عــــــمر والكارتون وأونكل موديست الحنون

[se_ Elsyed]

الحكاية مش حكاية عمر إبني

ولكنها حكاية كل أو نقول معظم الاطفال وبالذات أطفال الجيل الحالي الذين أصبحوا مدمنين للبرامج التليفزيونية وخصوصاً الكارتونية

ولا أتحدث مع أي حد في الموضوع ده إلا وأجده يُعاني مما اعانيه وأجد أطفاله أيضاً أسرى لتلك البرامج التي يقضون أمام التليفزيون بالساعات ليشاهدوها وأصبحت الأمور تخرج عن سيطرة الأب والأم وأصبح الأباء يقفوا عاجزين عن أيجاد حل

..

أما عن عمر إبني فتجربته كالتالي :

من صغره وهو بيحب الكارتون .. وهو طفل عصامي كون نفسه بنفسه .. فلقد بدأ مع لالا وبو وتينكي وينكي وديبسي وهما أبطال حلقات " تيلي تابيز " اللي بتفقع المرارة وعلى فكرة هي من إنتاج البي بي سي ..

ثم تخطى هذه المرحلة ليتعلق بتوم اند جيري

ثم ربنا فتحها عليه ووسع نشاطة الكارتوني ليفتح فروع جديدة للنينجا تيرتلز .. والبوكيمون وأبطال الديجيتال وجميع حلقات العنف والضرب والهبد والطحن

ولإن الأب - اللي هو سين سين - بيكبر دماغه وعايز يريح الجمجمة .. فراح خصص تليفزيون وستاليت لإبنه في غرفته الخاصة عشان ما يزعجوش لما يكون في مباراة كرة قدم او نشرة أخبارية أو مسلسل مصري حزين

وبالتالي تدهورت حالة الولد وظهرعلى وجهه الإرهاق وتكونت هالات سوداء تحت عينيه من كثرة مشاهدة هذا المخروب

ومش بس كده ... ده جر رجل أخوه الصغير الغلبان لتلك السكة البطالة ...

وعلي إبني طالع ما شاء الله عليه هادي ووديع ومالوش في التليفزيون إلا إن الزن على الودان أقوى من السحر .. فأستطاع هذا الشرير عمر ان يجذبه إلى تلك الهواية السيئة

مش بس كده

ده طرأت على تصرفاته أمور خطيرة جعلتني اتدخل وبقوة لوقف نزيف الدم ولوضع حد لهذه المأساة

- فمن هذه التصرفات إن البيه كان قبل الدراسة بيصحى من النوم على العصر كده زيه زي أي طفل .. لكن لإن ساعته البيولوجية إتظبطت على ميعاد المدرسة فبقى اليومين بتوع الاجازة بيصحى في الساعة السابعة صباحاً ويقفل على نفسه باب غرفته ويرش ميه قدام المحل وياخد إصطباحه كارتونية تستمر إلى ساعات عديدة .

قلنا ماشي يوم أجازته ومن حقه يعمل دماغ كارتونية .

- كان الأول مولع باللعب مع أصدقائة من أولاد الجيران في مدخل العمارة وبيفرح جداً بالموضوع ده ... دلوقت دلقهم كلهم وما بقاش يرضى يلعب معاهم وبقوا العيال يعيطوا على باب الشقة وهما يتحايلوا عليه يطلع يلعب ... وبقى يفضل الكارتون عليهم .

قلنا ماشي يمكن في خلافات أيدلوجية بين عمر وبينهم وربنا يهدي النفوس

- المدرسة عندهم بتطلع رحلات ترفيهية كل شهرين كده ولا حاجه .. وكان بيظبط نفسه على الرحلات دي عشان ينطلق في حرية مع زملاء الدراسة وبيستناها بشغف .... إبتدى البيه يقدم إعتذارات عن تلك الرحلات ويتحجج بأي حجج .

