عادل أبوزيد

عشق المصريين للمانجو

قيم هذا الموضوع :

79 مشاركات في هذا الموضوع

لسنوات طويلة و أنا أسمع القصص من أصدقائى عن عشقهم الشديد للمانجو و مغامراتهم للحصول على أحسن الأنواع و كيف كانوا فى صباهم يستطيعون تمييز رائحة المانجو المخبأة فى المنزل خلف سبع حوائط.

و كنت أصدق تلك الأساطير و أعود باللائمة على والدى الذين لم ينشئونا نشأة "منجاوية "

و لا يعنى ذلك أنى لاأعرف المانجو أو لم أتذوقها و لكن علاقتى بها علاقة حيادية جايز فى الموسم كله أتعاطى ما يقرب من دستة عصير مانجو و ربما متلهم من ثمار المانجو التى يقسم الفكهانى إنها من أحسن نوع.

أما عن المصطلحات "المنجاوية" مثل سنارة و هندى و الفونس الخ قائمة الشرف المنجاوية فلا أعرف منها شيئا !! صحيح أستطيع أن أميز نداء بائعى المانجو " عظيييييييمة يا مانجة" بل أننى قدمت تفسيرا لمن سألنى ما الذى جعل "المانجة" عظيمة ؟ و هو أغلى الفاكهة سعرا و أعلم أن التفسير قد لا يكون لائقا أو صحيحا علميا.

أشعر أنى أطلت بعض الشئ !!

فى هذا العام و فى الأجازة التى تورطت فيها هذا العام استدرجتنا الأحاديث مع الأهل و تم فتح موضوع المانجو و بكل شجاعة ذكرت أنى لا أفهم فى المانجو !!! و يبدو أنى أثرت شفقة أقاربى و معارفى و إذا بى أتلقى فى الثلاث أيام التالية ثلاث صناديق من المانجو و كل من هؤلاء أصحاب الهدايا يشفع هديته بكورس نظرى عن النوع الذى فى الصندوق و مزاياه و حلاوته الخ الخ

نسيت أن أقول أن حرمنا المصون كانت فى " نص هدومها من هذه الهدايا ... يقولوا علينا ايه ؟"

المهم قلت لحرمنا المصون فلنجعل أجازتنا هذه معسكر للتدريب على المانجو حتى أعالج مركب النقص الذى بدأت أشعر به

نسيت أن أقول لكم أنى يوم عند الفكهانى الذى فى مدينة الحمام سألته عن المانجو فبدأ يقول لى القائمة الكريمة من أسماء المانجو و رأف بحالى و أعطانى حبة مانجو لأتذوقها فى المنزل و أعود و أشترى منه يبدو أنه لاحظ جهلى الشديد !!! و أصر الرجل أ يبيعنى " ولو نص كيلو فص عويس" و هذا نوع من المانجو فى حجم البلحة و ثمنه خمسة و عشرون جنيها الكيلو

المهم يا سادة قضيت أياما أتذوق أنا و حرمنا المصون صناديق المانجو الثلاث و نحاول الخروج منها بنظرية معينة عن مواصفات أحسن مانجو الخلاصة أننا فشلنا بالكامل ووجدنا أنه من الصعوبة بمكان التوصل الى حلاوة و جمال ثمرة المانجو قبل أن تكون فعليا فى فمك بل أننا توصلنا الى أن كل القصص و الأساطير التى تروى عن المانجو من الأصدقاء و الأقارب ما هى الا " هلاوس منجاوية"

و لكن للحقيقة و التاريخ ما يطلق عليه "فص عويس" يمثل معجزة منجاوية بكل معنى الكلمة.

للسادة المنسقين لكم كل الحرية فى نقل الموضوع الى أى مكان

شارك هذه المشاركه


رابط المشاركه
شارك

أنا كنت هناااااااااااك فى باب الأسرة لكن أول ما شميت ريحة المانجة جيت جرىىىىىىىىىىى و قلت ألحق أخد لى حبة. الله يسامحك يا أستاذ عادل بقى ده احنا متحرمة علينا المانجة السنة دى بسبب ان أغلب البيت عنده حصوات فى الكلى منها!!!!!!!!!!! لكن ده برضو ميمنعش انه و "داونى بالتى كانت هى الداء"

وش واحدة" شمامة" مانجة و وش تانى مستغرب ازاى فى حد ممكن ميدمنهاش!!!.

شارك هذه المشاركه


رابط المشاركه
شارك

الحمد لله انا افتكرت انني الوحيده اللي معرفش اسماء المانجو وكنت اعتقد ان هذا العيب نتج من انني تركت مصر قبل ان اتحمل مسئولية شراء اي اطعمه او فاكهه ولكني احبها جدا

انا اشجع الطعم الحلو واعرف المنجو فقط بالحجم او الون اما اصفر او اخضر بس الحقيقه او مره اسمع عن "فص عويس" سواء الاسم او الوصف اللي حضرتك وصفته منك نستفيد

شارك هذه المشاركه


رابط المشاركه
شارك

الأخ الفاضل عادل ابوزيد

ارجو ان تتقبل دعابتي التالية بصدر رحب وهي:

ان من الأشياء التي عجبتني فعلاً في هذه المقاله هو انها قد تعد المقاله الوحيده - على قدر علمي- والتي لم تستخدم فيها كلمة آليات.

خد بالك انا بضحك بس معاك واوعى تزعل.

اما عن تعليقي عن المانجه وبصفتي مواطن مصري فهو :

يعني إيه مانجه؟؟؟؟

تحياتي

(واحد عمال يتخيل شكل المانجه)

شارك هذه المشاركه


رابط المشاركه
شارك

و انا كمان .. وانا كمان يا أستاذ عادل باموت في المنجة.. و اسمحولي بقي بما أني دارس المانجولوجيا..

تاريخيآ :موطنها الأصلي جنوب شرق آسيا..

اصل كلمة مانجو : " مان كاي" و هو أسمها في لغة التاميل بالهند

البرتغال هما اللي نقلوها في الأول لأفريقيا ثم لجنوب أمريكا

قيمة غذائية : غنية بفيتامين A و b و C و السكر الطبيعي و البروتينات و أحماض الماليك و الستريك والدهون و المعادن

الناحية الطبية : علاج ممتاز لبعض حالات النزيف الدموي الداخلي.. و علاج بعض أمراض الأذن.. و يصنع منها شراب لعلاج ضربة الشمس.. و من نواتها تستخدم بعض المستخلصات كقاتل و طارد للديدان.

أشجار المانجو : خشب شجرة المانجو من الأخشاب القوية علشان كده بيصنعوا منه الشبابيك و الأبواب لشدة تحمله.. كذلك القوارب و الأعمدة. ..و من لحاءه يستخرج أحد أنواع الصمغ..

أنواع المانجو : الفونس.. مبروكة.. عويسي.. مستكاوي.. مسك.. كبانية..زبدة... تيمور...هندي سنارة...قلب التور... محمودي.. أرومانسي..دبشة.. باير.. رقبة الوزة.. ملجوبا.. لونج... دول اللي فاكرهم بس فيه ييجي 20 نوع تاني عالأقل... و كل نوع تميز بنكهة خاصة به..

يااله بعد كل المعلومات دي حد يباصيلي مانجاية ربنا يخليكم.. أحسن المدام خلصت علي كل الذخيرة اللي كنت جايبها معايا من مصر.. ما فاضلش غير نص أزازة عصير أقطع دراعي أن ما خلصت عليها الليلة دي بحجة أنها عطشانة و هتروح تشرب ميه من التلاجة.. بس علي مين.. أنا لابدلها في الدرة.. قصدي في مغسلة الأطباق..

سلامي لكل مدمني المانجة... أصل أنا كنت بحب المشمش.. دلوقتي بادوب في المانجة.. يا مانجة.. مانجةةةةةةةةةةةةةةةةةة

شارك هذه المشاركه


رابط المشاركه
شارك

ممممممممم كل دهه كلام جميل جدا لكن ممكن حد يفسرلى ليه المانجا بتنقلب بقدرة قادر الى اسمنت بعد اكلها !!!!!!!

وش واحد بيفكر 100 مرة قبل ماياكل مانجا

شارك هذه المشاركه


رابط المشاركه
شارك

ياريت نغير إسم التوبيك ده إلى " إعترافات مانجاوية " وأنا أول واحد هاعترف إني مدمن مانجا ومن الأخر مش ناوي أتعالج ... ومع توافر المانجا فى السعودية إلا انها سبحان الله ماتجيش حاجة جنب المنجا المصري التي تجمع ما بين الحلاوه والمزازاة ، فالمانجا هنا هندي ، باكستاني أو يمني وهي أما شديدة الحلاوة لدرجة تجزع النفس أو كلها ألياف زي السوداني وبجد تحس ان أنت بتأكل ليفة إستحمام ..

ومابصدق أنزل مصر لألعب دور البطل في فيلم " عودة المنتقم " وهاتك يا أكل مانجا حتى الثمالة ...

وللعلم فانا لا اعترف بالمنجا كعصير ببساطة لأنه متوافره فى كل مكان ... اما هوايتي الأولى والأخيرة هو إني أمسك المانجايا صحيحة وأهبرها وبيبقى شكلي عامل زي الأنسان الحجري الأول ..

و مابتفرقش معايا الأنواع يعني تيمور عويس زبدية أم عبده أي حاجة بتقع فى أيدي بأنسفها .

المرة دي رجعت ومعايا كرتونة تحتوي على 15 ك مانجا زبدية علشان بتستحمل السفر والركنه فى التلاجه وبعون له جبت اجلها فى أقل من أسبوع . وعلى فكره الواحد لازم يقول الحقيقة أن بشكل عام المنجا سعرها مناسب جداً فى مصر فالزبدية دي نوع كويس جداً وسعره 4 ج للكيلو .

والملاحظ خلال سفره إلى دول الخليج ان الخليجيين انفسهم بيرجعوا محمليين كمية مانجا معاهم وكأنهم هايغذوا الخليج كله .. لأننا للأسف لا نرى المانجا المصرية هنا إلا نادراً وذلك يرجع لوجود خلافات إقتصادية وسياسية مع مصر.

شارك هذه المشاركه


رابط المشاركه
شارك
لسنوات طويلة  و أنا أسمع القصص من أصدقائى عن عشقهم الشديد للمانجو  و مغامراتهم للحصول على أحسن الأنواع  و كيف كانوا فى صباهم يستطيعون تمييز رائحة المانجو المخبأة فى المنزل خلف سبع حوائط.

 

أما عن المصطلحات "المنجاوية" مثل سنارة و هندى و الفونس  الخ قائمة الشرف المنجاوية فلا أعرف منها شيئا !! 

أشعر أنى أطلت بعض الشئ  !!

فى هذا العام و فى الأجازة التى تورطت فيها هذا العام  استدرجتنا الأحاديث مع الأهل و تم فتح موضوع المانجو  و بكل شجاعة ذكرت أنى لا أفهم  فى المانجو !!!   

و أصر الرجل أن يبيعنى " ولو نص كيلو فص عويس"  و هذا نوع من المانجو فى حجم البلحة  و ثمنه خمسة و عشرون جنيها الكيلو

بل أننا توصلنا الى أن كل القصص و الأساطير التى تروى عن المانجو من الأصدقاء و الأقارب ما هى الا  " هلاوس منجاوية"

و لكن للحقيقة و التاريخ ما يطلق عليه "فص عويس" يمثل معجزة منجاوية بكل معنى الكلمة.

حقيقى يا أستاذ عادل .. إنت غيرت فكرتى عندك تماما .. واتضح لى إنك باختيار هذا الموضوع عذبت الكثيرين وانا منهم .. إنت تستمتع " بالفص العويسى " واحنا هنا نشم على بعد .. ألذ واطعم انواع المانجو هى الفص سواءا هندى او عويسى أو حتى بيض العجل .. وتراه شكلا لا يشجع على دفع شلن بالكيلو .. وللعارفين ممكن يستغنى عن كل اللى فى جيبه .. وقد تعرفت عليه فى نهاية 73 فى منطقة قنال السويس ,, والحمد لله يومها كان معايا المان بس والسواق .. ووقفنا جنب واحد بتاع فاكهة ناكل بطيخ وآخذ كام كيلو منجة .. واغدقنا على الراجل فأخذى على جنب وقال خد الشوال ده وادعيلى .. وهات جنيهين بس .. واستغربت شوال منجة بجنيهين ؟؟ وبصيت لقيت حبات خشنة صغيرة مش باين لها لون .. وامام اصرارة اخذت الشوال وفى نيتى ارميه بعد ذلك حتى لا يشعر الرجل بحرج .. عرضت على السواق يآخد شوية رفض .. فأخذت انا واحدة وقلت أجرب قبل ما ارمى الشوال .. وبعد ما أكلتها .. تصورت أنى حاضرب بالنار اللى ييجى جنب الشوال .. وفى العام الماضى وبعد توصية متواصلة .. اتحفنى الراجل بتاع الفاكهة بجوار المنزل فى مصر بأثنين كيلو أخذ فيهم 38 جنيه بالعافية ..

واعتقد .. إننا حنسمع قريبا عن أنواع جديدة .. لونها أسود غطيس .. إسمها المقترح كما سمعت " منجة عبيدى " نسبة الى مستوردها الرئيسى " المعلم عبيد " وهى منجة سودانى أكتشفها اثناء رحلة السفارى منذ بضعة شهور الى السودان .. ووقع يومها عقد إحتكار لها يعنى هو المستورد الوحيد .. للمنجة السودانى السودة .. لأنه غاوى كله حاجة سودة .. لدرجة أنه خلا حياتنا سودة ..

وأسأل الله له الفشل فى تجارته .. قولوا معايا أمين

اخناتون المنيا

شارك هذه المشاركه


رابط المشاركه
شارك

بصراحه بكل صراحه يا عمى اخناتون انت شخصية اتمنى التحدث معها ولقاءها

متعك و ادام الله عليك الصحة والعافية

اضحكتنى على موضوع المانجو السودا خاصة ان المانجو فى المانيا غالية ولا يوجد اللون الاسود منها فهى احتكار مصرى كما قلت

شارك هذه المشاركه


رابط المشاركه
شارك

بسم الله الرحمن الرحيم

السلام عليكم ورحمة الله وبركاته

منجه و ثلاث اقفاص ......الرحمه يارب.....وحضرتك جاي تقولنا بعد ما كلتهم كلهم .....علي العموم بالهناء و الشفا.....بس لعلمك المانجايه الواحده متوسطه الحجم بالنسبه للمانجايه المصري بتتباع هنا السوبرماركات بسعر 2 دولار للواحده ....و في بعض الأحيان في التخفيضات ....تباع بدولار و نصف .....

لأن الأمريكان نسبه قليله منهم بتأكل المانجو.....اما في المطاعم الهنديه بعضها يقدم المانجو مخلله.....مانجو مخلله .....مضاف عليها بعض التوابل الهنديه و الحق يقال طعمها لذيذ جدا خصوصا مع الطعام الهندي الحار المشطشط.... اللي يخللي الواحد بعد الأكل ....يطلب واحد تمر هندي يطفي النار اللي أكلها....

شارك هذه المشاركه


رابط المشاركه
شارك

انتباااااااااااااااااه.

جميع الضباط وصف الضباط يجمعوا فورا فى ارض الطابور مع كل مدرسه الصاعقه..

انا عايز اعرف مين فيكم الى عمل غاره على مزارع المنجه الى فى انشاص؟؟؟؟؟الناس هاتتجنن منكم وبتشتكى واقسموا يضبوا نار المره الجايه

كان هذا هو المعتاد من سياده العقيد مدير مدرسه الصاعقه بانشاص كل يومين ..

كننا مجننينه .. كلنا طلبه وضباط وعساكر .كنا نقوم بعمليات اغاره منظمه فى الليل ..تقولش رامبو وكان فيها تسلق اسوار وتستر بالظلام وتخفى وتسلق كله من اجل المنجا

ونعد مع بعض المصايب الى كنا بنعملها من اجل المانجه:

1- هروب من وحده عسكره

2- سطو على مزارع الغير

3- التعرض لاطلاق النار من الغفرا..

ويكفى ان من ذكرياتى اننا كنا بناكلها من على الشجر وكتير اضرب نار علينا بجد..

وتعرف ان الصاعقه كانت هنا بعد ما تلاقى شجر المانجه وبقاياها على الارض زى ما يكون هجوم جراد..

بس حد يسألنا بناكل ايه النوع اقولك معرفش وعموما يا سى السيد انا بكتب الان وامامى تقريبا قفص منجه اتسلى فيه علشانك يا غالى ..

هأوووو

ابن مصر

شارك هذه المشاركه


رابط المشاركه
شارك
بصراحه بكل صراحه يا عمى اخناتون      انت شخصية اتمنى التحدث معها ولقاءها 

متعك و ادام الله عليك الصحة والعافية

اضحكتنى على موضوع المانجو السودا    خاصة ان المانجو فى المانيا 

غالية ولا يوجد اللون الاسود منها فهى احتكار مصرى كما قلت

أهلا بك ياعزيزى .. وعندما انزل مصر سأتصل بك برسالة خاصة ونلتقى بس هات معاك 2 كيلو مانجو { مش عبيدى } لأتعرف عليك ..

مع تحياتى

اخناتون

شارك هذه المشاركه


رابط المشاركه
شارك
وللعلم فانا لا اعترف بالمنجا كعصير ببساطة لأنه متوافره فى كل مكان ... اما هوايتي الأولى والأخيرة هو إني أمسك المانجايا صحيحة وأهبرها وبيبقى شكلي عامل زي الأنسان الحجري الأول ..

ده شعورى بس بالنسبه للقصب .. انا احب جدا امص قصب وماحبش اشربه عصير ماعرفش ليه .. وطبعا لانى باخجل اشترى قصب صحيح باضغط على ماما تشترى لى قصب لو لقيت حد بيبعه على عربيه و اقعد فى البيت امص قصب فى منتهى المتعه و الانشكاح ..

انا اول مره اعرف ان المانجه فى مصر شئ و بره مصر شئ تانى .. والله العظيم من حوالى ساعتين بس ماما بتقول لى تاكلى مانجه ولا بطيخ وانا اقول لها بتناكه لا بلاش مانجه عاوزه بطيخ اصل زهقت من المانجه ارحمونا منها بقى !! عفوا يا جماعه انا والله ما كنت اعرف ان المانجه فى مصر متميزه كده .. حقيقى عمار يا مانجه .. قصدى عمار يا مصر :)

وعندما انزل مصر سأتصل بك برسالة خاصة ونلتقى بس هات معاك 2 كيلو مانجو { مش عبيدى } لأتعرف عليك ..

طيب ماينفعش عودين قصب على قد ما قسم؟ icon_redface.gif

شارك هذه المشاركه


رابط المشاركه
شارك
وعندما انزل مصر سأتصل بك برسالة خاصة ونلتقى بس هات معاك 2 كيلو مانجو { مش عبيدى } لأتعرف عليك ..

طيب ماينفعش عودين قصب على قد ما قسم؟ icon_redface.gif

والله يا فيروزة المنتدى .. إذا لم يكن فى الإمكان .. فلامانع من عودين قصب بالزعازيع .. ومعاهم طقم إسنان .. لتعويض ما سوف يقع ..

شارك هذه المشاركه


رابط المشاركه
شارك
والله يا فيروزة المنتدى .. إذا لم يكن فى الإمكان .. فلامانع من عودين قصب بالزعازيع .. ومعاهم طقم إسنان .. لتعويض ما سوف يقع ..

لو هو ده المطلوب لنتشرف بلقاء حضرتك يبقى غالى و الطلب رخيص icon_lol.gif

شارك هذه المشاركه


رابط المشاركه
شارك

خلاص .. وانا حاتفق مع دكتور اسنان اجيبة معايا كطبيب مرافق .. ونعرض القصب الأول على لجنة وزارة السياحة إياها .. مين عارف يمكن يتضح أن تاريخ الصلاحية مضروب .. وهريدى بتاع القصب غشكم كالمعتاد ..آهو برضه الواحد يحرس ..

شارك هذه المشاركه


رابط المشاركه
شارك

لا مش هنجيبو قصب من بتاع هريدى icon_lol.gif

هنستوردوه من بره ان شاء الله icon_cool.gif اصل ده مش قصب لاى حد يعنى عشان ناكلوك قصب محلى يا اخناتون المنيا icon_smile.gif

شارك هذه المشاركه


رابط المشاركه
شارك

السلام عليكم

المنجه هنا فى امريكا تباع بالواحده كما تفضل الاخ KWA

ووضح وهى تباع فى نيو يورك ونيوجرسى ب دولار او

دولار ونصف فى بعض الاماكن. و احسن منجه فهى موجوده

عند محلات الجماعه الهنود. اما القصب فحاول احد المصريين ان

يبيعه كعصير و فعلا اشترى ماكينه العصير ولكن المشروع

فشل, وبخصوص عيدان القصب فيمكنك شراوْها من عند محلات الجماعه الاسبان ( اهل امريكا الجنوبيه) ويمكنك ايضا شربه كعصير لكنهم بيملوا الكبايه بالثلج فتجد العصير خفيف ومش ولابد.

لكن الحاجه الحلوه انهم عندهم الجوافه الحيه ( الثمره مش

العصير ) فى موسمها وهى غير موجوده فى اى مكان الا عند الاسبان . فامريكا بها كل شئ عدا الجوافه وام الخلول الصغيره المصريه مش الجندوفلى وانا كييف ام الخلول اموت فيها

وواحد قال لى ممكن الاقي ام الخلول عند بياعين السمك الروس وذهبت عندهم ولم اجدها واقترح اخر انى ساْجدها عند الجماعه الصينيين فى منطقه اسمها تشاينا تاون فذهبت الى هناك ولم اجدها وفى النهايه وجدت محل سمك مصرى قال لى انا عندى والدسته بدولار اخبرنى عايز اد ايه واعطينى اسبوع او عشره ايام على

الاقل.( اعتقد حايجيبها من مصر) ..

وبالمناسبه عند الجماعه الاسبان يوجد عصير اسمه بالاسبانى

(سناوْريا) وتنطق هكذا..SANA'ORIA وهو عباره عن عصير جزر

وعليه عصير برتقال وبيحطوا عليه لبن

بالرغم انى عارف ان اللبن يقطع مع عصير البرتقال ولكنهم يفعلونه كذلك

وقليل جدا من السكر بس بصراحه طعمه حلو. فبعد ان ذقته وعجبنى

قررت ان اعزم صديق مصرى على العصير اياه و ذهبت تانى يوم

وشربت كبايه ( او كوز ممكن تقول لانها كبيره) وبعد يومين مريت

بالصدفه فطلبت كوزا وفى اثناء اعداده فى الخلاط اقتربت منى السيده التى تعده

مبتسمه متسائله بخباثة: هممممممم اكيد انت عريس جديد صح ؟ ؟؟؟؟؟؟

ولم اذهب تانى عندهم ...........

شارك هذه المشاركه


رابط المشاركه
شارك

أبن مصر كتب

وعموما يا سى السيد انا بكتب الان وامامى تقريبا قفص منجه اتسلى فيه علشانك يا غالى ..

هأوووو

ابن مصر

ماش ماشي ... طب أيه رأيك إني هاخد عربيتي الهوندا السيفيك الأوتوماتيك موديل 98 ( واخدلي بالك ) وانزل أدور فى السعودية كلها على أجدعها مانجا مصري ولو هادفع فيها مرتبي كله .

وبعدين أيه النهم ده كله هاتتسلى بقفص أومال لو عوزت تاكل هاتعمل أيه ؟!!!!! يأخي حس بأخواتك المحروميين فى الصومال وجزر القمر وشبرا البلد.

شارك هذه المشاركه


رابط المشاركه
شارك

اهيه رئيك انا وقفت معاملة توصيل كهرباء لشركة في منطقة الصمان شمال الرياض لان المهندس بتاعهم وهو باكستاني قال لي ان الناجو البكستاني افضل من المانجو المصري

وفضل المشروع واقف لغاية لما صاحب الشركة اضطر يشتري عشر صناديق عصير مانجو (قها) وامر كل عمال الشركة بشربها واعطائهم رئيه فيها ولما اطمئنيت انهم اجمعو ان المانجو المصرية طلعت افضل من المانجو الباكستاني مضيت على الطلب فورا بالتنفيذ

اما علشان خاطر بن العم عادل انا امرت فورا تخصيص عشر فدادين لزراعتها شجر مانجو من الموسم الجاي

شارك هذه المشاركه


رابط المشاركه
شارك

يجب ان يتم الموافقه علي هذا المحتوي قبل نشره.

زوار
انت تقوم بالتعليق كزائر. اذا كنت تمتلك حساب فقم بتسجيل الدخول تسجيل دخول.
اضف رد علي هذا الموضوع....

×   You have pasted content with formatting.   Remove formatting

  Only 75 emoticons maximum are allowed.

×   Your link has been automatically embedded.   Display as a link instead

×   Your previous content has been restored.   Clear editor