لوحة القادة

عايز أقول..ومحدش يزعــل المنـتـدى بـقى دمُــه تـقــيــل ودا شئ واضح.. جـدا جــدا مش محتاج .. برهان ودليل المواضيــع.. أغلبها سياسه ومُجادله.. ومــــط..وتطويل والإشاعات ..أشكال.. ألوان نــازله تِرِف .. كــأنها سـيـل واللى يقولك .. سلفى وجاهل واللى يقول .. علمانى عــميل واللى بيـمـدح.. فى الإخـوان ويــذِم .. فى حــركة إبــريــل واللى بيتــكلــم ..ولا يســمــع وتحــــاورُه .. يوريــك الويل إيه يا جماعه..الرحمه شويه التـغيير..شئ بــردٌه جــميــل لوغلطان..ف كلامى..لومونى ونا بشكـُـركم .. شُكر جزيـــل أنا بشكُركم....شُكر جزيـــــل ملحوظه : اللى يزعل من كلامى ...يقيمنى بالأحمر ..وميهموش ..والتقييم بالأحمر ...لا يفسد للود قضيه و.....التونسى

رغم انى انضمامى للمحاورات جديد بالنسبة لتاريخ انضمام حضرتك الا انى اول مرة اشوف مشاركات لك فى الفترة الاخيرة وربما اسمع عن اسمك لاول مرة ايضا ورغم بعدى عن المحاورات فترة الا انى اتابع باستمرار مواضيعها والمداخلات التابعة لها ومالاحظته هو تعمد حضرتك استفزاز الاخوة الافاضل بردود لايصح ان تصدر من شخص ناضج زى حضرتك وتعرضك خصيصا لكل مايمت للاسلام بصلة حقيقتا لااعرف ديانة حضرتك ان كنت مسلم او غير ذلك لكن فى كلتا الحالتين يسيئنا التعرض المستمر من جانبك او جانب اى شخص لاى ديانة سواء الاسلام او المسيحية او حتى اليهودية والتى اعتقد لايتدين بها احد هنا فنقول فيها مالا ريضى الله ورسوله لمجرد ان هنا مفيش يهودى يعترض على كلامنا كلنا سواء مسلمين او مسحين لنا حرية تفكير وعقيدة وحرين نسمع اغانى نبطل سمعاها فليس هناك داع للسخرية والتنبيط على كل صغيرة وكبيرة فى موضوع لمجرد الاستفزاز واثارة البلابل والمشاغبات فى المنتدى كل شوية ابسط شئ ممكن حضرتك تعمله انك تتجنب قراءة المواضيع اللى بتضايقك وتحفزك لاستفزاز غيرك تجاهلها كما افعل ويفعل الكثيرين فى الفترة الاخيرة وبذلك قلت مشاركات البعض واحجام الكثيرين عن المشاركة نهائى او دخول المحاورات اصلا بالشهور من الاخر امثالك طفشتم الكثيرين وانا منهم من المنتدى بمجادلات عقيمة وتافهة لا لاشئ سوى نوايا سوء ليس وراها الا وجع القلب وسكب البنزين على النار البلد فى حالة فوضى وغليان والان عزاء وحزن للاخوة المسيحين وحضرتك نازل تريقة وسخرية على خبر نزله احد الاخوة الافاضل ارحمونا شوية ربنا يرحمكم

السلام عليكم ورحمة الله وبركاته تحيه طيبه وبعد طبعاً دلوقتى عارفين الحاله الاقتصاديه اليى مصر بتمر بيها وعارفين ان فيه ركود ( هو على طول كان فيه ركود ) فى مصر وفيه ناس فقدت مصدر رزقها ايه رايكم لما نجيب كل الهدايا بتاعتنا من مصر وتكون صناعه مصريه علشان نشجع المنتج المصرى ونجب هدومنا من مصر وكل حاجه بنشريها من بره نشتريها من مصر وبكده هتنزل مصر خفيف خفيف ولا هتضطر تقعد توزن وتقرف نفسك على الفاضى ل هتنزل وهتشترى حاجات من مصر تعالوا نفترض مثلا ان فيه حوالى 5 مليون مغترب فى مصر وكل واحد فيهم هيشترى هدايا للناس ب 1000 جنيه يبقى كده فيه 5 مليار اتصرفوا فى مصر ايه رايكم ؟ تحياتى عنبو

السلام عليكم سأدخل فى الموضوع بشكل مباشر وبدوم مجاملة لأحد , لأنى أرى أن هذه المرحلة الحرجة لاتحتاج لأى نوع من المجاملة , وتحتاج الى علاج سريع جدا للقضاء على العنف والتطرف فى المجتمع ولحماية بلدنا الحبيبة مصر. منذ وقوع الحادث الارهابى الدنيىء وأنا اتابع البرامج الفضائية وبعض المواقع الصحفية وأجد أن هناك محاولات واضحة وضوح الشمس لتحقيق أكبر قدر من المكاسب للأخوة المسيحيين واستغلال هذا الحادث لتعديل قوانين ومناهج وخطابات , وأنا مع ذلك , ولكنى ضد وبشدة أن تكون هذه المكاسب على حساب المسلمين . فلا أعلم حتى الآن من هو المسئول عن هذا الحادث , هل " الحكومة , الموساد , الامريكان , الشيعة , متطرف مسيحى , متطرف مسلم " ؟ ولكنى أشعر أن الجميع يوجه اتهاماته للاسلام وللخطاب الدينى الاسلامى . الارهاب يا سادة لا دين له , الارهابى لا يمثل الا نفسه فقط فقط , فالدين الاسلامى برىء من هؤلاء براءة الذئب من دم ابن يعقوب , أكتب هذا الموضوع لنتناقش سويا ولنصل الى حلول ترضى " جميع " الاطراف للقضاء نهائيا على كل مظاهر التطرف وللقضاء على كل مظاهر الفتنة الطائفية , شرط الا تكون هذه الحلول على حساب طرف دون الآخر . فأنا أتفق بشدة مع وجود قانون موحد لبناء دور العبادة شرط أن لايخرج البابا من كنيستة ولا يكون له أى دخل بالسياسة . أتفق بشدة مع اغلاق كافة القنوات السلفية شرط أن يتم اغلاق كافة القنوات المسيحية . أتفق بشدة مع مراجعة المناهج الدراسية الاسلامية شرط أن يتم مراجعة دروس القساوسة داخل الكنائس . أريد الا تعترض الكنيسة على ترك أحد للمسيحية حتى لو كان كاهن مثلما يفعل الازهر مع من يترك الاسلام . أريد أن تعتبر الكنيسة أقباط المهجر "خونه " وتقول ذلك صراحة مثلما نعتبر المتشديين " متطرفيين " . أريد أن يعامل البابا مثل شيخ الازهر ولا أراه الا فى المناسبات الدينية ولا أقرأ يوميا عن اعتكافات . هذه بعض الحلول التى أراها مناسبة من وجهة نظرى , فمصر دولة مدنية وليست دينية , مصر يحكمها القانون ولا يحكمها شيخ أو بابا , مصر ليست عنصرية , ولا تفرق بين جنس أو لون أو دين , مصر ليست للمسلمين , ولا للمسيحيين , ولا للمسلمين والمسيحيين فقط , مصر لكل المصريين . لا يرضينى هذا الشعار لا يرضينى الا هذا الشعار اللهم احفظ بلدنا الحبيبة مصر من كل سوء.

الحمد الله فى السراء والضراء الحمد الله على نعمتة و فضلةى علينا فى خيرة و شرة يجزع الانسان كثيرا عندما يمسة ضراا او شراا لا يعرف انها نعمة كبيرة لتقف مع نفسك قبل ان تاخذك الدنيا عن حقيقة وجودك فيها و هى عبادة الله تلهينا حياتنا و طموحنا و احلامنا و اطفلنا و اسرتنا و ننسى فى خضم ما نحن فية ان الله هو ملاذنا وهو من نرجع الية سوف نقف امامة بلا سند و لا عيلة و لا مال و جاة و لا سلطان و لا ذرية: تذكرت الاية الكريمة بسم الله الرحمن الرحيم ‏(يَوْمَ لا يَنفَعُ مَالٌ وَلا بَنُونَ إِلا مَنْ أَتَى اللَّهَ بِقَلْبٍ سَلِيمٍ لحظتين لن انساهم ما حييت وقت ان استدعيت لعمل اشعة الرنين وطلبت ان ادخل وحدى دون زوجى وقت دخولى غرفة العمليات وحدى و تركت كل اهلى و زوجى و اولادى خلفى ومشيت الى غرفة العمليات وحدى وقتها فقط تذكرت لحظة حساب الانسان وهو يقف امام الله وحيدااااا مهما بلغ سلطانك و مالك و ذريتك و نسبك سوف تقف امام الله وحدك بعملك ولن ينفعك احد لم يتبقى معى الا ما حفظت من ايات الله ارددها وانا فزعة عما سوف الاقية وانا ارى الدكاترة والممرضات تروح و تيجى امامى و نور العمليات ينير باشعتة القوية و الحقنة تالمنى من شدة قوتها غبت عن الوعى اكثر من اربع ساعات حسب ما قالوا بعدها فقت من البنج لاسمع اصوات اهلى حولى و زوجى و الدكتور يجيب لهم على اسئلة كثيرة اسمعهم لكن لا اعرف ان ارد عليهم اسمع ما يحدث لكنى لا استطيع ان احرك راسى او اتكلم واحسست انى عائدة من عالم اخر لا اعرفة و ظللت فترة طويلة الى ان افقت ووعيت ما حولى اول سؤال ورد على لسانى نتيجة العينة اية ردوا قالوا الحمد الله حميد حاولت ان اقوم لم اعرف شوفت الدنيا مشقلبة و تدور حولى ارى الصور اتين ودايخة عرفت انة من تاثير البنج خاصة انى ظللت فترة طويلة تتجاوز الاربع ساعات ظللت اول يوم فى المستشفى و تانى يوم خرجت الى منزلى لن اخوض فى الالم بعد العملية لكن كل ما احب ان اقولة ان الحمد الله الان احسن الم محتمل اعرف انة سوف ياخدوقتة تحت اشراف الدكتور الذى سوف اتابع معة لفترة طويلة لان حسب ما طلع فى التقرير ان حميد لكنة نشط ومحتاج متباعة قريبة اشكر كل من سال عنى اخص بالذكر هند على لونا و داموا و ام زياد ريهام نور العين خايفة انسى حد اشكركم كلكم ادعوكم و انا قبلكم ان لا تنسينا الدنيا عن الاخرة و ان نتصدق عن صحتنا و اموالناواولادنا ونعم الله التى بين ايدنا لا نعرف قيمتها الا ان نمتحن فيها

طبعا في الهوجة اللي احنا فيها دي بقى اللي يطق في دماغه حاجه بيعملها و اللي عنده عمارة بيعليها طبعا كلكم عارفين ان المحافظ اللي فات لاسكندرية كان موقف البناء فا الناس ما صدقت الثورة قامت و الطماعين نفسهم اتفتحت الشارع الموزاي للبحر على طول شارع ضيق يقوموا الناس معليين العماير مخالفة للقانون و توصل العمارة ل 14 دور و مكملين عادي المهم بابا ليل نهار يتكلم معاهم لانهم طبعا مخالفين و غير دا ما بيحلاش الشغل غير بالليل قدم شكاوي كتير بس طبعا وقت الثورة لا حياة لمن تنادي المهم من كام اسبوع ارض فاضية لازقة في بيتنا اتنبت عمارة في لمح البصر طبعا مباني مخالفة و الانكد من كده انهم ضموا الممر اللي بينا و بينهم يعني ما بقاش في بلكونات في عمارتنا بقت بلكونة مشتركة بين العمارتين فين حق الجار و المتنفس الطبيعي للناس مش مهم يا عم كبر قام بابا بقى اشتغل في تقديم الشكاوي و المحاضر في القسم التابع ليه بيتنا و كمان للجيش من اسبوع بالظبط لقى واحد وقفه في الشارع معروف انه بلطجي المنطقة و هدده بان دا كده قطع لرزقه و ان الناس دي تبعه و هاعمل و هاسوي فا ابعد احسنلك كلنا اترعبنا على بابا بصراحة لانه لسا خارج من حادثة فظيعة و جسمه كله شرايح و مسامير و اتكلمنا معاه يا بابا خلاص انت عملت اللي عليك و قدمت شكاوي في الجهات المسؤولة كتر خيرك على كده المهم ما سمعش كلامنا و راح القسم يبلغ عن البلطجي قوم ايه لقى المنيل على عينه البلطجي عامل محضر في بابا انه بيلم اتاوات من سكان المنطقة قصاد انه يعمل محاضر في اصحاب العمارات المخالفة قال ما بدهاش بقى و طلع على النيابة هو و سكان عمارتنا و قموا شكوى و امبارح قررت النيابة ازالة العمارة بس لا بتوع الحي ما جوش و بيقولوا خايفين من البطجية اللي اصحاب العمارات مأجرينهم قوم بابا بقى قايل و احنا كان المنطقة هانحميهم هابقى اقولكم اي تفاصيل تجد في الموضوع رغم خوفي على بابا الا اني شايفاه اتصرف صح ما ينفعش حد يسكت على الغلط و يقول انا مالي انا مالي دي هي اللي جابتنا ورا ال 30 سنة اللي فاتت ادعو ان ما فيش حاجه وحشة تحصله و انا كمان هادعي و فخورة بيه اوي مع انه ضد الثورة اصلا بس يالا بابا بقى هاعمل ايه :closedeyes:

