إنتقال للمحتوى


صورة

وسع وسع كشري المحلات وصل...


  • من فضلك قم بتسجيل الدخول للرد
13 رد (ردود) على هذا الموضوع

#1 doha

doha

    Super Member

  • Members
  • PipPipPipPipPipPip
  • 3241 مشاركة
  • النوع:أنثى
  • المكان:مصر

تاريخ المشاركة 17 March 2009 - 12:05 AM

قريت في موضوع حد بيسأل على طريقة كشري المحلات كنت هحطها رد بس قلت خليها موضوع مستقل افيد ..

للامانة الطريقة اخذتها عن الشيف اسامه في تلفزيون دبي هو مرة كان مستضيف معلم كشري وشرح بالتفصيل اسرار عمل الكشري في البيت عشان يطلع زي بتاع المحلات .. جربتها من فترة قريبة واول مرة في حياتي اعمل كشري ويطلع مظبوط بالطريقة دي بعد ماكنت خلاص فقدت الامل اني ممكن اعمل كشري زي الناس ..

المكونات هنحتاج بصل ورز وعدس اصفر وعدس بجبة ( بني او اسود معرفش غير المصريين بسموه ايه بس احنا بنسميه بجبه وهو النوع الثاني من العدس غير الاصفر ) ومكرونه وشعريه ..

الطريقة :

اول حاجه نقطع البصل جوانح ( شرائح طويلة ) بعدين نقليه في زيت كتيييييير .. يعني نخلي الزيت غزير شويه يحيث يغطي البصل ويفضل يكون زيت ذرة .. الزيت الي قلينا فيه البصل ده هو الزيت ده الي هنستخدمه بعد كده في طبخ الكشري عشان يبقى مشبع بطعم البصل ..

ملحوظه مهمه اوي عملتها ودي من اسرار المحلات وفرقت معايا كتير في الطعم فاضافة لاستخدم زيت البصل فالبصل نفسه بنغطيه الاول بدقيق قبل مانقليه خاصه لو لسه جديد يعني في اول موسمه لما بيبقى البصل مليان مية مش ناشف زي بصل آخر الموسم .. عن نفسي حطيته في كيس نايلون فيه شويه دقيق وهزيت الكيس كويس اوي لما كل قطعه بصل تغطت .. طبعا فككت البصل من بعضه بحيث ميبقاش كتل وانما شرائح رفيعه وغطيتها كلها بالدقيق بعدين قليت ..

طبعا بنترك البصل في الزيت لما ينقلي ويبقى بني غامق مش اسود .. الاسود ده يبقى انحرق .. البني الغامق او المائل للغامق هو ده المطلوب .. نطلعه على ورق نشاف او مصفاه زي ماتحبوا وبكده تكون التقلية جاهزه وانتهينا من اول خطوة ..


الخطوة الثانية بنجيب العدس ابو جبه ونغسله ونحطه في حله على النار مع ماء كافي للسلق وملعقة ولا اثنين من زيت التقلية .. ماء نظيف مش من الحنفية لان الماء ده هو نفسه هنستخدمه بعد كده في سلق الرز . شفتم الحرفنة ..

بعد مايستوي العدس كويس اوي ( طبعا اضفنا له شويه ملح صغيرين اثناء السلق عن نفسي اضفتهم في المرحلة ماقبل النهائيه معرفش ليه جالي احساس ان الملح ممكن يبطأ النضج في العدس زي مابيعمل في اللحمه .. يجوز ) بعد ماينضج تماما نرفعه من الحله وناخذ نفس المية الباقية ونجهز شويه رز مغسولين عليهم شويه عدس اصفر ومخلوطين على بعض نقلب الرز والعدس في ملعقتين زيت من بتوع البصل ونستمر في التقليب شويه عشان يطلع مفلفل ثم نضيف ماء سلق العدس .. طبعا نراعي الكميات يعني نحط كمية الماء مناسبة لكمية الرز بالظبط كأننا بنطبخ رز عادي ومنزودش عشان ميعجنش ..

في المرحلة دي لمن لا يتقن طبخ الرز خاصه المفلفل مفيش مانع بعد مايغلي نغطيه ونحط تحته صاجه او البتاعه الي بيحطوها عشان يستوي الرز تحت الحلة دي ..

وعلى فكره ممكن تسلق معاهم العدس ابو جبه برضه ثاني او تخليه لوحدده تحطه وقت الغرف بس .. عن نفسي حطيت العدس الاسود معاهم بعد ماانسلق بس المحلات مبتعملش كده كله بيبقى لوحده ..

اثناء نضج الرز اسلق شويه مكرونه ( صغيرييييين ) مع شويه زيت صغيرين وشويه ملح وبعد ماتستوي المكرونه كويس نغسلها بماء بارد بعدين نقلبها مع معلقتين زيت من اياهم .. عن نفسي محطيتش زيت على المكرونه بعد ماسلقتها واكتفيت بالزيت الي انسلقت فيه ..

برضه مفيش مانع نحمر ملعقتين تلاته شعريه في شويه زيت لغايه ماتبقى ذهبية بعدين نضيف لها شويه مية ونتفه ملح ونسيبها تستوي كام دقيقة تنفع مع الكشري برضه ..

نلاحظ اننا نستخدم كميات صغيره من كل مكون لان في النهايه هتطلع لنا حلة كبييييييييرة والكشري عامه لو بات مينفعش يتاكل فنحط مثلا كباية رز على نصف كبايه عدس اسود على نصف كباية عدس اصفر على نصف او ربع كوب مكرونه وهكذا ..

المكرونه المستخدمه طبعا هي الصغيره اوي والمحلات عامه بتحط منها وبتحط كمان اسباجيتي مقطعه قطع صغيره ..

نيجي لغرف العدس بقى ..

سهله اكيد الكل عارفها زي بتوع المحلات ..

ناخذ شويه رز بعدس .. نخبط المغرفة في الحله .. نحط عليهم شويه عدس اصفر .. نخبط خبطتين تاني .. نجيب شويه مكرونه وعليهم شويه شعريه واخيرا التقلية على الوجه .. ومفيش مانع ابدا من اضافة بعض الحمص الكبير ( حمص شامي ) مسلوق على الوجه بس بصراحه نسيت الحمص بيتعمل ازاي فمحطيتوش . .

الطريقة دي جهنمية وزي كشري المحلات بالظبط .. جربوها وادعوا لي ..


كنت هنسى طبعا لازم جنب الكشري سلطه وصلصة .. الصلصة بقى سهله جدا .. نجيب شويه سمنه ونقدحهم على النار .. ملعقتين تلاته صلصه ويفضل طماطم مضروبه في الخلاط كويس احسن .. نسيبهم يغلوا شويه مع ملعقة ولا اثنين خل . شويه ملح وفلفل وشطه وتبقى الصلصه جاهزه وبالهنا والشفا .. وعلى فكرة احيانا بحط على صلصة الكشري كتشب وبيمشي الحال ..

تم التعديل بواسطة doha, 17 March 2009 - 12:10 AM.

..إذا دعتك قدرتك على ظلم الناس فتذكر قدرة الله عليك ..


#2 fatfouta

fatfouta

    Super Member

  • Members
  • PipPipPipPipPipPip
  • 8372 مشاركة
  • النوع:أنثى

شريط الأوسمة:

الأعضاء الحاصلين على أوسمة

تاريخ المشاركة 17 March 2009 - 01:25 AM

هجربها بكره واقولك عشان مكانش عندى فكرة اكل لبكره يعنى ماكنتش عارفة هعمل ايه :)

عارفة لو طلع وحش انتى حرة بقى

تسلم ايدك وشكراااااااااا

#3 سهل جدا

سهل جدا

    Advanced Member

  • Members
  • PipPipPipPipPip
  • 1430 مشاركة
  • النوع:ذكر
  • المكان:مصر - السعودية
  • الإهتمامات:القراءة - كتابة القصص القصيرة - الألعاب الذهنية

تاريخ المشاركة 17 March 2009 - 10:11 AM

قريت في موضوع حد بيسأل على طريقة كشري المحلات كنت هحطها رد بس قلت خليها موضوع مستقل افيد ..


أيوه , هو أنا اللي سألت عن طريقة عمل كشري المحلات


شكرا جدا على الموضوع

وهابعت نسخة منه حالا للمدام


بس هاغير عنوان الموضوع بصراحة وهاحطله عنوان روش شوية, وهاسميه:

الطرق اللولبية لعمل الكشري أبو تقلية


ومــَنْ أَحْســــَنُ مِــنَ اللـَّـــــــهِ حُـكْــــمًا لِقـــــَوْمٍ يُوقِـنــــــــــُونَ
صدق الله العظيم


#4 بندق أفندى

بندق أفندى

    Advanced Member

  • Members
  • PipPipPipPipPip
  • 1290 مشاركة
  • النوع:ذكر
  • المكان:الدمام

تاريخ المشاركة 17 March 2009 - 10:23 AM

طريقة عمل الصلصة والدقة حسب مطاعم أبو طارق من داخل المطعم فى برنامج عباسيات


طريقة عمل الصلصة:
تغسل الطماطم ثم تعصر ونصفى.
نضعها على النار مع قليل من الزيت لمدة ربع ساعة.
طريقة عمل الطشة:
يوضع بعض الثوم المفروم في القليل من الزيت على النار لمدة نصف ساعة.
تضاف الطشة على الصلصة ثم يضاف المزيج من البهارات (الكمون، كزبرة نشفة، جوزة الطيب، فلفل أبيض وورق اللورى)

طريقة عمل الدقة:
ثوم مهروس + كزبرة فى خل أبيض.


صورة

تم التعديل بواسطة بندق أفندى, 17 March 2009 - 10:35 AM.

حبيبتى كالشمس لا نظر ولا اقتراب ولا استغناء

فالكل موت محقق



أنا الذى نظر الأعمى إلى أدبى وأسمعت كلماتى من به صمم


#5 مغتربة

مغتربة

    Super Member

  • Members
  • PipPipPipPipPipPip
  • 4445 مشاركة
  • النوع:أنثى
  • المكان:مصريه

شريط الأوسمة:

الأعضاء الحاصلين على أوسمة

تاريخ المشاركة 17 March 2009 - 11:31 AM

يوضع بعض الثوم المفروم في القليل من الزيت على النار لمدة نصف ساعة.
معليش يا استاذ بندق بس الحته دى انا مش فهماها انت متاكد من الوقت المكتوب ده
يعنى نحمر التوم نص ساعه ازاى
و لا مش تحمير
معليش استحملنى اصل انا مستجده فى الكشرى بصراحه
صورة
ما اجمل الانوثه عندما تمتطى صهوه الحياه

#6 doha

doha

    Super Member

  • Members
  • PipPipPipPipPipPip
  • 3241 مشاركة
  • النوع:أنثى
  • المكان:مصر

تاريخ المشاركة 17 March 2009 - 12:35 PM

جربي وعلى ضمانتي باذن الله هيطلع مظبوط ...



شكرا جزيلا شيف بندق على الصلصه فعلا بنحط فيها ثوم نسيته تماما معليش .. بنحمر الثوم الاول على نار هادية بس مش تحمير يصفر بس لان لو تحمر اوي هيبقى مر . والنار هادية طبعا عشان نضمن ان الثوم كله استوى بنسب متساوية مفيش حاجه انحرقت وحاجه لسه نية .. وبرضه تحمير الثوم ده مهم لان في ناس الثوم بيتعبها في الاكل فلو استوى كويس باذن الله بيكون خفيف على البطن ..

بعد ماحمرنا الثوم بنحط الصلصة ونسيبه يغلي ومننساش الخل وطبعا بنترك الصلصة على نار متوسطه او هادية لغايه ماتتسبك وتثقل ..


بس طريقتك في اننا نعمل الصلصة الاول بعدين نطش عليها الثوم اعتقد هي الطريقة الاظبط خاصة ودي نفسها تقريبا طريقة الفته بالخل والثوم ..


يلله حد جرب يقولنا طلعت معاه ايه؟

..إذا دعتك قدرتك على ظلم الناس فتذكر قدرة الله عليك ..


#7 se_ Elsyed

se_ Elsyed

    Super Member

  • Members
  • PipPipPipPipPipPip
  • 25138 مشاركة
  • النوع:ذكر

شريط الأوسمة:

الأعضاء الحاصلين على أوسمة

تاريخ المشاركة 17 March 2009 - 04:11 PM

بعون الله عندي المدام في الكشري ده لا تقولي أبو طارق ولا أم سلحول ..

والله محترفة بجد ..

