اذهب إلى المحتوى
محاورات المصريين

الى أصحاب الذوق الرفيع .. برفان رجالى نضيف


ابو صلاح

Recommended Posts

عايز استشارة مستعجلة من أصحاب الذوق الرفيع .. عن نوع برفان نضيف وما حدش يقولى ركب .. علاشان انا بقرف من نفسى جداً لما بعمل الحركات القرعة دى D : عايزه أصلى ومش عايز اسبيريه لأ برفان

طبعاً لأنه برفان يعنى مش هينفع يتوصف .. بس هحاول أوصف على خفيف

بس انا زوقى اللى بحبه فى البرفان ..

- انه يكون وسط فى رحته .. لاهو رحته تقيله تخنق .. ولا خفيفه ترمى على حريمى .. D:

- يثبت لمدة طويلة

- أن أمكن أزازته شيك ..

- الأوبشن ده مش عايز حد يتريق عليه .. سعرة يكون فى المتوسط 100 جنيه يزيد 30 يقل 30 جنيه يا ريت D:

بس ده ما يمنعش انك تقولى على نوع نضيف غالى اهو من باب العلم بالشئ .. حاكم انا ماليش فى مواضيع البرفانات دى

اللهم أتنى فى الدنيا حسنة وفى الأخرة حسنة ، وقنى عذاب النار

ma.salah ( محمود صلاح )

رابط هذا التعليق
شارك

نسيت تقول عايزه للصيف ولا للشتا... :D

بتتكلم جد يا وجدى ... فى برفان شتوى وبرفان صيفى :D ..

بما اننا داخلين على شتا .. قول على برفانات الشتا

وده لازم ابقا لابس تقيل قبل ما أحطه ولا ايه :wub:

وياريت تدينى برفانات تمشى على الوشين ( صيف وشتا ) اصل الحاجات دى الواحد بيجبها وتعد معاه عقدين من الزمان .. مش من كبرها .. لأ من كتر الأقتصاد وأنت بتتعامل مع هذه البرفانات الغالية .. وعلى حسب الخروجات الشيك اللى بيروحها ;)

اللهم أتنى فى الدنيا حسنة وفى الأخرة حسنة ، وقنى عذاب النار

ma.salah ( محمود صلاح )

رابط هذا التعليق
شارك

السلام عليكم ورحمة الله ........

شوف ياابو صلاح ...مش معنى ان الزجاجة اسبراى بتترش يعنى زى مابتقول انها ماتكونش برفان ...لان فيه ماء تواليت وفيه برفان واللى بيكون تركيزه اعلى ...اما عن انواع البرفان الرجالى فهى كتير جدا ....ممكن اكتب لك قائمة طويلة عريضة تتوه معاها ....بس اللى عايزة اقوله ان مش كل برفان بيمشى مع اى حد ..يعنى ممكن نوع معين من البرفان تشمه على صديق لك تلاقيه يجنن ...تيجى تجربه عليك تكون ريحته متغيرة ...

انت تنزل على اى محل للبرفانات وتشم بنفسك وتجرب ...عندك مثلا ..لو انت عايش فى مصر يعنى ..عندك محلات مزايا ...موجودة فى سيتى سنتر وفى روكسى ....عندك كمان محلات وجوه ...منها فى المهندسين ومنها فى سيتى ستارز ...

وغيرها كتير من محلات البرفانات الراقية ..ادخل بقلب جامد ...وافتج زجاجات التيستر ورش منها ولا يهمك ...واعمل نفسك مش واخد بالك لو لاقيت البياع بيرمقك بنظرة غيظ ...هى زجاجات التجربة دى معمولة علشان كده .....

ولو عايز اسماء برفانات غالية ..قول وانت حتلاقى كل الزملاءكتبوا لك قوائم طويلة عريضة ....وبعدين ايه الحكاية انت ماحدش بيهاديك بالبرفانات دى ولا ايه :D :D

{ لَّقَدْ كُنتَ فِي غَفْلَةٍ مِّنْ هَـٰذَا فَكَشَفْنَا عَنكَ غِطَآءَكَ فَبَصَرُكَ ٱلْيَوْمَ حَدِيدٌ }

رابط هذا التعليق
شارك

Allure من chanel

رووووووعة ...

بس بيتهيألي هتلاقيه غالي حبتين ...

وعلى فكره هو برفان سهرات .. بس مش مشكلة تستعمله صباحي ..

ALLURE_chanel_pM.jpg

وعلى فكرة يا أبو صلاح .. البرفانات الحريمي أحلى :D ..

ورجاله كتير يستعملوها ( وش وحده كل ما تخش اوضتها تلاقي اخوها بيحط من برفاناتها )

وكمان فيه برفان اسمه: "Fahrenheit" من Dior أه صحيح هو قديم .. بس جميل !!

1147.jpg

وكمان فيه برفان "hugo" جميل جدا .. بس خلي بالك الحريمي أحلى ..

دي صورة الحريمي

hugo-w_b.jpg

وده الرجالي .. ..

225.jpg

وده deep red

hugodeepred.jpg

وفيه كمان hugo boss ده برضه ريحته جميلة ( برفان بابا :wub: )

23236341_2690.jpg

كل دول بتستخدم اساسا برفانات سهرات .. بس عادي تستخدم صباحي ومسائي .. ولو انت عاوز برفانات صباحية بتبقى ريحتها فواكه والا فانيلا والا حاجات كده .. روح لمحل مش عارفه اذا كان موجود في مصر والا لا .. بس هو عالمي .. اسمه "the body shop" هتلاقي فيه روائح جميلة .. واحلاها white musk ده ريحته جناااان ...

ياريت اكون افتدتك ..

وزي ماقالت فلانة روح لـ faces ده جميل جدا .. هتلاقي فيه كل اللي انت عاوزه ..

بس على فكرة يا ابو صلاح انت حرقتلي موضوعي اللي كنت محضراه عن البرفانات ..

بس برفانات حريمي بس :D

تم تعديل بواسطة مصرية الهوى

جيجي ...

سعودية الجنسية ... مصرية الهوى ...

رابط هذا التعليق
شارك

الأخ ابو صلاح...

هو فيه شتوي وصيفي... يعني مثلاً البرفانات الصيفي بتيقى خفيفة بتخش فيها روائح الفواكه والفانيليا والشتوي بيبقى داخل فيها خشب الصندل والقرفة والجلد مثلاً يعني...فلو حطيت البارفان الشتوي في أغسطس الصبح وجسمك سخن شوية وابتديت تعرق حتلاقي ريحتك قلبت على تقلية :D ..

يعني مثلاً "Fahrenheit" إلى أشارت إليه الأخت مصرية الهوى شتوي بحت...وعلشان كده في منه نوع صيفي إسمه "Fahrenheit Summer"ريحته جايبه على يوسفندي شوية...

هو زي ما الأخت فولانة قالتلك إنت أحسن حاجة تروح بنفسك وتختار ...ولو عايز الصح أوي المفروض تشوف إنت حتحطه لمين وتاخد رأيه...يعني لو متجوز أو خاطب خدها معاك وخد رأيها لأن عامة هما الي بيشموا وهما إلى رأيهم يهم... وإذا رضت أنوفهم رضت قلوبهم ... :D

فكأننا والماء من حولنا... قوم جلوس وحولهم ماء...

رابط هذا التعليق
شارك

الى الأخت فلانة

مش معنى ان الزجاجة اسبراى بتترش يعنى زى مابتقول انها ماتكونش برفان

انا قصدى على الأسبراى .. اللى هو بيبقا فى أزازه صفيح وتقريباً مكوناته ما بتبقاش كلها سوائل بيبقا فى غازات .. على ما أعتقد .. انا جربت الحاجات دى لفترة بس ما بميلهاش دلوقتى

ادخل بقلب جامد ...وافتج زجاجات التيستر ورش منها ولا يهمك ...واعمل نفسك مش واخد بالك لو لاقيت البياع بيرمقك بنظرة غيظ ...هى زجاجات التجربة دى معمولة علشان كده .....

أنا فعلاً ناوى أعمل كدة .. وعلى حكاية القلب الجامد .. فأنا فى الحاجات المجانيه بتلاقينى لابد وما يهمنيش :D

بس اللى انا عايزه ابقا رايح وعاندى خلفية عن البرفانات وكدة .. احسن نا أروح وأنا ابيض ومش فاهم حاجه :D

ولو عايز اسماء برفانات غالية ..قول وانت حتلاقى كل الزملاءكتبوا لك قوائم طويلة عريضة

ياريت حاكم أخوكى ابو صلاح ابيض خالص فى الموضوع ده

وبعدين ايه الحكاية انت ماحدش بيهاديك بالبرفانات دى ولا ايه

أما عن موضوع الهداية .. ياريت تقفلى الموضوع ده علاشان انا دمعتى قريبه وبتصعب عليا نفسى أوى .. أخر هديه جاتلى حوالى من 16 سنة .. وكانت بمناسبة شيل اللوز :wub:

ومن ساعتها وأنا باخد حقى ناشف ( فلوس ) كده أضمن

بس اللى بيجيلو هدايا ابويا وبتجيلو بارفانات .. بس العبد لله بيخلصهالو أول بأول .. بس انا حبيت استقل بنفى ويبقالى العطر الخاص بعد اخر نظرة لأبويا بعد ما أكتشف أنى حطيت من البرفان الجديد بتاعه ;)

ومن ساعتها وانا كرامتى بتنقح عليا وعايز استقل ببرفاناتى :D

اللهم أتنى فى الدنيا حسنة وفى الأخرة حسنة ، وقنى عذاب النار

ma.salah ( محمود صلاح )

رابط هذا التعليق
شارك

وعلى فكرة يا أبو صلاح .. البرفانات الحريمي أحلى  ..

بقا ترضهالى برضو يا جيجى :D

ساعتها بقا هطلب للمرة التانيه اغير اسمى من الأستاذ عادل بس المرادى ها خليه ( أم صلاح )

بس تشكرى يا جيجى عل أنواع البرفانات اللى ادتهانى بالأسم والصور كمان .. بس دى حلوة ولا مضروبه ؟

أما عن موضوع حرق موضوعيك .. فتقدرى تقولى سبق صحفى .. أول تبادل خواطر :D

اللهم أتنى فى الدنيا حسنة وفى الأخرة حسنة ، وقنى عذاب النار

ma.salah ( محمود صلاح )

رابط هذا التعليق
شارك

الأخ ابو صلاح...

هو فيه شتوي وصيفي... يعني مثلاً البرفانات الصيفي بتيقى خفيفة بتخش فيها روائح الفواكه والفانيليا والشتوي بيبقى داخل فيها خشب الصندل والقرفة والجلد مثلاً يعني...فلو حطيت البارفان الشتوي في أغسطس الصبح وجسمك سخن شوية وابتديت تعرق حتلاقي ريحتك قلبت على تقلية  :D ..

يعني مثلاً "Fahrenheit" إلى أشارت إليه الأخت مصرية الهوى شتوي بحت...وعلشان كده في منه نوع صيفي إسمه "Fahrenheit Summer"ريحته جايبه على يوسفندي شوية...

هو زي ما الأخت فولانة قالتلك إنت أحسن حاجة تروح بنفسك وتختار ...ولو عايز الصح أوي المفروض تشوف إنت حتحطه لمين وتاخد رأيه...يعني لو متجوز أو خاطب خدها معاك وخد رأيها لأن عامة هما الي بيشموا وهما إلى رأيهم يهم... وإذا رضت أنوفهم رضت قلوبهم ...    :D

شكراً يا استاذ وجدى على المعلومات اللى انت ضفتهالى ... انا أول مرة أعرف ان فى برفان صيفى وبرفان شتوى .. وكمان جيجى عقدتلى الموضوع اكتر وقالت ان فى برفا صباحى وبرفان مسائى أو برفا سهرة .. واضح ان الموضوع مش سهل ومعقد :wub:

بس واضح يا أستاذ وجدى انك خبرة فى موضوع البرفانات .. فياريت تدنى كل خبرتك فى الموضوع ده .. وهبقا ادعيلك كل ما أحط برفا ;)

أما عن موضوع الخطوبة والجواز .. فده لسا ما حصلش .. فهعتمد على جهودى الذاتيه فى هذا الموضوع بدون ما حد يتحكم فيا ويقولى حط من ده وما تحطش من ده :D

اللهم أتنى فى الدنيا حسنة وفى الأخرة حسنة ، وقنى عذاب النار

ma.salah ( محمود صلاح )

رابط هذا التعليق
شارك

جرى ايه يا ام صلاح ياختشي ؟؟

والله مكنش عشمي فيكي كده ...

