البحث في الموقع

الرحمة!!! نفسي نوّسع مفهوم الرحمة تعالوا نخلي السنة دي مليانة "رحمة" نرحم بعض من أفكار الإدانة! نرحم بعض من النقد وإصدار الأحكام والاتهامات! نرحم بعض من كلمة جارحة او كلمة وحشة في حقهم! نرحم بعض من نظرة مظهرية ونظرة متعالية! نرحم بعض من التعقيد ، ونقبل ونتقبل الآخر! نرحم بعض من نظرنا اللي بيركز بس علي السلبيات! نرحم ونفوّت ونعذر بعض! نرحم حد غلط ، أصل كلنا غلطنا وبنغلط وهنغلط! نرحم نفوسنا من كتر التفكير والتأنيب واللوم وشيل الهم! نرحم حد مالوش سند أو حد مكتئب أو حاسس بغربة! نرحم بعض من تجاهل احتياجات بعض! نرحم حد ظروفه صعبة ونسنده ونقف جنبه مش نتجنبه! نرحم...و نرحم....و نرحم... كل يوم! خلينا نوّسع قلوبنا شوية ونهوّنها علي بعض... خلينا نكبّر مفهوم الرحمة من مجرد عطاء ، لقلب حنيّن بيحس ويحب ويرحم! تعالوا نتعلم نقدم حب ورحمة علي أد ما نقدر السنة دي...وطول سنينّا! ونخلي الرحمة تنجينا!!! "طوبي للرحماء لأنهم يُرحمون"(مت٧:٥) لعله يكون تدريبنا هذه السنة حتى يقبلها منا الله.

قصة اعجبتني اجبروا خاطر بعض ما يبخلوش بيه علي حد بيعدي علينا اوقات بنحتاج فيها لتطييب خاطرنا ولو بكلمه وانا صغير كنت بالعجلة بلعب بيها و راجل كان ف عربيته بس لسه ماتحركش روحت وقفت جنب شباك عربيته من ناحيته وقولتله "عااااموووو جاي سبق؟".. المهم انه بصلي ب ضحكة سخرية تبعتها ابتسامة شقاوة من عيل صغير، وقالي جاي و هو بيغمزلي بنظرة تحدي، طبعاً هو مكنش بيتحداني ولا حاجه، هو شاف عيل صغير جرئ وبنفس الوقت طلبه ده ممكن يكون بالنسباله حلم و منافسة حقيقية هو داخلها.. واستعدينا للسبق وبدأت انا أبدل و هو يدوس ع البنزين بهدوء عشان يكون جنبي ع الخط،، هو سايق براحه عشان يكسبني، حس اني هاطير مالفرحه لو سبقته، وانا حاسس انه اسرع مني برغم تساوينا ع الخط، بس انا عايز اسابقه وابص عليه ورايا مش جنبي، وبدأت سرعتي تزيد، وهو ثابت علي سرعته، السبق ده كان ف مسافة نص شارع مش طويل،،بس بالنسبالي تراك مسافته فوق ال 1000 متر، وكسبته فعلاً ولما لحقني بالعربية بصلي بصة عمري ماهنساها وهو بيضحك.. عدي سنين طويله ع الموقف ده، ومن سنتين كنت ف مستشفي بزور حد صاحبي كان عامل حادثة، وانا نازل لقيت الراجل ده قاعد علي كرسي متحرك و شاب يقربله بيزُق الكرسي، شكله كبر اوي،، بس تجاعيد السنين دي كلها ماغيرتش شكله اللي انا عارفه، وقفت للحظه واحده افتكرت فيها الموقف بتاع زمان، لقيت نفسي رايحله من وراه وقولتله بنفس النبرة "عااااموووو جاي سبق؟".. بصلي و سكت... انا كملت كلامي ماستنتهوش يفتكرني حتي، وقولتله بس لوحدك من غير ما الكابتن ده يزوُقك، قالي اكيد مش هاقدر يابني... قولتله هاتقدر ياعم الشباب و بالفعل وافق، وقفت جنبه وجريت جريه بسيطة لانه عارف اكيد انها مجرد مداعبة، وبدأ يلف عجلة الكرسي وكأنه فعلاً عايز يكسبني، وانا ببطّء ف حركتي لحد ما سبقني، وروحتله لقيته باصصلي نفس البصه اللي بصهالي زمان بس وهو مدمع، كان هاين عليا اني اعيط جداً، ده حتى مش فاكرني ولا عارفني، بس حضنته ساعتها وقولتله مانت زي الفل اهو واسرع مني و انا بضحك بالزق عشان ماعيطش،، طبطب علي كتفي وقولتله ربنا يقومك بالسلامه وتبقي زي الحصان ولينا سباق تاني بس علي رجلينا.. وضحكلي ومشيت، الراجل ده انا روحت عشان ازوره من فترة وعرفت انه مات، مات حتي من غير ما افكره بأن انا اللي جبر بخاطره وهو صغير والسنين لفت و رجعتني ليه واشوفه عشان اجبرله خاطره بنفس الموقف، الراجل ده علمني ان جبر الخواطر ده من اعظم الأشياء اللي ممكن إنسان يديها لحد، وانها داين تدان ولو بعد عمر طويل، وانها خير انت زرعته هاتحصده ف اشد وقت ل إحتياجك ليه.. إجبروا خاطر بعض ان كان ده ف مقدرتكم، ماتبخلوش بيه علي حد عشان هاتتردلكم وكلنا بيعدي علينا اوقات بنحتاج فيها لتطييب خاطرنا ولو بكلمه حلوه.. وادعوا للراجل ده بالرحمة لأنه يستحقها، ربنا يرحمه ويرحم جميع موتانا.