جيل الثمانينات

[lonewolf]

السلام عليكم,انا متابعكم من فترة,و متوسم فيكم انكم ما شاء اللة اعضاء مثقفين .

اسمحولي اشارك معاكم,و اسف اني بكتب بالعامية,البداية ها تكون بموضوع ممكن ما يشدكمش قوي لكنة بالنسبة لية مهم شوية

الموضوع الي عاوز اتكلم معاكم علية هو حقبة التمانينات,طبعا الخمسينات و الستينات و السبعينات و التسعينات فترات مشحونة تاريخيا ,بس موثقة جيدا سواء علي مستوي المبدعين بتوعها او علي مستوي التوثيق التاريخي.

يعني فترة الستينات مسجلة جيدا مثلا من حيث الموسيقي زي عبد الحيلم و الست او من حيث الاحداث التاريخية و كتب هيكل او من وجهة نظر تيارات المعارضة من اول سيد قطب في اقصي اليمين لحد اليسارين المتعصبين

و كذلك السبعينات,و ها تلاقوا عدد كبير من الادباء و الشعراء يعني مثلا واحد زي نجيب محفوظ كتب ثرثرة فوق النيل,او قصيدة الكعكة الحجرية لامل دنقل و نجم و غيرة بقي ما تعدش

و لكن من الناحية التانية الفترة من 1981 مقتل السادات الي 1991 حرب العراق و في اقوال اخري 1992 الزلزال ها تلاقوها فترة ضلمة,مطموسة من تاريخ مصر,يعني مثلا علي مستوي الادب مش ها تلاقوا حاجات كتير بتتكلم عن الفترة دي,الي في ذهني الان ذات لصنع اللة ابراهيم و مريم التجلي الاخير لابراهيم عيسي فقط روايتين مش كفاية يعبروا عن مرحلة ,و انا الحقيقة بتعاطف مع الجيل دة,يمكن لاني انا طفل كان الجيل دة بيمثل لية المثل الاعلي,يمكن لاني حاسسس ان الجيل دة جة بعد كل حاجة ما ضاعت و في نفس الوقت ما سمحلوش انة يبيع القضية و يكبر دماغة زي الجيل بتاعنا.

يعني مثلا انا لا اتخيل انة جيل التمانينات وصل لسن الاربعين و لحد دلوقتي مافيش عدد كافي منهم وصل للمكانة الادبية زي الاجيال تانية,ها تلاقوا اجيال قبلهم لسة موجودين,الناس القديمة لسة محتلة اماكنها و ناس من الاجيال الاصغر نطت و خدت المكان و الجيل دة اتنسي كدة في النص.

الحقيقة و الملخص بقي علشان ما اطولش عليكم انا فاتح التوبيك دة علشان نتكلم فية عن جيل التمانينات, نتكلم عن الاحداث الي حصلت,الموسيقي,السياسة,الاقتصاد,الكورة,سواؤ تحليل للوقائع او حتي تحليل لأي عنصر من العناصر زي المزيكا او الساسية او حتي الكورة

الفترة دي كانت مشحونة جدا,الناس طالعة من الطوفان و لسة بتحسس طريقها و مش عارف سكتها ,رئيس جديد مش معروف خلفياتة السياسية و حكومة ورثت تركة من الديون,طبعا كل شيء وضح بعد 1991 بس احنا بنتكلم عن ما قبل 1991,يعني لما نقول التمانينات هانتكلم عن اهم فترة موسيقية في راي في تاريخ مصر الحديث,موسيقي جامدة جدا اتعملت ,الموسيقي لوحدها يتعملها فورم,منير,علي الحجار,فرقة المصرين,مهني,خليل,عبد الرحيم ,منيب,حميد,عايدة الايوبي و حنان ماضي,حتي الناس الاستهلاكية كانت بدايتها جميلة زي مصطفي قمر او عمرو دياب مثلا,موسيقي الجيل زي ما بتتسمي قلبت منظومة الموسيقي العربية.

