[Tafshan]

تحية لواحد تانى و يا رب تروح له و ما تروحش لواحد تانى

الحقيقة اسكندرية كانت فسحتى المفضله رغم انى عمرى ما قعدت فيها اكثر من 3 ايام .. كانت احلى فسحي "تخاطيف" يعنى اروح يوم و ارجع ...

ايام الجامعه كنت احياناً تطلع في دماغى اشحن العربية على قد ما اقدر من الشله و هوب .. على اسكندرية .. و الحقيقة كانوا كلهم من زوى الاحجام الضخمه التى تأن تحتها اي عربية .. لكن انا كنت ولا بيهمنى ... نطير من جنب الجامعه على الكبري اللى جنبها - مش فاكر اسمه - و ننزل على كرداسه و نخرم شمال نبقى في الطريق الصحراوي و لا نتوقف الا عند ماستر في الطريق الصحراوى حيث النسكافيه المتين و نكمل الطريق الاسكندرية داعين الله ان لا يكون فيها "نوه" تفسد الرحلة السعيده .. و بما ان اليوم قصير فكنا نفضل الذهاب الى المعمورة و نركن السيارة و ننطلق على الاقدام .. نبدأ بايجار "عجل" حتى نتساقط من التعب و نتغذى عند بندق كشري او فطير او كبده كما يحلو لنا ثم نرتد سريعاً الى القاهرة و لا كأننا عملنا حاجه

[hopsan]

عم وليد صفوت صباح الفل
انا لم اتعمد العنف فى كلامى بقدر وصف حاله نعانيها فى كل موسم صيف و انت تعلم قبل غيرك ان المدينه لا تحتمل بشوارعها الضيقه من يعيش فيها اصلا و تعلم ايضا نحن نشرف بكل من يأتينا و لكن !!!.....و لكن لا اقارن الشريط الساحلى اى الأسكندريه بالقاهره من حيث المساحه التى يمكن الإمتداد فيها حيث يصعب و يصعب جدا الإمتداد للجنوب حيث نحن محصورون ما بين ترعه المحموديه و التى يصل العمق فيها احيانا ل 25 متر و يصعب الردم فيها لنتمكن من التوسع جنوبا و تعلم ايضا ان تلك الترعه هى المصدر الوحيد للشرب لدينا و لو مجازا ردمنا المحموديه فمن اين نشرب فكان الإمتداد لأقصى الشرق حيث ابتلعنا ابى قير و غيرنا من معالمها قهرا و قسرا و الإمتداد الأخر غربا حيث تم تعديل فى حدود الإسكندريه و اتلفنا شكل و موضوع العجمى و باتت رمالها التى كانت فى السابق مشهوره بالبياض الناصع رماديه من كثره التعامل عليها و نزحنا لما بعد ذلك بكثير و اصبحت العجمى مسكن عشوائى دائم الإذدحام و انتهت اسطوره التصييف فيها و من كان له فيلا هناك حولها لكتله خرسانيه عموديه و لا استثنى نفسى منهم فأنا فعلت نفس الشىء لا لشىء إلا لأنى وجدت نفسى محاصر بالعمارات و الفيلا اصبحت مقلب زباله ففعلت مثلهم ...لا اطيل عليكم فأنا من يتذكر جيدا الإسكندريه و ما كانت من قبل و اراها الأن فى حاله يرثى لها و ماذا بعد عشر سنوات ؟؟؟ اذا كان الإذدحام قد بلع الثلاث حارات المستحدثه فى شارع الجيش او شارع الكورنيش و ما تلى ذلك من رد فعل مثل ذبح الشاطىء الرملى الممتد من سيدى جابر و انتهاء بالسلسله فتلك مسافه ليست بالهينه و كانت المنفذ الوحيد و المجانى لسكان المنطقه و لم نتمكن من استحداث شاطىء رملى جديد حيث تكون فى تلك الحاله باهظه التكاليف ناهيك عما حدث فى مناطق سيدى بشر و ميامى حيث اكل البحر الرصيف وزحف للشارع و ذلك لسبب سوء فى التخطيط و تداركو الأمر بعدما ساءت الأمور و قامو بعمل مصدات للموج فى النهايه ...صدقونى انا لا انظر للموضوع بنظره سوداويه و لكنها الحقيقه و لا احد يلومنى اذا وجدت المنفس لشرح ما يجول بصدرى و لم ارد على ياسو إلا بإسلوبه حيث شممت التريقه فى كلامه و هو لا يدرى حقيقه الأمر و لم اجدك تعلق على كلامه وكل ما ذكر كان عن الفسح و المتع و لم يذكر احد ما تعانيه البلد من متاعب فى الصرف الصحى و قله ضغط الماء الحلو و اذدحام الشوارع و المخلفات و زياده فى الأسعار و ما الى ذلك من تبعيات الإقامه فكل هذا نحن الذين نعانى منه فقط

