إنتقال للمحتوى


صورة
- - - - -

مشاكل المرأه العامله المصريه


  • من فضلك قم بتسجيل الدخول للرد
11 رد (ردود) على هذا الموضوع

#1 Farida

Farida

    Advanced Member

  • Members
  • PipPipPipPipPip
  • 905 مشاركة

تاريخ المشاركة 14 January 2004 - 04:41 PM

و الله انا مشغوله جدا جدا و لكن انا اتشجعت و كتبت الموضوع ده بعد موضوع ربه البيت اللى اتفق مع بعض ما جاء به و لكنى اضفت ان كل المشاكل اللى بتمر بيها ربة البيت هى مشاكل مضافه للمشاكل اللى بتمر بيها المراه العامله و تعالول نحكى القصه من أولها :
- البنت و هى صغيره دائما تجد التشجيع على التفوق و تغذية طموحها العلمى و الدراسى لا فرق هنا بينها و بين الولد و خصوصا لو كانت ذكيه و متفوقه
- يستمر التفوق فى المدرسه و الجامعه و حتى فى العمل و هى نفسها تشعر بالفخر من كل اللى حواليها ..حتى يدق بابها ابن الحلال اللى جاى اصلا اعجابا بتفوقها و ذكائها و انه
بهذا قد احسن اختيار ام اولاده
- اول ما تتجوز و قبل مجئ الأولاد تبدأ المشاكل صغيره و فى الغالب بتكون بينها و بين زوجها اللى هو اصلا مرهق فى شغله من ناحيه تجهيز الأكل اللى غالبا لازم يكون طازه يوم بيوم زى ما حضرته متعود و الهدوم المكويه زى ما هو متعود برضه و غيره
- المشاكل الأكبر لما الآولاد بيجوا بقه ..... فين تودى الولاد و فين الحضانات الثقه و مواعيد المدارس اللى بيخرجوا الساعه واحده الضهر و لا الأمتحانات و اللى بيخرجوا فيها الساعه 11 الصبح مواعيد عجيبه جدا .....و لا المذاكره و لا انك لازم تثبتى كل ساعه و كل دقيقه ان عملك لا يمكن يؤثر على بيتك و كونك ست بيت بالإضافه لكونك امرأه عامله
- و المشاكل بقه من اللى حواليهم مثلا لو حد من الولاد تعب يبقى علشان الحضانه مع ان معظم اللى قاعدين فى البيت ولادهم بيتعبوا برضه ..... و لو راكبه مواصله تبص تلاقى اللى حواليها لما يبتدوا يتريقوا على اللى بيخرجوا من بيوتهم و يشتغلوا ....و لو حصلت مشكله فى العمل تلاقى اللى طالع يقول ما انتوا لو قاعدين فى البيت كنتوا ريحتوا و ارتحتوا ...... و لو الزوج طيب و ابن حلال لازم واحد من زمايله يثير موضوع خروج زوجته للعمل و انه لابد مش قادر يصرف عليها مثلا ....ده غير الإجتماعيات المفروضه و اللى تهد الحيل و لو الواحد حب يفلفص يبقى علشان خيابة الست العامله
- ده غير الإعجاب منقطع المظير بالمجتمعات المتقدمه مع انها فى الأساس قائمه على تعاون عملى بين الرجل و المرأه

اللى عاوزه اوصله اننا بالرغم من اعجابنا بالبنت المتفوقه و
الفتاة العامله الا اننا بنخسف بيها الأرض لو اصبحت زوجه و ام و عامله و الموضوع احيانا بيكون من الزوج و احياااااااااااان كتيره بتبقى من المجتمع ككل... المجتمع لا يحترم المراه العامله كما ينبغى مع انها بتتعب اكتر من اى شخص اخر و مرة اخرى مش تعب جسمانى فقط و لكن نفسى كمان
*اللهم انى اشكو اليك ضعف قوتى و قلة حيلتى و هوانى على الناس
*اللهم و لى امورنا خيارنا و لا تول امورنا شرارنا
* الساكت عن الحق شيطان أخرس
* الشعوب تستحق حكامها

#2 Set_Amina

Set_Amina

    Advanced Member

  • Members
  • PipPipPipPipPip
  • 458 مشاركة

تاريخ المشاركة 14 January 2004 - 05:40 PM

كل ما قولتيه وما استعرضتيه من مشاكل تواجهها الست العاملة هو صح وحاصل فعلا، ولكني لست اوافقك الرأي في نظرة المجتمع التي تصفيها للست التي تعمل جنبا الى جنب مع الرجل ، فلقد ولى الوقت والزمن الذي يسخر فيه الناس من الست التي تخرج يوميا من بيتها لتعمل ولتشارك ولتساهم في كل شؤون الحياة سواء على مستوى اسرتها أو على مستوى مجتمعها ككل.

اليوم الست مديرة ووزيرة وقاضية ولها مكانها في المجتمع من خلال عملها وقادرة على كسب ثقة واحترام وتبجيل كل من حولها اذا كانت فعلا موفقة في كل مجالات عملها بالاضافة الى تفوقها في بيتها.
هي اليوم محترمة اكثر من ذي قبل شأنها أعلى من ذي قبل بالتأكيد وليست مغبونة ولو بنظرة البعض اليها.
سيظل اكيد هناك من لا يوافق على خروج المرأة للعمل وللمشاركة وهم أحرار في رأيهم هذا ولكن اذا تطاولوا عليها بالاستهزاء من خروجها للعمل فأن هؤلاء في عرفي انا ممن لا مكان لهم في الركب الحضاري ولا أهمية لرأيهم اصلا
إن خوفت ماتقولشي وإن قولت ما تخافشي

#3 Salwa

Salwa

    Super Member

  • مشرف عام
  • PipPipPipPipPipPip
  • 5710 مشاركة
  • النوع:أنثى

تاريخ المشاركة 14 January 2004 - 06:21 PM

الفاضلات...فريدة وست امينة ..

ايه يافريدة الدوشة دى ؟؟؟...انا حاسة بيكى ...وعارفة انك تعبانة ..لكن ؟؟

كلام ست امينة صح ....المرأة اخدت وضعها فعلا...........لكن ؟؟
تخيلى يافريدة ....بحيرة فيها مياه صافية ....بحيرة مقفولة ...مع مرور الوقت ..مياهها حاتبقى مياه راكدة .................يمكن التعبير مش شيك .....بس خليكى معايا..

تخيلى لو البحيرة دى متصلة بالبحر .........على طول بتتغير المياه ....
الأمواج الآتية من البحر ....عاتية ..
لكن البحيرة دائما صافية ..........هو ده الفرق بين الاثنتان ...

يافريدة ...انا ربيت اولادى الأربعة ...واعلم تمام العلم ..معنى انك تجرى من شغلك علشان تلحقى تاخدى ابنك او بنتك من الحضانة ..ولاداعى لذكر تفاصيل ..كلنا عشناها تقريبا ...
لكن والله يافريدة كنت عاملة ..// سوبر وومان //..وده جمال الحياة ...
رغم دوشتها ..وسرعتها ..لكن لها طعم آخر .......حاسة انك عايشة وبتعملى حاجة رائعة .
لكن ربة البيت مظلومة ..صدقينى ..رغم كل شقاها .......قليل اللى بيشعر بيها ..
بالعكس ...ساعات زوجها يقول لها مثلا.......انا تعبان وتقول له مالك ...يقول لها ..يعنى لو قلت لك حاتفهمى ؟؟...بيحصل ياجماعة ..
لأن هى وضعها ورضاها ...جعلهم حتى ...لايقفوا ويسألوا نفسهم ...هى مش عاوزة حاجة خالص غير كدة ؟؟
وللحديث بقية ..
سلامى.
<span style='font-size: 14px;'><span style='color: #FF0000'>(وَمَنْ يَقْتُلْ مُؤْمِناً مُتَعَمِّداً فَجَزَاؤُهُ جَهَنَّمُ خَالِداً فِيهَا وَغَضِبَ اللَّهُ عَلَيْهِ وَلَعَنَهُ وَأَعَدَّ لَهُ عَذَاباً عَظِيماً) [النساء : 93]</span></span>

#4 فــيــروز

فــيــروز

    Super Member

  • Members
  • PipPipPipPipPipPip
  • 6505 مشاركة
  • الإهتمامات:reading<br />writing<br />family visits<br />travelling<br />tea tea teaaaaaaa

تاريخ المشاركة 14 January 2004 - 06:40 PM

يا جماعه اسمحوا لى
حسبما فهمت يعنى الست امينه و مدام سلوى قضيا جزء كبير من حياتهم خارج مصر
وفريده تتكلم عن المجتمع المصرى تحديدا و نظرته الى المراه العامله !!

