[بنت شعنونة]

من هنا بقى لحد ما الواحد يستقر في موضوع الشقة دي
عاوزة اعرف تجاربكم في الشقق
بمعنى
اوقات الواحد بيتزنق في حاجات ف بيعملها ب ايده هوا ارخص واحسن " اتمنى كلمة احسن دي "

مثلا
ايام ما كنت بعمل محل الخضار
انا اللي اشتريت البوية وبيضته بنفسي وانا اللي دهنت الأستاندات

امبارح قعدت طووووووووووول الليل ادعبس على مواقع دهان عشان اتعلم اساسياته
اهو
نوع من انواع التوفير لآنهم بيقولوا ان الدهان بيكلف كتير
حد بقى دهن بيته بنفسه او حد مهندس هنا يدينا شوية تعليمات ومعلومات تنفعنا كلنا
وحسنة قليييييلة تمنع بلاوي كتييييييييرة



على فكرة
انا لقيت دا امبارح

http://forum.hawaawo...?threadid=56526


وبجد نفسي اعملللله جدااااااا
لآنه سهل اوي في العماااااايل
وانا جربته مرة زماااااااااان بس ايام الفن بقى
انما على مساحة صغيرة
مش عارفة بقى بيييييييييت بحالة يبقى عامل ازاي؟

Attached thumbnail(s)

• 

تم تعديل هذه المشاركة بواسطةبنت شعنونة: 20 September 2004 - 07:23 PM

[بنت شعنونة]

الفكرة دي برضة اعتقد انها تكون رخيصة وها تعمل فرق ومنظر

Attached thumbnail(s)

• 

[maksoof]

شوفى بقى يا ستنا:

الموقع ده فيه تقريبا أى إصلاحات ممكن سعادتك تفكرى فيها و بيبن الخطوات بالفيديو كمان.

لتحضير الحائط و دهانه سعادتك أنظرى تحت:

Finishing & Decorating----> Walls---> Interior Paint Prep
و
Painting Interior Rooms

و عموما لو عملتى search عن
Home improvements أو
Do it yourself
فأكيد حتلاقى مواقع تانية بس أنا إستعملت الموقع ده و النتيجة كانت كويسة

[kfaya]

Quote

حد بقى دهن بيته بنفسه او حد مهندس هنا يدينا شوية تعليمات ومعلومات تنفعنا كلنا
وحسنة قليييييلة تمنع بلاوي كتييييييييرة

مين اللى بيدور على مهندسين ؟؟؟؟؟؟
احنا فى الخدمة ....

بصى يا شانا , الموضوع مش محتاج مهندسين ولا حاجة .... هى شوية خبرة و تجارب سابقة , بمعنى اللى عمل شقة أو شقتين ممكن يكتسب الخبرة دى ...
طالما الشارع اللى فيه البيت كويس و مقبول دى أول ميزة , و ايجار قديم يعنى بمليم , دى تانى ميزة ( لا عزاء لأصحاب المساكن القديمة ) طبعا حكاية الأستعانة باستشارى لتقرير حالة المنزل مش مستحبة لأنها ستثير عداء المالك و باقى السكان ...
نيجى للشقة من الداخل .. لازم يكون معروف ايه المطلوب بالضبط , هل أعمال دهانات فقط ؟؟ و ايه أخبار الكهرباء ؟؟ هل محتاجة أسلاك جديدة داخل الحائط ؟؟ و زيادة عدد البرايز و مفاتيح الكهربة ؟؟
الصحى أخباره ايه ؟؟ ( الحمام و المطبخ ) ؟؟
الأرضيات ؟؟؟
ثم أخيرا الدهنات ...

نأتى الى أعمال الكهرباء : و تلك بداية الأعمال , لو كانت حالتها مقبولة و الأسلاك داخل الحائط بحالة جيدة .... يكتفى فقط باضافة عدد من البرايز حسب تصورك لفرش الشقة .... مكان التليفزيون و الكاسيت و الاباجورة والمروحة و فى المطبخ مكان الخلاط و بسخان الشاى و هكذا ...
تانى حاجة الصحى : الحمام ...أنا ارى عشان تكون شقة عرسان , لابد من كومبينيشن و حوض جديدان .... و كذا سيراميك حوائط و أرضية .... دول بيخلو شكل الحمام تحفة و انطباع جيد جدا أن الشقة جديدة .... التكلفة فى حدود ثلاثة الى أربعة الاف جنية ... هذا فى حالة عدم تغيير مواسير داخل الحوائط , لو المواسير الداخلية دايبة , لزم تغييرها بتكلفة مش كتير حسب أمانة السباك ....
المطبخ : أرضية سيراميك شيئ أساسى .... حوائط ممكن سيرامك أو دهان زيت .. و ان كنت أفضل السيراميك لسهولة تنظيفة , و مش ضرورى لغاية السقف , ممكن بارتفاع مترونصف ..... حوض استينليس يعطى جمال و رونق للمطبخ ...
أرضيات الشقة : طبعا اللى ماشى اليومين دول هو السيراميك , و قد أثبت أنه عملى و سهل التنظيف و الميزة الأخرى هى تنوع أشكالة و أسعارة بدرجة كبيرة ترضى كافة الأزواق و الأمكانيات , و هناك حتى الفرز الثالث و ده سعرة منخفض جدا و الشطارة فى اللى بيلزقه يكون صنيعى شاطر يعرف يدارى أى عيب فيه ..
الدهانات : و دى أخر و أسهل مرحلة .... اليومين دول اللى ماشى فى السوق اللون الأبيض منفردا للشقة كلها , حيث يعطى أتساع و راحة للعين .... و أيضا هناك الغرفة ذات اللونين أحدهما فاقع جدا و الأخر هادى جدا .... و دى لعبة مهندسى الديكور بتوع الحداثة ..... و ان كان من تجاربى الأبيض لا يعلى علية .... دهان المتر المربع فى حدود 5 جنية مصنعية حسب الصنيعى و الموسم ..... الدهنات هقولك عليها لم نوصل لها , و هى أيضا متنوعة الأسعار و الأستخدامات ...

