اذهب إلى المحتوى
محاورات المصريين

مغامرات عصابة "حساس"


Scorpion

Recommended Posts

سي السيد...

جبتك يا عبد المعين تعينني.. لقيتك يا عبد المعين انيل مني... ايه يا جدع.. انت نسيت و الا ايه؟؟؟

عمال أقزقز في برسيم و كل شوية اطل يمكن الاقي حد من اخواتي طلع .. و لا تنهيقة واحدة...

كملها بقي و الا فالح بس تقطم في التانيين...

طبعآ ما انت أهلاوي و تموتوا في تضييع الوقت لما الكورة بتبقي معااا ... معااااااا .... معععععاااااااكم.....

(Moose-01.gif صوت تنهيقة جاي من بعيد )

كل اللي حيلتي زمزمية أمل... و إزاي تكفيني لباب القبر


"صلاح جاهين"


رابط هذا التعليق
شارك

معليش يا سكوب ... إستحمل اخوك اليومين الجايين دول ...

أنا مزنوق زنقة ولا زنقة الستات ....

فالحاجة إن ماكنتش تتعمل بمزاج ما بيبقاش لها طعم ..

وده فن يا حبيبي مش خضار سويته .

الأحـــرار يؤمنون بمن معه الحق ..

و العبيــد يؤمنون بمن معه القوة ..

فلا تعجب من دفاع الأحرار عن الضحية دائماً ..

و دفاع العبيد عن الجلاد دائماً

رابط هذا التعليق
شارك

الجزء الثاني

س س : سمعت إنك كنت عايز تعتزل يا سكوب ... فعشان ده هانعملك النهاردة ماتش إعتزال ونوجيبوا معاك اخر واجب ولا بيبو في زمانه ..

سكوب : مش بالظبط يا س س ولكن الموضوع وما فيه إن الصحة ما بقتش مساعدة وخصوصاً بعد الحادثة .. لكن على العموم انا من إيدكوا دي لإيدكوا دي .. ده انا عضم اكتافي من خيركم .

س س : هو ده سكوب اللي انا أعرفه ... رجل الشدائد والمواقف المهببة .... ما علينا .... المفاجاة اللي محضرهالكم هاتشوفوها حالاً ... آن آن آن ... خش يا بني بودنك اليمين ..

حشيش : نعم .. نعم هانهزر ونقلبها عصابة مشرفين ولا إيه .. إيه التهريج ده يا س س ؟ هو كل من هب ودب هاتجيبهولنا في العصابة ... مش كفاية سكوب إتوسطت له وعينته معانا على درجة مجرم تحت التدريب ، إيه اللي جاب اللي إسمه إسو ده هنا ؟

س س : الموضوع وما فيه يا معلم حشيش إن الراجل جاني الوكر يعيط ويشكي الظروف الملطشة معاه ،مصاريف العيال والتلاجة اللي جايبها بالتقسيط والمحمول اللي عايز يحولوا خط مش كرت ... إلخ ... فانت عارف قلبي .. رقيت له وقولت نجربه .

إبن مصر : أنا موافق س س وخصوصاً إن إحنا الأربعة بقينا كروت محروقة والحكومة حفظت وشوشنا وقفانا كمان .

سكوب : وانا بعد الحادثة ما بقتش فارقه معايا ... قال هايسخطوك يا قرد .

إسو : إيه يا معلم حشيش إنت قارش ملحتي ليه من اولها .. طب جربني كده في أي عملية وشوف هابيض وشك ولا لأ .

حشيش : إنت تخرس خالص يا جدع إنت وما تتكلمش هنا إلا بإذن ... عملية إيه اللي هاجربك فيها ؟ آه بالمناسبة .. في واحد قريبي عايز يعمل عملية البواسير .. ممكن أجربك في العملية دي ؟ وبعدين إيه قارش ملحتك وواكل سكريتك .. إيه نظام المطابخ ده ؟

إبن مصر : بالراحة على الراجل ي شيشو .. ده لسه عضمه طري .. ولازم تبقى ليراكس معاه .

س س : إسمها ريلاكس يا مسقف ، بالمناسبة يا إسو خلينا اعرفك على أفراد العصابة .

إسو ( مقاطعاً ) : مانا عارفهم نفر نفر يا معلم أبو الأسيان .. مش هما دول اللي في المحاورات .

إبن مصر : أدي عيب الشباب الجديد المندفع وراء شهواته... يا حبيب قلبي شخصياتنا اللي موجوده هناك دي عملية تموين بس ... وتقدر تقولك كده سعادتك إنها عملية غسيل شخصيات .

سكوب : ايوه صح .. زي غسيل الأموال كده .. انا ساعات كنت بانسى فلوس في جيب البنطلون الصغير ومراتي تشغل عليه الغسالة وأبص ألاقي الفلوس إتغسلت وبقت زي الفل .

س س : إسكت يا كسوب وفكر قبل ما تتكلم .. غسيل إيه وتشطيف إيه . إنت فاكر نفسك قاعد على طشت الغسيل .

إبن مصر : بص يا سيدي ... المعلم اللي هناك ده إسمه الحركي حشيش لكن هو في الحكيكة إسمه " أبو نوسه الشرقاوي " ملك الباطنية واللي حواليها ، اللي على يمينه ولابس جلابية جينز ده إسمه س س لكن إسمه الحكيكي " سيد الكويس " إسأل عليه على أي قهوة هاتعرف معلومات اكثر عنه ، اما بقى اللي في النص ده ولابس برنيطة ومخيط وشه مربعات ورابط إيده بشاش وعليه مكركرون فإسمه سكوب والحكيكي " السنيور " يعني المافيا يعني مجرمين صقلية يعني الإتحاد الاوروبي يعني الراجل اللي لبس آل كابوني طرحه وقعده في البيت .. يعني الراجل اللي مدوخ سكوتلنديارد اللي هما مباحث إيطاليا .

إسو : عفواً بس على حد علمي سكوتلنديارد هما المباحث بتاعت بريطانيا .

حشيش : مش قولت لك ما تتكلمش إلا بإذن ؟ يا بني ده كان قبل الإتحاد الاوروبي وقبل موسوليني .. دلوقت كله منفد على كله واللي بيقفش حد هناك بيديها للتاني .

إبن مصر : أما محسوبك فهو العبد الفقير إبن مصر الشهير بـ " أبو إمتثال " يعني بعون الله إسأل عليه في حلبات الفورمولا ون وتو وثري كمان .. يعني إفتح كل يوم صفحة الحوادث وإقرأ أي خبر حادثة عربية كارو هاتلاقي إسمي فيها .

س س : وأنا أقدم لكم يا جماعة الأخ الرفيق " إسو " وإسمه الحكيكي ... ( ملك السنافر )

حشيش : قوم يابني ياللي هناك يابو قميص فُحلقي يا بتاع السنافر إنت رص لنا عسلين محجر .

إسو : مين ؟ vlh::vlh:: ليه ... يعني إيه ؟

س س : إيه يا أبو الأحاشيش ؟.. يا واش يا واش ..... إدخل للراجل دوغري وبلاش السيم ده .. ده لسه جديد في الكار .. بيقولوك يا إسو قوم رص لنا حجرين معسل .

إسو : نعم ياخويا إنت وهو ... إنتوا فاكريني إيه ؟ ده انا ليسانس أداب قسم مكتبات ... ومشرف قد الدنيا.. بعد كل ده جايبيني أشتغل صبي قهوجي ؟ me0: prt:

س س : يا إسو لازم تستحمل وتتمرمط في الأول عشان توصل ... يابني ده انا في بداية حياتي الإجرامية رصيت حجارة أكثر من حجارة هرم سنفرو اللي في أول طريق الفيوم قبل ما تحصل الاوبرج .

حشيش : هاترص يعني هاترص .. إن شالله يكون معاك دبلون تجارة مش أسنس أداب حتى .

إبن مصر : قوم يا إسو يابني ربنا يهديك .

سكوب : لأ إعفوني انا .. انا مابقاش فيه نفس لشد الأنفاس ويادوبك باخد الشهيق بالعافية .

س س : ممكن بقى أدخل في الموضوع ولا هانقضيها هلفطه .

إبن مصر : سمي وإدخل يا باشا ... كلنا ودان مطرطقة .

س س : انا رسمت خطة لعملية العمر اللي هانتنغنع فيها ونضرب الفقر بالشلوت ... وبطل العملية دي هو سكوب وإحنا كلنا هانبقى سنيدة .

