "كلمات عن العشا في الهوا"

آهٍ آه عالفرخة و هيا مشوية

و ممددة قدامنا على الطبلية

أمسك بها فتتزفلط مني

فأعود مطأطأ و رأسي محنية

آهٍ آه عالفرخة و هيا مشوية

سي السيد: هوا ايه و هباب ايه في البرد ده .. خلصونا في يومكم اللي مش فايت

موديست: حاضر حاضر .. انت على طول عصبي كده؟ الموضوع يا إخوانّا ابسط ممّا تتخيلوا ... لكن محتاج دقة في التخطيط و كفاءة في التجهيز و سلاسة في التمييز ثم براعة في التنفيذ و هو ما أثق أنكم قادرون عليه... الموضوع يا جماعة إنــ

سي السيد (مقاطعاً): يااااادي النيلة ..ماتدخل في الموضوع يله.. كفاءة ايه و براعة ايه و نيلة ايه و احنا عمرنا ما نجح لنا عملية... الأخ حزب وطني؟

موديست: حد يسكّت لنا الأخ ده لإنه بعصبيته هايبوظ العملية قبل ما تبدأ

سكوب: تعالى جنبي يا سي السيد و انا أفهمك على كل حاجة .. قول يا موديست .. قول يا حبيبي .. قول مادام فيها فراخ

ما أن جلس سي السيد بجوار سكوب حتى همس له سكوب في أذنه : مش الواد ده معرفتكم انت و اللي ما يتسمّى (يقصد ابن مصر)؟ ما تبقاش تشتكي بقى .. احنا مستحملينه علشان خاطركم.

موديست: مش عايزين نضيع وقت يا جماعة .. العملية باختصار زي ما قلت لكم هيا سرقة خزنة مدرسة الواد احمد ابني .. انتوا عارفين إنه بيدرس أي جي و إنه...

سكوب (مقاطعاً و فاغراً فاه): هه؟.. ايه الآى جى دى.. قبل الثانوية العامة ولا بعد الإعدادية

عصام (واثقاً): لأ دي مجموعات تقوية في الصيف

سي السيد: جتكم الهَم كلكم مش فاهمين حاجة .. دي بتاعة نحو الأمية

سكوب: آه آه خلاص فهمت .. يعني بتدي دبلون يا موديست ياخويا.. لأ حاجة تفرح صحيح يعني

ابن مصر: كلكم جهلة .. أدي اللي عايزهم ينفذوا معاك العملية .. اقول لكم أنا ايه هيا

دي إعدادي تجاري .. و تتميز بأنها نظام تعليمي مختلف تماماً .. يعني من الحضانة للجامعة على طول .. و بتدي شهادة أمين خزنة

موديست: بصُّوا .. اللي أنا فاهمُه إنها شهادة واخدة القرشينات اللي حيلتي و خلاص.. غير كده أبقى أجيب لكم الواد احمد يفهّمكم لإنه قعد يشرحها لي 55 مرة و برضه ما فهمتش حاجة.

يتبع (خطة ماتخرّش الميه).... :cry:

رابط المشاركه
شارك
  • الردود 253
  • Created
  • اخر رد

Top Posters In This Topic

Top Posters In This Topic

Popular Posts

حبيب قلبى سكوب. انتظر فى القريب العاجل تكمله سرقه مركز التجميل تتبعها دره تاج عصابه حساس وهى... سرقه مطار القاهره .. علشان خاطر عيونك الى وحشتنى ضحكتها....  

يا حلاوو يا جودعاااااااااااااااااااااااااااااااااااااااااااااااااااااااااااااااااااان ....  حنرجع لأيام الشقاوة .... لأ و النية حتبقي علي مطار القاهرة بعد كده ... البيه جاييلي بعد 11 سنة و يخططلي

Posted Images

وانا الى فاكر انى هاخش الاقيك نزلت بالحته التانيه...

انت هاتقضيها تحيات متخلص فى ليلتك.....

انا... كلمات فى العشا والهوا.......موديست لو القصه مخلصتش موقفك معايا هايبقى سييييييييييييء للغايه.......

ماشى اما نشوف أخرتها.!!!!!!!!!!!!!!!!!!!!!!

بس بجد... حلووووووووووووووووه قوى قوى قوى.....شوط ولا يهمك..

رابط المشاركه
شارك

السلام عليكم ورحمة الله ...