المهم ...... شقة ايجار قديم ما تتسابش , البديل هو :
شقة تمليك اسكان شباب فى احدى المدن الجديدة
شقة تمليك فى العاصمة باسعار 200 ألف و انتى طالعة
شقة قانون جديد ..500 جنية فى الشهر و انتى طالعة

بجميع المقاييس توكلى على الله و واحدة واحدة الشقى تخلص و تطلع تحفة و لا خاب من استشار , و طولى بالك على خطيبك تاكلى قلبه و عينيه هو و أهله ... ما الرجل الا طفل كبير , و المرأة أم منذ ولادتها ....

[بنت شعنونة]

كفاااااااااااااايااااااااااااااا


انت فتحت عنيا على بلاوي كتييييييييييييييييير



كللللل داااااااااااا



اولا موضوع اسلاك الكهربا دا انا ها اعرفه منين؟
لازم احفر كل الحيطان؟ والا اعمل ايه عشان اعرف ان الكهربا كويسة؟
وسؤال كمان
ازاي اعرف ان كهربة الشقة تستحمل تكييف او اتنين تكيف؟

سيراميك فرز اول وتاني وتالت
انا سمعت الكلام دا من واحدا صاحبتي كانت ها تتجوز
بس ايه الفرق؟
يعني ايه مساويء فرز تالت دي؟
ويفرق ايه عن التاني؟؟

الحمام

ايدك منه والأرض
هوا مش ناوي يغيره
اقلب على غيره

[se_ Elsyed]

Quote

اولا موضوع اسلاك الكهربا دا انا ها اعرفه منين؟
لازم احفر كل الحيطان؟ والا اعمل ايه عشان اعرف ان الكهربا كويسة؟
وسؤال كمان
ازاي اعرف ان كهربة الشقة تستحمل تكييف او اتنين تكيف؟

إطلعيلي بقى من ورا الحيطه عشان اخوكي س س لسه عامل الموال ده في الاجازة ...

فالموضوع لا محتاج تكسير في حيطان ولا غيره .. يكفي ان يُلقي أي كهربائي نظرة على لوحة الكهرباء الموجودة في داخل الشقة ليعرف إن كانت هاتستحمل الغسالة الفول إوتوماتيك والسخان والمكواة والتكييف .... إلخ أم لا ... وخصوصاً التكييف .. وهما لهم تقسمة معينة فلازم تكون الكهربا 3 فاز ( أي طريقة التوزيع نفسها تعتمد على وجود خط منفصل للتكييف وخطوط أخرى لباقى الشقة والاجهزة حسب إستهلاك وسحب كل مجموعة من الاجهزة ) وكمان العداد لازم تكون قوته مش أقل من 40 أمبير ( لو بصيتي على الكتابة الموجودة تحت العداد اللي بيلف جوا العلبة هاتعرفي هو كام أمبير ) .... أما عن حالة السلك فبتبان برضوا من لوحة التوزيع لأنه كلها بتصب هناك .

ولازم لازم لو هاتزودي فيش ومفاتيح وحركات يبقى تكسري قبل الدهان والكلام ده ... ويكون اللي هايغطي التكسير والحاجات دي بالمحارة معلم .. وإلا كل ده هايتشقق تاني بعد الدهان وهاتبقى عامله زي التعابين حتى لو خلصتي ديكور خالص .

Quote

سيراميك فرز اول وتاني وتالت
انا سمعت الكلام دا من واحدا صاحبتي كانت ها تتجوز
بس ايه الفرق؟
يعني ايه مساويء فرز تالت دي؟
ويفرق ايه عن التاني؟؟ 

بمنتهى البساطة :

الفرز الاول : البلاط ما فيهوش غلطة .

