أعزاءي المحاوراتية، بتحبوا تتعشوا إيه؟!

[عبدالحكيم]

وجبة الفطار وجبة الغداء خياراتهما كثيرة جداً.. بس الحيرة الحقيقة فعلاً في وجبة العشاء، خصوصاً لمن يحب أن ينام "خفيف"!

طول عمري كنت أشوف أبوي - الله يطول عمره – لا يأكل أبداً طبيخ أو مشاوي أو لحوم في وجبة العشاء، إنما يطلب من أمي – الله يطول عمرها - قطعة جبن وكسرة خبز، ويكون في غاية الرضا والسعادة، مع أن طبيعة عمله تحتاج لجهد عضلي كبير.. سألته ذات مرة وأنا أجول في أطباق الطبيخ المختلفة أمامي، فأشار إلى وجبته الخفيفة وقال هذا أفضل!

تذكرت هذا الموقف لأني بالأمس احترت أتعشى ايه! لأني زهقت من التكرار! فذهبت إلى كارفور قريب من بيتي وأول ما دخلت حدثت المفاجأة! وقعت عيني على شيء مفتقده من زمان، البطيخ!

اشتريت بطيخة حلوة و"خبّطت" عليها من فوق وكل أملي أن تكون من الداخل كما أتمنى! واشتريت خبز طازج فريش خطير، وعندي في البيت جبنة حادقة، مملحة ومشطشة على خفيف!

حطيت البطيخة في الثلاجة لمدة ساعة ونص علشان تسقّع، وطلعتها ومسكت السكينة، وقلت: بسم الله، فكانت كما تمنيت!

عندما تذوقت أول لقمة "نفسي اتفتحت"! لم أتوقف إلا بعد أن قضيت على كيس الخبز كله، ونصف البطيخة، وجزء كبير من قالب الجبن!!!

وهكذا انتهت المعركة على خير، واحتمال كبير أن أستكملها الليلة إن شاء الله!!

الآن، جاء دوركم لتقصوا علينا وجبة العشاء المفضلة عندكم، وماذا تفعلون عندما تستبد بكم الحيرة؟! ويا سلام لو فيه مغامرات أو أفكار غير متوقعة

[Alshiekh]

الحقيقة بعد انتقالي الى الولايات المتحدة، وجدت نفسي بشكل تلقائي أغير نظام الاكل الذي تعودنا عليه في مصر حيث الوجبات الثلاث.

العشاء هنا موعده هو العودة من العمل والذي يكون مابين الخامسة والثامنة، وبعض الناس يكون متأخرا عن ذلك قليلا.

المهم ان نظام العشاء المتأخر غير موجود ومعظم الناس يكون عشاؤها المبكر -بالنسبة لنا والذي نصر على تسميته غذاء- غير موجود.

يعني نقدر نقول ان الواحد بينام ومعدته مستريحة.

طبعا هذا لاينفي ان هناك من يعشقون الطعام وبالتأكيد يأكلون كثيرا وبدون مواعيد او محددات.

بعض المطاعم تعلن انها تفتح حتى وقت متأخر ... التاسعة مساءا .

ولذلك فوجبة العشاء هنا هي الوجبة الرئيسية.

هذا النظام يذكرني بالريف في الماضي، حيث العشاء كان هو الوجبة الرئيسية وكان موعده بعد الغروب.

أتذكر جدتي عندما كنا نذهب للريف في اجازة الصيف ، كانت تقول لنا "المثل بيقول افطروا واتنطوروا، اتغدوا واتمدوا (تقييلة) واتعشوا واتمشوا".

[عبدالحكيم]

معك يا حق يا أستاذ محمد، الوضع بره مصر مختلف، مش بس في الوجبات، ده كمان في نوع الأكل.

أنا لسة امبارح متغدي "مدفون"!! عمرك سمعت عنه؟ دي وجبة عُمانية مشهورة في دول الخليج، وعبارة عن لحمة خروف بتتعمل على الفحم مع رز برياني، واو!

وعلى فكرة الأكلة دي لسة سامع عنها من يومين بس واتصدمت من اسمها. بس قلت لازم أجربها!

بس أنا بصراحة أكتر حاجتين افتقدتهم لما سافرت: الفطار فول الصبح، خصوصاً على عربية فول عليها زحمة، وعصير القصب!

بس يا أستاذ محمد مقولتش بتحب تتعشى ايه؟ وبتعمل ايه لما بتحتار في الوجبة المظلومة دي؟

[باهى الطائر الحزين]

موضوع خفيف وطريف استاذ / عبد الحكيم

طبعا زى ما محمد بك قال فإن الوجبه الرئيسيه

هى العشاء ﻹى رجل عامل

وبالطبع لها طقوس خاصه حيث المرء يثقل فى

العشاء ويتخفف من احمال النهار إرهاقا وعناء

فى الغالب اتناول عشائي بالخارج وده ﻷن حتى

اﻷن محدش اتكلم عليا وفاتنى قطار الزواج بشويه

مش كتير اوى يعنى

جرب كل انواع اﻷطعمه فى العشاء ولم ارتاح او

معدتى بالأحرى إﻻ فى اللحوم وخاصه الشواء

اى حاجه بقى مهم لحمه

ههههه

اما إذا كان عشائي مضطرا فى البيت فأن الواد

ابنى بيعمل مكرونه هايله مع اى لحوم مصنعه

هذا وبالله التوفيق

وعشا الغﻻبه عليك يارب

[التونسى]