سكوب : يا خوفي يا بدران تكون نهايتي على إيدك ... ولمن لم يمت في الحادثة مات على إيد سين سين أبو أفكار مسمومة .... إرغي يا عم وقول بالمختصر ... عملية إيه ؟ مانا بقيت تخصص مستشفيات ؟

س س : وصلني طراطيش كلام يا شبيبة بتقول إن كيلو اللحمة في أوروبا وصل 700 ج ده بالعضم كمان

سكوب : لإ إسمح لي ... همه 400 للكيلو بس .

حشيش : مش هاتفرق .. إحنا مش قاعدين في سوق وبنفاصل ... كمل يا سونسون

س س : فأنا قولت نضرب ضربتنا ونعمل عملية نبيع فيها لحمة على قد ما نقدر للعالم الطلاينة اللي ما بيفرقوش بين طعم اللحمة بمختلف انواعها لإنهم تخصص بيتزا ومكرونة بس .. يعني لو عملنا اللحمة دي مفروم ما حدش هايحس بالطعم .

سكوب : أيوه وإيه الجديد في كده ما اللحمة مرطرطه هناك ؟

س س : مانا جايلك في الكلام ... قول تعالى ؟

إبن مصر : تعالى يا حبيبي تعالى وخش عليه بالبروتين يا جامد .

س س : إحنا هانصدر لإيطاليا لحمة حمير .....

عندئذ سادت لحظات من الصمت الرهيب ... والجميع في حالة ذهول لدرجة إن حتة فحم لسعت إيد إسو وهو مش حاسس وشيطت له القميص النص كم المخطط .

إلى اللقاء مع الجزء الثاني في رمضان الجاي

الأحـــرار يؤمنون بمن معه الحق ..

و العبيــد يؤمنون بمن معه القوة ..

فلا تعجب من دفاع الأحرار عن الضحية دائماً ..

و دفاع العبيد عن الجلاد دائماً

رابط هذا التعليق
شارك

الجزء الثالث

سكوب : يا نهار إسود يا نهار إسود .... حمير يا س س... بيقولك حمير يابن مصر ..... دونكيس يا حشيش ..... حمير يا بتاع السنافر ..... انا عارف نهايتي على إيدك وقولت لك كده مراراً وتكراراً ...

س س : إيه يابني إنت ... إنت هاتولول ... ما تجمد اومال ، يابني العملية نضيفة وماتخرش البرسيم .

سكوب : والله العظيم أنا حاسس إني هاتسجن في العملية دي وهاكل برسيم لما أنهق .

حشيش : سكوب .. سيب الراجل يكمل وإشتري للأخر ... قول يا معلم يا بتاع حمير دمنهور .

س س : حشيش كده إبتدى يفهمني ، الخطة هي كالتالي :

* إسو عشان وشه لسه مش معروف هايروح يأجر عربيتين نقل من اللي بيقفوا تحت كوبري الملك الصالح جنب العيال اللي بيشموا كُله

* إبن مصر هايسوق عربية ... وإسو العربية التانية ...

* حشيش هايلبس بدلة يأجرها من عند أي محل ومعاه سكوب ويتنكر في صورة خواجة يعني ريدينجوت وبرنيطة وتمسك غليون في إيدك ( إسألني بقى غليون يعني إيه ؟) ... ويروحوا على سوق الحمير اللي في دمنهور اللي بيتعمل كل يوم ثلاث ومعاهم إبن مصر وإسو في زي سواقين لواري .

* حشيش وسكوب هايتقمصوا دور منتجين سينمائيين ... ويروحوا يقابلوا شهبندر الحمير ويقنعوه إنهم بيصوروا فيلم سيما عن معركة مرج دابق أيام العصر المملوكي .. فمحتاجين 300 حمار على الأقل لمدة شهر ... ويغروه بمبلغ خرافي ويقولوا له إنهم هايدفعوا على الحمار 100 جنية في اليوم ده غير برسيمه وعليقه ... وبكده الراجل هايسيل لعابه وممكن يطلب منهم إنه يلعب دور حمار من الحمير كمان .

* وأول ما يوافق يروحوا مديينه مبلغ تحت الحساب .

إسو : عفواً للمقاطعة يا بوس ... طب هانجيب فلوس الداون بيمنت منين ؟

إبن مصر : أولاً ما تتعودش تقطع حبل أفكار المعلم وهو بيتكلم .... ثانياً اومال الشيكات المضروبة اللي من غير رصيد بتعمل إيه يا نبيه ؟

س س : برافو عليك يا أبو أمتثال .. كويس إنك فهمته قبل ما أمد إيدي عليه واديله قلم مخبرين .

حشيش : أكمل انا بقى الخطة اللي بقت كريستال دلوقت ، ينزل إبن مصر ومعاه الجدع اللي أنا مش طايقه ده .. وينتعوا الحمير على العربيات .... صح يا أبو السناسين ؟

س س : قشطة يا شيشو ... ساعات لما بتفهم بتبقى فزييييع فزيييع ؟

إسو : عفواً للمقاطعة مرة أخرى سيدي الرئيس .... ممكن اتكلم ؟

س س : اللهم طولك يا روح .... قول يا سي سنفور ( انا اللي جبت الصداع ده لنفسي )

إسو : حضرتك كده انا اللي هأجر العربيات دي ببطاقتي الشخصية ... يعني بمنتهى السهولة لو الحمير خدت نمرت العربية .. قصدي تجار الحمير ... ممكن يجيبوني من قفايا خلال ساعات .... فما العمل طال عمرك ؟

إبن مصر : معليش سيبهولي يا س س هافهمه بالراحة ... الواد ده لازم له دروس تقوية مكثفة ... يا سنفور يا حبيب قلبي عمرك ما سمعت عن بطاقات مضروبة ؟ شغل مخك وروح لك أي مكتب سجل مدني وأغمزهم بجوز لحاليح وهاتلك بطاقة مبلولة .

إسو : آه صح .... فاتت عليه دي ... ده أنا كده هابقى مجرم آراري .. وماما هاتفرح بيه قوي لما تشوف صورتي في الجرايد .

حشيش : معليش يا س س .. إنت قولتلي جايب الجدع ده منين ؟

س س : سيبوا يا حشيش .. ده نازل مع المشاريب .

سكوب : جد شوية .. ونقطة نظام يا جماعة ... انا مش شايف ليه دور لحد دلوقت وسط الحمير دي كلها .... إيه العبارة يا س س ؟

س س : ما ترفصش يا سكوب .. الثقيل جاي ورا ، نكمل من غير مقاطعة من أي حد وخصوصاً اللمض اللي جايبه معايا ده ...

* في نفس الوقت أنا هاكون باخلص ورق الجمارك وقرية البضايع لتصدير شحنة حمير إلى إيطاليا بإسم سكوب .

سكوب : لأ لحد هنا وييييييييييييييس ... أربط عندك .... أنا موقفي هايبقى إيه ؟ وهاقول للحكومة الإيطالية إيه ؟ وأقول لبرلسكوني .. انا جاب الحمير دي كلها ليه ؟

س س : من حقك تفهم ( في بعض الاحيان ) يا حبيب قلبي يابو جنيور ربنا يخليهولك وما يكونش والعياذ بالله في ذكاء ابوه ... ممكن تقولهم هاعمل مشروع سياحي في جزيرة قبرص وهأجرهم للسياح اللفه بيورو .... او بأشتغل على مشروع تحسين سلالة حمير أوروبا وجايب حمير مصرية عشان يقوموا بالمهمة دي ... أنا ممكن أعد لك 100 سبب للصبح .... فهمت ؟

سكوب : قشطة .... هات بوسه ؟

س س : بالصلاتو عالنبي كده يا رجالة يو قلنا إن كل حمار يعمله بالميت 400 كيلو بالعضم ... قول 250 ك مشفي ... وهانبيع الكيلو بأسعار مغريه يعني نقول 200 ج في 300 راس يبقى كده في جيبنا كام ؟

حشيش : 5 * 6 بـ 30 ومعانا 11 يبقى 7 7 وصوابع رجلي 9 يبقى ...

إبن مصر : حشيش كفاية .. إنف إنف ... يبقى 15 أرنب يا معلم يا كبير ياللي دماغك تتلف في سلوفان .. مش زي ناس تانية دماغاتها لسه بخيرها وما عملتش 5 ك .

حشيش : مش هاسمح لك تغلط اكثر من كده يا أبن مصر .

إسو : هو كلمك يا عم ؟

حشيش : بس ياخويا مش جايبينك مطيباتي .