الفرز التاني : في كل صندوق تلاقي كام بلاطة فيهم غلطات .. اللي واخده بشلة واللي لونها مختلف زاللي مكسورة... كده يعني .

الفرز الثالث : إنتي وحظك ممكن تلاقي كوكتيل بلاط في الصندوق وحاجات مالهاش دعوة ببعض ( بصراحة تلزقي ورق جرايد أحسن منه )

وانصحك تشتري سيراميك فرز أول .معقول .. يعني مش لازم كليوباترا او الفراعنة ولا الجوهرة ... صراحة في مصر دلوقت أنواع كثير جداً جداً وجودتها كويسة وفي نفس الوقت أسعارها معقولة نتيجة المنافسة بين عشرات الشركات التي ظهرت على الساحة ... افتكر زمان قوي ماكنش غير ماركة سيراميك مصر وكان حجم البلاطة ييجي 15 سم وغالباً اللون بيبقى أبيض يعني كنتي تحسي إن إنت في مستشفى مش مطبخ او حمام .

وانا لي رأي خاص في عمل أرضيات الشقة سيراميك ... فبصراحة الواحد بييجي في الشتا والروماتيزم يشتغل وتحسي إن الأرض عبارة عن لوح ثلج ولازم تتغطي كلها بسجاد .. ده بالإضافة إلى إن الواحد لو مشي حافي علي السيراميك وجه بص على رجله هاتقولي ده انا كنت ماشيه على فحم من كثر لون الجلد ما بيتغير


ونصيحة بقى ومن الاخر ومش عايزين كلام كتير ... إدي العيش لخبازينه يا شعنونة ولو أكلو انصه .. وممكن بشوية نصاحة وفهلوة ما تخلهمش ياكلوا حاجة خالص ..

يعني على سبيل المثال : موضوع الدهان والديكورات .. يا ستي مش مهم تجيبي مكتب إستشاري أجنبي يعمل لك الديكور .. ولا تروحي تجيبي صنايعي أي كلام من سوق الجمعة يلكلك في الشقة .. فخير الامور الوسط .. هناك صنايعية كثير جداً جداً ولهم ذوق فني عالي .. لأن لما تيجي تبصي في الأخر مين اللي بينفذ الديكور ؟ هل هو مهندس الديكور نفسه ؟ أي نعم هو اللي بيعمل الديزاين وكده لكن اللي بينفذه صنايعيه أساتذه .. وهاتلاقي كتير منهم وأسعارهم حنينه .. بس إبعدي وحذاري من عمل أي حاجة في فصل الصيف لأن ده البيك سيزون بتاعهم والطلب عليهم بيبقى كثير بالإضافة إلى أن أسعار المواد التي تستخدم في البناء بتعلى جداً جداً نتيجة لعودة المغتربين في الأجازات وحتى الناس اللي في مصر بيفضل يعمل أي شغل في شقتة في أجازة المدارس عشان الدوشة ..

إنما بقى لما تيجي تدوري على حد منهم في الشتا .. هاتلاقيهم قاعدين على القهاوي بيسقعوا قلل وإنتي بقى تحكمي وتتحكمي وتلاقي بدل الواحد 100 .

وإبعدي عن الإجتهادات الشخصية وأنك تشمري دراعك وتدهني الشقة بنفسك ... الشقة غير المحل تماماً .. الشقة هي ننلكتك ولو عملتي حاجة غلط فيها هاتتعقدي ... بالإضافة إلى إنك لن تكوني في خبرة أصحاب المهنة .. بالإضافة أيضاً إلى إنك هاتهدري مواد كثير إنتي اولى بثمنها ... أنا لو في مصر والله كنت جبت لك صنايعية كثير ( ولي عمولة طبعاً ) لكن أنوي إنتي وأنا هاحاول أدبر حد وإنتي تحكمي ..


إحم إحم .... ولو إني ممكن أطلب قوات تدخل سريع من أخوياي إبن مصر ويجيب لنا صنايعي من فوق القفص وبضمان 5 سنوات كمان ( ده بعد إذنه طبعاً ) وهانقسم العمولة سوا .

ويا ريت لو جبتي إنتي صنايعي تكوني شوفت نموذج من شغله عند حد معرفة ,,,,

اما بقى إزاي ماتخليش الخباز ياكل نص العيش .. فدي عن طريق إن صاحب الشقة هو اللي يشتري المون بنفسه ويكون فيه رقابة على الصنايعية حيث إن كتتتتتتتتتتير منهم بيخنصر في المون وبياخدها يبيعها ... أما لو إنتي قولتي له أشتري وهات فواتير .. يبقى كده أعطيتيه هدية مش هاينساها لك طول العمر .

