الباشمهندس ياسر

الهجرة الغير شرعية

قيم هذا الموضوع :

21 مشاركات في هذا الموضوع

مما تم مناقشته بالامس فى الاجتماع المبارك قضية الهجرة الغير شرعيه و تداعياتها و الفرصة البديلة

و رغم اننى كنت فى الجانب الذى يتحدث عن عدم توافر الفرصة البديلة بمعناها الحقيقى

الا اننى حينما بدأت فى مراجعة الايميلات الخاصة بى

فوجئت ببعض الاضافات للايميل الذى وضعته فى الصفحة الشخصية فى المحاورات

و كنت قد وضعت للرد على تساؤلات الاخوة او ما الى ذلك

المحصلة .. حتى لا اطيل عليكم..كانت هذا الحوار

الفتى الغامض uykjpp: السلام عليكم

life is nice: عليكم السلام

life is nice: اهلا بيك

life is nice: حضرتك عملتلى اضافة من غير ما تبعت رسالة معاها

life is nice: ممكن اتعرف بيك

الفتى الغامض uykjpp: والله أ ياسر كنت محاتاج أسافر أوكرانيا

الفتى الغامض uykjpp: محمد من مصر

life is nice: اهلا بيك يا استاذ محمد

life is nice: بس حضرتك تعرفنى منين؟؟

الفتى الغامض uykjpp: والله ممكن الاعلانات في سوق العرب والله أعلم أو أي موقع آخر

life is nice: اهلا بيك

life is nice: اؤمرنى

life is nice: ازاى اقدر اخدم حضرتك

الفتى الغامض uykjpp: الله يخليك

الفتى الغامض uykjpp: أن عااوز فيزا لأوكرانيا

الفتى الغامض uykjpp: الله يكرمك

life is nice: اشمعنى اوكرانيا اللى اخترتها

life is nice: رغم انها بلد ضعيفة

الفتى الغامض uykjpp: أنا عاوز أسافر لبريطانيا بصراحة

الفتى الغامض uykjpp: بس ترانزيت

life is nice: هو حضرتك مؤهلك ايه؟

الفتى الغامض uykjpp: محاسب

life is nice: تجارة انجليش ولا عربى؟

الفتى الغامض uykjpp: عربي

life is nice: و اخبار الانجليزى بتاعك ايه؟

الفتى الغامض uykjpp: تمام جيد

life is nice: و حضرتك ناوى تشتغل ايه هناك

الفتى الغامض uykjpp: والله مش ناوي أستقر

الفتى الغامض uykjpp: أنا أريد بريطانيا لو حضرتك تعرف تسفرني من مصر موافق

life is nice: بص يا استاذ محمد

الفتى الغامض uykjpp: معاك

life is nice: انت طلبت النصيحة او المشورة

life is nice: و رغم انى معرفش حضرتك

الفتى الغامض uykjpp: أيوه

life is nice: الا انى وافقت انى اتكلم معاك

الفتى الغامض uykjpp: تمام

الفتى الغامض uykjpp: تمام

life is nice: و الهدف من وراء ده انى هعتبرك زى اخويا الصغير.... اذا سمحتلى يعنى

life is nice: و نشوف الصح فين مع بعض

الفتى الغامض uykjpp: ده شرف لي

life is nice: الله يعزك

الفتى الغامض uykjpp: موافق

life is nice: فخليك معايا شوية

الفتى الغامض uykjpp: معاك يا أ ياسر

life is nice: دلوقتى انت راجل معاك بكالوريوس تجارة و بتتتكلم انجليزى كويس

الفتى الغامض uykjpp: تمام

life is nice: السؤال اللى بيفرض نفسه هنا

life is nice: انت هتروح انجلترا تشتغل ايه هناك؟

الفتى الغامض uykjpp: أيوه

الفتى الغامض uykjpp: بصراحة اي حاجة بس بشرط حلالل

الفتى الغامض uykjpp: أ ياسر حضرتك معايا؟

life is nice: انسى موضوع حلال و حرام ده

الفتى الغامض uykjpp: إزاي

life is nice: انت مش هتطلع بلاد الناس عشان تدور ع الكلام ده

life is nice: انت طالع تدور ع الدولار

life is nice: فخليك واقعى

الفتى الغامض uykjpp: معاك بس أكيد فيه

life is nice: طبعا بما انك راجل متعلم فانت فاهم ان فرصتك ان تشتغل بمؤهلك هناك

life is nice: فرصة معدومه

الفتى الغامض uykjpp: تمام

life is nice: جميييييييييييل

الفتى الغامض uykjpp: معاك

life is nice: يبقى حضرتك هتشتغل فى الاعمال اللى بيرفضها المواطن هناك و بيشتغلها المهاجريين الغير شرعيين بس

