مصر هي أمي نيلها هو دمي

[Morial]

مصر حبيبتي

جنة الله في أرضه

حيث النيل العريق يجري منذ سبعة الاف سنة

مصر... الحضارة الفرعونية

مصر ...المناخ المثالي

مصر ... حيث الدفء الاسري ولمة العيلة

مصر ... التي قاومت الغزاة علي مر التاريخ ولم ترضخ لأحد

مصر

بطيبة شعبها وحسن ضيافته وإيمانه

بحبها ..... بحبها.....بحبها

يا تري في حد بيحبها أوي كدة ذي ما بحبها

ولــــــــــيه أحنا بنحبها ؟

ممكن كل واحد مننا يذكر أسباب حبه لمـــــصــــــــــر أم الدنيا wst::

تم تعديل 10 يوليو 2010 بواسطة Morial

[se_ Elsyed]

الموضوع ده بحق وحقيقي ولا خودعه يا مونتريال ؟ wst::

مش عارف حاسس إنه Piège ليه ؟

[Morial]

والله كدة أزعل أوي لما حد يشكك في وطنيتي وفي حبي لبلدي

ده اللي ملوش خير في اهله ملوش خير في حد

أنا طبعا بحب مصر

مصر الارض الطيبة والسما الصافية والموقع الجغرافي العبقري والتاريخ العريق

مصر النيل شريان الحياة للمصريين علي مر التاريخ

هي دي مصر اللي بحبها

لكن اللي مبحبوش هو تخاذل المصريين في التاريخ المعاصر

جبروت البعض واستسلام البعض الاخر

فساد الحكومة وانعدام الديمقراطية

عدم ثقتنا بانفسنا كشعب عريق ذو ثقافة متفردة وحضارة رائدة قادت العالم من الظلمات الي النور في الماضي

والعيب كل العيب الا نحافظ نحن الابناء علي ميراثنا من الاباء

بل نفرط ونتهاون بهذا الميراث

[hOuSsAm]

مع انى شاكك فى الموضوع ده ونوياكى بس هجاوبك wst::

اول حاجة انا بحب مصر مش عشان هى احسن حاجة فى الدنيا ولا هى احسن بلد ............ انا بحبها عشان لاقيتها كدة بحلوها ومرها

(يعنى كدة زى مسالك انتى بتحبى والدتك ليه............ ممكن متكونش والدتك احسن ام ولا اجمل ام ......... بس هى والدتك وهى اللى ربتك وصرفت عليكى واهتمت بيكى اكتر من اى حاجة تانية) يمكن يكون فى امهات تانية كتير احسن من والدتك ولو كنتى بنتهم كانوا هيهتموا بيكى اكتر من والدتك بس انتى مش هتحبيهم اكتر منها ................ لانها هى والدتك

------------------

فيه شق تانى

انا عشت احلى ايام حياتى فى مصر

بشكل معين وبيئة وفى ظل ظروف وتغيرات مختلفة

يمكن مش احسن مكان ولا لاقيت كل الامكانيات ولا اتعاملت احسن معاملة

بس هى دى احسن ايامى واجمل زكرياتى وهى دى الظروف اللى ادتنى الشخصية بتاعتى اللى بحبها واللى خلتنى اتغلب على اى حاجة فى الدنيا عشان انجح واثبت نفسى

هى دى الظروف اللى ولله الحمد خلتنى متفوق عن ناس كتيرة سواء مصريين او اجانب (وده واقع انا بلمسه)

هى دى البلد اللى خلت عندى نظرة موضوعية للامور وابعاد اخرى لحل المشاكل

هى دى بلدى اللى خلت عندى هدف شخصى فى النجاح وهدف قومى فى التطوير والتغير

وهرجع اقول هى دى اللى طلعت لاقيتها.............. هو فيه حد بيختار امه

-----------------

شق تالت

بلد فيها تركيبات متغيرة من جغرافيا ومناخ وتاريخ طويل عريض وتركيبة شعب بكل فئاته وطبقاته وطريقة فى الحياة خلتنى احس ان فيها من الامكانيات ما يساعدها عالنجاح وفيها من الامكانيات انك تقدر تعيش فيها حياة سعيدة لو توفرت فيها مقومات العدالة