[ماجد]

الأخت الفاضله بنت شعنونه:
بغض النظر عن رأى فى الموضوع و الذى ربما قلته فى الموضوع الرئيسى سأقول لك وجهة نظرى فى اعداد و تجهيز الشقه:
هناك دائما أسلوبان: الأول اعداد لفترة طويلة المدى و الثانى اصلاح مؤقت يهدف الى تسيير الأمور بانتظار الأصلاح الرئيسى.
اختيار احد الأسلوبين يعتمد على طول هذه الفترة و القدرة الماليه المتوافره
و نلاحظ ان الشقة مؤجره و العمارة قديمه فلن تتوافر امكانية تكسير حوائط او بناء اخرى جديده بمعنى ان التقسيمه الحاليه لن تتغير بدون موافقة المالك و استشارة ذوى الخبرة .
نأتى الى بنود الأعمال بالترتيب.
1- الكهرباء .
2- السباكه.
3- تجهيز و ترميم الحوائط و الأسقف و النجاره ( ابواب و شبابيك ).
4- الأرضيات .
5-- تشطيب الحوائط و الأسقف و النجاره .
6- تشطيب الحمام و المطبخ.
7- تشطيب الكهرباء و النجاره.

اولا الكهرباء:
اذا كان قد مر على آخر تغيير للأسلاك اكثر من 10 سنوات لابد من تغييرها بالكامل حيث تصبج جافة و تتقصف و لا تستطيع احتمال الأحمال و بالتالى تصبح مصدرا للحرائق و لابد من سحبها من داخل الخراطيم الموجوده داخل الحوائط و اعادة تدكيكها بالأقطار التاليه :
سلك السخان الكهربائى أو تكييف او غساله بها سخان او غسالة اطباق 4 مم
سلك البرايز الكهربائيه 3 مم
سلك الأناره و النجف 2 مم
السلك الصاعد للشقه من العداد لا يقل عن 10 مم.
- يتم تغيير التابلوه الرئيسى للشقه اذا كان من نوع المنصهرات القديمة و استبداله بأخر ذو مفاتيح اتوماتيك 16 و 20 و 24 امبير حسب الحمل بحيث يتم تجميع الأنارة مثلا على مفتاحين و البرايز على مقتاحين و كل جهاز كبير على مفتاح أو تقسم على الغرف كل غرفه مفتاح.
- يتم عمل مفتاحين كبيرين بعد عداد الأناره قوى 32 او 40 امبير.
فاذا كنتى تريدى استخدام 3 تكييفات يجب تغيير العداد الى 3 فاز و هذا بسيط بالرجوع لشركة الكهرباء و سيكلفك حوالى 900 جنيه و السلوك الصاعدة للشقه تزيد سلك قطر 10 مم بحيث يكون عددهم 3 بدل 2.
- يتم زيادة عدد البرايز و مفاتيح الأناره و اماكن اباليك و مفاتيح التكييف و السخان ( اذا لم يستخدم الغاز ) و ذلك حسب الرغبه.
- يمكن شراء جميع المستلزمات من العتبه بعد تحديدها من قبل الكهربائى و يفضل اسلاك السويدى و مفاتيح بتشينو.
- مراحل العمل : الأولى عمل السابق و الأخيرة بعد الدهانات تركيب لقم المفاتيح و البرايز و اوجة المفاتيح.
- التكلفة الأجماليه تكون لشقه مساحة من 150 - 200 متر حوالى 3000 جنيه و يمكن ان تزيد حسب انواع المفاتيح التى ستختاريها .

يتبع.......

[ماجد]

ثانيا السباكه:

يجب عليك الكشف جيدا على السباكه و ساقول لك طريقة سهلة لذلك لكن يجب عليك معاينة الشقه العلوية ( بمعاينة سقفك ) و السفليه ( بمعاينة سقف الحمامات و المطبخ ) لكى تطمئنى من عدم حدوث تسريب منهما. و طريقة الأختبار بسيطة بالنسبة لصرف البانيو الأحواض ( المطبخ و الحمام ) .
-اذهبى للبلاعه و افتحى الغطاء ستجدى داخلها فتحات موصله للبانيو و الأحواض سدى هذه الفتحات جيدا بواسطه قطعة قماش او جزء من شيطارة اسمنت و غطيها بطبقه من الجبس المخلوط بقليل من الماء و تدعيها تجف .
افتحى الماء فى الأحواض و البانيو و املئيها حتى الحافه و راقبى هل ينخفض منسوب الماء . اذا انخفض فمعناه و جود تسرب فى مواسير الصرف و لابد من تكسيرها و استبدالها .

بالنسبه لاختبار مواسير الماء يقوم السباك باحضار طلمبة كبس و ايجارها ( اذا لم تكن عنده 20 - 30 جنيه ) ليقوم بكبس الماء داخل المواسير فاذا لاحظتى انخفاض فى ضغط الماء يكون هناك تسرب للماء داخل الحوائط و يمكن ملاحظته بالنظر للحوائط المحيطة بالحمام و المطبخ من الخارج ( آثار نشع ).

فى حالة تغيير المواسير يمكن شراؤها من نوع بولى اثيلين ( بلاستيك ) من محلات السيراميك الكبرى كا عبد العزيزالسلاب ( مدينة نصر ) أو مصطفى السلاب ( النزهة الجديده ) او اى محل آخر كبير و ابتعدى عن المحلات الصغيره علشان الغش. كذلك مراعاة عمل وصلة صرف للغساله و غسالة الأطباق فى المطبخ اذا سمحت الظروف.

اذ حدث تكسير فى احد الحوائط او اذا رغبتى يمكنك استبدال السيراميك فى الحائط التالف بنوع اخر يسمى ازمالدو ( موزاييك تايلز ) وهو عباره عن سيرايك قطع صغيره حوالى 2 سم × 2 سم بألوان جذابه جدا و متعدده و لكنه غالى سعر المتر من 70 الى 130 جنيه فيمكن استخدامه فى مسطحات صغيره و يمكن ايضا استخدامه فيما بين قطعتى المطبخ العلويه و السفليه و متوافر عند السلاب و شركات اخرى يمكنننى اعطاؤك اسمائها و عناوينها.

اذا رغبتى فى تغيير الطقم فيمكن شراء كومبنيشن و حوض ابيض غاطس من نوع كيلوباترا بمبلغ حوالى 800 جنيه و طقم خلاطات للمطبخ و الحمام ( من الفجاله ) و باقى الأكسسوارات ( شماعه - فواطه - صبانه ) بحوالى 600 جنيه .يمكن ايضا شراء رخامه بمبلغ 300 جنيه و اختيار الحوض غاطس فى الرخامه ( و هو ارخص من العادى )

مراحل العمل :
تغيير المواسير اذا لزم
معجنة و تجهيز السقف و الحوائط
تركيب السيراميك اذا حدث
تشطيب ( دهان ) السقف و الحوائط و النجاره .
تشطيب الطقم و الكهرباء.

التكلفه لحمام واحد و مطبخ فى حالة مواسير جديده
مصنعية 400-500 جنيه
خامات 800 - 900 جنيه
و اضافة تكاليف التشطيب السابق ذكرها
فى حالة تغيير السيراميك (حوائط و ارضيات )
التكلفة من 2500- 3500 حسب المساحة و النوع

اذا رغبتى يمكننى ان اكمل باقى البنود

[ماجد]

قدر الله و ما شاء فعل
لم اقرأ ما حدث الا بعد ان كتبت الردود السابقه
على العموم يمكن حد يستفيد منها

[بنت شعنونة]

معلومات قيمة جدا بجد

كملواها ياريت
هاتنفعنا لكنا



واهي تنفع لما الواحد يسافر

[ماجد]

سوف اكمل ( لله ثم للوطن )

ثالثا :تجهيز و ترميم الحوائط و الأسقف و النجاره ( ابواب و شبابيك )

اذا كانت الشقه قديمه فمعنى كده ان ارتفاع السقف عالى ( اكثر من 3 متر ) و لن تستطيعى دهانه بنفسك منعا للأصابات و يفضل الأستعانه بنقاش متخصص.
بالنسبه للحوائط و الأسقف :
اذا كانت الحوائط زيت او ورق حائط فيجب ازالة الطبقة القديمة بسكينة معجون او ورق صنفره خشن ( تشترى من اى محل حدايد و بويات و يشترى معها فرشه مشط ( فرشه عريضه عرض 10 او 15 سم ) و عدد 2 روله قطن و عدة سكاكين معجون و عدد 2فرشاه 2 بوصه و عدد 2 فرشاه 1 بوصه . و اذا كانت الحوائط بلاستيك فيكتفى بالغسيل بالماء مع الدعك بليفة التشطيب بتاعة المطبخ مع ازالة الأجزاء المفككه ان وجدت مع فصل الكهرباء ان كانت ساريه للوقايه من الحوادث.
كذلك بالنسبة للأسقف مع صعوبتها و يمكن ربط الأدوات بعصاية المقشه للوصول الى الأرتفاع مع وجود سلم آمن ذو قطعتين .

الخطوه الثانيه معجنة الحوائط باستخدام معجون بلاستيك جاهز على شكل بودره من انتاج شركة سكيب للكيماويات ( أفضل نوع موجود ) و يمكن شراؤه من شارع جسر السويس او من الشركة الأم ويكون بوضع طبقة رقيقة على الحائط الغرض منها سد مسام الحائط و تجهيزه لدهان البلاستيك و ليس عمل طبقة سميكه - اى حولى من ثلث الى نصف مم - اى يدوبك مسح بالسكينة عدا الحفر و النقرفيتم ملؤها تماما .
يمكن الكشف على عيوب المعجون باستخدام لمبة او كشاف ووضعه على الحائط و النظر حوله فى اتجاعات مختلفه و ستكتشفين فورا عيوب الصنعه .

بالنسبة للدهان اخترت دهانات البلاستيك لعدة اسباب :
اقتصاديه - سهلة التشغيل - تدارى العيوب - سهلة الصيانه - سهلة الأعاده.

ينقسم الدهان لطبقتين بطانه ( تجهيز ) و ضهاره ( تشطيب ) :
- البطانه وجهين بلاستيك ابيض رخيص يمكن شراء البستله 15 كجم بسعر من 70 - 110 ج للواحده من نوع سايبس او كيماكوت او باكين او اى نوع فى حدود هذا السعرتخفف فى الوجه الأول بنسبة 1 بلاستيك : 2 ماء و الوجه الثانى 1 بلاستيك : 1 ماء
و تدهن بالفرشه العريضه ( تسمى الشياطه ) مع مراعاة خبط الفرشه بعد غمسها بالدهان لكى تزيلى فائض الدهان قبل الدهان لعدم حدوث ظاهرة تسييل الدهان و تكفى البستله لدهان من 10 - 15 متر مربع وجهين و يفضل ان تبدأى بحائط غير ظاهر حتى تكتسب يدك حساسية الفرشه ثم بحائط ظاهر و فى الآخر الأسقف

- التشطيب وجه واحد من نوع كيما تون او يوتن ( من جسر السويس ) سعر البستله 15 كجم من 170 - 220 ج و يدهن بالروله القطن بدون تخفيف اطلاقا ( ابدا حذار من التخفيف بالماء ) حيث ميزة هذان النوعان انهما نصف لامعين و قابليتهما للغسيل بالماء مع نصوع اللون الأبيض ( Shine white ) و طول العمر واضافة الماء تطفىء اللون فورا .
و ميزة استخدام الروله هى مداراة عيوب الحائط و المعجون حيث تشكل حبيبات صغيره على الحائط تشتت النظر مع الحرص على عدم التسييل و البدء فى حائط غير ظاهر للتمرين . تستهلك كل غرفه بستله و نصف او 2 بستله .
و يمكن تشطيب السقف بالفرشه مع استخدام البلاستيك الرخيص بدون تخفيفه بالماء.

تنقع الفرش فى الماء بعد نهاية كل يوم عمل.
لم اتكلم عن الألوان لأننى افترضت انه الأبيض لكن فى حالة الرغبه فى التلوين يمكن شراء البلاستيك من يوتن ملون و مخلوط بالكمبيوتر حسب اللون المطلوب تماما و يزيد سعر البستله حوالى 50 جنيه للتلوين و يجب ان تكون الماكينه قادره على خلط 12 لون فاكثر و هى موجوده عند كبار موزعى يوتن و اسعارهم اقل
و التلوين يتم على دهان التشطيب فقط و لايتم على دهانات البطانه.
الألوان السائده حاليا البيجات و بعض الرماديات ( درجات خاصه تقرب للموف الفاتح جدا ) و اللمونيات.
اذا كان السقف عالى يمكن تلوينه ايضا بنفس لون الحائط مع عمل فاصل ابيض بينهما .

بالنسبة لقطع النجاره .
- تصنفر بصنفرة الخشب جيدا جدا و تمرر اليد عليها حتى تكون كالحرير و الجهد كله فى الصنفره بحيث تزال البويه القديمة تماما و يمكن استخدام ماء الأكسجين للمناطق الصعبه و ان كنت لا افضل ذلك .
- يتم معجنة المناطق المتضرره من الخشب باستخدام معجون زيت جاهز .
- يدهن وجهين من لاكيهات سايبس مخفف بالزيت ( يشترى من جسر السويس ) بالفرشاه الصغيره 2 بوصه و 1 بوصه . و يترك بين الوجه الأول و الثانى الفتره الكافيه لتمام الجفاف ( يعضم )
- يدهن وجه نهائى من اللاكيه بدون زيت ( وهو صعب لان الفرشاه ستترك اثرفى الدهان ) لكن مع التدريب سيتحسن الوضع و هذا العيب موجود مع احسن الصنايعيه .

- يجب احضار نجار لترييح الأبواب و الشبابيك قبل دهان الوجه النهائى ( اى جعلهم يفتحون و يقفلون بسلاسه ) مع نزع اكسسوار النجاره من كوالين و مقابض لضمان عدم تلوثهم بالبويات.

يتكلف المتر من البلاستيك الابيض حوالى 10-12 جنيه و قطعة النجاره حوالى 20جنيه .و لعمل مقايسه سريعه اضربى مساحة الشقه × 3 يعطيك مسطح الدهان.
شقة 150م مسطح الدهان 450م التكلفه لا تقل عن 4500جنيه.

يتبع .........

