السيارات .. تكنولوجيا وصيانة ..

[a_ragab_itp]

شكرا يا سيدى على تعبك

هحكيلك على موقف ظريف حدث بمناسبة موضوع المانيوال فى يوم كنت فاضى واصريت انى اجيب هذا المانيوال واعدت انخرب على النت لمده طويلة ولم استطع وفى النهاية بعد ما زهقت بعدت رساله اليكترونية للشركة هيونداى الام ونسيت الموضوع واعتبرته حاجه عادية المهم بعدها بيوم او اثنين فوجئت بالموبايل بيرن واللى بيكلمنى بيقولى صباح الخير انا المهندس فلان من شركة غبور هيونداى مصر

وقال لى ان الشركة الام كلمتهم بخصوص طلبى للمانيومال بتاع العربية وفوجئت ان الراجل تفضل مشكورا وجهز لى المانيوال وكلمنى فى التليفون وقال لى تقدر تيجى تاخده فى اى وقت وقلت بس يا حلو يبقى اكيد الموضوع فيه فلوس وفوجئت انه بيقولى ان الموضوع مجانى ومفيش مشاكل ولكننى لم افضى حتى اروح استلمه

ولكنى اتبسط جدا من المعاملة بصراحة ولكنى فى نص هدومى لاننى لسه ما فضيتش اجيب المانيوال من الراجل مع انه اهتم بالموضوع وده شئ بسطنى جدا وبصراحة احترمت الشركة الام لاهتمامها بالعملاء بتوعها

[green bird]

شكرا على اهتمامك يا أسو ...

وانت فعلا فعلا مهندس بما لديك من خبره فى هذا المجال والتى تتضح من اجاباتك

وياريت تكمل لنا الكتابه عن اغلب المشاكل وكيفيه التعامل معها

يعنى عايزين نتثقف وننتفع بخبرتك الكبيره :-)(-:

[a_ragab_itp]

ايه يا عم اسو الحكايه انت زهقت مننا ولا ايه

فينك من زمان رحت فين

نرجو ان تكون بخير ولا اتحسدت ولا ايه

نرجو انك تطمئننا

[عصام]

ايه يا عم اسو الحكايه انت زهقت مننا ولا ايه

فينك من زمان رحت فين

نرجو ان تكون بخير ولا اتحسدت ولا ايه

نرجو انك تطمئننا

لا والله لسه بااااااادرى ...

نحن ما زلنا فى أوج مرحلة العطاء

المسألة بس كانت شبه أجازة علشان العشرة الأواخر والعيد كل سنة وانتوا طيبين ..

سنواصل البث إن شاء الله بدءا من يوم الأحد القادم .. (مع إنه أجازة الميكانيكية يا س س يا حبيبى (واحد بيجز على سنانه :D )

[a_ragab_itp]

ازيك يا باش مهندس وحمد الله على السلامة

عايز ارش اكصدمات العربية

ينفع ارشهم بويه فرن من غير فرن بتاع الدوكو قال لى ينفع

وذلك نظرا لرخص ذلك

بالفرن 150جنيه

من غير فرن 50جنيه

ما رايكم اطال الله عمركم

[عصام]

ازيك يا باش مهندس وحمد الله على السلامة

عايز ارش اكصدمات العربية

ينفع ارشهم بويه فرن من غير فرن بتاع الدوكو قال لى ينفع

وذلك نظرا لرخص ذلك

بالفرن 150جنيه

من غير فرن 50جنيه

ما رايكم اطال الله عمركم

ما ترشهمش أصلا :rolleyes:

إكصدامات الإكسل خليط من البلاستيك والكاوتش rubber .. وده بيتسبب فى إنه بيكون طرى جدا ..

في حين إن البوية عموما بتكون "جافة" نسبيا .. نتنيجة للمعجون والطبقة البطانة اللى بتكون تحتها ..

