اذهب إلى المحتوى
محاورات المصريين

نووووووسي ...


moheltohamy

Recommended Posts

موضوعي ده عن أعز حاجة على أي أب في الدنيا...

إبنه الغالي... ومغامرات الطفولة البريئة...

عشان كده حبيت أكلمكم عنه... واللي ليهم أبناء زيه يتفضلوا يحكولنا عنهم كمان...

نوسي ده ولد متدلع ... الحيلة بقى :blink:

واللي يلاقي الدلع وما يتدلعش ، حرام عليه!

وطبعاً ... زي أي أب في الدنيا ، ما كنتش باحب احرمه من أي حاجة... ساعات كان الموضوع ده ييجي على دماغي ، بس هاعمل إيه؟! الضنى غالي يا ناس!

وكانت عمته دايماً تقوللي خليه يخشن شوية ، العز ده مش دايم له! ولو اتعود على حاجة هيتبهدل لو اتحرم منها!

سيبه يزعل ولا يغضب ع الأكل ... لما يجوع هياكل اللي محطوط له في طبقه! اللي زية لو شافو لقمة مرمية في الشارع هياكلوها! وصحتهم زي الفل! والبيه بسلامته ما بياكلش غير لانشون حلواني ، ولو حطيت له لانشون فرجللو يسيبه ويمشي؟!

ده إسمه بطران على نعمة ربنا! وربنا هيحاسبك... إنتا اللي هتتلف أخلاق الولد!

يا جماعة... دا الأب بيكون نفسه يجيب لابنه حتة من السما... مش بس لانشون حلواني!

وأحلى حاجة بقى كانت دي مزاج المزاج ، وبيموت فيها ... الجبنة المثلثات ... ميلكانا أو بريزيدان. الولد بيغمض عنيه وهوه بياكلها ، ولا دلال - سعاد نصر الله يرحمها - وهيه مع سنبل (محمد صبحي) وبتقول له "حاجة ... بيسموها كباب"!

لأ ، والواد واطي من يومه... ما يعرفناش غير ساعة مصلحته ، لما يكون عاوز حاجة! أو لو زهقان وعاوز حد يلاعبه شوية!

وانتو عارفين طبعاً ، الأطفال كلهم ما بيتعبوش! وبصراحة ، أنا ما فياش حيل للجري و وجع القلب ده!

اللي فعلاً بتنسجم معاه هيه عمته... بيحبوا بعض جداً! وتحسوا إنهم هما الـ 2 عقلية واحدة! ويلعبو استغماية ، واللي يكتشف التاني مستخبي فين ، يروح يجري ، ويستخبى كويس! وجري مع بعض من أول البيت لآخره!

وهيه اللي بتعرف تحميه لوحدها. لما باجي أحميه ، ما بيحبش الميه خالص ، وخصوصاً لو جت على عنيه أو مناخيره! زي ما يكون هيموت! ويفضل يترعش بعد الدش ، ولازم يتكلفت بالهدوم لغاية ما ينشف!

وبرضه ما بيحبش ينام غير مع عمته ع السرير... آجي آخده ينام جمبي - هيه مش خلفته ونسيته - البيه مش على بعضه ، وما بيتهدش وينام غير معاها!

ولما نيجي نسرح له شعره ... مشكلة تانية! البيه يشوف المشط ويتعفرت ، ومش عاوز خالص ، وعايز يسيبنا ويجري يستخبى مننا! مأسااااه

ويمكن احنا ما عودناهوش على الخروج بره البيت ، وبالتالي بيخاف جداً لما آخده العربية معايا ، وما بيرتاحش غير لما آخده على رجلي وانا سايق ، وافضل أطبطب عليه واكلمه.

شوية كمان ، ويبدأ يهدى ، ويتلخم في المناظر اللي بره شباك العربية!

بقالي زمن ما شفتوش ، و واحشني! :ninja:

قلت أدردش معاكو عليه شوية لو ما يضايقكوش طبعاً... ونكمل بعدين :rolleyes:

فيجيب الدمع والماضي الجريح *** لم عدنا؟ ليت أنّا لم نعُد!