ايه الخطة اللى تفتح الشهية دى.....حاجة كده بتفكرنى بحلم اعادة الاموال المتأممة والنبى يا سى الاوستاز موديست باشا باعتبارك العقل المدبر نونكن تضع فى الحسبان المرور بمدرسة كريمتنا الغالية

نزيلة عنبر الاى جى اكس واى زد ابوسترف اس؟...

أحسن الموضوع زاد عن حده جداااااااا

اوستاز موديست باشا ماتحاولش تفهم معنى الاى طاخ جى طريخ ابوسترف سجن....خلينا كده مش فاهمين....لعل الله يرحمنا ويدخلنا فسيح جناته...

فى استنتظار عودة الاموال الضالة من خزينة المدرسة...

كان معكم المعذبة والمفلسة

ولية امر طالبة بالاسمها ايه دى

رابط المشاركه
شارك
انت هاتقضيها تحيات متخلص فى ليلتك.....

انا... كلمات فى العشا والهوا.......موديست لو القصه مخلصتش موقفك معايا هايبقى سييييييييييييء للغايه.......

أخلّص؟ :lol:

ده أنا هانقطك .. استنى عليا بس :lol:

رابط المشاركه
شارك
اوستاز موديست باشا ماتحاولش تفهم معنى الاى طاخ جى طريخ ابوسترف سجن....خلينا كده مش فاهمين....لعل الله يرحمنا ويدخلنا فسيح جناته...

فى استنتظار عودة الاموال الضالة من خزينة المدرسة...

كان معكم المعذبة والمفلسة

ولية امر طالبة بالاسمها ايه دى

يا نينة الحاجة :lol:

أنا مش عايز أفهم ... أنا عايز فلوسي :lol:

إدعي لنا انتي بس و أول ما العملية تنجح و نعكّم القرشينات هانشوفك باللي فيه النصيب :lol:

رابط المشاركه
شارك
موديست: حد فيكم يطلب لي سحلب

من أمتى وأنت بتشرب سحلب ؟؟ أمال أيه إشاعة الكابتشينو اللي ماليه البلد دي ؟ :lol: :lol:

مش عايزين تقطيم الله يكرمك :lol: .. ماكانش واحد كابوتشينو ده اللي خمّسنا فيه سوى و ماشي تفضحني بيه في كل حتة md2:

رابط المشاركه
شارك

.

اشعل موديست عُقب سيجارة يحتفظ به دائماً في جيب البنطلون لزوم المنظرة ثم بدأ في سرد الخطة و الجميع ينظر إليه

موديست: قرب انت و هو شوية علشان الرزق يحب الخفية .. قصدي علشان اليوم الاسود ينفع في القرش الأحمر .. قصدي علشان إن كبر ابنك خاويه.. أقصد يعني

عصام (مقاطعاً): قصدك علشان الحيطان ليها ودان

ينظر الجميع لعصام بإعجاب شديد لثقافته و لموديست بقرف

سكوب: خلّص يابني .. اللهم طوّلك ياروح

موديست: طيب .. حاضر .. هاختصر...يعني باختصار شديد .. بصّوا

سي السيد: يااااادي اليوم اللي مش فايت .. هو انت شايفنا بنتفرج على التليفزيون ياض؟!!!.. ماحنا باصّين لك أهو

موديست: انت واخد مني موقف يا سي السيد من ساعة ما جيت (و ينفجر في بكاء شديد)

ابن مصر: اسكت يا سي السيد دلوقتي .. هو واخدك حِجَّة و تلاقيه لا عنده خطة و لا نيلة .. إهدى يابني و كمّل في يومك اللي مش فايت

موديست: حاضر .. هاكمّل بس اسمعوني

سكوب: سمعت الرعد يا بعيد .. أنا أعصابي خلاص فلتت .. يا تنطق يا تغور من هنا يله

موديست: انت كمان واخد مني موقف يا سكوب؟؟

عصام: لأ يا موديست .. لأ يا حبيبي .. كمل يا ضنايا .. محدش يخضُّه يا جماعة.. محدش يخضه

موديست (متأثراً): حاضر .. بصوا .. الخزنة موجودة في مكتب الحسابات و مش بيكون موجود في المكتب غير واحدة ست اللي هيا المُحاسبة و ..