صباح الخير يحكى انه في يوم من الايام .. قرر الادفايزر الهمام .. راعي الذمام .. ان يجمع المحاوراتيين والمحاوراتيات .. ومن منهم قد مضى ومن هو آت .. ووقف فيهم خطيبا .. وقال اننا قد جمعنا امرنا .. واستشرنا اهل الحل والعقد من المشرفين والمشرفات .. واصحاب اليد الطولى في المشاركات .. والحاصلين على اعلى التقييمات .. واتفقنا على اصدار ام المفاجآت .. كتاب يضم خلاصة المشاركات .. سابقة ما سبقنا بها منتدى في العالمين .. يحمل اسم محاورات المصريين لكن قبل ان نطرح الكتاب في الاسواق .. وقبل ان نوقع على طبع الاوراق .. طرأ لنا أمر لم نحسب له حساب .. أخر كما ترون نشر الكتاب لمن يعود ريع النشر ؟ .. ومن يتحمل هذا الامر ؟ .. ان اصطفيتها لنفسي قلتم .. قد آثر نفسه علينا ونحن من سود الصفحات .. وان قصرته على المشرفين قلتم باي حق هذه الامتيازات ؟؟ .. ولماذا استفردهم بالعطية .. ونحن نعيش اجواء الديموقراطية ؟؟ وان وزعتها عليكم جميعا .. قال احدكم اتتساوى حصتي انا .. الذي بلغت مشاركاتي قرابة الالفين .. بمثل من هو في المنتدى ابن يومين ؟ والحق اقول لكم .. اننا بمركز الاشراف لم نستقر على حال .. ولا عرفنا اجابة هذا السؤال .. فقال لنا ابو الاسيان .. وهو الحكيم المفوه اليقظان .. من قال ان المحاوراتيين يرفضون ان يقتسم الاشراف الغنائم ؟؟ .. فوالله ما عرفناهم الا كراما عن فتات الولائم .. فاطرح يا سيدي الادفايز بهذا المنتدى الاستفتاء .. ليقل نعم من رضى لنا بالغنيمة .. وليقل لا من يرى انها ظليمة .. وهكذا يستقر بنا الحال .. وتنهي هذا الجدال ايها المحاوراتيين الاشاوس .. دونكم وصندوق الاستفتاء .. اهجموا عليه هجمة من لا يرى صندوق بعده .. وليقل كل رأيه صفق الحضور طويلا .. واخذوا يهنؤون بعضهم البعض بأن قيض الله لهم مثل هذا الادفايزر .. الذي يستشيرهم بكل صغيرة وكبيرة .. وكل قضية خطيرة هنا قال الباشمهندس تيمور .. هي دي الديموقراطية .. هي دي الحرية :happy: اللي شفته بعيني النهاردة مش هايصدقوه اصدقائي في منتدى احباب الفوركس .. ولا اصدقائي في منتدى حركة 6 ابريل ولا اصدقائي في منتدى المعماريون ولا اصدقائي في منتدى صناع الحياة وهاقول لاصدقائنا وائل غنيم وانجي و اسماء محفوظ :happy: وقالت فتفوتة : صورت كل اللي اتقال وسجلته .. وهانشره في كل مكان .. في الفيس بوك .. تويتر .. شبكة رصد .. شبكة جن ازرق .. المهم انشره وقال تامر مصطفى : وانا هانتج افلام عن الخطبة دي .. اخيرا يا مصر .. اخيرا هتشوفي اولادك يعملوا ايه وقالت دامو : i am happy وقال سكوب وهو يغالب دمعة تأثر : يا سلام .. وانا اللي كنت اقول محاورات تايهة يا ولاد الحلال .. لقينا المحاورات خلاص اما ضحى فقد قالت بواقعيتها المعروفة .. وبتجردها الصريح : طيب دلوقتي خلونا من اجواء الزغاريط والزفة البلدي .. وخلونا نفكر .. هنقول ايه .. نعم ولا لا ؟ قالت اغابي : يا سلام يا استاذة ضحى .. بقى دي عايزة سؤال طبعا هنقول لا .. مش من حقهم طبعا يحتكروا الارباح ليهم .. ياما تعبت وسهرت وانا اكتب مشاركات .. قسم الصحة والنفساويات يشهد على كده .. واخرتها يوزعوها بينهم ؟ ياما حرمت نفسي من الغطا عشان يستغطوا .. ياما حرمت نفسي من العشا عشان يستعشوا قالت لماضة : والله مش عارفة انا اقول لا ولا آه .. يعني لو قلنا نعم مثلا .. يجرى ايه ؟ هما ياما تعبوا وما تنسوش انهم يشتغلوا من دون اجر .. زي ما بيقولوا دايما ( وش اي واحد من فريق الادارة صباحك .. حيرة .. ما تعرفيش تقولي معاها .. آه ولا لأ قال حسام .. حسام عبدالفتاح سابقا : حيرة ايه يا لمضة انتي .. هي دي فيها حيرة .. طبعا هنقول نعم .. مش عايز احصل صاحبي عنبي ومن خاف سلم .. انتي عارفة معناها ايه قولة لأ ؟ يعني هنخليهم يتفرسوا مننا .. ويقولوا بصوا .. اعطيناهم ديموقراطية واول ما جربوها جات على راسنا احنا .. انا من ناحيتي متنازل ياختي وهاقول نعم صرخ اركتكت : نعم مين يا روح والدك ؟ ؟؟ نعامة ترفس بمصارينك .. لا تنازل :happy: لا استسلام :happy: انا مجاهد .. مناضل .. ثائر .. من الخيمة قال التونسي : يا عمي ريحنا شوية من الشعارات الحنجورية بتاعتك .. انا هاقول نعم باة .. مش ناقصين وجع دماغ قالت مغتربة : لنعرض الامر على لغة الارقام .. المتخوفين من نعم يمكن يشكلوا نسبة تزيد او تنقص قليلا عن 50 بالمئة .. في هذه الحالة سيقف الاشراف عاجزا عن الحاق الاذى باللي صوتوا بلأ .. لان نسبتهم كبيرة .. يختلف الامر في حال الاغلبية الكاسحة .. وبلغة الاحصائيات .. فان المصوتين بلأ سيشكلون نسبة كبيرة لو كان الفوز لصالحهم .. يختلف الامر جذريا في حالة فوز المصوتين بنعم .. .. لان استقصاد المشرفين سينتفي بانتفاء العلة .. هذا اذا ما اخذنا بعين الاعتبار العامل المحفز لتصويت من قالوا بنعم وهو في حالتنا الراهنة الخوف من ملاحقة المشرفين وترصدهم لمن صوت ضد قرار انتفاعهم بريع الكتاب .. في كل الاحوال فإن المنطق البراجماتي النفعي للمصوتين بنعم قد لا يسعفهم بالضرورة .. لأن اوزاوز مقاطعا : يا ست بالراحة شوية الله يخليكي .. معاكي بصمجية بالمنتدى .. يعني الخلاصة ها تقولي آه ولا لأ ؟ مغتربة : سأقول لأ طبعا .. لكني ضد مبدأ استغلال الخوف من المشرفين للتصويت الديموقراطي .. التصويت الحر ينبع من قناعة بلا مؤثرات او ضغوط قالت هند علي : يارب نجتاز هذه الغمة .. وترجع لنا مصر زي ما كانت واحسن قال سمبا : ترجع مصر ازاي زي ما كانت يا مدام هند ؟ .. واحنا كنا عاملين ثورة ليه ؟ قالت هند علي : والله مش عارفة يا بني .. التصويت ده شكله مش هيجيبها لبر قالت لماضة : حبة تفائل كدا يا مدام هند .. هو التفائل ايه غير شوية مشاعر صايعة .. بتبص لقدام .. وتخلي لكل ضحكاية من قلب كل واحد مننا .. انشودة فرح تزغرط على بلكونة الامل .. لما يشعشع .. صباحك .. تفائل قد السما .. مغموس بالزيت الحار قال ايمن : عن نفسي هاقول نعم .. بس ليه تتخانقوا على حاجة لسه ما بينتش .. كل واحد يروح للصندوق ويقول رايهه اللي هو حر فيه قالت مصرية متغربة : مش فاهمة ليه فزاعة الاشراف والمشرفين .. عاملين زي الاولاد اللي هيشتروا كفن لابوهم وهو لسه عايش .. الاشراف مسؤولية .. حضارة .. الاشراف .. قوة .. الاشراف .. هو اني ادافع عن افكارك وانظمهالك .. مش اني اصادرها لأ .. وبعدين هاينوبنا كم ملطوش يعني .. ؟ هو احنا بنبيع كتاب لا تحزن ؟ يا ريت ما كنا عرضنا الكتاب من اصلو .. حزني والمي .. كبير .. مش عشان ان فيه ناس قالت بوشنا لأ .. بس لاني للاسف اكتشفت ان فيه ناس بعد كل تعبنا منهم .. يبصوا لنا بصات .. غريبة انا مذهولة .. مصدومة اغابي : ما تعيطيش يا اختي .. بس هيا دي الديموقراطية .. لازم تتحمليها وما يصحش تقولي اننا بنبنص بصات غريبة :angry2: رؤوف : هاقول نعم نعم نعم .. واللي مش عاجبه بقى يهوينا مصرية متغربة : اصيل والله يارؤوف.. :blush: دريم وذ مي : ممكن اقول حاجة يا ابلة مصرية متغربة بس بليز ماتخاصمينيش .. ينفع اقول لأ .. ؟ مصرية متغربة : دي حريتك الشخصية يا بنتي ..القرار لازم ينبع من ذاتك .. بس مستعدة تتحملي القرار ده ؟ دريم وذ مي : في الحقيقة .. أ .. أ .. مصرية متغربة : ماشي يا ستي .. قولي لأ .. بس خليكي فاكراها :glare: سمبا : ايه هو الارهاب الفكري ده .. يعني لو مش عايزينا نصوت بتاخدوا راينا ليه بالاول ؟؟؟ ابو محمد : اهدأ يا حاج .. مافيش حاجة للصوت العالي .. وبعدين صوتك بينرفزني .. سمبا : فيها حاجة يا سيد الناس لو قلت لأ ؟؟ انا هاقول لأ .. هاقول لأ ابو محمد : من حقك تقول لا بس مش من حقك ترفع صوتك كده .. عندنا بنات بالمنتدى سمبا : وايه دخل البنات برفع الصوت .. ؟ ايه الاستفزاز ده بأة ابو محمد : اهو انت كده بتشوشر على المصوتين .. وبتعطيهم ايحاءات ان اللي هيقول نعم ياعيني يبقى مسكين وضعيف وغلبان .. وان اللي صوته عالي هو البطل والثائر والافلام بتاعتكو دي سمبا : !! اناقلت كل ده .. ؟؟ امتى .. ؟ وبعدين ايه دخل ده بوجود بنات معانا بالمنتدى .. ابو محمد : اهو انت كده بتشتت الموضوع .. معليش .. الحوار كده ما ينفعش .. جويرية : انا هاقول نعم .. كبر راسك يا استاذ ابو محمد .. صوتي هيوصلك واقول نعم اما دول اللي بيقولوا لأ .. لهم يوم ان شاء الله شرف الدين : يا جماعة ما تستهدوا بالله بأة .. اللي عايز يقول نعم هو حر واللي عايز يقول لأ هو حر واللي مش عايز يصوت برضو هو حر ها تقلبوها غم ليه .. كومنق سوون : انى ارى رؤوسا قد اينعت .. وحان قطافها .. واني بأذن الله لمقتطفهامن جذورها سي السيد : ما تهدي اللعب يا كابتن .. جذور ايه .. وتقتطف ايه .. ؟؟ هو بردقان ؟ ده تصويت كومنق سوون : بردقان .. يوسف افندي .. مشمش .. زر بطاطا .. هذا لن يغير من الحقيقة شيئا سي السيد : حقيقة ايه ؟؟ كومنق سوون : ستعلم قريبا يا كبيرهم .. عن اذنك .. سأذهب للتصويت ---------------------------------- قال طائر الليل الحزين : اليها .. تلك التي ترنو بعينها في هدأة الليل لن انساكي .. ولاجلك .. واحتراما لمواثيق سجلتها خطانا حين كنا في سن الصبا سأظل وفيا للحظ عينك الشفاف في لغتي .. وسأسطر لكي .. يا أمة الله .. ابياتا اسكبها في اذنيكي ذات القرط المتدلي واقول لك .. وحدك .. سأصوت بلا .. فأنتي قراري .. ---------------------------------------------- غني الابيات السالفة زوهيري .. تحت عنوان ( من وحي الصندوق ) .. على عوده الرنان .. وعملت فتفوتة لها شير بالفيس بوك يتبع ..

السلام عليكم ورحمة الله وبركاته ،، طبعاً كان من المقرر ان ينزل هذا الفيلم قبل اسبوع من الان لكن لظروف اخراجية وانتاجية ونظرا للازمة المالية العالمية اضطررنا لتأخير هذا الفيلم اسبوعاً واترككم مع مقدمة الرفيق لماضة مصرية جداً ======================================= اعزائي المستمعين و المستمعات اللي قاعدين قدام الللابتوبات واللي مستنين انتاج لماضة الساري..اللي هينسيكوا اللي فات عشان احنا...فكرنا نعمل سلسلة وثائقيات يعني لكل شهر من شهور السنة.....هنعمل رحلة بين التوبيكات فاكرين لما حسين الجسمي.....اتحفنا بواحدة من الابداعات و قال.....قلبي بيتقطع لحتات كل ما اعدي ع التوبيكات و افضل سهران فيكي و معاكي يا محاورات اهو......هو.....ده.....انتاجنا الجديد من الوثائقيات طب ما تيجوا نشوف http://www.youtube.com/watch?v=z-8CMEUfFJ4 مشاهدة ممتعة نرجوها لكم

السلام عليكم ورحمة الله وبركاته ،، تحية طيبة .. :hi: لا ادري ان كان قد سبقني لهذه الفكرة احد .. لكنها خطرت ببالي وجدت نفسي افكر بان استفيد من برنامج صانع الافلام .. :glare: و فكرت بان اعبر بابسط طريقة عن امتناني لبعض الاعضاء الافاضل الذين تعلمت واستمتعت بمحاوراتهم او مراقبة ردودهم flrt: وفكرت بأن استغل مواهبي الاخراجية فكان هذا العمل .. الذي ارجو ان لا تبخلوا عليه بالتعليق هو فيلم يحكي عن .. ما تيجي نشوووف ؟ http://www.youtube.com/watch?v=Rekg79EiFNo ونعدكم بافلام قادمة ان حاز على رضاكم .. tv_: مشاهدة ممتعة rs:

عمرك حسيت..عمرك حسيت!!؟ عمرك حسيت .. إن الدنيا .. فــ عنيك .. بتهون وان حياتك .. ماسخه.. وبايخه ... وعديمة اللون عمرك حسيت ..إنك قربت .. تصير... مجــنـون وانك مطحون.. وكمان مسجون.. فى براح الكون عمرك حسيت .. عمرك حسيت!!؟ عمرك حسيت .. إنك عايز .. تصــرخ .. وتثــور زى البركان .. إللى بيغلى .. وخــلاص حيفــور عمرك حسيت .. إنك شمعه .. عـُمرها .. مهــدور بتموت ف مكانها ..لجل ما توهب غيرها .. النور عمرك حسيت .. عمرك حسيت!!؟ عمرك حسيت .. إنك حــاير.. بيـــن إتجاهـــين وانك ضليت السكه ..وتُهــت .. مع التايــهين عمرك حسيت .. إنك نِفســك.. تبقى بجناحين وتطـــير .. وتفارق دُنيِــتنا .. المليانه أنيـــــن عمرك حسيت .. عمرك حسيت!!؟ عمرك حسيت .. إنـك متغــرب .. بــين النـــاس وانك مش لاقى.. معنى جميل ..إسمه الإخلاص عمرك حسيت .. إنك فى الحب .. وقعت خلاص مع إنك .. حاطط على قلبك ..قــفــل .. وحراس عمرك حسيت .. عمرك حسيت!!؟ عمرك حسيت .. إن الكلمه .. فـ حَلقَك..مدبوحه والصرخه الساكنه.. فـ نظراتك..ساكته ومجروحه عمرك حسيت.. إن البركه.. فـ رِزقك.. مطروحه وبتدعى.. ودايما كده.. أبواب السما..مفـتوحه عمرك حسيت..عمرك حسيت!!؟ اتمنى أن تحوز قبولكم و .. التونسى

حسبى الله ونعم الوكيل فى اللى بيشعل نار الفتنة بيننا الفيديو اسمه.....((هجوم سلفي شرس على احدى الكنائس بمصر أين الاعلام)) ادخلوا وشوفوا الهجوم الحقيقى فى يوم عيد الاخوة المسيحيين http://www.youtube.com/watch?v=JAVN8LLQ7MM&feature=share احلى تعليق مكتوب

السـلا م عليكم ورحمـة الله وبـركـاته صباح الخيـــر عليكم جميعاً .. =================================== عندما يتحد الساري مع لماضة مصرية جداً فماذا تتوقعون ؟؟ بهذا الصباح تكتمل ثلاثية ( حرب المحاورات ) ..افلام الثورة المجيدة الخاصة بمنتدى محاورات المصريين .. كرنفال التشويق .. فانتازيا الاثارة ابطالها .. انتم .. قصتها .. اسقاط من الواقع على الخيال .. واسقاط للخيال على الواقع ... وبينهم امور خلطة غريبة .. حرب .. قصف .. اسرار .. الغاز .. معركة خفية تدور رحاها هنا بمنتدى محاورات المصريين منذ قرون ولا زال لهيبها مشتعلا هل انت مستعد كي تخوض الحرب ؟؟ .. انها معركة جبارة .. ثورة .. لا اسرى .. قتال الى النهاية .. لمن لم يشاهد هذه السلسلة من قبل انصحه بمتابعة اجزائها السابقة كي يفهم اصول المعركة .. والثارات المبيتة .. فيلم ( حرب المحاورات ) .. الجزء الاول فيلم ( حرب المحاورات ) .. الجزء الثاني ============================= اما من شاهد الاجزاء السابقة .. فانصحه بتكبير حجم الشاشة .. ورفع الصوت .. وغلق الابواب .. فالحرب قادمة انها يا سادة حرب المحاورات .. مش هز اكتاف .. والا اقول لكم .. ما تيجوا نشوف ؟؟؟؟؟؟؟؟؟ http://www.youtube.com/watch?v=748FWZtqX4M

السلام عليكم الحقيقة مش عارف الموضوع دا مكانه فين فى المنتدى لانه موضوع شخصى بس متعلق بالمشاركة هنا فى المنتدى فحبيت اضعه فى هذا القسم حتى يراه الجميع . من فترة وجدت رد لاحد الاعضاء هنا فى المنتدى والرد عجبنى جدا وكلامه دخل قلبى لدرجة انى حبيته بجد وبعد كده عرفت انه توفى قبل تسجيلى فى المنتدى بحولى سنتين العضو دا هو الافوكاتو ( رحمه الله ) . كل فترة كنت بدخل على ملفه الشخصى وأقرأ كل موضوعاته ومشاركاته وبعد كل موضوع أو مشاركه .. أدعيله وحبيت أعمل مقارنه بينه وبينى !! وقلت ياترى لو أنا مت النهاردة وسجل عضو جديد ورجع لمشاركاتى هيدعيلى وللا هيدعى عليا !!! ياترى هيحبنى وللا هيكرهنى !!! ياترى هيستفيد من مواضيعى وردودى وللا هيقول أيه الكلام الفارغ دا !! المهم انى عملت المقارنة وكانت النتيجة صاااادمة !!!!!!! وقلت لازم يبقى فيه وقفه مع نفسى وأراجع دفاترى القديمة فلاقيت ان كل مشكلة حصلت هنا فى المنتدى منذ اشتراكى .. أنا مشارك فيها حتى لو مش سبب .. بس أنا مشارك أفتكرت مشكلتى مع أحمد سيف .. وردى البايخ على ريهام .. وردودى الاكتر بواخة على أغابى وسبحان الله انا وأغابى كانت علاقتها كزملاء هنا فى المنتدى أكتر من رائعة .. فى احترام متبادل .. كل موضوع كانت بتكتبه كنت ببقى أول مشاهد ليه وأحاول استفيد منه وأفتكرت كلام حسام ليا أول اما اشتركت ها فى المنتدى ( متخدش كل حاجة على صدرك ) وكلام ريهام ( بترد بعصبية ويتاخ كل حاجة على نفسك ) وكلام ضحى ( راجع ردودك فى المنتدى ممكن تلاقى رد وتاخد عليه ذنوب .. كان فى موضوع حج الرئيس .. وكان كلام غير مباشر ) وافتكرت رد لضحى أمبارح ( فَأَمَّا الزَّبَدُ فَيَذْهَبُ جُفَاءً وَأَمَّا مَا يَنْفَعُ النَّاسَ فَيَمْكُثُ فِي الْأَرْضِ ) ولقيت أعضاء كتير زعلانين وبيفكروا يسيبوا المنتدى .. وحاسس ان انا السبب طيب ليه مغيرش ردودى !! ليه مبقاش هادى !!! ليه بدل ما اقارن نفسى بالاستاذ محمود ( رحمه الله ) محاولش اتعلم منه !! فقررت انى لازم يبقى فيه وقفه مع النفس قبل فوات الأوان .... لو فيه حاجة مش عجبانى فى المنتدى ليه مغيرش من نفسى لانى جزء من المنتدى ولو كل الاعضاء عملوا كده هيبقى شكل المنتدى أفضل بكتير.... عشان كده قررت الأتى : أولا : تقديم أعتذار للى أسأت اليهم وكمان اللى حسيت أنهم زعلانين منى .. وهم مع حفظ الالقاب للجميع أغابى - أحمد سيف - ريهام ( لماضة ) - سكوربيون - ابو محمد - محمد يوسف - عادل ابو زيد - اشرف حليم - psychologyteacher - سى السيد - اسلام المصرى ثانيا : بالنسبة لى 1- عدم الرد بعصبية فى اى موضوع 2- عدم الهجوم على أى عضو 3- عدم استفزاز اى عضو واستخدام الفاظ غير مقبولة 4- عدم التواجد فى المنتدى لفترات ( طويلة ) والتركيز فى العمل والدراسات 5- تقبل الرأى الاخر بصدر رحب 6- عدم اهانة اى عضو فى المنتدى حتى لو اساء لى أتمنى أن يقبل الجميع أعتذارى والا يترك أحد المنتدى بسببى تحياتى شريف

أعرفكـوا بـيا .. أنا شـاب سيس مناضل كيبوردى..بدرجة رئيس براوِغ ... بناوِر بجادِل .. بحاوِر وِبضرب..وِبهرب..كتعلب خبـيـث وإسمِى وكِنايتى..خميس الخسيس أعرفكوا بيا .. أنا مِــسخنــــاتـــى أنا مِــهيجــاتــى..أنا مـِـولــعــاتى بَلِف .. وِبَدور .. وِبَحلِب فى تور وعايزك تِفـَرقَع .. ودمــك يفـور وعايزك يا خِينا..فى إيـدى عجينه وتِحرق فى نفسك..وتوصل ليأسك وتغضب بسـرعه .. وتبـدأ تثـــور واعرفكوا بيا....خميس الخسيس أعرفكوا بيا .. بحــب الحــرايـق وبارع وماهر.. فى قلب الحقايق أرارى حـويـط .. لِـسانى سَلِـيـط وراقِد .. وكامِن .. وبيرى غويط ولو تحـرجونى .. ولو تكشفونى بصنعِة لطافه .. وِظُرف وخَفافه حَكَبَر .. حَنَفَض..وحَعمِل عـبـيط واعرفكوا بيا...خميس الخسيس أعرفكوا بيا ...تَخَصُص هجايِص وعالنِت قاعد .. بَــ حَرَك عرايس أقول (لليمين) .. يجاوبوا(أمين) كَخاتِم فى صابعى .. ومِتبرمَجين صاحِبكم زعيم..وداهيه .. ولئيم وحالِف يا عسكر.. أحَرَض أَدَبَر وحَقلِب عليكوا .. الناس أجمعين خُلاصة الكـلام .. مِسَيطَر تمـام وإسمى وكنايتى..خميس الخسيس ***شكرا واجب للاخت الفاضلة ((الزهراء )) صاحبة الفكرة****

بغض النظر عن مسألة بوسترات الشيخ حازم صلاح ، وبالرغم من أنني لم أجد في مشاركة الدكتورة الفاضلة أم أحمد -التي نحترمها جميعاً- تأييداً لوضع الملصقات . ولكنني أذكّر نفسي والزملاء بأنه من شيم الرجولة احترام النساء وصون كرامتهنّ . ولا أحد يقبل أن يساء إلى أمّه أو زوجته لمجرّد اشتراكها في حوار ضمن "صالون ثقافي" يفترض أن يحترم كل من فيه وجهة نظر الآخر .

السلام عليكم ورحمة الله وبركاته ،، لن اقدم الفيلم هذه المرة .. سأترك المايكرفون للرفيق لماضة لتتولى التقديم .. :closedeyes: ============================================================================ بيان عاجل من وزارة التقلية لحماية امن المحاورات تمكنت قواتنا البواسل من احباط محاولة انقلاب و تمرد في القطاع الشرقي من ركن دعوة للابتسام حيث قامت فئة متمردة من المحاوراتية بترويج مواد اعلامية مفخخة تمس سمو العضو أطاطا....لماضة حفظها الله...و فخامة الزعيم المفدي الساري....و تطاولت علي كبير ياوران جناح شرق غرب فوق وتحت المداخلات...الزعيم سين سين و قد حذرنا مرارا و تكرارا...من مغبة عدم الاستماع للمعني الكامن في اغنية يا مطرة رخي رخي و آدي النطرة هترخ عليكم و من موقعنا هذا.....فإن وزارة التقلية بالمحاورات تطمئن شعبها الحبيب....بانه تم احباط و اجهاض و فس البالونة الاعلامية المضادة و تهيب بالسادة المواطنين الشرفاء عدم الاقتراب من التوبيكات المفخخة... ابلغ تحية و اعمق تقدير لقواتنا البواسل كان معكم مراسل قطاع المعركة أطاطا.....لماضة.....(أنا اتبعزقت يا رجالة) اصوات جماهير حاشدة....و هرج....و مرج....و مش عارفة ايه و ها هو .....الساري يتقدم بخطوات ثابتة....يزق الباب برجله اليمين....يبص لعدسة كاميرا تسعة اللي لافحاها علي قلبي و دايرة بيها انقل الاخبار يبتسم ابتسامة غريبة......ثم يقول ما تيجوا.....نشوف ضحكات شريرة......عنيفة http://www.youtube.com/watch?v=6Dq4ouwn0m4 ============================= وقتاً طيباُ نرجوه لكم

الليبراليين والعلمانيين دائماً يرددون المقولة المشهورة (لادين في السياسة ولاسياسة في الدين) وينتقدون دائماً استخدام الاسلاميين للمسجد لكن للاسف فان افعالهم مختلفة تماماً فهذا طارق حجي العلماني المعروف والليبرالي الجامد جداً يلقي خطبة داخل الكنيسة يحث المسيحيين فيها علي التحالف مع الليبرالين لتكوين حلف مسيحي ليبرالي وهو الحلف الموجود فعلاً الان http://www.youtube.com/watch?v=PoxpuyecnAw وهذا عمرو حمزاوي الليبرالي المعروف : يؤسس حزبة من داخل الكاتدرائية المرقسية بالعباسية! «حمزاوي» يعلن تأسيس الحزب المصري الديمقراطي من الكاتدرائية المرقسية بالعباسية ورداً علي هذا التحالف فان الكنيسة ترد بالمثل وتدخل الدين في السياسة http://www.youtube.com/watch?v=Wn4VnDJKLA4&feature=related وطبعاً لأن الليبرالين والمسيحيين بينهم حلف فلم يذكر الاعلام الليبرالي كلمه واحدة عن تدخل الكنيسة في السياسة بينما تم اعادة فديو الشيخ يعقوب مراراً وتكراراً طيب ان كنتم تريدون الاسلاميين ان يخرجوا من المساجد وعدم استخدامها الاولي ان تنصحوا انفسكم وتخرجوا اولاً انتم من الكنيسة!

ما هو لو بندفع فيهم فلوس كنت دفعت من زمان.......أمال ايه بس يا جدعااان قلت نبدأها ببيت شعر حلمنتيشي من تأليفي و أنا قاعد بضرب قهوة الصباح اللي باخدها بعد الظهر العبد لله بيكتب في مواضيع..و يرد ردود..و يقول في قرارة نفسه..أنا شكلي هاخدلي ييجي عشرة خماشر نقطة خضرا علي الحتة الجامدة دي..حلاوتك ياض يا عطار..شكلها هتلعب معاك.. و أفتح الموضوع بعد كده..و ألاقي لبلأسف رصيدي من النقاط زي ما هو..قلت مش مشكلة..ما حدش خد باله...دلوقتي ربنا يهديهم و ياخدوا بالهم.. مش ده اللي غايظني..أنا اللي هيجنني حاجة واحدة بس فيه عضو هنا..و بدون ذكر أسماء..هو اسمه كله حرف سين..بس مش هقول عليه عشان ده مفتري و ممكن يجيلي البيت يفرج عليا المنطكة كلها..يخليني عبرة لمن يعتبر..و من لا يعتبر.. المهم العضو ده كان عنده امتحانات و كدهوت و قعد كام يوم بيخش علي استحياء كده...و في عز ما هو يخويا قاعد في بيته..و أوفلاين..و ألاقي نقطه الخضرا بتزيد....حد يفهمني ازاي يا عالم..أنا هتجنن بيحسسني انه فاتح مثلا حساب جاري في بنك سامبا..و حاطط رقم حسابه و الناس بتتبرعله.. المهم..العضو ده كان ماشي معايا دايما..و أنا بضرب في 10...يعني أنا أجيب 40 نقطة..هو يجيب 400..أنا أجيب 50..هو يجيب 500..أنا عديت الستين الحمد لله و دخلت في الثمانينات..و أدخل النهاردة الصبح..و اذ فجأتن ألاقيه بقي 600.. أنا عاوز تحقيق فوري و مباشر في الموضوع ده..أنا حاسس ان بعض الأعضاء هنا بيقرأوا ردودي..و بيروحوا يدوه هو النقطة الخضرا..مش فاهم..ده علي أساس انه ولي أمري يعني؟..و أنا صغير ما ينفعش أشيل الحاجات دي؟؟ و بالمناسبة دي..أحب اوجه له نداء وأقولله,,أخوك الصغير برضه..و زميلك في المنتدي..يعني لما تبعتلي عشر نقاط كده أول كل شهر مش هيخسروك حاجة..و مش لازم تديهوملي أدام الناس..عشان ما حدش يفتكر اني محتاج ولا حاجة..

على معظم القنوات الان اجتماع عاجل للمشير طنطاوى مع سامى عنان وبعض رجال الدولة من ابرزهم مع حفظ الالقاب محمد البرادعى احمد كمال ابو المجد نجيب ساويرس عمرو موسى المستشار مرعى كمال الجنرزوى لبحث الوضع الحالى والانتخابات المقبلة

بعد ان تم عرض فيلم حرب المحاورات الجزء الثالث جاءت الرياح بما لا تشتهي السفن وانقلب السحر على الساحر متيجو نشوف http://www.youtube.com/watch?v=I2UWi9FFgIQ

السلام عليكم ورحمة الله وبركاته تحيه طيبه وبعد بتجول فى المواقع اللى مشترك فيها واللى اغلب المشتركين فيها من المغتربين ولقيت الاغلبيه بتدعوا الى ثوره زى اللى حصلت فى تونس والكل بيسخن الناس لكى تقوم بالثوره ولقيت ايضاً كلام ان مصر مفيهاش رجاله وان الرجاله بس فى تونس وان مصر فيها وفيها وفيها ....................الخ واللى بجد خلانى اشد فى شعرى ده ايام ما كان عندى شعر يعنى ان الناس دى كلها بره مصر اساسا وفيه منهم اللى اخد قرار بعدم الرجوع الى مصر الا اذا تحسنت الظروف يعنى خلاص شاف له حل تانى او حل انانى لمشاكل البلد انا طبعا مش بشكك فى وظنيتهم ولا اقدر انى اشكك فى وظنية اى انسان ولكن يا جماعه ليه عاوزين كل حاجه تيجى بالساهل ليه غيرنا اللى يضحوا علشان احنا نعيش انا شخصياً مقدرش اؤيد قيام اى ثوره فى مصر الا لما اكون فى مصر وبين الشعب غير كده مقدرش اقول كلمه غير انى انتقد تصرفات الحكومه واوعى الناس بيها لكن ادعوا الى ثوره وانقلاب وانا فى الخليج او فى اوربا او فى امريكا او ..........الخ يبقى منتهى الانانيه وخصوصا ان اى انقلاب او ثوره لابد له من ضحايا ليه اطلب من غيرى انه يضحى بحياته علشان خاطرى وانا بعيد قاعد فى التكيف وحياتى تمام اخر حاجه الى كل من يدعوا الى انقلاب اتفضل حضرتك انزل مصر وشارك فى الانقلاب غير كده يبقى ياريت حضرتك تسمعنا سكوتك تحياتى عنبو

رســـــالة محبـــــة انها الذكرى السنوية الاولى – لشهداء نجع حمادى – 6-1-2010 قمت باضافة صورة الشهيد المسلم ايمن حامد وسط صور الشهداء المسيحيين مجتمعين - حتى تكتمل المعانى . انا اعلم ان توقعات الكثيرين منكم ان تكون عودتى الى المحاورات بعد فترة حداد - بموضوع قاسي – وثائر العبارات – وغاضب كلهيب الاحداث الدامية فى الفترة الحالية ولكن ما حدث يفوق توقعاتي وسوف ارويه لكم اخوانى واحبائي الاعزاء - كيف استطعتم انتم – نعم انتم ان تغمرون النيران بقطع الثلج - هذا بالفعل ما حدث - فانا شعرت ان الامى هى الامكم واننا شركاء حقيقيون فى كل المحن هذه المحبة والرقى التى وجدتها فى عباراتكم ورسائلكم التى يفوق عددها توقعاتى - بل وكلماتكم - كانت بمثابة النموذج الذى اقدمه اليوم للمحبة والثقافة ونبذ التعصب – برغم تحفظاتى على بعض الاقلام التى خيبت ظنى وكانت قاسية ومؤلمة ومازالت ولكن اعود مرة اخرى لاذكركم ان المحبة كانت هديتكم لى خلال الفترة الماضية - ولكم الان اقدمها – لان الله محبة فاعلم يقينا - انه وبعد 50 عاما من الان - سوف تتلاقى اجيال ما بعدنا – و هم ابناؤنا واحفادنا على المحبة – لاننا اليوم نزرعها برغم الام بلادنا – لانه الدرس الحقيقي وددت ان اقول لكم وبرغم كل هذا وما وصلت له بفضل مشاعركم النبيلة الا اننى مازلت احاول ان اضمد جروحى واحزانى ولا استطيع ان انكر ذلك عليكم اقدم تعازي الحارة للفاضل / سكوربيون لانى لم ارسل له رسالة على الخاص - وانا اعلم يقينا ما تشعر به استاذى الفاضل - ولكن ادعوك اليوم لتشاركنى هنا فى مساحتى البيضاء انت وشركاء الوطن - والتى سوف تجتمع بها فقط حروفنا المضيئة لنبذ التعصب والكراهية والشماتة - شركاؤنا فى الالم الذين يجمعهم وطن واحد وامل وهدف مشترك - وليس غيرهم عدت اليكم بباقة زهور كتذكار - نضعها جميعا اكليلا فوق قبور شهداؤنا - بنجع حمادى – فى الذكرى السنوية الاولى لهم وفهمت الان معنى القول الماثور وردة واحدة لإنسان على قيد الحياة - أفضل من باقة كاملة على قبره اردت ان نتذكرهم جميعا - وانا اشعر مثلكم تماما بالخزى والعار – ليس فقط لمن فعل هذا العمل الاجرامى – ولكن لمساهمة القضاء المصري – بالتماطل والتحايل فى اوراق قضية مكتملة الاركان - برغم وجود اعتراف الجناه انفسهم ب8 جنايات اقل ما يقال حكم لاى جناية منهم هى حكم الاعدام والاعتراف سيد الادلة - وبرغم وجود شهود للحادث و برغم وجود الوقت الكافى لاتخاذ ما يلزم فعله للبت فى هذه المسالة – الا انهم لم يسمعو لصوت الضمير والحق والعدل – مما كان سبب او اخر فى تكرار الماساه مرة اخرى فى احداث الاسكندرية فى اقل من عام ولكن بخسائر اكــثر وجرم اكـــبر. وفى انتظار كلمة القضاء الاخيرة - يوم 16/يناير - الجارى – الحكم النهائي تذكرت هؤلاء الــ 7 شهداء - عندما كانو يحلمون بمستقبلهم ومستقبل اطفالهم اطفال الشهيد / ايمن حامد اطفال الشهيد / رفيق رفعت اصوات اطفالهم الايتام من يسمعها ؟؟ يـــــــــــــــــــــــارب من اعتصم بعقله ضل ، ومن استغنى بماله قل ، ومن عز بمخلوق ذل انت هو من نعتصم به ومن نطلب منه وليس سواك خالص مودتى اغابي

انا مستغرب و مش عارف ليه محدش لاقي حاجة يكتبها .. مع ان ما شاء الله كلنا لقينا حاجات كتير نكتبها في كل المواضيع اللي على الساحة ولا عشان سيد غلبان؟!! الحقيقة اصبت برعشة شديدة لما حطيت نفسي مكان سيد بلال أصل انا من الناس اللي بيقولوا عليهم متشددين متطرفين وحشين .. و عندي لحية و بأروح المسجد و بأحضر دروس و حاجات من اللي كان بيعملها سيد اترعبت لما رسمت زي ما قلتلكم قبل كدة في موضوع البحر .. رسمت فلاش باك مستقبلي لنفسي لو أنا مكان سيد اترعبت لما شفت حزن أمي و أبويا على شبابي و على تعذيبي ... حتى الموتة ما عرفتش أموتها في هدوء اترعبت لما فكرت في بنتي اللي عمرها مقارب لعمر ابن سيد .. سنة و نص .. و اللي هتتربى بدون أب اترعبت على زوجتي اللي مش بس اترملت و هتعيش من غير زوج .. لأ دي كمان ممكن تعيش مطاردة من الأمن و قد يطلعوها شريكتي .. في ايه أنا مش عارف؟!! اترعبت على كل الشباب الملتزم اللي هيخاف و يترعب من اللي حصلي و من اللي مش هيخاف و ممكن يحصله زي ما حصلي اترعبت على مصر .. مصر اللي خلاص بتقتل في ولادها بدون تمييز .. اسف يا مصر .. بحبك و الله .. نظام مصر اللي بيقتل فينا بدون تمييز امبارح كان في لقاء محاوراتي صغنتوت كدة .. قلت للشباب و الله قلبي واكلني على مصر و واجعني .. و أنا في مصر كنت عايش و السلام أنا في دنيا و مصر في دنيا .. شغلي و حياتي و سفرياتي و أهي ماشية .. لما جيت هنا و شفت مصر و اللي بيحصل في مصر .. لما بصيت عليها من برة .. اااااه يا بلدي و الله العظيم عرفت قد ايه هي غالية و قد ايه صعبانة عليا و قد ايه قلوبنا واجعانا عشانها و الله بنحبك يا بلدنا .. بس بنحبك حضن دافي يضم ولاده و الله بنحبك يا بلدنا .. بس بنحبك أمان و ملجأ لولادك و الله بنحبك يا بلدنا .. بس بنحبك تلمينا مش تفرقينا و تقطعينا و الله بنحبك يا بلدنا .. بس بنحبك نضيفة خالصة لينا مش لناس يدبحوا فينا ربنا يرحمك يا سيد و يرحمنا معاك و يرحم سيد زيك كتييييييير ما عرفناش ولا هنعرف عنهم حاجة!! مكاوى .. سيبها على الله

أعجبني هذا الموضوع قد يكون منا من يفعل هذه العبادات بطريقة طبيعية لأنه تربى على ذلك .. كأن يتبسم في وجه من يقابله أو أنه تعلمها و أصبحت لديه عادة .. كتلاوة أذكار الصباح و المساء هذا الموضوع ليذكرنا بتجديد النية .. أن ننوي بهذه الأفعال الثواب من عند الله و يلفتنا إلى بعض العبادات السهلة التي قد نكون غفلنا عنها نقلته لكم مع بعض التعديلات

الفيلم روعه بجد ,, من تصميم مكتب امريكي متعامل مع دار الهندسة الاستشاري الخاص بمشروع خادم الحرمين الملك عبد الله بن عبد العزيز لتوسعة المسجد الحرام والعناصر المرتبطة بها http://www.youtube.com/watch?v=4-AfunY7rME

أولاً: استحضار هيبة الله تعالى قبل أن تؤدي الصلاة. فهل فكرت يوماً وأنت تسمع الأذان بأن جبار السماوات والأرض يدعوك للقائه في الصلاة..؟ ثانياً: يجب عقد النية والتصميم على التركيز في الصلاة ليتقبلها الله سبحانه وتعالى والاستعاذة من الشيطان. ثالثاً: إننا في حديث مع الله فيجب ألا تؤدي الصلاة كمجرد مهمة فعندما تقرأ سورة الفاتحة في الصلاة تشعر بأنك في حوار خاص بينك وبين خالقك ذي القوة المتين. رابعاً: استحضار المعنى باشراك القلب والعقل مع اللسان فى تدبر كل كلمة والاحساس بها وبمعناها قال الله تعالى: (والذين هم في صلاتهم خاشعون) سورة المؤمنون. خامساً: عدم النظر إلى السماء. - قال رسول الله صلى الله عليه وآله وسلم ما بال أقوام يرفعون أبصارهم إلى السماء فى صلاتهم فاشتد قوله فى ذلك حتى قال لينتهن أو لتخطفن أبصارهم. سادساً: عدم الالتفات. - فإن الاختلاس يختلسه الشيطان من صلاة العبد فإذا صليتم فلا تلتفتوا فإن الله ينصب وجهه لوجه عبده فى صلاته مالم يلتفت فإذا التفت انصرف عنه. سابعاً: عدم التثاؤب. - قال رسول الله صلى الله عليه وآله وسلم التثاؤب فى الصلاة من الشيطان عند التثاؤب يقبض الفكين على بعضهما جيداً أو بوضع اليد على الفم. ثامناً: عدم التشكك. - لا يتشكك من اى هاجس فاذا تشكك من أي شيء كصحة وضوءه أو عدد الركعات استعاذ بالله من الشيطان وأكمل صلاته. تاسعاً: عدم القراءة سراً وأيضاً عدم رفع الصوت عالياً. - فيجب أن يسمع نفسه فقط لقوله تعالى فى سوره الإسراء (ولا تجهر بصلاتك ولا تخافت بها وابتغ بين ذلك سبيلا). عاشراً: اتقان الصلاة وذلك يكون بالتأني في أدائها وإعطاء كل ركن حقه والدعاء عند السجود بتركيز فى الرجاء فى الله تعالى باجابته. منقول

" الكاميرا الخفية " يبدو ان عقليات بعض المصريين مازالت تحتاج ثورة للتنظيف والتطهير صحيفة جديدة تريد ان تلفت اليها الانظار لكي يطلق عليها الصحيفة المثيرة للجدل وتحصل على دعاية عظمى لها، اكبر من اي طريقة دعاية اخرى قد لا تأتي ثمارها أوم ايه ..اوم تقول لك خبر عن لقاء مرشد الاخوان بمبارك فين في المستشفى التي يعيش فيها تحت الحبس - اوم ايه...او مفيش حد يشعر من الحراسة التي على المستشفى بهذه الزيارة ولا يكتب عنها ولا يفضحها...الا بعد فترة طويلة ....عن طريق مين...عن طريق اللهو الخفي اللي هوه المصادر الموثوقة لدى الجريدة اللي كان لابس طاقية الاخفاء وحضر اللقاء ودخل الى غرفة مبارك مستحدم خاصية البوللولم...التي تجعله غير مرئي لكي يسمع هذا الحوار... - طيب امتى ياعم كان اللقاء ده ....مفيش اي معلومة عن كده...ووواضح من الكلام ان اللقاء كان الايام الماضية...يعني بعد فوز الحرية والعدالة بالانتخابات وإلا لو كان في بداية الانتخابات لكان استغل هذا الخبر لفضح الاخوان واسقاطهم... - طيب ازاي يكون الأيام القليلة الماضية وفي هذه الاثناء كان مبارك في عز انشغاله بالمحاكمات - طيب هل مرشد الاخوان من السذاجة انه في هذا الوقت يضع نفسه ويضع الاخوان موضع شبهه التواطيء بانه يتلقى تعليمات من مبارك متهيأ لي اي عيل لسه بيرضع..هينطق ويقول ده مستحيل...ده يبقى منتهى الغباء....وهو المرشد بعد ما الاخوان فازت في الانتخابات ايه اللي يخليها تروح تزور مبارك...ويقعد بقى الناس يفتكسوا الاسباب الرهيبة اللي وراء الزيارة..وان ده تمهيد لاعلان براءة مبارك...وانه ده هو سر شويبس...من صفقة المجلس العسكري مع الاخوان...انهم يخلوهم يفوزوا بالانتخابات مقابل قبول الاخوان الافراج على مبارك... ويجي عمنا زعبلة...يقول لك ..هأو....البرطمان ده باطل.... يا حلولي - ...... - ياعم محمد...نفض......بالذمة يعني حد يكون متعلم صحافة يعلن عن خبر زي ده من غير ما يؤكده بأي دليل..او حتى شهود.... - ولما حاولوا يتصلوا باحد قيادات الاخوان ..وقال لهم هذا الكلام لا يستحق اصلا الرد عليه....فهذا هو الرد المناسب..... على العموم وسيلة مبتكرة للدعاية لهذه الجريدة...تدل على اننا كاعلام وكصحافة...لن نتغير حتى لو قمنا بمليون ثورة وحتى لو جاء نبي من الله ليحكمنا....فلن ينصلح حالنا الا لما نصلح انفسنا انفسنا التي تصر على ان تظل مريضة...

إلى من أعار الوطن عينيه .............. ترى إني رأيت عينيك معلقتين في الإشارة تحدد الطريق ..تدل الحيارى تزيل الغبار من الطريق وتكشف عما وراء الخبايا رأيت عينك تطير فوق النخيل كما الطير الأبابيل تحمل من سجيل حجارة ترجم غشم السرايا وتعد البغاة تكرار الزيارة رأيت عينيك فوق النجوم تطير بجناحي ملك مقرب تلملم خيوط الظلام وتفتح نوافذ الفجر الصادق للبرايا تهم بالأحرار أن هلموا آن للوطن أن ينال البشارة رأيت عينيك تخطب فينا حين أصاب الوهن جوانحنا تبث في أرواحنا نار الجسارة رأيت عينيك تكبر فوق المآذن تدق أجراس الكنائس ترقع مزق الوطن وتروي بماء النيل زهور البشارة سلام على الشهداء في السماء سلام عليك حين أصبت وحين حملت وحين وهبت حبيبتيك وحين يعود الوطن عفيا وحين تشرق شمس الوطن على العالمين بنور الحضارة

اولا اود ان اشكر الادارة الكريمة لتخفيفها العقوبة علي حاملي الانذارات بحيث امكن حذف الانذارات ابتداء من 6 شهور من تاريخ اخر انذار للعضو وهذا يعطي الاعضاء الفرصة لفتح صفحة جديدة بدون انذارات شريطة الالتزام بقوانين المنتدي. اما الاقتراح الذي اقترحه فهو ان تنظر الادارة في تخفيف العقوبة للاعضاء الحاصلين علي ايقاف نهائي بنفس الكيفية السابقة بحيث يسمح بحذف انذار للعضو الموقوف بعد ستة اشهر ومن ثم يمكنه العودة للمشاركة في المحاورات حيث سيصبح مجموع انذاراته 4 فقط ، وممكن للادارة الكريمة اتخاذ ما تريده من احتياطات مثل مراقبة المداخلات لفترة او اي احتياط اخر. ما دفعني لهذا الاقتراح عدة امور اهمها : 1- بعد تخفيف الادارة العقوبة للحاصلين علي 4 انذارات وامكان حذفهم ، نتمني ان يصل التخفيف للحاصلين علي 5 انذارات ايضا فالفرق بين الحالتين انذار واحد فقط. 2- فترة الايقاف 6 اشهر (او اي فترة تقررها الادارة ) اراها كافية لأي عضو للخروج من جو الضغط النفسي او توتر الاعصاب الذي ربما كان السبب في حصوله علي هذه الانذارات. 3- نحن في هذا المنتدي نعتبر كل الزملاء والزميلات بما فيهم الادارة والاشراف اخوة لنا ونعتبر المحاورات بيت ثاني لنا ، ويحز في نفس اي عضو خروج فرد من هذا المنتدي بلا عودة. 4- قد يسبب قرار الايقاف النهائي بعد 5 انذارات فقط ضغط نفسي علي الاعضاء الحاصلين علي عدة انذارات مما يؤدي بهم الي الحصول علي المزيد منها في فترة بسيطة نتيجة التوتر ، وبالتالي سيكون التخفيف في هذا الشأن مما يساعد الاعضاء علي التصرف بطريقة اهدأ وبالتالي تجنب المزيد من الانزارات. هذا و في كل الاحوال نشكر الادارة علي المجهود المبذول بلا مقابل من شأن ان تكون المحاورات افضل.

أنبثقت الفكرة من تعليق بنتنا جويرية اللوزعية الأتي وهنا أمسكت الأدارة بتلابيب الموضوع وقالت " عالبكره " لكن بما إننا في مرحلة سياسية ديمقراطية ... فلابد أن يتم دراسة الموضوع من كل الجوانب مع الأعضاء ... وبالفعل تم عقد مؤتمر موسع لطرح وجمع ولزق الأفكار : جويرية : بما إني صاحبة الفكرة .. فأنا عاوزه مترين قُماش زيادة أعملهم مًلس وطرحه صعيدي عشان لما أنزل البلد عندنا س س : هانبدأ من أولها ؟ يا ست جويرية خلاص الرؤوس إتساوت في المجتمع ... وإنتي صاحبة الفكرة .. ولا صاحبة صاحبتك .. هاتخدي زيك زي غيرك .. هما مترين ونص تعمليهم جلابيه تعمليهم اعلام لمصر وتنزلي بهم المظاهرات .. إنتي حُره الغريب : عندنا في الكويت أنواع هايلة من القماش ... وأنا مستعد أورد أجود وافخر أنواع القماش من محلات " غريبكو تيكستيل " وكله بسعر التكلوفه أبو محمد : يا أخ غريب الموضوع مش سبوبة .. إحنا لسه بندرس الموضوع .. وموضوع التوريد هايبقى أخر حاجه نفكر فيها .. ولازم يبقى هناك شفافية ومناقصة وفتح مظاريف على عينك يا تاجر .. عادل أبو زيد : فكره هايلة ... وموضوع تقدمي ... ده كان إستهلال لابد منه .. أنا فاكر في الخمسينات إنطرحت أفكار زي دي من الأتحاد الأشتراكي .. وكنا بنروح الجمعيات التعاونية نصرف كستور ودمور وبفته ودبلان وكافة أنواع القماش ... لدرجة إننا كنا بنعمل منها ملايات السرير . عبير الشرقاوي : ربنا يديك طولة العُمر يا بابا عادل ... بس عفواً حضرتك دلوقت ملايات السرير والمفارش بتتعمل من الساتان والحرير المزركش واللي عليه ترتر وشغل إبره ... تفتكروا هايفرقوا علينا حرير وساتان ؟ تيمور : وليه لأ ؟ أنا هاكلم محمد عادل وأنجي عادل و نصر محروس وكافة كوادر حركة 6 متر إبريل .. قصدي 6 إبريل .. إننا ندعو لمليونية من اللي خمسة بس بيحضروها ونسميها " مليونية البواقي والفُضل " ومش هانمشي من الميدان الا ومعانا الدبلان " .... ويا مُشير يا مُشير إنزل إنزل عالتحرير وهات معاك مترين حرير .... س س : إنت بتهيص يابني في اي حاجه والسلام ؟ مشير إيه اللي هايجيب لك حرير ... يا بني دول ما يعرفوش غير الكاكي وبس ... وأنا ما عنديش إستعداد ألبس ميري بصراحة بينك روز ( ريمو سابقاً ) : أنا موافقة على الفوكيرة دي ... وهاكلم أ عصام سلطان ... وكمان الهيئة العُليا لحزب الوسط .. إنهم يتبنوا فكرة توزيع القماش على عامة الشعب .. أنا فعلاً محتاجه حتتين قُماش أعملهم جونيله وبلوزه لمريم .... ربنا يخليها لي يارب محمد علي : والله عال ... الموضوع قلب جونيلات وبلوزات وناسيين الأغلبية الصامتة والناس اللي قالت نعم للكستور .. قصدي للدستور ... يا أخوان أنا بأقولها أهو .. القماش لازم يكون شرعي .. يعني مش شفاف للستات .. ومش مجرجر على الأرض للرجالة ... وما تنسوش كمان حتت قماش زيادة للرجالة عشان نعملها غُترة . محمد : طب ونسيت العُقال كمان ؟ والله عال ... يا سيد محمد علي إحنا لبسنا في مصر هو البنطال والقميص ... وعُمرنا ما هانبقى وهابيين ونلبس غترة وشماغ وحاجات من دي الساري : ومالها الغُترة يا أ محمد ؟ طب ليه التجريح ده ؟ س س : يا ساري لا تجريح ولا حاجه ... ترضى حد مصري ييجي يفرض عليكم هنا لبس البنطلون والقميص ؟ الساري : أه أرضى بصراحة س س : أفحمتني .. طب جاملني وقول لأ من ورا قلبك سمبا : على فكرة في برنامج على الايفون تدخل له القطن من ناحية ... يطلع لك قماش من الناحية التانية .. وبمية دولار بس أسد : أنا ضد أي حاجه فيها تقييد لحرية الإنسان ... يعني ليه الدول تفرض عليه نوعية وألوان معينين ؟ ده أسلوب شيوعي واشتراكي مقيت س س : فعلاً يا أسد ... كنت زمان بأشوف الصينيين وبتوع كوريا الشمالية كلهم لابسن زي بعض ... قال يعني هي ناقصة لخبطه ؟ أبو محمد : نقطة نظام ايها السادة المتحمسون ... عاوزين نناقش الموضوع متر متر .. ونشوف إحنا معترضين على إيه وموافقين على إيه عشان نرفع مقترحاتنا لحكومة أ عصام شرف فلانه : إسمحوا لي بكلمه من فضلكم ... أنا ضد الموضوع ده ... وعُمري ما اتصور نفسي وأنا واقفه في طابور طويل عريض عشان أخد حتتين قماش ليه ولاولادي .... فبدل البهدلة دي كلها ... ليه ما يكونش عند الحكومة خدمة الديليفري ؟ أو أوبشنز كتيره وكاتلوجات قماش نختار من بينها ؟ .. ليه كمان ما يتوسعوش ويفرقوا علينا قماش ستاير ... أو قماش أوبيسون للصالونات المدهبة وكدهوت ؟ س س وهو يجز على أسنانه : يا فلانه باشا ... بقى جويرية عمالة تقول لك حتة كستور مترين ونص يادوب يكفوا جلابية .. وإنتي عماله تقولي ستاير ويانسون و قطن للتنجيد ... أسكتي الله يرضى عليكي وخلي الشعب يستر نفسه الأول وبعدين نفكر في الحاجات التانية بتاعتك دي سلوى : ما تعملوش حسابي في الموضوع ده .. الـ Pano ده لإنه عندنا في أسبانيا حلو خالص .. وكمان العرض عرضين المحتار : لو سمحتوا يا جماعة .. أنا جايلي فرصة عمل في السعودية في شركة مقاولات .. بالنسبة بقى هناك . القماش بيبقى على الكفيل ولا على الموظف ؟ أرجو سرعة الرد جايلك يا كندا : دي ميزة الدول النضيفة .. إنت أول ما تعمل لاندنج يا معلم .. تلاقي بت كندية زي لهطة القشطة مستنياك في المطار وفي إيدها شنطة مليانه قماش كندي .. إيشي شيفون على فيسكوز على نوع هناك إسمه عضة الكلب .. تفصل وتهيص ويفيض منك كمان حسام وعنبو في بؤ واحد : طب بالنسبة لغير المتزوجين ؟ هايبقى في قماش جينز ديرتي ولا الموضوع ده للعوائل بس ؟ س س : لأ طبعاً للعوائل يابني .. إحنا ناس أصحاب عيال .. وبعدين إنتو أمركم سهل .. هو منطلون مقطع وتي شيرت ومشي حالك محمود البصيلي : قُماش ؟؟؟ بتتكلموا عن القماش ؟؟ الله يرحم أيام القماش المحلاوي اللي خربوه بالكويز والإتفاقيات الصهوينية ... حسبي الله ونعم الوكيل .. حسبي الله ونعم الوكيل بينك روز : على فكرة .. أنا كلمت أستاذ حماده سلطان .. قصدي عصام سلطان أمبارح وقولت له يلغي إتفاقية الكويز س س وهو ينظر لريمو شذراً ولسان حاله يقول : إحنا نخلص من 6 إبريل .. يطلع لنا عصام سلطان ؟ ريمو كرفت على حته أركتيكاوية يا رجالة لماضة مصرية قوي : يااااااه فكرتوني بأيام زمان وأنا صغيرة .. كانت مامه دايماً تقطع حته من ديل أي فساتن عندي وتعملهم لي شرايط للضفاير بتاعتي .. فكان الفستان لازم يبقى ماتشنج مع ضفايري .... وفكرتوني كمان باغاني الطفولة زي " لاعبيني والاعبك وأقطع ضفايرك " ................ صباحكم قصاقيص قماش ملونه كل قصقوصة بتحكي قصة صغنونه ... وش عيله صغيرة ماسكه مقص وعماله تقصقص في فساتين صاحبتها

عارفين ايه أحلي في السلفية أو المنهج السلفي أنها أرست مبدأ أغلبنا مكنش بيستخدموا وهي مدرسة الدليل يعني لما أقتبس كلام أو انقله عن حد لازم أجيب مصدره وده في حد ذاته كنا مفتقدينه تخيلوا مثلا الشيخ كشك الله يرحمه بالرغم من علمه إلا أنه نفسه وقع في نفس الخطأ لما إستشهد بحديث خطأ في أحد خطبه وراح الشيخ الحويني ينبهه عليه وكان لسه صغير راح الشيخ قاله تعلم قبل أن تسأل وكانت يداية الشيخ الحويني في علم الحديث الناس اللي في الخير زي الله يرحمه الشيخ كشك حتي كان خطأه بيجي بالخير انه حفز الشيخ الحويني انه يصبح أعلم الناس بالحديث في مصر مثال كلنا بنقول إطلبوا العلم ولو في الصين من غير من نقول رواه مين أو صحة الحديث إيه http://www.egyptiantalks.org/invb/index.php?app=forums&module=post&section=post&do=new_post&f=12 زي الحديث بتاع أن جنود مصر خير أجناد الأرض http://www.youtube.com/watch?v=KiKOLOEETP8 نقول أن الحديث باطل والرسول :pbuh: مقالوش نلاقي ناس وشها يحمر وتقول ازااااااااي ازاااااااي مقلوش مشفتش ازاي حربنا 1973 ووقفنا ضد اليهود ومن قبلهم الإنجليز والفرنساوين ده احنا كان عندنا أعظم حضارة وبنينا الهرم وخدنا كأس أفريقا 3 مرات علي التوالي ازااااااااي نقوله له كل كدة جميل بس ياعم الحاج هو بالعافية يزعل بقي بيرطم ويقولك شوف الناس اللي بتنكر الخير لبلدها وعايزين نبقي دلالديل للوهابية السعودية mf_p: نقوله يعني نكدب علي الرسول :pbuh: عشان نرضي غرور سعادتك حاجة غريبة قوي :happy: خلي بالكم يا جماعة بعد كدة وأنتوا بتنقلوا الأحاديث تقدر تتأكد من صحة ااحديث من موقع الدرر السنية الموسوعة الحديثية سهلة ؟ سهلة إن شاء الله rs: rs: rs:

ربى قعوار ادعت الاسلام خمس سنوات كامله ارتدت فيهم الحجاب و النقاب و اعقدت مئات المقابلات لتدعو للاسلام كلها موثقه بالصوت و الصوره ثم بعد ذلك اعلنت ارتدادها و خلعت الحجاب امام الكاميرات فى حركه مسرحيه و رغم ذلك لم يصدر احد دعوه باهدار دمها او حتى يتعرض لها هذا مثال واحد بخلاف عشرات الامثله الاخرى لاخرين ادعو التنصر و هم موليدين مسلمين فلم يهدر دمهم احد و لم يتعرض لهم احد و لسته اسمائهم تطول و ان كانت معروفه تماما و لا حاجه لاعادتها مره اخرى من يريد ان يؤمن فلنفسه لن يعود علينا ايمانه بشىء و من لا يريد ايضا لنفسه

سبحان المعز المذل

لقيت باب الفنون ده ماحدش بيقربله زي كانتين مدرسة الناظر صلاح الدين قولت انشطه شويه الجايزه نقديه بقيمة 125 دولار ياللا ورونا http://www.youtube.com/watch?v=i0dEUmPvzng&feature=player_embedded

السلام عليكم و رحمة الله و بركاته حبايبي الكتاكيت لا كتاكيت ايه حبايبي العفاريت......يووووووووه مش ديت حبايبي و قرايبي و جيراني....انا عايز اخدكوا في احضاني....(وش عبد الحليم وهو بيناهد ع العجلة) يووووووووووه برضه مش دي ايها الشعب المحاوراتي الرائع....(ابص يا خويا علي عدد الردود الاقيها يعني حوالي 10...ابص ع المشاهدة الاقيها عدت المية....طب ايه بقي.....بقي ايه طيب؟؟؟؟) ميرسي كتير علي كلمة حلوة اتقالت.....وكل بوينت خضرا رااااااااحت للساري....(وش حد هيمووت ن الضحك) و الاهم احنا اللي بنشكركم علي صبركم معانا و بجد متابعتكم بقت ترفع معنوياتنا كتير فيه حاجة بس عايزة انوه عنها طبعا منتدي المحاورات....ثري جدا....بوضوعاته الفكرية الجادة اللي بتسلط الضوء علي كتير من متغيرات الوطن كمصر....او اوطاننا كمغتربين لو تلاحظوا الفيلم ما اتعرضشي لاي من الموضوعات الجادة....لان الساري و انا رأينا انها اكبر من ان احنا نطرحها في فيلم....و كمان احنا بنحاول نحافظ علي الطابع الكوميدي لانتاجنا فيه مناطق ثرية جدا جدا في المحاورات......و جاتلنا الفكرة ان احنا نعمل توثيق سريع كده لكل الافكار اللي انطرحت في فترة زمنية عمرها شهر الفيلم ليس سوي اجتهاد...في التوثيق....قد نخطيء فيه و قد نصيب....فقط اردنا ادخال البسمة بشكل مختلف ع جنب بقي انا بريئة توماما من مشهد الشيف بندق.....مغتربة....و ضحي.....ساري كالمعتاد لبسني في الحيط....و هيخش يموت هو...(وش حد جبان بيتلفت وراه حاسس انه هينضرب) مساااكم لقطات كتيرة حلوة فوق بعضها....و احلي ما فيها انتم

تشكر على رفع الموضوع يا scoropion لكن الرفع لوحده ليس كافياً يا سيدي اما ان تتخذ الإدارة موقف جاد في تلك الموضوعات ولا تكيل بمكيالين ( أقصد هنا عندما قام الأخ الفاضل أ.شريف مان بفتح موضوع كانت فيه بعض الإساءات لليبرالين قامت الإدارة بحذف موضوعه بعد اقل من ساعة فقط وايقافه لمدة اسبوع ) بينما الطعن على السنة والإمام البخاري يترك بدعوي حرية الفكر , سبحان الله ولا حول ولا قوة الا بالله فلتحدد الإدارة موقفها لنحدد نحن ايضاً موقفنا , انا شخصياً قررت ان اكون من اليوم مجرد قاريء وزائر فقط للمنتدي ولست مشاركاً الى ان تحذف تلك الموضوعات , وستكون مشاركتي هذه اخر مشاركة الى ان تحذف تلك الموضوعات. لسبب بسيط اننى خائف على نفسي ان يقع على قول المولي عز وجل في كتابه الكريم "وَإِذَا رَأَيْتَ الَّذِينَ يَخُوضُونَ فِي آيَاتِنَا فَأَعْرِضْ عَنْهُمْ حَتَّى يَخُوضُوا فِي حَدِيثٍ غَيْرِهِ وَإِمَّا يُنْسِيَنَّكَ الشَّيْطَانُ فَلَا تَقْعُدْ بَعْدَ الذِّكْرَى مَعَ الْقَوْمِ الظَّالِمِينَ" وقول المولي عز وجل "وَالَّذِينَ لَا يَشْهَدُونَ الزُّورَ وَإِذَا مَرُّوا بِاللَّغْوِ مَرُّوا كِرَامًا" متابع لموقف الإدارة وانا في صفوف القراء, تحياتي للجميع. مع تحياتي

السلام عليكم ورحمة الله وبركاته ،، كما وعدتكم هذا هو الجزء الثاني من فيلم شخصيات من محاورات المصريين smk: ارجو ان ينال اعجابكم وتقديركم .. اكتفي بهذا الوصف .. واترك لكم المشاهدة والتعليق .. ولا تنسوا مع الساري .. مش ح تقدر تغمض عينيك ;) هذه المرة الفيلم يحكي عن .. ما تيجوا نشوووووف ؟؟؟ http://www.youtube.com/watch?v=tJUULjwD8Yc وقتاً طيبا ارجوه لكم bnd5::

جاليليو المذكور هنا هو جاليليو جاليلي " Galileo Galilei‏ " العالم الأيطالي الشهير الذي عاش في العصور الوسطي .. و ماساته انه ظهر في عصر سيطر فيه بشر علي بشر آخرين بأسم الدين ... تحول فيه رجال الدين لرجال دولة ... تركوا مهمة الوعظ و التبشير و ايصال رسالة المحبة التي تركهاالسيد المسيح له المجد ليتحولوا الي جباة ضرائب ... بائعي صكوك غفران ... حاملي قائمة اسماء من سيدخلون الجنة ... نافخي في نار حروب راسمين علي راياتها رمز المحبة محولينه من صليب الفداء الي صليب الكراهية و الشر ... لست بالطبع في عبقرية جاليليو .. و لكنني اخترته كرمز ... رمز لوأد ملكة الفكر و الأبتكار بل و عقابها شر العقاب علي يد بشر يعتقدون انهم يحمون العقيدة .. مستخدمين في ذلك آيات كتاب مقدس مفسرينه بما يأتي علي هواهم ... هم ...أخترته كرمز حتي لا أجد عشيرتي تبدأ من حيث ابتدوا ... هم ... حراس العقيدة ... حتي نتعظ من تجارب شعوب أخري و نبدأ بما انتهوا اليه ... لا لن اصبح ساحر آخر مكبل فوق محرقة الجهل و الكراهية و الخوف من الأختلاف .... لن أقبل بحرقي بين صيحات القطيع التي تعتقد انها بانسياقهاتحت عصا راع جاهل ستصل الي بر الأمان .. بينما هي المجزرة مصيرها ... لن اصبح جاليليو آخر في وطني ... لن انخدع بمعسول الكلام .. و حلو الوعود التي أعلم انها كاذبة .... لن يلهيني من يرفع في وجهي شعارات و آيات تجعل مني مواطن "درجة ثانية" ... لن أقبل ان يحكمني من يتلون بلون الحرباء و يغني للديموقراطية التي طالما حاربها ... الدين قد نختلف فيه ... و لكن الوطن هو ما يجمعنا جميعآبدون أفضلية لأحد الا في اتقانه لدوره مهما بلغت بساطته ... و للحديث بقية ...

احمد الله ان وفقني حتى ارى هذه الليلة التي انتظرتها من شهور (حتى انني سجلتها في جهازي الموبايل كي ﻻ انسى)...و هذه الليلة التي اعتبرها من ليال اشبه بالعيد ففي 31-من اب اغسطس-2005 سجلت في هذا المنتدى و صرت عضوا في اكبر و اعمق و اطول منتدى انضم اليه...هذا المنتدى الذي استطعت ان اعبر عن ارائي الفعلية بنسبة تجاوزت ال70% وﻻ شك ان المحاورات و التناقضات و الصراعات قد نمت مستواي فكريا و حواريا وجعلت قلمي سيالا الى حد كبير.... انضممت لهذا المنتدى وانا في اوائل الثلاثين من عمري و هانذا تجاوزت اﻷربعين!!!!! (ﻻ اكاد اصدق)....منتدى متنوع بحق وقد عرفت اشياء عن بلدي لم اعرفها قبل ان اصبح عضوا ...و عن طريق المنتدى جائتني دعوة كريمة من احد اﻷعضاء حتى انضم الى GMail عندما كانت مقصورة على الدعوات الخاصة....و الحمدلله خلال هذه المدة الطويلة لم تحدث معي اي شحناء او بغضاء ...و في عز خلاف وجهات النظر كان الرقي و اﻹحترام سيد الموقف.... ولم اجد تقدير ﻵرائي ووجهات نظري بالكم الذي استقبلته هنا في المنتدى و عبر الرسائل الخاصة....وﻻ زال هذا هو الوضع لو اردت ان اوفي ما بداخلي حقه لما استطعت...ولو اراد ان اوفي للأعضاء خاصة في البدايات حقهم لما قدرت....فكم من استشارة تقنية او معلومة عامة قام بها اﻷعضاء مشكورين..... ﻻ املك اﻻ ان اهنيء نفسي بمرور العشرية البيضاء في هذا المنتدى...

يشعر الطفل الصغير باقتراب يومآ من الأيام التي ينتظرها كثيرآ .. الشوارع مليئة بتلك الدميات و الفرسان الملونة المصنوعة من السكر .. و هو علي ثقة تامة ان نصيبه منها آت لا محالة .. تأتي أمه لتصحبه من المدرسة .. ثم تتوقف أمام محل ماسكوت للحلويات بشبرا و تشتري منه صينية منها .. فيمني نفسه ببعضها مما يسيل لعابه .. تتوقف الأم لتقبل يد قسيس يخرج من كنيسة و الذي يضع يده علي رأس الطفل ليباركها .. يصلا أخيرآ الي البيت و اثناء صعودهما تتوقف أمه في الدور الثاني و تقرع باب بيت أم مصطفي .. لا يطيق الطفل صبرآ .. فهو يعلم كم الثرثرة التي ستبدأ الآن .. و الوقت الذي سيضيع قبل ان ينال حظه من الحلوي .. تفتح أم مصطفي الباب و تنفرج اساريرها لرؤيتهما بينما تنتقل صينية الحلوي الي يدها و أمه تقول لها كل سنة و انتم طيبين .. يشعر الطفل بالقلق و يصرخ : و أنا ؟؟ تدعوه ام مصطفي للدخول لتعطيه كل ما يريده بينما تسحبه أمه الي بيتهم معتذرة عن قلة أدبه .. ما أن يدخل الي البيت باكيآ الا و بجد جده و معه ككل سنة في هذا الموعد تلك "اللفة" التي يعلم تماما ما تحتوبها فيهرع اليه حاضنآ اياه ببد و ممسكآ لفته باليد الأخري .. تلك اللفة التي تحوي حصانه .. حصان المولد .. بينما لفة أخته كانت قد أخذتها قبل وصولهما و بها العروسة الوردية ذات الرداء المزرقش .. تبتسم أمه و هي تقول : تعيش لكل سنة يا بابا فيرد : كل سنة و أنتم طيبين انتهت و ها أنا بعد ٤٥ سنة أكرر نفس التهنئة في نفس التوقيت لعائلة أخري أحبها من كل قلبي يا عائلة محاورات المصريين الجميلة كل مولد نبوي شريف و انتم طيبين .. كل سنة و احنا طيبين اخبار الحمصية و السمسمية ايه معاكم ؟؟

السلام عليكم و رحمة الله و بركاته النهاردة 30 جمادى الاخر و بكرة ان شاء الله غرة رجب كل سنة و انتم طيبين ايه رأيكم نبدأ من بكرة مع بعض نحيي الليل بركعتين و نستمر فيها ان شاء الله و كل يوم نفكر بعض برفع الموضوع و كل يوم احد و اربع بالليل نذكر بصيام الاتنين و الخميس اعاننا الله و اعانكم على الطاعات

أعتقد أن الهدف من إنشاء تلك المحاورات هو تبادل الحوار و الآراء بين أعضاء هذا المنتدى الكريم .. لاحظت إننا بنكون حلوين أوي مع بعض طول ما إحنا متفقين kis)- ونقعد نبعت لبعض ورد و كلام زى العسل :D ما اعرفش بصراحة إيه اللى بيحصل ده لما بنختلف ..يا نهاااار أبيض .. هجوم و صواريخ و مدافع وناقص نمسك في خناق بعض bsh:) وبعدين لما حد بيزعل بنقوله إوعى تزعل أنا مش بهاجمك إنت n2&( إنت زي الفل :yes: أنا بهاجم رأيك بس .. أصله بصراحة زى الزفت :tease: يعنى هو ماينفعش نختلف وكل واحد يقول رأيه بالراحة من غير ما يزعل التانى i*: يا جماعة إحنا كلنا إخوة و كل واحد ليه عقليته و آراءه و خبراته في الحياه .. ممكن والله نختلف ونتناقش من غير تجريح fty:: هي بس عايزة شوية صبر وتأنى في الرد .. مش لازم نرد واحنا غضبانين md2: ومش دايما اللى بيتقال ينفع يتصلح أو يتنسي بسهولة .. على العموم أنا قلت اللي عندي و اللى عنده كلمه طيبة يقولها .. وتصبحوا على خير yaw:

هوب .. ستوب .. وخمسه هدوء محسوبكم..واحــد مخنــوق مِـ للى بيحصل ..فى التحرير م الوطن اللى ..ملوهش كبير ياه..داالوضع حقيقى .. خطيـر بـدعى يا رب ..الخلق تفـوق محسوبكم .. واحــد مخنــوق بأمارة….فِـكـرِى المشلول محسوبكم..واحــد مغــلول لماوقفت ..مع الثـــوار قالواعليا ..بــطل مغوار ولماحاولت ..أَطَـفِّى النار إتهـمـــونى...بإنى فلـول محسوبكم..واحــد مغــلول كـر .. وفـر .. وحرب ضـروس محسوبكم .. واحــد مفـروس ليه الحق .. يضيع .. ويتوه ليه المصرى ..يعادى أخـوه إصحواياعالم..إصحواياهوه دامُخـطـط .وأكيد مـدروس محسوبكم..واحــد مفـروس لـت ..وعجن ..وهِيئ..ومِيئ محسوبكم..واحــد ح يطـأ إللى يهيــنك ..بالألفـاظ ويحـاورك..بكـلام ألغــاز وتقول له ..الحل يا أستاذ ياخُد بعضو ..قوااام..وِ يزُء محسوبكم..واحــد ح يـطأ هـم..وغـم..وحـزن كـمان محسوبكم..واحــد قرفان تقريبا..حيصيبنى جنون حتفرتكنى ..بجـد..ظنون خايف على..تمانين مليـون من فتنه ..بيزرعهاشيطان من فتنه ..بيزرعهاشيطان من فتنه ..بيزرعهاشيطان محسوبكم..واحــد قرفان محمود البصيلى

الاستاذ تامر حط موضوعه كنصيحة و جاب ما يدلل على كلامه لا اجبر حد و لا قال لو ما عملتوش كده هاتروحوا النار ليه ما يبقاش الرد عليه جزاك الله خير على النصيحة و انا حر بقى اعمل بيها او لأ و بعدين هو احنا كمسلمين مش مأمورين من الله بالتناصح و لا نسينا حديث الرسول عليه الصلاة و السلام الدين النصيحة و بعدين معلش بقى يعني هو السلفيين دول مش من المصريين و من حقهم يتكلموا زيهم زي العلمانين في المنتدى دا و لا ايه بما انهم مصرييييييييييين يبقى من حقهم يقولوا اللي هما عاوزينه زيهم زي باقي المصرييييييين اللي اسم المحاورات على اسمهم و بعدين خلونا نتكلم بصراحة بقى هو لو واحد او واحدة في اي منتدى حاطط صورة واحدة قالعة اكتر ماهي لابسة دا حلال و لا حرام دا بيثير غرائز و لا لا و بعدين هو مش حاطط الصورة دي في محفظته لا دا حاططها و كل حد بيشوفوها يبقى ليه نؤذي الناس و لا دي كمان فيها و الله مش عاجبك عندك الريموت و غير المحطة جزاك الله خير استاذ تامر على النصيحة و جعلها الله في ميزان حسناتك

أرجع يا عنبو لما كل الناس عايزة تبقي فتوات اومال مين اللي هينضرب .. توفيق الدقن أرجع يا عنبو احلي من الشرف مفيش ... توفيق الدقن من النهاردة مفيش حكومة ... فيه عنبو .. احمد السقا ارجع يا عنبو كده برضه يا خاين :wub: هند رستم انت فين يا عنبو ... انا هنا يا سلاااامة فيلم واسلاماه ارجع يا عنبو هي حبكت فيلم الزوجة الثانية ارجع وهتبقي ليلة يا ابو العلا اقصد يا عنبو فيلم الزوجة التانية ارجع وحياة تيتا عماد حمدي بعت البيت بالحشيش يا شيخ عنبو فيلم الكيت كات سلام عشان عنبو العطار معروف كمان وزباينه كتار من اسوان لراس التين عارفين طبعا عارفين فيه عنده قمر الدين وافزدق ويا التين واشمر والينسون والفلفل والكمون عنبو العطار عنبو العطار ___ الصلا عالزين الصلا عالزين ياعنبو مفتح عالخدين جبت الجمال ده ياحلوه منين البركه في عنبو ياضي العين البركه في عنبو انا جيت اهني بشكل جديد ومعايا فيتامين كله حديد _____ لأنه من أرقى أنواع الليمون في العالم (!!) فهي تجلب لي ولك ... الانتعاش عنبو خمس خمسات ـ الانتعاش عنبو خمس خمسات ـ لنتعاش ____ عنبو ابو زيد بيجيب اجوان هو وعماد متعب كمان _____ علي عنبو الساكن في دير القطان الدواء فيه سم قاتل _______________ الشعب ايد واحدة الرجاء دعم الحملة ومواصلة النضال :)

أنا آسف يا محاورات المصريين أولا مع الحرية اللي عشناها هنا بدون قيود يعني أنا مثلا واحد من الناس بقول كل اللي أنا عايز أقوله وعمري ما خدت إنذار للآن وأنا اعتبر إن بعض الأشياء ممكن تكون مشروعة في حوارنا وممكن يعتبرها البعض تطاول أو شخصنة مش مهم المهم يكون فيه فكر أنا آسف لأن بعض المداخلات بقى فيها كلمة أو نصف كلمة أو إشارة بدون فكر أو مضمون مفهوم وبعض المداخلات أقل ما يقال فيها إنها إسفاف وبعد صدور الكتاب عن المحاورات نرى هنا الدفاع عن شخصية عليها علامات استفهام كثيرة ويقول عنها فكر ....... هي دي الصورة اللي هتكون في كتاب بعد كده عن المحاورات؟ هي دي الصورة اللي ممكن نرتضيها في الصالون الثقافي؟ أضف إلى ذلك عمليات النقل المنظم والموجه الذي سيقابله نقل للرد وهكذا طيب إحنا رايحين فين

قال الراوي بعد ان تم اعتماد رأي الصندوق .. واشاع المشرفين انه الرأي الصدوق .. امتلأت جيوب المشرفين بريع الكتاب .. وانقسم المحاوراتيين لاقسام واحزاب .. عند الإشراف قد فاضت الخزانة .. وتيمور تم ايداعه بالزنزانة .. في المحاورات .. طغت الجدالات .. بمختلف الترددات .. ان هناك تلاعب بالاصوات .. وتغيير لراي بعض المشاركين والمشاركات .. وحسبنا الله العزيز المكين .. على ما كان يجري في الخفاء ولا نعلمه .. او كان يجري في العلن ولا نفهمه .. مرت ايام ثلاثة وتيمور في غياهب السجون .. و كان في سجنه يقاسي كل انواع الشجون .. فتارة يغضب ويهدد بالويل والثبور .. وتارة يستسلم لعظائم الامور .. وغالبا يحلم بحكمة الشجاع الصبور .. ويترك لعقله التخطيط ويقرا ما بين السطور .. ثم قال بعد طول تفكير .. وبعد عناء وتدبير هي والله ثورة تأكل الاخضر واليابس .. وتنزع الظالم و تفك المحابس وعلى هذا الراي قد طاب عزمه واستراح الخاطر .. ان هي الا ايام وتفتح العنابر .. فويل لكم يا بني اشراف -------------------------------------- المكان : ساحة المحاورات الزمان : بعد ثلاثة ايام من حبس تيمور الحدث : يخرج تيمور من السجن وقد طالت لحيته .. يستقبله الرجال بالاحضان والنساء بالزغاريط اوز اوز : كفارة يا معلم حسام عبد الفتاح : اوعى تفتكر اني كنت قاعد ساكت .. انا عملت المستحيل عشان اخرجك .. عارف يا هندسة لو ما كانوش خرجوك النهاردة كنت هاعمل ايه ؟ .. انا ساعة الجد ماليش حل .. التونسي : الله فرجها .. الله فرجها تيمور خيوله مسرجها والحرية عالي درجها من قلب الحبس مخرجها العطار : ضايعين من غيرك والله يا ريس .. ربنا ما يرضاش بالظلم اركتكت : متشكر خالص مش عارف من غيركم كنت هاعمل ايه والظالم ليه يوم .. تامر مصطفى : على ايه الغاغة دي بس ؟ .. هو مانديلا يعني اللي طلع من حبسه ؟ طارق حسن : مبروك الافراج يا عمدة .. دقنك طالعة اهو .. انت بقيت اخوان ولا ايه ؟ اركتكت : آآآه بس على اللي عدى عليا في الحبس .. كانوا يعذبوني كل يوم .. ما تقوليش ابو غريب .. ولا جوانتانمو هند علي : عملوا فيك ايه يا ضنايا يا ابني .. شكلك متشحتف خالص تامر مصطفى : ما عملوش فيه حاجة يا مدام هند .. انتم مكبرين الموضوع ليه بس .. تلاقيه اترزع كم كف على كم شلوت وخلصت القضية ضحى : اعتقد دلوقتي بقى واضح رأيي اللي قلته من اول وكلكم كدبتوه .. قلت من اول انهم مش هيسيبوا اللي صوت بلأ على مزاجو .. واهو كلامي طلع كله صح .. بس فين اللي بيفهم ؟ حسام : سبتهم يضربوك ليه .. الفجرة .. عارف لو انا مكانك ؟ كنت طبقت كل الكونغ فو والتايكوندو بخلقتهم .. اصلي لما ازعل ابقى وحش اوي اركتكت : هو انا قادر عليهم كلهم .. ؟؟ دول استخدموا كل حاجة .. كهربا .. انتزاع اضافر .. سلخ .. تكسير عضام .. كل حاجة قلب ابيض : يا ضنايا يا بني .. كل ده ؟ تامر مصطفى : يا ماما قلب ابيض ما تصدقيش كل حاجة بقى .. اهي اضافره زي الفل بس هو اللي عايش الدور اوي بوسي : ايوة .. انت اوفر اوي يا تيمور .. عقدة اضطهاد متجذرة دامو : ايه متجذرة دي يا بوسي ؟ اوزاوز : ايه بلوفر دي يا بوسي ؟ اركتكت : يا جماعة متشكر خالص .. تعبتكم معايا :flr1: اما اولئك ال ( تيييييييييييييت فاقول لهم .. جررررررررررررر قلب ابيض : بص يا ابني يا تيمور .. احنا ياما اختلفنا معاك بس بالظرف ده كلنا معاك .. تلاقيك على لحم بطنك يا عيني .. تعال عندنا بالديوانية بتاعتنا اصلي عاملة طاجن مسقعة باللحمة تاكل ايدك وراها تامر مصطفى : ما تتعبيش نفسك يا ماما قلب ابيض .. الراجل زي الفل اهو .. تلاقيه لسه متغدي اركتكت : تلات ايام ما اكلتش فيها حاجة يا ماما ... تصوري .. بندق : يا راجل مش لسه باعت لك امبارح صينية بط بالبردقان ؟ اركتكت : اخدوها الظلمة ..وتعازموا عليها اوزاوز : معذورين والله .. انا لو مكانهم هاعمل اللي عملوه لونا : ممكن تعطيني وصفة الطبخة دي ياشيف بندق ؟ .. طول عمري نفسي اعمل صينية بط بالبردقان اوزاوز : وانا طول عمري نفسي اكل بط بالبردقان الساري : وانا طول عمري نفسي افهم .. ازاي بط .. وبردقان ؟؟ اركتكت : انا اعتذر يا ماما قلب ابيض .. خبز الاحرار هو الثورة :happy: لن يدخل الزاد فمي حتى انتقم اوزاوز : شششششششش .. اسكت انتا .. احنا معاكي يا قلب ابيض .. مايصحش نكسفك برضو نغسل فين ايدينا ؟ اركتكت : كلنا مش هناكل اي حاجة لغاية ما نثور عليهم بقى .. ثوار .. نتحد .. من اجل القضية تامر مصطفى : اول مرة اتفق معاك .. يالله يا سيدي روح اعمل لك ثورة هناك بعيد اوزاوز : ثورة مين يا عم انتا .. تقول لك طاجن مسقعة باللحمة .. باللحمة يا راجل انتا قلب ابيض : والله يا تيمور يا بني انتا كسفتني .. فعلا .. ناكل ازاي والظلمة دول ياكلوا عيش الغلابة ؟؟ دامو : يعني ايه مسقعة يا اوزاوز ؟ يعني حاجة ساقعة ؟ اوزاوز : يعني داهية تاخد تيمور هو و ثورته --------------------------------- المكان : ساحة المحاورات الزمان : بعد اربعة ايام من حبس تيمور الحدث : يخرج تيمور مع مجموعة ضخمة من ثوار 31 فبراير مرددين هتاف .. الاعضاء يريدون اسقاط الاشراف فتفوتة : انشرووووووا .. ثورة .... انشرووووووووا .. مصيبة ... انشرووووووووا مظاهرات ضخمة يقودها تيمور المراغي .. تتجه الى مبنى الاشراف الرئيسي .. المظاهرات تقطع طرق المحاورات .. وتغلق الميادين .. ومعانا هنا بعض المتظاهرين .. نسمع بيقولوا ايه .. تعال انتا يا فندم .. انتا يا اللي لابس الطربوش .. ممكن تعرفنا بنفسك ؟ احمد سيف : انا باحث عن الحقيقة .. مدافع عن الحرية فتفوتة : ممكن تقول لنا مطالبكم ايه من الثورة دي ؟ احمد سيف : اعادة الاستفتاء .. الغاء الاشراف .. فتفوتة : متشكرين خالص يا استاذ .. ومعانا استاذ تاني .. ممكن تعرفنا بنفسك ؟ كومنق سوون : انا من سيجتث راس الظلام .. انا الذي سيحرق اكبادهم فتفوتة : وعايز ايه من كل اللي تعملوه ده ؟ كومنق سون : قطع رأس الافعى الكبرى .. فرعون هذا المنتدى .. سي السيد فتفوتة : ومعانا واحد هنا كمان ويظهر انه متحمس اوي .. انتا مين سعادتك ؟ حسام : بصوا .. انا مش هاسكت تاني .. انا هاطربقها فوق دماغهم كلهم .. انا هاحرق .. انا هاثور .. انا فتفوتة مقاطعة : طيب بالراحة شوية .. التف بتاعك غرق المايك .. قول اللي انت عايز تقوله بس بهدوء شوية لو سمحت حسام : انا مش هاقبل يعدلوا الاستفتاء زي ماهما عايزين .. من حقنا نقول كلمتنا المهندسة : انتا يا راجل انتا مش كنت معاهم وعايز تعطي الخزرانة للمشرفين عشان يضربونا ..؟ حسام : لا لا لا .. دي كانت مسرحية .. اخدعهم عشان يحزنوا عليكم ويطلقوا سراحكم فتفوتة : كانت معكم فتفوتة .. في بث حي ومباشر من قلب المظاهرات --------------------------------------------------- المكان : مبنى الاشراف الرئيسي الزمان : بعد خمسة ايام من حبس تيمور الحدث : المشرفين مجتمعين في قاعة الاجتماعات .. يتزعمهم سي السيد سي السيد : ايه المصيبة دي .. بيعملوا ايه دول ؟؟ ابو محمد : ثورة ايها المعلم الفاضل .. ثورة مضادة .. ثورة فئوية .. ثورة جياع اسد : انا في شدة الحزن .. في شدة الغضب .. في شدة الزعل .. سي السيد : طب نعمل ايه ؟؟ الادفايزر على وشك الوصول .. .. ولو شاف الغاغة دي هيبهدلنا المشرف محمد : انا رأيي نخلص عليهم .. نحرقهم سلوى : لا .. لا .. انا رايي نفلت عليهم شوية بلطجية .. مع جمال وبغال وحمير سكوب : انا اشوف نتفاوض معاهم .. ونسكتهم بشوية فلوس سي السيد : ولا حل ينفع .. عايز حل جذري فلانة : هو اللي عامل الهرجلة دي كلها تيمور .. بس ما ينفعش دلوقتي نحبسه تاني .. احسن هيولعوا اكتر سي السيد : طب رسوني على حل .. الادفايزر طيارته قربت .. يجي يشوف المنتدى بالمنظر ده ؟ سكوب : مافيش حل غير اللي قلته .. اندهو تيمور ومعاه تلاتة من كبار القادة بتوعوا .. الراجل ده مصدق نفسه اوي .. قولوا له انت جدع اوي .. وانت احرجتنا .. وانت بطل .. انفخوه كدا شوية .. سي السيد : ننفخ مين يا ابو جونيور .. انتا شايفنا نفيخة بلاليم ؟ .. من امتى بندادي ونطبطب على الفوضى ؟ سكوب : يا سي السيد الزمان اتغير .. هو انتا فاكر المنتدى بقى زي ايامنا لما كنا نمشي في الميادين والعالم توطي تبوس ايدينا ؟ وما يرفعوش عينهم بعنينا ؟ ده جيل بايظ .. ولو ما نفعتكش العصايا .. جرب الطبطبة فلانة : اتفق مع سكوب .. اهو على راي المثل ايه اللي رماك ع المر .. اللي امر منه .. وما فيش امر من المراغي دا مصرية متغربة : يا عم سي السيد مافيش داعي تعصلج دماغك اكتر من كدا .. احنا كلنا عارفين ان دماغك ساعات تبقى عاملة زي الجــز .. أ .. أ .. زي الجزرة .. ايوة هي الجزرة .. الجزرة آه .. الجزرة والعصايا .. أبو محمد : الفاضلة مصرية متغربة .. انا ما فهمتش انتي عايزة تقولي ايه ؟ مصرية متغربة : لا .. لا ولا حاجة .. اقصد سياسة الجزرة والعصايا .. ليه ما نطبقهاش معاهم .. ؟ سي السيد : يا ما كان نفسي استخدم العصايا وبس .. لكن نعمل ايه .. انا خلاص .. هيجيني شلل .. لو شاف الادفايزر المنظر ده اللي بالساحات والميادين هيطردنا كلنا ونبقى نبيع سميط وجبنة احسن لنا امرنا لله .. حد يندهلي الاركتزفت ده سلوى : انا ما افضلش نناديه لان ده هيخليه يحس انه مهم اوي .. وتكبر الحكاية بدماغه وهو من غير حاجة اصلا مفكر نفسه جيفارا .. وهيقعد يتدلع ويتنطط علينا ويقول انا مش عايز اتفاوض معاكوا .. افضل حل ننزل احنا بنفسنا ونكلمهم فرد فرد ونحاول نهديهم أسد : نعم يا مدام سلوى أؤيدك .. جداً .. جدا .. ابو محمد : الفاضلة سلوى .. احييكي على الفكرة الجهنمية سي السيد : إذن .. الى الميدان --------------------------------------------- المكان : ساحة المحاورات الزمان : بعد ستة ايام من حبس تيمور الحدث : يتفاجأ الاعضاء بتواجد المشرفين معهم .. يكلمهوهم و يستمعوا منهم سي السيد : انا مش عارف انتم عاملين الدوشة دي كلها ليه .. محنا قدامكو اهو وابوابنا مفتوحة على طول .. اسد : كلام سي سيد صح .. لماذا هذه الغاغة .. لماذا .. لماذا .. ضحى : اهو المشرفين جم اهم .. مش قلت لكم هينزلوا وما فيش داعي من الثورات دي ؟ .. عشان تعرفوا اني كنت صح وكنتم كلكوا تغلطوني .. اهو طلع كلامي صح اهو حسام : انا ماليش دعوة يا ابو الاسيان .. هو تيمور اللي عمل الليلة دي كلها .. انا ماليش دعوة اركتكت : آه يا جبان .. وعاملي فيها سبع البرومبا اول .. ؟؟ bsh:) حسابك هيبقى معايا بعدين حسام : ماليش دعوة بيك يا راجل انتا .. هو انا من امتى اعرفك .. بليز يا ابو الاسيان .. سماح النوبة دي دياب : ايه مالها النوبة بس .. ؟ بطلوا تجيبوا سيرة بلدنا ع الفاضي والمليان .. ايه العنصرية دي زوهيري : عن نفسي .. جيت افسح كلبي .. اصله مخنوق اليومين دول :closedeyes: سي السيد : يا جماعة هدوء بليز .. احنا مش جايين نعاقب حد .. احنا جايين نتفاهم معاكو باللتي هي احسن .. انتم عايزين ايه ؟؟ كومنق سوون : نريد اجتثاث الباطل اركتكت : نريد اعادة الاستفتاء .. نريد اسقاط الاشراف .. بل نريد اسقاط الادفايزر شخصيا مغتربة : نريد صيانة حقنا الدستوري الذي كفله لنا قانون المحاورات رقم 73657456 والذي ينص انه في حالةاي تلاعب بنتيجة الاستفتاءات من قبل المشرفين فإنه تلغى عضوياتهم الشرفية ويحالوا للتحقيق في لجنة يكون للاعضاء عضو ممثل فيها يحمل ما لا يقل عن 50 تقييما ايجابيا احمد انور : نريد عدالة .. مساواة .. نريد مساحة اكبر للتوقيع تتسع لصوري الضخمة اصل الصور اللي باعرضها بتوقيعي صغيرة اوي وعاوزها تغطي نص الصفحة على الاقل جويرية : عايزين احصنة وجمال كوسيلة مواصلات بالمنتدى سقراط المصري : نريد ان تمنحوني جائزة اكثر توقيع شهي على الاطلاق بينك روز : نريد ان يكون لنا مطلق الحرية في تغيير اسامينا باي وقت لماضة مصرية جدا : نريد شعاع امل يخبط على قلب كل واحد مننا ويمنحه طاقة دفء يشعشع على كل ضحكاية تطلع من كل شفة تزغرط حوالينا تامر مصطفى : نريد تثبيت توبيك مغتربي الكويت .. حرام عليكوا بأة سلوى : يا جماعة بالراحة شوية .. ايه المطالب دي كلها .. ؟ هنوفر ايه ولا ايه اوزاوز : نريد لحمة راس .. نريد كبدة جملي .. نريد بط بالبردقان مسافر زاده الخيال : نريد تغيير اسم المنتدى من محاورات المصريين الى محاورات العرب .. حسام : كل دي مطالب يا مجرمين .. احنا اسفين يا ريس .. والله انتم مستحملينا كتير سي السيد : خلاص فهمتكم .. انا فهمتكم .. اكتبوا طلباتكم دي وابعتوها برسالة للاشراف واحنا هندرسها اسلام المصري : ياما كتبنا وارسلنا وعملنا وفعلنا وما فيش فايدة دريم وذ مي : انا مش عايزة حاجة .. انا عايزة بس اقول لكم ربنا يسعدكم زي ما بتسعدونا دايما ابو محمد : اعتقد كلام الفاضل سي السيد واضح جدا .. وكمان كلام الفاضلة سلوى .. وكمان طلباتكم واضحة .. بس اكتبوها و بطلوا الدوشة دي اركتكت : يا عمي الفاضل احنا مش عاوزين اي حاجة من ديت عايزينكم تشاركونا وبس عايزين نحس انكم مننا واننا منكم مش عايزين تحسسونا انكم بابراج عاجية مش عايزين نشوفكم مرة بالاسبوع مصرية متغربة : هو انت فاكرنا ايه .. احنا بشر طب والله العظيم احنا بشر المشرف عضو عادي وبيؤدي الاشراف كتكليف . . انا مذهولة .. مصدومة هو انتم شايفينا ايه ؟؟ جلاميد مالهاش قلب ؟ دامو : مصرية متغربة .. يعني ايه جلاميد ؟ شرف الدين : يا سيدتي الفاضلة .. ما قلناش انتم مش اعضاء .. بس انتم اعضاء مميزين .. بعقولكم الكبيرة .. وتاريخكم .. عايزين بأة تتعاملوا معانا كأفراد زيكم ... طب والله العظيم احنا كلنا بنحبكوا ونتشكر فيكوا كلكم .. بس انتم اللي بايديكم ترجع المحاورات صالون ثقافي .. اعطوا شوية مساحة حرية .. ما تخلوش المنتدى قالب واحد جامد .. الناس تختلف وهتفضل تختلف ليوم الدين بدل ما تزعلوا اننا بس بقينا بننشر اخبار .. ليه ما تحاولوش تنزلوا مواضيع ليكو ثقيلة مش برضو احسن من لما تنسحبوا .. ؟ واهو الموضوع اللي يكون خفيف يروح بسرعة .. والموضوع الجامد .. يفضل مرفوع دايما هو ده اللي كنتم تعملوه زمان سي السيد : انا بكل مكان موجود .. اكتر مشاركات .. اكتر تقييم .. اكتر .. شرف الدين : ما ننكرش كل ده .. بس عايزين روح اكتر .. مش عايزينكم تتخانقوا .. تحجروا على بعض الاراء .. عايزين بس تخفوا علينا شوية من بعض القرارات وساعتها صدقني .. مش هتحتاجو اي صندوق .. لا صندوق نعم ولا صندوق لا لان راينا كلنا فيكم هيبقى واحد ومبني على الاحترام والتقدير مهما اختلفت نظرتنا بالدين او السياسة او ... او .. او سي السيد : يا سيدي كلام جميل وكلام معقول ما اقدرش اقول حاجة عنو .. بس برضو انتم عليكم بلاوي زرقا .. ساعات تقلبوا المنتدى شات .. و مش ممكن نطبطب ع المخالفات .. لازم تتواجه بحزم اركتكت : واجهها يا سيدي بحزم .. بس برضو بشوية روح .. مش كدة حلو ؟ :happy: - فترة صمت - سي السيد : بص يا ابني انت وهو .. انا اختلف مع بعض وليس كل اللي قلتوه .. بالنسبة لطلباتكو دي اوعدكم ادرسها .. انا ومجموعة الاشراف اركتكت : مش عايزينكم تدرسوها .. عايزينكم بس تفكروا فيها شوية .. وما تردوش علينا بالتوبيك دا لانه مش مكانه .. ردوا عليها بعقولكم وفكركم .. واهم حاجة بقلبكم :happy: سي السيد : خير ان شاء الله .. يالله يا مشرفين .. كل واحد ع القسم بتاعه .. رسالتهم وصلت اركتكت : خير ان شاء الله .. يالله يا ثوار .. كل واحد على شغله .. رسالتكم وصلت ضحى : شفتوا ازاي .. ؟ قلت لكم الحوار هو افضل طريقة .. بس ما صدقتونيش .. عشان تعرفوا ان كلامي صح .. لماضة : صباحكم .. طاقة فرح .. تنور كل ايامنا وليالينا فتفوتة : السلام والوئام يعودان للمحاورات .. خبر جديد لانج .. انشروووووووووا التونسي : اللي نشرها اللي نشرها اهو ده اللي يا روح قلبي قشرها قشر القشرة وبان اللب والله وحشنا يا سيدي الحب اللي نشرها اللي نشرها دريم وذ مي : انا فرحانة .. انا فرحانة .. انا هايغمى عليا من الفرحة حسام : اوعى تفتكر يا تيمور اني كنت هاسيبك .. دي كانت تمثيلية بس .. ولا انتا عارف حسام حبيبك عمره ما يفلسع اركتكت : اعمل فيك ايه بس .. مضطر اسامحك .. مهو مش ممكن المشرفين يبقوا احسن مننا .. ويسامحونا ويتحملونا .. قلب ابيض : يسامح مين على مين .. فيه ايه بالضبط يا باشمهندس ؟؟ اصل لي تلات ايام غايبة عن المنتدى ومش عارفة جرى ايه سمبا : حصل كل خير يا ماما قلب ابيض .. انا مش مصدق وداني .. سمعت اسد وهو ماشي يقول انا في شدة السعادة .. في شدة الفرح .. _____________________________ قال الراوي قرر المشرفون التنازل عن ريع الكتاب للاعضاء .. تطبيقا للنتيجة الحقيقية للاستفتاء .. ورفض الاعضاء استلام الغنيمة .. لان المشرفين احق بتلك التكريمة .. ووصل بحمد الله الادفايزر .. في موكب مهيب مثل جريندايزر .. ليتفاجأ بالشعب الكريم يهنؤونه بالسلامة .. و يقولوا ان لا ثورة في حضرة الكرامة .. و قرروا ان يستفيدوا من ريع الكتاب في تحسين المنتدى .. فجاوزت شهرته الافاق وجاوزت كل المدى .. واصبح شعار كل من يكتب حرفا في التوبيكات .. افتخر فانت تكتب بالمحاورات وانشد طائر الليل الحزين : اليك فاتنتي .. ازفك التهاني لقد امسيت في عالمي الثاني منتصرا لمستقبلي .. لحاضري .. لقلمي فلا تقولي لي متى سيزول المي زال الالم .. ورفعنا العلم انها ديباجة السعادة فلا تنتظري الاشادة اعتبريها من قلبي إفادة سلاما .. لكل من غادرنا وذهب .. وقال كلاما من ذهب وننتظر الاياب .. بكل شوق ملتهب لك وحدك .. فاتنتي .. ------------------------------------- كتب كلماتها الطائر .. وغناها زوهيري .. واضافتها لماضة لفراشة المساء بالاحساس فقط .. وقرأها كل المحاوراتيين .. وقام باخراجها الساري - تمت -

دول إخواتك اللي قوات الامن في ملابس مدنية تتوجه إليهم لحرقهم او كما قالت الفنانة سماح أنور على الهواء .. يستاهلوا الحرق بصراحة خلينا نخلص ؟ أتقي الله أتقي الله لو كنت مسلم .. هل أنت مُسلم ؟ الحمد لله على نعمة الاسلام وكفى بها نعمه لتفهمنى يا س س اولا: الغرض من المظاهره تم ولن يتولى الرئيس مره اخرى الرئاسه واحييى هؤلاء السبابا على ماقاموا به ولكن مايحدث الان ليس له مبرر هل ترضى ان يصاب اخيك بجرح سطحى الان ولن اقول لاقدر الله يقتل كل هذا من اجل السيد البرادعى او الاخوان او حمدين صباحى كله ركب الموجه طبعا نظام مبارك فاسد ويجب ان يرحل ولكن حقنا للدماء يجب ان يرجع كل الى بيته ونتحمل الطاغيه 6 شهور اخرى لانه لوذهب الان وترك الامر لمايسمى احزاب المعارضه ولاخوان (اخوان بعضهم فقط) فسوف يتقاتلون ولن تشكل حكومه الابعد10 سنوات فى حرب 1973 كنت أنا ووالدى رحمه الله فى منطقة القتال ، انا كنت متقدم عنه حبتين ، انا كنت فى الخط الأول ( الفردان ) وكان رحمه الله فى الخط الثانى ( ابوصوير ) لو كنا سمعنا وقرأنا ماتكتبونه هنا ، كان زمان مصيركم نفس مصير اللاجئين الفلسطينيين. أنها حرب بين الخير والشر ، حرب أهل مصر وفرعون وأعوانه ، انه ليس حسنى مبارك وحده ، بل شلة المنتفعين الذين سرقوا ونهبوا مصر ، سرقونى ونهبونى كما سرقوك ونهبوك ، منهم من هبر وهرب ومنهم من لم يستطع ان يهبر ويهرب فقرروا ان يحاربوا مصر والمصريين. لكم الخيار ان تكونوا مع مصر والمصريين او أن تكونوا مع جحافل الشيطان. ثانيا يا اخ ابو هنا الثورة دى لم تقم من اجل البرادعى ولا صباحى ولا الإخوان الثورة دى قامت من أجل مصر ولم تقم الثورة علشان حسنى مبارك يترشح تانى والا لا ، الثورة قامت علشان الناس نامت عن المطالبة بحقها سنين طويلة وفضلوا يقولوا الحمد لله وهم مش لاقين المش يأكلوه ، الثورة قامت علشان عايزين نظام تعليم يتباهوا بيه امام العالم لما يسأله انت مؤهلك من اين ، يرد بكل فخر من مصر ميروحش يجيب شهادة مضروبة من معاهد اوروبا الشرقية او من على النت ويتباهى بيها. الثورة قامت علشان تلاقى دكتور اتعلم صح ومهندس اتعلم صح الثورة قامت علشان نقضى على الرشوة والمحسوبية والفساد الثورة قامت علشان لما تحب تشترى ارض تشتريه بنفس السعر اللى اشترى بيه احمد بهجت وهشام طلعت مصطفى وباقى المحاسيب أقول لك ايه والا ايه عن اسباب الثورة

شعرب بنفس الاهانة و المهانة التي شعر بها العزيز محمد من هذه الرسالة السياسية "الفجة" من أبويا و أبو عيالي أبونا عبد المسيح... نعم أفهم ما يقوله العزيز سكوب من أن الكنيسة تتحدث بلغة الأم التي تخاف علي أولادها، و أن أولادها لهم عقل يفكرون به و يزنون الأمور... و لكن متي تحدثت الكنيسة في السياسة، مجبرة أو مخيرة، فهي تهين عقلي و عقيدتي و تلوث سمعتي و عليها أن تتكلم بضمير المفرد المذكر أو تسكت بدلا من ال"عك" اللي بتقوله... ما أقبله علي غيري ألتزم به قبله... مادمنا اتفقنا علي ان المجتمع العلماني الذي يفصل في الدين عن السياسة هو المخرج الوحيد لبلادنا، فما لنا نسمح لأنفسنا بغير ذلك؟ قابلت أقباط أرثوذكسيين أكثر من أن أحصيهم في حياتي تركوا الكنيسة و التحقوا بطوائف أخري بعد أن "نصحهم" الكاهن بالتصويت لذلك الحزب أو ذاك!!! متي نتعلم؟؟ و أختلف مع العزيزة أغابي (مع احترامي لرأيها) في نتيجة هذه المظاهرات أو فعالية البرادعي و حركته للتغيير... يا عزيزتي استنشقي رائحة الحرية القادمة من تونس، لماذا نخاف من بعض التخريب أو قلة الأدب أكثر مما نخاف من السرقة و الفساد و بطء التقاضي طوال أربعين عاما... يعني هتكون اد ايه الخساير، اكتر من خسايرنا في القروض المنهوبة، أكتر من خسايرنا في أرباح حديد عز، اكتر من خسايرنا في الدروس الخصوصية بعد ما تم تدمير التعليم العام... و بعدين لو حضرتك شاركتينا في الجروب بتاع "كلنا خالد سعيد"، كنت حسيتي بكم التحذيرات و التوجيهات اللي اتبعتت للشباب انه يبعد و "يوقف" أي تخريب يحصل... احنا مش شعب جاهل و لا كلنا رعاع زي ما بيحاولو يصورونا... كفايانا بقي حسابات سياسية و مين أفيد لي و مين أسوأ لي... لو كان البلا هو نصيبي فخليه يجي، حصول البلا و لا انتظاره شكرا لأبونا علي محبته و خوفه علي، بس قرايبي كلهم في مصر طلعوا المظاهره، شباب من اروع و اكثر شباب مصر ادبا و تعليما، ما حدش عرف يضحك عليهم، و يعلمهم ينمطوا ال"آخر" بفرشه واحدة ... و لا يقنعهم ان خير البلد مش خيرهم... يا عزيزتي، البرادعي ليس الاخوان، و حتي الاخوان ما يخوفوش قوي كده، احنا مش في العصور الوسطي... احنا في عالم مفتوح، و كل فعل له رد فعل، وزنك السياسي مش في الحاكم، وزنك السياسي في تعليمك و قدراتك الانتاجيه، و ده ما حدش يقدر ياخده منك اللي جاي أحسن... مهما كان تحية احترام و تبجيل للشعب المصري "كله" علي وقفته العظيمة... يارب نكمل و ما ننامش بعد اول تغيير وزاري و زيادة الدعم لرغيف العيش... احسن احنا شعب طيب زيادة

وصلتنى هذه القصة الرائعة على الايميل ارجو من الجميع قراءتها وياريت نطبق دروسها فى حياتنا الزوجية عندما عدت إلى المنزل ذات ليلة كانت زوجتي بانتظاري وقد أعدت طعام العشاء، أمسكت يدها وأخبرتها بأنه لدى شئ أخبرها إياه، جلست هي بهدوء تنظر إلي بعينيها وأنا أكاد ألمح الألم فيها، فشعرت فجأة أن الكلمات جمدت بلساني فلم أستطع أن أتكلم .لكن كان يجب أن أخبرها : أريد الطلاق . خرجت هاتان الكلمتان من فمي بهدوء، لم يبد على زوجتي الضيق مما سمعته مني لكنها بادرتني بهدوء وسألتني: لماذا ؟ نظرت إليها طويلا وتجاهلت سؤالها مما أصابها بغضب شديد فألقت ملعقة الطعام وصرخت بوجهي: أنت لست برجل . في هذه الليلة لم نتبادل أنا وهي أي حديث ، وبقيت زوجتي بألم وصمت تبكي طوال الليل .كنت أعلم بأنها تريد أن تفهم ماذا حدث لزواجنا لكنى بالكاد كنت أستطيع أن أعطيها سببا حقيقيا يرضيها وفي هذه اللحظة أحسست بأن زوجتي لم تعد تملك قلبي .فقلبي أصبح تملكه إمرأة أخرى أسمها "جيين" .أحسست بأنني لم أعد أحب زوجتي ..فقد كنا كالأغراب وإحساسي بها لم يكن يتعدى الشفقة عليها . في اليوم التالي وبإحساس عميق بالذنب يتملكني قدمت لزوجتي أوراق الطلاق لكي توقع عليها وفيها أقر بأني سوف أعطيها المنزل والسيارة و 30% من أسهم الشركة التي أملكها .ألقت زوجتي لمحة على الأوراق ثم قامت بتمزيقها الى قطع صغيرة، فالمرأة التي قضت10 سنوات من عمرها معي أصبحت الآن غريبة عني. أحسست بالأسف عليها ومحاولتها لهدر وقتها وجهدها، فما تفعله لن يغير من حقيقة اعترافي لها بحبي العميق لامرأة أخرى اسمها "جيين" . وأخيراً انفجرت زوجتي أمامي ببكاء شديد ،وهو أمر توقعت منها أن تفعله. بالنسبة لي بكاؤها كان مصدر راحة فهو يدل على أن فكرة الطلاق التي كانت تراودني أسابيع طويلة قد بدأت تصبح حقيقة ملموسة أمامي . في اليوم التالي عدت الى المنزل في وقت متأخر من الليل لأجدها منكبةً تكتب شيئاً، لم أتناول ليلتها العشاء وذهبت على الفور للنوم وسرعان ما استغرقت بالنوم فقد كنت أشعر بالتعب جراء قضائي يوماً حافلاً بصحبة "جيين" . فتحت عيني في منتصف الليل لأجدها مازالت تكتب، وفي حقيقة الأمر لم أكترث لها كثيراً وأكملت نومي مرة أخرى . وفي الصباح جاءت وقدمت لي شروطها لقبول الطلاق، لم تكن تريد أي شي مني سوى مهلة شهر فقط وقالت: أمهلني شهرا واحدا فقط . في هذا الشهر يجب علينا أن نفعل ما في وسعنا حتى نعيش حياة طبيعية بقدر الإمكان كأي زوجيين فولدنا سيخضع لاختبارات في المدرسة ولا أريد أن يؤثر خبر الطلاق على أدائه بالمدرسة . لقد لاقى طلبها قبولاً لدي، لكنها فاجأتني بقولها : أريد منك أن تقوم لي بشئ آخر. أتذكر كيف حملتني بين ذراعيك في صباح أول يوم من زواجنا ؟ أريد أن تحملني لمدة شهر كل صباح من غرفة نومنا الى باب المنزل! بصراحة ، اعتقدت لوهلة أنها قد فقدت عقلها ! لكن حتى أجعل آخر أيام لنا معا تمر بسلاسة قبلت أن أنفذ طلبها الغريب . لقد أخبرت "جيين" يومها عن طلب زوجتي الغريب فضحكت وقالت باستهزاء: إن ما تطلبه زوجتك شئ سخيف ومهما حاولت هي أن تفعل بدهاء فهذا لن يغير حقيقة الطلاق فهو واقع لا محالة . لم نكن أنا وزوجتي على اتصال جسدي منذ أن أعربت لها عن رغبتي بالطلاق ، وعندما حملتها بين ذراعيي في أول يوم أحس كلانا بالارتباك، وتفاجأ ولدنا بالمشهد فأصبح يصفق ويمشي خلفنا صارخا فرحاً : أبي يحمل أمي بين ذراعيه. كلماته جعلتني أحس بشئ من الألم ، حملتها من غرفة النوم إلى باب المنزل مروراً بغرفة المعيشة ومشيت عشرة أمتار وهي بين ذراعي ،ثم أغمضت عينيها وقالت بصوت ناعم خافت:لا تخبر ولدنا عن الطلاق الآن . أومأت لها بالموافقة وإحساس بالألم يمتلكني، إحساس كرهته جدا. في اليوم التالي تصرفنا أنا وهي بطبيعية أكثر، وضعت رأسها على صدري، استطعت أن اشتم عبقها، أدركت في هذه اللحظة أنني لم أمعن النظر جيداً في هذه المرأة منذ زمن بعيد أدركت أنها لم تعد فتاة شابة فعلى وجهها رسم الزمن خطوطاً ضعيفة، غزا بعض اللون الرمادي شعرها، وقد أخذ زاوجنا منها ما أخذ من شبابها، لدقيقة تساءلت : يا الهي ماذا فعلت أنا بها ؟ في اليوم الرابع عندما حملتها أحسست بإحساس الألفة والمودة يتملكني اتجاهها، إنها المرأة التي أعطتني 10 سنوات من عمرها. في اليوم الخامس والسادس شعرت بأن إحساسنا بالمودة والألفة أصبح ينمو مرة أخرى ولم أخبر "جيين" عن ذلك . وأصبح حمل زوجتي صباح كل يوم يكون سهلاً أكثر وأكثر بمرور مهلة الشهر التي طلبتها وقد أرجعت ذلك إلى أن تماريني الرياضية هي التي جعلتني قوياً فسهل حملها. في صباح أحد الأيام جلست زوجتي تختار ماذا ستلبس، لقد جربت عددا لا بأس به من الفساتين لكنها لم تجد ما يناسبها ، فتنهدت بحسرة قائلة :كل فساتيني أصبحت كبيرةً علي ولا تناسبني. أدركت فجأة أنها أصبحت هزيلة مع مرور الوقت وهذا هو سبب سهولة حملي لها. فجأة استوعبت أنها تحملت الكثير من الألم والمرارة في قلبها . لاشعورياً وضعت يدي على رأسها بحنان، وفي هذه اللحظة دخل ولدنا وقال : أبي لقد حان الموعد لتحمل أمي خارج الغرفة. بالنسبة إليه رؤية والده يحمل أمه أصبح شيئا أساسياً من حياته اليومية، طلبت زوجتي من ولدي أن يقترب منها وحضنته بقوة،ثم تنهدت بأسى شديد . ومرة أخرى راودني ذلك الأحساس بالألم فأدرت وجهي عن هذا المنظر لخوفي أن أضعف وأن أغير رأيي في هذه اللحظة الأخيرة، ثم حملتها بيبن ذراعي وأخرجتها من غرفة النوم إلى الباب الخارجي مروراً بغرفة المعيشة وهي تطوق عنقي بيديها بنعومة وحنان شديدين. ضممت جسدها بقوة كان إحساسي بها كإحساسي بها في أول يوم زواج لنا، لكن وزنها الذي أصبح خفيفاً جعلني حزيناً. في آخر يوم عندما حملتها بين ذراعي لم استطع أن أخطو خطوة واحدة، ولدنا قد ذهب الى المدرسة فضممتها بقوة وقلت لنفسي : يا الهي، لم أكن أتصور أن حياتنا كانت تفتقر إلى المودة والألفة إلى هذه اللحظة. قدت السيارة وترجلت منها بخفة ولم أغلق الباب خلفي خوفاً مني من أن أي تأخير قد يكون السبب في تغيير رأيي الذي عزمت عليه... صعدت السلالم بسرعة ... فتحت "جيين" الباب وهي تبتسم ، فبادرتها قائلا: أنا آسف يا "جيين" ، لكني لم أعد أريد أن أطلق زوجتي . نظرت جيين إلي مندهشة ومدت يدها لتلمس جبهتي وسألتني : هل أنت محموم؟ رفعت يدها عن جبيني وقلت لها : أنا حقاً آسف جيين لكني لم أعد أريد الطلاق، قد يكون الملل تسلل إلى زواجي لأنني وزوجتي لم نكن نقدر الأشياء الصغيرة الحميمة التي كانت تجمعنا وليس لأننا لم نعد نحب بعضنا. الآن أدركت انه بما أنني حملتها بين ذراعي في أول يوم زواج لنا لابد لي أن أستمر في حملها حتى آخر يوم في عمرنا. أدركت "جيين" صدق ما أقول وقوة قراري ، عندها صفعت وجهي صفعة قوية وأجهشت بالبكاء وأغلقت الباب في وجهي بقوة... نزلت السلالم وقدت السيارة مبتعداً . توقفت عند محل بيع الزهور في الطريق واخترت حزمة من الورد جميلة لزوجتي، سألتني بائعة الزهور: ماذا ستكتب في البطاقة ؟ فابتسمت وكتبت : سوف استمر في حملك وضمك بين ذراعيي كل صباح إلى أن يفرقنا الموت. في هذا اليوم وصلت إلى المنزل وحزمة ورد بين يدي وابتسامة تعلو وجهي . ركضت مسرعاً إلى زوجتي. ودخلت البيت بلهفة شديدة فلم أجدها في الصالة ولا في المطبخ وناديت عليها مرات عدة ولكن دون فائدة . توجهت مسرعا الى غرفة النوم فوجدتها في فراشها .ولكن ... جثة هامدة . نعم وجدتها وقد فارقت الحياة في فراشها ... ثم عرفت الحقيقة ... لقد كانت زوجتي تكافح مرض السرطان لأشهر طويلة دون أن تخبرني ... وأنا كنت مشغولاً مع "جيين" فلم ألاحظ شيئا ... لقد علمت زوجتي أنها ستموت قريباً ... ففضلت أن تجنبني ردة فعل سلبية من قبل ولدنا ضدي وتأنيبه لي في حال مضينا في موضوع الطلاق. لقد أرادت أن أظل الزوج والأب المحب في عيون ولدنا. اخي الحبيب اختي الغالية لا المنزل الفخم ولا السيارة ولا الممتلكات أو المال في البنوك هي الأهم في حياتكم .المهم هو التفاصيل الصغيرة الحميمة في حياتكم ، هي أهم شي في علاقاتكم . هذه الأشياء الصغيرة هي مصدر السعادة. فاوجدوا الوقت لشركاء حياتكم ولعائلتكم .واستمروا في عمل هذه الأشياء الصغيرة لبناء المودة والألفة والحميمية . وهي أيضا مهمة بين الأصدقاء , فاذا وجدتم أن أصدقاءكم بدأوا بالابتعاد عنكم, فربما تعيد الحرارة لصداقتكم كلمة لطيفة أو هدية صغيرة أو ايميل يذيب برودة البعد والجفاء.  ]