وده بيتسبب فى إن البوية بتقشر عند أى "ترييحة" بالعربية على حيطة مثلا أو عربية تانية ..

فبيحصل إنها "تتكسر" وتبدأ فى التقشر أوتوماتيكيا .. ثم تبدأ فى التساقط تاركة منظر العربية "زبالة" .. الحقيقة ده اللفظ الوحيد اللى ممكن يوصفها ساعتها ..

طيب ليه ده ما بيحصلش فى عربيات تانية؟

لأنها أولا بتكون مدهونة دهان المصنع وتكون معالجة (البوية) لتلافى هذا العيب .. أما السبب الآخر .. فهو إن الاكصدامات الجديدة كلها بلاستيك فقط بدون أى نسبة rubber حاجة كده حلية زى لعب الأطفال فبتكون ناشفة .. فلا يحدث تكسير للبوية نتيجة الاحتكاك أو "الترييح"

بلاش يابنى .. غيرك جربها ... وندم

[a_ragab_itp]

طيب يا عمنا وايه الحل ...... أحرقها ولا ايه

علما بان شكلها فعلا بقى ازبل من الزبالة

كمان عايز اقولك ان عفشة العربية بقت زباله موووووت ومش عارف حد بتاع عفشة امين لو تعرف قولى تبقى عملت معروف.

سؤال كمان والحساب يجم ما تعرفش واحد ميكانيكى كويس بيفهم فى الورد الفيستا أحسن واحد صاحبى الحساسات بتاعتها باظت وعماله تقطع ولف بيها كثير ومش لاقى حل وخايف يروح التوكيل لان زى ما انت عارف توكيل فورد ما شاء الله صباح لخير عندهم بفلوس

[عصام]

طيب يا عمنا وايه الحل ...... أحرقها ولا ايه

علما بان شكلها فعلا بقى ازبل من الزبالة

كمان عايز اقولك ان عفشة العربية بقت زباله موووووت ومش عارف حد بتاع عفشة امين لو تعرف قولى تبقى عملت معروف.

سؤال كمان والحساب يجم ما تعرفش واحد ميكانيكى كويس بيفهم فى الورد الفيستا أحسن واحد صاحبى الحساسات بتاعتها باظت وعماله تقطع ولف بيها كثير ومش لاقى حل وخايف يروح التوكيل لان زى ما انت عارف توكيل فورد ما شاء الله صباح لخير عندهم بفلوس

يا سيدى لا تحرقها ولا حاجة .. خليك :blink:

طالما بقت أزبل م الزبالة .. يبقى خليها زبالة بس .. mfb: وتوكل على الله ورشها .. وزى ما يكون ..

أما بخصوص الصنايعية .. سامحنى .. بطلت أرشح حد منهم .. حفاظا على العلاقة الطيبة اللى بينى وبين الناس ..

لأنهم فى الغالب النسبة الأعظم منهم .. تلت حرامية وتلت نصابين وتلت مالوش فيها أساسا :lol:

وكلهم ما بتفرقش معاهم لا عشرة سنين ولا عيش ولا ملح ولا غيره .. أيوه والله .. عن تجربة ..

[a_ragab_itp]

شكرا يا يا جميل

[عصام]

الأسس السليمة للقيادة

مع تزايد عدد الحوادث التي تقع يوميا علي الطرق وازدياد عدد الضحايا أصبح من الضروري العودة للحديث عن قواعد القيادة السليمة التي تحمي قائد السيارة من الحوادث.. وهناك اساسيات في القيادة السليمة نعيد التشديد عليها مرة أخري رغم انها من البديهيات ونبدأها باحياء الشعار الذي تعرض لوقف التنفيذ وهو القيادة: فن وذوق وأخلاق.

ونبدأ بالعنصر الاول وهو الفن وفي هذا الصدد ..

قبل ان تمد يدك لتشغيل المحرك عليك أن تتأكد أن عصا الفتيس في وضع 'المور' ثم جذب ذراع الشفاط للسيارات التي تعمل بهذا النظام ثم نبدأ في تشغيل المارش باستخدام مفتاح الكونتاكت ولابد من تحذير البعض من محاولة استمرار تشغيل المفتاح بطريقة متصلة لمدة اكثر من 15 ثانية اعتقادا منهم ان هذا يساعد في عملية التشغيل وهذا خطأ يقع فيه الكثيرون ولكن اذا لم يتم تشغيل السيارة فعليه ان يقوم بغلق 'الكونتاكت' لفترة بسيطة ثم يقوم باعادة تكرار التشغيل ويراعي في الأيام الباردة الضغط علي بدال الدبرياج أثناء تشغيل المارش لتخفيف الحمل علي المارش والبطارية.

وينسي البعض غلق مفتاح الكونتاكت بعد توقف المحرك وهذا خطر لانه يؤثر علي دائرة الاشعال بالنسبة للسيارات التي تعمل بنظام الإشعال العادي..

ثم قبل بدء التحرك بالسيارة يجب اعادة وضع الشفاط الي مكانه تدريجيا كلما زادت درجة حرارة المحرك حتي ينتظم دوران المحرك.

تحذير هام يجب التحذير من الضغط علي دواسة البنزين الي نهايتها بطريقة سريعة وعنيفة دون الحاجة لذلك اذ ان ذلك يؤدي الي زيادة سرعة دوران المحرك وزيادة شديدة لاتتناسب مع درجة استعداد المحرك للتشغيل بهذه السرعة فهو لايزال في مرحلة بداية التشغيل.

التحرك بالسيارة:

نبدأ في التحرك بالسيارة بالضغط علي الدبرياج ونقل الفتيس علي الأول ثم نضغط علي دواسة البنزين مع رفع القدم عن الدبرياج بمهارة بحيث تتحرك السيارة بسهولة ثم نبدأ عملية النقل الي الثاني أو الثالث مع ازدياد السرعة أو الي الأول لو كان السير بطيئا..

صعود الكباري:

عند صعود السيارة إلي الكباري يجب مراعاة نقل السرعة الي الاقل وتجنب السرعة الزائدة أو المفاجئة.

النزول من الكباري:

هناك خطأ شائع يقوم به البعض عند النزول من الكباري أو أي مكان مرتفع هو وضع الفتيس في 'المور' وهذا في غاية الخطورة فالسيارة في وضع 'المور' تكون في مهب الريح ويمكن لقائد السيارة ان يفقد سيطرته عليها لذا يجب النزول بنفس السرعة التي تصعد بها السيارة مع رفع القدم عن دواسة البنزين.

ملحوظة: الابتعاد التام عن النزول والقدم علي الفرامل لمسافة طويلة فهذا يؤدي إلي ارتفاع درجة حرارة تيل الفرامل والتسبب في احتراقه وتلفه..

السير في المنحنيات:

تتميز الأنفاق وبعض الطرق لدينا بوجود منحنيات شديدة لذا علي قائد السيارة تخفيض السرعة تدريجيا قبل الوصول الي المنحني.. فتخفيض السرعة في المنحنيات ضروري لأن السيارة تكون مندفعة للأمام بفعل التأثير بالقوة (قوة الطرد المركزي) الموجودة في المنحنيات لدفع السيارة لذلك فتخفيض السرعة في المنحنيات ضروري ضروري ضروري حتي لاتحدث كوارث لاقدر الله.

رفع القدم عن الدبرياج ضروري عند الذين اعتادوا وضع القدم بصورة شبه دائمة علي الدبرياج للمحافظة علي عمر اسطوانة الدبرياج..

وينصح السائقين بتهيئة أنفسهم نفسيا وصحيا قبل الجلوس علي مقعد القيادة وان يكونوا في حالة يقظه تامة والبعد عن السرحان في أمور شخصية وان يكون الانتباه في أعلي الدرجات... وياليت الكل يحتفظ بهدوء الاعصاب حتي يمكن التصرف بحكمة امام اي موقف مفاجيء.

ومن هنا تجد ان قائد السيارة الكفء هو الذي يعرف التعامل مع السيارة بالتحكم في تغيير السرعات المتناسبة مع السيارة وظروف الطريق من خلوه من المارة والسيارات أو ازدحامه وبطء الحركة.. واستخدامه الأمثل للدبرياج ودواسة البنزين..

خطورة السرعة الزائدة:

السرعة الزائدة عن الحد هي أقصر الطرق للحوادث.. وكما هو معلوم ان أقصي سرعة داخل المدينة هي 60 كم/ ساعة واقصي سرعة خارج المدينة هي 90 كم في الساعة.. وهذه الأرقام مصممة علي ان تهييء لقائد السيارة القدرة علي السيطرة علي السيارة لأن السرعة كلما زادت فشل قائد السيارة في التحكم فيها وبالتالي عند اي فرملة أو ظهور اي خطر كشخص عابر أو سيارة تقف علي جانب الطريق لاينجح قائد السيارة في ايقاف او تهدئة السرعة نتيجة لسيره علي سرعة زائدة.. لذا ننصح بضرورة الابتعاد عن السرعة الزائدة تحت أي ظرف من الظروف.

القيادة ليلا:

الليل يحمل السكون والهدوء وحتي يتمتع قائد السيارة بجمال الليل والقيادة الممتعة والأمن في نفس الوقت عليه أن يتأكد من سلامة الأنوار الأمامية والخلفية والاشارات ونور الاستوب 'الفرامل' واحيانا نفاجأ بسيارات تسير بدون اضاءة علي الاطلاق وهذا خطأ جسيم فعلي قائد السيارة اضاءة النور الصغير الأمامي والخلفي لتحديد السيارة اثناء الليل حتي تصبح مرئية ولاينسي اعطاء الاشارة عند المنحنيات وصعود الكباري وكذلك تقاطع الطرق التي يتفنن الكثيرون في عبورها بدون ادني اشارة سواء باضاءة النور العالي الرعاش أو حتي استخدام الكلاكس لذا نجد ان مفترق الطرق للأسف مكان يكثر فيه الحوادث.. ولدينا شوارع ضيقة وأخري واسعة وفي كلتا الحالتين يجب السير علي الجانب الأيمن من الطريق وعدم استخدام الضوء العالي الذي يصيب قائدي السيارات الاخري بالعمي فلا يري شيئا وبالتالي تقع الحوادث.. وعند التعرض للنور العالي علي قائد السيارة الالتزام بالجانب الأيمن مع تركيز البصر الي حافة الطريق اليمني وتهدئة السرعة لحين مرور هذا النور العالي.

يخطيء البعض عندما يتوقف علي الطريق دون استخدام إشارات الانتظار مع انه لابد من وضع علامة مثلث التحذير ذي اللون الاحمر الفوسفوري قبل مكان توقف السيارة بمسافة قدرها عشرة أمتار علي الأقل لتحذير السيارات القادمة من الخلف ولابد من التوقف علي حافة الجانب الايمن لا الجانب الايسر أو في عرض الطريق حفاظا علي حياة قائد السيارة وحياة قائدي السيارات الاخري.

ممنوع تخطي السيارات:

من الأشياء الكريهه والتي تحدث بشكل مستمر، قيام قائدي بعض السيارات بتخطي السيارة التي أمامهم وفي طرق ضيقة والتي يكون السير فيها في الاتجاهين.. دون مراعاة أي اشارات تنبيه للسيارات القادمة أو للسيارات الخلفية ودون مراعاة المسافة التي تكفي لعملية التخطي بدون مشاكل.

القيادة في الشبورة وتحت الأمطار:

الشبورة تسبب دوما عدم وضوح للرؤية وكذلك الامطار وان كانت بحمد الله في بلادنا قليلة.. ومن أهم الاحتياطات التي يجب مراعاتها هو حالة الاطارات.. فلو كان 'أملس' فهذا معناه انه في حالة سيئة.. ويتسبب في انزلاق السيارة علي الارض مع أقل استخدام للفرامل وبالتالي يفقد قائد السيارة السيطرة عليها.. وهنا لابد من تغيير الاطارات فورا.. والتأكد أن فوانيس الشبورة صالحة وهي الفوانيس الصغيرة جدا والتي تكون أسفل كشاف النور وهي عادة لاتكون مرئية الا لو دقق الانسان.

ولذا ننصح في حالة الشبورة اضاءة النور الصغير والنور الخلفي الأحمر حتي لاتتعرض السيارة للإصطدام من الخلف أو الأمام وكذلك اضاءة النور الأمامي المنخفض ويبتعد تماما عن النور العالي الذي ينعكس علي قائد السيارة نتيجة لانتشار قطرات المياه بالجو فيزيد من عدم القدرة علي الرؤية وليس العكس كما يعتقد البعض.

ولاننسي استخدام 'الكلاكس' بين حين وآخر حتي يتم تنبيه السيارات الاخري وننصح بعدم زيادة السرعة فهي ينبغي الا تتجاوز 15 كم في الساعة مع تشغيل المساحات.. لحين وضوح الرؤية ونبتعد عن استخدام الفرامل ونقل السرعة ببطء ومهارة حتي يمكن التوقف بأمان..

وعلي الجميع ان يدركوا أن ما وضعه رجال المرور هو في المقام الاول لصالح الناس والمحافظة علي حياتهم وعلي الأسر المصرية أن تعيد النظر في بعض المفاهيم الخاطئة والسائدة من أن القيادة بسرعة زائدة هي مهارة وشطارة من قائدها وأن تخطي السيارات الامامية هو نوع من 'الجدعنة'!!.. ما أجمل أن يصبح سلوكنا جميعا متحضرا محافظا علي سلامتنا وسلامة الآخرين

[kokowawa1979]

بالنسبة للإطار التيوبلس بالطبع أفضل من الإطار مع تيوب في رأيي. لإن التيوب حينما يصاب الإطار بمسمار وماأكثرها يقوم بتفريغ الهواء بسرعة على العكس من التيوبلس الذي يمكنك السير عليه لفترة حتى الوصول إلى أقرب ورشة لإصلاح الإطارات .

علاوة على أن تاريخ إنتاج الإطار يكون مكتوبا بخط بارز على الإطار ومنه يمكنك معرفة ماإذا كان الإطار جديد الصنع أم إنتاج قديم وسوء التخزين يؤدي إلى تشقق الإطارات .

ويمكن معرفة تاريخ إنتاج الإطار عن طريق برواز صغير يكون منتهيا ب 04 ( بالانجليزي طبعا ) أي إنتاج 2004 وإذا كان 02 فهو إنتاج 2002 وهكذا .

أما الرقمين اللذين يسبقان 04 يعني مثلا: 3704 فهذا يعني أن الإطار منتج في الأسبوع 37 من عام 2004 وهكذا بسهولة يمكن معرفة ماإذا كان هذا الإطار قديم أم جديد .

وحاليا يتم ملأ الإطارات بغاز النيتروجين بدلا من الهواء العادي حيث يجعل النيتروجين الإطاربارد دائما ولايتأثر بحرارة الجو أو حرارة الأسفلت الشديدة التي ترفع درجة حرارة السلك المدعم لمطاط الإطاروبالتالي يرفع درجة حرارة الإطار ويتعرض للإنفجار في السرعة العالية .

[إبن مصر]

قال لى الطبيب ان امتثال فى حاجه لنقل جسم مقطع وبعد كده يدق النمره الجديده للشاسيه على القايم ويضيفها للملف .

وتبقى عربيه جديده بتأكيده .

هل افكر فى العمليه التى تعيد امتثال للحياه

والا اولع فى الى فاضل منها بجاااااااااااز

[عصام]

هل افكر فى العمليه التى تعيد امتثال للحياه

والا اولع فى الى فاضل منها بجاااااااااااز

سؤالك ده يا إبنى مكانه مش هنا ..

مكانه الصحيح فى باب "استشارات طبية ونفسية" ولو فيه "أخلاقية" يبقى تمام ..

خدووووه hypr:

[إبن مصر]

قصدك يا دكتور انه

انه

مافيش فايده ...

نهائى..

مهما حاولنا....

يعنى

يعنى

اولع فيها!!!!!!!!!!!!!!!

[عصام]

وانا عازمك على 4 لتر جاز .. هدية للغالية ..

hypr:

trch:

شيل الغطا يابنى ... vmp:

[ماجد]

أخى ابن مصر

قال لى الطبيب ان امتثال فى حاجه لنقل جسم مقطع وبعد كده يدق النمره الجديده للشاسيه على القايم ويضيفها للملف

انصحك بعدم تجديد السياره و بيعها كده اوفر..... عن خبره طويله

اللى هاتصرفه عليها مش هاتجيبه لما تبيعها .

و لا انصحك اطلاقا بدق ارقام الشاسيه على قائم الباب . لأنك ببساطه مش هاتعرف تعدى من الفحص عند التجديد علشان بيتم المقارنه بين الرقم القديم و الجديد و لازم يكون نفس الرقم بنفس فونت الكتابه و ممكن تخش فى جنايه تغيير اجزاء جوهريه من السياره - و دى جنايه مش جنحه - و يمكنك التأكد من ضابط الفحص و مهندس المرور فى المرور اللى انت تبعه.

اسأل على الأجراءات الأول و تأكد منها لأنك ممكن تغير رقم الشاسيه و الموتور كمان بشكل قانونى بس ليها اجراءات قانونيه فى المرور يعنى ممكن تركب للعربيه نص كامل و بالرقم الجديد بس بشكل قانونى .

استعوض ربنا و بيع العربيه . لما تبيعها سجلها للمشترى و لو على حسابك و اعمل اقرار استلام سياره و بيمضى عليه المشترى فى الشهر العقارى علشان ما يعملش اى حاجه غلط زى اللى كنت هاتعملها و تيجى رجلك انت باعتبارك صاحب السياره

[darker19]

لو ممكن حد يقولي رأية في السيارتين دول من حيث قوة المحرك و التحمل و إستهلاك البنزين و أي معلومات تانية ممكن تفيد في إختيار السيارة لأني عقبال عندكم (إلي لسة معندوش سيارة) نويت أشتري واحدة منهم.

1. BMW 318i موديل 1996

2. Nissan Sunny موديل 2002

أه و على فكرة عايز أعرف كل واحدة فيهم كام CC و الCC ده بتاع إيه بالظبط؟ (وش واحد مش عارف حاجة في أي حاجة)

[se_ Elsyed]

الحمد لله طلعنا جدعان قوي وميكانيكية بالجامد ولا الحوجة لعم إسو اللي بيذلنا على ما يدينا معلومة .. وصحيح ياولاد " المواقف الصعبة هي التي تُظهر معادن الرجال " والحمد لله الموقف ده اعطاني ثقة في نفسي وأكد لي ني ممكن أفهم في الميكانيكا بعد 20 سنة كمان

- يوم الأربعاء اللي فات حصل لي موقف زبالة وكنت هابات في قسم الوايلي وأستنى الأدفايزر ييجي يضمنني .. لكن إستطعت بحكمتي المعهودة ان أتداركه واتجاوز الموقف ..