بس اللي مابحبوش في الكشري هو إني بأجوع بعد ما أكل بساعة بالظبط ... مش عارف ليه ؟
الأحـــرار يؤمنون بمن معه الحق ..
و العبيــد يؤمنون بمن معه القوة ..
فلا تعجب من دفاع الأحرار عن الضحية دائماً ..
و دفاع العبيد عن الجلاد دائماً

#8 Virus

Virus

    Advanced Member

  • Members
  • PipPipPipPipPip
  • 318 مشاركة
  • النوع:ذكر

تاريخ المشاركة 17 March 2009 - 05:25 PM

بس اللي مابحبوش في الكشري هو إني بأجوع بعد ما أكل بساعة بالظبط ... مش عارف ليه ؟


وأنا كمان يا أخي..الحمد لله أنا كنت فاكر إن عندي حالة طفاسة متقدمة :ph34r:

بس دي ميزة في الكشري ياراجل مش عيب أبدا..

وللتغلب على هذه المعضلة..الحاجة بتاعتنا(مامي :blink: ) بتعمل حلة كشري عملاقة مقاس 5*5 ..وتسيبها متغطية على البوتاجاز وجنبها الدقة...اللي يهضم يخش على المطبخ علطول يفول تاني (زي الري- فل بتاع المطاعم الأمريكاني كده)..م الآخر حفلة كشري معتبرة

طبعا غني عن الذكر إن كشري الحاجة -ربنا يديها الصحة- لا ينافس على الإطلاق..ولا أبو طارق ولا السيدة سينة سينة بذات نفسها :rolleyes:

أكتفي بهذا القدر..

#9 وردوفل

وردوفل

    new Member

  • Members
  • Pip
  • 14 مشاركة

تاريخ المشاركة 13 April 2009 - 07:33 AM

الحقيقة دى الطريقة الاسكندرانى ---وبنسمى العدس الاسود العدس ابو جبة -وممكن نعمله من غير العدس الاصفر -ويطلع طعمه رائع ايضا

#10 SOSOLOLO

SOSOLOLO

    new Member

  • MemberN
  • Pip
  • 1 مشاركة

تاريخ المشاركة 14 April 2009 - 04:51 AM

:roseop: انا مرررررررررررة عجبتنى الطريقه وهانفذها فورا وجزاكى الله خيرا

#11 doha

doha

    Super Member

  • Members
  • PipPipPipPipPipPip
  • 3241 مشاركة
  • النوع:أنثى
  • المكان:مصر

تاريخ المشاركة 14 April 2009 - 04:54 AM

:roseop: انا مرررررررررررة عجبتنى الطريقه وهانفذها فورا وجزاكى الله خيرا



طيب كويس ومنتظرة نتيجه التجربة على احر من الجمر ياريت تثري الموضوع بيها ..

..إذا دعتك قدرتك على ظلم الناس فتذكر قدرة الله عليك ..


#12 لونا

لونا

    Advanced Member

  • Members
  • PipPipPipPipPip
  • 1269 مشاركة
  • النوع:أنثى
  • المكان:أرض الله
  • الإهتمامات:القراءة

تاريخ المشاركة 14 April 2009 - 07:00 AM

بصي يا ضحى أنا كنت بأعمل الكشري المصري بطريقتك دي بالضبط و لكن باختلافين اتنين:

الأول : إني مش باضيف عدس أصفر , و متهيألي ممكن يخليه معجن

التاني : هو حركة إضافة زيت تحمير البصل للأرز و المكرونة و العدس و لما جربتها طلعت رائعة فعلا فرقت كتير في الطعم

تسلم ايدك :roseop:

ربنا آتنا في الدنيا حسنة .. و في الآخرة حسنة .. و قنا عذاب النار

.. يا رب ..
احفظ مصر و المصريين


#13 khiria

khiria

    new Member

  • MemberN
  • Pip
  • 1 مشاركة

تاريخ المشاركة 15 May 2009 - 02:29 PM

tank you

#14 الباشمهندس ياسر

الباشمهندس ياسر

    Super Member

  • Members
  • PipPipPipPipPipPip
  • 5420 مشاركة
  • النوع:ذكر

تاريخ المشاركة 27 August 2009 - 01:39 PM

شكرا ع الوصفة الجامده دى

تفاءلوا بالخير تجدوه
بعضا مني هنا .. فاحفظوه





0 عضو (أعضاء) يستعرضون هذا المنتدى

0 أعضاء, 0 زوار, 0 أعضاء متخفين


زار هذا الموضوع 9 عضو


    , لونا, bibliophile, جويرية, mfarag, mody ahmed, رونا, Om Zayd, tamerfarouk