لو قلنا سينما يبقي عاطف الطيب ,احمد ذكي,الواقعية ,اثار الحكيم,داود عبد السيد,يوسف شاهين,رضوان الكاشف غيرهم,افلام مهمة جدا اتعملت

لو قلنا سياسة يبقي انتفاضة 1987,بداية المواجهة المسلحة بين الجماعات اليمينية الاسلامية و الحكومة,ضرب مدينة حماة من قبل الحكومة السورية بالقنابل,ثورة عشاكر الامن العسكري,الحرب الايرانية العراقية,موردخاي فنونو و مفعل ديمونة حاجات كتير قوي ما ينفعش تتحصر

لو قلنا اقتصاد يبقي مشروع الصرف الصحي ,عمولات السمسمرة من ديون مصر,الريان و السعد افتتاح اول فرع كنتاكي وويمبي في مصر

انتهاء عصر الحشيش و بداية عصر المخدرات الكيميائية

لو قلنا الدين يبقي الشيخ شعراوي,انتشار الفكر الوهابي مع العائدين من الخليج,

لو قلنا الكورة يبقي كل الخطيب,كاس افريقيا 1986 و كاس العالم 1990

لو قلنا الحركة الطلابية يبقي مظاهرات 1987 و 1991 و ضحايا و شهداء شباب الجامعة

حاجات كتير قوي اكبر من اني احطها في رسالة واحدة

يمكن لان الموضوع كبير وواسع انا مش قادر اعبر عنة او حتي احصرة

شكرا لوقتكم الثمين

[lonewolf]

ملاحظة:الموضوع كنت قد كتبتة من فترة علي منتدي اخر و اخذتة هنا بطريقة القصو اللصق

اكتب النهاردة عن تمرد قوات الامن المركزي في عام 1986

طبعا ادت تلك الاحداث الي ازاحة وزير الداخلية وقتها احمد رشدي و تولية ذكي بدر و تقليص عدد قوات الامن المركزي و نقل معسكراتهم الي خارج المدن.

في اواخر شهر فبراير من عام 1986 و بينما الاستعدادات تجري علي قدم و ساق في القاهرة و المحافظات لتنظيم مصر كاس افريقيا للام و اثر منشور وزع في ثكنات قوات الامن المركزي بأن مدة التجنيد ستزيد سنة اضافية,تمرد حوالي ثمانية الاف جندي بالقاهرة و حطموا معسكراتهم و خرجوا في جماعات الي المدينة.

المشكلة لم تكن بدايتها في هذا اليوم,في ذلك الوقت كانت الاحصائيات احيانا تصل بعدد قوات الامن المركزي الي حدود ربع مليون من الجنود العادة,اي غير المتعلمين,كان الجنود يتم انتقائهم من وسط جميع فئات الشعب الموجب عليهم التجنيد بحيث كونوا الاقوي بنية و الاقل تعليما و ذكاء و الابعد عن المدنية و لعلنا نذكر النكتة الشهيرة عن انتقائهم بحيث يدخل الظابط و يقول المتعلمين الي اليمين و الامين الي اليسار اما من يقفوا بلا حراك فيتم ترشيحهم.

يعامل الجندي منذ انتقائة في المعسكر معاملة في غاية السوء,مثل المنع من الطعام و الشراب و السب و اللعن و التعرض لظروف بيئية لا انسانية مثل السكن عشرون فردا في خيمة واحدة و تقاضي ستة جنيهات شهريا و احيانا الضرب بالاحذمة والهراوات من الظباط و صف الظباط بغرض الوصول بة الي حالة حيوانية مستعدة لتنفيذ اي امر للقائد في سبيل ارضائة,عادة ما يوكل الي هؤلاء الجنود مهام حراسة الفنادق و المطاعم و السفارات و مباريات كرة القدم و ذلك الي قمع المظاهرات و خاصة الجامعية منها.

