مساعدة 
انا حبيت اعرض حالتي هنا يمكن حد يطلع باقتراح جديد غير الدكاتره اللي مش عرفين يعملو حاجة.
اولا..مش عرفه اسميها اعراض ولا ايه بس الحاجات اللي بتحصلي ملهاش علاقة ببعض خااااااااالص. انا تقريبا في اول السنة دي ابتديت اكل اكتر من قبل كده و ابتديت اجوع اسرع. قولنا ماشي عادي باكبر و جسمي محتاج غذا..بعدين الاكل ده فضل يزيد يزيد لحد ما دلوقتي مش ببطل اكل طوووول الوقت و الاوقات اللي مش باكل فيها ببقى همووووت من الجوع و تفضل بطني تصوصو. و مش بشبع ابدا..عمري ما حسيت اني شبعانه او اتماليت!! علطول حاسة بطني فاضية. يعني لو خرجنا مطعم او حاجة النظام المعتاد بقى نعمل اوردر لدلوقتي و اوردر زياده اكل فيه على ما نروح. فوق ده كولو...ان انا underweight
في بقى حاجات تانيه ابتدت من حوالي كام شهر كده..ان وانا نايمه و نعسانه بليييل خالص اصحى على آلااااام بشعة في قدمي مرة تقلصات و مره تنميل شدييد شدييد شدييييد و رجلي تبقى سقعاااااا. و انا على فكره مش بنام في اوضاع مجعلصه يعني لا بحشر رجلي في الحيطه ولا اي حاجه كده نومتي بسيطة خاالص و مفيش اي حاجة تعمل كده. و بردو الموضوع ده فضل يزيد لحد ما بقيت الحكاية دي تحصلي كل يوم مبتعديش ليلة. و لازم انده مامتي تيجي تعملي حاجة لاني ببقى مش قدره احركها خالص مش من الالم و بس لأ انا لما بحاول احركها مش بترضى
كاني بكلم نفسيالحاجة التالته بقى اني ابقى مقضيه يومي طبيييعيييي جدا و فجأه اتعب و و اوقف اي حاجة بعملها و انااام و اليوم كلو يبوظ طبعا. حتى ساعات نبقى بره البيت و تحصلي بروح اقعد في العربية مفيش عشر دقايق و اكون في سااابع نومه و ايام بصحى الصبح بعديها بساعتين ارجع انام تاني لحاااد اخر اليوم اصحى لمى يبقى فاضل ييجي ساعة على معاد نومي الطبيعي و في المعاد ارجع انام عااااادي خالص كاني صحيا طول اليوم.. بعدين بعد ما مامتي تابعت الحكاية دي اكتشفت ان بيحصلي هبوووط في ضغط الدم غير معروف اسبابه.
روحت طبعا لداكتره و حكيتلهم على كل الحاجات دي و كلو قال تحاليل دم و اتهريت تخريم في دراعي و مطلعوش بحاجة عدله. كل اللي اتقال في نقص حديد بسيط جدا و ده طبيعي في سنك و خدي اقراص حديد لكن كلوهوم قالوه معندوهومش تفسير للي بيحصل. حتى اخر دكتوره عملتلي رسم قلب و بردو ماطلعش حاجة. مستسلمتش قالتلي اكشف عليكي تاني و فضلت تفعص في بطني تفعص في بطني وانا طبعا فطساااانه (بتزغزغ طبعا) و في الاخر طلعت كانت فكراني حامل.
المهم مش ده موضوعنا..و دلوقتي انا مهريه اقراص الحديد دي و مفيش اي تغيير. اللي انا عايزه اعرفو هل اي حد يقدر يديني فكره عن ده ممكن يكون ايه و اذا كان الاعراض اللي ملهاش علاقة ببعض دي ....ليها علاقة؟ و هل نقص الحديد البسيط اللي كلو بيقولو ده يعمل كده؟
احب بس اشير ان عندي في الfamily history موضوع ضغط الدم ده بس كلوهوم بيعاني من ارتفاعو مش انخفاضوا..فهل ماتفرقش موضوع عالي ولا واطي ولا؟ زائد ان حتى لو من الfamily history المفروص المفروض اني لسه صغيره على انو يظهرلي الحاجات دي
تم تعديل هذه المشاركة بواسطةDamo: 27 December 2009 - 04:12 AM
