مواقف مضحكة حقيقية

[tarek hassan]

أعجبني موضوع في أحد المنتديات يحكي فيه الأعضاء لمواقف طبيعية طريفة حدثت معهم وهي كثيرة وأعجبتني الفكرة والمحتوى كثيرا ولذلك أدعو الأعضاء هنا لكتابة مواقف حدثت معهم ولا ينسونها ولا يمانعون في ذكرها هنا

وبداية أنقل لحضراتكم بعض هذه المواقف التي قرأتها لأناس يتسمون بالظرف والمرح والفكاهة

حصل لي موقف مره كنت ماشي هنا في فيينا وفي الشارع لاقيت واحد بيرمي ورقه على الأرض و على حظه كان فيه ضابط معدي .. قولت في بالي الراجل دا أكيد مصري اللي يبقي جمبه بتاع الزباله ويرمي على الأرض أكيد مصري .. روحت قربت أتفرج الضابط بيقول له إيه وكده

بعد ما الضابط خلص ومشي الراجل بص لي وقال لي أنت مصري صح؟ انا اتخضيت قولت له أيوه عرفت منين؟ قال لي ماهو محدش وقف يتفرج غيرك ومين بيعمل كده غير المصريين؟؟

أنا عرفته وهو عرفني المصري .. أم الاجنبي

موقف لآخر

مره ماما كانت فى المطبخ و تقريبا البوتجاز حصل فيه حاجه فجأه فماما صرخت صرخة جامدة فأنا جريت أشوفها

وبابا بقى كان بيصلى كان لسه بيقول الفاتحه سمعها جرى عليها من غير ما يسلم

لما وصل المطبخ افتكر انو مسلمش فوقف سلم في المطبخ ( استغفر الله العظيم )

لا يمكن حد يتخيل الموقف

وفيه واحد بيقول

أنا مره داخل البيت قلت للأمن أعوذ بالله من الشيطان الرجيم بدل السلام عليكم

موقف آخر

كنت بشتري حاجات من محل ملابس

والبنت بنتي سابت من إيدي

خلصت كلام مع البياع وأخدتها من إيدها من غير ما ابص وعاوز أخرج وأنا بكلم البياع

والبنت مش راضيه تخرج

أشدها مش راضيه

أشدها مش راضيه ولاحظت إن المحل كله سمع هس

خدت البنت وجاي أخرج لقيت إيديها في إيد راجل تاني وبجره معايا

أتاريني خدت إيد بنت تانيه وأبوها ماسكها من إيدها التانيه والبنت مرعوبه وأبوها مش فاهم حاجه ؟؟؟

كملوا أنتم بقى

تم تعديل 3 يونيو 2011 بواسطة tarek hassan

[spain]

بصراحة اختيار موفق

الموقف رقم 2 موتني من الضحك

انا دلوقتي قاعدة في البلكونة وحدي

ولو حد ماشي في الشارع عندي حيقول مالها المجنونة دي

[tarek hassan]

بصراحة اختيار موفق

الموقف رقم 2 موتني من الضحك

انا دلوقتي قاعدة في البلكونة وحدي

ولو حد ماشي في الشارع عندي حيقول مالها المجنونة دي

شكرا وعلشان التشجيعة موقف آخر

واحد صاحبى طلع بيتهم قابل واحد ميعرفهوش نازل بغساله الراجل وبيقوله والنبى يا صاحبى إيدك معايا أنزلها تحت وأحطها على العربيه

الواد راح واخد الغساله كلها على كتفه وحطها له على العربيه

والراجل مشى

شويه وسمع أمه بتصوت طلع البيت بتقولو حرامى سرق الغساله حرامى سرق الغساله

قالها ده أنا الى حطيتها له فى العربيه

بس أخد الى فيه النصيب من التهزيق من أمه ويومها صعب عليا أوى

آخر موقف حصلي هنا في السعودية كنت راكب العربية وسرحان

وداخل على إشارة مرور الإشارة وقتها كانت خضرا رحت أنا وقفت وأول ما بقت الاشارة حمرا مشيت

ومن حظي النحس كانت في عربية مرور بجانب الإشارة

راح مسكني وإداني غرامة 300 ريال وكان عاوز يحبسني بس في الاخر اكتفى بالغرامة

كان منظري زباله والعربيات كلها داخله عليا بس ربنا ستر

ومن يومها كل ما أعدي على إشارة اطلع الدليل خضرا يعني سر وحمرا يعني قف

تم تعديل 3 يونيو 2011 بواسطة tarek hassan

[باهى الطائر الحزين]

غالبا يوم الجمعه بعد الصلاه نذهب انا وابنى لنتسوق طلبات الاسبوع

فى الماركت يسحب كلآ منا سله ويذهب فى اتجاه معاكس للاخر ، ثم نلتقى عند السياره

وكلانا قد اشترى نفس الاشياء angl::

ويحدث ذلك كل جمعه

[طبيبة بالخارج]

اللي عنده أولاد مش حيخلص من المواقف المضحكة المبكية أحيانا (للأم طبعا)

_ بنتي نغم في سن 3-4 سنوات كنا راكبين قطار الصعيد و بعدين فجأة سألتني: ماما هو اللي قدامنا ناس؟

أنا: أيوه يا نغم.

نغم: طيب هو اللي ورانا ناس؟

بدأت أضحك: أيوه يا نغم

نغم: ماما هو احنا ناس؟ ههههههههههه من ورايا و من قدامي

__________________________________________________________________

ابني سمعة آخر العنقود و عمره حوالي سنة و نصف فجأة اختفى عن نظري و مش سمعاله حس (طبعا بقول في كارثة مستنياني) بدأت أدور عليه فلقيتوه فيييييييييين؟ في طبق رمل القطة ........ و قاعد مبسوط و بيلعب و كأنه على شاطيء ميامي ........قشعرت و انا بحكي

__________________________________________________________________

كنت سهرانة مع ولدي التوأم طول الليل (كانوا لسه في أول 3 شهور) و يدوبك نمت الساعة 7 الصبح و لقيت نغم و عمرها كان سنتين و شوية بتصحيني الساعة 9 و هي ماسكة البامبرز في ايدها فقمت بسرعة لانقاذ ما يمكن انقاذه فلقيتها كانت خلاص قامت بالواجب و زيادة. باب الثلاجة مفتوح و البيض مفقوس على الموكيت و معجون فوقه لبن البودرة و حاجات تانية bsh:) و حتى الآن البقعة مش راضية تروح

____________________________________________________________________

الولدين التوأم كانوا حوالي سنتين و نصف و لسه مشطفاهم و مغيرين هدومهم و بعدين اتشغلت في التليفون و بعد ما خلصت لقيتهم فيييييييين؟ طبعا في الحمام بيغسلوا هدومهم اللي قلعوها في ماء التواليتbnd5::

و اكمل بعدين ان شاء الله

[طبيبة بالخارج]

سمعة آخر العنقود كان جالس في غرفة المعيشة يتفرج على التلفاز و يلعب مع القط (الحمد لله هرب من نفسه من كام يوم) و أنا في المطبخ أحضر الغداء و بعدين لم أعد أسمع له حس فرحت أطمئن فلم أجده و بعدين اكتشفت انه فتح الشباك و طلع قعد مع القط على حافة الشباك الخارجية و قفل الشباك عليهم

................

................

...............

...............

...............

................

الحمد لله احنا ساكنين في الدور الأرضي و كمان في حديد على الشبابيك

[طبيبة بالخارج]

طول عمر ولدي التوأم هاديين جدا و كلامهم قليل ما شاء الله و اتأخروا حتى في الكلام

كنا في أول سنة لنا هنا بالدمام و بابانا لسه جايب سيارة تويوتا مستعملة و ركنها تحت البيت و احنا ساكنين في الدور الأخير (الرابع) و شباك غرفة المعيشة على الشارع

و فجأة وجدنا أحد التوأمين و كان عمرهم حوالي 3 سنوات و نصف، بيزعق من الشباك على ناس في الشارع و عمال يقول: انت ولد سيب عربية بتاعتنا .... انت ولد أنزل أضربك

أصل شاف مجموعة شبان واقفين جنب عربيتنا و راكنين عليها فنطر عليه العرق الصعيدي فجأة و لأول مرة يقول جمل بهذا الطول