و يروي احد ظباط الامن المركزي بعض اساليب تطويع الجنود مثل حمل الظابط حملا الي دورة مياة,,الضرب و البصق و السب بالوالدين و اطفاء السجائر بأجسامهم و امطتاء ظهور بعضهم بعضا و اسلوب اشرب ويسكي اي يضع يد علي الارض و الاخري علي الاذن و بطرف سبابتة يظل يدور مثل الساقية حتي يسقط كالسكير,بينما المحظوظون منهم يعهد اليهم قيادة سيارات الظباط و اعمال المنزل و رعاية الاطفال و شراء حاجيات منازل الظباط و احيانا العمل في مزارع و حوانيت الظباط.

و لعلنا بعد ان ادركنا البيئة التي يعيش فيها هؤلاء الجنود و خلفيتهم المعيشية و التعليمية فأننا ندرك ان قرار زيادة عام الي مدة التجنيد يدفعهم الي التمرد بأقصي درجاتة.

النقطة الثانية التي ادت لاشتعال التمرد من معسكر الجيزة دون غيرة كون ذلك المعسكر-كان يقع وقتها في اخر شارع الهرم-تم نقلة الان الي قلب طريق مصر اسكندرية الصحراوي في الخلاء-و كما تعرفون فان شارع الهرم وقتها كان يعيش اذدهار سياحي نتيجة للحرب اللبنانية التي ادت الي تدفق الاخوة الخليجين الي قاهرة المعز لتحقيق الوحدة العربية بطريقتهم الخاصة مع ممثلات الشعب المصري فيفي عبدة بعش البلبل كيمو لاند وزيزي مصطفي بالمريديان و الناشة وقتها دينا بملهي الهمبرة.

لعل التناقض الذي كان يياة هؤلاء المساكين-قوات الامن المركزي و ليس العرب بالتأكيد-حين يخرجون في عرباتهم الزرقاء الشبيهة بالاقفاص لتأمين موكب مسؤل ما من ترف و مظاهر رفاهية و مجون و بين عيشتهم الضنك ادي الي انفلات العيار حيث احرقوا اول مااحرقوا فندق الجولي فيل الملاصق للمعسكر ثم غيرة من الفنادق و البازارات و الاوتوبيسات السياحية و البوتيكات و الملاهي ثم انتشروا بطول القاهرة و عرضها الي ان يصلوا الي مصر الجديدة و ضواحيها و المعادي بالطرف الاخر للميجا سيتي ثم يمتد التمرد الي ست محافظات اخري. حيث بلغت خسائر الفنادق فقط وقتها حولي ال150 مليون جنية مصري. و في بعض الاقوال فان الجنود بلغ ببعضهم التمرد و الجنون الوقتي الي الهجوم علي ليمان طرة و النجاح ف ياطلاق سراح بعض السجناء.

ادي التمرد الي نزول قوات الجيش الي العاصمة و فرض حالة من حظر التجول و تسلم الجيش اقسام الشرطة و ووفقا لشهود عيان تم قصف معسكرات الامن المركزي و بالتحديد معسكر الجيزة بالصواريخ بواسطة طائرات الهليكوبتر

ظلت حالةالهرج بالبلاد لمدةاسبوع انتهت ببدء شهر مارس بنزول الجيش الي الشوارع و دحر التمرد و تلي ذلك تصريحات حكومية بتحسين ظروف الجنود ثم اقالة وزير الداخلية و تقليل عدد قوات الامن المركزي الي النصف تقريبا و نقل ثكناتهم الي قلب الصحراء و اطراف المدن.

المصادر:

الذاكرة الشخصية

روايات الشهود

رواية ذات لصنع اللة ابراهيم

لمزيد من التفاصيل رجاء الرجوع الي رواية ذات لغناها بالتفاصيل التي لا يتسع المجال لذكرها

[Lighthouse]

مرحبا اخونا العزيز ;)

موضوع جميل

اعتقد ان اهم حدث في فترة الثمانينات مر بمصر هو اغتيال السادات وماصاحبه من احداث وتداعيات مازلنا نعاني من نتاجئها حتى الآن .