يعنى مصر بكل الحسابات تقدر تعيش فيها مبسوط اوى فقط .................. لو هى بلد بها عدالة

[herohero]

لو هى بلد بها عدالة

هبدا من هنا هو فيه حد بيكره مصر كلنا بنحب مصر مش بس لاننا لنا فيها ذكريات او لان الواحد طلع لقاها بلده لكن لان ده شيئ ف قلوبنا

لكن عتبنا ان فيها اخوات لينا للاسف ظلمونا وللاسف بنزعل لما بنلاقي بلدنا بتدي خيرها لغيرنا او للغرب والكلام ده

مش راي شخصي بصوا حواليكم كده وانتوا تتاكدو وظهر ده حتى ف كذا اغنيه لكذا فيلم زي اغنيه بالورقة والقلم ف فيلم عسل اسود واغنيه فيلم الديلر يعني ده مش انطباع شخصي

ويا اخ حسام انت لسه صغير يعني مش من السهل تقدر تحكم لسه حضرتك لما تيجي تشتري شقة وتسجلها وعربيةوترخصها وارض وتدخل فيها مرافق هتلاقي سلبيات لن تقبلها

مش البادي الكارينا لا ده انت هتلاقي عري اخلاقي أسوا بكتير من العري الجسدي

مصر بنحبها بس هي مش عارف بتفرق بينا او مخدوعه ومدية خيرها لناس انا شايف انها بتضرها اللي نهبوا مصر هم عيالها مش غرب ولا اجانب ولا ناس اتولدت بره مصر ولا ناس مزدوجي الجنسية

وما احب ان اؤكده هل حب مصر هو فقط ف الاغاني

هل نحن اصبحنا من مؤيدين الحب بالشعارات فقط

اذاكان ولا بد فكلنا هنقعد نغني من هنا للصبح اننا بنحب مصر

وما يحدث الاتي شوف كده ف المنتدى هتلاقي شباب يادوب متخرج واشتغل سنة او قضاها ف الجيش ويافكيك ع بره .... وبرده هنغني بنحبك يامصر

انا شايف ان اللي بيحب هو اللي بنتقد عموما

خلينا نغني ونكرر الاغنية مع موريال

لان بجد الاغاني مفيش اكتر منها وماشربتش من نيلها وبلدنا امانة ف ايدينا وبنطلع نخلف عيالنا بره

مش عارف wst::

[sarmar]

مش عارف wst:: لو ماحبيناش مصر طب هنحب مين وهل ينفع الحب ينحب من غير ماتكون مصر حاضناة

جربتم يامصريين ياللى برة واللى جوة انكم تحبوا غير مصر ؟؟؟ مش هتعرفوا صدقونى مش هاتعرفوا تحبوا الا مصر ولو لاقيتوا اللى تحبوة مش هتلاقوا حد زى مصر

مش عارف خنقانى الكلمات لانى مش عارف افصح ان مصر شىء واللى بيحصل لنا فى مصر شىء اخر

يعنى كل السلبيات اللى مايكفيها كتاب تنقال او تنحكى فية وبتحصل منة اكثر من كدة يمكن مصر ماتعرفش عنة حاجة اصلها ربنا يشفيها هى بعافية شوية وان شاء الله هتخف وتقوم وتحضر فرح بناتها وشبابها اولادها

انت بتقول اية ياحسام يمكن والدتك مش احسن ام ؟؟ نعم طبعا ماهى مصر احسن من اى ام وهتحضر فرحك وانت بتتزف على عروستك وهتزغرد وترقص وتغنى لكل اولادها بس سايق عليكوا النبى تدعوا لها وصلوا لها عشان ربنا يشفيها وترجع لنا آة يا أمى