سكوب (و هو يعدِل القُصَّة "بضم القاف"): ست؟

موديست : أيوة يا سيدي .. لكن علشان نوصل للمكتب ده اللي هو موجودة في الإدارة لازم نمر الأول من بوابة المدرسة و بعدين الحوش و منه على ممر طويل مليان مكاتب و فصول و بعدين ندخل الإدارة في آخر الممر.

ابن مصر: أنا أقترح ننُط ندخل من شباك الإدارة مباشرةً توفيراً للوقت يعني.

سكوب: آه .. علشان يمسكونا و الموضوع يبوظ من أوله .. اخرس خالص

ابن مصر: حاضر .. أنا كنت باحاول افيدكم بخبرتي.. انتوا حُرِّين

موديست: دلوقتي مع الخطوط العامة للخطة.. لازم يكون فيه سبب لدخولنا كلنا المدرسة في وقت واحد

أنا هاعمل إني رايح أدفع المصاريف ..لكن قبل كده عايزين نتصرف في كام هِدمَة حلوة علشان يكون علينا القيمة و احنا داخلين المدرسة.. آه أنا عايز اشرّف الواد ابني ..لازم يعرف إن أبوه شغال مع عصابة محترمة مش أي كلام

المكوجي اللي على ناصية حارتكم يا سي السيد بيقبل ميزة كارد؟ .. اقصد بيزا كارد .. قصدي ليزا كارد .. يعني...

عصام (مقاطعاً): قصدك فيزا كارد

ينظر الجميع لعصام بإعجاب شديد لثقافته و لموديست بقرف

سي السيد: هه؟ و عايز فيزا ليه يله؟ فيزا لأنهو بلد بالضبط ؟ ناوي تهرب على فين بعد العملية؟

موديست: حد جاب سيرة هروب دلوقتي؟ أنا أصلي اتحصّلت من الواد ابن اختي على كارت صغير كده اسمه اللي قال عليه عصام ده، لقاه واقع في محطة مترو الانفاق.. بيقول لك سرُّه باتع و مش ضروري يكون معاك فلوس لإنك ممكن تدفع بيه في أيوتها حته من غير ما ياخدوا منك فلوس.

ابن مصر: أنا سمعت عن الهباب ده بس بيقولوا إنك في آخر الشهر تدفع للبنك كل اللي صرفته بالكارت.. هاتدفع منين يا فالح؟

موديست: لأ أنا سمعت بس لغاية إنك تصرف بيه و بعدها نِمت.. و بعدين يا سيدي لما يبقى ييجي آخر الشهر هاتكون حالتنا فُللي .. ده أنا بافكر أشتري البنك نفسه.

سي السيد: حيث الحكاية كده و كارت و مفيش فلوس.. لأ يا سيدي مش بيقبل... و أنا اصلاً باخاف اعدّي من قدامه علشان ما اديتوش حق إيجار البنطلون اللي عليّا.

موديست: طيب يبقى سكوب يلهف قرشين من حصالة جونيور و يأجر لنا كام بدلة على مقاسنا.. 4 بدل آخر شياكة و الخامسة بدلة سواق لابن مصر و ماتنساش البرنيطة و الفوطة الصفرا.

ابن مصر: سواق؟

موديست: آه و هاتجيب امتثال معاك.. أمّال يعني عصابة محترمة هاتروح متشعبطة في أوتوبيس؟ ماتنساش إنك بعد العملية هاتعمل عَمرَة لامتثال من نصيبك في اليغمة و ها ترجعها عروسة

ابن مصر: أما لو حصل ياض يا موديست .. هاركّب لها 4 فِرَد كاوشت نص عُمر و أخليها عروسة صحيح يعني.

موديست: طيب نرجع للخطة:

يتبع... :P

.

رابط المشاركه
شارك

موديست ...بجد جامده جدنون :wub:

بس انت عارف بقي ان الاعمار بيد الله wst:: .....و اديني بادعي ربنا اني اعيش لغايه ما اشوف الخطه... :P....هه.....خلص يا موديست قبل ما تخلص علينا من الانتظار

رابط المشاركه
شارك

السلام عليكم ورحمة الله .....

موديست باشا ... :roseop: :wub: .....لو مش واخد بالك احب اقولك ان امتحانات الاى جى حتبدأ بعد 10 ايام...يعنى الحق بسرعة نفذ الخطة احسن الفلوس زمانها حتتورد....