[جـورج]

يعني مثلا انا لا اتخيل انة جيل التمانينات وصل لسن الاربعين و لحد دلوقتي مافيش عدد كافي منهم وصل للمكانة الادبية زي الاجيال تانية,ها تلاقوا اجيال قبلهم لسة موجودين,الناس القديمة لسة محتلة اماكنها و ناس من الاجيال الاصغر نطت و خدت المكان و الجيل دة اتنسي كدة في النص.

ازاى يعنى جيل الثمانينات وصل سنه الى اربعين سنه ؟؟

حـرام عليك ..... واسعه شويه

معلش انا بهزر معاك

انتشار الفكر الوهابي مع العائدين من الخليج

مع ان كلامى انا قد يسبب حساسيه للبعض , و لكن انت وضعت ايدك على السبب الحقيقى لتخلف جيل الثمانينات عن الوصول الى اى موقع مرموق , فانتشار الفكر الوهابى و ما صاحبه من تضييق على الفكر و الثقافه و الموسيقى و الغناء بل و حتى فى كره القدم كانوا عايزين يفرضوا زى معين على اللاعبين لان الشورت لا يليق حسب مفهومهم , كل ذلك شتت افكار الجيل الجديد فلم نجد منهم مثقف او كاتب او فنان معروف و كل من ظهر فى الفتره دى يعتبر من الاجيال السابقه و ليس من جيل الثمانينات .

بل خرج علينا اصحاب الفكر الجديد بفكر التكفير و الهجره و الارهاب و قتل كل من يخالفهم فى الرأى و ذهب العديد منهم الى الجهاد خارج مصر و كأن مصر لا تحتاج الى سواعدهم للبناء و التعمير

ماسأة هذا الجيل هى فى النخبه من المفكرين الذين نقلوا لنا الفكر الوهابى بفضل البترودولار و مازلنا للأسف نعانى من هذا التيار حتى الان .

[Handicraft]

أتذكر يوم تمرد الأمن المركزى أنى كنت فى أولى أعدادى وخرجونا بدرى من المدرسة فى شبرا وكان شارع شبرا كله عربيات نقل محمله بناس معاهم عصيان وكله متوجه فى اتجاه رمسيس بس الجميل فى الموضوع ده فى سنى الصغيره وانا مش عارف حاجه انهم ادونا أجازه وده احسن حاجه التلاميذ بيحبوها ولو حتى الدنيا بتغلى.

[se_ Elsyed]

أنا لا اتفق مع الرأي الذي يقول أن الفكر الوهابي إنتقل لمصر في فترة الثمانينات فعمل مش عارف أيه وايه ..

اولاً : مصر كدولة لها تاريخ عريق أكبر من ان يغزوها أي فكر كان .

ثانياً : أرجو من أي شخص يريد أن يتكلم عن الفكر الوهابي ، أن يرجع أولاً للمراجع والكتب التى تتكلم عن هذا الفكر ثم يأتي لنتحاور .. لأنه ببساطة وبدون كلكعة فكر لا يحلل حراماً ولا يحرم حلالاً فكيف نكيل له مثل هذه التهم .

وبعدين ثمانينات أيه اللي الناس رجعوا فيها من الخليج ؟.. معنى كده انهم كانوا هناك من الستينات مثلاً حيث لم تكن طفرة البترول حدثت في دول الخليج أو بالسعودية على الأخص ؟...

وبعدين إزاي نرجع إليه السبب في تخلفنا الذي بدأ أساساً مع قيام ثورة يوليو وإنتشار الإشتراكية وأفكار القومية العربية والتأميم التى عادت بالأمة 100 عام إلى الوراء والقمع الذي مارسه ضباط الجيش الذين لم يكن لديهم أي خبرة او تجارب سياسية وعلى رأسهم عبد الناصر وحولوا الشعب المصري والأمة العربية إلى معمل تجارب للوحدة والقومية والمد الثوري والحنجوري المتفهيق ورمي الاعداء في البحر اللي شبروا منه العديد من المرات والنكسة والمعتقلات ومحاربة الأخوان المسلمين ...... ماتخلينا ساكتين أحسن ...

فجيل الثمانينات يا سادة هو نتاج لما قبله يعني ماتولدش كده شيطاني وحيث ان فاقد الشيء لا يعطيه فإذاً كيف نطالب جيل الستينات والسبعينات بإنه ينتج لنا سلالة كويسة .... ماتخليني ساكت وماحدش يدوس على الجرح اللي بأحاول أنساه ...

مع إني من جيل الثمانينات ويادوب أفتكر منه أحداث طشاش كده وكل اللي فاكره إن يوم الثلاثاء الساعة حوالي 12 الظهر سنة 81 كنت رايح أستلف كتاب سلاح التلميذ بتاع سنة سته من واحده زميلتي ساكنة جنب بيتنا وسمعت أن السادات إتقتل ..... وبعدين في 89 نجحت في الثانوية العامية وفاكر إني كنت واقف أعيط عند المدرسة ( مش عارف ليه ) ... وفاكر برضوا إني روحت أشتري شريط لولاكي بتاع على حميده سنة 89 فلقيته بـ 4 جنيه قولت لأ المبلغ ده أروح اتفسح به أحسن وأبقى أستلف الشريط أسجله من أي واحد من صحابي .. زي سلاح التلميذ كده .. يعني الثمانينات عندي إبتدت بالسلف وإنتهت برضوا بالسلف ...

[Handicraft]

يا أبو السيد شريط لولاكى ايه وعلى حميده ايه بس انت مؤرخ ولا مغناتى وبعدين شوية ونلاقى واحد طالع يحكيلنا ايام ثورة عرابى ويستشهد عليها بحكاية أدهم الشرقاوى ولا حسن ونعيمة. لأ من غير زعل سسيب شغل التأريخ ده لأصحابه وخليك انت فى عربية الكشرى اللى انتى حاططها قدام الشركة عندكم ومشارك عليها الواد البنجالى.

اوبسسسس شكله حيزعل ياعم متأسف "سامحنى ما كانش قصدى" وده مسلسل بيشهد على حقبة من التاريخ الجغرافى والهجرى لشعب المحروسة.

واديها تأريييييييييخ

[se_ Elsyed]

يا أبو السيد شريط لولاكى ايه وعلى حميده ايه بس انت مؤرخ ولا مغناتى وبعدين شوية ونلاقى واحد طالع يحكيلنا ايام ثورة عرابى ويستشهد عليها بحكاية أدهم الشرقاوى ولا حسن ونعيمة. لأ من غير زعل سسيب شغل التأريخ ده لأصحابه وخليك انت فى عربية الكشرى اللى انتى حاططها قدام الشركة عندكم ومشارك عليها الواد البنجالى.

اوبسسسس شكله حيزعل ياعم متأسف "سامحنى ما كانش قصدى"  وده مسلسل بيشهد على حقبة من التاريخ الجغرافى والهجرى لشعب المحروسة.

واديها تأريييييييييخ

طب يا عم الجبرتي ....

ماشي يا هاندي ... ماهو الكشري ده إنت ياما كلت منه ..

وبالمناسبة بقى حسابك تقل والواد البنجالي بيقولك بقى لك 4 شهور بتاكل على الطباشيره .. فجه وقت الحساب :) :unsure: ax: me0: وإلا هايسحب منك الإقامة .. mfb:

[Handicraft]

4 شهور بتاكل على الطباشيره

يا ابنى طباشيرة إيه هو انا كنت باكل كور بلياردو وبعدين الحساب يوم الحساب يا سيدى ويجعل بيت المحسنين عمار.

[lonewolf]

معلش يا اخواني,مبدئيا كدة انا مواليد 1979 فقط, يعني كنت طفلا في هذة الفترة و لكن الجيل دة كان بالنسبة لية المثل الاعلي في فترة الطفولة.