تم تعديل هذه المشاركة بواسطةماجد: 22 September 2004 - 07:47 AM

[ماجد]

رابعا :الأرضيات :

و هى اكثر ما يتكلف فى الموضوع لان المساحات بتأخذ فلوس كثيره من أى مادة مستخدمه . و الأنواع المتوافره هى بترتيب التكلفه :
1- قنالتكس أو موكيت:
لا أنصح بالموكيت تحت أى ظروف فقد اثبت فشله مع ظروفنا فى الأتربه و الصيانة و النظافه و الصحه العامه و ما يصلح لأوروبا قد لا يصلح لنا و ان كان و لابد يستخدم القنالتكس ( و يدعى اليوم ريكيت حيث اغلقت شركة المحاريث و الهندسه منتجة القنالتكس ابوابها و تبقت الشركة الأسلاميه للأرضيات منتجة الريكيت ) و يلصق على بلاط سنجابى ( سطوحى ) جيد مع الأبتعاد عن الرسومات (ترتيب البلاطات على الأرض ) و الألوان التقليديه فيه و يتكلف المتر بدون البلاط حوالى 30 جنيه و البلاط حوالى 9 جنيه .

2- سيراميك :
وهى مادة جيده جدا و مناسبة لظروفنا و يوجد فيها اختيارات مختلفه و متنوعه افضل الأنواع كيلوباترا . و تتكون البلاطه من طبقتين . الفخار و هى الطبقة الحامله للبلاطه وهى خامه محليه متوافره فى أسوان و الصينى و هى الطبقه اللامعه و المسئوله عن المظهر الجميل وهى خامة مستورده من الصين . كلما زاد سمك البلاطه الأجمالى زادت قوة تحملها وكلما زاد سمك طبقة الصينى ازداد سعرها .معظم السمك الجمالى يتراوح بين 6 مم و 10 مم للأنواع الفاخره .
يوجد للأنواع الفاخره فرزان اول و ثانى و للأنواع العادية فرز اول و ثانى و تجارى. فى اغلب الأحوال يمكن شراء الفرز الثانى بأمان خاصة لو كانت الكميات كبيره ( 100 متر فأكثر ) و النوع ذو سعر مرتفع اما الفرز التجارى فلا انصح به .
تفضل البلاطات الصغيرة المقاس عن الكبيره و خصوصا للمسطحات الضيقه كالشقق حيث تقل عيوب التصنيع و عيوب اللصق و ان كانت غير متوافره بسهوله كالأنواع كبيرة المقاس.
تكلفة مصنعية اللصق من 5 جنيه حتى 12 جنيه للمتر حسب نوع الشغل ( مجرد رص للبلاط او عمل دورانات و اشكال داخل البلاط ) و يضاف تكلفة مونة اللصق و سقية اللحامات حوالى 3 جنيه للمتر بالأضافه طبعا لسعر المتر من البلاط و الذى يتراوح من 22 جنيه الى حوالى 45 جنيه.
فترة حياة السيراميك من 10 - 15 سنه كحد اقصى فى الأستخدام يبدأ بعدها فى التنقير ( تجريح فى الطبقة المزججه ) خاصة فى أماكن الحركه و يتغير منظره بشده و يلزم استبداله للحفاظ على المنظر.

3- باركيه لصق :
و يتكون من طبقة بلاط سنجابى ملصوق عليها طبقة من الواح الباركيه سمك 1.5 سم او 1 سم .
و تعطى منظرا جذابا و بتكلفة معقوله و ان كانت قصيرة العمر حيث ان الماده اللاصقه تتآكل و تتحلل بسبب الرطوبه الموجوده فى الجو و يمكن استعمال اللواصق السريعه مثل الشعله و الحصان للصق و هى تعطى عمرا أطول للصق و يعيبها عدم تمكن كل الصنايعيه خاصة قليلى الخبره من استعمالها .
ايضا من عيوبها احتياجها للصيانه المستمره لمتابعة ما يفك منها و اعادة لصقه و كذا التلميع المستمر بالورنيش .
يتكلف المتر حوالى 60 - 65 جنيه بدون البلاط .

4- خشب :
وهى ماده جيدة جدا و ان كانت تحتاج للمحافظه و التلميع بصوره دائمه بالورنيش و هى من المواد التى أطلق عليها المواد الدافئه التى تشعرك بالحميميه .تحتاج أن تشترى الخشب من اجود نوع من الخشب السويد قبل التركيب و التصنيع بفتره و تخزنه بطريقه صحيحه حتى يجف تماما و ذلك لردائة النواع الموجوده بالسوق المصرى و احتوائها على نسبه عاليه من الرطوبه .
يكون سمك اللوح الواحد 2.5 سم و طوله 4 متر و عرضه 10 او 15 سم و يتم فى الورشه مسحه من الجانبين و تفريزه ( أى عمل نتواءات ليدخل فى بعضه عاشق و معشوق ) و يركب على شاسيه من الخشب ( تسمى علفه ) مكونه من الواح موسكى ( نفس الخشب السابق و لكن بقطاع 5 سم × 10 سم ) تسمى مراين و عوارض و تدهن ببيتومين اسود سائل بعد التركيب للحفاظ عليها من الرطوبه ثم تثبت عليها الواح الخشب و تسمى ( التطبيق ) و تمسمر بمسامير مائله و غير ظاهره و تعمل على الحائط وزره بارتفاع 10 أو 15 سم ( تفضل )
يمكن استخدام الأرضيات الخشب فى كل الأماكن بالشقق و ان كان المعتاد استخدامها فى غرف النوم.
يتكلف المتر حوالى 80 جنيه.