قلنا ماشي يمكن ما بقاش يلاقي نفسه في تلك الرحلات أو إنه كبر على رحلات الملاهي وجنينة الحلويات ( الحيوانات ) وبقى عنده تطلعات إنه يروح ماليزيا او بلاد الضباب

- إلى ان جاءت قاصمة الظهر والتي دقت ناقوس الخطر من الدرجة جيم وكان لازم اتدخل

مع قرب نهاية كل عام دراسي كانت المدرسة بتعمل لهم حاجة كده بيسموها Fancy Party يعني زي حفلة تنكرية كده وكل طفل بيروح بملابس تنكرية إيش باتمان على سوبرمان على سبيدر مان او أي حد من عيلة مان .. وتلاقي البنات اللي رايحة بملابس فلاحه ومعاها البلاص ونزله تدلع تملى القلل أو ملابس العروسة باربي أم دم تقيل .. إلخ

لقيت البيه بيقولي أنا مش هاروح معاكو أشتري هدوم الحفلة ؟

ليه يا عمر يا ولدي ؟

جال لي : كده أنا ماليش مزاج ومش هاروح

انا قلت يمكن الولد حاسس إننا في أخر الشهر وأبوه معذور ومش هاقد أشتري له هدوم تنكرية جديدة ... يا واد يا سين سين سيبوه براحته

لقيته يوم الحفلة قايم الساعة 7 الصبح برضوا وقاعد بيتعاطى كارتون مع سبق الإصرار والترصد .. مع إن الحفلة دي كان بيموت نفسه عليها وبينزل يلففنا على المحلات لحد ما يختار الملابس اللي بيحبها وبيستنى الحفلة من السنة للسنة عشان يهيص ويتصور مع أصحابه ...

قلت ما بدهاش .. وحان وقت تدخل السلطة الباباوية القهرية ...

روحت مهددة إنه لو إتفرج كتير عل التليفزيون فمش هايروح الملاهي في كل ويك إند ... ده كان التهديد

أما الوعيد ( فهنا بقى جه دور موديست )

في أخر زيارة لموديست وكعادته دائماً صاحب عطاء متجدد .. لقيته جايب لي إتنين دي في دي :

1- الأول في كل القصص بتاعت ميكي والشياطين الـ 13 والحركات دي .. ودي لسه لا تتوائم مع مزاج عمر .

2- مجموعة برامج اكثر من رائعة انا شخصياً بألعب بها ... وهي عبارة عن ألبومات أبيض وأسود صور لجميع الشخصيات الكاترونية ييجي 900 صورة ... ممكن نطبعها على ورق A4 وتتعمل على شكل مُجلد والولد يلونها من خياله

، بالإضافة إلى عدة برامج تلوين بالكمبيوتر لجميع الشخصيات المحببة للأطفال وتلاقي الولد يمسك الماوس ويشاور على فُرشة الألوان ويختار اللون اللي بيحبه ويبتدي يلون لحد ما تكمل اللوحة

فقلت بس .. موديست جاب الحل ... إبتديت أضع تارجت لعمر وعلي كل يوم ... يلونوا كل يوم صورة أو اتنين من اللي في المجلد اللي ظبطه لهم وعملته بشكل فاخر ... واللي يلون كويس له هدية مختلفة في كل مرة ..

فأصبحوا يقللوا من الفرجة على المخروب وكل واحد يجتهد عشان لما أرجع البيت يفرجني هو لون إيه

وكمان الكمبيوتر ما يشتغلش عمال على بطال ... فاللعب والتلوين على الكمبيوتر بيبقى مكافأة على ممارسة هواية الرسم والسلوك الطيب في البيت والصلاة في مواعيدها ..

على سبيل المثال : يوم الخميس اللي فات الأستاذ عمر بلطج وما صلاش العصر مع مامته عشان كان في إيده فيلم كارتون بيضربهم .. روحت البيت وتم إبلاغي بالحادث ... فروحت معاقبه بإني جبت جهاز الكمبيوتر وفضلنا نلعب أنا وعلي - اللي صلى في الوقت مع مامته - وصاحبنا عمال يطنطت ويعمل عجين الفلاحه ويبكي بالدموع عشان عايز يلعب معانا

تاني يوم لقيته صحي من بدري وجايب الفرشاة والألوان والأقلام والحركات بتاعت الرسم ونازل حرت في الرسومات عشان لما أصحى يوريني هو عمل إيه ...

الخلاصة :

- أحب اوجه الشُكر كالمعتاد لبابا شارو قصدي بابا موديست على تلك البرامج الرائعة .

- أحب أسمع تجربة كل واحد مع هذا الموضوع المعقد واللي أكيد كتير مننا بيعانو منه وما هي الحلول الفعالة

- عشان أجيب من الأخر .. عمر عنده بلاي ستشن وجبناه له عشان يلتهي عن التليفزيون شويه .. برضوا بقى يقعد قدامه بالساعات وبقى عصبي وبيبقى على وشك إنه يدخل جوه التليفزيون عشان يوقع الطيارات أو يموت الوحش المخيف اللي بيحاربه ... فكانت النتيجة إني شيلت البلاي ستيشن في الصندرة ،

- مامته أقترحت إننا نشترك له في قناة المجد الإسلامية للأطفال .. طب ما هي تليفزيون برضوا وهايقعد قدانمها بالساعات وحالة الغدمان هاتزيد .

الألعاب والعربيات اللي بالريموت والكلام ده .. عنده اكداس مُكدسة منها لكنها عبارة عن أشلاء مُدمرة نتيجة للحروب التي خاضها هو وأخوه وخروجو منها منتصرين باكاليل الغار واوسمة الفخار .

- ما فيش هنا نظام نوادي رياضية زي مصر ... وحتى لو فيه ، الواحد ما بيأمنش على الطفل إنه يتحرك لوحده حتى لو كان شاب .

مع تحيات / اخوكم المُعذب .. أبو ساميه

[م الغزالى]

هذا الموضوع من وجهة نظرى موضوع خطير و جدير بالمناقشة و لعل أحد المتخصصين لو وجد يشاركنا الرأى

أنا بالفعل هالنى حين كنت فى مصر أن الأطفال يقضون فترات كبيرة بالفعل أمام الكرتون وصار بالفعل إدمان ويمكن أن نلتمس العذر لهم وذلك لآن الأباء بتستسهل الأمور و هناك أباء بالفعل بيخلصوا من "دوشة " ولادهم ويتركوهم أمام التلفزة لفترات طويلة سواء الكرتون او خلافه

- هناك بعض العذر للأباء فى مصر حيث أن البعض ليس فى إستطاعته أن يوفر لهم الإشتراك فى نادى رياضى ز لاتوجد متنزهات إلا فيما ندر و بعضها مكلف وحالة الشوارع لا تصلح لمشى الكبار مابالك بالصغار ولاتوجد حمامات سباحة عامة يمكن من خلالها تمكين الصغير من ممارسة الرياضة, و ناهيك عن إختفاء ممارسة الرياضة فى المدارس.

ولحد ما نفس الأمر ينسحب على دول الخليج حيث حرارة الجو تؤثر على النشاط العام وبالطبع فى الليل بينام الأطفال. ولكنى شاهدت بنفسى أن أقصى ماتفعله بعض الأسر بتأخذ أولادها للمولات التجارية و بالطبع فسحة أكل و مالاتفعله فى البيت تفغله فى المول .

- لى أخت فى الإمارات كانت تترك إبنها فترات كبيرة ما بين الكرتون والكمبيوتر و إكتشفوا بعد فترة أنه فقد لحد كبير جزء من نظره و رغم أنه كبر الأن وأصبح فى كلية الطب إلا أنه لا يرى شئ بدو ن نظارة و هو ما أثر على خالته النفسية .

ولكن مازال هناك مايقوم به الأباء و الأمهات لتقليل تللك الأخطار من وجهة نظرى وتحت مثل هذه الظروف :

- لابد من تقليل الفرجة على التليفزيون للكبار حتى يكونوا قدوة وأيضاً لتقليل الموجات الكهرومغناطيسية التى تسرى فى البيت من التلفزة وغيرها من الأجهزة ,

- إياك ثم إياك أن تضع جهاز تليفزيون فى غرفة الطفل

- إذا كان إبنك مدمن كرتون فيجب أن تحاول أن تقلل مشاهدته للكرتون فى المرحلة الأولى (الأسبوع الأول )

إلى ساعة فى اليوم ثم إلى نصف ساعة فى اليوم (الأسبوع الثانى) ثم نصق ساعة كل يومين (الأسبوع الثالث)

ثم من بعد فقط ساعة فى الويك إند .

- بعض الأباء و على سبيل التباهى بيفرح إن إبنه صار يعرف كيف يتعامل مع الكمبوتر فى سن صعير وهو الخطأ بعينه فقربه من شاشة الكمبيوتر أخطر من مشاهدته للتليفزيون

- تشجيع الطفل على القراءة لو كان فى سن القراءة او القراءة له يوميا فى حالة عدم قدرته على القراءة

- عمل فحص دورى على النظر للأطفال فنحن مسئولوون عنهم أمام الله أولاً

- الطفل عنده طاقة لابد من إحراجها بصورة أو أخرى فلا نكتفى بإعطائه شئ لتلوينه أو رسمه أو بعض ألعاب التركيب فلابد من خروج الطفل اليومى للشارع أو للحدائق التى بها ألعاب و هذا موجوود بدول الخليج لحد ما فإن لم يمكن على الأقل فى يومين الأجازة للأب و الأم و يمكن أثناء الخروج أن يلبس حذاء التزلج (الإنلينر) لو أمكن بالدراجة حيث يمكنه إفراغ طاقته اومن عنده بيت أوسع ممكن جهاز نرمبولين يمكن للولد أو البنت من الطنطيط عليه.

- الخروج ثم الخروج للهواء و المشى ولو لفترة بسيطة يومياً هى أفضل الحلول.

-عليك بالسباحة للطفل إذا أمكن فهى من أفضل الرياضات للطفل و أقربها لقلبه

كما ذكرت لا بد بالفعل من أن يجد الأباء الوقت ولو ساعة يومياً لعمل نشاط ما مع أبناءهم و لو ذكرت لكم مايقوم به الأباء و الأبناء من مجهود مع أبناءهم هنا لعرفتم لماذا يحجمون عن الإنجاب لأنهم حين يقررون الإتجاب لابد من أداء الحقوق كاملة تجاه الطقل .

فى كل ما ذكرت سابقاً لابد من رغبة فعلية عند الأباء بإعطاء أولادهم بعض من وقتهم وهو حقهم عليهم و البعد عت الكسل والإستسهال

وتقبلوا تحيات أب بيحاول يعطى وقت لأولاده مع إن المنظومة هنا فى ألمانيا مسهلة الأمور كتير و لكنه الوقت ضيق فقط

تم تعديل 12 مايو 2007 بواسطة م الغزالى

[نانو]

والله يا س س كأنك بتوصف الحاله نفسها في البيت عندنا

مع الفارق إني حاولت بكل ما أوتيت من قوة مقاومة التليفزيون في غرفه الاطفال ....

مرة بحجة الترابط الأسري ..يعني التليفزيون فيه كرتون شغال (وده طبعا كان اغلب الوقت ) يبقي ماما قاعد بتتفرج معاهم وبابا قاعد جنبا علي الكومبيوتر او العكس ماما علي الكومبيوتر وبابا بيتفرج علي الكرتون غصب عنه....و من وقت للتاني بابا بيستأذن فتره انقطاع عن الكرتون علشان يتفرج علي ماتش او مسلسل او فيلم اوبرنامج

مره تانيه بحجة ان وجود التليفزيون في غرفه الاطفال بيخلينا ننسي هما قعدوا اد ايه أدامه و تمر ساعه ورا التانيه وإحنا طبعا فرحانين بالهدوء في البيت

المشكله ان اللي عندي بنات و للأسف اتحولوا إلي بينكي وبرين تانين في البيت لأنهم في نفس سن عمر و بدأو برضه بالتيليتبز وانتهوا ببات مان وبينكي وبرين ...البنات اصبحت مش بتحب الهدايا العرايس لكن بتميل الي عربيات السباق والمسدسات

مرة تالته رغم إن غرفه الأطفال عندي واسعه إلا إنهم بيسيبوا الاوضه كلها ويقعدوا تحت شاشه التليفزيون مباشره علي الأرض وده علي المدي الطويل بيأثر علي النظر والتركيز والمخ نفسه وبعد ساعات فرجه بيبقوا شكلهم كده :lol:

السلبيات بسبب وجود تليفزيون في غرفه الاطفال أكتر بكتير أوي من الإيجابيات لكن للأسف أنا إنهارت أمام السيل المندفع من ماتشات الزمالك اللي بيتغلب فيها ونفسيه زوجي المسكين وحسيت أد إيه إني لازم أقوم بدوري كزوجه بتقف جنب جوزها في أحلك أزاماته وإني لازم اذلله الصعاب علشان يقدر يشوف الزمالك وهو بيتغلب بدون اي إزعاج من الأولاد :lol: ووافقت علي تليفزيون في غرفه الاولاد

ارجوكم .....اللي لسه ما جابش تليفزيون في غرفه الولاده بلاااااااااش يجيب

الحلول اللي تفضل بيها اخونا محمد الغزالي عمليه ومفيده جدا لتقليل من مشاهده التليفزيون

[semsema]

موضوع حضرتك يا استاذ س س فكرني بنفسي في السنوات الاخيره اللي راحت(اصل انا لسه يادوب خارجه من مرحلة الطفوله)

وافتكر ان انا كنت باعيط لبابا عشان اشوف بوكيمون وخرابيط الديجيتال( دا اسمها الجديد)

وعشان اكون صريحه انا لسه بحب اشوف خرابيط الديجيتال وتوم اند جيري وكونان ( بس بالياباني)( محدش يضحك عليا) ودا بالنسبه لشخص في مثل عمري مقبول نوعا ما

فما بالك لما يكون شخص طالع ع الاربعين من عمره وبيحب يتفرج على مسلسلات الكرتون وده يبقى صديق بابا بيموت في حاجه اسمها نينجا تيرتلز وكونان لدرجة انه كان بيشتري حلقات كونان بالياباني ويدهالي بعد ما يشوفها

افلام الكرتون فيها حاجات تشد الاطفال ليها لدرجة ان الطفل بيتخيل نفسه شخصيه من الشخصيات دي

اخويا( 4 سنوات)

لقيته مره ما سكلي عصايا ونزل بيها على دماغي ويقولي:

هاااااااااااااااااي انا سوبر مان سأوريكي ايتها الفتاه طعععععععع( بيتكلم بالفصحى)

وبقى يحرمني من كل حاجه او أي برنامج عايزه اشوفه عشان يتفرج على سبيس تون و mbc3

اقول لبابا ع اللي بيعمله يقولي احسن بيطلع فيكو اللي طلعتوه فينا وانتو صغيرين

في حل بسيط جدا للمشكله دي والحل ده اتجرب معايا شخصيا

ممكن حضرتك تعمل رقم سري للقنوات اللي بيحبها وتفتحهاله في ساعات معينه

يمكن الطفل يعيط شويه بس يعد كام يوم هينسى لو عملت معاه الحاجات اللي أ/ الغزالي ذكرها وهي حلول عمليه جدا

هقول لبابا عليها يجربها مع اخويا (اصل الوضع بقى لا يطاق)

وشكرا

[DARWEEN]

للأسف أنا إنهارت أمام السيل المندفع من ماتشات الزمالك اللي بيتغلب فيها ونفسيه زوجي المسكين وحسيت أد إيه إني لازم أقوم بدوري كزوجه بتقف جنب جوزها في أحلك أزاماته وإني لازم اذلله الصعاب علشان يقدر يشوف الزمالك وهو بيتغلب بدون اي إزعاج من الأولاد

:lol:

:lol:

wst::

:lol:

mft: mft: mft: mft:

[Ahmad Farahat]

بصراحة يا عمو ثين ثين.........

رغم إني........

شاعر ومثقف ومهندس وحاجات كتير....

بس أنا عاشق للكارتون لحد النهاردة.........

ولا مؤاخذة أقدر أخش لأي عيل مناظرة حول أفلام الكارتون..........

بس عايزك تسألي إبن حضرتك..........

هوا شاف دراجون بول ولا لأ..........

[أسد]

السيناريو المتكرر ...

تجربتي تلخصت في التالي :

- ابني عنده تليفزيون في غرفته .. ولكنه موصول على البلاي استيشن و دي في دي .

أي أن كلها أشياء محددة المدة .. وشرائط الدي في دي والبلاي استيشن .. محفوظة بمعرفة أمه .. فلايمكن له أن يشغل أي منها إلا بعد طلب وموافقة.

- التليفزيون تم تحديد وقته بأوامر وتعليمات صارمة .. لا يتم كسرها أبداً تحت ي ظرف من الظروف. ولك أن تتخيل أن إبني من فرط شوقه لمشاهدة التليفزيون في بعض الأوقات .. يجلس بجواري ويتلذذ بمشاهدة الأخبار .. فقط لمجرد أنه يشاه التليفزيون.

- الكمبيوتر .. له أوقات محددة أيضاً .. ومن خلال برامج تعليمية فقط .. فلايوجد أي ألعاب على جهاز الكمبيوتر بمنزلي .. اللعب يكون على البلاي استيشن .. أما الكمبيوتر فهو للعمل والتعلم ..

- أسكن في مجمع سكني .. ولذلك توجد بعض الأنشطة الأخرى المسلية .. مثل السباحة .. وركوب الدراجة .. وأيضاً بدأت له برنامج لحفظ القرآن .. يأتي له شيخ في المنزل ليحفظه.

- هذا بالإضافة إلى الوقت المستنفذ في عمل الواجب المدرسي .. وبرنامج التعلم الذي تقوم به والدته معه.

- هناك برنامج إسمه UCMAS وهو برنامج لتنمية مهارات الطفل في الحساب والرياضيات .. عندما يبدأه الطفل صغيراً .. أعتقد أنه يساهم بشكل عبقري في تنمية قدراته الذهنية .. وإبني مشترك في هذا البرنامج منذ عام .. هو الآن عمره 6 سنوات .. وأرى نتيجة رائعة لهذا البرنامج. وبسبب هذا البرنامج فهناك وقت محدد يومياً لحل بعض المسائل والواجب ..