فكان بقى لي إسبوع جهاز الإنذار مش عايز يشتغل ( مهنج يعني ) فقولت بسيطة ادور العربية وأفتحها بالمفتاح وأمري لله .. وبكره أروح للمحل اللي ركب البتاع ده وكويس إنه تحت الضمان .. المهم بكره جاب بعده وإنشغلت .. وجيت يوم الأربعاء ونويت أروح للمحل عشان عيب كده بقى ... وكان الوقت تحديداً بعد الظهر وأنا مروح البيت في وقت الراحة وتحديداً كنت جنب وزارة الدفاع السعودية وإذ بالجهاز يشتغل لوحده وسارينة إنذار السرقة إنطلقت وبقت فضيحة والدنيا أتلمت وأنا مش عارف اعمل إيه والطريق كان زحمه جداً لإن ده ميعاد خروج الموظفين .. وكل وزارة الدفاع بظباطها كانوا خارجين ..

طفيت العربية إنه يبطل ..... أبداً ... قولت اجهز أوراق العربية في إيدي وأي حد هاييجي يضرب هاقول له إقرأ وإتثقف قبل ما تضرب ومش عايز ضرب .. ياريت شتيمه بس ..

ربنا ستر ودلفت ( حلوه دلفت دي ) إلى شارع جانبي وفتحت الكبوت إني أعرف البتاع ده بيتفصل منين أبداً ... فستر ربنا كنت شايل مقص في العربية - طبيعة المهنة بتحكم والواحد بيحن برضوا - روحت منقي سلكين كهربا واصلين بالسارينة واحد تخين ومتضفر والتاني رفيع ومسلوع وروحت متوكل على الله وناطق الشهادتين وقاطعهم والحمد لله بطلت ( والله شكلي كان عامل زي خبراء المفرقعات وهما بيبطلوا مفعول عبوة ناسفة تم زرعها على الطريق العام والحمد لله فشلوا وانفجرت لدى مرور رتل من الآليات العسكرية الأمريكية wst:: )

تاني يوم روحت للمحل بتاع الاجهزة وقولت له شوف المصيبة اللي الجهاز عملهالي ... الرجال فتح الكبوت وشاف السلوك المقطعة ولقيته بكى ووقع على الأرض وراح قايم وزاغر لي ....انا قولت هايمد إيده هو كمان روحت واخد موقف دفاعي .. وراح قايل لي إنت عملت إيه فالح ؟

قولت له قطعت سلك السرينة!!! إيه غلطت ؟ اطلع من البلد يعني ولا أستنى لما أبات في القسم بعيد عن عيالي .

فقالي يا أستاذ إنت قطعت سلك السارينة وقطعت كمان معاه سلك الكهربا الأرضي بتاع الموتور وده سلك بييجي من الوكالة .. وقالي العربية عملت إيه معاك من إمبارح ؟

قولت له كانت بتقطع وبتبطل مني في الإشارات وانا واقف و كنت بأقول لنفسي دي اكيد برده من الجو والموتور لسه ماسخنش..

فقالي : شوفت بقى ... السبب هو السلك اللي إتقطع يا بيه يا بتاع المدارس

فالحمد لله إتصرف الراجل ووصل السلك بطريقة معينة بحيث ما يحصلش فيه أي تهريب ...

وبرضوا ولا الحوجة لك يا إسو ...

[عصام]

الحمد لله طلعنا جدعان قوي وميكانيكية بالجامد ولا الحوجة لعم إسو

وبرضوا ولا الحوجة لك يا إسو ...

wst:: :unsure: bk:

[Modest]

إسوووووو ..... ممكن سؤال فني؟

سامعك بتقول ممكن طبعاً :D

بعد اللي سمعناه عن هبوط اسعار السيارات "الصغيرة" كم يبلغ سعر هيونداي اكسيل 1500 موديل 95 لكن ماشية حوالي 30 ألف فقط لإنها مركونة معظم شهور السنة و معظم الكيلومترات اللي مشيتهم كانوا على الطرق السريعة يعني حالتها ممتازة.