5- بورسلين :
من الأرضيات الفاخره و هو عبارة عن طبقة من الصينى بكامل سمك البلاطة ( 10 مم ) و يوجد منه نوعان .عادى و قطع ليزر.
الأول يبلط بالطريقه العاديه و الثانى تلصق البلاطات ببعضها بحيث لا يكون بينها فواصل ظاهره يمكن شراء قطع الليزر من الفرز الثانى بسهوله
تكلفة المتر من البلاط 70 - 120 جنيه
تكلفة المتر من المصنعي 7 - 12 جنيه
تكلفة المتر من مونة اللصق حوالى 4 جنيه

6- باركيه مسمار و الرخام :
و هى افخر انواع الأرضيات و يمكن استخدام النوعين معا ( وهى موضه ) و يتكون الباركيه من علفه كالسابق ثم تطبيق الواح بينها فواصل كبيره بدون تفريز او مسح ثم طبقة الواح الباركيه من الزان او الأرو .
بالنسبة للرخام نفس خطوات لصق البورسلين قطع الليزر
يتكلف المتر من أيا من النوعين من 220 جنيه - 400 جنيه حسب نوع الباركيه او الرخام المستخدم

أرجو ان اكون قد اجبت على استفساركم و انا فى الخدمه لزيادة الأيضاح او لذكر بند نسيته.

تم تعديل هذه المشاركة بواسطةماجد: 24 September 2004 - 02:56 AM

[se_ Elsyed]

الله يسامحكم ...

قمت بقراءة هذا الموضوع .. فسخنت وتقمصت دور الأسطى بليه السباك .. حيث إن الكومبنيشن بتاع الحمام كان بايظ وقولت أغيره انا بنفسي .. وأديني عندي عالدة في البيت وكله هايبقى تمام .. روحت أشتريت ماكينة كاملة ( عوامة ومقبض وحركات ) كل ده في كارتونة .. وأول ما أخرجت المحتويات ضربت أخماس في أسداس ولم افهم مين مع مين ومين بيعمل إيه ... فروحت زي الباشا أديت الحاجات دي للفنيين اللي في شركتنا وقولت لهم جمعوا الحاجات المتبعتره دي مع بعضها وانا هابقى أفك الماكينة القديمة وأركب دي .. وروحت البيت ... إني اعرف أفك حاجة .. أبداً .. لأن الميه خلت المسامير والصواميل جامدة ولم ينقذني غير مجيء أخويا الصغير وقام هو بالمهمة ..

وأدي اخرة التجارب الشخصية بتاعة شعنونة .

[se_ Elsyed]

حقيقةً إستمتعت جداً بالمعلومات التي أوردها اخونا ماجد ( وشكله كده نجار مسلح ومخبي علينا )

بس انا عايز أستفسر عن حاجة لو سمحت يا ماجد :

- بالنسبة للباركية .. أنا بأفضل إنه يكون في غرف النوم وليس بباقي الشقة ... فهل الباركية يتحمل بشكل كافي ولا يوجد مشاكل تتعلق بتركيبة .. يعني ما جيش بعد فترة الاقي الخشب في الأرضية بقى فيه فرق بينه وبين بعضة وبالتالي الميه تنزل تحتية وتعملي برك مياه ... ولا ده يعتمد على الفني اللي هايركبه ؟

وكمان فكرة جيدة جداً بتاعت التخلص من رطوبة الخشب وسهلة التطبيق

[ماجد]

أخى العزيز se_ Elsyed

لا مانع طبعا من استعمال الباركيه فى أى مكان و لو انه فى غرف النوم لا يظهر جماله نظرا لطبيعة فرش غرف النوم و المساحات المتوافره حاليا الا اذا كنا نتكلم عن مساحات 5متر×8 متر او أكبر اما 4متر ×5 متر او أقل فتجد انه الذى سيظهر من الباركيه هو مجرد مشايات بين السرير و الدولاب عرضها حوالى المتر و لذلك فالأوفر تتعمل خشب بس.

بالنسبة للفوارق بين الخشب. لا تظهر هذه المشكله فى أرضيات الباركيه نتيجه لصغر حجم الواح الباركيه لكن من المفروض طبعا أن الباركيه ( خصوصا المسمار ) يحتاج لحرفى عالى مش أى كلام .
ثم من اين يجىء الماء فمن البديهى طبعا أن الباركيه يلمع بالورنيش فقط ولا يستخدم الماء اطلاقا فى أى مرحله من مراحل التنظيف و الا فبعد سنه بالكثير تحتاج لصيانه كبيره جدا ...

وفى الخدمه دائما

نجار مسلح / ماجد ax: