عدت لمصر ولكن لم أعود لوطني(2)!

[ابو خليل]

السلام عليكم ..

عدت الي مصر يوم 17/6الماضي .. .

***عدت فجرا ..

ونمت الي الظهر ..

صحوت لأسلم كالعادة علي جارتنا السيدة المسنة المريضة ..

فلقد كانت صديقة لوالدتي ، والرسول الكريم أوصانا بصلة أصدقاء أباءنا وأمهاتنا ..

لذلك أحببت أن أسال عليها ..

لاسيما أنها تعيش بمفردها ..

طرقت الباب فتحت لي طفلة صغيرة ..

سألتها عن الست أم سمير !

دخلت الطفلة وخرجت لي شابة قالت لي :

دي ماتت من 3 شهور .. !!

**** الشوارع كما هي

.. مليئة بالقمامة ...

والزحام .... والشتائم وسب الدين واللعن يخترقون أذناي فتمتعض نفسي في اشمئزاز !!!

******

مررت مصادفة علي مكان عملت فيه منذ ما يقرب من 7 سنوات ..

فكرت- ويا ليتني لم أفكر - في الدخول والسلام علي من هناك من زملاء سابقين ..

دخلت وسلمت . .

تلقفوني ... ورأيت في عيونهم كل الحقد والكراهية .. لا أدري لماذا ؟

-- تسيب بلدك يا راجل .؟ تتبدهل في بلاد كلها ذل ومهانة ؟

والله أنا ما شفت منهم إلا كل خير ومعاملة حسنة !

-- وبتيجوا تولوعوا لي الأسعار ، وتقرفونا بالعربات الجمارك !

حاولت أن اضفي جو من المرح فقلت :

انا احب السعودية لان عملتها (الريال ) مكتوب عليها لفظ التوحيد : لا اله إلا الله محمد رسول الله ، بينما الجنيه المصري عليه صورة الفرعون !!

قلتها مازحا .. لاني كنت لا زلت اعتقد ان ثمة مجال للمزح ..

-وايه اللي جابك بلاد الفراعنة ..

-ما تخليك هناك احسن وتبقي سعودي ..

خرجت ولم اشرب لديهم شربه ماء !! خرجت وأنا أسف ما حدث لقلوب الناس ..

لا تزال لي تعليقات وملاحظات ..

[ابو خليل]

***كيف تتحول 1500 جنية الي 477 .. :

كنتم قد عرفت فيما سبق أنني احمل قلباً رقيقا .. يتسبب لي في كثير من المشكلات .. لا سيما مشكلة السلف .. حيث أقرض الناس وافترض فيهم حسن النوايا وغالبا ما أقع بسب ذلك في مشاكل عديدة ..

المهم عندما عدت لمصر فكرت في استرداد عدة ألاف من الجنيهات اسلفها مني (اصدقاء أعزاء )

المهم كان لي عند صديق 1500 جنية

كويس

بعد سلسلة مطاردات قال لي بعد أسبوع أرد لك المبلغ أنا فاكرك يا ابراهيم فلوسك حاططها علي جنب مستنيك لما ترجع من السفر ..

(أصيل صحيح !!)

بعد اسبوع اتصل ..

ابراهيم بركة تاخذ فلوسك بس لي طلب ؟

عرفت ان في الأمور أمور وبدأت (الفئران ) تتراقص في عبي وعقلي !!

:مراتي ولدت وعايز نص المبلغ مش هاقدر ارد لك غير 750

--يعني تخلف وأنا أصرف عليك وعلي أسرتك ؟؟

*قلبي الطيب ثاني قال لي : خلاص يا واد من فرج عن مسلم كربة من كرب الدنيا ..

يعني بكرة هاتاخذ مني 750 ؟

قلت احسن من مفيش ..

وجاء بكرة

اتصل

ابراهيم خذ تاكسي وتعالاي في الحتة الفلانية انا مش هاقدر استناك انا سبت لك هناك 500 جنية .. معلش ال250 بقي كمان يومين ..

قلبي الطيب ثاني مرة قال لي : خلاص ..

اخذت تاكسي وقلت 500 برضة يفرجوا أزمة ..

ورحت وأعطاني صديق له رزمة فلوس ..

طبعا معدتشاش .. اخذتها ومشيت

ركبت تاكسي وروحت وانا كلي حزن لان واحد زي ده ضحك عليه ؟؟

عديت الفلوس في البيت لقيتها 480 جنية ...

عديتها ثاني

480

جبت واحد صاحبي عدها :

برضه 480

قعدت ا حسبها ..

بعد طرح 3 جنية تاكسيات ..

اكتشتف ان باقي معايا

477 جنية ..

يعني 1500 جنية تحولت بقدرة قادر الي 477 جنية ..

عمار يا مصر

ولا تزال التعليقات تتوالي ...

:excl:

[se_ Elsyed]

عمار يا مصر

يا عم أبو خليل .. بالله عليك لا تقيس حالات فردية شاذة أمام القاعدة من الناس اللي هما طيبيين ويحفظون الجميل ... وإذا كان قدرك تتكعبل في القطط الفطسانة يبقى لا تحكم على كل القطط إنها كده .. باعلكس في ناس ولاد حلال كثييييييييييييييييير جداً جداً ، وزي ما قولت لك قبل ذلك وهي نصيحة أخ ، حاول في مثل تلك الأمور أن تضع الله نصب عينيك ، يعني لما تيجي تعمل معروف في شخص إعمله لوجه الله ولو أساء إليك هذا الشخص تأكد تماماً بإن اللي عند ربنا ما بيضيعش .

كمل بقى وسودها في وشي زيادة عشان أنا نازل خلاص أهو وهاولع في الدنيا باللي فيها ..

[الشبح الغاضب]

السيد سي السيد

السواد لم تراه بعد.... من شهر الي شهر تتغير مصر .. ولا اقصد بالارض ! ولكن اقصد الناس!!

سوف تراه من شباك الطائرة و معالم مصر تتضح لك..

سوف تراه منذ خروجك من باب الطائرة ....

سوف تراه في المطار و خارجه و تتزيد حدة الجحيم درجات ...كلما تتوغل سوف تري !!!!

نصيحه لا تنخدع بالمقابلات الساخنة والطريقة الجميلة في الترحاب بك

انت في نظر الكثير ( ده اللي عملهم و جه و محوش علي قلبه قد كده) و كثيرين سوف يمهدوا الطريق معك و محاولة كسبك و الحاجات ديه يعني...!

ولكن ...

ولكن انت لم تري الوجه الآخر بعد

اذا كان معكش فلوس حتتعامل بطريقة تانيه خالص ..مش مصدق جرب و انت حتعرف انا قصدي ايه

ام موضوع الشعب الطيب ابو دمعه علي خده ...الكلام ده في الاحلام يا سي

الموضوع اخطر من كده بكتير ..سيبك من الافلام و الاغاني الي انت قاعد بتسمعها في الغربة ديه ....

مصر دلوقتي حاجة تانيه خالص .... خااااااااالص

علي العموم لما حتنزل حتشوف بنفسك .......كل حاجة فاسدة كلللل حاجة

النفوس اكثرهم فاسدا

و زعلنين من الحكومة !!!! فعلن ( ومنكم سلط عليكم )

سلام يا استاذ سي السيد

[shawshank]

سوف تراه منذ خروجك من باب الطائرة ....

في الحقيقة أنا شفته فعلا من باب الطائرة في إحدى الاجازات

أول ما الطيارة نزلت ... لقيت واحد بالظبط قدام باب الطيارة واقف على الأرض و ماسك ورقة في ايده بيقرا منها و بينادي: "داليا عبد اللطيف ... داليا عبد اللطيف ... داليا عبد اللطيف" (مش مهم الاسم ، أنا أصلا مش فاكره)

دي كانت واسطة عشان الجوازات و الجمارك ... الخ

فدي كانت أول استقبال مصري صميم :D :huh: :wub:

بس برضه أنا بحب مصر مهما كان

ربنا يستر لما أنزل إن شاء الله

واحد صاحبي رجع بقاله 6 شهور فبسأله حالتك النفسية عاملة ايه دلوقت ، مش اتأقلمت و كده؟ فرد: اتأقلمت ايه ... هو بس استسلام للأمر الواقع :wub:

على العموم يبقى سي السيد يقلنا انطباعه إن شاء الله عن زيارته ... و ممكن يضيفها للموضوع الظريف ده

تم تعديل 10 يوليو 2005 بواسطة shawshank

[ابو خليل]

انتخابات المدرسين

ولقيت في الشوارع يافطات كبيرة قوي .. لمدرسين

يفط خضراء

ويفط حمراء ..

الأستاذ فلان الفلاني مدرس الكيمياء

الأستاذ فلان مدرس الرياضيات ..

قلت ما شاء الله .

هل دخل المدرسين انتخابات مجلس الشعب ..

وسألت وضحك الناس عليه !!!

وعرفت فيما بعد أنها كلها يافطات للدعاية للدروس الخصوصية !! !

[se_ Elsyed]

إيه يا جدعان ... إنتوا فاكريني مهاجر في الخارج ؟ ده أنا كل كام شهر بأنط هناك وعارف اللي بيحصل كويس ..

اذا كان معكش فلوس حتتعامل بطريقة تانيه خالص

طب المعاملة دي من مين ؟ من أهلي وعائلتي ولا سواقين التاكس ولا مين بالظبط ؟ ;)

أول ما الطيارة نزلت ... لقيت واحد بالظبط قدام باب الطيارة واقف على الأرض و ماسك ورقة في ايده بيقرا منها و بينادي: "داليا عبد اللطيف ... داليا عبد اللطيف ... داليا عبد اللطيف" (مش مهم الاسم ، أنا أصلا مش فاكره)

طب وإيه الجديد في كده ؟

دول بيبقوا أمم واقفه قدام الباب والواحد بيفوت من وسطهم وكإنه بيصارع ...

بس إسكت يا شوشنك .. المره الوحيده اللي لجئت فيها للعملية دي كلمت واحد صديقي في المطار وبعت لي ناس إستقبلوني من قلب الطيارة وبقيت عمال أبص للبشر اللي واقفين طابور وعرقانين بكل إشمئناط .. وقولت أخيراً يا س س إسمك إتكتب على ورقة وبقيت من كبار الزوار ... فعلاً إحساس غرييييييييييييب

ولقيت في الشوارع يافطات كبيرة قوي .. لمدرسين

يفط خضراء

ويفط حمراء ..

الأستاذ فلان الفلاني مدرس الكيمياء

الأستاذ فلان مدرس الرياضيات

فعلاً يا ولاد الأقاليم لسه بخير ..

طب ده عندنا في القاهرة يابو خليل أفظع من كده .. تلاقي يفط بتقول " الأستاذ عبد المتجلي .. صاروخ الكيمياء " ... " الأستاذ بعضشي .. إمبراطور اللغة الإنجليزية " آه والله العظيم ومئات اليفط من هذه العينة منتشرة في الشوارع مع أرقام المحاميل والتليفونات ... لأ والوزير يقولك من حوالي سنة إن اللي هايعمل يُفط زي دي في الشوارع هايتنفخ ...

[ابو خليل]

إيه لأ والوزير يقولك من حوالي سنة إن اللي هايعمل يُفط زي دي في الشوارع هايتنفخ ...

<{POST_SNAPBACK}>

أيه الألفاظ دي يا سي السيد : يتنفخ أيه بس ؟

انت شغال عجلاتي اليومين دول ولا أيه ؟؟

المهم يا سيدي أني انتهتز هذه الفرصة لأكرر ما قلته العام الماضي في موضوع بنفس العنوان :

( عندما نعود للأوطان نعتقد أن كل شيء قد تغير ، بينما نكون نحن اكثر الأشياء التي تغيرت !!)