رابط هذا التعليق
شارك

ما شاء الله لا قوة الا بالله .........ربنا يطمنك عليه يا دكتور وتشوفه قريب ان شاء الله :blink:

نوادر الاطفال بتكون بجد مالهاش حل ........انا بقي بجد مش بلاقي نفسي الا في حالتين ........يا اما اقرا يا اما مع ولاد اختي....لما بيسافروا بقعد معاهم ع النت للفجر نتكلم ونلعب قدام بعصض او نشغل برامج الرسم وانا ارسم وهما يلونوا شخابيط طبعا...........واول ما ييوصلوا عندنا ببقي انا الراعي الرسمي والوحيد ليهم من اول ما يصحوا لحد حدوته قبل النوم......زي عمه نوسي كدا......... wst:: اجمل حاجه بقي انهم مش بيصدقوني خالص لما بزعق لهم........رغم اني برسم علي وشي ابلغ ايات الزعل عشان يقتنعوا انهم غلطانين واعمل هيبه وكدا........بس برضوا ببقي مش مقنعه خالص........وانا احاول وهما يضحكوا ويجروا ومفيش فايده...واوضتي طبعا مستباحه والاب توب بتاعي ودولابي ........واي حاجه تخصني من حقهم بوضع اليد......وبمزاجي كمان.........وكل يوم ايث كريم ومثاثه وانا جايه من الشغل......والمرتب خلاص بيستغيث......... wst:: ............شقي عمري :blink:

ودلوقتي نزلوا ينادوني عشان اطلع اعشيهم واتفرج معاهم علي التليفزيون وطبعا لازم اطلع.......ومنها اتعشي برضه يعني......... wst::

ربنا يخليهولك يا دكتور وتفرح بيه :rolleyes: :ninja:

تم تعديل بواسطة galaxy

املأ عينيك من وجوه الأحباء والأهل والأصدقاء فقد يغيبون عنك بعد حين ولا تؤجل إفصاحك لهم عن مشاعرك الطيبة تجاههم إلى الغد فقد لا يكونون على مسرح الحياة حين يجيء ذلك الغد

رابط هذا التعليق
شارك

بقالي زمن ما شفتوش ، و واحشني!

قلت أدردش معاكو عليه شوية لو ما يضايقكوش طبعاً... ونكمل بعدين

يا خبر يضايقنا ايه

هى مشاعر الابوة الحنونة تضايق

ربنا يجمعك بيه فى القريب العاجل ان شاء الله :rolleyes:

و يارب يكبر كده و تفرح بيه و تشوفه رجل و يبقى سندك فى الدنيا دى

أقلل عتابك فالبقاء قليل...و الدهر يعدل تارة و يميل

رابط هذا التعليق
شارك

ربنا يطمنك علية وتشوفة دكتور زيك بس اوعي من الدلع الزيادة لحسن بيقلب باعادة ويبق الولد دماغة ما فيهاش حاجة اسمها لا

وربنا يبارك لك فية

عارف ان انا نقطة خلافي مع جوزي دلعو للاولاد وكل حاجة طيب وماشي ومن النادر لما يقول لا :rolleyes:

:ninja:

دة بق بيضايقني جدا رغم اني كنت مدللة في بيتنا جدا عمري ما حد ضربني لكن انا بضرب وبزعق وبعمل كل حاجة يمكن دة غلط بس لاني مش عاوزاهم يتعودوا علي كدة :blink:

وياما ليهم مغامرات وخصوصا الشعر والتسريح دة من اكبر مشاكي مع ولادي والسبايكي :blink:

رابط هذا التعليق
شارك

ازيك يا دكتور..

انا والله كل يوم بشوف ابداعاتك فى موضوع كندا

فقلت ادخل موضوعك الجديد هنا استمتع بحلاوه

الأسلوب فى الوصف والكتابه..

وبجد عندك طريقه هايله للوصف تخلى اللى بيقرا يشوف الصوره

ويتخيلها..بس نظرا لحسك الفكاهى حاسه انك حتقول

حاجه فى تكمله الموضوع.

عموما احنا مستنين الجزء التانى.واخر مغامرات حبيب بابا.

طائره ورقيه

رياح شديده

خيط قصير

الطائره ليست بين السماء ولا الأرض

..هذه انا!!

لولا

رابط هذا التعليق
شارك

الأخوات : هبه - جالاكسي - فتافيت - لولا

أشكركم جداً على وجودكم معايا ، و وقفتكم جمبي ، وانا بافتكر نوسي حبيب قلبي.