الفتى الغامض uykjpp: معاك

life is nice: او حتى المهاجريين الشرعيين بس بمؤهلات تعبااااااااااانه

الفتى الغامض uykjpp: تمام صح

life is nice: حضرتك ... سمعت عن الازمة العالمية

life is nice: و تداعياتها

life is nice: ولا معندكش فكرة

الفتى الغامض uykjpp: أيوه وتهجير العمالة

life is nice: بخلاف التهجيير

life is nice: انما المواطنيين اللى هما اصحاب البلد

الفتى الغامض uykjpp: مظاهراتهم تقصد

life is nice: بيتفصلوا م الشغل او بمعنى اخر بيتسرحوا

life is nice: لا مش المظاهرات

life is nice: انما الشركات بدات تسريح الناس

الفتى الغامض uykjpp: أيوه

life is nice: بسبب الازمة المالية

الفتى الغامض uykjpp: معاك تمام

life is nice: فيبقى بالمنطقى كده... الاسواق بره مش مستحملة اى حاجة دلوقتى ع الاقل

life is nice: مقتنع يا استاذ محمد؟

الفتى الغامض uykjpp: طيب أ ياسر أنا مقتنع بكلامك والله

الفتى الغامض uykjpp: بس فيه حل تاني

life is nice: اتفضل

الفتى الغامض uykjpp: بس فيه حل تاني؟

life is nice: ايه هو الحل التانى

الفتى الغامض uykjpp: اقصد يعني ده أفضل الوحشين

life is nice: انا فاهم ان حضرتك هتقولى...ولا انت بتسالنى

الفتى الغامض uykjpp: طيب حضرتك رأيك ايه ؟

life is nice: اه

life is nice: قصدك ايه هى الفرصة البديلة يعنى

life is nice: طيب

الفتى الغامض uykjpp: سؤال

life is nice: سؤال كمان

الفتى الغامض uykjpp: ايوه

life is nice: حضرتك مجهز اد ايه فلوس للسفر

life is nice: ؟

الفتى الغامض uykjpp: اتفضل

الفتى الغامض uykjpp: والله أنا كنت هدبر فلوس بريطانيا بس عن طريق السلف

الفتى الغامض uykjpp: يعنى

life is nice: كنت هتستلف كام يعنى

الفتى الغامض uykjpp: المبلغ المطلوب أو بصراحة احنا بنبيع أرض فكنت هأخذ جزء من الفلوس

الفتى الغامض uykjpp: علشان أسافر

life is nice: بص يا استاذ محمد

life is nice: المحصلة انك كنت هتتصرف فى حوالى 10 الاف دولار

life is nice: سواء بالسلف

life is nice: سواء بالبيع

الفتى الغامض uykjpp: تما م بس على فين

life is nice: سواء حتى انك تنط ع البنك و تجيبهم

life is nice: الفكرة اللى انا عايز اكلمك فيها

life is nice: انك ممكن تبدأ بالفلوس دى ف اى مشروع

life is nice: و تحافظ على نفسك

life is nice: من البهدلة و المرمطة ف البلاد الغريبة

life is nice: و بالذات فى الوقت اللى احنا فيه

الفتى الغامض uykjpp: معاك أخي الحبيب

life is nice: ده لو كان هدفك م السفر هو انك تزود دخلك بس مش اكتر

الفتى الغامض uykjpp: بس هو حضرتك من مصر

life is nice: و ده اللى انا حسيته

life is nice: ايوه

الفتى الغامض uykjpp: ظروف مصر صعبة

life is nice: مصرى

الفتى الغامض uykjpp: ظروف مصر صعبة

life is nice: مفيش بلد دلوقتى ظروفها مش صعبه

life is nice: انا عندى اصحاب ف كل حتة ف العالم

life is nice: و كلهم بيشتكوا

الفتى الغامض uykjpp: تمام

life is nice: الامارات... اللى مفيش حد اشتكى منها ابدا

life is nice: الناس قاعده ع وشك الانهيار

الفتى الغامض uykjpp: ازاي مع أناه دولة متضررة بدرجة كبيرة

life is nice: كندا ... اللى الخير بتاعها لسه محدش قاله انت فين ... فيها كمية تسريح عماله غير طبيعيه

الفتى الغامض uykjpp: صح أعرف ناس أصحابي رجعوا

life is nice: تمام يبقى انت فهمتنى كده

life is nice: اللى عاوز اقولهولك

الفتى الغامض uykjpp: معك

الفتى الغامض uykjpp: اتفضل

life is nice: ان الانسان اللى بيشتغل صح و يخطط صح و ياخد بالاسباب و يبعد عن اى حاجة فيها شكل او لبس