المهم في الأمر .. أن الطفل لديه وقت فاضي كبير .. يجب ملأه .. إذا لم نقم نحن بملأ هذا الوقت الفارغ بأشياء مفيده .. فهناك بديل فوري وجاهز ومباشر .. وهو التليفزيون ... في بداية أمري كنت سأدخل في تلك المعضلة .. ولكني وزوجتي أدركنا حجم المأساة المرتقبة . لذا قررنا شغل كل وقته وأكثر بأشياء نعتقد أنها مفيدة ..

حالياً أشفق عليه في بعض الأوقات .. لأن وقته مشغول جداً .. ولكنه أيضاً .. يضرب له حلقة باور رنجرز يومياً قبل النوم ... (فقط).. ويمكن يوم ا لخميس أن تمتد مشاهدته للتليفزيون ساعة إضافية تقريباً بعد حلقة باور رنجرز ...

هذه هي تجربتي .. ونصيحتي ..

[Handasah]

والله يا س س كأنك بتوصف الحاله نفسها في البيت عندنا

والله ياجماعة نفس الحالة بالظبط واضافة ليها حب الاعلانات ... والواحد فشل

الله يكرمك يااونكل مودييست تلحقنا بالحل زى سين سين وترحم اخوك من من ميكى وتوم جيرى .

[نانو]

- هناك برنامج إسمه UCMAS وهو برنامج لتنمية مهارات الطفل في الحساب والرياضيات .. عندما يبدأه الطفل صغيراً .. أعتقد أنه يساهم بشكل عبقري في تنمية قدراته الذهنية .. وإبني مشترك في هذا البرنامج منذ عام .. هو الآن عمره 6 سنوات .. وأرى نتيجة رائعة لهذا البرنامج. وبسبب هذا البرنامج فهناك وقت محدد يومياً لحل بعض المسائل والواجب ..

اخونا الكريم أسد ....ياريت لو فيه وعلومات إضافيه عن البرنامج ديه وهل هو سايت علي النت ويتم الاشتراك فيه ؟

لغايه اونكل موديست ما يجيبلنا البرنامج اللي حل مشكله عمر س س

تم تعديل 13 مايو 2007 بواسطة نانو

[nash]

اخي الكريم سي السيد

.................................

هي مرحله وستمر.....الصبر طيب...

كل ماتحدثت عنه كان يتم بالضبط وتقريبا بنفس التفاصيل....

المنع ليس حل أبدا....صدقني عن تجربه شخصيه...

إلي الأن يتم تظبيط المنبه علي كارتون الساعه الرابعه والنصف.....تخيل....الشباب علي أعتاب الجامعه وبيتابعوا الكارتون...عادي جدا....

ستأتي مرحله اخري بعد الكارتون....وستتبدل أهتمامتهم وتختلف......

لا أحبذ أبدا التدخل إلا فقط في مواعيد النوم والمذاكرة وبعد ذلك ليشاهدوا مايشاؤون...

هذه كانت طريقتي.....المهم ضبط الوقت وتوفيرة للمذاكرة والصلاة....

[Eemaan]

السلام عليكم جميعا

تسجيل متابعه و إهتمام بالتعرف على المزيد من التجارب.

نانو كتبت:

اخونا الكريم أسد ....ياريت لو فيه وعلومات إضافيه عن البرنامج ديه وهل هو سايت علي النت ويتم الاشتراك فيه ؟

ناس كتير بتشكر فيه...و يا ريت اخونا الفاضل أسد يحكلنا زياده عن تجربته...

اول مره سمعت عنه كان فى العاشره مساءا و عجبنى اوى ...كانوا مستضيفين ولاد و بنات يتراوح اعمارهم من 5 إلى 11 سنه على ما اتذكر... المهم كانوا بيقدروا يجمعوا عدد من الأرقام بدون أله حاسبه و بسرعه و دقه عاليه... لإن فكرته هى تدريب الطفل على استخدام مهاراته العقليه و تنميه سرعه بديهته و تركيزه...

شوفى كده يا نانو المواقع دى

ucmas

ucmasegypt

تحياتى

[Modest]

يعني لازم تفكّر أونكل موديست الحنون (أنا في الأول قرأتها المجنون ) بمحاولاته التربوية يا سين سين أفندي؟

أعترف باستخدام إبني الكبير كحقل تجارب لمدة لا بأس بها، و يرجع هذا إلى قلة أو انعدام خبرتنا أيامها ، ثم بدأنا أنا و زوجتي في تطبيق ما تعلمناه على أخويه.

كان عاشقاً للكرتون و خصوصاً على أيامُه نينجا تيرتلز و طبعاً توم و جيري ، و كان أيضاً عاشقاً لإعلانات التليفزيون بصورة مُبالغ فيها حتى أن زوجتي كانت تقوم بتسجيل الإعلانات و تشغيلها وقت الأكل لأنه كان يفتح فمه آلياً و هو منتبه للإعلانات و يوفر عليها مشقّة المُحايلة و "افتح بؤك علشان خاطر ماما" و "القطر داخل المحطة" و "هَم يا جمل" و باقي الجُمَل المأثورة ... حتى تنبهنا إلى هذا الخطأ مبكراً نوعاً ما و اتفقنا على عدم اتباع هذه الطرق السهلة مادام ضررها أكبر من نفعها على التكوين العقلي للولد ، و قمنا بتقنين مواعيد مشاهدة الكرتون و التليفزيون عموماً و تلى هذا الأمر تقنين استخدام الكمبيوتر في أمور التسلية ، مع الدفع - قدر استطاعتنا أثناء وجودنا في مصر و بقدر المتاح في الغربة - إلى قيامه بمجهود بدني لبعض الوقت.

ما سبق قمنا بتطبيقه على الولد الثاني (فارق 5 سنوات بينه و بين أخيه الأكبر) و بالطبع مع وقت منتظم لحفظ القرآن الكريم في البيت مع شيخ و هو صغير ثم بدأ في الذهاب للحفظ في مسجد قريب جداً من البيت و أعتقد أننا نجحنا إلى حد ما و الحمد لله.

إلى أن جاء الإبن الثالث (بينه و بين الأخ الأكبر 11 سنة) و الذي عوّدنا أن نفشل أمام نظراته و طريقة كلامه اللي تفطس من الضحك و أيضاً شقاوته و أعترف أننا تركنا له الحبل على الغارب نوعاً ما و أصبح مدللاً من الأسرة كلها و أعترف أيضاَ أننا لا نرفض له طلب و لكن حجّتنا إلى الآن أنه مازال صغيراً (5 سنوات) و ربنا يقدرنا و نربيه زي ما ربينا اخواته.

اتفقنا أنا و زوجتي على عدم وضع تليفزيونات موصلة بالدش في غُرف الأولاد و وضع فقط تليفزيون للبلاي ستيشن و قمنا بتنفيذ غرفة المعيشة لتكون مساحة مفتوحة بلا خصوصية حتى يكون هناك رقابة على ما يشاهدونه.

لا يخلوا الأمر أحياناً من الخروج عن القواعد التي وضعناها ولكن في النهاية خير الأمور الوسط و مادام في حدود المعقول فلا بأس أحياناً من التغاضي عن بعض القواعد لبعض الوقت لكسر الملل الناشيء عن اتباعهم لهذه القواعد.

و قبل ما أخلص هذه الوصلة المزعجة و أروح لحال سبيلي ، جبت لكم معايا الألبوم اللي قال عليه سين سين و فيه مجموعة مكونة من 900 صورة مختلفة لشخصيات ديزني للتلوين.

قمت بتقسيم المجموعة إلى 3 ملفات كل منهم يحتوي على 300 صورة حتى يسهل تحميلهم.

المجموعة الأولى

المجموعة الثانية

المجموعة الثالثة

أونكل موديست (عاشق توم و جيري ... و جوفي) :lol:

[se_ Elsyed]

شكراً لكل المتفاعلين

وشكراً لأصحاب الخبرة والتجربة على نصائحهم الغالية ( العُزاب يمتنعون ) :lol:

موديست بطل البخل اللي فيك ده وإنزل بورق الحائط وبعدين إدخل عالكرانيش ...

قِب يا موديست ببرامج التلوين اللي الواحد بيلاقي فيها فرشاة وجنبها ألوان .. وفي حاجات بتطلع له فيقعد يلونها وكده

ومساعدة مني

هانزل أنا بالبرنامج الأولاني وأدخل إنت عالتاني اللي هو ( Kids emagic coloring book )

اعزائي الأباء والامهات المُعذبين في الأرض

إليكم البرنامج الأولاني اللي هو تحفه من تحف أخونا موديست المج ... قصدي الحنون

Kids coloring Book 3 parties واللي يحبنا ما يضربش نار

أما الـ 900 صفحة اللي وضعهم موديست دول فحكاية من حكايات الزمن

شكراً موديست .. وشكراً سيريلاك

[نانو]

ايمان

الف شكر ليكي علي مساعدتك وانا فتحت الموقع وباحاول فيه ....بس الي انا فهمته انه مش اشتراك عن طريق النت زي ما كنت فاهمه لكن ديه زي مدرسه بيكون فيها حضور وللاسف مش موجوده في الكويت علي حد علمي

اونكل س س

البرنامج نزل بسهوله ويسر الحمد لله خصوصا إني خبيره قديمه في برامج الكومبيوتر

تسلم يا أونكل انت و أونكل موديست

اونكل موديست ال.....حنون :lol:

اللينك اللي محطوط مش بيفتح في اي مجموعه ولا الاولي ولا التانيه ولا التالته .....هل فيه مشكله ولا خبرتي الزايده في مجال الكومبيوتر هيا سبب العطل

[Folana]

السلام عليكم ورحمة الله......

ياولالالاد...ياووولاد....مافيش حاجة للاطفال فوق السبعين؟؟؟ :lol: :closedeyes:

[إبن مصر]

والنبى يا سى موديست يا اخويا

محدش عندياته حلقات...الليث الابيض؟؟

انا تاشتريت جرانديزر كامله ..

وكمان السندباد..

بس لو عندك دى يبقى ربنا يكرمك

يطعمك ما يحرمك

يكسيك ما يعريك

يسترك ما يفضحك

قادر يا كريم

[أسد]

اخونا الكريم أسد ....ياريت لو فيه وعلومات إضافيه عن البرنامج ديه وهل هو سايت علي النت ويتم الاشتراك فيه ؟

الموقع الخاص بالبرنامج هو الذي ذكرتة إيمان ..

وهو فعلاً برنامج دراسي يتم الذهاب إليه .. وإبني يذهب إلى أحد المعاهد الخاصة في الرياض .. يوم الخميس من كل أسبوع للدراسة في هذا البرنامج .. ويتم عمل إختبار تقييم كل 3 شهور .. ويعطى شهادة إجتياز في حالة نجاحة وينتقل إلى المستوى التالي .. إبني الآن لم يكمل السادسة وأشرف على الإنتهاء من المستوى الثاني بإذن الله .. وهو يستطيع إتمام عملية جمع وطرح لأكثر من رقم مكون من خانتين (أحاد وعشرات) بدون إستعمال أي أدوات (من الذاكرة) ويستطيع عمل تلك العمليات على أعداد أكبر باستخدام العداد الخاص بذلك.

من يقوم بتنظيم تلك الدورات هي إحدى السيدات موتعقد تلك الدورات في أحد المعاهد النسائية في الرياض .. حصة واحدة أسبوعياً لمدة ساعتين ... الشرح بالعربي .. والإنجليزي ...

أعتقد أيضاً أن المدرسة الهندية الواقعة على طريق خريص في الرياض بحي الروضة تنظم هذا البرنامج باللغة الإنجليزية فقط ...

[Handasah]

اخوتنا الاعزاء انكل مودييست وانكل سين سين

جزاكم الله خير عنا وعن الغلابة اللى زينا ربنا يجعلكوا دايما نصير للغلابة واللى طالع عينيهم مع العيال .., قادر ياكريم .

اية بقى حكاية البرنامج يوسى ماس دة حد عندة معلومات وافية عن الموضوع دة ..

[semsema]

عمو سين سين باشا و عمو موديست الطيب والحنون جدا جدا

ثانكس.. بالانجليش

ميغسي بوكو.. بالفرنسي

دومو.. بالياباني

جراتسيا.. بالايطالي او البرتغالي( مش متأكده )

وطبعا بالعربي شكرا

ولو كنت اعرفها بلغات العالم اجمع كنت كتبتها بس للاسف ثقافتي محدوده

وبجد .. بجد شكرا جزيلا على الكرم ده

اللينكات كلها فتحت معايا

مع السلامه عشان ابطال الديجيتال بدأت مش عايزه افوت ولا حلقه

[Ahmad Farahat]

السلام عليكم ورحمة الله......

ياولالالاد...ياووولاد....مافيش حاجة للاطفال فوق السبعين؟؟؟ :blink: :old: :vian:

إيه رأي حضرتك في بكار........

أعتقد ده لحد التسعين ينفع......