ومش عارف ليه الحنيّة دايماً الواحد ما بيشوفهاش غير من الجنس الناعم؟!

أنا قلت قبل كده ... معرفة الرجالة دي ما بتجيبش غير لورا! :roseop:

أما بخصوص أشوفه راجل ويبقى سندي دي ( هبه )

وأشوفه دكتور كمان؟! ( فتافيت )

إحممممم ... بيتهيألي صعبة شوية :roseop:

أوريكم صورة إبني وحبيب بابا ، واللي طلعت بيه من دنيتي ، وبعدين نتكلم :roseop:

1001838fe9.jpg

1001841ex4.jpg

قمر ولا لأ بذمتكم؟! :lol:

مش عارف ليه حاسس إنك يا لولا يا سوسة كان قلبك حاسس! :roseop:

فيجيب الدمع والماضي الجريح *** لم عدنا؟ ليت أنّا لم نعُد!

رابط هذا التعليق
شارك

سيبونى على الراجل ده انا اقتله

و انتى يا لولا طيب شاورى بايدك غمزة كده بيعنك

يادى الكسوف

سى نوسى طلع قط (و الا قطه)

بس ما شاء الله لذيذ اوى

انا كمان بحب القطط تحب اجيبله عروسة :closedeyes:

أقلل عتابك فالبقاء قليل...و الدهر يعدل تارة و يميل

رابط هذا التعليق
شارك

سيبونى على الراجل ده انا اقتله

و انتى يا لولا طيب شاورى بايدك غمزة كده بيعنك

يادى الكسوف

سى نوسى طلع قط (و الا قطه)

بس ما شاء الله لذيذ اوى

انا كمان بحب القطط تحب اجيبله عروسة wst::

عروسة إيه بس يا هبه؟ ما هو ده اللي ضيع الواد مننا! :roseop:

حتت بنت جزمة ولا تستاهل ؛ خطفته مننا! مع إنو برقبتها! وكان ممكن أجوّزه ست ستها! بس جيت ف الآخر قلت - زي أي أب - مش مهم اللي أنا عاوزه... المهم نوسي يكون مبسوط وسعيد!

هيه صحيح مش من مستواه ، بس الواد هيموت عليها! وهيه ... سايقة التقل ع الآخر! والواد العبيط هيريّل عليها!

فعلاً ، الفيميلز دول ... دايماً مشكلة :lol:

وآدي صورة الكلبة اللي خطفت ابني مني... اللي اسمها (سيلفر)!

30112007004md1.jpg

وممكن تلاقيه قاعد بالساعة والـ 2 مستنيها تحن وتبص له! وهيه ولا في دماغها الولد أصلاً! هيه نايمة ، والواد يفضل باصص لها ، لما أنا رقبتي وجعتني عشان خاطره! :wub:

لأ ... حلوة بجد جامدة .. شديدة قوي

يا راجل ده أنا الدمعة كانت حتفر من عينينا .. وصعبت عليا .. ودعيتلك كمان

بصراحة هيه النكتة حكمت... بس بجد لما تعيش مع قط أو أي حيوان أليف ، بتحس زي ما يكون ابنك بجد!

نفس حركات الأطفال بالظبط! لدرجة إنو ما بيهونش عليك تزعّله!

ولا لما ينط نطة عبيطة شوية ، وتلاقيه ماشي يعرج! تبقى مش عارف تعمل إيه!

وبالمناسبة صحيح... نوسي غاوي يقعد وينام في أماكن غريييييبة مووت! شوفو كده ، واحكموا بنفسكم!

1000355jd1.jpg

1000362po3.jpg

1000376ga5.jpg

1000755tz2.jpg

وبناقص البس أنا هدومي يا عم نوسي!!!

1000882yg0.jpg

وبلاها قعاد من أصله!

1000874jq8.jpg

ماهو الحوض ده معمول مخصوص على مقاسه ، يبقى بديهياً معمول علشانه!

وممكن نقلبه سرير ، وننام خالص...

24072007009sy1.jpg

كنا بنسيبله الحمام كله عشان ما نزعجوش ، ونروح الحمام التاني... نام براحتك يا نوسي بيه!

وفي عجلة الخضار...

