الحياة فى كندا

[maksoof]

البرد بقاله إسبوع و الجو مش ناوى عليه حيتعدل قريب.

النهاردة درجة الحرارة وصلت ل 40 تحت الصفر و بتأثير الرياح بقت ناقص 52 درجة.

صور يناير

إضغط على Page Down لمشاهدة المجموعة كلها.

[ragab2]

الله

منظر التلج يهوس , يجنن

[achnaton]

والشمس طالعه .. تشارك فى إظهار هذا الحمال .. وإدا كان البرد .. فدا لأن الحر " مكسوف " منك يا أخ مكسوف ..حد طايل لا غبار ولا عفار .. .. تمنياتى لك .. وكل سنة وانت طيب ..

احناتون المنيا

زيك سقعان .. والتلج هنا بسيط وآخر روقان

[zamalkawy]

الجو هنا في مصر صقيع برضة اه مش -40 يعني ممكن يكون من 5 :10 بس تلج :blink:

[Salwa]

40 تحت الصفر ..الصراحة..... مجربتهاش..ربنا يكون فى العون ..

بالنسبة للمنطقة اللى احنا فيها ..يعنى مرة كنا 6 تحت الصفر ..وفيه مناطق بتكون اقل كتير طبعا ..يعنى 20 و30 تحت الصفر ......بس هنا لأ.

وانا شخصيا بحب جدا فصل الشتاء ..احتمال لأنه ..اكثر انتظام ..بالنسبة لباقى فصول السنة .

وخلاص احنا اخدنا على كدة ....

وسبحان الله ..من معاشرتك للمكان فترة طويلة ...بتاخد عليه وكل ده بيبقى بالنسبة لك طبيعى وعادى .

اكيد عاملين حالة بيات شتوى ؟؟

كل عام وانتم بخير ...

سلامى.

[فــيــروز]

الحمد لله برد مصر بردو محتمللللل .. واللى يشوف تلجة غيره تهون عليه تلجته .. :huh: معلش يا اخ مكسوف حاول تتعزى عن البرد بالحاجات الحلوه اللى قال عليها الاستاذ اخناتون .. نضافه و اتساع ولا غبار ولا زحام .. جتنا نيله فى حظنا الهباب :blink:

[MuslimaEgyptian]

ياه ه ه..40 تحت الصفر ...سبحان الله ..ده أنا زرت مره ولايه كانت الحراره فيها 4 تحت الصفر بس وكنت خلاص حاسه ان وشى هيقع :blink:

أكيد التكييف الحار والfire place خير ملاذ عندكم..ربنا يعينكم يا رب.

الحل الوحيد هو لحاف مصر المتين ، يا ريت حد يبعتلكوا واحد فى ال

fed ex :blink:

تم تعديل 31 يناير 2004 بواسطة MuslimaEgyptian

[فــيــروز]

الحل الوحيد هو لحاف مصر المتين ، يا ريت حد يبعتلكوا واحد فى ال

fed ex :)

يا سلااااام :)

هو فيه زى لحاف مصر ابو سبعتلاف وش :blink:

اللى الواحد مايعرفش اصلا يجره عشان يتغطى بيه من كتر ماهو تقيل :blink:

والله مصر حلوه كتير :)

[maksoof]

الحمد لله الجو بدأ يتحسن و درجة الحرارة طلعت لناقص 26 النهاردة.

بعض اللى حصل فى الكام يوم اللى فاتو:

المياه تجمدت فى بعض المواسير

معظم البيوت بتتسخن بالغاز الطبيعى و لكن الغاز تجمد فى أحد المناطق و السكان ما كانش عندهم تسخين لمدة 6 ساعات

1300 سيارة إتعطلوا فى الشوارع لأسباب مختلفة (تجمد البنزين أو الزيت أو البطارية .. الخ)

المدارس أغلقت

سمعت فى الإذاعة إن لو أخدت كباية مياه و رميت المباه فى الهوا حتتجمد قبل ما توصل للأرض. إبني جربها .. و حصل cr((:

الأخ الفاضل رجب:

الثلج منظره جميل فى الصور و الأفلام و حتى فى الطبيعة لو لمدة قصيرة بس لما بيطول بيسبب إكتآب (نسبة الإنتحار بتزيد فى فبراير)

الأخ الفاضل أخناتون

الواحد مش عارف لو دى الشمس و اللا صورتها :o

السقعة بتزيد لما بتكون الشمس ساطعة. السحاب بيعكس الحرارة من الأرض

الأخت الفاضلة سلوى

بقالى 30 سنة هنا و الواحد شاف عشرينات و تلاتينات تحت الصفر بس الأربعين دى نظام تانى خالص!

الأخ الفاضل زملكاوى

النهاردة فى ناقص 26 العيال بيلعبوا برة بالثلج. 5 أو 10 ممكن يستحموا فى البحر ;)

أختنا صاحبة الأعمال فيروز:

والله أنا مكسوف hlwn: لإنى باين على باشتكى بس كلكم معاكم حق .. يعنى العيشة هنا مريحة و كنت دايما باقول يعنى لو جت على كام يوم برد فى السنة الواحد يستحملهم وأهه وجع ساعة ولا وجع كل ساعة!

الأخت الفاضلة مسلمة مصرية:

يا ستى ألف شكر على اللحاف! إعتبريه وصل :)

[Byte]

انت مكبر المسائل كده ليه يامكسوف ، الحرارة عندنا -52 وعايشين حياتنا بصورة طبيعية، هو حد بيمشى فى الشارع فة الشتاء؟ انا قاعد فى البيت بالشورت وباشوف التلج من الشباك زى الافلام بالظبط hlwn:

وعلى فكرة اللحاف بتاع كندا احسن من لحاف مصر لأنه اخف وبيدفى اكتر

ايضا المراتب هنا (السوست) احسن من مراتب مصر ، لكن الانواع الجيدة يتعد سعرها الفين دولار cr((:

[فــيــروز]

هو حد بيمشى فى الشارع فة الشتاء؟

ما شاء الله

بتروحو الشغل بالطياره يعنى !! cr((: اشى خيال يا ناس hlwn:

[Byte]

بتروحو الشغل بالطياره يعنى

hlwn:

لأ ، الشغل هوه اللى بيجيلنا لحد البيت!!! cr((:

الجراج بتاع عربيتى (جوه البيت) ، حاجة كدة زى شقق عمارة المليونيرات اللى ساكنة فيها فيفى عبده ، بس هنا محدودى الدخل من امثالى متاحة لهم هذه الرفاهية!

وطبعا كل حاجة بتكون فى الشتاء indoors لأن ما ينفعش تمشى فى الشارع فى الجو ده!

فى الصيف بقى، يتغير الحال تماما، كندا تصبح جنة خضراء، وماحدش بيقعد فى البيت نوهائى

[maksoof]

هو حد بيمشى فى الشارع فة الشتاء؟ انا قاعد فى البيت بالشورت

بس أنا أحيانا شغلى بيكون خارج المبنى (outdoors)

hlwn: cr((: :)

[فــيــروز]

بتروحو الشغل بالطياره يعنى

hlwn:

لأ ، الشغل هوه اللى بيجيلنا لحد البيت!!! cr((:

الجراج بتاع عربيتى (جوه البيت) ، حاجة كدة زى شقق عمارة المليونيرات اللى ساكنة فيها فيفى عبده ، بس هنا محدودى الدخل من امثالى متاحة لهم هذه الرفاهية!

وطبعا كل حاجة بتكون فى الشتاء indoors لأن ما ينفعش تمشى فى الشارع فى الجو ده!

فى الصيف بقى، يتغير الحال تماما، كندا تصبح جنة خضراء، وماحدش بيقعد فى البيت نوهائى

اللهم لا حسد :o :) cbyb:

[حشيش]

أنا فعلاً باشعر باكتئاب فى فصل الشتاء بس مش عارف ليه؟؟؟...إيه علاقة درجة حرارة الجو بالحالة النفسية للأنسان؟؟؟...هل بالفعل يوجد ما يسمى بالساعة البيولوجية داخل كل إنسان تتأثر بالظروف المناخية خارج المنزل حتى فى وجود المدافئ ومكيفات الهواء؟؟؟...

[Byte]

أنا فعلاً باشعر باكتئاب فى فصل الشتاء بس مش عارف ليه؟؟؟

هوه فيه شتاء فى السعودية ياحشيش؟ hlwn:

ماعلينا!

الناس اللى بتكتئب فى كندا فى الشتاء غالبا مابيكونش بسبب البرد / ولكن بسبب شكل السماء لم بنكون overcast ودي بيبقى شكلها كأن فوق غطاء رمادى سادة ! مابتشوفش نجوم ولا شمس ولا قمر ولا حتى درجات مختلفة من الرمادي!

بس طبعا المصريين الحاجات دى تعتبر زغزغة بالنسبة لهم، اظن فيه مليون حاجة تجيب الاكتئاب فى مصر ، ومن كل الالوان!

[Byte]

اللهم لا حسد   

طيب تعرفى ان الحياة فى بلدنا- مصر يعنى - كانت فى يوم من الايام اكثر رفاهية وجمالا ؟

كان معظم المصريين عندهم بيوت، وكان السكن فى الشقق عيب!

وكانت الشوارع مش بس بتتكنس، انما كمان بتتمسح!! (ماسمعتيش عن اللى كانوا بيجروا ورا عربية الرش؟؟)

الحاجات دى انا وعيت عليها، وماهياش من ايام خوفو زى ماممكن ييجى فى مخك، انا لسة ماكملتش اربعين سنة!

طيب تصدقى ان السباك كان بيقول لوالدى يابيه؟والبواب كان بيجيبلنا الطلبات من غير مايقوللنا اى خدمة؟

تصدقى ان اللى ربانا دينيا واخلاقيا هو مدرس العربى فى المدرسة وكان فخور بدوره ويؤديه بضمير؟

مصر كانت جنة، شمس وهواء وفلوس وادب واخلاق

احنا اللى ضيعناها!

تم تعديل 2 فبراير 2004 بواسطة Byte

[Abouhemeed]

أعزائي

تحياتي

لقد عشتالجزء الأكبر من حياتي في شمال بريطانيا ( أسكتلندا ) ، و على الرغم من البرد تجد الإنسان يتأقلم على الحياة هناك و يصبح إحساسه بالبرد أقل من الوافدين حديثا ، كما أن كافة الأماكن و المنازل فيها تدفئة من نوع ما و في منزلك لا بد من أن تستعد للشتاء بتوفير مبلغ للتدفئة كما تحضر المنزل لمواجهة الشتاء من صيانة و خلافه و حماية نباتات و ممرات الحديقة ، و لكن بالنسبة للحاف المصري فهو يفوق الكويلت و البطانيات و أكثر صحية فهو لا يختزن الكهرباء الإستاتيكية و يجعل الإنسان يعرق و هذا غير متوفر في البلاد الباردة التي قلما يعرق فيها الإنسان في داخل المنزل أو خارجه في الشتاء ، و من المعروف أن هناك فوائد لعرق الإنسان ، فهو يخلص الجسم من المواد الضارة و يفتح المسام و يرطب الجلد و يجدده .

حديثكم عن اللحاف ذكرني بقصيدة كتبتها بإسم الدفا عفا و نشرت في منتدى الشعر و أحب أن أهديها إليكم في هذه المداخلة ، فأعتذرلإعادتها على مسامع من قرأها سابقا و هي بإسم الدفا عفا ، و إليكم ها هي :

بسم الله الرحمن الرحيم

يوم ميلادي كان ليا شمخة و زهوة

مكسي ستان و في العيون فرحة

شايلاني صبايا تتغمز بعيون إرحة

و جدعان تزف شوار و تزغرد النسوة

نسيت يا صاحبي و لا فاكر ليلة الدخلة

ستر و غطا كنت فرحان ببداية الأسرة

أضم الأحبة في حضني و لي في الغرام نظرة

بالصلاة على النبي في عين الحسود حصوة

كنت في الحلال و رضا الرب سوا وياك

أفكرك تذكره و تحمده على ما أعطاك

أسمع دعاك في الليل و دعايا معاك

بالستر في الدنيا و الفلاح في أخراك

قبل الفجر ما يشقشق أتزحلق من فوقك

لأجل تصحى و صلاة الفجر لا تفوتك

و تسعى لرزقك و تجري على قوتك

و بعد العشا أنتظر و أفرح برجوعك

سنه و الثانية و هلت الأنجال

كل واحد فيهم نام علي و بال

بسعادة و رضا في أغلب الأحوال

ما هو دا نصيبي في تربية الأجيال

في الفرح شاركتك فرحتك

و في الطرح جففت دمعتك

و دعيت يحرس لك سكتك

و أفضل دايما في خدمتك

قال المثل الدفا عفا و البرد لحاس القفا

في المرض ضميتك و مشيت معاك للشفا

بعد الشتا أسيبك بعد ما أترقع و أترفا

فراق على لقا و جوه الدولاب أتنفى

و يوم حسيت بأيد حد غريب

ينفضني يفحصني بقسوة عن قريب

يسموه بكيا أو بائع الكراكيب

دا مخرم مرقع لا يسوى و لا يجيب

أهانني و أنا عليه موش قادر أرد أجيب

و رماني في بؤجته بدون طي و لا ترتيب

ودارت بي ذكريات أمس بعيد و قريب

شفت فيها مع صاحبي فرح و سمعت نحيب

ساعتها بس عرفت إني مغادر الأحباب

و بعد الهنا و الدفا رموني أمام الباب

كتمت دمعي و إتقطعت بي الأسباب

و استسلمت لقدري و نسيت كل عتاب

شالني و مشيت مع صاحب ليا جديد

سمعته يتمتم لحاف تمام يلزمه تنجيد

تاخده لشوار بنتها الحاجة أم سعيد

و أكسب لي قرشين حلال منه أكيد

ساعتها لقيت الدنيا مهاش سيعانى

بعد ما إترميت ح أرجع للحياة ثاني

و أعيد الكره مع ناس شرياني

أحمدك يا رب فاكرني لا بتنساني

أبو حميد المصري ‏21‏‏/‏12‏‏/‏2003‏

[أسد]

اللهم لا حسد   

طيب تعرفى ان الحياة فى بلدنا- مصر يعنى - كانت فى يوم من الايام اكثر رفاهية وجمالا ؟

كان معظم المصريين عندهم بيوت، وكان السكن فى الشقق عيب!

الكلام ده عن مصر ....؟؟؟؟؟؟

إمتى ده ...؟؟؟؟؟

شقق ايه اللي كان السكن فيها عيب ... ؟؟؟؟

الجمالية ... الأزهر ... الحسينية ... شبرا ... روض الفرج .. الوايلي ... الحدائق ... بحري في الأسكندرية ... حي العرب في بورسعيد ... حي الأربعين في السويس ... قرى مصر كلها ....

هل كان فيها حاجة من اللي سعادتك بتقول عليها دي ؟؟؟؟؟

[Byte]

شبرا

بالنسبة لشبرا ، بيت جدتى مازال موجود وقائم فى شارع مدرسة التوفيقية، ووالدى كان مستأجر بيت فى خدائق شبرا ب 15 جنيه، بس استغلى الايجار وسابه! :)

الخلفاوى : ليا اصحاب كتير اهلهم بانيين بيوت هناك، ومن التمانينات مش هاروح بيك لزمان قوى!

روض الفرج

صديق لى مازالت عائلته مستأجره نفس البيت من 30 سنة ، خلف مستشفى الرمد، عايز اسمه؟ <_<

بالنسبة لمصر الجديدة، فكان لى خالة مستأجرة منزل فى ميدان الحجاز ب 20 جنيه

وخالة اخرى تركت شقة فى نفس المنظقة لدواعى السفر سنة 1970 ، واخدت من المالك 150 جنيه فى بداية عصر الخلوات

... الحدائق

ماعرفش الحدائق، ايه رأيك فى كوبرى القبة ، جنبها مش كدة؟ روح شارع الحداد، متفرع من شارع عبد المجيد سليم(شارع الميدان) البيت الوحيد فى الشارع مستأجراه عائلة فلسطينية من 40 سنة ب11 جنيه

حي الأربعين في السويس

ياراجل هوه ده اسمه حى برضه، ده ثكنات عسكرية

ورغم كده، كانت البيوت فيه كتير ايام فترة جيشى فى الثمانينيات، همه هدوه؟

بحري في الأسكندرية

ايوووووه ، ياراجل ده انت كان ممكن تلاقى بيتفى الاسكندرية لحد الثمانينات - بس يكون بعيد عن منطقة الكورنيش - بسعر ممتاز ، خلينا فى القاهرة احسن علشان انا مابروحش بحرى الاعلشان بؤش او ابو اشرف، حاكم انا غاوى جندوفلى طازة! mfb:

ازمة السكن فى القاهرة بدأت تحديدا من سنة 1970!!!

اخوك بايت بن بطوطة ـ رحالة قاهرى عاش فى 6 احياء ايام الرخص! mfb:

(وعلى فكرة برضه، الطبقة المتوسطة كلها كان عندها عربيات ، واللى كان بيركب تاكسيات ومواصلات كان هوه كمان عيب،يالا بقى علشان الخناقة تحلى، راجعوا تعريف الطبقة المتوسطة قبل ماتحدفوا كراسى) mfb:

تم تعديل 7 فبراير 2004 بواسطة Byte