استاذنا shinercorner
انت وفيت و كفيت و تصلح مرشد حتى لأهل الإسكندريه و لكن اسمحلى تصحيح بسيط هو ان حوده جندل اسمه حوده جندر و مكانه فى الأزريطه بعد فندق الدلتا بشارعين او حارتين يمين و بعد كده يسار و تجده امامك و صحيح قعدته مش ولابد و لكن اسعاره مناسبه خصوصا فى العزايم حيث ( و ده سر لا افشيه لأحد ) ان لى اصدقاء من القاهره و عندما يأتونى معزومين فلابد و ان تكون اكله سمك.... فأستعين بهذا الحوده و تكون التكلفه بنصف السعر و هم يعتقدون انى صرفت ما املكه حتى ميراثى أو اذهب بهم ( شكلى كده حفشى كل اسرارى ) الى مطعم خطير لا يعلمه الكثيرون و هذا المطعم اسمه عروس البحر و يقبع بجوار المرسى ابو العباس و صحيح هو ليس على البحر مباشره مثل فش ماركت فى نادى الكشافه و لكن عندما تدخل المكان لا تشعر بإحتياجك للبحر حيث السقف مرسوم عليه و ايضا بالبارز اشكال بحريه خطير تغنيك عن البحر و ايضا عندما تنهمك فى تفصيص الكابوريا و تشرب الويسكى ( يقال عنها ماء سلطه الجنبرى او الكابوريا و هى قويه لمن لا يحتمل شربها و لكنها مطلوبه ) و الكم الهائل من السلطات والتى تشبعك قبل ان يأتيك الأكل و لا تنسى قول لف لى الباقى ...عدا ذلك انت اكثر من خطير
اخيرا اعذرونى عما بدر منى من تقل دم و لكن عندما كتبت ردى على سى السيد فضفضت بما يجيش به صدرى من حزن على مدينه لن تعود مره اخرى و انوه عن كارثه ستأتينا قريبا ولا حل لها مثل ما ذكرت سلفا و ربنا يكتر من المصايف الأخرى حتى نستطع ان نتنفس هنا
واحد تانى ...
لا استطيع إقفال رسالتى قبل ان انوه و ارشحك لتكون مخرج سياحى من الدرجه الأولى ..انا اتفسحت معاك حقيقى ولا املك تعليق على كلامك غير انك خطير
...و مرحبا و اهلا وسهلا بكم مره اخرى

[بنت شعنونة]

ممكن ادلو ب دلوي

لو ها تأجر شقة في اسكندرية ف عليك وعلى زوانق خالد ابن الوليد عشان ها تلاقي شقق مفروشة كويس وسعرها معقول
لو مريش يبقى المعمورة عشان الشقق هناك سعرها غالي شويتين بس فرشها بيكون شيك اوي
لو اوتيلات.. طبعا الفنادق الكبيرة معروفة
فيه فنادق سعر الليلة فيها للفرد بالافطار بيبقى 60 او 70 جنيه وهيا فنادق نضيفة " من ناحية النضافة" ولكن من ناحية الشياكة عادية.. زي فندق نوبل او فندق مكة او المدينة المنورة
فندق قاعود يعتبر وسط في سعره و شيك بالنسبة للي زيه.. وكل الفنادق دي مطله ع البحر..
نيجي للفسح
بالنسبة للبلاجات ماحدش يالني عشان انا بنزل بحر مطروح بس
بالنسبة للأكل..
لو الحالة المادية متوسطة عندك بلبع بتاع سيدي بشر او فرعه الجديد في داون تاون مدخل اسكندرية
عندك جرين بلازا دا في مدخل اسكندرية وملياااااااااااااااااان مطاعهم وكافيهات ومحلات اشكال والوان يعني دا لوحده فسحه وفيه الغالي وفيه الرخيص وهييييييييييييييص يا عم هيص
فيه عندك انا ميشو ع الترام بتاع فاطاير هايل وعندك كمشري بندق في سموحة كويس
وعندك شاورمة شامي في جرين بلازا بس بتاع سموحة الشيف عنده هاااااااايل لازم تجربها
وفيه عندك قرية عبد الوهاب في الراس السودة بيقولوا على اكلها حلو بس هيا ك مكان اوريجينال خالص
لو الحالة المادية مريشة وعاوز مكان ساااااااااااااااااحر عندك زفريون في ابوقير بتاع سمك يوناني بس كااااااااارثة في الأكل وفي السعر كمان يعني على نفرين اعمل حسابك في 100 جنيه مريح وتقوموا لسا جعانين كمان

بالنسبة للساحل الشمالي
قرية عايدة انضفهم عشان فيها شاليهات واوتيل و الفندق اشيك وبيقدملك عروض قوية كمان من اوبن بوفيه لغرفة شيك لحفلات يومية والعاب اطفال وبسين وبحر يعني كلللللللللللللل حاجا بسعر واحد و ممكن تفتح السايت دا يساعدك كتير
www.waffar.com
بالنسبة للتمشية قلعة قايتباي بقت شييييييييييك جدا دلوقتي ترمس ودرة وطيارات و دكك للقعدة وشاي وبتاع فيما عدا الشحاتين فهي تحففففة ومنورة وجميلة
بالنسبة للفسح بقى عندك قرية الأسد على بعد يجي 30 ك من اسكندرية تنفع للعيلة وجمييييييييييييلة
عبارة عن جنينة حيوانات ع الطراز الفلاحي يعني اقفاص وحيوانات وسيرك جوا بيضحك بجد انا دخلته لأخويا بس انا انبسطت اوي كمان وفطير مشلتت ومش وبتاع وفيه كمان كباب وكفته ولحم نعام يعني تروح من الضهر لحد ما الدنيا تضلم و الكل مبسوط من كبير لصغير بس ابعد عن اخر الأسبوع عشان الرحلات والزحمة
فيه عندك افريكانو بعدها بشوية دي زي جنينة حيوانات مفتوحة يعني الحيوانات برا القفص وبياخدوك في عربية مصفحة باين عشان الأسد ياكلك براحته اللي راحوها قالوا تجربة جديدة لكن انا خفت " التذكرة بالغدا هناك"

لو افتكرت كمان ها اقولكم...

[wagdi]

shinercorner, on May 26 2006, 06:35 PM, said:

اما بقى لو حضرتك فييص و تحب البعزقه فمحلات السمك ممتازه و اذكر منها على سبيل المثال لا الحصر ابو اشرف و جزيره الملكه و سمكمك ف بحرى و زفير ف المكس و زفيريون ف ابو قير
و بالمناسبه بلبع فى ميامى بيعمل سمك ممتاز رغم انه اساسا تخصص لحوم
و يوجد مطعم شعبى اسمه حوده جندل تقريبا ف كامب شيزار ممكن تاكل فيه اكله جمبرى سريعه بسعر مناسب جدا و ان كانت قعدته مش ولابد لانه تقريبا ف الشارع

معلش أن حاقول حاجة صغيرة أوي بس حزقاني... لأني بتغاظ أوي لما المصاروة ينزلوا أسكندرية ويروحوا أبو اشرف ولا جزيرة الملكة ولا زفريون ويقعدوا يسبحوا بحمد السمك هناك...
إلى عايز ياكل سمك صح أوي يروح شارع الطباخين في بحري يسأل على فرج... و يبقى جيبه دفيان أوي لأنه يعتبر أغلى محل سمك في مصر...يعني لو اتنين أكيلة ممكن تصرفولكوا تلتميت ربعميت جنيه مستريح.... بس مش حاتحتاج تاكل سمك تاني بقيت السنة.....
ولما تاكل عنده مرة حتقرف "بمعنى الكلمة" تبص في سمك المحلات التانية...

ملحوظة..."لو حد راح ياريت يقوللي علشان أحصل نسبتي "

[واحد تاني]

س س ... يا س س ... اصحى يا استاذ انت جاي تصيف والا جاي تنام؟
ياللا قوم عشان هنروح البحر ...الميه النهارده ايه بقى... مئولكش ... حصيرة

صحصح كده على ما نعمل القهوة
وشوف الصور بتاعت امبارح اهه طلعتها...

دوس هنا:

شوف العيال اللى كانت بتصطاد
والجدع ابو صوابع بتاع الشبك
يا عينى عليك فى الحزين
سعد زغلول هناااك اهه
والمكتبة

عيش ... وانا راجع لك ...
جهز نفسك والبس (البنيش) ده هنطلعوا النهاردة العجمي...

[yasovinas]

صديقي الغالي س س ضيفنا اللي منورنا دايما
معلش يا صاحبي بصراحه بعد مشوار الغالي واحد تاني ما فيش مشوار ولا خرايط الراجل لف بيك لفه جميله وحسسني اني مصيف بجد او دخيل على اسكندرية كما قال اخونا اللي انا دايس على رجله
شوف يا طيب انا هقول لك بقى على الاماكن اللي تعتبر جديده في اسكندرية ومش معروفه قوي
عندك طبعا للفسح بعد العصاري في الداون تاون اللي على اول الصحراوي قبل كوبري محرم بيك ومقابله في كارفور
ايضا للسهر اللذيذ والعشاء الرائع مكان مش هتلاقي مثله في بر مصر المحروسه هو "الجنجل" ودا يا سيدي خلف الداون تاون يعني بدل ما تطلع على كوبري محرم بيك للدخول الى لاسكندرية تحود يمين كانك طالع على طريق مطار النزهه وبعدين تدخل يمين تاني من خلف الملاهي هذا الشارع يسمى سكاديا في وسطه سوف تجد الجنجل مطعم رائع
ايضا في الشاطبي على البحر مطعم سمك جديد نوفي فتح الصيف الماضي بس بصراحه غطى على كل المحلات المعروفه والمشهورة اسمه "رقوده" اسعارة مش غاليه قوي بس اكلة ررررهيب

كمان في محطة لوران بين شارع ابو قير وشارع الترام سوف تجد مطعم سي عمر ودا كمان حاجه راقيه جداً بس ما ينفعش تروحه مع الاطفال يعني دا عايز عشوة رومانسية انت والمدام وبس

طبعا لا يفوتك زيارة لحدائق انطونيادس ولا ملاهي المعمورة لكنها تعتبر لا شيء بجوار ملاهي القاهرة الكثيرة
نصيحه لا تذهب الى التكا جريل لتناول الغذاء فلقد اصبح من اسؤ المطاعم في اسكندرية سواء الخدمه او النوعية للاسف
شي جابي يا س س تجربة ممتعه جدا انصحك بالذهاب اليه وهو في محطة الرمل متفرع من السلطان حسين او شارع فؤاد اسال والف من يدلك عليه

[nancy]

ياسر المنطقة دى اسمها اكاسيا مش سكاديا
لانها متخد اسمها من اسم شجرة هناك اسمها اكاسيا
والخط دة اولة الملاهى وبعدين قاعة افراح وبعدين نادى اكاسيا والكانترى كليب وبعدين الجانجيل وبعدية اللاجون وبعدية الداون تاون
دة خط كامل بعد ما تنزل من الكبرى وتدخل يمين
كلة على اليمين والشمال ترعة صغيرة
على فكرة الجانجل ممنوع دخول اطفال فية وحلو اوى بالليل اكتر من النهار
وشى جابى تخلى سنيما امير على شمالك وتمشى كانك رايح على المنشية لحد ما توصل عند مسرح سيد درويش
تدخل الشارع الى بعدة يمين هو يبان شارع صغير مفهوش حاجة بس فى نصة على شمالك حتلاقى شى جابى
شفت واصفة ساهلة ازاى

[hopsan]

إقتباس

صديقي الغالي س س ضيفنا اللي منورنا دايما
معلش يا صاحبي بصراحه بعد مشوار الغالي واحد تاني ما فيش مشوار ولا خرايط الراجل لف بيك لفه جميله وحسسني اني مصيف بجد او دخيل على اسكندرية كما قال اخونا اللي انا دايس على رجله
شوف يا طيب انا هقول لك بقى على الاماكن اللي تعتبر جديده في اسكندرية ومش معروفه قوي



ايه يا عم ياسو دا انت واخد الموضوع صد و رد ...طيب براحه علينا شويه.مكنتش عارف ان النضاره بتاعتك محتاجه تتغير ..دى قزاز مصنفر من ايام الخواجه استافرو اللى كان فاتح فى شارع تانيس قبل ما ياخد ديله فى سنانه وخلع ايام التطهير .المسامح كريم و انا مسامح....شيل رجلك بقى وحنغيرلك النضاره
المهم كنت ناوى اصلحلك معلومه بس نانسى سبقت ...معلهش

و خد بالك انت اللى فتحت السكه دى

[se_ Elsyed]

Quote

بس ما ينفعش تروحه مع الاطفال

أطفال مين يابا ولا أعرفهم

على فكره أخوك سين سين قلبه ميت

فبإذن اله هأنا مقرر إني أرمي العيال الصُغيرين عند حماتي - خليها بقى تشيل المسئولية شويه - ونطلع طلعه أنا والمودام لوحدينا ... بس مش عارف على فين لحد دلوقت إسكندرية ولا ما أسكندريتاشي ربنا يسهل حسب الطقس ...

بس كان طلبي للخريطة الجنهمية لمدينة الإسكندرية مش عشاني بالتحديد ولكن عشان تكون مرجع للمصيفين والمصيفات الأحياء منهم والأموات وكده يعني

بس تسلم إيديكو يا ولاد ...

صحيح إسكندرية ما جابتش غير رجاله .. ونانسي عشان ما تزعلش

يالله بقى كملوا أصل الموضوع ده لما بأقرأه باعمل دماغ عاليه قوي ... وبيحسسني إني كنت بأروح أصيف فوق السطوح مش في إسكندرية ..


أما أنت يا دوق وجدي .. فهاسيبك للزمن

Quote

يعني لو اتنين أكيلة ممكن تصرفولكوا تلتميت ربعميت جنيه مستريح

بقى يا راجل إحنا عمالين نتكلم عن الأروطة .. وأربطوا الحزام .. ودعوة إلى التقشف والكلام ده وإنت تقولي إتنين يأكلوا بربعميت جنيه ؟ ... ليه هانكلوا حوت ؟ ولا هانشارك في محل السمك ؟

وبعدين إحتمال نتجمع أنا و إخواتي اللي جايين من بره ا على نسيبي اللي نازلين سوا في نفس الوقت ونهب هبه على إسكندرية بدعوة على شرف تعلوب اللي هو سين سين ...يبقى بالصلاتو عالحبيب لو عزمت الجرمأ ده كله أقوم مصفي أعمالي هنا .. وأبيع دهب مراتي .. وأرهن البيت عشان اكلة سمك عند سي فرج ؟

إستهدى بالله يا دوق ودعبس عندك كده على أكلة دنيس ولا قراميط من أم 20 ج ونحبس بكوبايتين شاي فتله وخلي الليلة تعدي ..

[واحد تاني]

العزيز "hopsan"
ايه رأيك لو نحافظ على روح الود والألفة بينا ...
من غير ما حد يفتح سكك ولا يردم ترع؟
الحياة ابسط من كده....

وتصحيحا للتصحيح اللى حضرتك كنت جاي تصححة فاذا كان سينما امير على شمالك وهتمشى كانك رايح على المنشية لحد ما توصل عند مسرح سيد درويش وبعدين تدخل الشارع الى بعدة يمين هتلاقيه شارع على اوله صالون شاي عتيق وبعد منه استورجى قدامه كافيه صغير قفل من زمان والشارع ده سد تطلع منه شمال على شارع النبي دانيال وللاسف مش هيكون شى جابي موجود طبعا ....
شى جابي ندخل له يمين قبل سينما رينسانس (رويال سابقا) اللى هي قبل مسرح سيد درويش.

يا رب تتقبل كلامي ده بصدر رحب

تم تعديل هذه المشاركة بواسطةواحد تاني: 28 May 2006 - 07:10 PM

[yasovinas]

ماشي يا عم رمضان ؛؛؛؛
بشويش بس ما تزعلش مني
مش انت مسامح
وقلت ان المسامح كريم
وكلنا عارفين ان رمضان كريم
خلاص تبقى انت رمضان
شوف يا طيب انا مش بزعل ولا عمري بحب ازعل حد مني < معلش بقى اسكندراني قديم > فحقك علية لو كنت زعلتك دي اولاً
ثانيا المعلومه اللي كنت داخل تصححها وصححتها بنت عمي نانسي "اللي مش عجرم طبعاً" صح الشارع اسمه اكاسيا بس معلوماتي انة على اسم نادي في وسط الشارع بجوار الجانجل واسمه اكاسيا بس حكاية الشجرة دي جديده عليه
المعلومه التانية ان الجانجل ممنوع فيه الاطفال!! فدي اظن انها مش صح لان عمر ابني (سنتين ونصف ) زبون مستديم هناك بيروحه معايا كل ما بنزل اجازة يعني 4 مرات في السنه على الاقل والعام الماضي عملنا عيد ميلاده فيه كمان الداون تاون في ظهر الشريط اللي نانسي قالت عليه هو والملاهي
سيبكم بقى من الكلام دا؛؛؛؛ ايه رايكم ي رحلة الى "الاكوا سيتي" اللي على الطريق الصحراوي قبل دخلة الكنج بشوية!!! بصراحه اللي يروح اسكندريه وما يروحش "الاكوا سيتي "اللي هي تبع "تافرنا" يبقى خسر فسحه جميله ،، والقريه رائعه وكلها العاب مائية ممتعه جدا للكبار والصغار وكمان فيها ركن هادي بيعملوا فيه فطير مشلتت ما حصلش وكمالن فيها مطعم للغداء واسعارة معقوله واسعار الدخول اما بالغداء او من غير غداء بس بصراحه مش فاكر الاسعار كانت كام

[hopsan]

و ماله ياسى ياسو رمضان رمضان ..هو حد طايل
ربنا يبارك لنا فى رمضان و ايام رمضان
و على قوله رمضان و السيره اللى فتحها علينا عمنا ياسو قبل ما يغير النضاره
و العنوان كبيييييييييييييييييييييييييييييير
الإسكندريه و ايام رمضان فيها
معلهش يا سى السيد انت اخدت كفايتك من التصييف و اناريك لسه بتفكر تصيف فيها و لا لأ
يعنى تعبنا المخ و المخيخ و سموك لسه مش عارف تصيف فى الإسكندريه ولا لأ ....مششششكرين يا عم ..
حد يللى مهاجرين بره فاكر رمضان اسكندريه ؟؟؟ يارتها ايام تعود

[wagdi]

بتدعي عليا يا سين سين؟؟

طب مانتا مافهمنتنيش إنك عازم قبيلة... لا يبقى أحسن حاجة في حالتك تصحي بدري قبل الفجر.. تطلع على حلقة السمك تصلي هناك الفجر وتخش الحلقة بعد الصلاة تعيش حياتك... وماتسمعش إلى يقولك كل ما تلف والوقت يعدي كل ما الأسعار بتنزل... هو صح بس برضه جودة السمك إلى بتشتريه بتنزل... ولو إنتوا قبيلة فعلاً أحسن حاجة تشوفلك سبوبة تشتريها وتخلص نفسك... لو فيه ناس طبيخة معاك ممكن تعملوها في البيت أو أحسن تروحوا محل سمك يطبخهالكوا... (على ما أذكر في واحد جنب الحلقة إسمة إيلا كان بيطبخ مش عارف لسة ولا بطل)...

[se_ Elsyed]

wagdi, on May 28 2006, 08:22 PM, said:

بتدعي عليا يا سين سين؟؟

طب مانتا مافهمنتنيش إنك عازم قبيلة... لا يبقى أحسن حاجة في حالتك تصحي بدري قبل الفجر.. تطلع على حلقة السمك تصلي هناك الفجر وتخش الحلقة بعد الصلاة تعيش حياتك... وماتسمعش إلى يقولك كل ما تلف والوقت يعدي كل ما الأسعار بتنزل... هو صح بس برضه جودة السمك إلى بتشتريه بتنزل... ولو إنتوا قبيلة فعلاً أحسن حاجة تشوفلك سبوبة تشتريها وتخلص نفسك... لو فيه ناس طبيخة معاك ممكن تعملوها في البيت أو أحسن تروحوا محل سمك يطبخهالكوا... (على ما أذكر في واحد جنب الحلقة إسمة إيلا كان بيطبخ مش عارف لسة ولا بطل)...

أيوه يا عبدالسميع .. إنت بتنده على وجدي

حالاً هابعتهولك دلوقت

بقى يا راجل أقولك رايح أصيف وأعمل دماغ وأبلبط بعد عدة شهور من الشقا والغُلب في بلاد الله لخلق الله تقوم تقولي إصحى بعد الفجر وخد القُفه وروح الحلقة وإشتري سمك وأقعد 7 أيام تنضف وتشوي وتقلي ؟

إنت ماعندكش وسط ؟

يعني يا أدفع ألاف الدراهم في أكلة سمك

يا أتبهدل وأتزفر ويطلع عيني ؟

ماشي ياوجدي

على قدر سعادتي بك وبأفكارك الإفتكاسية في موضوع البرفانات والحاجات دي واللي خلتين أقول إني إكتشفت عالم من علماء الطبيعة ... إلا إنك في السمك ماطلعتش مُحترف ..

خليك بقى في لخمة الراس وإنت تعيش

العزيز هوبا سان

إسكندرية في القلب يا مان .. ومهم روحت ودلدلت رجلي على شواطي الريفيرا أو جُزر الكناري عُمري ما بنسى الفريسكا ولا الكلو كلو ولا البكلويز ولا خالد بن الوليد


عايز تسقيف حاد

[yasovinas]

hopsan, on May 28 2006, 10:22 AM, said:

حد يللى مهاجرين بره فاكر رمضان اسكندريه ؟؟؟ يارتها ايام تعود

رمضان زمان في اسكندرية ايام الصيف كنا بنصلي الفجر ونطلع على البحر ي كليوباترا قدام فندق نوبل نلعب كورة لغية الشمس ما تطلع وبعدبن ننزل البحر في الحوض الكبير تحت كازينو كليوباترا ونرجع البيت على الظهر ننام لغاية قبل المغرب بشوية وبعد الفطار وبعد الفوازير نصلي التراويح في جامع سيدي جابر او جامع سليمان محمودوبعدها نلعب برضه كورة في الدورة الرمضانيه وبعد الكورة اللي كانت في الغالب بتنتهي بخناقة كل يوم على السحور
وفي الايام اللي ما فيهاش كورة بعد التراويح كان لازم نروح ابو العباس او نتفسح في الكيدان وسوق المنشية واحيانا القلعه
ايام رائعه الشوارع في رمضان تمشي فيها وكانها متغطيه من كثرة الزينة وعلى كل امة شارع تلاقي فانوس وكل حاره او شارع يتفنن شبابها في عمل فانوس بشكل جديد وتصميم مختلف عن العام اللي قبله
والفانوس كان بيتعمل فوق سطوح احد البيوت وكان من الاسرار العسكرية الهامه ان لا يراه احد من اهل الشارع او من عيال الحارات المجاورة وهذا كان يتطلب ان تكون الورشه في سطوح اعلى بيت في الشارع

ايااااام