1000880da7.jpg

لدرجة إننا خصصناله الدرج اللي تحت خالص ، بس هوه يؤمر!

يا ترى هتطبخولي إيه النهارده؟

1000886uv4.jpg

فيجيب الدمع والماضي الجريح *** لم عدنا؟ ليت أنّا لم نعُد!

رابط هذا التعليق
شارك

نوسى بيه دا مفترى...فيه بشر من مخاليق ربنا نفسهم فى نص الحمام و السرير ده :roseop:

و يستاهل اللى بتعمله فيه البنت الامورة دى

سايقة التقل بجد :lol:

أقلل عتابك فالبقاء قليل...و الدهر يعدل تارة و يميل

رابط هذا التعليق
شارك

نوسى بيه دا مفترى...فيه بشر من مخاليق ربنا نفسهم فى نص الحمام و السرير ده :P

و يستاهل اللى بتعمله فيه البنت الامورة دى

سايقة التقل بجد wst::

هيه من حيث سايقة التقل يا هبه ، فهيّه ما تتوصاش!

لدرجة إنها كانت بتتكشف لما ما تلاقيهوش جمبها... كنا ساعات نسيبها نايمة ، ونشيل نوسي بالعافيه ونلخمة بالأكل أو باللعب ، ويهبط من كتر الجري وينام!

البرنسيسة تفتح عنيها ، ما تلاقيش العبد بتاعها مرمي تحت رجليها ، تفضل تلف تدور عليه زي الهبلة!

تشوفه من هنا ... يرجع الاستعباط من تاني! واحاول أعقّله ، يابني إفهم ، والله ما تستاهلك! دي بتلعب بيك!

بس هتعملي إيه؟! مراية الحب عمياء!

ما كمّلتلكيش الأماكن الغريبة اللي بقت بتاعته! مثلاً جوه العربية ، التابلوه اللي ورا ده ، محدش عاوزة يبقى بتاعي (دا نوسي اللي بيقول!)

1000756kc8.jpg

ومن منطلق إنه بتاعه ، يبقى ممكن ينام فيه :roseop:

1000757io4.jpg

ولو دست فرامل جامدة شوية ، وصحي من النوم ، أبص في المراية أشوفة رافع راسه وباصصلي "أنا آسف يا نوسي!"... دي الحاجة الوحيدة اللي ممكن تخليني أسوق بعقل شوية!

وبرضه مفيش مشاكل لما يطلع أدامي وانا سايق! وان شللا ما سوقنا ، ولا شفنا الطريق أدامنا!

1000766zj6.jpg

وآدي نومة!

1000764xe0.jpg

أعمل إيه أنا ساعتها؟! أضطر أمشي بالراحة ، وآخد جنب ، لغاية ما البيه يزهق ، ويغير المكان!

ولما الأدب وسمعان الكلام بقى يبقوا موجودين... ساعتها بقى يستاهل نكافئه بمثلث جبنة ميلكانا من اللي بتعدل المزاج :wub:

nousynestomn4.jpg

ولما يكون زهقان وعاوز حد يلعب معاه بالكورة ...

1000383wy4.jpg

ولما يكون عاوز يعيش مع نفسه شوية...

1001843pl7.jpg

شوفو الأخلاق والطعامة... دا الأدب نوسي ، والأخلاق نوسي ... هوه انا خلّفت غير نوسي؟ :lol:

فيجيب الدمع والماضي الجريح *** لم عدنا؟ ليت أنّا لم نعُد!

رابط هذا التعليق
شارك

  • بعد 2 أسابيع...

جامده قلبى كان حاسس ان فى شىء فى الموضوع

وطلع الشىء

نوسى

بس باين عليك بتعزه خالص

من فضلك يادكتور

ممكن تخلى نوسى يكلملى اى حد من البهوات المسئولين يسفرنى اى دوله اوربيه انتا عارف البلد دى مابتمشيش الا بالبشوات اللى زى حضرته

بس باين عليه ابن عز خالص

حاجه تفرح يعنى خاف عليه بقه من القطائيط اولاد الشوارع :lol:

اللهم صلى على محمد وعلى ال محمد

رابط هذا التعليق
شارك

  • بعد 3 أسابيع...