انا لا ادعى ان المراه العامله فى الغرب لا تتعب .. لكن هناك فرق كبير بين ان تتعب فى مجتمع يحترم تعبك ويبذل جهده ليذلل لك الصعاب وبين مجتمع ينتهز كل فرصه ولو بالظلم لينسب الى عملك كل المصائب !!

كثيرون مثلا يدعون ان عمل المراه هو سبب ازمة البطاله !! تخيلوا !! طيب ما المراه فى اوربا و امريكا وحتى دول شرق آسيا ولم يقل احد انها سبب البطاله
فجاه اصبح عاطف عبيد بريئا من كل تقصيره وصارت المراه بقدرة قادر هى المسئوله عن ازمة البطاله رغم تواضع نسبة الاعمال التى تحظى بها المراه لتفضيل الرجال عليها او لعدم حصولها على تعليم جيد

عمل المراه ينظر اليه البعض على انه سبب الانحرافات الاخلاقيه فى المجتمع !! رغم ان التربيه مسئولية الرجل و المراه معا !! ورغم ان الانحراف كان موجودا من قديم الازل رغم عمل المراه

المراه العامله فى اوربا تجد خلفها مجتمعا لا يقف لها بالمرصاد اذا اشتكت وتكون اجابته الجاهزه "ماتقعدى فى البيت ما انتى اللى جايباه لروحك" !! مع ان هذه المراه فى الغالب لا تعمل للترفيه او عشان هى غاويه بهدله ولكن لانها ترجو لابنائها ولنفسها ولاسرتها حياه افضل ومش عيب ولا حرام ولا جريمه .. المراه فى الغرب تركب مواصلات تحترم آدميتها .. زوجها لا يطالبها ان تقف بالساعات لتعد له طعاما طازجا يوم بيوم بل انه لن يستنكف ان يعاونها فى اعمال المنزل .. بالمناسبه انا لست بصدد تفضيل مجتمع على آخر .. انا فقط احاول ان اوضح ان المقارنه بين المجتمعين غير عادله على الاطلاق .. ولن تؤدى بنا لنتائج صحيحه .. تحياتى

"أَمْ مَنْ يُجِيبُ الْمُضْطَرَّ إِذَا دَعَاهُ وَيَكْشِفُ السُّوءَ وَيَجْعَلُكُمْ خُلَفَاءَ الْأَرْضِ أَإِلَهٌ مَعَ اللَّهِ قَلِيلًا مَا تَذَكَّرُونٌَ"
صدق الله العظيم

-----------------------------------

قال الصمت:
الحقائق الأكيده لا تحتاج إلى البلاغه
الحصان العائد بعد مصرع فارسه
يقول لنا كل شئ
دون أن يقول أى شئ
صورة
مريد البرغوثى

#5 Salwa

Salwa

    Super Member

  • مشرف عام
  • PipPipPipPipPipPip
  • 5710 مشاركة
  • النوع:أنثى

تاريخ المشاركة 14 January 2004 - 07:23 PM

يافيروز .........
انا زوجى مصرى ......اصييييييييييل..
لازم اكل طازج كل يوم...........لازم اكل مصرى ........لازم ولازم ولازم ..
حتى العمل ....../.معه هو /.....فهمتى ؟؟...استحالة كنت اشتغل بعيد../.صعيدى اصيل ./
حكاية المقارنة خطأ..........قولى لى مين قارن ؟؟..ايه دخل هنا بهناك ..؟.اقولك..
المرأة هى المرأة فى كل مكان ..............معرفش جبتى منين انها تختلف هنا عن هناك.؟
حكاية المواصلات ...!!..دى مشكلة الدولة ........رغم انى اعرف ان فى الاسكندرية وفى ترام الاسكندرية مثلا ....فيه اماكن مخصصة للسيدات .....والترام فى منتهى النظام والنظافة ....وفيه اتوبيسات كثير ..ممنوع الوقوف ....يعنى مريحة .
اما من يدعى ان المرأة هى سبب البطالة ....فهذا بالتأكيد شخص موتور ..
ماعلاقة هذا بذاك ...؟؟؟
من قديم الأزل والمراة المصرية بالذات ..تعمل ...وعكس ماهو شائع ..انها اخذت حقوقها متأخر ..
حقيقى كان مجال عملها ....محدد....لكنها كانت تعمل ..
بدليل حتى انها ...حكمت مصر ..
ومش هو ده موضوعنا .......
ليه دائما هى ..............مهدورة حقوقها ....//// التى لاتطالب بها .////
انا اتحدث عن المرأة ......الصامتة .
وليس عن التى تصرخ وتطالب ......
مش حكاية مساواة .........لكن ....شوية تقدير ....اهتمام ....تعاون ..

سلامى.
<span style='font-size: 14px;'><span style='color: #FF0000'>(وَمَنْ يَقْتُلْ مُؤْمِناً مُتَعَمِّداً فَجَزَاؤُهُ جَهَنَّمُ خَالِداً فِيهَا وَغَضِبَ اللَّهُ عَلَيْهِ وَلَعَنَهُ وَأَعَدَّ لَهُ عَذَاباً عَظِيماً) [النساء : 93]</span></span>

#6 فــيــروز

فــيــروز

    Super Member

  • Members
  • PipPipPipPipPipPip
  • 6505 مشاركة
  • الإهتمامات:reading<br />writing<br />family visits<br />travelling<br />tea tea teaaaaaaa

تاريخ المشاركة 14 January 2004 - 10:33 PM

يا مدام سلوى انا حين تحدثت عن الصعوبات التى تواجه المراه العامله لم اقصرها فقط على الزوج !! لكنى تحدثت عن مجتمع بالكامل تحيا بداخله المراه

مجتمع صغير هو اسرتها بما فيها الزوج و مجتمع اكبر ينظر للمراه نظره تختلف من مكان لآخر

المقارنه قصدت بها مداخلة حضرتك و مداخلة ست امينه
لسبب بسيط .. انى فهمت ان كلا منكما تتحدث عن ما تعيشه بالفعل .. ولان كلا منكما لم تعش فى مصر من فتره طويله -حسبما فهمت يعنى- كان لابد ان اوضح ان ما تتحدثان عنه ليس هو واقع المراه المصريه الذى تحياه !!

هل انا قلت ان المراه تختلف هنا عن هناك؟ المراه لم تختلف لكن الظروف المحيطه ببها هى المختلفه !! تتاثر المراه بهذه الظروف .. شئ طبيعى جدا :lol:

المواصلات مشكلة الدوله .. طبعا هى كذلك لكنى اتحدث عنها كجزء مما تحياه المراه وهو جزء لا تريه حضرتك على ما اعتقد فى اسبانيا او تراه ست امينه فى المكان الذى تقيم به !! اما ترام الاسكندريه فالاسكندريه ليست مصر كلها زى ما حضرتك عارفه :lol: وحتى عربية السيدات التى توجد فى مترو الانفاق البعض يرى انها كفايه جدا على الستات ومش مفروض انهم يركبوا باقى عربيات المترو !! فهمتى حضرتك ليه المراه ترى انها ضيف ثقيل على البعض؟

انا بالطبع لم يكن رايى ان المراه سبب البطاله او اصل فساد الاخلاق .. قصدت ان اسوق لك امثله على ما تعيشه المراه فى مصر و المجتمعات العربيه عموما ..

اما عن مطالبة المراه لحقوقها :lol: يكفى ان تتابعى حضرتك رد فعل الرجال على مطالبة المراه بحق من حقوقها "الخلع مثلا" لتعرفى لم يستغرق الامر سنين طويله للمراه حتى تحصل على تلك الحقوق

باختصار شديد يا سيدتى الفاضله

المراه لو نالت حقوقها التى كفلها لها الاسلام بدون من او اذى من احد لن تطالب بمساواه او تفكر فيها .. لكنن للاسف هذا كله مرهون ب .. لو

"أَمْ مَنْ يُجِيبُ الْمُضْطَرَّ إِذَا دَعَاهُ وَيَكْشِفُ السُّوءَ وَيَجْعَلُكُمْ خُلَفَاءَ الْأَرْضِ أَإِلَهٌ مَعَ اللَّهِ قَلِيلًا مَا تَذَكَّرُونٌَ"
صدق الله العظيم

-----------------------------------

قال الصمت:
الحقائق الأكيده لا تحتاج إلى البلاغه
الحصان العائد بعد مصرع فارسه
يقول لنا كل شئ
دون أن يقول أى شئ
صورة
مريد البرغوثى

#7 Farida

Farida

    Advanced Member

  • Members
  • PipPipPipPipPip
  • 905 مشاركة

تاريخ المشاركة 15 January 2004 - 12:08 AM

يا مدام سلوى انا مش عامله دوشه الدوشه موجوده بالفعل و انا مش انسانه شكايه على الدوام لأ انا واقعيه جدا و للأسف هو ده الواقع و هو ده المجتمع و حكايه المراه بقت سفيره ووزيره كلام حيلو زى اللى بيقولوه فى التليفزيون لكن كل ما حولك لا ينظر للمرأه كما يراه من يشاهد الفضائيه واحد و اتنين انا باحكى على متاعب ناس عايشه فى مصر و ستات بتشتغل فى الحكومه و القطاع الخاص مش فى مكتب خاص ;) ;)
اما انت يافيروز دايما بتكملى كلامى فعلا انت فيروزة المنتدى بجد :rolleyes: :blink: mfb:
*اللهم انى اشكو اليك ضعف قوتى و قلة حيلتى و هوانى على الناس
*اللهم و لى امورنا خيارنا و لا تول امورنا شرارنا
* الساكت عن الحق شيطان أخرس
* الشعوب تستحق حكامها

#8 achnaton

achnaton

    Super Member

  • MemberL
  • PipPipPipPipPipPip
  • 2489 مشاركة
  • النوع:ذكر
  • الإهتمامات:اللغة العربية والقراءة المتأنية

تاريخ المشاركة 15 January 2004 - 03:45 AM

سيداتى .. آنساتى .. أسغد الله اوقاتكن وشملها بسلامه ورحمته
الموضوع لذيذ .. وكم ناقشه المجتمع البشرى سواء فى مصر او غيرها من الأقطار .. ولكننا فى مصر بكل أسف تأثرنا كثيرا بعدة عوامل أولهما الأستعمار المتكرر والمختلف .. والرجل الصعيدى قد يختلف عن البحرواى .. ولكنهما الأثنين يشتركون فيما مايمكن تسمية " بالردة النفسية " وموقع المحروسة .. وتاريخها يفرض عليها فرضا هذا التباين الواضح بين سلوكيات الرجال والنساء .. واسمحوا لى ان - رغم عدم تخصصى - أن أعتمد على خبرة الأيام .. والممارسة .. والملاحظة .. وممكن أن أدعى أنى أكتسبت خلال تلك التجارب والتنقل والمحاكاة الكثير من الأعمال التى تجيدها المرأة .. وكان ذلك من خلال حب الأستطلاع .. والدراسة .. فقد تعلمت واجدت الطبيخ بأنواعة منذ كنت طالبا بالجامعة .. رغم أن أيامها كانت الجامعة تقدم وجبة غذا شهية ب بثلاثة او اربعة قروش علمتنى الطبيخ صاحبة البيت التى كنت أسكن عندها .. كنت أيامها صعيدى من اللى بتحكى عنهم أختنا فيروزة المنتدى .. وتركت النجع الى المدينة لمدة بسيطة ثم الى أقصى الشمالالى الثغر السكندى .. وشتان أيامها بين المجتمعين .. كان ثلث الأسكندرية أيامها خواجات ,كان حظى أن اسكن لدى زعيمة الجالية الأرمنية .. واكتسبت منهم على مر السنين الكثير والكثير .. وعلى يدهم تعلمت بجانب الطهى التركى وهو أصل وجباتنا المصرية .. تعلمت الخياطة والمكوى لأتمكن من رفى شرابى .. او رفى ما يتمزق من ثيابى وازرار قميصى وفى احد المرات سألت " اوهان " وكان صديقى من اين أشترى مايوه مناسب .. وكان رده الفورى " عند أم أوهان " وسألتها قالت .. نعم .. غدا بعد أن تعود من الكلية ستجد المايوه .. ويومها وجدت قطعة قماس ( مطاط ) والفة استك .. وقالت اختر الموديل من هذه المجلة .. ودعنا نقص القماش .. وسأتولى أن الخياطة على الماكية .. وانظر أنت .. ونظرت وتعلمت .. وخلال سنتين فقط تغيرت سلوكى وطباعى بالكامل .. لدرجة أن أمى كانت تتمنى أن ازورهم بصفة مستمرة لأساعدها فى المطبخ .. واعمال المنزل .. وخاصة تزييت ماكينة الخياطة ( فكها وتنظيفها وتزيتها ) ثم كمل جميلك وخد خيط ده ؟؟ الله يرحمها بقى .. رغم أنها كانت صعيديه .. الا انها زغردت عندما تغربت من النجع للمدينة ومن المدينة للخارج .. وحا اقولكم حاجة عن المرأة الألمانية وكانت أكثر عددا فى المصانع يقمن بكل الأعمال .. حتى الحدادة والبناء .. اكثر من عشر سنوات كانت رئيستى أمرأة .. تعلمت منها الكثير .. ليس حبا فى شخصى .. ولكنها كانت تعطينى من علمها وثقافتها كأحد اعضاء الصف الثالث وليس الثانى .. وكان يحلوا لها أن تؤكد أمام الزميلات والزملاء ان من يحب لقمة عيشه لابد أن يذيق منها اولاده وجيرانه ليعلموا ماذا يقدمه للمجتمع .. رحمها الله .. ولما تزوجت .. كانت كل الأعمال فى المنزل تصادف من يتطوع بالقيام بها .. فكانت المدام تعد الأولاد للمدرسة وكان على توصيلهم واحضارهم .. كان على زوجتى ان تطبخ لنا .. وكان على أن اجفف بالفوطه ما تغسله من اطباق .. ونحن الأثنان امام الحوض .. كان عليها تسوق الأشياء الصغيرة مما نحتاجه .. وكان على تسوق السلع المعمره .. وهكذا ولم يحدث يوما أن إعترضت على أكلة .. او هى إعترضت على جهاز أو معدة ..او حتى حله .. عليها تربية الأطفال ورعايتهم بحكم اللغة .. وكان على أن اباشر طلباتهم .. وكان التعاون الغير مقنن والغير مخطط يسود الحياة .. مثلنا مثل البيوت الأخرى مفيش سى السيد .. ولا عم حشيش وشروطه .. وعندما بلغ ابننا سن العاشرة .. واشفقنا عليه من أكل السندوتشات والوجبات الجاهزة .. الحقناه بالجامعة الشعبية ليتعلم الطهى فأصبحت له هوايه .. ومن خلال دراسته للمطبخ .. تعلم مدى الجهد الذى تبذله أمه فى إعداد الطعام لنا .. فكان لا يترك ترابيزة الأكل قبل أن يشكر أمه على جهدها .. من هنا الماكينة الألمانية بتدور .. وكل جزء فيها له وظيفة .. وكل اجزاء الماكينة تعلم جيدا انها مالم يكن هناك تعاون مفترض .. توقفت ..
وليس بالضرورة أن الأم العاملة خيرمن الأم ربة البيت .. فقد تربينا كما تربى الكثيرين فى احضان أمهات غير عاملات .. وكان آباؤنا - وليعترض من يشاء - معظمهم سى السيد ولكن لكل زمن اسلوبة .. واثناء زياراتى للمحروسة .. التى احاول فيها بقد إستطاعتى وباقصى جهدى أن اعيش عيشة اهلى .. الصعايدة البسطاء .. تشد إنتباهى المرأة العاملة وهى تلهث وراء أتوبيس .. وتقرفنى أخرى عندما أراها قاعدة على المكتب تقرن بامية او تفصص بسله .. طبعا عاوزين تعرفوا شفت ده فين .. فى مجمع التحرير .. فيه أكثر من مصلحة ومن إدارة .. ودى هوايتى اروح هناك اتفرج على نماذج البشر واتحسر على المحروسة .. ولكن أحب أطمأنكم .. مفيش أحلى واعز واحن من الأم المصرية .. وبمعنى اوسعع من المرأة المصرية .. سألونى مره فى احد حفلات الكرنفال .. هل أنت سعيد بزواجك من المانية .. ورغم انهم المان .. قلت لا .. ولو عادت بى الأيام لما اخترت غير مصرية .. فرغم التفاهم التام .. والسعادة التى أعيشها .. ينقصنى دفء وحنان أمى .. أشاء لا يمكن للمرء أن ينساها حتى ولو انقلب اوناسيس ..
تحياتى وتقديرى لكن ولكل أم مصرية ..ولكل بنت مصرية ..
اخناتون المنيا

[size=4]كلمات حق وصيحة فى واد .. إن ذهبت اليوم مع الريح ، فقد تذهب غدا بالأوتاد ..
ليس كل من مسك المزمار زمار .. وليس كل من يستمع لتصريحات الحكومة الوردية ..حمار
ويا خسارة يامصر .. بأحبك حب يعصر القلب عصر

#9 Farida

Farida

    Advanced Member

  • Members
  • PipPipPipPipPip
  • 905 مشاركة

تاريخ المشاركة 15 January 2004 - 09:47 AM

استاتذى العزيز اخناتون المفروض و الله تألف كتب انت ما شاء الله الواحد ما بيشبعش من كلامك .....ربنا يديم عليك نعمه الأستقرار و يخلى لك المدام .... على فكره انا كمان زوجى بيساعدنى فى شغل البيت رغم انه ما كنش بيجيب لنفسه كبايه ميه فى بيت والدته و الحمد لله ...
اما عن حكايه الستات اللى بتقمع باميه فى مجمع التحرير فمش كلهم و الله عموما لما حا تدور على زمايلهم الرجاله تلاقيهم بيلقطوا رزقهم بره المجمع اما شغالين على تاكسى او فى لوكانده او فى مطعم انا و الله اعرف مدير ادارة كان كل شويه يختفى و بعدين عرفت انه بيشتغل فى فرقه موسيقيه فى الأفراح و كل شويه يزوغ علشان البروفات .....
قيمه العمل فى حد ذاتها غايبه عننا فما بالك لو كانت ست و بتشتغل
أكيد مثلا فى المانيا فيه حضانات مجهزه و محترمه و رخيصه و أكيد المدارس بتطلع الولاد الصغار فى مواعيد مناسبه لمواعيد الم مش تبقى محتارة الولاد يقضوا فين الساعات اللى بيبن طلعوهم و رجوعها هى و اكيد فيه انشطه صيفيه و رعايه للأطفال فى الأجازات و غيرها تبقى مطمئنه عليهم و اكيد فى كتب المدرسه عندهم ابى يعمل و امى تعمل مش ابى يعمل و امى ربة منزل

تم التعديل بواسطة Farida, 15 January 2004 - 09:49 AM.

*اللهم انى اشكو اليك ضعف قوتى و قلة حيلتى و هوانى على الناس
*اللهم و لى امورنا خيارنا و لا تول امورنا شرارنا
* الساكت عن الحق شيطان أخرس
* الشعوب تستحق حكامها

#10 Salwa

Salwa

    Super Member

  • مشرف عام
  • PipPipPipPipPipPip
  • 5710 مشاركة
  • النوع:أنثى

تاريخ المشاركة 15 January 2004 - 01:34 PM

صباح الخير ...
اولا...يافريدة انتى ناسية كمان مشاكل المرأة العاملة فى شغلها نفسه ..
على فكرة ..كلمة دوشة ..مش بمعنى ..زعيق...لكن بمعنى اعتراض يافريدة الزمان .وانا عارفة يافريدة ..ويافيروز ..ويالايت هاوس ان وضع المرأة غير مريح ابدا ابدا فى مصر ..وخصوصا انها لاتشكى وصبورة وترضى بالواقع بدون احتجاج ...ولهذا قلنا ...نتكلم.
انتى تقولى رأى ..وهو يقول ..وهى تقول ..وانا أقول ..
ومن مجموعة الآراء دى ...اكيد حانلاقى حل لمشاكل ..كتير محسوسة وملموسة ..لكننا نضع رأسنا فى الرمال ونجبن عن المواجهه ..
اولا ..يجب ان تكون المرأة مرتكزة فى حياتها على اربعة قواعد..
ثقتها فى نفسها .
شعورها انها لديها دائما ملكة الابتكار فى كل نواحى حياتها .
محاولة تحقيق رغباتها دائما ..طالما هى لاتجور على حقوق الغير فى تحقيق رغباتهم .
الروحانيات ...شعورها انها قانعة بكل شئ..واحساسها الدينى عالى ورغبتها فى مساعدة الغير تملؤها بالحب والحياة .
وللحديث بقية .....
مرة ثانية حقول لكم ...كل حريم المحاورات ...اخواتى وبناتى ..
بالنسبة لأخونا اخناتون ..
ضحكت بعد قراءتى لكلامك ...زوجى كان اكثر بكثير من ..سى السيد التقليدى ..
لكنه ايضا بحكم عمله فترة طويلة فى القوات المسلحة واكتسابه مهارات كثيرة ..بصراحة يساعدنى فى كل شئ ...ويوجد بيننا تقسيم للأعمال بدون تحديد معين ...برضه نفس الوضع ...
الكبيرة عليه والخفيفة عليه .
ولى تعليق على ..حتة ..الزواج من اجنبية ..
احترمك سيدى جدا جدا لقولك هذا الرأى ........وسبق ان سمعته من اقرباء لى .
مهما كانت الزوجة الأجنبية ممتازة ...ومهما كانت تحبك وتحبها ...
توجد فى الزوجة المصرية ...طباع...احاسيس...موروثة ...صعب ان لم يكن استحالة .ان تجدها فى امرأة اخرى ..
انا اقول ...المرأة المصرية ...كالنواة بالنسبة للأسرة ...من الاستحالة ان يخرج المحيط عن مداره ...
هذا الطوفان من المشاعر ...مع الرقة المغلفة بالحياء ..لاتجدها فى امرأة اخرى ..
ربنا يسعد الجميع ..