وتبقى اول خطة فشلت من قبل ماتتكتب حتى ...الله !!!

نانو انا قايمة انام وابقى سجلى لى المسلسل اتفرج عليه بعد الامتحانات

اااوووففف :wub:

رابط المشاركه
شارك
انت عارف بقي ان الاعمار بيد الله :old: .....و اديني بادعي ربنا اني اعيش لغايه ما اشوف الخطه... :wub:....هه.....خلص يا موديست قبل ما تخلص علينا من الانتظار
موديست

إنت ليك حد بيشتغل في تأليف مسلسلات رمضان ؟

السلام عليكم ورحمة الله .....

موديست باشا ... :roseop: :angry: .....لو مش واخد بالك احب اقولك ان امتحانات الاى جى حتبدأ بعد 10 ايام...يعنى الحق بسرعة نفذ الخطة احسن الفلوس زمانها حتتورد....

وتبقى اول خطة فشلت من قبل ماتتكتب حتى ...الله !!!

نانو انا قايمة انام وابقى سجلى لى المسلسل اتفرج عليه بعد الامتحانات

اااوووففف :wub:

إنتوا كده بتخلوني أرتبك :cry: .. هاتنفعوني لما العملية تفشل يعني؟ :cry: ..بدل ما كل واحد يدخل يستعجلني كدهو ، لموا من بعض قرشين و ساعدوا أخوكم ... أوففففففففف md2:

و لعلمكم بقى .... أنا بافكّر ابدأ من الأول تاني smk:

رابط المشاركه
شارك

آه و النبي يا موديست من الأول ... بس احياااااات ابوك يا شيخ خليها تبتدي في مسمط فيه هبر .. و بعد المسمط نروح عالقهوة عشان نحبس و من هناك تبتدي الخطة ...

تيك اووووول يور تايم يا عسل و لا يهمك منهم ... و ركزلي قوي علي مساجلات الفراخ اللي عالعشا دي ... ده موضوع يهمني جدآ ....

رابط المشاركه
شارك

إنت اللي فاهمني يا سكوب .. أوعدك أول ما نخلّص العملية هانقلب العصابة الفقر دي و نفتح انا و انت عصابة محندقة على قدّنا كلها فراخ و حمام و بط و وز .. متخصصة في سرقة المطاعم يعني :FN:

دلوقتي هاكمل الخطة و بعدين التنفيذ علشان سي السيد بدأ يلسّن عليا في الرحلة المنحوسة بتاعته :cry:

-----------------------------------------------------

الخطــة

ينظر موديست إلى أفراد العصابة فيجدهم كالتالي:

سي السيد راح في سابع نومه

سكوب قام يدخل الحمام

ابن مصر و عصام انشغلوا في حديث جانبي و هم ينظرون إلى موديست بقرف بين الحين و الحين.

موديست: مش هاينفع كده يا جماعة .. أنا عايز ناس مصحصحة معايا

ابن مصر: قوم يله من هنا .. زهقتنا في عيشتنا و انت لا ليك في الخطط و لا في أي حاجة من أصله.. أنا الحق عليا عرّفتك أسرارنا بعد ما اتغشيت فيك لما عرفت إنك بتتعشى كل يوم.... بتتعشى كل يوم قال يا عديم الشرابات انت.

موديست (متأثراً و عيناه مغرورقة بالدموع): طيب المرة دي مش هأقول بصوّا و لا شوفوا و لا أي كلام تاني .. هادخل في الموضوع على طول.. بس ادوني فرصة

في هذه الأثناء عاد سكوب من الحمام و أفاق سي السيد من التعسيلة

سي السيد (موجهاً كلامه إلى موديست و هو يتثاءب): انت لسه هنا يله؟

موديست: آه .. بس خلاص يا سي السيد هادخل في الموضوع . هادخل في الموضوع .. وعد رجالة يعني بس محدش يقاطعني

زي ما قلت لكم أنا هاعمل إني رايح ادفع المصاريف و سكوب زي ما وعدته هايكون مدير التربية و التعليم رايح يفتّش على المدرسة

ابن مصر و سي السيد و عصام هايكونوا مفتشين ... ابن مصر مفتش تربية موسيقية و سي السيد مفتش ألعاب و عصام مفتش أناشيد

أقول لكم؟ .. خليها ابن مصر مفتش لغة عربية و سي السيد مفتش انجليزي و عصام مفتش حساب

لألأ .. خليها سي السيد مفتش تربية قومية و ابن مصر مفتش تاريخ و جغرافيا و عصام مفتش علوم

أو متهيألي الأحسن يكون عصام مفتـ.....

