اذهب إلى المحتوى
محاورات المصريين

عملية تصحيح الإبصار أريد مشورتكم


~Heba~

Recommended Posts

السلام عليكم عليكم و رحمه الله و بركاته

هل يوجد احد من القاهره؟؟؟

عارفه انه سؤال بايخ

طب اذا كان فيه محتاجه معلومات عن مستشفى المغربى عناوين فروعها و ارقام تليفونات اذا ممكن

و ليه؟؟؟

ربنا ما يوريكم انا مسافره للقاهره عشان اعمل عمليه ليزر العيون و اودع النظاره و العدسات للابد ان شاء الله

طبعا العمليه بتتعمل فى الصعيد بس لازم اعملها فى القاهره و فى مكان كويس عشان الست الوالده قلبها يطمن

اذا كان ممكن ادونى مشوره اذا كان فعلا المستشفى ده هو احسن مكان ممكن نعملها فيه

فيه واحده قالت لى عن دكتور بس تكلفه العمليه عنده 4200 بينما انا اعرف انها ب 3000 زى ما قال لى الدكتور اللى كشفت عنده اول مره و ده كان من 4 سنين

و فى مستشفى المغربى و صلنى خبر انها ب 1350 جنيه

طبعا عشمانه فيكم خير و اكيييييد نص المنتدى هنا قاهرى و يمكن الحظ يصدف كمان و الاقى دكتور عيون هنا والا هنا

و شكراااا

تم تغيير العنوان للتعبير عن محتوى الموضوع

تم تعديل بواسطة Advisor

أقلل عتابك فالبقاء قليل...و الدهر يعدل تارة و يميل

رابط هذا التعليق
شارك

السلام عليكم

أولا شفاكى الله و عفاكى

بالنسبة لمستشفى المغربى فلا اعلم عنها شيئا

و لكن و بما ان الحال من بعضه , بس انا مشهعمل عملية و لا حاجة ,الحمد لله

اعرف دكتور جيد جدا و بتعامل معه من حوالى قولى 10 , 15 سنة

اسمه حسين شاكر المرقبى

( المركز الدولى لأبحاث الشبكية )

ت : 4172076

اتصلى و اسئلى

ما الفخــــر إلا لأهل العلم إنهم , على الهدى لمن استهدى أدلاء

وقدر كل امرئ ما كان يحسنه , والجاهـلون لأهل العـلم أعداء

فـفـز بعلم تعش حيـا ً به أبــدا , الناس موتى وأهل العلم أحياء

( على رضى الله تعالى عنه )

رابط هذا التعليق
شارك

العزيزة المهندسة هبة

زمان قالوا الصيت ولا الغنى

واظنك فاهماها وطبعا بالنسبة للاسعار فهى متقاربة جدا بين 3500 و 4000 للعينين ربنا يكتب لك الخير والشفاء هو فيه تقنيتين الليزر والليزك واسرعها شفاء وربما ذات نتائج افضل هى الليزك هذا من اطباء العيون انفسهم وهى تتم بتقنية بسيطة عن طرق عمل شق فى العدسة الامامية للعين واصلاح العيوب التى تسبب قصر النظر او طوله على القرنية بالكشط او التشريط حسب اختيارك ثم اعادة العدسة لمكانها بدون اى خياطة ووضع عدسة حماية لمدة 24 ساعه مثلا بعدها مع عدم التعرض للضوء فترة محددة بعدها يعود كل شىء طبيعيا باذن الله

نسبة النجاح فى عمليات الليزر اقل نسبيا من الليزك فالاخيرة نسبتها تصل الى 98 بالمائة وفترة الشفاء فيها لاتتجاوز اليومين مع الالتزام بكافة تعليمات الطبيب

آخر شىء وهو مهم لى صديقة لم يوفقها الحظ فى مستشفيات المغربى ولا تنخدعى بأية اسماء ايا كانت ركزى على خبرته الطويلة واتقانه للتقنية واجعليها مغامرة محسوبة ولا تلتفتى للسعر وفروقه فى هذا الموضوع تحديدا

وانا شخصيا اجرت عدة صديقات لى هذه الجراحة عند جراحين يشهد لهما وتلقيا تدريبا بالخارج لو اردتى اعطيتك هواتفهما او اسمائهما ولك الاختيار اولا واخيرا اهم شىء اختارى بعناية وركزى على تنفيذ تعليمات طبيبك بكل دقة وحرص

ربنا يكتب لك الشفاء والخير يارب :rolleyes: :P

ام حماده

عندما تشرق عيناك بإبتسامة سعادة

يسكننى الفرح

فمنك صباحاتى

يا ارق اطلالة لفجرى الجديد

MADAMAMA

يكفينى من حبك انه......يملأ دنياى ....ويكفينى

يا لحظا من عمرى الآنى.....والآت بعمرك يطوينى

يكفينى .....انك........................تكفينى

رابط هذا التعليق
شارك

اخ وائل اشكرك على تجاوبك بس حضرتك ازاى مستحمل هم النظارات و العدسات انا صراحه بقالى ست سنوات بستعملهم من ساعه ما نظرى ضعف و كرهتهم والله و لولا ان الدكتور قال لى العمليه متنفعيش ليكى دلوقتى الا لما تكبرى و النظر يثبت لولا كده انا كنت عملتها من زمان

و اكيد ان شاء الله حسأل على الدكتور ده

بينى و بينكم انا كشفت اساسا عند دكتور استاذ فى جامعه القاهره بس انا نفسى اطمن والدتى و اقنعها ان العمليه ناجحه باذن الله

الاخت العزيزه بنت مصريه

انا فعلا سمعت اللى بيقول مستشفيات المغربى مش كويسه والى قال انها الافضل فى الموضوع ده طيب الواحد يصدق مين والا مين مش حيصدق الا لما يجرب بنفسه

الاحتياط الوحيد اللى فى ايدنا اننا نجرب اكتر من دكتور

على فكره انتى خوفيتينى ازاى تكاليف العمليه بقت غاليه كدا انا من اربع سنين لما كشفت اول مره الدكتور قال انه فعلا فيه نوعين للعمليه حتى شرح لى بالتفصيل كمان بس انا مش فاكره

الشئ الوحيد اللى فاكراه هو ان تكلفه العمليه 3000 و النوع التانى اقل بس هو قال نسبه النجاح فيه اقل

صراحه انا فرحت 3000 جنيه مقدور عليها طيب ليه 4000 دى هما الدكاتره بيغلوا بمزاجهم والا فعلا تكاليف العمليات زادت

تفتكروا تكلفه اعلى يعنى نتايج افضل و الا ادفع ابويا دم قلبه و فى الاخر ابقى شيش بيش

أقلل عتابك فالبقاء قليل...و الدهر يعدل تارة و يميل

رابط هذا التعليق
شارك

الفاضلة هبة

أستطيع أن أجد لك عنوان مستشفيات المغربى و المستشفى الرئيسى أمام مسجد السيدة نفيسة و لهم فرع فى المهندسين.

سأكتب لك مرة أخرى بتفاصيل أكثر إذا كنتى ما زلت مصرة على العملية.

من سنوات قمت بتحليل بيانات العمليات الخاصة بالمستشفى ( فرع خارج مصر) ووجدت أن هناك نسبة من الفشل كانت على ما أذكر 4% و كنت أقوم بهذا التحليل خدمة لعدد من الأطباء هناك ( كلهم يرتدون النظارات ) و كانوا ينظرون إلى نسبة الفشل كشئ عادى.

أعرف فتاة أجرت الجراحة و كانت غير موفقة فأصيب بزغللة دائمة و لا يمكن إعادة العملية لأن سمك قرنيتها لا يسمح !!!

إبنة أخت زوجتى نائبة رمد فى مستشفى عين شمس التخصصى تقول أن هناك الكثير من إحتمالات الخطأ فى عمليات العيون و أنها تنبه المريض على الإحتمالات السيئة و تقول للمريض هذه العملية أنت لا تحتاجها و إحتمالات مضارها كذا و كذا و الرأى لك.

عندى ولدان (مهندسين أيضا) الكبير (27 سنة) يرفض مجرد التفكير فى تلك الجراحة و الآخر (23 سنة ) يريد إجراء العملية و أنا أرفض بإباء و شمم

مواطنين لا متفرجين


رابط هذا التعليق
شارك

الاخ المشرف عادل :P

بدايه اقدر لك جدا حرصك و توجيهك لى بخصوص مخاطر العمليه

لكن حضرتك لا تعرف ظروفى

و اقولك قاعده اساسيه النظاره الطبيه بالنسبه للولد عادى اما بالنسبه للبنت فهى نقص شنيع و اذا كان عندكم دا عادى ففى البيئه اللى انا اعيش فيها مش عادى ابدا

تتصور حضرتك انى لما كنت فى المدرسه الثانويه و بالذات لما كنت فى تالته ثانوى و لبست النضاره لاول مره فى حياتى كنت الوحيده فى المدرسه

عندك فكره عن الكلام و التريقه اللى كنت بسمعه من زمايلى الاولاد

حتى فى الشارع لدرجه انى والدتى كانت تمنعنى من الخروج بيها و انا اصر لانى كنت بدايق اما ابقى ماشيه و شايفه الدنيا طشاش حتى لو قابلت حد اعرفه من بعيد مش حعرفه و كان الخلاف بينتهى انى مش خارجه اصلا طبعا حضرتك تتصور حالتى النفسيه بقت ازاى

طبعا رحت الكليه مفيش مشاكل بعد كده كتير فى الكليه كانوا بيلبسوا نضارات بس انا مازلت اكره لبسه النضاره و احس ان تغير كتير فى شكلى

طيب تعرف اخويا كان بيسميها ايه :rolleyes: كان يسميها الفاترينه طبعا انا كنت بتقبلها منه بضحك و بعتبرها هزار لكن من جوايا بردوا نفسيتى تعبت

قلنا الحل فى العدسات بس مش عارفه مشكلتها معايا كانت بتحرق لى عنيا يمكن لانى بلبسها كتير

كمان هى كرهتها و الحمد لله ان فى حل اخر بارقه امل بالنسبه لى

و اقول لحضرتك انا ذهبت لحوالى 6 اطباء عيونى من ساعه ما حسيت بضعف نظرى حتى الوقت الحالى و تلقيت منهم كل الشرح اللازم للعمليه و احتمالات النجاح من الفشل

كل اللى ارجوه من ربنا انها تنجح و استغنى عن النظاره الطبيه و العدسات و السبب بس عشان نفسيتى تتحسن و اخرج من غير ما احس بالاحراج و كمان مكدبش عليك عشان الاقى عريس كويس يشوفنى بدون نظاره و نظرى سليم

انا عارفه ان السبب الاخرانى سبب تافه بس هنا فى الصعيد الشكليات مهمه عند الشباب لا يهمه تعليمها و لا عملها

و اطلب منكم الدعاء لى بالتوفيق و تلاقوا لى طبيب كويس بيعملها باسعار مناسبه

أقلل عتابك فالبقاء قليل...و الدهر يعدل تارة و يميل

رابط هذا التعليق
شارك

أختي هبه

توكلي على الله و اعمليها

أنا عملت عملية الليزك أنا و زوجتي في مستشفى مغربي سنة 2002 و كانوا الناس بيقولوا علينا مجانين عشان عملناها في نفس الوقت

و من ساعتها مفيش أي مشاكل و ندمنا على ترددنا لسنوات قبل إجراء العمليه

العمليه تكلفت في هذا الوقت 4200 جنيه للفرد و العمليه بسيطه جدا تستغرق 15 دقيقه من أول ما تدخلي لحد ما تخرجي .. مفيش أي الم أثناء العمليه .. بعد العمليه حرقان خفيف يستغرق ساعات و ينتهي

أنا عملت العمليه الظهر و رجعت نمت و صحيت أتفرج على الفيلم الأجنبي في التلفزيون و أقرأ الترجمه من على بعد و أنا مش مصدق نفسي

الزغلله بتروح بالتدريج بعد كام يوم

مستشفى مغربي ممتاز .. بس أسألي على دكتور محمود اسماعيل و اعمليها معاه

عايز أقولك إن صديق جزائري زميلي في العمل في قطر .. صمم ينزل مصر عشان يعملها في نفس المستشفى و مع نفس الدكتور و نزل فعلا و بعد ما عملوا له فحوصات ما قبل العمليه .. رفض الدكتور محمود يعملها له عشان قرنيته مخروطيه

يعني الناس دي لو بتاعة تجاره كانوا عملوهاله و خلاص و خدوا الفلوس

فشل العمليه حسب كلام الدكتور محمود اسماعيل هو أن يبقى النظر كما هو و ده احتمال نادر جدا .. لكن متصدقيش الكلام عن العمى و الزغلله الدائمه و الكلام ده

الا اذا كان المستشفى غير أمين و يعلم أن حالة العين لا تسمح لها بالعمليه و مع ذلك يجرونها للمكسب المادي

مغربي بيعملوا فحوصات كامله عن العين و سمك القرنيه و طبيعة سطحها قبل العمليه بيوم و لو فيه أي مشكله مش بيعملوها .. عشان كده لما بتتعمل بتكون ناجحه ان شاء الله

أعرف طوب الأرض هنا في قطر عملوها و عايشين زي الفل و أعرف واحد زميلي في الشغل عملها سنة 1997 أيام ما كانت ليزر مش ليزك و شايف زي الصقر ما شاء الله لحد دلوقتي بدون مشاكل

و الليزك هو التقنيه الأحدث دلوقتي .. يعني أنت حظك أحسن

توكلي على الله .. لو فيها مشكله كانوا وقفوها من زمان

و كل الناس بتعملها و مفيش مشاكل

المهم مستشفى أمين و دكتور بيفهم .. مش تجاره و خلاص

هاتي نمرة مغربي م الدليل (أنا سنتها جبتها م الدليل) و اتصلي و صممي على دكتور / محمود اسماعيل

وودعي النظاره و العدسات للأبد و عيشي الحياه

على فكره : اتصلي و احجزي قبل النزول للقاهره .. لأن الدكتور / محمود اسماعيل بالذات بيكون له قائمة انتظار لا تقل عن 20يوم و أحيانا تزيد حسب ضغط الحالات

بالتوفيق ان شاء الله

تم تعديل بواسطة ايهاب سالم
رابط هذا التعليق
شارك

الاجازة الماضية لم أمكث في مصر إلا أقل من شهر .. أما زوجتي والأولاد فضربوا الصيف كله هناك .. لكن لما وصلت الرياض لقيتها عامله لي مفاجأة جميلة بصراحة .. وهي إنها راحت مستشفيات مغربي - بالظبط الفرع اللي أمام مسجد السيدة نفيسة .. وأعتقد عملت الفحوصات في فرع مدينة نصر - وعملت عملية الليزر والحمد لله ودعت النظارة الطبية للأبد ..

وزوجتي لم تُجري العملية لمجرد الترفيه .. فهي من كثر المذاكرة أيام الدراسة فعنيها إتلحست وبقت تلبس نظارة مش ظريفة خالص .. وقالت لي بإن العملية بسطية جداً ولا تستغرق وقت طويل .. وكانت في حدود 3500 ج للعينين الإثنين .. والميزة كمان إنهم بيطمئنوا المريض بإنه لو في أي جزء من الدرجة لم تنجح العملية في تصحيحه فيمكنه مراجعتهم في أي وقت خلال عام من تاريخ إجراء العملية لكي يتم تصحيح المتبقى - مجاناً -

والمغربي بصراحة واخد شُهره عالمية في مجال العيون بالذات ...

وأنا عن نفسي عندي عيني الشمال يمكن 9/6 وعشان كده بألبس نظارة خصوصاً أمام شاشة الكمبيوتر وأثناء قيادة السيارة وبإذن الله ناوي أعمل العملية لما أنزل مصر في الصيف .

الأحـــرار يؤمنون بمن معه الحق ..

و العبيــد يؤمنون بمن معه القوة ..

فلا تعجب من دفاع الأحرار عن الضحية دائماً ..

و دفاع العبيد عن الجلاد دائماً

رابط هذا التعليق
شارك

تليفون مستشفى المغربى بالسيدة نفيسة هو 3631111

و أظن هناك فرعين آخرين للمستشفى

لو توصلت لبيانات أخرى سأكتب إليك مرة أخرى

مواطنين لا متفرجين


رابط هذا التعليق
شارك

أنا بقالي تقريبا 7 سنين بألبس نظارة ،،بألبسها في البيت بس وعادي الحمد لله مش مسببالي مشاكل ،، ولما أخرج برا البيت بألبس عدسات .. فكرت أعمل العملية بس بابا رفض ،، خاف من الكلام اللي بيتقال عنها والمشاكل اللي بتسببها ، انا وبابا كلنا بنلبس نظارة .. بس أنا بصراحة مش مستعجلة ان انا اعملها ... قريبتي عملتها من اكتر من خمس سنين والحمد لله نظرها تمام تمام .. وابن خالتي عملها من سنتين وبرضه الحمد لله ناجحة ونظره زي الفل ...

بس أنا استغربت فعلاً من كلامك عن التريقة وتعبك النفسي ،، يا ستي ثلاثة ارباع الناس دلوقتي بيلبسوا نظارات يعني عادي جداً ... وشكل النظارات مش قبيح اوي للدرجة اللي قلتي عليها ..

طب تصدقي بالله ، عندنا في الكلية نص البنات بيلبسوا نظارات ونظرهم ستة على ستة ، يعني النظارات مش طبية ، نظارات شياكة ، وبتلاقيهم بيتنافسوا مين الأشيك ، وفعلا شكلها بيبقى يجنن ، أنا تقريبا في الكلية هواياتي أتفرج على الموديلات الجديدة وماركاتها :excl: .. يعني فيه ماركات بصراحة شكلها بيبقى منتهى الجمال زي مثلاً:

Dior Gucci Armani Chanel

وبالنسبة لسعر العملية ، مفتكرش ان السعر هيغلى ، بالعكس بيرخص من سنة للتانية ، احنا في السعودية السعر بيقل من سنة للتانية ..

تمنياتي لك بعملية ناجحة يا هبه .. يلا خليكي فأر التجارب :excl: ، جربي وقوليلي

جيجي ...

سعودية الجنسية ... مصرية الهوى ...

رابط هذا التعليق
شارك

الفاضلة هبة...

انا عملت عملية الليزك من حوالي أربع سنين في مركز الأسكندرية للعيون...وهو مركز يضم عشرة من أكبر دكاترة العيون في الأسكندرية وله سمعة طيبة جداً...وقد تكلفت أيامها حوالي 3500 جنيه..وكما أشار الأفاضل الموضوع لا يستغرق أكثر من 10 دقائق وتذهبين بعدها بيتك للنوم وتاني يوم الدنيا تبتدي تتفتح قدامك... بس الصراحة انا فضلت أحس بزغللة بسيطة لمدة حوالي تلاتة أشهر بعد العملية خاصة في الليل... وقد قال لي الطبيب وقتها أن هذه الأعراض طبيعية وتختلف مدتها من شخص لأخر وأنها سوف تنتهي ...وقد كان...

ونصيحتي لك إن كنتي تقودين سيارتك كثيراً خاصة باليل أو كنتي ممن يجلسون لساعات طويلة أمام الكمبيوتر فعليك ترتيب هذا الأمر قبل إجراءك للعملية... لأن الزغللة لن تدوم بس برضه محدش يقدر يضمن لك حتستمر يوم ولا شهر...

وكما أشار الأخ إيهاب "المهم مستشفى أمين و دكتور بيفهم" وقبل كل ده طبعاً توفيق ربنا...

وتمنياتي بالتوفيق...

فكأننا والماء من حولنا... قوم جلوس وحولهم ماء...

رابط هذا التعليق
شارك

أهم شىء يا أختى العزيزة هو أن يكون الجهاز حديث جدا...

يعنى انا عملت الليزك من حوالى 5 سنوات ....قعدت اسبوعين عينى مزغللة.

بينما الآن فى الأجهزة الأحدث....الزغللة فقط لمدة يومين.

الشىء المهم الثانى هو انك لآ بد أن تعلمى أنك ستصابى بطول النظر بعد سن الخامسه و الأربعين... يعنى لآ بد أن تكونى متقبله هذا الأحتمال.

الشىء الثالث هو : لآ بد ان تتكلمى مع الطبيب عن تلك العشر دقائق التى ستمرى بها اثناء العملية.

هناك لحظة يضغط بها الجهاز على عينيك فلآ ترين شيئا...

هى مجرد لحظة سريعه....لكنك لو علمتى هذا من قبل فلن ترتعبى.

و أخيرا أقول لكى....

يا ريتنى عملت العملية من زمااااان .... بدل ما كنت كل مرة أخرج فيها خروجة حلوة...أضطر اخلع النظارة و اركب العدسات.

للأسف ...عملت العملية بعد ما اتجوزت....

و بنتى قربت تتجوز كمان... :excl:

ياللآ .... بالتوفيق ان شاء الله.

رابط هذا التعليق
شارك

استاذ عادل بشكرك مره تانيه هو ده اللى كنت محتاجاه طبعا بالاضافه لنصايحكم الغاليه

صدقونى يا جماعه انا محتاجاها جدا انا مش بعمر مع النضارات و لا العدسات زهقت و فاض بيا منهم بس الشكوى والله و دا كله فى الاول والا خر ابتلاء أأجر عليه

و العمليه سواء نجحت او فشلت انا راضيه باللى يجيبوا ربنا بس فى الوقت الحالى مش عايزه الموضوع يبقى موت و خراب ديار يعنى على الاقل فيه فرصه

الاخت العزيزه سعوديه الهوى طبعا انتى مش حتقوليلى على بنات السعوديه يا سلام عليهم و على شياكتهم بس بينى و بينك انا لى واحده صحبتى من النت طبعا و هى ايه سعوديه بقلها انا بستعمل نظاره طبيه قالت لى على كده يكون عندك هالات سودا تحت عينيكى

طبعا انا عندى هالات بتروح و تيجى و عارفه ان النضاره مش هى السبب

السبب انى من النوع اللى بيسهر لوش الفجر على النت على التليفون او حتى المذاكره ايام الدراسه عاده وحشه ان شاء الله ابطلها

و على فكره احب اقولك انى غيرت حوالى اربع نضارات و كنت بشترى موديلات و اشكال حلوه و العدسات احيانا فوتو براون و احيانا انتررفلكشن اما العدسات الللاصقه فأنا جربت نوع واحد و زى ما قلت انى تعبت معاها لانى بلبسها طول النهار

و اخيرا فيه امل فى العمليه يارب تنجح

عارفه لو نجحت ليكى الحلاوه

الاخ وجدى اشكرك على التجاوب و انا اللى عرفت من اللى حكوا تجاربهم عن العمليه ان الاغلبيه نجحت معاهم و نسبه الفشل موجوده بس ضئيله يارب ما اكون منها

الاخت العزيزه هنون

لو تعرفى حلم العمليه ده يراودنى من اربع سنين لما كشفت اول مره و انا ساعتها عملت استشاره طبيه عند طبيبين من افضل الاستاذه فى جامعه القاهره و طبعا الاتنين تقريبا قالوا نفس الكلام و شرحوا لى مخاطر العمليه و ازاى هى بتتعمل اصلا و حتى حكايه طول النظر دى عرفتها بس اظن انها مش بتحصل لكل الناس

و انا الحمد لله عرفت من الانترنت و من استشاره الاطباء كل اللى محتاجه معرفته عن العمليه بس اتمنى من الله التوفيق

و دعواتكم لى

أقلل عتابك فالبقاء قليل...و الدهر يعدل تارة و يميل

رابط هذا التعليق
شارك

بصي يا هبه يا حبيبتي ... أنا بعد ما قريت كلامك كله .. هأقولك ..

اتكلي على الله واعملي العملية ومتتراجعيش ابداااا ...

وإن شاء الله هتنجح وهنشوفك قريب من غير نظارات ولا عدسات ...

ومتنسيش إنك قلتي لي الحلاوة :wub:

مستنياها ...

تحياتي .. جيجي

جيجي ...

سعودية الجنسية ... مصرية الهوى ...

رابط هذا التعليق
شارك

لأ

لأ

لأ

إستني قبلي ما تعملي العملية يا هبه .. عايز أقولك حاجة ...

وإنتي بتردي على جيجي قولتلها

الاخت العزيزه سعوديه الهوى

والحمد لله لحقنا نلم الموضوع ونصحح الخطأ .... هي إسمها " مصرية الهوى "

روحي إعملي العملية يا هبه وبإذن ترجعي بالسلامة بعيون كعيون الصقر في كبد السماء عندما يرى الأرنب البري بين الأعشاب الخضراء في المروج الواسعة ..

الأحـــرار يؤمنون بمن معه الحق ..

و العبيــد يؤمنون بمن معه القوة ..

فلا تعجب من دفاع الأحرار عن الضحية دائماً ..

و دفاع العبيد عن الجلاد دائماً

رابط هذا التعليق
شارك

  • بعد 2 سنة...

يااااااه و الله كانت ايام

الموضوع بقى قديم عدى دلوقتى ييجى سنتين و اكثر و انا مدينى بشكر لكل اللى شجعونى و كل اللى امدونى بمعلومات عن مستشفى المغربى و كمان نتيجة العملية ضرورى احكى كل اللى حصل

اولا لما رحت القاهرة رحت مباشرة على الدكتور اللى كنت براجع عنده من الاول و اللى كان بيرجعنى قبل كده 3 مرات و يقول العملية متنفعش ليكى دلوقتى عشان انتى صغير لازم يكون سنك اكبر من 21

لكن اخرتها حضرته حولنى على المستشفى بتاعت ابنه تتصوروا يا ناس دكتور صغير يتعلم فيا مكنتش غلبت و جيت من اسوان عشان كده لأ و كان حيأخرنا و يقول العملية بعد كام يوم

قلت مبدهاش لازم اروح المغربى بس خفت لاحسن تكون غالية العملية هناك او اتأخر بزيادة

المهم رحنا هناك و الله مش قادرة اوصف لكم كم الراحة اللى شعرت بيها بجد بجد مستشفى المغربى ده صرح المفروض المصريين كلهم يفخروا بيهم بجد و الله مش مجاملة و لا مبالغة على الاقل ده رأيى

لما رحت هناك لم يطول انتظارى على الاطلاق و بدأت الفحوصات بسرعة لكن الفحوصات نفسها كانت كتيرة عشان يتحدد اى نوع يناسب عينى لانه كان فيه نوعين حقيقة لا اتذكر التفاصيل الطبية

المهم جاءت نتيجة الفحوصات لتبشر بان النوع الاول هو اللى يناسبنى و العملية تكلفتها للعينين 4700 جنية دى التكلفة الكلية 4000 تمن العملية نفسها و 700 الفحوصات

فى اليوم الثانى اجريت العملية و لم اشعر بشى بعدها سوى كأنه فيه غيم على عيونى و بقيت اشوف بوضوح بعد مضى حوالى 3 ساعات بعد العملية و فى الايام التالية الى الان لم اشعر بشى و نظرى ستة على ستة الحمد لله

كذلك المستشفى عملت لى فحص مجانى فى اليوم التالى و فى نفس اليوم غادرت القاهرة يعنى المشوار كله كان 3 ايام لو كنت عملتها عند الدكتور الاولانى كنت اخدت اسبوع

صراحة مستشفى المغربى هايلة من حيث كل شئ و احسن حاجة فيها معاملة الاطباء حتى الدكتور طول الوقت كان بيقولى يا باشمهندسة ...كنت قربت اصدق نفسى

.

.

.

.

.

.

.

.

بالمناسبة فين اختنا مصرية الهوى مش شايفاها فى المنتدى ..عسى المانع خير

أقلل عتابك فالبقاء قليل...و الدهر يعدل تارة و يميل

رابط هذا التعليق
شارك

  • بعد 7 شهور...

انا لسة سائلة دلوقتى فى مغربى قالتلى فى جهازين واحد ب 5000 والتانى ب 7000

اية الأسعار دى .. انا اللى اعرفة انها ب 3000 لما قلتوا ب 4200 قلت اروح اسأل قالتلى الاسعار دى

يعنى فى خلال 8 شهور تزيد حوالى 800 جنية .. حاجة غريبة وكمان ممكن يطلعوا 2800

انا كمان لقيت ان دكتور محمود اسماعيل ساب المستشفى

يا ريت لو الأخ اللى قال انة عمل العملية عند دكتور محمود اسماعيل يقدر يدينى تليفونة

تم تعديل بواسطة msrawya
رابط هذا التعليق
شارك

انا كنت متأكده انى كتبت المداخلةدى....دلوقتى لما فتحت الموضوع لقتها مش ظاهره

عموما انا كنت قلت انى لما سألت اول مرة كانت ب 3000 و ده من ييجى 6 سنين لما كنت فى اولى كلية

فى سنة 2006 سعر العلمية عند الدكتور اللى كنت بكشف عنده من الاول (صراحة انا نسيت اسمه) المهم انا رحت اعادة عنده ييجى 3 مرات فى آخر مرة حولنى على مستشفى بتاعت ابه و تكلفة العملية كانت 4000

بس انا رحت عملتها فى المغربى بنفس السعر و هو لا يشمل تكلفة الفحوصات الاولية و هى قدرها 700 جنية

الكلام ده كان فى يونيو 2006

اظن فى سنتين و السعر يزيد 1000 دى حاجة معقولة

كل حاجة بتغلى دلوقتى جت على دى يعنى

الاخت مصراوية بالنسبة للدكتور محمود اسماعيل انا كمان ملقتهوش ساعتها بس الدكاترة كلهم فى مستشفى المغربى ممتازين و الاجهزة حديثة و المستشفى ممتاز صراحة

و متخافيش الاطباء راح يصارحوكى لو العملية متنفعش او فيه مشاكل

و انا عمليتى نجحت الحمد لله و للنهارده نظرى كويس الحمد لله

اتمنى الشقاء للجميع

تم تعديل بواسطة ~Heba~

أقلل عتابك فالبقاء قليل...و الدهر يعدل تارة و يميل

رابط هذا التعليق
شارك

الف الف سلامه علي عيونك الحلوة يا هبه.. :P

مبروك نجاح العمليه وان شاء الله ما تشكيش من اي شيئ بعد كدا............المعلومات دي مفيده جدا جدا لان لي صديقه عزيزه جدا .......تقدري تقولي الانتيم........كانت لسه بتحكي انها عايزة تعملها بس محتاجه تشجيع لانها متخوفه حبتين من نسب النجاح................الف سلامه تاني يا هبه ...تحياتي :roseop: :wub:

تم تعديل بواسطة galaxy

املأ عينيك من وجوه الأحباء والأهل والأصدقاء فقد يغيبون عنك بعد حين ولا تؤجل إفصاحك لهم عن مشاعرك الطيبة تجاههم إلى الغد فقد لا يكونون على مسرح الحياة حين يجيء ذلك الغد

رابط هذا التعليق
شارك

انشئ حساب جديد أو قم بتسجيل دخولك لتتمكن من إضافة تعليق جديد

يجب ان تكون عضوا لدينا لتتمكن من التعليق

انشئ حساب جديد

سجل حسابك الجديد لدينا في الموقع بمنتهي السهوله .

سجل حساب جديد

تسجيل دخول

هل تمتلك حساب بالفعل؟ سجل دخولك من هنا.

سجل دخولك الان
  • المتواجدون الآن   0 أعضاء متواجدين الان

    • لا يوجد أعضاء مسجلون يتصفحون هذه الصفحة
×
×
  • أضف...