سكوب : أموت في الملوخية بالأرانب ... إديني ورك يا معلم وإتوصوا وحياة والدك ، سؤال يا سونسون وحياة والدك ؟

س س : إسأل يا نور عيني .. يا ثمرة فؤادي ... يا فلذة كبدي من جوه .

سكوب : طب الحمير الصاحية دي .. هابيعها هناك إزاي ؟ يعني أروح ادور بيها على تجار المواشي هناك ؟ ولا أروح السلخانة بتاعت روما واكون ملبس الحمير فروة وأقول لهم إدبحوا لنا الخرفان دي ؟

إبن مصر : معليش يا س س ... سكوب حيرن ولحد كده كفاية عليه فهم ... اعتقد إنه خلص تارجت الفهم بتاع النهاردة .

س س : سيبهولي هافهم بالراحة واخده على قد عقله ... يا سكوب يا حبيبي يا حتة من قلبي ... إنت اللي هاتدبحها وتسلخها وتشفيها كمان ...

سكوب : على جثتي ... أولاً أنا نباتي ... وكبيري قوي لما بأبقى عيان بأشرب شوربة فراخ بعد ما مراتي بتكتفني وتسقيهالي زي الشربه ... وبعدين ده انا باخاف وباعمل حاجات مش ظريفة لما بأشوف منظر الدم ...

حشيش : نعم يا بودي .... إنت هاتعمل فيها هيثم ولا إيه ؟ هاتدبح يعني هاتدبح ... ده مستقبلنا كله متوقف على سكينتك ...

سكوب : مش دابح يا حشيش ... واعلى ما في حميرك أركبه ... وبعدين انا مباعرفش ادبح من أساسه .

س س : وحياتك عارف إنك هاتقول كده وحلك عندي .... إنت نازل أجازة قد إيه ؟

سكوب : شهر ونص ...ليه دي كمان ؟

س س : انا حجزت لك دورة مكثفة لفنون الدبح والسلخ في مدبح السيدة زينب .. أشهر مدبح فيكي يا مصر ... وبعون الله خلال شهر هاتكون ولا المعلم حلاوه العنتبلي بتاع باب الوزير .

سكوب : الله يخرب بيت معرفتك ... إنت ما بتييأسش أبداً ... ومابتعرفش مستحيل .

إسو : تسمح لي أقولك يا بابا يا اونكل سين سين ؟

س س : وماله يا حبيبي ... قول اللي في نفسك ، المهم .. بعد ده كله تسافر بالسلامه يا سكوب وتروح تأجر محل إيجار جديد في روما وتعمله جزارة ... وفي الخباثة كده تدبح لك كل يوم راسين تحت بير سلم بيتكم وممكن تأجر أي عيلين من الصقالبة يشتغلوا معاك في المحل .... وأديها يا ريس .. على كام إعلان بإنك بتحطم أسعار البتلو تحطيماً ..... وما تخافش انا عارف السؤال اللي هاتسأله دلوقت .... فانا ضربت لك الختم الاحمر بتاع اللحمة وهاتخدوا معاك مشفي ... في أي أسئلة تانية ؟

إسو : عفواً للمقاطعة مرة اخيرة سيدي الكونت ... الصقالبة دول كانوا في أسبانيا أيام الاندلس ... ودلوقت عقبال عندك إنقرضوا ... فمعاليك تقصد عيلين صقليين من صقلية البلد يعني ؟؟؟ صح ...

سكوب : إسكت يابني الله لا يسيئك ... المعلم لما يقول صقالبه يبقى صقالبه .... ( إحنا إتعودنا ناخده على قد عقله ) ... تحب اجيب كمان عيلين من السلاجقه يا س س لزوم التورسيكلات بتاعت التوزيع على المحلات ؟

س س : إحنا هانهزر ونقلبها مألته ولا إيه ؟

إبن مصر : بالنسبة بقى للتحويلات ونصيبنا في العملية يا س س أنا اللي هاتولى العمليه دي ... والمبلغ هايتقسم بالعدل بيننا زي كل مره ... يعني س س 40 % وسكوب 20 % وانا 20 % وشيشو 20 % .

إسو : نعم نعم ... وانا إيه قرطاس لب معاكو ... رجل ترابيزة ... فين نصيبي ؟

حشيش : بس يابني إنت وبلاش دوشه ... إنت لسه في فترة تجربة وقدامك 3 شهور على ما تشم نفسك وتسأل على حقك ياك كسر حقك ... وبعدين إنت هاتشتغل بأكلك .... سكوب إبقى باصي له فخده من اللحمة اللي هاتبيعها .

إسو : وكمان هاتأكلوني لحم حمير يا ظلمه ... طب والله مانا لاعب ... قصدي مانا مكمل .

س س : أقسم بالله يا سنفور لو نطقت بكلمة تانية لهادهنك مخطط بالطول .. وأبعتك إيطاليا مع الحمير ونبيع منك الكيلو بربع يورو .... يابني إنت هاتتعلم حاجات لا تُقدر بالبتنجان وبكره تدعيلي لما اموت .

إبن مصر : تحب نبدأ التنفيذ إمتى يا س س ؟

س س : خلال إسبوع ... كل واحد كده عارف دوره وحافظة .... وبعد شهرين نبعت إبن مصر يحاسب سكوب في إيطاليا .. ولو العملية مشيت معاه حلاوه هابعت له شحنة تاني زي الفريرة ... داكور يا شباب ...

الجميع .... قشطة يا مان ...

إلى اللقاء مع الجزء الرابع والأخير (نزل التتر ... سمعني يابني ما تسرسبيش يا سنين مين بين إيدينا .. وما تنتهيش ده احنا يادوب إبتدينا .... وعجبي )

الأحـــرار يؤمنون بمن معه الحق ..

و العبيــد يؤمنون بمن معه القوة ..

فلا تعجب من دفاع الأحرار عن الضحية دائماً ..

و دفاع العبيد عن الجلاد دائماً

رابط هذا التعليق
شارك

بجد... مش لاقي كلام اقوله....

خطيرةيا سي السيد... احيي فيك موهبة الكتابة ..

سيبوا يا حشيش .. ده نازل مع المشاريب .

اهي دي لوحدها قعدت اضحك فيها 5 دقايق....

كمل يا معلم... الحلقة دي حيتحط جنبها 5 نجوم.....hit.gif

كل اللي حيلتي زمزمية أمل... و إزاي تكفيني لباب القبر


"صلاح جاهين"


رابط هذا التعليق
شارك

اللهي يجبر بخاطر يا سكوب

اللهي يطعمك ما يحرمك ... ويكسيك ما يعريك ( حتى لو كنت هاتصور فيديو كليب ) :P

اللهي يخليلك جنيور وتشوفوه رجل محترم ولابس بدلة كروهات ...

نكمل باقي باقي القصة وبلاش إسلوب التسول المُقنع ده ...

كلاكيت ... سكوت ...هانصور ....

30 أول مرة .... فيلم إحنا بتوع الحمير ...

---------------------------------

وبعد ان تم تنفيذ الخطة بحذافيرها .... مر شهر ثم ماتت رابعة mc: ... ومر شهرٌ أخر ثم مات سكوربيون ... قصدي سافر إبن مصر إلى إيطاليا لمقابلة سكوربيون فقد حانت ساعة الحساب ، ومكث هناك أسبوع وعاد ليطلب إجتماع عاجل للقيادة العليا للعصابة ..

س س : خير يابن مصر ... إطلع بالمعلوم ووريني شكل الأنارب وحطوهم في حِجرب أرنب أرنب وحلق عليهم أحسن يطيروا .... .

إبن مصر : أنارب ؟!!!!!!!!!!!!! mc: vlh:: B) ... كان غيرك أشطر ..... سكوب شقلطنا يا معلم tot:: .

إسو : يا نهار إسود ... يا نهار إسود ... هو ده اللي كنت عامل حساب ... ضيعت مستقبلي ومستقبل أولادي يا س س يا مفتري .... إيه ده يعني إيه شقلطنا بصحيح ؟

س س :يـــــــــــــــــــــــــــــــــا حشيششششششششششششششششششش خد الجدع ده شمموا الهوا وحطوا في التلاجة لحد ما نعوزه ، يابو إمتثال إحكي لي القصة تاتا تاتا .. وبالمناسبة إيه الزرقان اللي في وشك ده ؟

إبن مصر : في وشي بس ... ده ما كان خفي كان أعظم .. انا كلت ضرب يا أستاذ ماكلوش حمار من اللي سرقناهم في مطلع من اللي طلعناهم .

س س : إحكي من اول ما وصلت روما لحد ما علقوك في الجنش ... وبالراحة وبالتفصيل الممل .

إبن مصر : انا أول ما وصلت روحت على عنوان المحل اللي أجره اللي ما يتسماش سكوب ... ولقيته حاطط يافطة كبيييييييييييييييييييييييييييرة على المحل مكتوب عليها ( محلات سكوربينكو ... للرستو والفلتو ) فأول ما شوفته جيت أخده بالحضن راح مصدر لي قفاه وقالي بصوت خشن ... إنت جاي ليه ياله ؟ ... قولت له بإستغراب ياله ؟!!!!! إنت نسيت حبيبك وصاحبك أبو أمتثال ؟...

على العموم س س بيسلم عليك وبيقولك عايزين حقنا أحسن العيال المية نشفت معاهم وبقوا يستلفوا حتى السبارس ...

هو يا س س ياخويا أول ما سمع كده راح منادي على العيال صبيان المحل ... وقالهم كلمه واحده بس بالإيطالي .. عرفت بعد كده إنه قالهم علقوه في الخطاف بتاع الدبايح .... إتلموا عليه يابو عمر وفين يوجعك إشي بالكرابيج وإيش بالعصيان اللي بيسوقوا بها الحمير ... كل ده وقليل الادب قاعد يكركر في الشيشة ( مش عارف جابها منين ) ويقولهم كلام بالإيطالي عرفت بعد كده إنه بيقولهم " إديله .. إضرب بذمة ياد إنت وهو أحسن أخصم لكل واحد منكم نص يوم " والعيال كانوا بيضربوا بضمير وكأنهم بيعزقوا في أرض بور ...

المهم نزلوني بعد 4 ساعات عزق وأنا مابقيتش قادر حتى أصرخ .. وحسيت بإحساس معتقلين أبو غريب ...

وراح الولا سكوب قال لي : قول للي بعتينك " تعيش إنت يا حاج " واللي هايهوب ناحية حدود إيطاليا هاقطع رجله وأخزق عينه وأخليه يشتغل فقي يقرأ على التُرب ... وبلغ الكلام ده خصوصي خصوصي لزعيم الغجر بتوعكوا اللي إسمه سين سين .. وفي الاخر راح ضربني بشلوت في صرصور ودني ...

والعيال راحوا شالوني هيله بيله ورموني في حاره ضلمة ....

فضلتة نايم 4 أيام في الحارة الضلمة أكل مع الققط والكلاب لإني مش قادر اتحرك ... بس تعرف يا سين سين ؟ أكل القطط عندهم ولا تقولي اكل فنادق الخمس نجوم هنا ... ولا الفتة اللي بياكولها ... تجنن !!!!

س س : آه يا طفس ... بقى انا باعتك تجيب أرانب تروح تاكل مع القطط .... أمممممممممممم بقى كده .... حشيش ... يا حشيش ... طلع إسو من التلاجة وتعالوا لي حالاً .

حشيش ... إسو : نعمين يابو الأسيان .

س س : إنتوا تروحوا حالاً تعملوا حجز على أول طيارة مسافره ألمانيا ..

إسو : بس ده سكوب في إيطاليا يا معلمه ؟

س س : تصدق بالله ... أنا بأضرب نفسي 100 برطوشة إني جبتك معانا في هذوها المكان المحترم .... يابني إسكت شويه وإسمع للأخر وما تعملش فيها فرقع لوز .

حشيش : وبعدين يا سونسون .... هانعمل إيه في ألمانيا ؟

س س : الولا ناظر المدرسة بتاعت الواد جنيور إبن سكوب كان صاحبي في فيكتوريا كوليدج بتاعت إسكندرية ... بس انا ماكملتش وإنحرفت ... وهو كمل ورجع بلده تاني وباقي صاحب سلسلة مدارس ... فانا هالاغيه وأخليه يعمل رحلة للعيال اللي عنده لألمانيا إن شالله أتحمل تكاليفها معاه .. وهناك تستفردوا بالواد جنيور وتجيبوه تحت رجلي هنا ... ويبقى يوريني شطارته سي سكوب أفندي الفتوة .

إبن مصر ( بصوت واهن ) : طب فرضنا طلبنا فدية واخينا أستندل وقالك إدبحوا الواد وانا هاجيب غيره في قاعده ؟ نعمل إيه ؟

س س : ساعتها هاقوم دابحك إنت يا صاحب البشارة عشان ادخل السجن وأنا مستريح .

تمت .............

وإلى اللقاء في مغامرة أخرى ... مع تحيات مجموعة س س لأفلام المقاولات ... وعندنا كمان شُقق أوضة وصالة وعفشة ميه في مدينة نصر بتبص عالنيل عِدل

الأحـــرار يؤمنون بمن معه الحق ..

و العبيــد يؤمنون بمن معه القوة ..

فلا تعجب من دفاع الأحرار عن الضحية دائماً ..

و دفاع العبيد عن الجلاد دائماً

رابط هذا التعليق
شارك

اخص....

بقي انا كده...

طب... طب...

طب انا سحبت الكلام اللي كتبته في المداخلة اللي فاتت... هه....

كل اللي حيلتي زمزمية أمل... و إزاي تكفيني لباب القبر


"صلاح جاهين"


رابط هذا التعليق
شارك

اعترض............... :D

اولا على النهايه السلق بيض دى.. taz::

ثانيا لان سكوب مش كده ..... لانه عارف اننا عانتلم كلنا عليه نضحضحه.. tot::

سى السيد قولت لك بلاش شاى بلبن على الريق انت كبرت وما بقتش حمل الحاجات دى!!!!! et:(

لعقل يابنى و اكتب الحقيقه!!!!1 ha)

لا حول ولا قوه الا بالله....

خدوه من هنا ....... وفسحوه. f((:

ال يضربنى قال!!!1 :P

إن ربا كفاك بالأمس ما كان.... يكفيك فى الغد ما سوف يكون

 

رابط هذا التعليق
شارك

ظهر الحق .. ظهر الحق

يحيا العدل يا ظلمة يا مفترييييييييييييييين...

قول له يا أبن مصر ... قول له.. بذمتك يا شيخ.. و رحمة إمتثال.. انا عمري ما مديت ايدي عليك.. و لا حتي علي أي حد.. و صبيان ايه اللي عندي دول.. ده انت حبيبي...

لأ يا عم إعترف أن النهاية أتزورت... و المافيا إخترقت جهازك و غيرت آخر صفحتين علشان كان فيه اسرار كبيرة قوي عن اللحمة الطلياني... الكندوز منها و الحميري... و النبي دور في اوراقك كويس يا سي السيد يمكن تلاقي النهاية قبل التزوير...tot::

تم تعديل بواسطة Scorpion

كل اللي حيلتي زمزمية أمل... و إزاي تكفيني لباب القبر


"صلاح جاهين"


رابط هذا التعليق
شارك

كنت عارف ومتأكد إن مافيش حد فيكم هايفهم قصصي ..

قصصي اللي بعد 50 سنة هاتتباع زي المخطوطات والبرديات على سور الازبكية والناس تقول الله يرحمك يا سين سين يا نابغة يا فلته ياللي كانوا بيعملوا قصصك في القرن الواحد وعشرين قراطيس لب عشان كانت ارخص من جرنان الجمهورية بتاع سموره .

وعلى فكره أنا مش زعلان منكم .. لإن العباقرة كده .. بيبقوا سابقين زمانهم .... وبالتالي فالناس العاديين بينظروا لأعمالهم على إنها جنون او اعمال سطحية ...

وإنت بالذات يا أبن مصر إنت و سكوربيون أنا حاسس بالوليعه اللي قايدة في صدوركم لإننا ادباء زي بعض ..وبا لتالي يوجد لديكم حالة من الحقد الأدبي المغلفة بغيرة من النجاح الساحق اللي بتحققه مبيعات قصصي ( أنا بايع 3 نسخ لحد دلوقت يا سادة )

لكن إنتوا أدباء على المعاش ... واحد عايش في دور بياع قُلل وكل ماحد يكلمه في القصة يروح مطلع قله من الشنطة وخابطه بها ... تقولش على دماغه شايل شنطة عربية وماشي بها ؟....

والثاني ... عمل 5 أو 6 عمليات ورا بعض وما بقاش عارف دماغه من قناة فالوب ...

اما أنا بعون الله فأديب سابق عصري ... وكلي ثقة إن اعمالي سوف ترى النور ( والميه والصرف الصحي ... اعمال بمنافعها يعني ) ولو بعد حين .. ولو كره الحاقدون ...

هو واحد بس اللي فاهمني ... إسو حبيبي نور عني اللي بيضربوا به المثل ...

الأحـــرار يؤمنون بمن معه الحق ..

و العبيــد يؤمنون بمن معه القوة ..

فلا تعجب من دفاع الأحرار عن الضحية دائماً ..

و دفاع العبيد عن الجلاد دائماً

رابط هذا التعليق
شارك

  • بعد 1 سنة...

بعد عام كامل من الغياب يسر العصابه ان تعلن لكم:

انتظرونا فى الحلقه القادمه من عصابه حساس.....

ســــــــــــــــــــــــرقــــــــه المـــــــــــزرعــــــــــــــــــــه

ابن مصر

إن ربا كفاك بالأمس ما كان.... يكفيك فى الغد ما سوف يكون

 

رابط هذا التعليق
شارك

بعد عام كامل من الغياب يسر العصابه ان تعلن لكم:

انتظرونا فى الحلقه القادمه من عصابه حساس.....

ســــــــــــــــــــــــرقــــــــه المـــــــــــزرعــــــــــــــــــــه

ابن مصر

كنت متأكد إنك هاتعملها يا أشيكف .. وإنك هاتستغل إنفلونزا الطيور وتحشرها في أي قصة ..

يالا رفرف بجناحاتك وغرد في سماء الأدب ...

أيوه كده عايزين إنتعاشة في ... بيت الأدب

الأحـــرار يؤمنون بمن معه الحق ..

و العبيــد يؤمنون بمن معه القوة ..

فلا تعجب من دفاع الأحرار عن الضحية دائماً ..

و دفاع العبيد عن الجلاد دائماً

رابط هذا التعليق
شارك

بعد عام كامل من الغياب يسر العصابه ان تعلن لكم:

انتظرونا فى الحلقه القادمه من عصابه حساس.....

ســــــــــــــــــــــــرقــــــــه المـــــــــــزرعــــــــــــــــــــه

ابن مصر

أيوه كده عايزين إنتعاشة في ... بيت الأدب

هو مش بيت الأدب ده اللي هو الحمام؟ :D

Vouloir, c'est pouvoir

اذا كنت لا تقرأ الا ما يعجبك فقط فإنك لن تتعلم ابدا

Merry Chris 2 all Orthodox brothers

Still songs r possible

رابط هذا التعليق
شارك

هو مش بيت الأدب ده اللي هو الحمام؟

خليك في حالك يا زُهيري لا يعرف مغذاها إلا الاُدباء ...

الأحـــرار يؤمنون بمن معه الحق ..

و العبيــد يؤمنون بمن معه القوة ..

فلا تعجب من دفاع الأحرار عن الضحية دائماً ..

و دفاع العبيد عن الجلاد دائماً

رابط هذا التعليق
شارك

  • بعد 1 شهر...

اهداء الي فريدة و سقراط

مغامرة سينمائية

ت

الصيف رجع ... و الجاكيتات و البلوفرات اختفت ... و طلع مكانها القمصان النص كم و الصنادل ... و صباح يوم جديد ... أمشير يرش أمام القهوة ... في الداخل مجموعة صغيرة تحتسي مشروباتها في سكون بينما تتصفح جرائدها ...

من بعيد يقترب سي السيد و سكوب .. و بأبتسامة علي وجهه يصيح :

- صباح الخير يا أمشيييييير ... والله و ليك وحشة ياد ...

أمشير مصعوقآ لرؤيتهم : يا نهار أسود

سكوب : هو ايه اللي يا نهار أسود يا أمشير .. دي برضه مقابلة تقابل بيها الزباين ....

أمشير : يا نهار أسود

سي السيد : مالك يالا ... لأخلي نهارك أسود فعلآ ...

أمشير : انتوا رجعتوا تاني ليه .. مش كنتم نقلتوا قعدتكم علي قهوة المحاورات

سكوب : ما هي برضه قعدتنا يا مشمش ... بس اليومين دول مشغولة بحفلة كبيرة .. و فيه عالم كتيرة قوي فقلنا اللي فات قديمه تاه .. و رجعنالك شوية يا حلو ... ايه رأيك في المفاجأة الحلوة دي ...

أمشير : يا نهار أسود

سي السيد : تاني حيقول يا نهار اسود ... اجري يا أمشير هات واحد شاي عين الكتكوت لسكوب .. و القهوة بتاعتي ...

أمشير بنظرة تحدي : ما كانش يتعز يا بهوات .. الدفع مقدمآ ..

سي السيد : ولاه يا أمشير ... ده احنا يااااد

أمشير : ما هو علشانه انه انتم ... الدفع مقدمآ ....

سكوب : ينفع ادفع بالبانكومات ...

أمشير : الله يرحمه يا خواجا ... الحساب 95 قرش ...

سي السيد : طب ينفع امضيلك شيك ب 10 جنيه و تجيب الباقي ...

أمشير : يا جدعان ارحموني ...

و هنا يدخل عصام ذا جريت ...

عصام : أنا كنت متأكد اني حلاقيكم هنا .. هو ايه اللي حصل ؟؟ زعلتوا مع حد هناك ... ثم ناظرآ الي أمشير .. واحد شاي بحليب والنبي يا ميشو ...

أمشير : يا نهار أسود

سكوب : ما حصلش حاجة يا جدع ربنا ما يجيب زعل .. كل اللي فيها ان الجو قافش شوية هناك .. فقلنا نيجي نا شوية لغاية ما العملية تهدا .. ( ثم هامسآ ) و بعدين فيه عملية بلفها في دماغي بقالي فترة كده .. و خلاص جاهزة للتنفيذ .. و الكلام فيها ما ينفعش الا هنا .. بس هو فين ابن مصر ؟؟

عصام : مش عارف والله يا سكوب ... آخر مرة شفته كان بيكلم نفسه و عمال يقول .. المزرعة .. هي المزرعة مافيش غيرها .. و يقوم يطلع قلة من شنطته و يلب بيها اول واحد يعدي جنبه ...و بعدين أختفي .. اتصل بيه في التليفون .. الجماعة يقولولي المزرعة ... اسأل عليه في الشغل .. برضه يقولولي المزرعة ...

سكوب : مزرعة !!! ... مزرعة ايه ؟ هو حيشتغل في الحفر و العزق ....

سي السيد : هي دي آخرة الشغل مع الأمريكان ...يعملولك البحر طحينة و بعدين ... ( ثم ناظرآ الي الشارع ) .. الحق .. أهو هناك اهه ماشي و لا علي باله .. تلاقيه رايح الحفلة .. ارميله صوت يا عصام ... احمممد ... يا احمممممد ...

ينظر اليهم ابن مصر .. و يبتسم .. و يتجه اليهم

ابن مصر : سلامو عليكو

سي السيد : و عليكو يا خويا ... ايه حكاية المزرعة اللي طلعتلنا في البخت دي ؟؟؟

أحمد : دي عملية كبيرة ... كبيييييرة ... اصبروا عليا و بعدين حتعرفوا ... لسه فيه شوية تفاصيل مزمزأة في دماغي .... ( ثم ناظرآ الي أمشير ) كوباية حبر يا أمشير .. إزاي ابوك بالحق ؟ السلام أمانة اول ما تشوفه والنبي .... والله لينوكس وحشني بجد ... و كل ما اشوف رقبتك اللي كابسة في دقنك افتكره ... هييييييي دنيا ...

ينظر اليهم أمشير فاغرآ فاه ... ثم يبتعد في يأس مدمدمآ : حسبي الله و نعم الوكيل ....

عصام : و عملية المزرعة دي حتكون جاهزة أمتي ...

ابن مصر : مش عايز صربعة .. انتوا عارفين افكاري متكلفة و عايزة وقتها ....

سي السيد : موت يا حمار ... كلها ميت سنة وتخلص .. و الا نسيت عملية سرقة الكهربا ...

سكوب : فكر براحتك يا عم .. بس لغاية ما تجهز .. انا عندي واحدة اولريدي جاهزة عالتنفيذ ... بس ناقصنا حشيش ...

سي السيد : ايه ده يالاه ... يبقي أنت فعلآ بقيت زي ما كليو بتقول عليك .. مدمن ... إخص.. يا جدع حرام عليك ... ما فكرتش في بيتك و في عيالك ...

سكوب: .. ايييييه يا حسين يا صدقي ... انت مخك راح فين ... حشيش .. حشيش يا جدع صاحبنا .... كيرميت ... فهمت ؟

سي السيد : آآآآآه حشيش ... لأ تعيش أنت ..

سكوب : يا نهار اسود ... مات ؟

عصام : فال الله و الا فالك يا شيخ .. مات ايه .. الجدع اتجوز و أتستت و قاعد في بيتهم بيألف في كصص سياسية تودي ورا الشمس ..

سكوب : سياسة ... سياسة اييييه ؟؟ .. مالناش دعوة يا عم .. ربنا جعل كلامنا خفيف عليهم ... بلاها حشيش .. ده حتي عمره ما كتب حرف في الموضوع ده ...

ابن مصر : مش فاهم .. يعني ايه عمره ما كتب حرف في الموضوع ده ...

عصام : يعني عمره ما شغل دماغه في خطة ... افهم بقي ...

سي السيد : يعني العملية ما تنفعش من غيره ؟

سكوب : لأ ... ناقص واحد ...

عصام : و مين اللي ممكن انه يكون واحد متأكدين منه ؟

سكوب ناظرآ لهم : ايه رأيكم في زهيري ؟

لحظة سكوت ...

سي السيد : تصدق بالله عندك حق يا سكوب ... حتخليني ابتدي اغير فكري فيك ... قعدة قهوة المحاورات نضفت مخك شوية .. و الجدع اللي اسمه زهيري فعلآ شكله واحد زينا ..

ابن مصر : فعلآ .. شكله امه داعية عليه في ليلة مفترجة ...

عصام : بس لازم يتعمله أختبار في الأول .. مش ناخده كده عمياني ...

ابن مصر : صح ... اروح اجيبه الأول من عالمرسح مطرح ما عمال يغني من صباحية ربنا في القهوة هناك ....

سكوب : و بالمرة هات معاك كام بيضة علي كام طماطماية من اللي بيترموا عليه يا احمد .. خلينا نعمل طبق عجة الواحد علي لحم بطنه من الصبح ....

كل اللي حيلتي زمزمية أمل... و إزاي تكفيني لباب القبر


"صلاح جاهين"


رابط هذا التعليق
شارك

اهداء الي فريدة و سقراط

Dear Scorpion

thanks ....my hard disk was formatted and i couldn't write in arabic ....execuse me and continue i am waiting 3ala a7ar men el gamr eey:: -_-

*اللهم انى اشكو اليك ضعف قوتى و قلة حيلتى و هوانى على الناس

*اللهم و لى امورنا خيارنا و لا تول امورنا شرارنا

* الساكت عن الحق شيطان أخرس

* الشعوب تستحق حكامها

رابط هذا التعليق
شارك

عصام: طيب أنا كنت عايزكو فى موضوع كدا

يرد الثلاثة على الفور وفى نفس واحد بعد أن ينظرون إلى بعضهم البعض دون إخفاء تخوفهم: خييييييير؟

عصام: إنتوا عارفين طبعا إنى سيبت الشغل

سكوب: آه ليه؟

عصام: أنا بقى الحقيقة قررت أغير كاريرى :P

أحمد: ريرى مالها :blink: ؟

س س : يا إبنى حاول بقى تتتعالج .. بيقول كا ريرى يعنى صنعته أففففف

سكوب: أيوا ازاى يعنى؟ .. هاتشتغل دلالة مثلا؟ -_- مش عايز ضرب

عصام: لأ هابقى حرامى :D

ينفجر الجميع فى موجة من الضحك يعقبها صمت ونظرة خبيثة لبعضهم البعض

س س: والله فكرة .. أنا طول عمرى ياد يا عص شايف انك خسارة فى الشغل الشريف

أحمد: يمد يده مهنئا عصام: أهلا بيك وسهلا يابنى فى العصابة :wub: (متمتما هى كانت ناقصاك؟ حسبى الله ونعم الوكيل mfb: )

سكوب: طيب أفكارك بقى يابو العصاعيص .. عايزينك تنزل سخن .. عايزين حاجة جامدة بس تكون بعيدة عن حماتك اعمل معروف ابوس إيدك لاحسن انا بقى عندى عقدة ولا عقدة الخواجة

أحمد: مابلاش انت والخواجة دى mfb: طبعا انت فاهمنى .. لأ وكمان حماته وفى جملة واحدة .. سبحان الله عليك

عصام: إقعدوا كدا واستهدوا بالله وركزوا معايا .. العملية الجاية شغل عالى محتاج تركيز وفهم .. واخد بالك يابو السيد فهم

س س: هانبدأها بقلة الأدب بقى :blink:

عصام: مطار شرم الشيخ

كلهم: إشمعنى :blink:

[وسط]!Question everything

[/وسط]

رابط هذا التعليق
شارك

اهداء الي فريدة و سقراط

ربنا ما يحرمكش مني يا سكوب يارفع رايتنا يامعلي رايتنا وكايد العزال

سكوب شكرا

سقراط

<span style='font-family: Arial'><span style='font-size:14pt;line-height:100%'><span style='color: blue'><strong class='bbc'><br />زوجتي الحبيبه ، امي الغاليه ، حماتي الطيبه<br /><br />برجاء تجهيز مايلي يوم وصولي لأرض المحروسه :<br /><br />باميه باللحم الضاني ، محشي ورق عنب ، كباب حله ، قلقاس باللحمه ،نص دستة زغاليل محشيه ، بطه راقده على صينية بطاطس ، وزه متشوحه كفتح شهيه ، صينيه رقاق ، موزه مشويه على الفحم ، سلطة طحينه بالليمون ، مية "دقه" ، ملوخيه بالارانب ، شربة فرخه بلدي بالحبهان والمستكه، برميل تمرهندي............... وكفايه كده عشان انام خفيف.<br /><br />سقراط المصري<br /></strong></span></span></span>

رابط هذا التعليق
شارك

  • بعد 5 شهور...

. الى ان ينتهى عصام حبيبى من قصته أستأذنكم فى قصه..

سرقه المزرعه .....

اهداء الى أخى الحبيب سكوربيون كما وعدته يمكن مين عارف!!!!!!!!!

سرقه المزرعه

بعد ان فشلت أخر عمليه للاصدقاء كالعاده تقوقع كل منهم عده شهور دون ان يتقابلوا على القهوه كعادتهم وانقطعت اخبارهم تماما حتى يوم مر ابن مصر على القهوه ........

ابن مصر: أمشير انت يا واد يا امشير......

أمشير :عميييييييييييييييييي ( يقفز ويتعلق برقبه ابن مصر )

ابن مصر : اهمد الله يهدك وانت عامل زى القراده..........

لينكس( أبو أمشير): الله الله الله نورت يا شقيق فينك وفين أيامك ( يقترب من ابن مصر ويحضنه بعنف )

ابن مصر : الله يخليك يا راجل يا طيب ..... أهو ما انت عارف بقى ....

لينكس : عارف ايه .... انتم فين انا قلت انتم طفشتوا عشان ما تدفعوش الحساب يا رمم......

ابن مصر : الله الله ليه الغلط ده ما انت عارف الحاله عامله ايه بس قولى انت ما بتشوفش حد من الشله خالص؟؟؟؟

لينكس : لا والله سى السيد أخر مره شفته كان راكب ورا سكوب العجله وشايل قفص عيش !!!!!!

ابن مصر : قفص عيش ؟؟؟؟؟؟ لا حول ولا قوه الا بالله ... يا بختهم ...

لينكس : نعم يا خويا بقولك بيبع عيش .....

ابن مصر : ايوه يا سيدى على الاقل بيروح برغيفين فى الاخر مش احنا الى عضلات الفك عندى تبست من قله الاستعمال....

لينكس : ياااااه هى الحاله ضنك كده؟

ابن مصر : الحمد لله على كل حال .. انت ما بتشوفش أسو؟؟؟؟؟؟؟

لينكس : اااااه اخر مره شوفته كان بيلم الجرانين القديمه ......

وبينما يتكلمون يقترب سى السيد من القهوه....

سى السيد : شوماااااااااااخر أأأأأأه يا ندل ...

( يجرى على ابن مصر ويحضنه بقوه )

ابن مصر : انا الى ندل يا جبان كل ده كل ده ... ما دام ربنا فتحها عليك وبقيت تاكل كل يوم مش تفتكر أخوك يا مفترى .... ما كنش العشم يا سى السيد ..

سى السيد وقد فتح عيناه فى دهشه وهو ينظر الى ابن مصر : أكل كل يوم ؟؟؟ أعدمك لو ده حصل ... دى كانت سبوبه كده وباظت...

ابن مصر : باظت ازاى ؟؟

سى السيد: ابدا الواد سكوب عرف يجيبلنا شوغلانه توزيع عيش من الفرن للحته ......وفى أول يوم لاقيته جاى بالعجله وقالى هاسوق انا... بينى وبينك انا اتوغوشت بس قلت وماله ما هو.. هو الى سعا فى العمليه ..... ورحنا ياخويا الفرن وجبت القفص ...... وشيلته وساق بينا ....... وعند أول مطب صناعى.......بيدوس فرامل ... مفيش فرامل ....... قام لابس فى الاتوبيس....والعيش وقع ... واتكحرتنا.. سالته انت جايب العجله منين قالى بتاعه جونيور.... وعينك ما تشوف الا النور ما حاشوش منى الا الشديد القوى وطبعا اضطرينا نختفى عشان صاحب الفرن كان عايز فلوسه....

ابن مصر : سؤال ولو فيها رزاله .... العيش طعمه لسه زى زمان ؟؟؟؟

سى السيد : لا حلوه وملعوبه ... انت فينك....

ابن مصر : ابدا يا سيدى عرفت ادبر قرشين ورحت اشتريت بقايا امتثال من تاجر الخرده وربنا كرمنى فيها وجمعتها تانى بس ناقص شويه رفايع .....

سى السيد : الله الله ايوه كده وناقص ايه ان شاء الله ؟

ابن مصر : ابدا .. رفايع .... الفتيس والكوبلن اليمين و الرادياتـــــ............( يقفز سى السيد عليه ويخنقه)

سى السيد : دى رفايع !!!! انا عرفت الى نحسنا كان ايه ..

ابن مصر : ايييييييييييييييه انت هاتفترى عليا والا ايه اهمد بقى ...... بقولك ايه.... قوم نروح لسكوب نشوفه.... وبالمره نعدى على اسو....

سى السيد : والله فكره .... تعالى......

وذهبوا الى سكوب فى المنزل......

سكوب : يااااااااااااااااااااااه والله زمان ازيكم يا فقر والله وحشتونى .

ابن مصر : أه ما انت بقيت من عليه القوم وبتاكل 3 مرات فى الاسبوع يا مفترى ..

سكوب : أعدمك والله لو ده حصل ..... والله زمان يا فقر .. وانت يا سى السيد عامل ايه

سى السيد: الحمد لله .. والله الحاله مش ولابد يا سكوب يا اخويا وبايننا كده لازم نولع فى نفسنا ..

سكوب : وايه الجديد محنا طول عمرنا كده الا فين الواد اسو؟؟

ابن مصر: انا سمعت انه الله اكبر عليه بقى اقطاعى وبيتاجر فى الجرانين..

ينظر الجميع الى بعض فى دهشه ..

سى السيد: صحيح أرف.. هوا فين يا جماعه..

سكوب : انا كلمته وهو قال انه جاى .

يدق باب المنزل ثم يأتى جونيور ابن سكوب.

جونيور: بابا بتاع الزباله واقف بره وبيقول عايزك.

سى السيد: يا نهار ابيض حتى الزبال يا سكوب مداينك.

ابن مصر: يا تحفه افهم البيه بقى عنده حاجات يرميها خلاص اغتنى و..

سكوب : حيلك حيلك انت وهو انتم ما صدقتم... والله عمرى ما رميت حاجه لان اصلا مفيش حاجه تترمى... قوم يا منيل ورينى مين ده..

يدخل سكوب وهو يضحك ويدفع اسو امامه..

خش يا فاضحنى .. كتكم الهم دا طلع اسو والواد ... استغفر الله العظيم

ينظر ابن مصر الى سى السيد وينفجروا فى الضحك..

اسو: ايه يا رمم منك ليه .... اصل عندنا غسيل ومفيش غير الطقم ده عندى .... والميه مقطوعه وبعدين...

ابن مصر: خلاص حلاص ... الحال من بعضه ولا يهمك يا شقيق ايه يا عم اخبارك

سى السيد: استنى يا بنى منك ليه ايه يا عم اسو موضوع الجرانين الى بتلمها دى؟؟؟

اسو ينظر لهم ولا يرد..

سكوب : ما ترد ردت الميه فى زورك ..

اسو ينظر اليهم بمنتهى القرف..

ابن مصر: ايه يا جماعه انتم كلكم على الراجل ... تعالى يا حبيبى اقعد عند عمو ..

اسو : خلصتوا ولا لسه يا انصاف الرجال يا مشاريع مثقفين اصابها افه الجهل والتكبر الغرور بدون امتلاك اى من مقومات.....( ينظر اليهم وقد فتح كل منهم فمه فى ذهول وهم ينظرون اليه )

سى السيد: اقطع دراعى الواد ده شم توكسافين وهو جاى..

ابن مصر وهو يقف فى هدوء وقد لمعت عيناه عندما نظر الى صينيه الشاى : لا سيبوه سيبوه انا هاخليه يتكلم..

اسو فى فزع : لا خلاص خلاص والله هاتكلم وقفز ويختبىء خلف سكوب فى رعب ..

سكوب وهو ينظر الى ابن مصر وقد امسك ببراد الشاى المغلى : خلا..خلا..ص يا ابن مصر ..... خد منه البراد يا سى السيد الله يرضى عليك.

سكوب وقد امسك باسو من قفاه : ايه يا سى زفت انت عاوز الحاله ترجع له احنا ما صدقنا ربنا كرمنا..

اسو : انا اسف .. خليكم معايا بقى وبهدوء كده.. صلوا على النبى ..

الجميع: الف صلاه عليك يا نبى .....( ينظر الجميع الى سكوب )

سكوب : ايه يا معفن منك له فى حاجه .....( يمسك ببراد الشاى الساخن )

سى السيد: لا ابدا ابدا بس سيب البراد من ايدك..المهم يا اسو ايه موضوع الجرانين..؟

اسو: ابدا انتم عارفين انى ولا مؤاخذه زيكو يعنى لا شغله ولا مشغله ومش لاقى اللضى فقلت الم الجرانين واديها لمحلات البقاله بالكيلو واخد تمنهم جبنه وزتون بدل الجوع الى احنا فيه ..

سى السيد: يا بن الايه يا ذكى والله فكره..

اسو : اصبر بس .. المهم كل بقال اديله جرانين الاقيه بيكلم نفسه و يقول ايه اخرتها مفيش ولا فرخه فى البلد...

ابن مصر : فرخه؟؟؟ يعنى ايه فرخه؟؟؟

سى السيد: اصبر وهاقولك بعدين....

اسو: المهم لقيت الموضوع ده فى كل حته فى الاماكن النضيفه والى مش كده كله معندهوش ولا فرخه واحده...

سكوب :الله يعنى ايه.. هايغلوها ولا ايه العباره .. الناس خلاص خلصت حتى على الفراخ؟؟

ابن مصر: فراخ.. أأأأأأأأأأأأأاه مش دى بتاعه صدر ولا ورك يا معلم .. يا سلااام .. كانت ايام....

اسو: مش ده المهم المهم انى من كام يوم وانا برمى ودنى كده فى موقف الاتوبيس..

ابن مصر : بترمى ايه ؟؟..... لا حول ولا قوة الا بالله .. ودى باظت امتى ؟

سى السيد: هى ايه ؟

سكوب وهو ينظر الى الارض فى اسى : ودن اسو يا سى السيد .. ودن اسو الى رماها فى الموقف عشان محدش يشوفوه .. وجالك قلب ..

سى السيد وهو ينظر الى ابن مصر وسكوب : ودن ايه الى رماها يا ولاد المجانين منك له ..

ابن مصر..: مش هو الى قال الله انا جبت حاجه من عندى ...

اسو وهو ينظر بمنتهى الذهول : ودنى ( يتحسسها ) ودنى ؟؟ الله يخرب بيوتكم .. برمى ودن يعنى باتصنت على الناس.

ابن مصر : أأأأأأأأأأأأأأأأأأأأه شوف يا أخى كلام المثقفين ..

سكوب : كمل يا مثئف.

اسو وهو ينظر لهم فى ريبه : انا سمعتهم بيقولوا ان فى القرى والنجوع الخيييييييييير يااااااااااااما والفراخ ماشيه فى الشارع كده من غير صاحب..

سى السيد : يعنى ايه ؟

اسو : يعنى تروح وتلم من الشارع وانت ساكت ولا حد هايقولك ايه وبتعمل ايه ... دول حتى بيرموا الفراخ الى بتكبر فى النيل وبيدوسوا عليها كمان ..

سكوب : بجد الكلام ده دا احنا كده ممكن نروح نلم فراخ للصبح وناكل ونتشبرق ....

اسو : ناكل ايه يا اغبيا.. اذا كان الحال هنا فى مصر كده امال لو جبنا الفراخ والبط والرومى من هناك للمحلات الى هنا هانكسب قد ايه .؟

ابن مصر : تجاره يعنى ؟.... طيب احنا لو حطينا تكلفه النقل على ....

اسو : تجاره ايه يا غبى منك ليه ..

سكوب يصفع اسو على راسه بسرعه مهوله ..

اسو : اسف اسف .. بس خبطه تانى من دى وعنيا ها تبظ تانى من مكانها ....

سكوب: اذا مكناش هانتاجر امال هانعمل ايه ؟؟؟

اسو : احنا هاتسرق مزرعه طيور ..

ينظر الجميع الى بعضهم بمنتهى الذهول ........وفى نفس واحد...

سرقه تانننى

اسو : اشمعنى انا و بدل ما نجيب فراخ بلدى وحمرا نجيب بيضه كبيره... دا الكيلو وصل 10 ج..

ابن مصر : بيضه ؟؟ 10 جنيه ؟؟

سكوب : فى ذهول .. حتى البيض غلوه ؟؟؟

اسو : بيضه ايه يانتم ايه من موزمبيق.. بقول الفراخ البيضه ..

سى السيد : خليك معايا انا يا عبقرى ..هاتسرق مزرعه ازاى ....

اسو : ابدا احنا ناخد عربيه نص نقل

ينظر الجميع الى ابن مصر

ابن مصر .: اييييييييييييييييييه لا انا لسه مكملتش تصليحها امتثال لأ

سى السيد : لازم تضحى امال هاننقل ازاى .. اقولك .. اجر العربيه وسيب امتثال رهن ..

ابن مصر ينظر الى الارض: امرى الى الله..وبعدين .

اسو : وناخد العربيه وعلى مزرعه الاخلاص الى في أول طريق القليوبيه .. نخش بالليل والفراخ نايمه نعبى من خيرات الله ونورد للبقالين الى هنا .. وشوفوا بقى ها نكسب كام ..

سى السيد : على بركه الله نتقابل بكره الساعه 1 الصبح عشان نلحق نروح ونيجى قبل الليل

الجميع على بركه الله ..

وفى الساعه الواحده ظهرا يتقابل الجميع ويركبوا سويا السياره نصف النقل وقد انحشروا فيها وعندما بدأو الدخول الى الطريق الزراعى وجدو الفراخ بالمئات تجرى فى الشارع ..

ابن مصر : سبحان الله شايفين الخير يا سلاااااااااااااااام ..

اسو : مش قولتلكوا خليكوا ورايا وانا هانغنغكوا ..

سى السيد : انا مش مطمن هيا كل الفراخ دى مالهاش صاحب .

سكوب : يا اخى واحنا مالنا ...ايه ده.. ايه ده؟؟

ينظر الجميع الى امرأه تحث التراب على رأسها وامراه اخرى بجانبها تذبح الطيور وتلقى بها فى الترعه ...

ابن مصر: هو فيه ايه ..

اسو : ولا حاجه تلاقيهم بيأكلوا السمك.... خش يمين من هنا ..

كانت الشمس تميل الى المغيب عندما وقفوا اما باب المزرعه المفتوح على مصرعيه ولا يوجد شخص واحد..

ابن مصر: الله امال فين الناس.

سكوب : واحنا مالنا يالله بسرعه على ما نجرى ورا الفراخ ونلمها بسرعه..

ينظر الجميع الى سى السيد الذى تسمر فى مكانه وهو ينظر الى الاف الطيور النائمه على الارض بلا حركه ..

سى السيد: انا مش مرتاح للمنظر ده .. هى الفراخ عامله كده ليه..

اسو: نايمه يا سى السيد ماهم بيناموا من المغرب .

ابن مصر فى دهشه : هى الفراخ برضه بتنام على ضهرها ؟؟؟

سكوب : يا سيدى النوم مالاوش كبير .. عبى معايا انت وهوا بسرعه ..

اسو : البليه هاتجرى ..

ابن مصر : بس دول ما بيتحركوش خالص..انت متأكد انهم تايمين يا اسو ؟.

اسو :/ ايوه ايوه نومهم تقيل بسرعه عبى معانا ( ويحدث نفسه هو انا كنت كلتهم قبل كده لما اعرف بيناموا ازاى )..

وبعد ان وضعوا مئات الفراخ فى الصناديق قفزوا الى السياره وتحركوت باتجاه القاهره..

سى السيد: انا متوغوش يا جماعه .. الموضوع كده مش مريح.

ابن مصر : انا اول مره اعرف ان الفراخ بتنام على ضهرها ...اول مره ..

سكوب ينظر امامه ويقول : يا جماعه فى لجنه ... كله يسكت ..

وفجأه تضىء كشافات قويه فى كل اتجاه ويصدر صوت عالى من مكبر صوت.

الضابط : مفيش حد يتحرك كله يثبت مكانه أى حد هايتحرك هايتضرب بالنار..

سكوب : يضرب بالنار؟؟؟ يضرب بالنار ؟؟؟ احنا ايه سرقنا مزرعه حد كبير والا ايه ؟؟؟ فى ايه ..

ينظر ابن مصر الى عدد من الاشخاص يرتدون ملابس عازله بيضاء تشبه رواد الفضاء وهم يقتربون من السياره ..

ابن مصر : ايه ده ... ايه ده؟؟؟ مين دول .. هو في ايه؟؟

سى السيد : يا نهار اسود دول عاملين زى بتوع الحرب الكيماويه الى شوفناهم فى الجيش....

سكوب :كيماويه؟؟؟؟ جيش ؟؟؟؟؟ يا نهار اسود .. يا نهار اسود

أسو وهو ينظر فى ذهول : الفراخ طلعت متبلغ عنها والا ايه ؟؟

فجأه يسمع الجميع أزيز طائره مروحيه تحلق فوقهم وتسلط انوارها على السياره وصوت أخر من مكبر صوت بالطائره ..السياره بها طيور أكرر السياره بها طيور تم تأكيد الاخباريه..

يحدث هرج ومرج ويبعد الجميع عنهم فى فزع فى كردون مساحته 200 متر حول السياره..

الضابط : على جميع من بالسياره النزول والانبطاح على الارض ..

ابن مصر وهو يحمل دجاجه ويقترب من اللجنه :فى ايه؟؟؟ ايه يا ناس ؟؟؟؟ والله دى فراخ..... فراخ.....وكتاب الله فراخ...... ونايمه كمان..

الضابط : كله يثبت مكانه كله يبتعد عن الفراخ النافقه ..

سكوب : نافقه ؟؟؟ نافقه يعنى ايه نافقه ( ينظر الى الشله هو يكاد يبكى ..

سى السيد وهو يلطم : نافقه.. يعنى ميته.... مييييتتتتتتتتته... ميته ياخويا ( يقفز على أسو ويكيل له الصفعات.) ميتتتته يا حبيييييييبى

سكوب : ميته ... ميته ليه.... هو فى اييييييييييه( يبكى )

ابن مصر وقد ركع على ركبتيه ويحث التراب على راسه: ميييييييييييييييته .. ماكنتش ناييييييييييييمه ( وهو يولول) ماكنتشششششش نايمه ... يا لهووووووى... انا قولت الفراخ ما بتنامش على ضهرها... ( وهو يلطم ) مكنتش نايمه ماكنتش نايمه ما كنتش نايمه..

سى السيد وهو يجرى وراء أسو بكوريك السياره : قولتلك متوغوششششششششش تقولى هانغنغكو..

الجميع ينظر من الطائره والشله تجرى وراء بعضها حول السياره ويتبادلوا قذف الدجاج على بعض ..

الضابط: بلغ مصر انهم باين عليهم مجانين وخليهم يبعتوا الخانكه..

وفى الصباح كانت عناوين الصحف..

ايداع 4 مختلين عقليا الخانكه حاولوا نقل انفلونزا الطيور الى القاهره..

تمت

إن ربا كفاك بالأمس ما كان.... يكفيك فى الغد ما سوف يكون

 

رابط هذا التعليق
شارك

انشئ حساب جديد أو قم بتسجيل دخولك لتتمكن من إضافة تعليق جديد

يجب ان تكون عضوا لدينا لتتمكن من التعليق

انشئ حساب جديد

سجل حسابك الجديد لدينا في الموقع بمنتهي السهوله .

سجل حساب جديد

تسجيل دخول

هل تمتلك حساب بالفعل؟ سجل دخولك من هنا.

سجل دخولك الان
  • المتواجدون الآن   0 أعضاء متواجدين الان

    • لا يوجد أعضاء مسجلون يتصفحون هذه الصفحة

×
×
  • أضف...