انا فتحت الموضوع هنا علشان انا رأيت ناس عاشت شبابها و مراعقتها في الحقبة دي,و تنمنيت ان كل واحد يحكي ذكرياتة الخاصة لنجمع شتات تلك الفترة التي لا اراها قد وثقت جيدا الا من خلال كتاب السلطة من نويعية ابراهيم نافع و عبد العظيم رمضان

النقطة التانية,انة اتمني ان التوبيك ما يتحولش لمناقشة الفكر الوهابي,انا ما انتقدتش او مدحت الفكرة الوهابي,و اذا كنا بنتكلم علي الاجيال الي قبلها فأنا بسجل اتفاقي مع الاخ الي اتكلم عن السرقة الي حصلت بأسم الثورة و بتفق معاة في انة جيل الثمانينات ظلم ظلم شديد من قبل الاجيال السابقة عنة

نرجع للفكر الوهابي,كل فكر في الدنيا لة و علية و لكن اذكر الاخ الي بيدافع عنة بنقطتين,الاولي الفتوي العجيبة لابن باز,بكل اسف معنديش مصدر علي النت الان للفتوي دي,و لكني قرأتها مكتوبة,ان الارض مسطحة و ليست كروية نتيجة تفسير خطأ لاية و الارض بعد ذلك دحاها,و الشيخ شعراوي وقتها راجعة في النقطة دي علي ما اذكر,و ايضا اتذكر خلال الفترة القصيرة التي قضيتها بالمهلكة العربية السعودية فتوي لابن عثيمين انة من ترك صلاة الفجر عمدا ثم ذهب الي عملة فقد كفر ,ذلك لانة يخاف من رب العمل فضبط منبهة علي وقت العمل و لم يخاف من رب العباد فلم يضبط منبهة ليصلي الفجر

عامة و ارجع و اقول ارجوكم انا جاي استفاد منكم ما تحولوش الامر الي مناقشة فكر من الافكار الاسلامية ارجوكم

[Handicraft]

طيب يا سيمى ما تزوقش حاضر حنأرخ لحضرتك الفترة اللى ابتدت بمولد حضرتك وأمرنا لله.

بص يا سيدى فى نقاط سريعة كده والأعضاء ممكن لو غلطت يراجعونى

فترة الثمانينات:

1- مقتل السادات وكانت مذاعة فى التليفزيون فى احتفالات اكتوبر فى المنصة

2- تولى مبارك الحكم

3- سفر الفلاحين للعمل فى دول الخليج وهجرتهم أرضهم

4- تبوير الأراضى الزراعية وتجريفها من أجل مصانع الطوب الأحمر

5- التعدى على الأراضى الزراعية بكل أنواع المخالفات من أول البناء

6- هجرة الفلاحين والصعايدة إلى القاهرة بأعداد كبيرة

7- بدأت الفترة وشبكة الصرف الصحى متآكلة لدرجة ان بعض الشوارع كانت تسبح دائما فى بحور من المياه وانتهت بانشاء شبكة عن طريق المعونة الأمريكية

8- فى بداية الفترة كان الدعم يشمل مواد تمونية كثيرة وكان من الطبيعة أن يكون لكل أسرة بطاقة تموين.

9- طوابير المجمعات الإستهلاكية للحصول على كرتونة بيض مدعم أو فرختين او حتى السمك المجمد

8- لم تكن تنتشر الدروس الخصوصية ونادرا ما تجد طالب يأخذ درس خصوصى وكان التعليم بمستوى اعلى من الآن

9- كانت الكهرباء لم تمتد لبعض مناطق القاهرة الكبرى وحضرت فى شبرا وشارعنا ما كانش فيه كهربا لسه

10 - بدات الفترة دى والدولار على ما وعيت كان سعره 81 قرش

11- الفترة دى غاب عنها مولد المفكرين والكتاب إلا ما ندر وكانت الأجيال القديمة بتكبس على أنفاس البراعم الشابه لكيباى لا تزيحها من على الكرسى.

12- مجاميع كليات القمة كانت قليله لدرجة ان هندسة كانت بتاخدمن 72% بس

13- فترة انتشار المخدرات والماكس والهيروين

14- فترة استيراد الفراخ اللى حجمها كبير زى الديك الرومى وتوزيعها فى المجمعات والظاهر دى كانت غربان وكان فيه واحد من رجال الأعمال متخصص بس مش متذكر اسمه.

15- طوال الفتره دى كانت رئاسة الوزراء من نصيب عاطف صدقى

16 - فترة الخطط الخمسية وشد الحزام على بطنك وعنق الزجاجة

17- استرجاع سيناء من اسرائيل (ده لو سميناه استرجاع)

18- كان الترام منتشر فى كل احياء القاهرة تقريبا

19- فترة برنامج العلم والإيمان وعالم البحار وماتشات التنس العالمية والخطيب وحسن شحاته وفاروق جعفر وبطولة أفريقيا 86 لما اتغلبنا من السنغال اول ماتش بس كسبنا البطولة والريس حضر الماتش النهائى.

20- فترة بطولات نادى الإتحاد السكندرى فى السله ومدجت ورده

21- فترة البطولات الأفريقية للأهلى والزملك والمقاولين

23- فترة انتشار نوادى الفيديو فى القرى وانصراف الفلاحين عن الزرع وبداية دخول أفران العيش للقرى.

24 - فترة انتشار الوعى الدينى وأفكار تنظيم الأسرة وانظر حولك وحسنين ومحمدين.

25 - فترة تلفيزيون الأبيض والأسود وفوازير نيللى وفطوطه وشريهان

26 - فترة طلبة مدارس المشاغبين ومدرسة النجاح التى لم ينجح أحد

27- فترة أزمة المساكن والإيجارات وغزو المقابر

على المستوى الدولى حد من الكبار هنا يأرخ لأن أنا كنت لسه صغير ومعرفش حاجه.

[lonewolf]

استاذ استاذ استاذ

بس مستني اكتر :)

لانك شكلك استاذ

[se_ Elsyed]

14- فترة استيراد الفراخ اللى حجمها كبير زى الديك الرومى وتوزيعها فى المجمعات والظاهر دى كانت غربان وكان فيه واحد من رجال الأعمال متخصص بس مش متذكر اسمه.

إسمه توفيق عبد الحي يا باشا .. يعني الفراخ الفاسدة .. يعني رجال الاعمال .. يعني أول من فتح الطريق لسياسة " إخطف وإجري " " واللي يحصلني يكسرني "

بس بذمتك سمعت عن حد مات من اكل الفراخ دي .. بطلوا بقى الأوشاعات دي وسيبوا الناس تاكل .. إحنا شعب معدته تهضم الزلط ...

[عادل أبوزيد]

الأفاضل أعتقد أن العنوان الأقرب إلى الصحة - حسب المشاركات حتى الآن - هو حقبة الثمانينات و بهذا أستطيع أن أدلى بدلوى فى هذا الموضوع.

عقب زيارة الرئيس الرحل أنور السادات للقدس و ما تبعها من إتفاقية كامب دافيد ... ظهر فى العالم العربى تجمع أطلق على نفسه جبهة الصمود و التصدى هذا التجمع يتزعمه العراق بقيادة صدام حسين و سوريا بزعامة حافظ الأسد و منظمة التحرير الفلسطينية بزعامة ياسر عرفات ثم أخيرا الجماهيرية العربية الديموقراطية العظمى - هكذا إسمها - بقيادة العقيد معمر القذافى .. وكان الهدف الأساسى لجبهة الصمود و التصدى هذه هو إلغاء معاهدة كامب ديفيد أو إلغاء كل نتائج زيارة الرئيس السادات للقدس و أن يعود الجيش المصرى لساحة القتال !!!!

و قام صدام حسين بدور "البلطجى" لإرهاب دول الخليج للإنصياع لمقررات جبهة الصمود و التصدى هذه ....

و كانت هذه المقررات حصار مصر !!!! لاتتعجبوا تم قطع العلاقات بين كل الدول العربية و مصر - عدا سلطنة عمان - كل العلاقات و أظن كان هناك محاولات لأن تتضمن تلك المقاطعة الإستغناء عن العمالة المصرية و لكن ذلك لم يتم.

و من ضمن المقررات أيضا نقل مقر الجامعة العربية من القاهرة إلى تونس.