بقى انا هأقولك حاجات مضروبه ..

انتشي عارفة يختشي ان كل الحاجات اللي قولتلك عليها .. انا شماها بنفسي

والا ايه :D

بقولك ايه يا ستشي رووحي الحقي الغدا احسن يشيط وجوزك يبهدلك :D

وبطلي تسرقي الافكار من اوضتشي .. آآآآ .. أقصد من دماغي ..

-----------------------------------

ايه يا وجدي انا اول مرة اعرف ان فيه صيفي وشتوي ؟

اللي بعرفه صباحي ومسائي ..

يلا معلومه جديده

تشكر يا باشا ..

تم تعديل بواسطة مصرية الهوى

جيجي ...

سعودية الجنسية ... مصرية الهوى ...

رابط هذا التعليق
شارك

عزيزى ابو صلاح

مشكله البارفان اساسا انها اذواق

بمعنى ان فيه ناس بتعشق بارفان معين اللى هوه ناس تانيه مابتطيقش تشمه

و عموما نصيحه اخويه

حط البارفان اللى تفضله مراتم او خطيبتك لانها هى المستهدف الاول بهذا البارفان

و بالمناسبه اطرف اخبار البارفان اللى قريتها مؤخرا ان فيه زوجه طلبت الخلع من جوزها لاصراره على وضع بارفان معين ذو رائحه نفاذه و بالفعل خلعته عندما اصر على موقفه

فانا باقول انك تاخد راى ام صلاح تفاديا لاى مشاكل عوائليه و ساعتها لا جيجى ولا باقى اعضاء المنتدى هينفعوك يا حلو

--

على فكره انا عموما باعشق بارفان اسمه دانهيل ديزاير

ريحته جميله و هاديه و ثابته

و العبوه بتاعته فى منتهى الشياكه

سعره حوالى 180 جنيه

ليس شرطا للموت ان يكفن الميت

ولا ان ينشر له نعيا

او ان يضعوا شاهدا على قبره

انت تموت عندما تصمت بينما كان ينبغى عليك ان تتكلم

"shinercorner"

رابط هذا التعليق
شارك

شوف يابو صلاح...

واضح إنك عايز تفهم اللعبة من اساسها...مش مجرد اسم بارفان وخلاص...

بص...

الريحة في أي بارفان محترم في الدنيا بتبقى متقسمة على 3 نوتات... زي المزيكا كده...

نوتة عليا، ونوتة وسطى (وبيسموها النوتة القلب)، ونوتة الأساس...

والنوتة العليا دي هي إلى بتشمها أول حاجة... يعني أول ما ترش البارفان على إيدك تشمها على طول.. وعادة بتبقى خفيفة وسريعة التطاير ومابتقعدش أكتر من 20 دقيقة...

النوتة الوسطى أو القلب عادة مابتشمهاش قبل 10 دقائق وممكن توصل ل20 دقيقة...ودي إلى بتحدد مسار العطر ده رايح فين ومن أي عائلة هو (وحاقولك على العائلات كمان شوية)...

النوتة الأساسية ودي بقى أهم واحدة لأنها مابتظهرش قبل نص ساعة وهي إلى بتفضل... وبتيقى فيها خاصية الثبات وبتقلل من معدل تطاير النوتات إلى قبلها... (ودي إلى بيقول عليها إبن العرب "العبق")

والنوتة العليا وإن كانت هي أول حاجة بتشمها لما تحط البارفان فعادة عقبال ما تنزل والناس "تشمك" بتبقى راحت والي فاضل القلب والاساس... وعلشان كده لما الفاضلة فولانة قالتلك في ريحة على واحد تبقى حلوة والتاني تبقى وحشة... ده السبب...إن القلب والاساس معدل تطايرهم بطئ نسبياً فبيتفاعلوا مع الجلد... وجلد كل واحد غير التاني...وده موضوع بحاله ملخصه إن جلدنا عبارة عن تركيبة معقدة جداً من الماء والدهون والأحماض والأملاح والسكر والبروتين والشعر...والتركيبة دي بتختلف من بني أدم للتاني وبالتالي تفاعل القلب والأساس بيختلف...فممكن التفاعل مع جلد بني أدم يطمس على نوتة من النوت أو يسرع أو يقلل من تطاير حاجة عن التانية فتلاقي الريحة قلبت حزن أو بالعكس قلبت تفاريح...

نيجي بقى على الشتوي والصيفي والصباحي والمسائي ...ولو عايز كمان فيه غامق وفاتح...يعني للألوان الفاتحة والألوان الغامقة...

إحنا إتفقنا إن إحنا بنتكلم على القلب والأساس وخاصة الأساس إلى بيمثل روح العطر والي بيفرقه عن غيره...

عائلات العطور سبعة...(هما أكتر بس دول المتفق عليهم) وبيتقسموا على حسب الريحة إلى بتفكرك بيها لما بتشمها..

أول تلاتة شبه بعض وإلى يفرقهم نوع التركيبة إلي حيتحطوا فيها...

1- العائلة الخضراء... ودي الي ريحتها تديك تأثير الأوراق الخضرا والأعشاب و (كأنك دخلت مناخيرك صندوق مليان نجيلة وورق شجر)

2- عائلة الزهور ... ودي عادة تلاقي منها في معظم العطور...وبتديك تاثير الفاكهة أو الزهور أو خليط منهم...

3- الشيبرا...ودي خليط من برجاموت (حاجة كده ما بين اللمونة والبرتقالة) وخشب البلوط...

4- الألدهايد...ودي روائح بتيجي من مكونات صناعية غالباً مركبات الالدهيد...وريحتها ترمي على الخشب...

5- العائلة الشرقية....ودي بترمي علي التوابل والبهارات والكهرمان...

6- عائلة التوباكو والجلود....ودي واضحة من اسمها وهي غالباً رجولية

7- عائلة الفوجير (Fougère ) ودي رجولية صرفة وأساسها اللافاندر والطحالب...