تصدق يا دكتور انا اول مرة اشوف الموضوع دة

متتخيلش قد اية بجد فرحت جدااااااااااااا لما شوفت الصور دى

اصل كان عندى لولو قط زية بالظبط .. بس الله يرحمة مات من سنتين تقريبا

وفعلا كل اللى انت بتحكى علية كان بيحصل . لدرجة ان الفجر كان ساعات يقف قدام الباب بتاع الشقة ويفضلل ينونو علشان عاوز يعقد قدام الباب شوية .. قال يعنى الجو حر جوة وعاوز يشم هوا ..

بس كان بيحبى قوى وبيحب العائلة كلها بصراحة.. وكنت لما انام كنت لازم انيمة جنبى واغطية .. بس الكلب لما كان بيروح فى النوم تسمع شخيرة بقى ..

بس اوحش حاجة كانت بتضايقنى منة ان شعرة كان بيقع .. مع انى والدتى كانت دائما تجيبلة شامبو بيرت بلاس

اقولها دة للقشرة . تقولى ما القشرة هى اللى بتوقع الشعر .. :wub:

بس هو مكنش بياكل الجبنة والحاجت دى .. كنا معلمينة الادب.. كان بياكل شوكالاتة بس تكون سادة .. وكان بيحب البامية اوى اوى اوى .. وساعات بياكل عيش فينو بس باللبن ..

وياسلام على الموز تقولش مربين قرد..

بس بصراحة كان محترم اوى . لم احد يزعقلة كان بيعقد مكانة زى ما يكون حس انه عمل حاجة غلط .

بالله عليك يا دكتور لو عندك صور تانية تحطها .. بجد صور روعة

WE WAIT FOR SOME ONE , WE WAIT FOR SOME THING, WE WAIT FOR CALL , WE WAIT FOR CHANGE , ALL WE HAVE JUST WAITING

رابط هذا التعليق
شارك

الأخوات : هبه - جالاكسي - فتافيت - لولا

أوريكم صورة إبني وحبيب بابا ، واللي طلعت بيه من دنيتي ، وبعدين نتكلم wst::

3372488261f37a8e3.jpg

2966488261f4d38c4.jpg

قمر ولا لأ بذمتكم؟! :wub:

مش عارف ليه حاسس إنك يا لولا يا سوسة كان قلبك حاسس! smk:

قمر وبس ده يهبلللللللللللللللللللللللللل.. عسللللللللللللللللللللللل

بسم الله ما شاء الله ... هو ده القط اللي نفسي فيه من زماااااااااااان بس مش لأقياه :D

بجد بجد يكننننننننننننننننننننننننننننن :P

كان عندي 56 قط وقطه تقريبا بس ادفع نص عمري واجيب قط زي ده

بجد موضوع هايل وانا عن نفسي ما خدتوش كنكته بالعكس .. جايز لأني بموت في القطط وبتكلم معاهم وبحس انهم بيردوا عليا.. ومرة لقيت قطه جمب باب الشغل رحت خدتها ودخلتها والمكتب كله كان مسخر لخدمتها :P

عقلي المستخبي:

شكلهم حيفتكروني مجنونة بس بجد بجد ده احساسي بيهم

رابط هذا التعليق
شارك

  • بعد 2 شهور...

مبدئياً... خالص الشكر لعمنا عصام اللي طلعت عينيه عشان يلم صور نوسي ويرجّعهولنا ينوّر القعدة هنا bv:-

بُص يا مصري لم يندثر أثره... لو عندك قط في البيت زي نوسي كده ، سدّأني هتلاقيك بتعامله زي البيبي الصغيّر ، ونفس حركات الأطفال بالظبط هتلاقيه بيعملها... تيبيكال :wub:

حسيني حبيبي...

هوه خلاص يا ريّس كندا خلّصت على كل حاجة ، ما سابتش! :blink:

وفكرتني يا علاء بحواديت نوسي مع الأكل (بس ما وصلتش للبامية دي الصراحة خالص :lol: )... كان برضه بياكل كل حاجة ، ويحب دايماً التغيير! وبيعز الآيس كريم موووت ، والزبادي بالعسل ، بس ما كانش بيحب يكتّر منه ، وبرضه قلب العيش الفينو (اللبابة الطرية) ، والواد المجرم لما رجعت من كندا كنت جايبله معايا ويسكاس من هناك ، بتشكيلة (رومي - سمك - بيف - ضاني - فراخ) ، وكان بيموت فيها ، ولما خلّصها نزلت اشتريتله من مصر نفس الماركة ونفس التشكيلة من سوبر ماركت مترو (كانت صناعة جنوب أفريقيا) ؛ البيه أكل منها شوية ، وسابها! :lol: :blink:

مش قلتلكو ابن عز :wub:

شهد...

أنا حاسس بكلامك والله... بتحسي بجد إن القط ده واحد من أفراد العيلة ، وممكن تلاقيه معاكو على ترابيزة السفرة!

نوسي كان دايماً معانا على ترابيزة الغدا ، وبياكل من نفس أكلنا ، وقاعد بكل أدب وأخلاق...

كانت أختي تنضّفله السمك (ما بيجيش ناحية جلد السمك طبعاً) ، وتدّيله من سدر الفراخ (ما كانش بياكل غير السدر :blink: ) وطبعاً لازم الفراخ تكون محمّرة :lol:

طب تعرفي إن أختي مرة بتدّي لنوسي قطعة من السدر ما كانتش متحمّرة ؛ شمّها وسابها ومشي ، قامت مديالُه من طبق جوزها ، وبعدين بتدّي جوزها حتت السدر المسوقة ، وده يقوللها هوه نوسي بيه يغضب عليها ، تقومي مدّياهالي أنا؟! :happy:

فيجيب الدمع والماضي الجريح *** لم عدنا؟ ليت أنّا لم نعُد!

رابط هذا التعليق
شارك

موضوعي ده عن أعز حاجة على أي أب في الدنيا...

إبنه الغالي... ومغامرات الطفولة البريئة...

عشان كده حبيت أكلمكم عنه... واللي ليهم أبناء زيه يتفضلوا يحكولنا عنهم كمان...

نوسي ده ولد متدلع ... الحيلة بقى

واللي يلاقي الدلع وما يتدلعش ، حرام عليه!

وطبعاً ... زي أي أب في الدنيا ، ما كنتش باحب احرمه من أي حاجة... ساعات كان الموضوع ده ييجي على دماغي ، بس هاعمل إيه؟! الضنى غالي يا ناس!

وكانت عمته دايماً تقوللي خليه يخشن شوية ، العز ده مش دايم له! ولو اتعود على حاجة هيتبهدل لو اتحرم منها!

سيبه يزعل ولا يغضب ع الأكل ... لما يجوع هياكل اللي محطوط له في طبقه! اللي زية لو شافو لقمة مرمية في الشارع هياكلوها! وصحتهم زي الفل! والبيه بسلامته ما بياكلش غير لانشون حلواني ، ولو حطيت له لانشون فرجللو يسيبه ويمشي؟!

ده إسمه بطران على نعمة ربنا! وربنا هيحاسبك... إنتا اللي هتتلف أخلاق الولد!

يا جماعة... دا الأب بيكون نفسه يجيب لابنه حتة من السما... مش بس لانشون حلواني!

وأحلى حاجة بقى كانت دي مزاج المزاج ، وبيموت فيها ... الجبنة المثلثات ... ميلكانا أو بريزيدان. الولد بيغمض عنيه وهوه بياكلها ، ولا دلال - سعاد نصر الله يرحمها - وهيه مع سنبل (محمد صبحي) وبتقول له "حاجة ... بيسموها كباب"!

لأ ، والواد واطي من يومه... ما يعرفناش غير ساعة مصلحته ، لما يكون عاوز حاجة! أو لو زهقان وعاوز حد يلاعبه شوية!

وانتو عارفين طبعاً ، الأطفال كلهم ما بيتعبوش! وبصراحة ، أنا ما فياش حيل للجري و وجع القلب ده!

اللي فعلاً بتنسجم معاه هيه عمته... بيحبوا بعض جداً! وتحسوا إنهم هما الـ 2 عقلية واحدة! ويلعبو استغماية ، واللي يكتشف التاني مستخبي فين ، يروح يجري ، ويستخبى كويس! وجري مع بعض من أول البيت لآخره!

وهيه اللي بتعرف تحميه لوحدها. لما باجي أحميه ، ما بيحبش الميه خالص ، وخصوصاً لو جت على عنيه أو مناخيره! زي ما يكون هيموت! ويفضل يترعش بعد الدش ، ولازم يتكلفت بالهدوم لغاية ما ينشف!

وبرضه ما بيحبش ينام غير مع عمته ع السرير... آجي آخده ينام جمبي - هيه مش خلفته ونسيته - البيه مش على بعضه ، وما بيتهدش وينام غير معاها!

ولما نيجي نسرح له شعره ... مشكلة تانية! البيه يشوف المشط ويتعفرت ، ومش عاوز خالص ، وعايز يسيبنا ويجري يستخبى مننا! مأسااااه

ويمكن احنا ما عودناهوش على الخروج بره البيت ، وبالتالي بيخاف جداً لما آخده العربية معايا ، وما بيرتاحش غير لما آخده على رجلي وانا سايق ، وافضل أطبطب عليه واكلمه.

شوية كمان ، ويبدأ يهدى ، ويتلخم في المناظر اللي بره شباك العربية!

بقالي زمن ما شفتوش ، و واحشني!

قلت أدردش معاكو عليه شوية لو ما يضايقكوش طبعاً... ونكمل بعدين

................................................................................

.............................

السلام عليكم

الاب المكلوم اخويا دكتور تهامى

طبعا انا اول ما قرأت المداخله للمره الاولى تحركت مشاعرى و تذكرت فتره الاجازه (شهرين )

و الدمعه كانت هاتفر من عينى (من الفرحه طبعا ) و اللى كانت فيها العيال و امهم فى اجازه فى مصر فى الصيف الماضى.

و لما قرأت باقى المداخلات و عرفت مين هو بسلامته .... شربت كبايه ميه ساقعه علشان مشاعرى تهدى .

و قلت صحيح الضنا غالى و اللى جابلك يخليلك و يتربى فى عزك ..قصدى فى حجرك إن شاء الله و يكبركده و تدخله المدرسه

و ما تتحرمش من دخلته عليك كل اليوم الصبح يأخد مصروفه و يلحس ايدك قبل ما يروح المدرسه .

و انت واقف تتفرج عليه من البلكونه بكل حنان الابوه و هو بيركب عربيه الكلاب ..عفوا عربيه المدرسه ..

و ان شاء الله تفرح بيه و هو عريس و بيتجوز ( الكلبة اللي خطفت ابني مني... اللي اسمها (سيلفر)!)

و يخلفولك كلاب مقطقطه ...) ( او قطط ولاد ..........قطط)........ الحقونى بالكركدييييييييييييه :happy:

تم تعديل بواسطة abaomar

<strong class='bbc'><strong class='bbc'>وَلَا تَحْسَبَنَّ اللَّهَ غَافِلاً عَمَّا</strong></strong><br /><br /><strong class='bbc'><span style='font-family: arial'>يَعْمَلُ </span></strong><br /><br /><strong class='bbc'><span style='font-family: arial'><strong class='bbc'>الظَّالِمُونَ</strong></span></strong><br /><br /><strong class='bbc'><span style='font-family: arial'>إِنَّمَا يُؤَخِّرُهُمْ لِيَوْمٍ تَشْخَصُ فِيهِ الْأَبْصَارُ</span></strong><br /><br /><br /><br /><br /><br /><p class='bbc_center'><span style='font-size: 18px;'><strong class='bbc'>(24) إبراهيم </strong></span></p>

رابط هذا التعليق
شارك

ايه يا عم المواضيع الجامدة دى

الحاجات دى مستخبية فين يا جدعان

تفاءلوا بالخير تجدوه

بعضا مني هنا .. فاحفظوه

رابط هذا التعليق
شارك

انضم إلى المناقشة

You are posting as a guest. إذا كان لديك حساب, سجل دخولك الآن لتقوم بالمشاركة من خلال حسابك.
Note: Your post will require moderator approval before it will be visible.

زائر
أضف رد على هذا الموضوع...

×   Pasted as rich text.   Paste as plain text instead

  Only 75 emoji are allowed.

×   Your link has been automatically embedded.   Display as a link instead

×   تمت استعادة المحتوى السابق الخاص بك.   مسح المحرر

×   You cannot paste images directly. Upload or insert images from URL.

  • المتواجدون الآن   0 أعضاء متواجدين الان

    • لا يوجد أعضاء مسجلون يتصفحون هذه الصفحة
×
×
  • أضف...