سلامى.
<span style='font-size: 14px;'><span style='color: #FF0000'>(وَمَنْ يَقْتُلْ مُؤْمِناً مُتَعَمِّداً فَجَزَاؤُهُ جَهَنَّمُ خَالِداً فِيهَا وَغَضِبَ اللَّهُ عَلَيْهِ وَلَعَنَهُ وَأَعَدَّ لَهُ عَذَاباً عَظِيماً) [النساء : 93]</span></span>

#11 إبن مصر

إبن مصر

    Super Member

  • Members
  • PipPipPipPipPipPip
  • 3336 مشاركة
  • النوع:ذكر

تاريخ المشاركة 18 January 2004 - 03:15 PM

عمل الرجل..عملت المراه... استوت الاسره... كبر الابناء....استدامت الالفه...
حلم كل رجل وامراه ومن اجمل ما قرأت ما قالته اختى الصغيره فيروز...
لو نالت المرأه حقها الذى كفلها له الاسلام لما نادت بأى مطالب بل طالبت بان يكف الرجل عن تدليلها ..
والله
ابن مصر
..أشعر بالفخر انى ابن مصر وانى شاركت فى كتابه تاريخ..

#12 White heart

White heart

    Super Member

  • Editors
  • PipPipPipPipPipPip
  • 5409 مشاركة
  • النوع:ذكر

تاريخ المشاركة 03 April 2012 - 01:20 PM

اللى عاوزه اوصله اننا بالرغم من اعجابنا بالبنت المتفوقه و
الفتاة العامله الا اننا بنخسف بيها الأرض لو اصبحت زوجه و ام و عامله و الموضوع احيانا بيكون من الزوج و احياااااااااااان كتيره بتبقى من المجتمع ككل... المجتمع لا يحترم المراه العامله كما ينبغى مع انها بتتعب اكتر من اى شخص اخر و مرة اخرى مش تعب جسمانى فقط و لكن نفسى كمان

ولهذا يريد مولانا فضيلة الشيخ "حازم أبو اسماعيل" مرشح الرئاسة، حفاظاً على "كرامة" المرأة المصرية يريدها ان تعود الى المنزل والا تشارك فى العمل الا اذا كانت غير متزوجة، أو مطلقة، او أرملة .. فهو يرى ان عمل المرأة بشكل أو بآخر من أحد أسباب إرتفاع مُعدلات الجريمة فى بلدنا!!! وسيسعى للفصل بين السيدات والرجال فى أماكن العمل ... الخ .. الخ .. فأطمئنوا تماماً.


http://www.youtube.com/watch?v=-9dEa1uMuZM




0 عضو (أعضاء) يستعرضون هذا المنتدى

0 أعضاء, 0 زوار, 0 أعضاء متخفين


زار هذا الموضوع 17 عضو


    , abdulmuttaleb, AbkaReno, متعب, AhmedSalim, Alshiekh, egyptawy, eslam rashed, pocy, Prince Amir, Rosea, Salwa, Scorpion, ssamir, ssmaly, عبير الشرقاوي, White heart