سي السيد (و هو يجز على سنانه لكبح جماح غضبه): يا بني يا ضنايا مش مهم مين يفتش على إيه.. ركّز في ليلتك .. أنا جالي حَوَل رباعي في إيديا الاتنين

موديست: بعد الشر عليك يا سي السيد .. خلاص خلاص .. مش مهم النقطة دي مع إنها نقطة مركزيه لكن نبقى نرجع لها بعدين

هانتجمع كلنا عند ابن مصر و نلبس البدل اللي هايجيبها سكوب .. أنا عايز بدلة خضرا يا سكوب علشان تليق على الكرافتة البنفسجي اللي حيلتي و سي السيد هايلبس بدلة برتقاني على قميص أحمر مشجّر عليه ورد كبير علشان هو بيحب الشياكة و عصام هاياخد البدلة الــ ..

في هذه اللحظة يلمح موديست سي السيد و هو يهم برفع الكرسي ليهوى به على راسه فيتراجع عن تكملة توزيع البدَل

موديست : المهم يعني .. كل واحد يلبس البدلة اللي على مزاجه و بعدين نركب العربية

ابن مصر هايسوق العربية لإن هو الوحيد اللي بيعرف يسوق البتاعة دي اللي مسميها عربية

سي السيد هايقعد قدام جنبه و عصام و سكوب و أنا هانقعد على الكنبة ورا ..

أو اقول لكم .. هاقعد أنا جنب ابن مصر و يبقى سكوب و سي السيد و عصام يركبوا على الكنبة ورا

لألأ استنوا .. سكوب يقعد جنب إبن مصر و على الكنبة ورا نبقى نقعد أنا و سي السـ...

سكوب (مقاطعاً في حدة و الشرر يتطاير من عينيه): أنا قايم مروّح

موديست: صبرك بس يابو جونيور .. خلاص هادخل في الموضوع .. إحيات جونيور لتقعد.. إركبوا زي ما يعجبكم بس انت لازم تقعد على الكنية ورا علشان الخطة عايزة كده.

يجلس سكوب مرة أخرى على مضض

موديست: وصلنا المدرسة

هاتركن العربية بعيد يا ابن مصر و ننزل أنا و سي السيد و عصام نكمّل على رجلينا .. و انت أول ما توصل المدرسة تنزل تفتح الباب لسكوب و تؤدي التحية مع انحناءة شديدة .. الحركة دي المقصود بيها إن الأمن يعرف إن سكوب سخسية مهمة .. و إلا أول ما هايشوفوكوا بمناظركم دي هايجروا وراكم بالعصيان.. مفهوم؟

بدا على الجميع الدهشة و الاعجاب الشديد بنباهة موديست و قال الجميع في صوت واحد: مفهوم

موديست: عند البوابة يا سكوب تشخط في بتاع الأمن الي واقف و تقول له فين يابني مكتب الناظرة .. أنا السيد المحترم المدير التربية و التعليم.

و انت يا ابن مصر تستنى في العربية و تسيبها شغالة علشان لما نخلّص ننط فيها كلنا و تجري بينا على طول.

سي السيد انت هاتدخل على الإدارة و تقول لهم أنا مفتش اللغة الانجليزية عايز جدول حصص تالتة تالت... هاو أر يو .. جود مورنينج.. أي هاف تو أيز

سي السيد: هه؟

موديست: اسمع بس اللي بأقولهولك و احفظه صم.. مش ضروري تفهم دلوقتي.. أنا سمعت الواد أحمد بيقولهم و هو بيذاكر المدعوقة الأي جي.. يعني كلام مضمون بريفكس.

عصام هايدخل على الحوش على طول و أي حد يسألك على فين يا حضرة؟ .. قول له أنا السيد مفتش الألعاب.. و تقوم ناطط في الهوا و مديله واحدة شمال مستقيمة خليه يتكوّم و تكمل طريقك لحوش المدرسة.

سكوب: و لما يافالح كل واحد فينا يدخل مكان غير التاني .. هاتوبقى ايه العوبارة ؟ هادخل عند الناظرة أهبب إيه أنا؟

سي السيد: و بعد ما أقول البؤين اللي أصلاً مش فاكرهم من دلوقتي .. اقول لهم فين الحمّام و لا إيه؟

عصام: افرض اللي هاضربُه طِلِع واد جِرِم و رزعني علقة.. يوبقى ايه الوضع؟

موديست: يا جماعة افهموني.. الغرض من دخولنا أماكن متفرقة هو عدم لفت الأنظار.. لكن بعد دخولنا بربع ساعة كلكم هاتحصلوني على مكتب المحاسبة.

هاتدخلوا انتوا التلاتة و تقفلوا الباب وراكوا .. سكوب هاترفع مسدس المية بتاع جونيور في وش المحاسبة.. و هيّ لسه في هول المفاجأة عصام يلف ورا الكرسي و يكتم بؤها علشان ماتصرخش.. أنا و سي السيد ناخد مفتاح الخزنة من شنطة إيدها و نفتح الخزنة.

نلم كل اللي في الخزنة و نطلع بالترتيب .. أنا هاطلع الأول و إيدي فاضية و بعدي سي السيد و سكوب و معاهم شنطة الفلوس.. و انت يا عصام تشيل إيدك و تطلع جري قبل ما الست تنطق و نجري كلنا على ابن مصر في العربية اللي هايكون سايبها شغّالةو نهرب..

و دلوقتي ميعاد التنفيذ هايكون أول ما سكوب يبعت جونيور عند حماته علشان ما يخدش باله إن ابوه سرق مسدس الميه و الفلوس من الحصالة بتاعتُه علشان يأجر البِدَل ..

مش بأقول لكم عملية نضيفة مية المية؟؟!!.

يبدو على الجميع الدهشة من دقة التخطيط و يبدؤوا في تهنئة موديست على هذه الدقة الرهيبة.

عصام: مع إني مش بالع إنك تطلع الأول و إيدك فاضية دي، و حاسس كمان إني هالبس مصيبة و انا كاتم بوء الولية لكن كله يهون علشان القرشينات.

سي السيد: تعرف ياض يا موديست.. أنا دلوقتي بس عرفت قيمتك.. سيبك انت برضه التخطيط له ناسُه

سكوب: براوه عليك يله يا موديست.. لأ صحيح براوه عليك.. برضه يا جماعة تخطيط واحد بيتعشى كل يوم غير تخطيطنا خالص يعني

ابن مصر (و قد ظهر عليه التأثر الشديد):

أوعدك يا صديقى.. و العيش و الملح لنعملها

من أجل عينيك .. هانقوم ونسرقها

ولا نرى دمعه بعينك .. يا واد يا واكلها

ينفجر موديست في البكاء من شدّة التأثر .. بينما يطبق الصمت على المكان حيث بدأ كل واحد يفكر في كيفية إنفاقه لنصيبه من المبلغ المسروق.

يتبع (التنفيذ).... :ninja:

رابط المشاركه
شارك

السلام عليكم ورحمة الله ..........

:)

:blink:

:blink:

رابط المشاركه
شارك
تسجيل متابعة وتصفيق حاد وأنا (مسخسخ) من الضحك md2:

دا انت طلعت جن مصور md2:

:lol:

حُفِظت يا واحد بيه تاني :blink:

شفت أخوك حالته اتدحدرت إزاي :blink: .. قصدي يعني الحالة بقت فُللي و بقيت شغال مع عصابة محترمة :)

رابط المشاركه
شارك
السلام عليكم ورحمة الله ..........

:)

md2:

:lol:

مش عايزك تقلقي خااااالص يا نينة .. كلّه محسوب بالدقيقة و الثانية md2:

و كمان بعد ما شفت اللي عملُه معاكي سي السيد في الرحلة :blink: ، بافكّر أديلك نصيبُه في عمليتنا بعد ما نلِم القرشينات :blink:

رابط المشاركه
شارك

انشئ حساب جديد او قم بتسجيل دخولك لتتمكن من اضافه تعليق جديد

يجب ان تكون عضوا لدينا لتتمكن من التعليق

انشئ حساب جديد

سجل حسابك الجديد لدينا في الموقع بمنتهي السهوله .

سجل حساب جديد

تسجيل دخول

هل تمتلك حساب بالفعل ؟ سجل دخولك من هنا.

سجل دخولك الان

×
×
  • اضف...