فتخيل مثلاً معايا بارفان اساسه من عائلة التوباكو والجلود...حتلاقيه مناسب للشتاء ولسهرة مثلاً أو ميعاد عمل رسمي ويفضل لو أنت لابس رسمي ويفضل لو ألوان غامقة... زي ما تتصور نفسك في الشتاء لابس جاكت جلد طبيعي أسود وماسك سيجار في إيدك (إكسلانس)...لكن ماينفعش تتخيل نفسك لابس جاكت جلد وماسك سيجار وانت نازل تصلي الجمعة في شهر أغسطس... وبالعكس... لو بارفان بأساس الزهور ممكن تحطه في يوم صيف الصبح وانت لابس مواد "أرضية" زي الزهور كالكتان أوالقطن...وألوان فاتحة والحياة حلوة... لكن ماينفعش تتخبل نفسك داخل إجتماع عمل مهم في يوم شتا وانت لابس قميص قطن مشجر وبنطلون كتان وحاطط وردة في عروة القميص... وهكذا...

وطبعاً مافيش راجل بيحط بارفان على طول... يعني فيه ناس بتتكلين لمراتتها (وهنا المهم الريحة تكون مراتتها بتحبها)، وفيه ناس على طول لبسها رسمي وطبيعة عملها ومعظم وقتها في مكاتب واجتماعات رسمية، وفيه ناس طبيعة لبسها كاجوال وخروجها معظمه في الصباح وبره... فسعادتك تشوف الأول أنت معظم الوقت إلىإنت عايز تتكلين فيه إيه وفين ولمين وتقول وإحنا نقولك أنواع تمثل الاتجاه الي انت عايزه... تقوم تروح للمحل وتجرب نوعين بالكتير...مثلاً رشة على إيد ورشة على إيد تانية...وتتمشى شوية كدة نص ساعو وبعدين تبتدي تشمشم كل إيد منهم وتشوف...

يانهار أبيض...إيه يا عم ده... ده الموضوع كبر مني أوي....باقولك إيه... دانتا كده حاتسيب شغلك وحالك وتقضيها إختبارات....

إنسى الكلام ده ياعم وماتقولوش قدام حد احسن يظن فينا ظن مش ولابد...

:blush: :angry:

فكأننا والماء من حولنا... قوم جلوس وحولهم ماء...

رابط هذا التعليق
شارك

ايه ده ياوجدي !!!

اعترف انت في اي مصنع برفانات بتشتغل -_-

بس والله معلومات رهييييييييييبة ومفيييييييييييدة جدا جدا

تشكر عليها والله

:blush: :angry:

جيجي ...

سعودية الجنسية ... مصرية الهوى ...

رابط هذا التعليق
شارك

أبو صلاح

وجدى وسع لك الموضوع على الآخر

الحل انك تفتح لك محل عطور صغير كده ( على قد استخدامك انت بس )

وتجيب من كل عائلة شوية برفانات ، اشيى للصبح وايشى للظهر وايشى علشان تقابل فلان وايشى لمقابلة فلانة،

وايشى للانتر فيو ، والصيف والشتاء والربيح والخريف ، وهلم جرا.

وبعدين ماتقلقش ، زى مانت بتستخدم برفان الوالد ، حايبقى هو اللى يستخدم البرفانات بتاعتك ، واهو برده ترد شوية من اللى شربته من ازايز البرفان بتاعته.

:blush: :angry:

--

{وَإِذَا قِيلَ لَهُمْ لَا تُفْسِدُوا فِي الْأَرْضِ قَالُوا إِنَّمَا نَحْنُ مُصْلِحُونَ}(11){اَلَا إِنَّهُمْ هُمُ الْمُفْسِدُونَ وَلَكِنْ لَا يَشْعُرُونَ}(12)وَإِذَا قِيلَ لَهُمْ آمِنُوا كَمَا آمَنَ النَّاسُ قَالُوا أَنُؤْمِنُ كَمَا آمَنَ السُّفَهَاءُ أَلَا إِنَّهُمْ هُمُ السُّفَهَاءُ وَلَكِنْ لَا يَعْلَمُونَ}(11)

new-egypt.gif

ذو العقل يشقى في النعيم بعقله *** وأخو الجهالة في الشقاوة ينعم
***************
مشكلة العالم هي أن الحمقى والمتعصبين هم الأشد ثقة بأنفسهم ، والأكثر حكمة تملؤهم الشكوك (برتراند راسل)
***************
A nation that keeps one eye on the past is wise!A
A nation that keeps two eyes on the past is blind!A

***************

رابط القرآن كاملا بتلاوة الشيخ مصطفى إسماعيل برابط ثابت مع رابط للقراءة
***************
رابط
القرآن كاملا ترتيل وتجويد برابط ثابت مع رابط للقراءة
***************
رابط سلسلة كتب عالم المعرفة

رابط هذا التعليق
شارك

واضح إنك عايز تفهم اللعبة من اساسها...مش مجرد اسم بارفان وخلاص

فعلاً يا استاذ وجدى .. وبجد انت ظبتلى دماغى فى موضوع البرفانت ده وضفتلى معلومات ما كنتش أعرفها .. وأبتديت ألقت الأساسيات بتاعت الموضوع

الريحة في أي بارفان محترم في الدنيا بتبقى متقسمة على 3 نوتات... زي المزيكا كده...

نوتة عليا، ونوتة وسطى (وبيسموها النوتة القلب)، ونوتة الأساس...

فعلاً الموضوع ده حقيقى .. وأيام ما كنت بركب برفانات . كان البرفان بيطير بسرعة جداً . وتعد تلزق مارخيرك فى التيشرت علاشان يادوب تشم البرفان ... ربنا ما يعدها أيام :angry: .. علاشان كده انا عايز حاجة اصلى وبتثبت .. أما عن موضوع السعر فأنا بعد فهمى للموضوع البرفانت .. ما بقاش السعر محدد .. بس المهم انه يكون نضيف

عائلات العطور سبعة...(هما أكتر بس دول المتفق عليهم) وبيتقسموا على حسب الريحة إلى بتفكرك بيها لما بتشمها..

