اذهب إلى المحتوى
محاورات المصريين

أميبـا فــي بيتــي الأخيرة


shahd

Recommended Posts

اميبا في بيتي

المكان:تجويف الأمعاء الدقيقة

انتاميبا والعائلة المصونة

(الأم) يلا يا بت انتي وهيا خلينا نلقط رزقنا

( البنت الكبيرة) ايوة يامامي حاكم اليومين دول بيغسلوا كل حاجة كويس والشغل شاحح

( البنت الصغيرة) الا صحيح يا اوختشي عرق النظافة ده طلعلهم منين عجبت لك يازمن

تقف الأنتاميبا الأم فاردة طولها ومادة بوزها شبرين

شاحح ايه وبتاع ايه يا خايبة الرجا منك ليها .. انتميبات اخر زمن

مصمصة شفايف ونظرة اعتراض

البنت الكبيرة : جرى ايه يامامي هو السؤال حرم

دي حتى تانتو اسكارس اتحايلت عليا عشان اشتغل معاها وانا قلت نوو نوو امبوسيل لامومكن ابدااااا ده الي مالوش خير في مامي انتاميبا مالوش خير في تانتو اسكارس

البنت الصغيرة: وانا برضه يا اوختشي عمتو بلهارسيا طلبت مني ابعتلها الــ CV بتاعي بس انا رفضت ياااااااي دي عايشة في الترعه موش من مستوايا

الأم: اسم الله على مقامك يابرنسيسة .... تقولش هوانم جاردن سيتي ؟؟!! اجري يا مفعوصة انت وهيا ورانا شغل

البنتين ياخدو ديلهم في سنانهم ويافكيك

البنت الصغيرة: هيا مامي مالها بقت نيرفز

البنت الكبيرة: انا عارفة تلاقيه حكم السن يا اوختى

البنت الصغيرة: عندك حق واحنا عمالين نعايرها بطانط اسكارس وعمتو بلهارسيا .

البنت الكبيرة: ياستى ( من تانتو اسكارس لمامي انتاميبا ياقلبي لاتحزن)

الأم: انتو فين ياحلوين خلاص ما تزعلوش يلا عشان عندنا مشوار طويل في معاميع الراجل نقرحه قبل ما نخش عـلى كبده ياعيني ونطلع عينه لحد ما يطلع له خراج

الأثنين: فريرة يامامي

الأم: استني ياماما .. استني يا شاطرة ..كله يقف في مكانه

تقف الأم وتنادي

الكبيرة اجمع بالخطوة السريعه

الكبيرة : تمااااااام يا فندم

الأم :عرفي نفسك للجماهير

اسمي :بتاعة الحركات ور ور ما بقفش ابداااا

ليا خلية واحدة بنواة واحدة وما ليش دعوة بالحشاحيش الجوانيه

الأم وتطلع ايه الحشاحيش دي جك حش وسطك

بتاعة الحركات : يعني الأحشاء الداخليه يامامي اووووف

بتاعة الحركات:ولما يكون في ميكروباص بتاع الثانويه معدي في المعاميع

الأم: ميكروباص وميتروا الأنفاق ايه انت حستخفي دمك خلصي بلاش لكاعه

بتاعة الحركات: يامامي يعني ميكروبات ثانوية انت مش بتفهمي لغة الروشنه ؟؟؟؟والمعاميع يعني الأمعاء دي بتساعدني عشان اخش على الغشاء المخاطي الي بيعمل بطانيه للحيطة بتاعة المعاميع المكعبرة.

انا مش بأذي صاحبي خالص مالص ولا بعدي حد غيره ابداااااا عشان انا بتأثر باللمون بتاع المعدة

الأم: لمووووووون اييييييييه جاك لمون لما يهري مصارينك

بتاعة الحركات: قصدي الحامض بتاع المعدة ييووووووه

الأم خلاص اتلقحي هناك على ما اندهلك

الأم : قولي ياروح مامي .. انت مين وبتعملي ايه

الصغيرة:بنبرة ملل وقرف

انا بتاعت الأكياس: عايزين مني ايه ما انا قاعده مدفيه وبشرب الشيشة يووووووه حاجة تعكر المزاج

الأم: معلش يانوغه .. معلش ياعين مامي استحملي شوية .. ياغلبي ياااااااني .. يلا يااااابت

ليا أربع نوايا بالكتير بس ماعرفش اخش على المحاشيش الجوانيه،

الأم: امال بتعملي ايه يا ست الحسن والجمال

بتاعة اللأكياس: لااااااا ده انا اعجبك قووووووي لأني معديه والبتاعة العصارة الحامضة بتاعت المعدة ما تقدرش تعملي أي حاجة

الأم : جدعة يامشرفاني ورافعه راسي هه وبعدييييين

بتاعة الأكياس: ولما بوصل للمعاموع المكعبر بخرج من الأكياس بتاعتي وبروح هاجمة على الأغشية المخاطية للمعموع واروح مدياله بوكس في قفاه والبكتيريا معايا لحااااااد ما تجيلها قراريح ياهووووووووو.

وياحلولي بقى لو البني ادم ده كانت صحته على قده وياعيني ما بيتقوتش كويس

ساعتها بكل قوتي وفين يووووووجعك

وفي لحظة ما بتاعة الأكياس وبتاعة الحركات بيعرفوا نفسهم على الجماهير المصونه .. اميبا صغنونة تزهق من كثر الرغي وتروح سايباهم وماشية ..

تقف الأنتاميبا الأم في وسط المعاميع تلطم وتزعق :

ياترى انتِ فين يا ضناااايا .. رحتي فين ياكبد امك؟؟؟؟؟؟؟؟؟؟؟؟

يتبع...................

تم تعديل بواسطة شهد
رابط هذا التعليق
شارك

  • الردود 53
  • البداية
  • اخر رد

أكثر المشاركين في هذا الموضوع

أكثر المشاركين في هذا الموضوع

الحلقة الثانية

انتاميبا صغنونة حيرانه وبتفكر تدور على مكان جديد

انتاميبا صغنونة:ياي ايه ده انتوا مستحملين الريحه دي ازاي انتوا بيئه بصحيح اففففف

زحرور: ما هي دي الي بناكل منها عيش .. روحي شمي هوا عند المعموع المكعبر

انتميبا: لالا ده بقى شيئ فظيييييييييع انا حدورلي على حتى انظف يعععععع

زحرورة: استني يا مفعوصة انت حتروحي فين .. يابت من طلع من داره اتقل مقداره

الأنتاميبا: مقدار ايه و بتاع ايه ... غوري من وشي خليني اشوفلي حته محترمه

زحرورة: يا بت ارجعي اسمعي الكلام دي امك قلقانه عليكي

تسيبها وتمشي تروح تدور على مكان في جسم البني ادم وما تلاقيش غير مناخيره

المناخير حاسة بكائن عجيب وعمالة تهرش بحركة دائريه .....

الأميبة ماسكة في الأغشيه المخاطيه بأديها وسنانها

المناخير قرفانه منها وعايزة تطلعها بره

المناخير: سايبة بيتكم وجايه ليه ؟؟؟ مالهاش حد يلمها دي ولا ايه؟؟؟

الأنتاميبا: بنرفزة وقرف .. قال رضينا بالهم

المناخير: يا شخية اتنيلي مش كفايه ريحتك الزفرة

الأنتميبا: اسمممم الله على البرفان الي بيهلللل. من قعر مناخير سيادتك.

المناخير: اقلها انا بيتشال بكلينكس.. مش زيك اخرتك شدة سيفوون

الأنتميبا: انت مش ناوية تجيبيها البر ..اشرف اي حتة اقعد فيها

المناخير: قصدك اعفن اي حتة اطل عليها..........