عن نفسى مليش روتين معين فى موضوع الأكل .. ولا اعترف ب مواعيد محدده او تسميات ال((فطار وغدا وعشا )) .. انا عامل زى العربيه .. يعنى بمون معدتى وقت ما بتطلب ههههههههههههههههه .. يعنى ممكن يوم أصحى وماكلش حتى الخامسه مساءا .. مش ببقى جعان او بالبلدى كده نفسى ((مسدوده)) .. وأيام بصحى بفطر طبيخ او سمك مدخن مثلا ههههههههههههههههههههه .. وايام ممكن اكل خمس وجبات مثلا على مدار اليوم .. لكنى بحاول حاليا انى فعلا ماكلش بالليل خصوصا قبل النوم .. وبحاول انى اعود نفسى اكل زبادى بس

[عبدالحكيم]

ياه يا أستاذ باهي، فكرتني بأيام العزوبية لما كنت مدمن على الأكل برة، لدرجة إني كنت مصاحب الموظفين في مطعم جاد، وحفظوا طلباتي، ولما كنت بعزم زمايلي كانوا بيرحبوا بي قدامهم كأني من كبار الزوار! بس اختفيت من عندهم بعد الجواز طوالي!!

بالنسبة للمكرونة، وسع وسع دا أنا خبير فيها، خصوصاً بعد ما حرقتها كذا مرة!

[عبدالحكيم]

معقولة يا أستاذ محمود ممكن تفطر سمك مدخن؟! بس يعني ايه مدخن؟!! مشوي يعني ولا ايه أصلا عمري ما سمعت عنه

وكمان خمس وجبات يا (مش مفتري)؟!! ولسة بتفكر تأكل زبادي بس على العشاء! بصراحة انت عشرة على عشرة خصوصا لما تصحى الصبح ونفسك مسدودة!

تم تعديل 12 مارس 2014 بواسطة عبدالحكيم

[التونسى]

معقولة يا أستاذ محمود ممكن تفطر سمك مدخن؟! بس يعني ايه مدخن؟!! مشوي يعني ولا ايه أصلا عمري ما سمعت عنه

وكمان خمس وجبات يا (مش مفتري)؟!! ولسة بتفكر تأكل زبادي بس على العشاء! بصراحة انت عشرة على عشرة خصوصا لما تصحى الصبح ونفسك مسدودة!

الرنجه وما شابه يا مان .. انا اساسا قلما اصحى واكون جعان .. يمكن عشان بدبها اكل بالليل هههههههههههههههه .. وكنت بفطر دايما بس لما كنت بدخن عشان بطنى متكونش فاضيه .. واسوء عاداتى انى ممكن لو فطرت الصبح انى اكل بصلايه حيه .. وقابل يا عم بقى ههههههههههههههههههههههههههههه

[Grandma]

المعدة ما بقيتش زي زمان يا أحفادي الحلوين

يا دوب الواحد يأزأز كام صوباع كفتة على منبار

يبلعهم بحتتين بفتيك وجنبهم طبق طرشي صغنن

بحلي بحلة محشي بالسمن البلدي

و أحبس بقى بطبق كبدة اسكندراني و أدخل أنام على طول

ياللا لازم الواحد في السن دا يخفف م الأكل شوية علشان صحته

فوتكم بعافية و صحة وهنا

[أبو محمد]

فى ليالى الشتاء الباردة .. حيث ترى الكل متكلفتا

وحيث الدفا عفا .. والبرد لحّاس القفا

أهب من تحت البطانية منشدا هاتفا ومؤيدا

العدس الليلة الليلة ليلة عيده

يا رب تبارك تبارك وتزيده

https://www.youtube.com/watch?v=cppu11Vbmus

[tarek hassan]

المعدة ما بقيتش زي زمان يا أحفادي الحلوين

يا دوب الواحد يأزأز كام صوباع كفتة على منبار

يبلعهم بحتتين بفتيك وجنبهم طبق طرشي صغنن

بحلي بحلة محشي بالسمن البلدي

و أحبس بقى بطبق كبدة اسكندراني و أدخل أنام على طول

ياللا لازم الواحد في السن دا يخفف م الأكل شوية علشان صحته

فوتكم بعافية و صحة وهنا

المشكلة الأزأزة والنأنأة دايما بتبقى خدعة .... فأتعشى بالهنا والشفا عالطول أرحم من الأزأزة دي

[Grandma]

المشكلة الأزأزة والنأنأة دايما بتبقى خدعة .... فأتعشى بالهنا والشفا عالطول أرحم من الأزأزة دي

ياريت أقدر يابني ... القولون مش مساعد

و الكبد تعبان دا غير القرحة و الطحال

و المرارة المفقوعة

خلينا في الأزأزة و النأنأة و الحاجات الخفيفة اللي متعودين عليها أحسن أتعب

[tarek hassan]

ياريت أقدر يابني ... القولون مش مساعد

و الكبد تعبان دا غير القرحة و الطحال

و المرارة المفقوعة

خلينا في الأزأزة و النأنأة و الحاجات الخفيفة اللي متعودين عليها أحسن أتعب

ألف ألف سلامة ...... بس نسيتي الشنان

[Grandma]

ألف ألف سلامة ...... بس نسيتي الشنان

لا ما أنا مركبة طقم ... هننكر نعمة ربنا