أما بنسبة لعائلات العطور دى .. فدى المعلومات دى أول مرة اسمع عنها .. وكمان يا أستاذ وجدى سمعت ان لون الغطى بتاع أزازة البرفن بيحدد لون اللبس اللى يليق على هذا البرفان . ف مش عارف المعلومة دى صحيحة ولا لأ

فسعادتك تشوف الأول أنت معظم الوقت إلىإنت عايز تتكلين فيه إيه وفين ولمين وتقول وإحنا نقولك أنواع تمثل الاتجاه الي انت عايزه

بص يا أستاذ وجدى انا ببقا خروجاتى بتبقا معظمها الصبح .. وبرضو عاندى خروحات كتير بليل .. بس انا ناوى أجيب برفان صيفى او نهارى اى كان اسمه .. وبرفان شتوى او مسائى

بس انا عامة بكره الرسميات جداً .. وتقريباً كل لبسى جاجول .. حتى لو فكرت ألبس كلاسيك .. بيبقا بنطلون جابردين على قميص بيبقا بره أو تيشرت

فشوف ايه الحاجات اللى تناسب الحالة بتاعتى .. وممكن برضو تقولى على الكلاسيكيات او الرسمية . من باب العلم بالشئ ولزيادة المعرفة بهذا الموضوع ..

وبجد شكراً يا أستاذ وجدى على المعلومات اللى انت ضفتهالى .. مش عارف من غيرك كنت عاملت ايه . انت ومصرية الهوى و shinercorner وفلانه

كان زمانى رحت وأدبست فى برفان م لوش لازمه .. أو جبت حاجه مش مناسبة .. وبعد ما أحط البرفان وكده وأبقا فرحان بنفسى .. وأقعد جامب واحد مثقف فى العطور زى أستاذ وجدى .. وبعد ما أمشى يعد يتريق عليا :sad:

تم تعديل بواسطة ابو صلاح

اللهم أتنى فى الدنيا حسنة وفى الأخرة حسنة ، وقنى عذاب النار

ma.salah ( محمود صلاح )

رابط هذا التعليق
شارك

أما بنسبة لعائلات العطور دى .. فدى المعلومات دى أول مرة اسمع عنها .. وكمان يا أستاذ وجدى سمعت ان لون الغطى بتاع أزازة البرفن بيحدد لون اللبس اللى يليق على هذا البرفان . ف مش عارف المعلومة دى صحيحة ولا لأ

قصدك الإزازة كلها على بعضيها...غالباً ده صحيح...ماتنساش إن معظم البارفانات طالعة من بيوت أزياء في الأصل...يعني أكتر ناس حتعرف توفق ريحة مع لون...

فعلاً الموضوع ده حقيقى .. وأيام ما كنت بركب برفانات . كان البرفان بيطير بسرعة جداً  . وتعد تلزق مارخيرك فى التيشرت علاشان يادوب تشم البرفان ... ربنا ما يعدها أيام  :P  .. علاشان كده انا عايز حاجة اصلى وبتثبت .. أما عن موضوع السعر فأنا بعد فهمى للموضوع البرفانت .. ما بقاش السعر محدد .. بس المهم انه يكون نضيف

بس نقطة صغيرة يابو صلاح....هو التركيب في حد ذاته مش مشكلة...بالعكس...ده اغنى اغنياء العالم بيركبوا عطور مخصوصة لهم بتبقى بتاعتهم هما بس...هي الفكرة مين الي بيركب وبيركب إيه....يعني مثلاً اي برافان محترم بيبقى داخل فيه من 10 إلى 40 نوتة وساعات بتوصل لخمسين و منها زيوت عطرية بتبقى نادرة وغالية جداً والكحول الي بيستخدم مش اي حاجة...ده ايثانول فائق النقاء ومش صناعي لأة ده بيتعمل من تخمر وتقطير حبوب الغلة...(زي الفودكا كدة..)..وده لو وقفت على شعر راسك مش حتعرف تجيبه... :D فالي بيركب ده مجرد بيحط شوية زيوت تجيب شبه من ريحة النوتة العليا من البارفان الأصلي ويغرقها كحول أي حاجة... تيجي إنت ترش منه خمس دقايق الكحول يطير وتطير معاه الريحة...

بس مش معنى كدة برضه إن البارفان الأصلي حايقعد معاك اليوم كله لأن ده بيخش فيه عوامل كتير أهمها نوع جلدك... فالجلد الدهني بيحتفظ بالريحة أكتر من الجلد الجاف..(وعلشان كدة الستات الأراشانات تلاقيهم يدهنوا إيدهم ورقبتهم الأول بأي حاجة مرطبة ملهاش ريحة قبل ما يحطوا البارفان)...

باقولك إيه....الموضوع كدة قلب كيميا وباخ....

الموضوع في الاول كان بارفانات وروايح وحلويات دخل في كحول وجلد وبلا أزرق :sad: ...

أنا أسف...

:angry:

بص دي البارفانات إلى انا شخصياً بحبها....في منها قديييييم أوي على فكرة...بس ما يمنعش...الشتوي الأول وبعدين الصيفي...

( Jaïpur Homme (Boucheron وده بالمناسبة eau de parfum مش eau de toilette

Pi (Givenchy)

Dolce & Gabbana Pour Homme برضه eau de parfum

Eau Sauvage (Dior)

Kenzo Pour Homme Frais (Kenzo)

Vetiver (Guerlain)

L'Eau d'Issey ( Issey Miyake)

Herrera Aqua (Carolina Herrera)

------------------------------------------------------------

Happy for Men (Clinique)

Nino Cerruti (Cerruti قديييم

Joop! Jump (Joop)

Pasha Fraîcheur Menthe (Cartier)

Himalaya (Creed) برضه eau de parfum

HM (Hanae Mori)

Clean Men (Clean

فكأننا والماء من حولنا... قوم جلوس وحولهم ماء...

رابط هذا التعليق
شارك

السلام عليكم ورحمة الله ....

الله يفتح عليك ياوجدى والله .....ايه المعلومات الهايلة دى ....انا كنت عارفة المعلومات دى كده شفوى يعنى وبالتجربة لكن دلوقت طبعا ومع الخلفية الثقافية البارفانية دى ..خلاص فخمتو كولو خاجة...روح ياشيخ الله يباركلك ..

اصل انا عاشقة للبرفانات جدا...وعندى مايزيد عن سبعين زجاجة بارفان غير اللى شربتهم (حدش عايز يتشرى؟)....لكن الحقيقة برضه وبفضل الله مش باستخدمهم وانا خارجة لسببين ..اول سبب ...عرفت رأى الناس بتوع علم النفس فى الموضوع ده ..قال ايه بيقولولك ان اللى يستخدم بارقان كتير جدا بطريقة مبالغ فيها جدا والناس تشم ريحته من على بعد اميال ...بيقولوا يعنى والعهدى عليهم ...انه بيكون شاعر بعدم رضى داخلى عن نفسه او يكون شاعر بانه نفسيا كريهه ..فبيعوض ده باستخدام البارفات الكتير ويبالغ فى استخدامها ...

فبدات اخف شوية منها ...تانى سبب والاهم ...رأى الدين طبعا فى استخدام العطور للمرأة خارج بيتها ..ودى كانت اهم نقطة خلتنى اتعاطى البرفان فى البيت بس ..لكن ده مايمنعش ابدا ان كل سفرية لى بارجع محملة بالعديد من الزجاجات ...والحمدلله الذى هدانا لهذا ....

بس انا متهيالى ابو صلاح كده كرهه القصة خلاص ....عايزة اقوله بس ان الموضوع بسيط خالص ...يعنى ماحدش حيشم البارفان الشتوى فى الصيف ويحدفك بالطوب مثلا ..هى القصة كلها ان انت نفسك مش حتتحمله فى الصيف لانه حيكون تقيل ويخنق ....

انا بأيد اختيار وجدى فى مجموعة البارفانات اللى رشحها لك لان زوجى العزيز بيستخدم اغلب الانواع دى وبالاخصJaïpu ro -(Givenchy بس خلى بالك علشان فيه منهم حريمى ,والمجموعة اللى الاخ وجدى كاتبها لحد الخط دى ..انا بايدوه فيها .....وعندك كمان fendi.....الرجالى هايلة بس دول سعرهم فوف ال 250 جنيه وانت طالع

اضيف عليها بقى BOND.....Ka.....MALBEC.......BLV(BVLGARI).....ESCAPE......CK(calvin klein)>>>دول حتلاقى سعرهم معقول ....

بص يابنى احنا حنلم من بعضنا هنا ونبعت لك واحدة على الايميل بتاعك :rolleyes:

{ لَّقَدْ كُنتَ فِي غَفْلَةٍ مِّنْ هَـٰذَا فَكَشَفْنَا عَنكَ غِطَآءَكَ فَبَصَرُكَ ٱلْيَوْمَ حَدِيدٌ }

رابط هذا التعليق
شارك

بس انا متهيالى ابو صلاح كده كرهه القصة خلاص ....عايزة اقوله بس ان الموضوع بسيط خالص ...يعنى ماحدش حيشم البارفان الشتوى فى الصيف ويحدفك بالطوب مثلا ..هى القصة كلها ان انت نفسك مش حتتحمله فى الصيف لانه حيكون تقيل ويخنق ....

بصى يا أستاذة فلانه .. انا من النوع التنك أوى وبحب لم اعمل حاجة اعملها صح جداً .. وأنا عن نفسى بتضايق من الموضوع فى نفسى

بص يابنى احنا حنلم من بعضنا هنا ونبعت لك واحدة على الايميل بتاعك

انا كان نفسى أسمع الجملة دى من أول ما فتحت الموضوع :rolleyes: .. بس أستنو لما استقر على حاجة غالية شويه

__________________________________

والنبى يا أستاذ وجدى انا عايزك فى معلومات صغيرة كده علاشان بس ألم بالموضوع بشئ من التفصيل ... مش عارف ليه حاسس أن بستغلك اسوء الأستغلال :angry2:

عايزك تقولى ايه الفرفق ما بين العطور ... يعنى الفرق ما بين المسك و العنبر والبرفان والأسبرى وماء التواليت وكل أنواع العطور ولو فى حاجة كمان مش هيخسر ... وأيهما أفضل

اللهم أتنى فى الدنيا حسنة وفى الأخرة حسنة ، وقنى عذاب النار

ma.salah ( محمود صلاح )

رابط هذا التعليق
شارك

خلينا نستغله ياابوصلاح .. وراه ايه ؟؟!! :rolleyes:

يا ريت يا وجدي لو تقولنا على الفرق بين :

eau de parfum و eau de toilette

لأني بصراحة كتير بقراها بس مش عارفه ايه الفرق ..!!

طب كلمنا شويا عن العطورات الشرقية .. زي البخور ( اللي زي الخشب) ودهن العود ..

بصراحة فيه بعضها ريحته جميييييلة جدا بس دايما اسعارها نار ..

جيجي ...

سعودية الجنسية ... مصرية الهوى ...

رابط هذا التعليق
شارك

عايزك تقولى ايه الفرفق ما بين العطور ... يعنى الفرق ما بين المسك و العنبر والبرفان والأسبرى وماء التواليت وكل أنواع العطور ولو فى حاجة كمان مش هيخسر ...  وأيهما أفضل

شوف يابو صلاح....انت دلوقتي قلت تلات حاجات مختلفة...

"الأسبراى"

"البارفان وماء التواليت"

"المسك والعنبر"...

مبدئياً...

العطور بتتباع في أزايز..والأزايز إما بيبقى فيها بخاخ وإما لأة...وبعض الأنواع بتنزل بالاتنين وده حسب تركيزه (وحاقولك التركيزات كمان شوية)... ويستحسن عادة إنك تشتري ابو بخاخ (السبراي) لأن الزجاجة العادية بتحتاج طريقة حفظ معينة خاصة لو حتحفظ بيها لسنين طويلة علشان الكحول فيها ما يتطايرش وتبقى تقيلة أوي (عندي إزازة قلبت زيت تقريباً...)

والعطور بتباع على حسب تركيز الزيوت العطرية فيها (والي بيسموها الjuice ) بالمقارنة بنسبة الكحول والماء فيها...كلما ما تركيز الزيوت زاد كل ما الريحة بتفضل أكتر وكل ما تمنها بيزيد....التقسيمة بتبقى كالأتي:

البارفان (Parfum) وده اعلى تركيز بيتباع تجارياً وبيبقى حوالي من 20 إلى 40 في المية...

ماء البارفان (Eau de Parfum) وتركيزه بيبقى من 10 إلى 30 في المية...

ماء تواليت (Eau de Toilette) وتركيزه بيبقى من 5 إلى 15 في المية...

ماء كولون (Eau de Cologne) وتركيزه من 3 إلى 5 في المية...

After Shave.... وده بيبقى اقلهم تركيزاً وأقلهم سعراً ومابيقعدش اكتر من ساعتين تلاتة...

دول الرئيسيين...فيه برضو تصنيفات تانية بس نادرة جداً زي Parfum De Toilette وده بيبقى مابين البارفان وماء البارفان...

أما بقى بالنسبة للمسك والعود و(العطور الشرقية)زي ما الفاضلة جيجي قالت..فده بقي موضوع يتكتب فيه مجلدات...وأنا معلوماتي فيه تعتبر سطحية...

مبدئياً خلينا نتفق على شوية حاجات...

المسك والعود والعنبر المستخدمة في كل حاجة الأيام دي بتبقى مخلقة صناعياً مش طبيعية...والمسك الصناعي مثلاً موجود في كل حاجة تقريباً...من أدوات تجميل لعطور لشامبوهات ...حتى مكسبات الطعم إلى بتبقي في الأكل...

الحاجات دي غالييييييييييية أوي..فوق ما تتصور... والي بيتعاملوا فيها لازم بيبقوا بيفهموا فيها علشان مايتخموش... يعني بيبقوا زي الجواهرجية كدة... وبتتوارث علمها عائلات بعينها...والناس لما بتشتري مابتبقاش فاهمة أي حاجة في البطيخ وعادة بيكون إلى بيشتروه إما مضروب أو مش نقي تماماً...

اسعار الحاجات دي بتبقى بالجرام زي الدهب...وطبعاً الدهب أرخص لأن جرام الدهب 24 بميت جنيه جرام العود الهندي مثلاً ممكن يوصل مستريح لمتين أو تلتميت جنيه حسب عمره...

يعني من الأخر بلاش حد يقل عقله ويشتري حاجة مندي...ولو لابد ياخد معاه حد بيفهم...طبعاً أنا كل ده باتكلم عن الخامة الأصلية النقية مش الهجص إلى بيتباع في أزايز قدام الجوامع... :rolleyes:

وطبعاً كل الحاجات دي وخاصة المسك والعنبر لهم خصائص علاجية كتييييير أوي غير إن ريحتهم حلوة ولو تفتح تذكرة داوود الأنطاكي تلاقيه كل شوية يقولك العنبر بيقوي مش عارف إيه المسك بيعالج أبصر إيه...وحتى اليوم في الطب الحديث خصائص المواد دي العلاجية معترف بيها...

طب نبدأ بالمسك ...ومادمنا جيبنا سيرة المسك يبقي نصلي على الحبيب عليه الصلاة والسلام والقائل "أطيب الطيب المسك"...

اصله من الغزال الجبلي إلى بيعيش في التبت وعلى جبال الهيمالايا...وأول من عرفه الصينيون من أربعة الاف سنة... ثم انتشر في الهند وبلاد فارس ومنه للعرب...وبيجي أصلاً من غدة صغيرة في أخر بطن الغزال الذكر البالغ وبتبقى كدة بروز مليان شعر عبارة عن كيس صغير قد اللمونة كدة مكون من طبقات من الجلد...

في أوائل الصيف بيبتدي الزيت يتكون ويتجمع في هذه الغدة...والموضوع ده بياخد شهور الصيف كلها تقريباً...ومع تجمعه بيتكلس و يكون حاجة كدة زي الحبيبات لونها بني محمر وريحتها نفاذة جداً...على دخول الخريف وبداية موسم التزاوج بيبتدي جسم الغزال يتخلص منه عن طريق البول... وبالريحة دي بيحدد مناطق سيطرته وبيجتذب الإناث... وساعات الكيس ده لما بيتملي أوي بيبتدي يضايق الغزال فيقعد يحكه على صخرة مثلاً...فينفتح الكيس مع الحك وينزل المسك على الصخرة... وكانوا لما بيلاقوا الصخور دي ريحتها حلوة أوي مايفهموش ليه ويعتبروها صخور "مقدسة" وكانت توضع في قصور ملوك الصين والمعابد...

ساعات بقى الغزال يفضل يصرف المسك في البول لحد الشتا....وطبعاً الشتا في الهيمالايا الأرض بتبقى متغطية بالجليد... فكانوا يلاقوا على الارض ما يبدوا إنه بول حيوان ولكن لونه احمر مش اصفر وريحته جميلة جداً... وطبعاً ابتدوا يدعبسوا لحد ما عرفوا الحكاية فابتدا صيد الغزلان علشان ياخدوا الغدة دي وابتدت تجارة المسك وابتدت الناس تعرفه وابتدا المشوار يا قلبي....

طبعاً لأن صيد الغزلان كان بيتم كده عمال على بطال الذكر مع الانثى البالغ مع الي مش بالغ ، غزال التبت أو الهيمالايا اصبح مهدد بالانقراض... ومع تطور الكيمياء والتوصل لتخليق رائحة المسك بوسائل صناعية تم "تحديد" صيد الغزلان وووضع شروط صارمة ليها...ده غير إنه إتمنع التداول به تجارياً في العالم كله إلا في فرنسا واليابان (والطبعاً البلاد الي مالهاش صاحب زينا)... علشان كدة بقة صعب جداً جداً إنك تلاقيه لأن الكميات الي بتنتج منه سنوياً محددة ومحدودة وبتبقى أغلبها محجوزة مقدماً لشركات معينة...

أما بقى المسك الموجود المخلق معملياً فده انواع كتيرة... أكتر من 300 نوع.. وبيختلف سعره تبعاً لنوعية تركيبه وطريقة تحضيره ونقائه ودرجة سميته...ومافيش تركيبة واحدة بعينها بتجيب نفس رائحة المسك الطبيعي... إنما مثلاً مركبين العطور بيقعدوا يخلطوا كذا نوع مع بعض علشان "يقربوا" علي قدر الامكان من الطبيعي...

والمسك الطبيعي للي شمه ماينفعش يتوصف...وتحس كده إن قلبك إنشرح وصدرك إنجلى...والي يتعود على شمه ممكن يتحول لشبه إدمان...وكان بيوصف لحالات الاكتئاب...بل استخدمه البعض كتعويض نفسي للعلاج من إدمان الكوكايين... والكتير منه ممكن يقلب البطن ويخليك ترجع...وحتى في القرون الوسطى كانوا بيقولوا إنه ممكن يسبب للستات الجنون أو حالات هيستيريا....ولذلك فالمسك نفسه ما بيتحطش كده بتركيزه ولكن لازم يتم تخفيفه او خلطه بزيوت اخرى...وده فن وعلم في حد ذاته...

على فكرة المسك بيبقى موجود برضه في فصائل معينة من الثيران والسلاحف ودي بتعيش هنا في كندا...وبرضه في أنواع من الثعالب والفئران الجبلية....بس هذا المسك يستخدم أكتر في الأغراض العلاجية واستخلاصه أصعب بكتير من الغزال ومش عملي...وفيه مسك نباتي برضه وبيجي من زهرة يسموهها المسك الأمريكي ودي اصلها في المكسيك والسلفادور....بس برضه مش زي مسك الغزال...

نخش عالعنبر...

العنبر بيجي من الحوت الأزرق... والأصل إن الحوت وهو ماشي كده في البحر يقوم فاتح بقه...يدخل فيه ما يدخل...طبعاً الحوت مابيقدرش يهضم حاجات كتير من العك إلى بلعه...يقوم يفرز في بطنه عصارة تحيط بالحاجات الغير مرغوب فيها وتعزلها... تيجي العصارة دي تنشف وتتحول لمادة راتنجية (حاجةكده زي الشمع) ويطردها جسمه في الماء... ييجي صحابنا الصيادين يلاقوا بلوكات كده لونها رمادي (ساعات بيوصل وزنها لأربعين وخمسين كيلو الحتة الواحدة) عايمة على وش المية... ياخدوها ويبيعوها ويكسبوا على قلبهم... بس تقول إيه بقى في ابن أدم...طماع... لما الطلب زاد وتحول لتجارة رابحة مابقاش الصيادين يستنوا يلاقوا العنبر على وش المية بل بقوا بيصطادوا الحوت مخصوص علشان يشقوا بطنه ويطلعوا العنبر... وكالعادة تحول الحوت الأزرق برضه لفصيلة مهددة بالانقراض... وتم منع وتجريم صيده... وأصبح كل المتاح من عنبر الحوت هو الي بيتفضل علينا بيه سعادته ويخرجه من جسمه ويا حظه يا هناه إلى يلاقيه...

والعنبر لو تشوفه تلاقي شكله كانه صخر...ولونه رمادي وبعروق بيضاء وسوداء...

وده برضه نادر جداً والجرام الخام منه تمنه يوصل لعشرين دولار... يعني لو مرة كنت في اليخت بتاعك بتتفسح في المحيط الهادي ولقيت حتة كدة عايمة وزنها 5 كيلو ممكن تبيعها بميت ألف دولار....وأهو تبقى جبت تمن البنزين والسجاير... :angry2:

والعنبر فيه منه حيواني الي هو عنبر الحوت...وفيه منه نباتي...

والنباتي ده بيجيي من أشجار معينة بتكون مواد صمغية وراتنجية على قشرتها الخارجية ( إلي هيا لما أتسابت 200 مليون سنة تحولت للكهرمان الي بنلاقيه دلوقت) وبيكون ريحتها قريبة للعنبر الحيواني بس طبعاً مع الفارق...

نيجي عالعود....

وزيت العود...أو بيسموه دهن العود (لأن لزوجته بتبقى عالية أوي) بيستخرج من خشب شجرة العود...وهي شجرة اصلها في الهند... وبتزرع كمان في كمبوديا وماليزيا... والعود بقى علشان تشتريه لازم تبقى فاهم اوي في "نكهاته" لو صح التعبير... فالموضوع كده عامل زي الجبنة... يعني إنت ممكن تنزل تشتري جبنة جوده مثلاً وخلاص...بس لو واحد كييف جبنة حيبقى عايزها مثلاً عمرها 10 سنين...وعلى فرض إن العمر مش مكتوب عليها فحيعتمد على حاسة التذوق عنده علشان يعرف الجبنة القديمة فعلاً من الجديدة.... وكذلك العود....كل ما عمر الشجرة بيزيد كل ما الريحة بتبقى أعمق وأجمل...ولأن ماحدش بيعد ورا الي بيبيع أو الي بيكتب على الزجاجة فيجب أن تعتمد على حاسة شمك وتذوقك لمدى عمق ونقاء العطر... وعلشان برضه أفهمك إنت ممكن تتخم لأي درجه ... سعر جرام العود الهندي القديم ممكن يوصل ل200 جنيه بينما جرام العود الماليزي مثلاً ممكن تلاقيه بجنيه ونص...ده قبل المفاصلة... :blink:

والعود مايتحطش كده على حيله... وأحسن حاجة تخلطها بيه هو زيت الجوجوبا...

طبعاً العطور الشرقية بالهبل بس هما دول المشهورين أوي....أه...وطبعاً فيه زيت الورد الطائفي...او بيسموه دهن الورد الطائفي...وده زيت بيستخرج من وردة بتنمو في مرتفعات مدينة الطائف.... ونصيحة مني يا أبوصلاح مادام الأخت فولانة والأخت جيجي ضربتهم الشهامة وقالوا انهم حيهادوك بإزازة...فأطلب إزازة زيت ورد طائفي...يعني...هيا الإزازة الصغيييرة حوالي 12 ملي يعني قد قطارة العنين كدة ممكن تمنها يوصل 4000 جنيه مستريح...تبيعها وتفتح محل العطور الي الأخ محمد نصحك بيه...والبلية تلعب...وتبقى تفتكرنا بمزيل عرق ولا حاجة... :blink:

تم تعديل بواسطة wagdi

فكأننا والماء من حولنا... قوم جلوس وحولهم ماء...

رابط هذا التعليق
شارك

انشئ حساب جديد أو قم بتسجيل دخولك لتتمكن من إضافة تعليق جديد

يجب ان تكون عضوا لدينا لتتمكن من التعليق

انشئ حساب جديد

سجل حسابك الجديد لدينا في الموقع بمنتهي السهوله .

سجل حساب جديد

تسجيل دخول

هل تمتلك حساب بالفعل؟ سجل دخولك من هنا.

سجل دخولك الان
  • المتواجدون الآن   0 أعضاء متواجدين الان

    • لا يوجد أعضاء مسجلون يتصفحون هذه الصفحة

×
×
  • أضف...