ذكريات الطفولة .. صوت وصورة !!

[badroora]

يااااااااااااااه شوفت الحاجات الاثرية دي اللى بتتكلموا عليها حببتونى فى الزمن بتاعكم :happy:

بجد بجد يا بختكم انتم زمنكم كان زمن البركة وكل شيء جميل .

مافيش حد من جيلي هنا ؟!!!!!!!!!!

طب حد فاكر M&MS :ninja:

بجد بجد باحسدكم على ايامكم الجميلة دي

:blink:

تم تعديل 14 أبريل 2008 بواسطة Badria Mekkawy

[om marawan]

M & M'S !!!!!!!!!!!!!!!!!!

بقا بنقولك دوم وحرنكش اكياس طرشى تقولى ام اند امز

طب حد يقول حاجة ياجماعة ولا بأقول نبعتها على المحكمة والقاضى يقول رأيه

[حشيش]

طيب مين فيكم يعرف صورة إيه دى ؟ ... وكانت كمان ساعات بتتباع بره المدرسة bv:-

[nash]

دوده القز

هات عشرة دينار بحريني

[حشيش]

دوده القز

هات عشرة دينار بحريني

برافو يانااااااااااااااااش bv:- ... مع إنى معرفتش ولا مرة أطلع منها خيط حرير واحد وكانت بتضحك عليا وتاكل ورق التوت كله ... مشيها عشرة جنيه مصرى النوبة دى :blink:

[!! Lidooooo !!]

طب فاكرين أعلان كريم الحلاقه؟؟ بتاع....هي دي اربع اساب؟؟

اسم الكريم انجرام...هاا حد فاكر؟؟

لا طبعا أعلان التلات أسباب اللي بقوا أربعة مش بتاع انجرام ده بتاع معجون حلاقة بالموليف

وإليكم النص الأصلي الكامل

أنا أسمي كامل

بس دقني طويلة قوي

علشان كده غيرت لبالموليف

رغوة بالموليف الرهيبة بتديني

واحد حلاقة ناعمة

أتنين حلاقة سريعة

و أحساس بانتعاش غرييييييييييييييب

هما دول التلات أسباب اللي ,,,,,

وبعد ظهور الصاروخ mfb: قصدي الفتاه التى تقترب لتقف بجانبه يتضح أن كل ما قيل سابقا غير كافي

لذلك يضيف سريعا

أربع أسباب bv:-

:)

المغامرين الخمسه؟؟

بطوله ..محب ولوزة ونوسه وعاطف وتختخ والمفتش سامي

نسيتي الكلب بتاع تختخ .. كان اسمه زنجر :P

الشياطين ال13

والقائد زيرو

وطبعا البطل أحمد من مصر

على فكرة مؤلف السلسلة دي محمود سالم صديقي وجاري .. ربنا يديله طولة العمر

فاكرين مجله ( لاكي لوك )؟؟

:blink: :blink: :wub:

[nash]

لا ....لااااااااااااااااااااااااااااااااا

ده كتير قوي بجد.......

الرساله الطائرة؟؟؟ وزنجر......اللي دايما كان ينقذ تختخ اللي ساكن في المعادي.....لاااااااااا

سؤال شخصي نعلش فضول بأة...

هي مامتك ماكانتش بتقولك ياريت تحفظ النشيد زي مانت حافظ الإعلانات كده؟؟

اظن بأة كلنا أتقالنا الكلمه دي .....محدش ينكر....ومحدش يداري وشه في القصه المحطوطه جوة كتاب المذاكرة.....

.................................................................

فاركين مقدمه البرنامج المزأطط...بتاع****** مش فاكرة برضه...

غمض عنيك وامشي بخفه ودلع...

الدنيا هي الشابه وانت الجدع...

تشوف رشاقه خطوتك تعبدك...

لكن أنت لوبصيت لرجليك تقع...

ولا أعرف مين كان بيقولها اصلا ....

..........................................................

فاكرين طبعا عالم الحيوان اللي كان بييجي يوم الجمعه ...كنت بكرهه ... كان لازم نتفرج عليه بالغصب..قال يعني كده بنزود معلمواتنا

.........................................................

[سهران]

فاركين مقدمه البرنامج المزأطط...بتاع****** مش فاكرة برضه...

غمض عنيك وامشي بخفه ودلع...

الدنيا هي الشابه وانت الجدع...

تشوف رشاقه خطوتك تعبدك...

لكن أنت لوبصيت لرجليك تقع...

ولا أعرف مين كان بيقولها اصلا ....

أيناس جوهر و ضحكتها الجميلة .......... برنامج تسالـــــــــــــــــــي

حد ينسى يا أم ياسر الأيام دي .... و كمان برنامج سمار الليالي ..........................................................

فاكرين طبعا عالم الحيوان اللي كان بييجي يوم الجمعه ...كنت بكرهه ... كان لازم نتفرج عليه بالغصب..قال يعني كده بنزود معلمواتنا

.........................................................

[!! Lidooooo !!]

برنامج تسالي الساعة 3 ونص على اذاعة الشرق الاوسط

حسني غنيم

محي محمود

و...

bv:- إيناس جوهر

[nash]

ماشاء الله يافرحه قلبي بيكم.... bv:-

بجد عتاوله....

هو الحقيقه برنامج ايناس جوهر...كانت علي أيام ابو ياسر....يعني أنا حفظتها منه...

وييجي عند كلمه ( تعبدك) ويقول الكلمه دي فيها قولان...وبعد الديباجه يقول وأنا اقول وراه لحد ماحفظتها...

.............................................................

فاكرين....برنامج ( حياتي) برضه مش فاكرة أسم المذيعه بس كانت شعرها ناعم وتقريبا اسمها فايزة حاجه....

.............................................................

فاكرين أعلان العربيه الدودج الميتسوبيشي...؟؟

واحد أتنين تلاته كالوري كالرويتا ...صقفولي صقفه وانا أنط النطه....

........................................................

فاكرين تراب القمر......اللي بيقعد يطرقع لما بناكله ويعمل دوشه؟؟

وعشقي الدائم العرق سوس الملفوف علي بعضه....والحمدلله ربنا أكرمني وشوفت صورته...

.........................................................................

تم تعديل 15 أبريل 2008 بواسطة nash

[!! Lidooooo !!]

بمناسبة الراديو :P

قرآن السادسة من اذاعة القرآن الكريم .. وبعدين الاخبار في اذاعة لندن mfb:

اكاد اجزم ان أغلبنا كان بيصحي على ياصباح الخير ياللى معانا في الشرق الاوسط

وبعدين دعاء محمد ثروت الساعة 7 الا خمسة : يااااااااا ربي الملك ياربي الملك والحمد لك

باصبح عليك (ايناس جوهر)

تساااااااالى bv:-

شبّيك لبّيك

يوميات امرأه عصريه

دروس تعليم الفرنسية

تحت العشرين :)

ومحكمة الفن يا حلاوتها صدرت احكامها الغنائية:blink:

كل اللى فاتوا دول كانوا في الشرق الاوسط

في البرنامج العام بأة

أخبار خفيفه

الى ربات البيوت

غنوه و حدّوته بتاع ابلة فضيلة

كلمتين و بس (فؤاد المهندس)

وحاجة تانية مش فاكر اسمها لصفية المهندس

وهمسة عتاب

واغرب القضايا بموسيقتها المرعبة:wub:

قال الفيلسوف :old: (بنيتي)

لو كنت مكانى

من الحياه

وذكريات من زمن فات :blink:

[!! Lidooooo !!]

:blink: اعصابكو جامدة؟؟

mfb:

كنا بنلعبه مع القرايب والجيران ع السلم :wub:

وكان قلبك يقع في رجليك لما تقف في محكمة bv:- ..

تسحب فيقوللك اليوم عيد ميلادك

فتفرح :blink: فيقوللك ادفع لكل لاعب 100 جنيه :)

تروح قالب اللعبة وقايم

[shawshank]

باصبح عليك (ايناس جوهر)

تساااااااالى

شبّيك لبّيك

يوميات امرأه عصريه

دروس تعليم الفرنسية

تحت العشرين :blink:

ومحكمة الفن يا حلاوتها صدرت احكامها الغنائيةbv:-

فونتاستيكــــــــــــــــا

وعمو حســـن (حسن شمس)

تم تعديل 15 أبريل 2008 بواسطة shawshank

[shawshank]

فاكرين....برنامج ( حياتي) برضه مش فاكرة أسم المذيعه بس كانت شعرها ناعم وتقريبا اسمها فايزة حاجه....

واصــــــــــــــــف

كان اسمها فايزة واصف

[إيزيس]

وعشقي الدائم العرق سوس الملفوف علي بعضه....والحمدلله ربنا أكرمني وشوفت صورته...

تصدقي أنا كنت باموت فيه و لحد دلوقتي لما نروح سيتي سنتر بابعت العيال يجيبوا لي بس السعر مختلف شويتين

كان في برنامج مذيعة بتقرأ شعر بالليل مش فاكرة إسمه.. كنت باكرهه موت باحس المذيعة روحها هتطلع بعد شوية

برنامج فايق زغلول برنامج مسابقات يوم الجمعة كمان مش فاكرة اسمه

فاكرين دعاء الفجر بتاع علي الحجار أيام المذاكرة الجامدة آخر السنة؟؟

أيام ذكرى عبد الحليم كل سنة يقولوا نفس الكلام وبردة نقعد نعيط و نعيط

مين فاكر همسة عتاب بحب الموسيقى بتاعته جدا

[إيزيس]

زي مانتوا شايفين ذاكرتي جامدة جدا لكب فاكرة كلمة اللي هيعرف كانت في إيه له عندي واحد آيس كريم من اللي ناش فضحتني عليه

مورش بالية يورشو

فكروا

[shawshank]

كان في برنامج مذيعة بتقرأ شعر بالليل مش فاكرة إسمه.. كنت باكرهه موت باحس المذيعة روحها هتطلع بعد شوية

أوتار الليل ؟

وكان فيه "قطرات الندى" الصبح على الراديو ... لو سمعت البرنامج ده دلوقت هيجيلي مغص عشان كان وقته قبل ماروح المدرسة كنت باكل سندوتش الفطار غصب عني عشان ماليش نفس أصلاً أفطر .

برنامج فايق زغلول برنامج مسابقات يوم الجمعة كمان مش فاكرة اسمه

مسرح المنوعات

فاكرين دعاء الفجر بتاع علي الحجار أيام المذاكرة الجامدة آخر السنة؟؟

معرفوش ده . أنا أعرف صلينا الفجر فين صلينا في الحسين .

تم تعديل 15 أبريل 2008 بواسطة shawshank

[أسد]

:blink: اعصابكو جامدة؟؟

mfb:

كنا بنلعبه مع القرايب والجيران ع السلم :wub:

وكان قلبك يقع في رجليك لما تقف في محكمة bv:- ..

تسحب فيقوللك اليوم عيد ميلادك

فتفرح :blink: فيقوللك ادفع لكل لاعب 100 جنيه :)

تروح قالب اللعبة وقايم

كان زمان اسمه

بنك السعادة ..

باتكلم على السبعينيات ..

وهو النسخة العربية للعبة أجنبية

اسمها

مونوبولي

[se_ Elsyed]

غمض عنيك وامشي بخفه ودلع...

الدنيا هي الشابه وانت الجدع...

تشوف رشاقه خطوتك تعبدك...

لكن أنت لوبصيت لرجليك تقع...

ولا أعرف مين كان بيقولها اصلا ....

دي من رباعيات العملاق صلاح جاهين يا أم ياسر

--------------

فاكرين طبعا عالم الحيوان اللي كان بييجي يوم الجمعه ...كنت بكرهه ... كان لازم نتفرج عليه بالغصب..قال يعني كده بنزود معلمواتنا

بيقدمه محمود سلطان ... وشيل يا بني الإيريال من فوق الزريبة الحيوانات مليت البيت

-------------

إيناس جوهر

عارف يا ليدو إن كل بتوع الإذاعة كنت بأقعد وانا صغير أرسم في خيالات خيالاتي المتخيلة صور لهم :

1- أبله فظيله .................. دايماً كنت أحس إنها ست حنينه وشكلها حلو واموره زي مامتشي ..... لكن يا بني عينك ما تشوف الا النور .... إتصدمت لما شوفتها وعرفت إنها يمكن عدت السعينات فخلاص معالم الشيخوخة ظهرت عليها ( أعتقد ربنا يديها طولة العمر لسه عايشة ... صح ؟ )

2- علي فايق زغلول والغلط فين .................. كنت بقى لي سنين بأسمعه ومتعلق ببرنامجه .... وطبعاً الصدام الامامي عندي إتخبط لما شوفته في الجامعة عندنا وهو بيسجل برنامج من بتوعه ....... الله يرحمه .... كان شُكمان في صورة إنسان وأثناء الساعتين التلاتة بتوع التصوير دخن ييجي خرطوشة سجاير لما نفخ المدرج كله .. وكان مبهدل في لبسه بهدله .. ما هي إذاعة بقى و ماحدش شايف حاجه .

3- إيناس جوهر ..... صوتها يدل على إنها ست روشة وستايل ..... دي بقى الصدام الخلفي عندي هو اللي إتصدم ... دبدوبه التخينه ... شكلها نسيت نفسها وفضلت تاكل محشي لحد ما كرفت على ميادة الحناوي ..

---------------

اكاد اجزم ان أغلبنا كان بيصحي على ياصباح الخير ياللى معانا في الشرق الاوسط

الصحيان وغسيل الوش ما يكملش إلا بـــ " ماشي في نور الله .. بأدعي وأقول يارب "

------------------------

دروس تعليم الفرنسية

لو فغانسي آوسيه

----------------

وهمسة عتاب

تخيل إن الموسيقى الكئيبة بتاعتها بقت نغمة موبيل ومنتشرة اليومين دول ... اعتقد إنها مقدمة أغنية فرنسية قديمة ..

مين فاكر همسة عتاب بحب الموسيقى بتاعته جدا

عايزه النغمة بتاعته أبعتهالك وأقعدي حبي فيها براحتك ؟

سبحان الله ... لولا إختلاف الأذواق .. لبارات النغمات

----------------------

[!! Lidooooo !!]

طب تخيل فعلا يابو السيد

انها بقت قاعدة

قاعدة العلاقة العكسية بين الصوت والصورة bv:-

القايمة طويلة من اول صفية المهندس مرورا بآمال فهمي وكثيرين

بس العجيب يا اخي انها اصوات لا يمر عليها الزمن

تحبها وترتبط بيها حتى لو ايه

زي عمك عبحليم كدة

كان بيموت

وصوته احلى م الأول

تم تعديل 15 أبريل 2008 بواسطة !! Lidooooo !!