وحياتك ياغالية ترجعلنا زى زمان وحياتك يامنا يااغلى ام يامصر ماتسبيناش دة انتى وحشتينا قوى وحياتك ياامى ماتطردينا وتعيشينا وهم اسمة الغربة لانك ببساطة عايشة جوانا ليل ونهار ماعمرنا نسيناكى وربنا يهدينا ويشفيكى

[عنبو]

انتى سافرتى كندا يا منال ولا ايه ؟ اصل احساس الحب الجارف ده بيكون فى اول شهور الغربه

عارف زى ملا تيجى تقلعى النبات من الارض علشان تزرعيه فى مكان تانى ممكن يكون فيه مصلحته

بس هو طبعاً يفضل البقاء فى الارض اللى اتولد فيها بس ظروف بقى

بالتوفيق ان شاء الله

[Morial]

الاجابة هنا يا عنبو

تم تعديل 11 يوليو 2010 بواسطة Morial

[Mr MAGED]

أكيد كلنا بنحب مصر وبندوب في هواها كمان

دي بلدنا .. عشنا فيها واتربينا واتعلمنا وكبرنا

حياتنا وذكرياتنا واهلنا واصحابنا وكل أيامنا

ماحدش يقدر يعدد الاسباب لأنها بالتأكيد كتيرة

ولازم نفرق بين مصر وبين اللي بيحصل في مصر

في ظلم في مصر .. بس هيا مصر اللي ظلمتك والا اللي عايشين وبيحكموا في مصر !!!

في سرقة وفساد في مصر .... بس هيا مصر اللي بتسرقك !!! أكيد لأ ... اللي بيسرقك اللي ربنا سلطهم علينا

لأننا أضعف كتير من الرجالة اللي كانوا عايشين في مصر زمان ... هما قدروا يقفوا ويتحدوا الظلم وياخدوا حقهم

بس احنا مقدرناش

أكيد بنحب مصر ... واكيد زعلانين من اللي بيحصل في مصر ... اللي مصر نفسها مالهاش ذنب فيه

[Diab]

هو في ماتش للمنتخب قريب ولا حاجة

[Morial]

مصر كانت ومازالت في عيني اجمل بقاع الارض

ولولا ما ألت اليه الاحوال فيها ما فكرت بتركها ابدا

ولكن رحيلي عنها هو رحيل المضطر

ولكن ستبقي مصر معي اينما كنت

فمكانها في القلب

تم تعديل 11 يوليو 2010 بواسطة Morial

[Howayda Ismail]

مصر كانت ومازالت في عيني اجمل بقاع الارضيه

ولولا ما ألت الاحوال فيها ما فكرت بتركها ابدا

ولكن رحيلي عنها هو رحيل المضطر

ولكن ستبقي مصر معي اينما كنت

فمكانها في القلب

عندك حق لان صعب على اى انسان انه يمحو ذكريات الطفولة والشباب بحلوها ومرها والذكريات معناها اماكن واشخاص

الجميع يتزوج ويترك بيت اسرته لكن دايما فى حنين لذلك البيت فما حال المغترب الذى بعد عن بيته الكبير ( مصر).

[اغابي]

فعلا مصر هى امى . .

احنا عمرنا ما شككنا فى وطنيتك يا منال . . ولا اعتقد ان فى شك فى وطنية اى حد على المحاورات . . احنا اتجمعنا على حب مصر . .

وانا قولت قبل كدا ان اللى بيحب مصر لازم يكشف الاخطاء ونعرفها . . وحتى ان ما عرفناش نعالجها لان ما باليد حيلة طبعا فى الوضع الحالى للبلد

لكن على الاقل نورث حبها لولادنا . . وانت كنت اتكلمتى فى موضوعاتك سابقا . . عن بعض الامراض اللى بدأت تنتشر فى مصر - زى مرض التوك توك دااه . .

ومش معنى كدا ان اى حد يشك فى وطنيتك . .

بالعكس انا فى راى ان معرفة المرض وتشخيصه .. امر مهم فى التمهيد للعلاج . . والتخلص منه نهائيا . .

تحياتى

اغابي :lol: