ارجو المشورة في موضوع البيع والشراء

[Simba]

نويت أن شاء الله أدفع مقدم شقة في برج من الأبراج اللي بيبنوها في المدينة وهيكون المقدم 60 في المائة في حالة التسليم الفوري والباقي علي أقساط

وبما أني أجهل ما يكون في في البيع والشراء كنت عايز من الاخوة والاخوات هنا افادتي ايه الشروط اللي المفروض اخد بالي منها في بنود العقد والعقد ده بيتوثق ولا بيكون نظامه ايه لاني بجد خايف يتنصب علي من اي حد

نقطة تانية انا كنت اشتريت بيت قديم بلدي في قرية تابعة لمدينتي ناوي ابيعها ان شاء الله في اجازتي بس اجازتي هتكون حوالي 40 يوم بس انا لما اشتريت البيت ده عملت قضية صحة توقيع فاللي هيشتري مني برضه هيعمل القضية دي المشكلة ان علي ميعاد الجلسة فيه احتمال كبير جدا اكون رجعت من الاجازة فايه الحل وياتري لو ما حضرتش الجلسة دي ايه الضرر

وشكرا للجميع

تم تعديل July 18, 2010 بواسطة سمبا

[Mr MAGED]

أخي العزيز

أولا ً مبروك عليك مقدما ً ان شاء الله

ثانيا ً من المهم يكون مكتوب مساحة الشقة بالظبط ويكون متحدد دي المساحة صافي ولا المساحة الكلية

لأن الخروجات والبروزات والشوراع الجانبية والسلم والأسانسير كل ده بيتحسب من ثمن الشقة

الأكثر أهمية هو النسبة من مساحة الأرض ... بمعني ان لو البرج عشر شقق .. يبقي لازم يتكتب في العقد

ان ليك عشر مساحة الأرض المبني عليها البرج ومش بيتحدد فين مكان العشر ده بالظبط انما بيكون علي المشاع

بالنسبة لصحة التوقيع مش محتاج انك تكون متواجد ولا حاجة ... لو انت اللي بتعمل صحة التوقيع ممكن تعمل توكيل خاص لأي محامي

وهو يخلص الاجراءات نيابة عنك .. وخد بالك توكيل خاص بالقضية دي بس مش توكيل عام

اما لو كنت انت اللي بايع والمشتري هو اللي رافع القضية ... حتي لو محضرتش ده مش هيضرك في شيء

أرجو أن أكون قد أفدتك

بالتوفيق ان شاء الله

[ذهبية]

لازم ترجع الى الحى قبل ان تدفع فلوس الشقة علشانتعرف وضعها اية ىف الحى هل هى مخالفة او سليمة فى الورق بدل ما تدفع و تتصدم بوضعها لان ساعات بيكون فية مخالفات كتيرة

لو مخالفة هتتعب جدا فى تدخيل عداد الكهربا و المية

[HanaaOsama]

يقر الطرف الأول البائع بصفته بأن الوحده السكنيه المبيعه بموجب هذا العقد خالية من كافة الحقوق العينية الأصلية والتبعية أيا كانت نوعها كالرهن والاختصاص والوقف والحكر وحقوق الانتفاع والارتفاق ظاهرة أو خفية و كما يقر بأنه حائز لهذه الوحده السكنيه دون منازعة وبصفة ظاهرة وغير ظاهرة وغير منقطعة وأنه لم يسبق له التصرف في الوحده السكنيه المبيعه بأي نوع من أنواع التصرف المادية أو القانونية وأن للوحده سكنيه المبيعه كامل المرافق العامة كما يقر بأن مباني هذا العقار الواقع به الوحده السكنيه المبيعه مطابق للقوانين واللوائح وليس عليها أي حق امتياز لصالح المقاولين الذين تولوا تشييدها.

تم تعديل July 19, 2010 بواسطة HanaaOsama

[HanaaOsama]

يقر الطرف الأول ( البائع) بأنه يتعهد بتقديم مستندات الملكية عن العقار الذي يقع فيه المكان المباع و التوقيع علي العقد النهائي أمام الشركه ومصلحة الشهر العقاري المختص أو المثول أمام هيئة المحكمة للتصديق علي صحة هذا العقد أو الإقرار بتوقيعه أو عمل توكيل غير قابل للإلغاء للطرف الثاني بالتصرف في الوحدة المباعة .

[Simba]

انا شاكر لكم جدا افادتي في الموضوع ده

بس كنت حابب اسال بيكون مين المسئول عن الشركة في التوقيع علي العقد صاحب الشركة نفسه ولا حد تاني والعقد بيكون باسم الشركة ولا بأسم صاحبها يعني مثلا عندنا شركة الرسالة فالعقد المفروض هيكون ازاي

وبالنسبة للبيت القديم اللي عايز ابيعه لما المشتري بيعمل صحة توقيع اظن فيه بند في العقد بيكون فيه شرط جزائي في حاله عدم حضوري الكلام ده صح ولا غلط

اسف لازعاجكم وشاكر جدا ليكم