امشي اطلعي برة مش قادرة استحمل الريحة دي افففففففففففففف

وتفضل المناخير تهرش عشان الأنتاميبا تخرج ووووووووو .....وهاااااااااااتشووووو

تطلع الأنتاميبا من المناخير ودببببببببببب

تقع في سلة الخضار

يتبع......................

تم تعديل بواسطة شهد
رابط هذا التعليق
شارك

الحلقة الثالثة

الأنتاميبا تتفرج على الخضار

الأنتاميبا: يا حلاوة الخضرة ياحلاوة ياحلو لو ياااااااحلاااااااااوة

طماطماية تبصلها بقرف

طماطمايه: انت ايه جابك هنا وبتغني كمان

الأنتاميبا: ابدا يا طمطم اصلي زهقت وعايزة اغير جو ... الاقيش عندك شاليه في مارينا؟؟

تبصلها الطماطمايه باندهاش وتبرقلها!!!!!!!!

تطلع حتة خس(سلطة خضرا) من اخر السلة:

شاليه فييييييين ؟؟؟؟ ااااااااه قصدك في بلاعينااااااااا

تتفتح الثلاجة وتطلع حزمة بقدونس:

لا و انت الصادقة قصدها في علبة التحاليلينااااااااا

قال مارينا قال .. ما تكلمي على قدك

الأنتاميبا تكشر ووشها يحمر .. والخس والبقدونس نازلين فيها تريقه

الخس: هو انت زعلتي يا نونو

الأنتاميبا: انااااااا ازعل من شوية خضار بايته ياااااي وموش مستحميه كمان

البقدونس: وجنابك الي فرش وطالعه من حمام بخار ان شاء الله؟؟؟؟

الأنتاميبا: انت بترغي كثير ليه اف .. فين سلة الفاكهه .. بلا خضار بلا بتاع.......

تدور الأنتامبيا على سلة خضار .. تتخبط في زحرور ...

زحرور: انت فين يا روح مامي .. انت فين كل ده بدور عليكي؟؟

الأنتاميبا: يووووووووووووه انت جيتي ورايا ليه.. انا ما صدقت نضفت

زحرور: نضفتي ايه يا عبيطه .. مش شايفة وشك مصفر ازاي.. ارجعي يانونة حتموتي

الأنتاميبا: مادة بوزها والدموع نازلة ..

ما تقوليش يانونة انا موش صغيرة وعارفة مصلحتي فين.. وبعدين اموت نضيفة احسن ما اموت معفنة اففففف

وتفضل الأنتاميبا تجري والزحرور وراها ....

الأنتاميبا الصغنونة تهرب منها وتستخبا في ورا تفاحه لسه مش مغسولة...........

يطلع عيل صغير من اوضته لسه مش غاسل وشه ولا ايديه ويشوف التفاحه ياخدها .. يفتح بقه.. وهااااااااااا....

ياترى حياكل التفاحه فعلا ؟؟؟

ياترى الأنتاميبا حتدخل جوا بطنه ؟؟؟؟

طب هيا مش عايزة ترجع المكان ده تاني؟؟؟

طب حتعمل ايه؟؟؟

اول ما يفتح بقه تروح ناااااااااااااااطه على حزمة الجرجير ..........

حزمة الجرجير.. يعععععععععععععع ايه القرف ده

الأنتاميبا.. ششششششششش .... وطي صوتك الله يخليكي.. واستحميلني الشويتين دول على بال ما اخواتي يمشوا

حزمة الجرجير: واوطي ليه يعني واستحمل ليه يعني .. هو انت عامله عمله ولا ايه يا مفعوصه انت

الأنتاميبا: ابدا يا اختي بس انا عايزة اهاجر وامي واخواتي قال ايه..لو خرجتي من عندنا مش حتعيشي ..

قال يعني عايشة في سويسرا ياخي

حزمة الجرجير : عندك حق يا اختي .. ده حتى عندكوا سويسخا خااااالص

الأنتميبا: هااااااا حتخبيني ولا ايه ؟؟؟

حزمة الجرجير: بصي ولو انك جربانه ومعفنة وريحتك تقرف........ الا اني حعمل بأصلي واخبيكي

بس مش تستحلي الحكاية وتبلطيلي فيها

الأنتامبيا: ربنا يخليكي .. هاتي ايدك ابوسها

الجرجير: بس بس بس اوووووووووووووووووووف

الزحرورة تمسك ميكرفون وتفضل تنادي.. و تنادي .. ......... ياانتاميبا .. ياتوتو.... ارجعي لبيتك......

والأنتميبا مستخبية جوا حزمة الجرجير ........

الزحرورة نفسها يتقطع وترجع البيت تطلب مساعدة من اخواتها الزحارير والأنتاميبات

ويعقد اجتماع عاجل يناقشوا فيه ازاي يرجعوا اختهم الصغنونة... قبل ما تضيع منهم خااااااااااالص........... ويعضوا معاميعهم ندم!!!!!!!!!!!!

يتبع.........

تم تعديل بواسطة شهد
رابط هذا التعليق
شارك

الأخت شهد

ما شاء الله ... ده انتي وصفتي دورة حياة الأنتاميبا بالتمام والكمال .. وحديث الأنتاميبا لأولادها

الصغننين قوى ... وكمان الأنتاميبا هستولتيكا .. فاضل بقى الأنتاميبا كولاى .. والأميبا وتبقى

كملت العائلة كلها ..... تسلم أيديكي .. وفي انتظار ابداعاتك الأخرى

أبو أحمد الأسكندراني

:ninja: B) :roseop:

أبو أحمد الأسكندراني

رابط هذا التعليق
شارك

الأخت شهد

ما شاء الله ... ده انتي وصفتي دورة حياة الأنتاميبا بالتمام والكمال .. وحديث الأنتاميبا لأولادها

الصغننين قوى ... وكمان الأنتاميبا هستولتيكا .. فاضل بقى الأنتاميبا كولاى .. والأميبا وتبقى

كملت العائلة كلها ..... تسلم أيديكي .. وفي انتظار ابداعاتك الأخرى

أبو أحمد الأسكندراني

:ninja: B) :roseop:

يارب يخليك استاذ ابو احمد .. ميرسي جدا على تشجيعك ..

والبقية تأتي ان شاء الله

رابط هذا التعليق
شارك

الحلقة الرابعه

المكان: جوا المعموع المكعبر

طاولة اجتماعات كبيرة

الزحارير على اليمنين .. والزحرورات على الشمال..

الزحرور الأكبر يترأس الجلسة

الزحرور سيداتي وسادتي..

زحوروات وزحارير.. اميبات وانتاميبات..

انني وفي هذا الموقف الجلل ..

وفي هذه المصيبة المنيلة بستمية نيلة على دماغنا كلنا

حيث ان الهاربة هيا بنتنا كلنا..

وهروبها ده يسيئ لنا نحن جمعيه الزحارير و الأنتاميبات المتحدة

فقد قررت بأن...............

وتطلع انتميبا صغنونة .. ترفع صباعها

ممكن سؤال ....

هيا هربت ليه يا عمووووووو؟؟؟

تطلع ثانية تسأل

هيا صحيح هربت عشان المكان هنا مش نظيف؟؟

تقوم الثالثة.. لالا انا سمعت ان الريحة كتمت نفسها فطفشت..

الزحرور يخبط في طاولة الأجتماعات بأديه الأثنين ....

مين العيال دول ؟؟؟؟؟؟؟؟

انا قلت الأجتماع ده للكبار فقط

كل الصغيرين براااااااااااااا

كل الأميبات الصغيرة تطلع برة وتقف ورا الباب تتصنت

هدووووووووووء ياسادة.. ممكن نكمل الأجتماع..

وقبل ما يبتدي الزحرور الكبير يتكلم يقوم ....واحد من الزحارير:

بس يا ا فندم سيادتك اتنرفزت قوي عليهم .. ماكانش في مشكله لو جاوبت على اسألتهم

الزحرور الكبير: يعني عايزني اقلهم ايه يا عبقري عصرك وزمانك

اقلهم انكم عايشين وسط عيله جرباااااااانة

وبترأسكم جمعيه كل رموزها معفنين وعايشين في بيئه لو اكتشفت

حتلاقيها يا في علبة التحليل

يا بيتشد عليها السفون

يقوم واحد من الزحارير : بس يا افند............

الزحرور الكبير: بس بس نقطنا بسكاتك

الي عنده حل لمشتكلنا ويعرف ازاي يرجع الأنتاميبا الهربانة يقول

غير كده مش يخرس خالص ..........

تقوم زحرورة وبكل هدوء

زحرورة: انا عندي الحل

الزحرور :طب وساكته ياجميل ما تقولي

زحرورة: ماحدش اداني فرصة سيادتك..

طب قولي يا ماما ..قولي واشجيبنا

الزحرورة: حنروح للبقدونس والخس

ونطلب منهم يدورو معانا .. بما انهم ادرى بالمكان

زحرور: طب ولو رفضوا يا فالحة.. وعرق الشهامة نقح عليهم من غير مناسبة

الزحرورة: ساعتها .. اطعم الجذور تستحي الأوراق

الزحرور: برافو عليكي يا بت .. ما يجبها الا نسوانها

يا ترى الحل بتاع الزحرورة حينفع

وهل حتقدر ترجع الأنتاميبا الصغنونة فعلا؟؟؟؟؟؟؟؟

يتبع...........

رابط هذا التعليق
شارك

مساء الخير يا شهد

شوقتينا للأنتاميبا الصغنونة .... عملت أيه يلا بسرعة .. عايزين نعرف حكايتها

في انتظار بقية القصة ... وشكرا

أبو أحمد الأسكندراني

:unsure: :sad: :sad:

أبو أحمد الأسكندراني

رابط هذا التعليق
شارك

شهد تجيد إصابتنا بالمفاجأة والدهشة من براعتها وقدراتها الرهيبة..........

واللامحدودة أيضا...........

وتكنها الرائع في كل أنواع الفنون الأدبية..........

أقلك إيه بس

سلمت أناملك

105724557.jpg

ألام على هواك وليس عدلا ................ إذا أحببت مثلك أن ألاما

رابط هذا التعليق
شارك

مساء الخير يا شهد

شوقتينا للأنتاميبا الصغنونة .... عملت أيه يلا بسرعة .. عايزين نعرف حكايتها

في انتظار بقية القصة ... وشكرا

أبو أحمد الأسكندراني

:roseop::roseop::Ahly:

اشكرك جدا استاذ ابو احمد على متابعتك واهتمامك .. خالص تقديري

والحكاية جاية ان شاء الله

رابط هذا التعليق
شارك

شهد تجيد إصابتنا بالمفاجأة والدهشة من براعتها وقدراتها الرهيبة..........

واللامحدودة أيضا...........

وتكنها الرائع في كل أنواع الفنون الأدبية..........

أقلك إيه بس

سلمت أناملك

ارسين اشكرك اخي الغالي بكل ما تعنيه الكلمه على كلماتك العذبة الرقيقة..خالص احترامي وتقديري

رابط هذا التعليق
شارك

الحلقة الخامسة

وبعد اجتماع الزحارير والزحرورات ما ينتهي

الزحرور الأكبر يبعت الزحرورة عشان تجس نبض البقدوس والخس

زحرورة: مساء الفل يا بيبي

البقدونس: بيبي !! ده ايه الذوق الي نزل عليكي ده؟؟

الزحروروة: الله يابيبي وانا الي بقول عليك لزلز ومفيد

البقدنس: انجزي يلا ورايا سلطة حتتاكل

زحرورة: ما تبقاش حمقي كده.. ما شفتش انتاميبا صغنونة؟؟

البقدونس مش فاكر

زحرورة: حاول يابيبي عشان خاطري

البقدونس: اااااه .. العيلة ام مخ طاقق دي.. اجري دوري عليها بعيد عني بلا

هم..

زحرورة تغري البقدونس بشوية ميه

البقدونس: جتك القرف جايبالي ميه من المجاري ..

الزحرورة تسيب البقدونس وتروح للخس

زحرورة: سوسو .. ازيك يا عنيا.. ماشفتش الــــ

الخس : ماشفتش الهباب .. هو انا شايف اصلا .. يووووووووووه

زحرورة: مالك يا نور عيني .. مين الي مزعلك .؟؟

الخس :الوليه الي جوا دي .. ملتني زيت وخل وسابتني ومشيت ..طالما مش حتطفحني بتَبلّني ليييييييييييه ؟؟؟

زحروروة: ولا يهمك .. انا حاخدلك بطارك منها.. بس قولي شفتي انتاميبا صغنونة ؟؟

الخس: تلاقيها راحت في رحلة بلاعيه هنا ولا هنا.. هع هع هع

رورة : حروح ادور عليها بنفسي ولا الحوجة لخساية بايته

وتفضل الزحرورة تدور .. وتدور لحـــــــــــــــد ما تتعب

فتجيلها اميبا صغنونة

الأميبا: مالك ياتيتا زحلانة ليه؟؟

الزحرورة: انت ايه اللي جابك هنا؟؟ مش كفاية الأنتاميبا .. امشي انجري على البيت بسرررررررعه

الأميبا : حاضر ياتيتا .. بس انا حاوزة اقلك اني حارفة مكان الأنتاميبا

الزحرورة: بجد يابت ..هه .. طب هيا فييين؟؟؟

الأميبا: حقلك بس تجيبيلي شكاليته وفسن اب؟؟

الزحرورة: حديكي عنيا

الأميبا : موش حاوزة حنيكي .. حاوزة فسن اب سااااااقع وشكاليته

الزحرورة: حاضر حاضر.. بس هيا فين

الأميبا: انا سوفتها حند الكركير

الزحرورة: قصدك الجرجييير ؟؟

الأميبا: ايوة ياتيتا

زحرورة تروح للجرجير هيا والوفد المكون من الزحارير والزحرورات

يخبطوا على الباب

يا استاذ جرجير احنا جاين ناخد بنتنا الأنتاميبا

الأنتاميبا: حتسلمني ليهم وانا لجأت لك

زحرورة: دي بنتنا ولازم ترجعلنا

الجرجير: أي نعم هيا كاتمه على نفسي .. بس برضه هيا في حمايتي

واحد من الزحارير: اذا فهي الحرب

الزحرور الأكبر: يا شيخ اتنيل .. هو انت عارف تصلب طولك

الجرجير: ونحن لهاااااااا .. هلموا ياااااا

زحرورة: هلمو ايه .. استنى بس ياجراجيروا.... ابوس جذورك

زحورو: كل شيء بالتفاهم .. احنا عايزين بنتنا ..يرضيك جرجيرايه من بناتك تهرب منك

الجرجير لاطبعا ما يرضينيش

ويروح يسأل الأنتاميبا والشر بينط من عنيه : هما دول اهلك؟؟ انت هربانة منهم فعلا

الأنتاميبا :لااااااااااا ...ابدا .. ابدا .. ولا اعرفهم .. دول خطفوني من مامي..اهئ .. اهئ

الجرجير: همممممممم..بقى هيا الحكاية كده

زحرور:يا اهبل .. انت حتصدق كلام عيله

الجرجير : هيا حصلت لطولة اللسان..

يامعشر الخضاااااااااااار .. يامعشر الفواااااااكه.. الجرجير بيتهان ياقووووووووم

الأنتاميبات والزحارير اعتدو على حرمة بيتي...........

الخضار كلها تتجمع .. ووراهم الفاكهه.. وتقوم المعركة

زحرور يمسك في خناق جرجير

خساية تخنق انتاميبايا

اميبايه تبطح تفاحايه

تنتهي المعركة بسقوط ضحايا كثيييير من الطرفين .. ياترى الأنتاميبا راحت فين ؟؟

لسه عايشة؟؟ ولا راحت في الرجلين

يتبع.....

رابط هذا التعليق
شارك

مساء الخير يا شهد

والله القصة أحلوت قوي .. والحرب على أشدها ... شوقتينا .. عايزين نعرف التفاصيل

بس لعلمك مش حا نتنازل عن 30 حلقة زي أي مسلسل في التليفزيون

قصة جميلة وخيال مبدع يا شهد .... ننتظر بقية القصة المبدعة .. تحياتي الخالصة

أبو أحمد الأسكندراني

:blush2: :unsure: :unsure:

أبو أحمد الأسكندراني

رابط هذا التعليق
شارك

مساء الخير يا شهد

والله القصة أحلوت قوي .. والحرب على أشدها ... شوقتينا .. عايزين نعرف التفاصيل

بس لعلمك مش حا نتنازل عن 30 حلقة زي أي مسلسل في التليفزيون

قصة جميلة وخيال مبدع يا شهد .... ننتظر بقية القصة المبدعة .. تحياتي الخالصة

أبو أحمد الأسكندراني

:soccer: :blink: :lol:

استاذ ابو احمد اشكرك جدا على متابعتك الجميلة واهتمامك..

بس 30حلقة مرة واحدة :Zamalek: .. يااااااااخبر .. على كده مش حنتكلم عن الأنتاميبا وعائلتها المصونة وبس !!! الموضوع حيدخل فيه

ولا د خالتها وعمتها.. وولاد الجيران والخ........ :soccer:

بجد بشكرك جداااااااا على مجاملتك الرقيقة وكلماتك الي اسعدتني فعلا ..

والبقية تأتي ان شاء الله

رابط هذا التعليق
شارك

الحلقة السادسة

الزمان: بعد انتهاء معركة الزحارير والأنتاميبات مع الخضار والفاكهه

المكان: المياة الراكده والمستنقعات ( الفصل الدراسي)

الأنتاميبا مستنيه الأميبا اللي فتنة عليها عند الزحروروة وناويلها على نيه سووووووووده

بس مش عارفة توصلها عشان الأميبا النهاردة عندها امتحان تجريبي عشان الثانويه العاميه ...وباين عليها خايبة ومش عارفة تحل فبتغش من الأميبا الثانية الي جمبها..

فصممت انها تستناها قدام باب الفصل

الأميبا الأبلة: قومي يابت يا خايبة الرجا انت وقوليلي

جدودي وجدودك كانوا بيعملوا ايه .. واحنا حنعمل ايه من بعدهم

الأميبا الشاطرة: انا .. انا .. اناااااااااااا ياابلة.. انا اجاوب

الأميبا الأبلة: استني انت بس خلينا نشوف الخايبة دي حتعرف تجاوب ولا لأ؟؟

وتقوم الأميبا الفتانة وبكل غرور ..

الأميبا الفتانة: من فضلك يا ابلة مش تشتميني .. انا حجاوب

بصي يا ابلة جدودنا كانوا بيلعبو عسكر وحراميه مع تيتا بلهارسيا وبعيشو معها في الترعة...

وكان جدو اميبا الأكبر يلعب كورة مع تيتا بلهارسيا الكبيرة .. والعيال تشجع

بيب .. بيب .. بلهارسياااااااا

بيب... اميبااااااااااا

الأبلة: بقى كده.. بيلعبوا كورة والعيال بتشجع ..يا اخي ان شاالله تجيلك بلهارسيا في دماغك يابعيييييييييده

ناوليني الفلكة يابتتتتتتتتتتت

الأنتاميبا: من ورا الباب .. تستاهلي يا فتانة .. احسن .. احسننننن..

الأميبا الأبلة: الصوت ده جاي منين .. ششششششششش .. ولا كلمة

الأميبا الشاطرة: مافيش صوت يا ابلة

الأميبا الأبلة وهيا ماسكة الفلكة ..: قومي يا خايبة واقفي برجل واحدة ووشك في الحطية واطلعي وانزلي وانت ماسكة ودانك

الأميبا الفتانة: لااااااااااا حرام ياابلة .. اهئ .. اهئ...

الأميبا الأبلة: قومي فزززززززي.. والااااااااااا!!!

الأميبا الفتانة: حاضر يا هبلللللللللة..........

الأميبا الأبلة: بتقولي اييييييه؟؟؟؟؟

الأميبا الفتانة: بقول حاااااااضر يا ابلتييييييييييييييي

الأميبا الأبلة تكشر في وش الأميبا الفتانة وتزعقلها وتمسكلها العصاية:

هو احنا في كباريه يابتتتتتتتتتتت

ويادوب حتبتدي تمدها على رجليها ........

تدخل الأنتاميبا من ورا الباب

الأنتاميبا: عنك انت سيبهاااااااااالي ..

الأميبا الأبلة من غيظها ما تركزش ان دي هي الأنتاميبا الهربانة.. المهم ان في كائن جه وخلصها من الأميبا الفتانة...

الأميبا الأبلة: يلا يا حبايبي نخلص الأمتحان

هااااااااااا مين حيجاوب على سؤالي:

تقوم الأميبا الشاطرة: انا ياابلة

تشاورلها الأميبا الأبلة .. قومي يا بنتي

الأميبا الشاطرة: جدودنا الأميبات كانوا بيعشوا في المياه الراكده والمستنقعات زينا كده بالضبط وكمان ياابلة كانو كائنات اوليه بسيطة.. اجسامهم بتتكون من خليه واحدة..

لكن ما تعرفش تشوفها بعنيك.. بس بتظهر بالفحص المجهري وشكلها عامل زي الكتلة البروتوبلازميه

تصرخ الأميبا الغلابوية من اخر الفصل:

برتو مين يا اخوتشي .. مابلاش الكلام المجعلص ده يامامااا

كلمونا عربييييييييييي

الأميبا الأبلة: اهلا وسهلا .. ياست هانم.. طلعتي منين ان شاء الله

الأميبا الغلابويه: ابدا يا مس .. كنت تحت الدرج بقزقز لب وسوداني

الأميبا الأبلة: طب اتفضلي اقعدي ومش عايزة اسمع صوتك

الأميبا ت الباقين بيوشوشو بعض:

اميبات رغاية:شفتي يا اختي لما الغلابوية اتكلمت .. الأبلة عملت ايه .. ولا عرفت تعملها أي حاجة

كل بيجي على الخايبة الغلبانة

اميبا حقوده : ايوا يا اختي .. ماهو اصل الأميبات مقامات.. مش شايف هيا لبسه ايه مش احنا حسرة علينااااااااااا ..

الأميبا الأبلة تدب العصاية في دماغ الأميبات الي بيتكلموا ...

كملي باقي الأجابة يا رغاية انت وهيا...

تقوم الأميبا الرغاية وهيا بتترعش: ج.. ج .. جسسسس.. جسم الأمييبا .. بيتركب من خل .. خل .. خليه .. واححدة.. بس ..بس.. بتعمل كووووول .. الوظائف الحوويه......

.. قصدي الــ .. الــــ... ..

الوحـــــــــــويـــــــــــة

الفصل كله يقوم .. يقف على الترابيزات

والكل يغني.......................

وحوي.. ياوحوي .. ايااااااحه.. وكمان .. وحوي .. اياااااااااحه

وحوي.. ياوحوي .. ايااااااحه.. وكمان .. وحوي .. اياااااااااحه

وحوي.. ياوحوي .. ايااااااحه.. وكمان .. وحوي .. اياااااااااحه

وووووووووووووووو....

. ترررررررن

تررررررررررن ....

ترررررررررررررن

يضرب الجرس

اشفكو ا في الدرس الجاي..........

يتبع.................

تم تعديل بواسطة شهد
رابط هذا التعليق
شارك

الحلقة السادسة

الزمان: بعد انتهاء معركة الزحارير والأنتاميبات مع الخضار والفاكهه

المكان: المياة الراكده والمستنقعات ( الفصل الدراسي)

الأنتاميبا مستنيه الأميبا اللي فتنة عليها عند الزحروروة وناويلها على نيه سووووووووده

بس مش عارفة توصلها عشان الأميبا النهاردة عندها امتحان تجريبي عشان الثانويه العاميه ...وباين عليها خايبة ومش عارفة تحل فبتغش من الأميبا الثانية الي جمبها..

فصممت انها تستناها قدام باب الفصل

الأميبا الأبلة: قومي يابت يا خايبة الرجا انت وقوليلي

جدودي وجدودك كانوا بيعملوا ايه .. واحنا حنعمل ايه من بعدهم

الأميبا الشاطرة: انا .. انا .. اناااااااااااا ياابلة.. انا اجاوب

الأميبا الأبلة: استني انت بس خلينا نشوف الخايبة دي حتعرف تجاوب ولا لأ؟؟

وتقوم الأميبا الفتانة وبكل غرور ..

الأميبا الفتانة: من فضلك يا ابلة مش تشتميني .. انا حجاوب

بصي يا ابلة جدودنا كانوا بيلعبو عسكر وحراميه مع تيتا بلهارسيا وبعيشو معها في الترعة...

وكان جدو اميبا الأكبر يلعب كورة مع تيتا اميبا الكبيرة .. والعيال تشجع

بيب .. بيب .. بلهارسياااااااا

بيب... اميبااااااااااا

الأبلة: بقى كده.. بيلعبوا كورة والعيال بتشجع ..يا اخي ان شاالله تجيلك بلهارسيا في دماغك يابعيييييييييده

ناوليني الفلكة يابتتتتتتتتتتت

الأنتاميبا: من ورا الباب .. تستاهلي يا فتانة .. احسن .. احسننننن..

الأميبا الأبلة: الصوت ده جاي منين .. ششششششششش .. ولا كلمة

الأميبا الشاطرة: مافيش صوت يا ابلة

الأميبا الأبلة وهيا ماسكة الفلكة ..: قومي يا خايبة واقفي برجل واحدة ووشك في الحطية واطلعي وانزلي وانت ماسكة ودانك

الأميبا الفتانة: لااااااااااا حرام ياابلة .. اهئ .. اهئ...

الأميبا الأبلة: قومي فزززززززي.. والااااااااااا!!!

الأميبا الفتانة: حاضر يا هبلللللللللة..........

الأميبا الأبلة: بتقولي اييييييه؟؟؟؟؟

الأميبا الفتانة: بقول حاااااااضر يا ابلتييييييييييييييي

الأميبا الأبلة تكشر في وش الأميبا الفتانة وتزعقلها وتمسكلها العصاية:

هو احنا في كباريه يابتتتتتتتتتتت

ويادوب حتبتدي تمدها على رجليها ........

تدخل الأنتاميبا من ورا الباب

الأنتاميبا: عنك انت سيبهاااااااااالي ..

الأميبا الأبلة من غيظها ما تركزش ان دي هي الأنتاميبا الهربانة.. المهم ان في كائن جه وخلصها من الأميبا الفتانة...

الأميبا الأبلة: يلا يا حبايبي نخلص الأمتحان

هااااااااااا مين حيجاوب على سؤالي:

تقوم الأميبا الشاطرة: انا ياابلة

تشاورلها الأميبا الأبلة .. قومي يا بنتي

الأميبا الشاطرة: جدودنا الأميبات كانوا بيعشوا في المياه الراكده والمستنقعات زينا كده بالضبط وكمان ياابلة كانو كائنات اوليه بسيطة.. اجسامهم بتتكون من خليه واحدة..

لكن ما تعرفش تشوفها بعنيك.. بس بتظهر بالفحص المجهري وشكلها عامل زي الكتلة البروتوبلازميه

تصرخ الأميبا الغلابوية من اخر الفصل:

برتو مين يا اخوتشي .. مابلاش الكلام المجعلص ده يامامااا

كلمونا عربييييييييييي

الأميبا الأبلة: اهلا وسهلا .. ياست هانم.. طلعتي منين ان شاء الله

الأميبا الغلابويه: ابدا يا مس .. كنت تحت الدرج بقزقز لب وسوداني

الأميبا الأبلة: طب اتفضلي اقعدي ومش عايزة اسمع صوتك

الأميبا ت الباقين بيوشوشو بعض:

اميبات رغاية:شفتي يا اختي لما الغلابوية اتكلمت .. الأبلة عملت ايه .. ولا عرفت تعملها أي حاجة

كل بيجي على الخايبة الغلبانة

اميبا حقوده : ايوا يا اختي .. ماهو اصل الأميبات مقامات.. مش شايف هيا لبسه ايه مش احنا حسرة علينااااااااااا ..

الأميبا الأبلة تدب العصاية في دماغ الأميبات الي بيتكلموا ...

كملي باقي الأجابة يا رغاية انت وهيا...

تقوم الأميبا الرغاية وهيا بتترعش: ج.. ج .. جسسسس.. جسم الأمييبا .. بيتركب من خل .. خل .. خليه .. واححدة.. بس ..بس.. بتعمل كووووول .. الوظائف الحوويه......

.. قصدي الــ .. الــــ... ..

الوحـــــــــــويـــــــــــة

الفصل كله يقوم .. يقف على الترابيزات

والكل يغني.......................

وحوي.. ياوحوي .. ايااااااحه.. وكمان .. وحوي .. اياااااااااحه

وحوي.. ياوحوي .. ايااااااحه.. وكمان .. وحوي .. اياااااااااحه

وحوي.. ياوحوي .. ايااااااحه.. وكمان .. وحوي .. اياااااااااحه

وووووووووووووووو....

. ترررررررن

تررررررررررن ....

ترررررررررررررن

يضرب الجرس

اشفكو ا في الدرس الجاي..........

يتبع.................

مساء الخير للمبدعة المتألقة : شهد

والله قصة جميلة بجد .. واذا قيلت بنفس الأسلوب القصصي ده في داخل الفصول المدرسية

لفهمها الطلاب والطالبات بسهولة وبتركيز كبير لأنها سوف ترسخ في أذهانهم بالتأكيد

وحسستنا بجو الفصول الدراسية والأبله وطريقة العقاب الجميلة بالفلكه .. وكمان حسينا

بجو رمضان وأغاني وحوي يا وحوي .. رائعة بكل المقاييس

بس أنا عندي سؤال .. أنتي جبتي الأفكار الجميلة دي منين ؟؟؟؟؟

نحن في انتظار بقية ال 24 حلقة وبعدهم حلقات البلهارسيا بنوعيها

داخل المستقيم والمجاري البولية والقواقع في المياه العذبة في الترعة

في انتظار مزيد من ابداعاتك

أبو أحمد الأسكندراني

:closedeyes: :blink: :roseop:

أبو أحمد الأسكندراني

رابط هذا التعليق
شارك

مساء الخير للمبدعة المتألقة : شهد

والله قصة جميلة بجد .. واذا قيلت بنفس الأسلوب القصصي ده في داخل الفصول المدرسية

لفهمها الطلاب والطالبات بسهولة وبتركيز كبير لأنها سوف ترسخ في أذهانهم بالتأكيد

وحسستنا بجو الفصول الدراسية والأبله وطريقة العقاب الجميلة بالفلكه .. وكمان حسينا

بجو رمضان وأغاني وحوي يا وحوي .. رائعة بكل المقاييس

بس أنا عندي سؤال .. أنتي جبتي الأفكار الجميلة دي منين ؟؟؟؟؟

نحن في انتظار بقية ال 24 حلقة وبعدهم حلقات البلهارسيا بنوعيها

داخل المستقيم والمجاري البولية والقواقع في المياه العذبة في الترعة

في انتظار مزيد من ابداعاتك

أبو أحمد الأسكندراني

:blink: :roseop::roseop:

صباح الخيرات استاذ ابو احمد :roseop:

بشكرك جدا استاذ ابو احمد على المتابعه الجميلة وتعليقك القيم.. ومتنة جدا لحضرتك

بس أنا عندي سؤال .. أنتي جبتي الأفكار الجميلة دي منين ؟؟؟؟؟

هو بصراحة سؤال صعب ؟؟

طب مافيش اختيارات :closedeyes:

لا بجد .. كل الحكاية .. بحاول افكر في موضوع غريب .. واول ما تخطر على بالي الفكرة.. ابقى قلقانة لاتكون مش مقبولة.. وفي الأخر اتوكل على الله واكتب .. وغالبا ما بتكون افكار غريبة عجيبة :roseop: .. وربنا يستر على اللي بيقرا... :roseop:

وفي اغلب الأحيان الفكرة بتخطر على بالي من غير اي مقدمات .. بشكل عفوي ........ :roseop:

تحياتي ليك استاذ ابو احمد وخالص تقديري و احترامي

والحلقة الجاية في السكة ان شاء الله

تم تعديل بواسطة شهد
رابط هذا التعليق
شارك

  • بعد 3 أسابيع...

الحلقة السابعه

الزمان: اليوم الثاني في مدرسة الأميبات

المكان: الفصل الدراسي ( المياه الراكده والمستنقعات)

الشخصيات: الأميبا الأبلة وتلاميذها , الأميبا الناظرة

المنظر : الأميبات على التربيزات بيلعبوا و الأميبا الأبلة بتجري وراهم بالعصاية ...

الأميبا الفتانه تهرب من الأنتاميبا الهربانة وتقول للأميبا الناظرة على اللي بيحصل في الفصل

تسمعها الأميبا الرايقه من الفصل الثاني : فتبعت ماسج للأميبا الرغايه .. فتوصل الخبر للكل

ما عدا الأبلة..

تدخل الأميبا الناظرة تلاقي الكل في مكانه و الفصل اخر هدوء .. والأميبا الأبلة بتتنطط من

كرسي لكرسي ومن ترابيزة للثانية

الحوار: الأميبا الناظرة: هااااااااااااااااا بتعملي ايه يا ابله

اول ما تشوفها قدامها تقع من الترابيزة ودب تتخبط على دماغها وتتشقلب ...

الأميبا الأبلة: أأأأأأأ ..... هـــ هــــ هــــ لـــ لــــ نننننن ووووو سهل هل هل لاااااااً... يااااا ابببب للللل له النن ناظظظررره....

الناظرة: ايه في ايه مالك يا ابلة متلخبطه ليه ولا كأنك لدغتك عقربة

الأبلة: دي العقربة جمبك فراشة

الناظرة: نعم بتبرطمي تقولي ايه يا ابله

الأبلة: ابدا بس اصل حضرتك نورنيا ودي لخبطة الفرح سيادتك

الناظرة: هممممممممم .. ما علينا .. الحصة دي حصة ايه يا ابلة؟؟؟

الأبله: ده امتحان تجريبي ياابله الناظرة

الناظرة : اهااااااااا... وتروح خابطه بالعصاية على الترابيزة بتاعة الأبلة تفز الأبله من مكانها وسنانها تخبط في بعض ..

الناظرة: امتحان تجريبي!!!!!!! وطالما هو كده.. حضرتك بتتنططي فوق الكراسي ليييييه ؟؟!!!!!!

الأبله: ماهو اصل اناااااااااااا

تقوم الأميبا الغلابويه : ما هو يا ابله الناظرة حضرتك مش واخده بالك ..ده امتحان موديل 2007 ..

الأميبا الناظرة: ياسلاااااااااااام

الأميبا الناظرة ماسكة نفسها على الأخر.......

الأميبا الناظرة: ازاي يعني ياريت تنورينا حضرتك اصل انا اميبا ماركة900 ق.م

الأميبا الغلابويه: انا انا اقول لحضرتك ...

احم .. احم.. هيا الموضه دي مش جديده لالالالا ابداااا.. دي كانت نايمة في قعر البركه من سنة الف وخمسميه وشرطه ونص والأبله بتاعتنا اكتشفتها بكل عبقريه ..

الأميبا الناظرة ماسكة العصاية وعماله تلفها في ايدها وشويه وحتكسرها

الأميبا الناظرة: واكتشفت ايه يا فالحة ؟؟

تقوم الأميبا الرغايه : انا انا اناااااااااااا يا ابلة :

الناظرة: طب قومي قومي خرمتي وداني ...

الأميبا الرغايه: لما جدو الأميبا الأكبر قرر.. انه يعمل لفه على السموبلازمو..فرجليه وجعته من كثر اللف ..

فصعب على الأندو زلابمو فراح جايبلة كرسي انمااا ايييييه ما تقولش للأنتاميبا عليه....

اما غشاء الزلابيا ياعيني عليه ظهرة اتقطم قوي من وقفته في الشمس وقفاه يقمر عيش عشان خاطر اسم النبي حارسة ده ........ما اعرفش اسمه ايه

يلا مش مهم؟؟؟

ماعلينا.. فكان برضه لازم نجيبله كرسي من اللي بيتمرج ........اصل يا ختي عشان القر .. اصل القر وحش....

اصلك يا اختي ما شفتيش خالتي اسكارس لما قرت على عمتي البلهارسيا جرالها ايه.... هو انا ماقلت لكيش

ووووووووو................

الناظرة: بسسسسسسسسسس .. هششششششششششش.. اكتمي خاااااااااااالص .. بالعه راديو.. وكل كلامك مش فاكرة.. ومش عارفة .. جتكو البلااااااااااااوي

ان ما رويتكم كله يطلع ورقه وقلم .. يلاااااااااااا .. امتحان اخر السنة..........

الأميبا الأبله بنظرة خوف وبصوت هااااااااادي : بس يا حضرة الناظرة: امتحان اخر السنة لسه بدري عليه

الناظرة: انتِ حتعلميني شغلي .. انت مرفوده يا هانم.. انا حبعتلكو اللي تعرف تربيكم.. اميبات اخر زمننننننننن.. وتسيب الفصل

الأبلة الجديده تدخل وتكتب الأسئلة على السبورة.. الأميبات كل واحدة بتبص للثانية

الأبلة الجديده: بصي في ورقتك انت وهيا ..

الأميبا الرغايه: ما هو مش فاهمة السؤال الأول ياابله عععععععععععععععععع

الأبلة الجديدة: ماهو واضح قدامك اهو .. حلي وانت ساكته.............

الأميبا الغلابويه: طب السؤال التاني انا مش ما خدناهوش في المقرر ياابله يوووووه بقى

اميبا بليده خالص والسؤال الثالث ملعبك اخر لعبكة يووووووووه بقى ماليش دعوة .. خطك وحششششششششش

الأبلة الجديده تتقمص ووشها يحمر

الأبله الجديده: انا خطي وحش ..

تقوم كل الأميبات وبصوت واحد ايووووووة خطك وحش وانت وحشة .. احنا عايزين الأبلة بتاعتنا هيا اللي تحط الأمتحان..

ويتجمعوا على الأميبا الجديده ويضربوها .. وبالعافيه على ما تعرف تهرب منهم

الأبلة الجديده شعرها منكوش .. وماسكة جزمتها في ايدها.. وتجرييييييي . على البوابة .. فتشوفها الناظرة

الأبله الجديده: انا يتعمل فيا كده .. انا موش قاعدالكو في المدرسة الهباب دي ... ان ما قلت لدادي .. اهئ اهئ ...

الناظرة : استني بس يا ابله .. استني استني بس يا ابلة.. بلاش دادي .. انا حعمل اللي يرضيك

الأبلة الجديده: الأولاد دول لازم يتربوا والا انا حقفلكو المدرسة دي .. وتطلع الموبايل من الشنطة ووو...

الناظرة تاخد منها الموبايل وتحاول تهديها ...

الناظرة: يتربوا ونص كمان بس اهدي انت .. اشربي كبايه العصير دي وروقي دمك

الأميبات : يطلعوا من الفصول .. وتشاركهم اميبات الفصول الثانية.. ويروحوا ناحية الأبلة الجديده والكل مافيش على لسانه غير...

مش عاوزينك

عاوزين ابلتناااااااا....

مش عاوزينك

عاوزين ابلتناااااااا....

مش عاوزينك

عاوزين ابلتناااااااا....

مش عاوزينك

عاوزين ابلتناااااااا....

مش عاوزينك

عاوزين ابلتناااااااا....

مش عاوزينك

عاوزين ابلتناااااااا....

مش عاوزينك

عاوزين ابلتناااااااا....

لحد ما يوصل صوتهم للجمعية العالمية لحقوق الأميبات والأنتاميبات...

يتبع..........

تم تعديل بواسطة شهد
رابط هذا التعليق
شارك

الحلقة الثامنة

الزمان: اليوم الثالث مدرسة الأميبات

المكان: حوش المدرسة

الأشخاص: الأميبات( التلاميذ) , الناظرة, المدرسات, و مندوب جمعيه حقوق الأميبات والأنتاميبات العالمية

المنظر: اعتصام في حوش المدرسة .. التلاميذ قاعدين على الأرض والناظرة والمدرسات واقفين قدامهم بيحاولو يدخلوهم الفصول ومافيش فايدة..

يدخل مندوب جمعيه حقوق الأميبات.........

الحورا:

مندوب الجمعيه(انتاميبا كولاي) هو ايه اللي بيحصل في بركتك ياحضرة الناظرة

الناظرة: اهلا .. اهلا يا افندم .. نورت المستنقع.. كرسي للباشا يابت..

المندوب ( انتاميبا كولاي) : مش عايز كراسي جاوبي على سؤالي الأول

الناظرة: مافيش حاجة يا افندم .. دول شوية عيال عايزن قطم رقبتهم

المندوب( انتاميبا كولاي): همممم باين عليكي مش حتتكلمي .. طب والأنسات المدرسات ؟؟ واحدة فيكم تقلي فيه ايه؟؟

واحدة من المدرسات: دول عيال ناقصين ربايه .. ولازم يتعاقبوا

المندوب( انتاميبا كولاي) : برضه مش لاقي اجابة مفيده؟؟؟

تقف الأميبا الغلابويه وترفع ايدها..

الأميبا الغلابويه: هو ايه اصل ده احنا المعتدى علينا وحضرتك بتسأل العدو.. اما غريبة .. وتضرب كف بكف

المندوب: مين اللي بيتكلم ؟؟ يقرب جمبي كده عشان اسمع ..

الأميبا الغلابويه: انا يا استاذ ..

المندوب: اتفضلي يا انسة انا سامعك..

الأميبا الغلابويه: شوف يا سي الأستاذ كلاوي

المندوب: اسمي كولااااااي مش كلاوي..

الأميبا الغلابويه: ياعم وهيا حتفرق في ايه ..... بقلك ايه هو انت واقف ليه؟؟ ما تخلي البساط احمدي.. وتقعد معانا على البركه كده.. خلي الكلام يحلوووو.. الشيشة للأستاذ يا رغاية

المندوب: شيشية؟؟ وفي مدرسة؟؟

الرغايه : كبر دماغك يا عمنا وشدلك نفسين...

المندوب يبصلهم باندهاش.. وفي الأخر يمسك الشيشة ويبتدي يشد....

المندوب: مسااااء الخيييير....... هيا ايه العبارة .. انا شايف البركة بامبي ..

الرغايه: حلاووووووووتك يا بامبي انت يا جميلللللللل...

الغلابويه: نقلك ايه العبارة.. الحكاية ومافيها ان ابله الناظرة دخلت علينا الفصل من غير لآ احم ولا دستور..

الرغايه: والأبلة بتاعتنا بتشرح الدرس بطريقتها الخاصة.. اصل هيا متعوده على اسلوب معين.. هو اللي بنفهم بيه

المندوب: وايه الأسلوب ده يا معلمه...يووووووه قصدي يا انسه؟؟

الغلابويه: طريقه التنطيط في الكراسي.. كل سؤال بنطه...

المندوب: ياسلاااااااااام .. وجابتها منين الطريقه دي؟؟

الرغايه: اخترعتها من بنيات افكارها.. تبقى دي جزاتها .. تترفد وتجيلنا الوليه ؟؟ اللي مش عارفة حتى تكتب كلمتين على بعض؟؟

الغلابويه: دي حتى منظرها تحفة.. وحاطه اصفر واحمر .. عامله زي الأرجوز...

المندوب: لا عيب كده .. ما يصحش يا انسة..

الرغايه: ما يصحش ايه بس .. طب اسألها لبسك ده اصله ايه؟؟ تركيبته ايه ؟؟

المندوب: يااااا ابله..انت ياللي هناك؟؟ جاوبي على السؤال؟؟

الأبلة الجديده: انا يا استاذ....

المندوب: ا ه امال انا ..مش سامعه السؤال .. جاوبي؟؟؟

الناظرة: يا افندم دي الأبلة.. حضرتك تسأل التلاميذ؟؟

المندوب: وانت ايش حشرك ياوليه يا قرشانة انت؟؟ انا قلت هيا اللي تجاوب ... يعني هيا اللي تجاوب؟؟

الناظرة: حاضر.. حاضر .. يا افندم

جاوبي يا ابلة .. خلي اليوم ده يعدي على خير..

الأبلة: انا لبسي كله حرير في حرير.. متركب عليه لولو والماظ.. وياسلام على مكياجي.. مافيش منه في أي حته ابدا .. ابداا

المندوب: حرير مين ده؟؟ ومكياج ايه.. ليه يعني جايبينو من قعر بركه لويس السادس عشر ؟؟؟؟؟؟؟

الغلابويه: شفت يا استاذ .. انها مش فاهمة أي حاجة ؟؟ تدرسلنا ازاي بس بتاعة بابا وماما دي؟؟ انا عارفة نجحت ازاي في الأبتدائيه اصلا!!!

الرغايه: يبقى مين اللي مفروض يترفد ..دي ولا الأبلة اللي علمتنا حاجات كثيييير ه .....................

المندوب: وعلمتكو ايه يا رغايه؟؟؟

الغلابويه: لاااااااااااا دي شغلانة الشاطرة.. احنا مقسمين الشغل بينا

تعالي يا شاطرة .. قولي للأستاذ واشجينا...

وتطلع الأميبا الشاطرة.. لابسه نظارة وهدوم المدرسة مترتبة

الشاطره: نعم يا استاذ ...

المندوب: قولي يا بنتي اتعلمتي ايه من الأبلة بتاعتكم

الشاطره : اتعلمت .. ان :

تركيب الجسم:

جسم ناعبارة عن كتلة بروتوبلازمية هلامية صغيرة رائقة عندها حبيبات وقطرات كثيرة، و الجزء السطحي من البروتوبلازم بيعمل غشاء رقيق سيتوبلازميا اللي هو(الغشاء البلازمي) بيخلي الميه والغازات يدخلوا للسيتوبلازم ويخرجه منه

بس بيمنع البروتوبلازم من انه يضيع المواد البروتينية وكربو هيدراتية ودهنية وأملاح اللي عنده

المندوب: شاطرة برااااااافو عليكي.. ها مين يكمل

تطلع اميبا من اخر الفصل اسمها الأميبا الخجولة.. انا يا استاذ .. ممكن اكمل

الرغايه و الغلابويه: الخجولة نطقت يا اميباااااات .. لولوولولولولولولولولوولولي

الأميبا الخجولة: وشها يحمر ..

خلاص مش حقول ...

المندوب: لالا قولي يا ماما .. قولي يا امورة

الخجوله: حاضر يا استاذ

لما تتقطع الاميبا إلى لجرئين يدور كل جزءفيها ويحاوط نفسه على طول بغشاء سيتوبلازمي كامل عشان يمنع ضياع محتوياته،

ويعتبر تكوين الغشاء السطحي السيتوبلازمي واحد من خصائص البروتوبلازم.

و بروتوبلازم الاميبا زيه زي بروتوبلازم أي خلية، إلى نواة وسيتوبلازم والنواة مالهاش مكان ثابت في البروتوبلازم

و اتعملت تجارب على الاميبا للوقوف على وظائف النواة.

المندوب: ممتازة يا بنتي.. مين يكمل ياولاد؟؟

الأميبا الناعمة ترفع ايدها بكل هدوء .. وبصوت واااااااطي .. انا ......

الرغايه: انت بتكلمي نفسك .. ما تعلي صوتك يا بت...

المندوب: مين اللي عايز يجاوب.. تعالي يا عسولة انت ...

الأميبا الناعمة:

لو قسمنا الاميبا لجزأين واحد فيهم عنده نواة، حنلاقي أن الجزء حيفضل عايش وينمو

وبعد أن يرجع حجمه الأصلي للاميبا يبتدي يتكاثر

لكن الجزء اللي مافيهوش نواه حيعيش فترة من الزمن يتحرك فيها ويمكن يبلع الغذاء

بس ما يقدرش لا يهضم ولاينمو أو حتى يتكاثر

المندوب: هيا يارغايه .. ولا انت يا غلابويه.. مافيش واحده فيكم تعرف تكمل

الرغايه: تقلب عينيها يمين وشمال.. وتهرش وشها بضوافرها..

اه طبعا اعرف يا استاذ.. ده احنا نعجبك قوي( ده ايه الورطه دي)

المندوب: ايه مش عارفة.. ولا ايه؟؟

الرغايه: طبعا عارفة .. اصل الدرس ده سهل قووووووووي

المندوب: طب قولي...

الرغايه: شوف يا معلمه

البتاع ده بيموت بسرعه بعدما يخلص المواد الغذائيه اللي مخزنها عنده

وده دليل على إن النواة لازما ولابد منها عشان البتاع اللي اسمه البروتوبلازم يعرف يعمل العمليتني بتوع التمثيل الغذائي والتكاثر.

ويتميز السيتوبلازم إلى اكتو بلازم خارجي رقيق شفاف، واندوبلازم داخلي محبب عنده أنواع مختلفة اشي حبيبات بلورية على قطرات دهنية

وكمان أجسام غذائية في طريق الهضم جوا فجوات غذائية وفجوة منقبضة كبيرة فيها سائل مائيه.

المندوب:ممتاااااااازة جدااااااااا يا غلابويه.. ايه الشاطره دي...

الرغايه: متشكرين يا استاذ .. طول عمري شاطره .. بس ما حدش عارف قيمتي ...

الغلابويه: ايه يا بت العبقريه اللي نزلت عليكي من غير مناسة دي..

الرغايه: اكتمي لا اديكي على وشك.. مش شايفه الكتاب اللي تحت رجليا ..

الغلابويه: يخررررررب عقلك..

الرغايه: ششششششششش حتودينا في داهيه

المندوب : مالكو في ايه ؟؟

الغلابويه: ابدا يا استاذ ... مستنين قرار حضرتك .. حترجعلنا ابلتنا ولا لأ؟؟

المندوب: بعد اللي شفته ده.. والمستوى ا لجميل .. واللي كانت السبب فيه المدرسة بتاعتكم .. فأكيد لازم نرجعها..

اما الناظرة والأبلة الجديده فحسابهم معايا بعدين

الأميبات كلها في حالة فرح وسعاده .. هيييييييييييييييييييييييييييييييييييه

الناظرة والأبلة الجديده مقموصين وقفاهم يقمر عيش

المندوب: بس ده مش معناه انكم ماغلطتوش ولازم تنالوا عقابكم انتوا كمان .................

الأميبات : يوووووووووووووووووووووووووه

يتبع..................

رابط هذا التعليق
شارك

مساء الخير للمبدعة : شهد

جميلة جدا الحلقتين السابعة والثامنة من الأخوات الأميبات

ما شاء الله وصف رائع لشكل الأميبا وتركيبها وأهمية النواة فيها

والتعبيرات العلمية الدقيقة مثل الأكتودرم والإندودرم وأجزاءها الخلوية

والأميبات الحلوات وتمسكهم بأبلتهم بشدة وده وصف واقعي جميل

ينطبق على الطلاب والتلاميذ في المدارس ... في انتظار بقية القصة الجميلة

والخيال المبدع للفنانة المبدعة شهد ... مع خالص تحياتي وتمنياتي بالتوفيق

أبو أحمد الأسكندراني

رابط هذا التعليق
شارك

مساء الخير للمبدعة : شهد

جميلة جدا الحلقتين السابعة والثامنة من الأخوات الأميبات

ما شاء الله وصف رائع لشكل الأميبا وتركيبها وأهمية النواة فيها

والتعبيرات العلمية الدقيقة مثل الأكتودرم والإندودرم وأجزاءها الخلوية

والأميبات الحلوات وتمسكهم بأبلتهم بشدة وده وصف واقعي جميل

ينطبق على الطلاب والتلاميذ في المدارس ... في انتظار بقية القصة الجميلة

والخيال المبدع للفنانة المبدعة شهد ... مع خالص تحياتي وتمنياتي بالتوفيق

صباح الخيرات استاذ ابو احمد.. شكرا لمتابعتك الأكثر من رائعه.. يسعدني تواجدك الطيب .. حقيقة لا املك من الكلمات الكثير للتعبير عن مدى تقديري وامتناني لأهتمامك وتشجيعك..........

رابط هذا التعليق
شارك

انشئ حساب جديد أو قم بتسجيل دخولك لتتمكن من إضافة تعليق جديد

يجب ان تكون عضوا لدينا لتتمكن من التعليق

انشئ حساب جديد

سجل حسابك الجديد لدينا في الموقع بمنتهي السهوله .

سجل حساب جديد

تسجيل دخول

هل تمتلك حساب بالفعل؟ سجل دخولك من هنا.

سجل دخولك الان
  • المتواجدون الآن   0 أعضاء متواجدين الان

    • لا يوجد أعضاء مسجلون يتصفحون هذه الصفحة

×
×
  • أضف...