life is nice: لازم يوصل للى هو عاوزه

life is nice: انت مازلت شاب صغير زى ماهو واضح فى الصورة قدامى

life is nice: و عندك بدايات

الفتى الغامض uykjpp: الله يكرمك

life is nice: راس مال و لغة و كمبيوتر

الفتى الغامض uykjpp: تمام

life is nice: و يا سلاااااااام بقى لو عندك شوية اصرار

life is nice: صدقنى هتنجح و توصل للى انت عاوزه

الفتى الغامض uykjpp: الله المستعان

life is nice: انما يا ابنى حلة الاستسلام للسفر

life is nice: و السعى وراء الغنى الفاحش

life is nice: ده مش حل

life is nice: و مش صح

الفتى الغامض uykjpp: صح بس صعب على النفس دعواتك وهفكر في اللى حضرتك قلته

الفتى الغامض uykjpp: وجزاك اللله عنى خيرا

life is nice: بالتوفيق

دلوقتى افتكرت انى مستاذنتش الراجل انى انشر الحوار فكلمته و تم الحوار ده

uykjpp: مع السلامة

life is nice: استاذ محمد

الفتى الغامض uykjpp: معاك يا أ ياسر

life is nice: ممكن استاذنك انى اتناقش مع معارفى ف الحوار اللى دار بينا

life is nice: يعنى الهجرة غير الشرعيه

life is nice: الاسباب و الدوافع و الفرصة البديلة

life is nice: وكده يعنى

الفتى الغامض uykjpp: مين بالضبط

الفتى الغامض uykjpp: والله انت بتحرجنى بأدبك

life is nice: احنا عندنا منتدى

الفتى الغامض uykjpp: اسمه ايه

life is nice: و بنتناقش فيه عن اى حاجة بتهم البلد

life is nice: محاورات المصريين

الفتى الغامض uykjpp: تمام هدخل عليه

life is nice: انا هستاذنك

life is nice: لانى متعودتش انشر حوار تم بينى و بين حد من غير ما استاذنه

الفتى الغامض uykjpp: موافق

life is nice: شكرا

الفتى الغامض uykjpp: ربان ييسر الحال

الفتى الغامض uykjpp: ربنا

life is nice: هبقى ابعت لحضرتك اللينك بتاع الموضوع عشان تطلع عليه

الفتى الغامض uykjpp is typing a message.

الفتى الغامض uykjpp: ماشي يا ا ياسر

Last message received on 30/05 at 10:51 ص

شارك هذه المشاركه


رابط المشاركه
شارك

موضوع جميل كالعادة يا باشمهندس ياسر

موضوع الهجرة غير الشرعية موضوع مخيف فى مصر الغريب جدا ممكن يعرض نفسه للموت فى سبيل الهجره يعنى يروح يركب قارب علشان يهاجر عن طريق البحر وغالبا ما بتكون النتيجه ان يغرق او يتمسك

هل وصل الحال ببعض الشباب فى مصر انه عنده استعداد يخاطر بحياته فى سبيل انه يهاجر من مصر

مشكله فعلا تستحق النقاش فيها

شارك هذه المشاركه


رابط المشاركه
شارك
موضوع جميل كالعادة يا باشمهندس ياسر

موضوع الهجرة غير الشرعية موضوع مخيف فى مصر الغريب جدا ممكن يعرض نفسه للموت فى سبيل الهجره يعنى يروح يركب قارب علشان يهاجر عن طريق البحر وغالبا ما بتكون النتيجه ان يغرق او يتمسك

هل وصل الحال ببعض الشباب فى مصر انه عنده استعداد يخاطر بحياته فى سبيل انه يهاجر من مصر

مشكله فعلا تستحق النقاش فيها

استاذ شريف

انا فعلا استغربت جدا .. الموضوع اتطرح للنقاش امس فى الاجتماع بتاع محاورى القاهرة

و اصحى الصبح الاقى اخونا الصغير الاستاذ محمد عاملى اضافة و بيكلمنى ف الموضوع

حسيت اننا لازم نتكلم ف النقطة دى

لان اى جملة هنكتبها ممكن تفرق فى مصير انسان

انا كمان مرضيتش احط نقاط معينة للحوار ع اساس اننا نحاول نعالج كل الجوانب

و كل واحد يعالج الموضوع من زاوية مختلفة

فنوصل لشبه معالجة كاملة

شارك هذه المشاركه


رابط المشاركه
شارك

أولاً أحب أحييك يا باشمهندس على أدبك في الحوار واحترامك للأخر وأمانتك

أعتقد ان اللي وصلناله كشباب جوا مصر ده مش من شوية

الضغوط علينا بقت كتير قوي وكلنا مابقاش عنده صبر وعندنا قناعة انك لما تطلع بره مصر وبمجرد الخروج لأي بلد حتلاقي الجنة

وشكاير الفلوس

انا كنت واحد تفكيري هو ده خلصت الكلية والجيش وتفكيري ان السفر هو الحل

ولما سافرت عرفت ان تفكيري كان غلط

طبعاً الحمد لله على كل شيء بس صحابي اللي سبتهم في مصر وابتدوا نفس بدايتي ممكن اقول انهم دلوقتي في نفس المستوى اللي انا وصلتله

اسباب التفكير في السفر سواء شرعي او غير شرعي

- تكاليف الجواز وان معظم البنات دلوقتي مابقاش عندهم استعداد تبتدي خطوة خطوة

- الإحباط بوجه عام للمصريين والنصيحة المعهودة لو معاك قرشين ماتغامرش بيهم هنا

- الفساد الحكومي

- طباعنا اللي اتغيرت والأخلاق اللي بقت مش اللي هيا

- محاربة الناس اللي بتنجح

- التعليم التعبان اللي كلنا عانينا منه

- في حاجات كتير وأخرها وأهمها في رأيي عدم الإنتماء وعدم حب مصر

موضوعك ممتاز ويا رب نحط ايدنا على الحل

دعواتي لينا ولشبابنا اننا نتخطى المرحلة السودا اللي احنا فيها

شارك هذه المشاركه


رابط المشاركه
شارك

و الله يا جماعة موضوع جميل و يستحق النقاش

انا بصراحة مش عارف الناس اللى بتفكر فى الهجرة غير الشرعية دى بتعمل كده ليه ؟

اولا بيدفعوا فلوس كبيرة عشان السفر و طبعا بيغامروا بيها طيب طالما عرفت تلم قرشين ليه بقى متبدأش بيهم مشروع صغير او تدور على شغل كويس

ثانيا السفر الى المجهول , كل الناس اللى بتسافر غير شرعى مفيش عندهم شغل هناك و بعضهم معندوش مكان للأقامة ولا حد يعرفه طيب رايح تعنل ايه؟

ثالثا الواحد اما بيسافر سواء شرعى او غير شرعى بيكون يه اهداف من السفر

طيب واحد رايح هربان هتكون ايه اهدافه يعنى؟ لا شغلانه كويسه ولا دخل ثابت و لا جواز ولا اولاد ولا اى حاجه

السؤال الوقتى هوه الواحد اما بيبقى فى بلده بيبقى ليه كل الحقوق فى الشغل و التعليم و الزواج و كل حاجه و اما بيسافر غير شرعى مبيبقاش عنده اى حقوق لا فى شغل ولا تعليم ولا اى حاجه

فهل الحياه هربان و مطارد فى اوروبا افضل من الحياه و لك كل الصلاحيانفى مصر؟

العمليه تستاهل يعنى ؟

شارك هذه المشاركه


رابط المشاركه
شارك

أخى الفاضل الباشمهندس ياسر شكرا جزيلا على طرح هذا الموضوع ونبدأ بالتفكير العلمى للأسباب ومن ثم نبحث عن الحلول المقترحة

اسباب التفكير في السفر سواء شرعي او غير شرعي

1- تكاليف الجواز وان معظم البنات دلوقتي مابقاش عندهم استعداد تبتدي خطوة خطوة

2- الإحباط بوجه عام للمصريين والنصيحة المعهودة لو معاك قرشين ماتغامرش بيهم هنا

3- الفساد الحكومي

3- طباعنا اللي اتغيرت والأخلاق اللي بقت مش اللي هيا

4- محاربة الناس اللي بتنجح

5- التعليم التعبان اللي كلنا عانينا منه

6- في حاجات كتير وأخرها وأهمها في رأيي عدم الإنتماء وعدم حب مصر

اضافة الى ماسبق

7-نظام الضرائب

8-التطاولات الأمنية وعدم تطبيق أو مراعاة القوانين من قبل رجال الشرطة وعدم احترام أدمية الأنسان

9-انتشار المحسوبية فى القطاعين العام والخاص وعليه اضاعة الفرصة على صاحب الحق

10-ارتفاع مستوى المعيشة وانخفاض مستوى الدخل وارتفاع معدل التضخم

11-فقدان الثقة فى النظام وأيضا فقدان الثقة فى رجال الأعمال بعد ماظهرت نواياهم وصرعاتهم على الكراسى من اجل حصد الأموال على حساب الفقراء

12-عدم وجود ديموقراطية حقيقية

شارك هذه المشاركه


رابط المشاركه
شارك

خلينا واقعيين العشرين ثلاثين الف الي هيدفعهم الواحد عشان يهاجر هجرة غير شرعيه وهيجمعهم بطلوع الضرس دول .. فين المشروع المضمون في مصر الي ممكن تشغل فيه ( مبلغ تافه) زي ده ويجيب لك ايراد يعيشك عيشة ( الآدميين )

محدش يقولي المشاريع في مصر كتير والفرص كتير بس الناس الي كسالى .. واضح ومشاهد ان اي حد بيسافر برا بيطحن الصخر طحن عشان يجيب فلوس وكلنا بنتعلق في طاحونه الله اعلم هتقف امتى عشان بس نجيب تكاليف المعيشه ( المحترمه ) الي تليق بينا كناس ( ولاد ناس ) .

واختلف مع الاخ الجدار في ان احد مسببات الهجرة هو طلبات البنات ( الي مبتخلصش) .. لو على الطلبات كانت هانت لان في ناس كتير اوي اهلهم يقدروا يتكفلوا بمصاريف زواجهم لكن ميقدروش يتكفلوا بمصاريف ( فتح البيت ) ... للاسف الرواتب في مصر لا تفتح بيت ده اذا فرضنا وجود الراتب اساسا .. الناس في مصر بتشترط في بدايه الزواج شراء اثاث واجهزه وخلافه لانهم عارفين ان الي مش هيجي دلوقت عمره ماهييجي .. لان الي جاي بالظبط على قد الي رايح ويادوب بتقضى ..

السبب الرئيسي للهجرة الغير شرعيه هي العيشه غير الشرعيه الي اجبرنا كمصريين اننا نعيشها في بلدنا الي مش معترفه بوجودنا اصلا .. دول الخليج بتقول ارفع راسك انت خليجي حتى لو مكانتش الراس دي تستاهل الرفع .. عندنا العكس وطي راسك انت مصري حتى لو كانت الراس دي لازم تنباس ..

مش هقول غير كلمه حكمه سمعتها على لسان احد ( المواطنين ) المصريين في برنامج كان بيتكلم في نفس الموضوع ..

سألوه ليه الناس بتسافر بطرق غير شرعيه على مراكب وخلافه مع ان ممكن تموت في الطريق قبل ماتوصل

قال احنا بنسافر ونقول اهو ان مت وسعت لاخويه .. وان عشت وسعت على العيلة كلها ..

وعلى راي اخونا شريف .. خلص الكلام ..

شارك هذه المشاركه


رابط المشاركه
شارك

طبعا لو حبينا نستعرض المشاكل التى تدفع الشباب فى مصر للهجرة سواء الشريعة او غير الشرعية سنجد الكثير الكثير

فى اعتقادى ان الشباب الباحث عن الهجرة غير الشريعة يخطط انه ربما مع الوقت فى بلاد المهجر تحدث تسويه اوضاع وتتحول اقامته لاقامه شرعية يحدث هذا فى بعض الاحيان لكنه قد يستغرق 10 سنوات مثلا وعليه ان يعيش فى هذه الفترة فى ظروف سيئه ويقبل باى وضع واى وظيفه

ولكن الغريب فعلا ان بعض حالات هذه الهجرة تكون اشبه بالانتحار كلنا نسمع كل فترة عن شباب غرقوا فى البحر بسبب الهجرة غير الشريعة وهذا فعلا ما يشعرنى بألم هل وصل الحال ان يفضل البعض الموت عن البقاء فى مصر

يا اخوانى هذا مؤشر خطير جدا جدا على مستقبل اى بلد

هذا بالاضافة للمؤشرات الخطيرة التى تقول ان حوالى 80% من المصريين راغبين فى الهجرة خارج مصر الموضوع ده خطير جدا جدا على مستقبل مصر

الحقيقة مش عارف اعلق على هذا الموضوع باى كلمات غير ...

ربنا يصلح الحال .... (أمين)

شارك هذه المشاركه


رابط المشاركه
شارك
أخى الفاضل الباشمهندس ياسر شكرا جزيلا على طرح هذا الموضوع ونبدأ بالتفكير العلمى للأسباب ومن ثم نبحث عن الحلول المقترحة
اسباب التفكير في السفر سواء شرعي او غير شرعي

1- تكاليف الجواز وان معظم البنات دلوقتي مابقاش عندهم استعداد تبتدي خطوة خطوة

2- الإحباط بوجه عام للمصريين والنصيحة المعهودة لو معاك قرشين ماتغامرش بيهم هنا

3- الفساد الحكومي

3- طباعنا اللي اتغيرت والأخلاق اللي بقت مش اللي هيا

4- محاربة الناس اللي بتنجح

5- التعليم التعبان اللي كلنا عانينا منه

6- في حاجات كتير وأخرها وأهمها في رأيي عدم الإنتماء وعدم حب مصر

اضافة الى ماسبق

7-نظام الضرائب

8-التطاولات الأمنية وعدم تطبيق أو مراعاة القوانين من قبل رجال الشرطة وعدم احترام أدمية الأنسان

9-انتشار المحسوبية فى القطاعين العام والخاص وعليه اضاعة الفرصة على صاحب الحق

10-ارتفاع مستوى المعيشة وانخفاض مستوى الدخل وارتفاع معدل التضخم

11-فقدان الثقة فى النظام وأيضا فقدان الثقة فى رجال الأعمال بعد ماظهرت نواياهم وصرعاتهم على الكراسى من اجل حصد الأموال على حساب الفقراء

12-عدم وجود ديموقراطية حقيقية

انا شايف فى كل النقط تقريبا اللى حضراتكم قلتوها احباط و فشل و ظلم

امال فين الناس اللى بتسافر تحضر ماجستير و دكتوراه

و الناس اللى بتسافر تشتغل فى شركات اجنبية و جامعات

و الناس اللى معاها فلوس بتفتح مشاريع بره و لا هما اللى بيسافروا على طوول كفشانين ؟ :roseop:

انا شايف ان السفر ده يعتبر اكمال لمشوار نجاح يعنى المفروض الواحد يكون ناجح فى بلده و بعدين يفكر فى سفر او هجره و يستكمل المشوار هناك

يعنى واحد مش لاقى شغل فى مصر و معاهوش فلوس و لا عارف يتجوز ولا عارف يعمل اى حاجه فاكر نفسه هيروح ايطاليا يسوى البدع

اللى معرفش يشتغل فى مصر اكيد مش هيعرف يشتغل لا فى ايطاليا ولا اليونان ولا فى اى حته

ولا ايه رأيكم؟

شارك هذه المشاركه


رابط المشاركه
شارك

اولا انا بشكر كل الاخوة و الاخوات ع مداخلاتهم الكريمة

لكن تعالوا نجيب السؤال من اوله

يعنى ايه حيااااااااااااااااااااة

عايز اعرف تصورنا كمجموعه من المصريين لمعنى كلمة حياة

امتى الواحد فينا يقدر يقول ... انا عندى حياة

اظن اننا لو اتفقنا و لو ف خط عريض على معنى كلمة حياة ...ممكن نجيب حل جذرى للازمة دى كلها

ايه رايكم ف المدخل ده؟

شارك هذه المشاركه


رابط المشاركه
شارك

انا قابلت واحد مصرى فى هولندا

الراجل ده اتجوز واحدة من سورينام"على ورق " علشان الاقامة .. واللى اتزوجها اصلا مصاحبة واحد دوتش وخلفت منه

طبعا اللى اطفل اتسمى باسم الشاب المصرى

المصيبة ان الاخ المصرى ده مبسوط جدا وبيقول انهم كده مش هيعرفو يخرجوه من هولندا لان عنده طفل

تخيلو الناس وصلت لدرجة ايه!!!!!!!!!!!!!

شارك هذه المشاركه


رابط المشاركه
شارك

احسنت يا باشمهندس في اختيار نقطة البدء ...

و في نفس الأطار حتي يكون الموضوع شامل تجد اراء اعضاء آخرين هنا :

عن الهجرة اتكلم

و هنا :

موسم الهجرة - الغير شرعية - إلى الشمال

شارك هذه المشاركه


رابط المشاركه
شارك
انا قابلت واحد مصرى فى هولندا

الراجل ده اتجوز واحدة من سورينام"على ورق " علشان الاقامة .. واللى اتزوجها اصلا مصاحبة واحد دوتش وخلفت منه

طبعا اللى اطفل اتسمى باسم الشاب المصرى

المصيبة ان الاخ المصرى ده مبسوط جدا وبيقول انهم كده مش هيعرفو يخرجوه من هولندا لان عنده طفل

تخيلو الناس وصلت لدرجة ايه!!!!!!!!!!!!!

اولا الكائن ده ... لا هو راجل ولا هو اخ

ده تيس .... حاشاكم ... و مع الاعتذار للتيس طبعا

لما بقعد اتناقش مع حد فى ان الهجرة مشوار خطر جدا

بقوله ان الطباع بتتسرق ... بمعنى انك بتخسر طباعك من غير ما تحس

و كل ما يبقى عندك استعداد نفسى اكتر فانت بتخسر اكتر

و اسمحلى استخدم المداخلة دى فى معنى كلمة حيااااااااااة

شارك هذه المشاركه


رابط المشاركه
شارك
احسنت يا باشمهندس في اختيار نقطة البدء ...

و في نفس الأطار حتي يكون الموضوع شامل تجد اراء اعضاء آخرين هنا :

عن الهجرة اتكلم

و هنا :

موسم الهجرة - الغير شرعية - إلى الشمال

الفاضل سكوب

راجعت الموضوعات سالفة الذكر و وجدتها تتعامل مع القضية فى معظم نقاطها

و ان كنت اريد ان نناقشها فى اخر ما توصلنا اليه و هو تعرف مصطلح الحياة

و انى ف انتظار مشاركات الاخوة الافاضل

شارك هذه المشاركه


رابط المشاركه
شارك

طب علشان منديش الموضوع رغم اهميته حيز من التفكير اكبر من حجمه .. رغم انه فعلا يستاهل حجم كبير

عايز اقول كلمتين

كلمة حياة بتفرق من واحد للتانى

و كل واحد عنده اولويات و عنده مبادىء لا يتم التنازل عنها او حتى المساس بيها

م الاخر

اللى بيفهم و بيعرف يفكر استحالة يرمى نفسه ف البحر و يقول اوسع لغيرى و الكلام الغريب ده

اللى بيعرف يعيش حياته بيعر ف يستمتع مهما كان الوضع

و بيبدأ يخطط لتحسين الوضع طبقا للتجارب و الخبرات الحياتيه

اللى مش لاقى شغل يبطل كسل و نوم جنب الست الوالده ف البيت و يطلع للدنيا

قسما بالله العظيم بتكلم مع و الدى على سواق عنده رخصة تالته و مش عايز عنده اى خبره

بيقولى مش هتلاقى باقل من الف جنيه ف الشهر

بقوله انا عايز سواق حديث لسه مطلع الرخصة و اخره دبلوووووم و انا هعمله الدورات بتاعت السيفتى درايف و الليلة دى كلها

يقولى برده مش اقل من الف جنيه

قلتله ليه هو ايه اللى حصل يعنى

الملالايين اللى ملهاش اول من اخر دى و مش لاقيه شغل راحت فين

قالى قاعدين ف البيت ومش هيشتغلوا الا باليوميات الغالية دى و ان كان عاجبك كمان

ده بخلاف انى لو قلتلكم الارقام اللى وصلتلها يوميات الصنايعية و المساعدين بتوعهم فى كار المقاولات

يمكن تقولوا ياسر بيهييس علينا

معادلة بقت غريبة جدا

الصنايعية كفائتهم و انتاجيتهم عماله تقل عن الاول ... حتى اخلاقهم و الله مبقتش زى زمان

و معدلات ارتفاع اجورهم عاليه .... عارف ان معدلات التضخم وارتفاع الاسعار اعلى برده ... بس ده مش موضوعنا دلوقتى

المحصلة

ان الناس اللى بتروح ترمكى نفسها فى جهنم الزرقاء دى

لازم تتعلم من اول و جديد اختراع اسمه القناعة

لازم يسمعوا عن حاجة اسمها الرضا

لازم يعرفوا يحلموا بس قبل ما يحلموا ... يفوقوا و يعرفوا هل الحلم قابل للتنفيذ ولا لأ

سورى للنبرة الشديدة ف الكلام

بس فعلا الوضع غريب لدرجة تخنق

تم تعديل بواسطة الباشمهندس ياسر

شارك هذه المشاركه


رابط المشاركه
شارك
انا قابلت واحد مصرى فى هولندا

الراجل ده اتجوز واحدة من سورينام"على ورق " علشان الاقامة .. واللى اتزوجها اصلا مصاحبة واحد دوتش وخلفت منه

طبعا اللى اطفل اتسمى باسم الشاب المصرى

المصيبة ان الاخ المصرى ده مبسوط جدا وبيقول انهم كده مش هيعرفو يخرجوه من هولندا لان عنده طفل

تخيلو الناس وصلت لدرجة ايه!!!!!!!!!!!!!

اولا الكائن ده ... لا هو راجل ولا هو اخ

ده تيس .... حاشاكم ... و مع الاعتذار للتيس طبعا

لما بقعد اتناقش مع حد فى ان الهجرة مشوار خطر جدا

بقوله ان الطباع بتتسرق ... بمعنى انك بتخسر طباعك من غير ما تحس

و كل ما يبقى عندك استعداد نفسى اكتر فانت بتخسر اكتر

و اسمحلى استخدم المداخلة دى فى معنى كلمة حيااااااااااة

و الله يا باشمهندس انا ليه راى تانى

الذى يحدث مع الكائن السابق ليس هو المرض بل هو اعراض المرض وليس هذا هو العرض الةحيد الذى ظهر جليا فى الشخصية المصرية والتغيرات الواضحة جدا والخطيرة جدا التى طرأت على الشخصية المصرية وعلى المجتمع المصرى

الذين يرمون بأنفسهم فى البحر طمعا فى الهجرة الى اوربا ليست الظاهرة الوحيدة اكيد حضرتك والاخوه هنا سمعتم عن الذيم هاجروا الى اسرائيل وطلبوا الحصول على الجنسية الاسرائيلية ايضا ولو شاهتم برنامج الحقيقة لادركتم حجم الكارثة والكثير من المظاهر التى اصبحت منتشرة فى مجتمعنا وهى مؤشرات خطيره جدا على تغييرات جوهرية فى الشخصية المصرية

وفى الحقيقة انا من راى ان كل هذه الظواهر هى اعراض لمرض خطير وهو انعدام الانتماء للوطن وهذا مرض خطير ويمكن ان يصبح مميتا لأى بلد وحضارة تصاب به

طبعا هذا لا يعفى القائم باى عمل خطأ او عامل شائن بالمسؤلية عن اعماله ولكن فقط يجب ان يكون التركيز عما ادى به الى القيام بهذا العمل

يا اخوانى التغيرات فى سلوكيات المجتمع المصرى خلال الخمسين عام الاخيرة فى منتهى الخطورة

اخشى ان ياتى اليوم الذى اذا تعرضت فيه مصر للاعتداء من اى قوى محتله ان لا تجد من لديهم الانتماء الكافى ليموتوا فى سبيل هذا الوطن

تم تعديل بواسطة sherifhfm

شارك هذه المشاركه


رابط المشاركه
شارك

اولا السلام عليكم ورحمة الله وبركاته

بالنسبه لموضوع الانتماء فده جزء كبير اقوى يقع على الحكومه اللى تقريبا شالت ايدها من كل حاجه الا حاجه واحده بس انها تقرف الناس وعلشان تعمل حاجه تبقى مشكله لازم تاخد الف ختم ومعرفش كام دمغه ............ ياجماعه المفروض ان اللى يدور على الناس دى ويتابع الظاهره الغريبه دى الدوله والاعلام بدل ما احنا شغالين نفسنا بمعرفش مين هيعمل ايه الماتش اللى جاى والفيلم فلانى الفلانى جاب كام ؟؟ نشوف الناس دى بتعمل كده ليه ؟؟؟

ياجماعه احنا المفروض نشوف الدافع ورا الهجره ايه يعنى لما تلاقى واحد وحيد وعنده كذا اخت بنت وعاوز يجوزهم وعاوز يتجوز هو كمان طيب والوضع فى مصر بيزداد سوء عن سوء كل يوم يبقى هيعمل ايه الراجل ده

فبيقول اهو حاجه من الاتنين اهاجر ياما صابت وفرجت او اما مش صابت ومت وتبقى ارتحت من الدنيا

يعنى من الاخر مش نلوم على الشباب بس لا لازم نلوم على حكومتنا الرشيده اللى مخلينا فى كل حته فى العالم :D

يعنى انا بستغرب ليه الدوله مش بتحاول تشوف الظاهره دى سببها ايه وتحلها ولا هى عاوزنا كده نرمى نفسنا فى البحر

دى كده وجهة نظر الشباب اللى بيهاجر هجره غير شرعيه

نيجى بقى للجانب الدينى

اولا الانتحار حرام فانت لما تروح ترمى نفسك فى البحر وتقولى لصابت لخابت ده اسمه انتحار وهروب من الحياه وطبعا الحياه اللى ربنا وهبها ليك مش ملكك علشان تتحكم فيها زى ما انت عاوز

انا اتعرض عليا هجره زى دى واحد صاحبى بيسافر لبيا وعارف واحد هناك بيسّفر بالطرق دى

واقلى لو عاوز تروح اقولته انا اساسا معترض على الهجره الشرعيه اذا كان انا هنا والواحد مش سالك وربنا يسامحنا ابقى اروح هناك "" طبعاً ده رأى شخصى ليا ""

لا ياعم انا اقعد هنا اعافر وهحاول واكيد ربنا هيكرمنى وان مش كرمنى فى الدنيا اكيد ربنا هيعوضه ليا فى الاخره

مهو ياجماعه فيه حاجه اسمها الاحتساب يعنى الواحد يحتسب اى حاجه تصيبه عند ربنا وان شاء الله ربنا هيعوضه خير

يعنى م الاخر الشباب اللى بيهاجروا بالطريقه دى دول اكيد طبعا والله اعلم الواعظ الدينى بتاعهم تعبان او ميعرفوش مدى خطورة الموضوع وان لو مات مش هيرتاح زى ماهو فاكر لا ده هيبقى انتحار مش موت

لذالك من الواجب علينا وطبعا على الدوله وبما اننا اولادها وهما ماسكننا بقالهم معرفش كام انا وعيت على الدنيا لقيت الناس دى انهم يوعوا الشباب دول وياخدوا بيدهم ويشوفوا حل للموضوع ده

وياريت برضه الشباب اللى بتفكر التفكير ده تعرف انها فى الاول والاخر دنيا يعنى مش بتدوم واحتسب عند ربنا وان شاء الله ربنا هيكرمك

سواء فى الدنيا او فى الاخره

وحسب الله ونعم الوكيل فى كل مسؤل عن الخراب والفساد اللى احنا فيه

شارك هذه المشاركه


رابط المشاركه
شارك

من كام اسبوع فوجئت ان احد معارفي بيجيب تأشيرة اتحاد اوروبي بمبلغ 80 الف جنيه بعد ما يعمل شوية ورق

لطالب الفيزا .. فسألته و اخبار الزباين معاك ايه .. قاللي بالهبل لدرجة اني بأخرهم بالكام شهر كمان

الشباب اللي دفع المبالغ دي رايح فين و هيعمل ايه هناك

زمان كنا بنقول العيب ف الحكومة و شلة الحزب الوطني

للدرجادي فقدنا الامل تماما

شارك هذه المشاركه


رابط المشاركه
شارك

من كام اسبوع فوجئت ان احد معارفي بيجيب تأشيرة اتحاد اوروبي بمبلغ 80 الف جنيه بعد ما يعمل شوية ورق

لطالب الفيزا .. فسألته و اخبار الزباين معاك ايه .. قاللي بالهبل لدرجة اني بأخرهم بالكام شهر كمان

الشباب اللي دفع المبالغ دي رايح فين و هيعمل ايه هناك

زمان كنا بنقول العيب ف الحكومة و شلة الحزب الوطني

للدرجادي فقدنا الامل تماما

ينوبك ثواب يا باشمهندس ياسر

ياريت تفتح موضوع في باب الهجرة و تقول لنا على تفاصيل الحصول على الفيزا دي

جعلها الله في ميزان حسناتك

شارك هذه المشاركه


رابط المشاركه
شارك

من كام اسبوع فوجئت ان احد معارفي بيجيب تأشيرة اتحاد اوروبي بمبلغ 80 الف جنيه بعد ما يعمل شوية ورق

لطالب الفيزا .. فسألته و اخبار الزباين معاك ايه .. قاللي بالهبل لدرجة اني بأخرهم بالكام شهر كمان

الشباب اللي دفع المبالغ دي رايح فين و هيعمل ايه هناك

زمان كنا بنقول العيب ف الحكومة و شلة الحزب الوطني

للدرجادي فقدنا الامل تماما

كالمستجير من الرمضاء بالنار

شارك هذه المشاركه


رابط المشاركه
شارك

انشئ حساب جديد او قم بتسجيل دخولك لتتمكن من اضافه تعليق جديد

يجب ان تكون عضوا لدينا لتتمكن من التعليق

انشئ حساب جديد

سجل حسابك الجديد لدينا في الموقع بمنتهي السهوله .


سجل حساب جديد

تسجيل دخول

هل تمتلك حساب بالفعل ؟ سجل دخولك من هنا.


سجل دخولك الان