اذهب إلى المحتوى
محاورات المصريين

كابتن فيليبس و ثروتنا السمكية


Scorpion

Recommended Posts

كنت اشاهد انا و زوجتي فيلم " كابتن فيليبس" للرائع توم هانكس ... و هو فيلم يحكي قصة حقيقية لسفينة امريكية " مارسك ألاباما " تم اختطافها علي يد قراصنة صوماليين .. و كيف وجهت البحرية المريكية سفنها و طائراتها لتخليصهم .. و الذي حدث بالفعل بعد سلسلة مريرة من المحاولات .. و كعادتي في الفشخرة في المقارنة ببلدي ..ذكرت لها ان شيئآ مماثلآ حدث مع مركب صيد مصري و لم نكن في حاجة للمارينز و لا البحرية لتخليصهم لأن صيادين المركب قاموا بالواجب و زيادة و لقنوا القراصنة درسآ .. و اتوا بهم مكبلين الي مصر ..

و لكن الشعور بالعنترة و الفخر تحول فجأة و انا اروي لها تلك الحادثة الي نقيضه عندما سألتني بعفوية :

- و هما اللي وداهم هناك ؟

- هو ايه اللي ايه اللي وداهم هناك .. انتي اتعديتي من الإخوان و الا ايه ... بقولك مجموعة صيادين مصريين اتخطفوا و هما بيصطادوا في الصومال و من غير مارينز و لا هانكس و لا فيليبس .. ربطوهم زي الخرفان و جابوهم لمصر .. يعني خطفوا اللي خطفوهم ...

- والله فهمت .. انا بسأل ايه اللي وداهم يصطادوا في الصومال من اساسه .. يعني قدامهم البحر الأحمر كله .. و المتوسط .. و النيل .. و البحيرات .. يسيبوا كل ده و يروحوا لحد الصومال يصطادوا ليه من اساسه ؟

بصراحة لجمتني .. و طلعت منها بتريقة نظام السمك الصومالي فيه فوسفور اكتر من المصري و كده يعني ..

بابتسامتها المعهودة قالتلي . طيب .. ممكن نشوف بقية الفيلم ..

كملنا الفيلم .. لكن من غير ما اتابع النهاية ..

ايه اللي وداهم هناك ؟؟

صحيح .. اللي وداهم هناك ... هي بحورنا و انهارنا و بحيراتنا ما بقاش فيها سمك بجد ...

كل اللي حيلتي زمزمية أمل... و إزاي تكفيني لباب القبر


"صلاح جاهين"


رابط هذا التعليق
شارك

من حوالي 18 سنة كنت في اسوان...

و اول مرة اشوف يعني اية سمك بلطي وزن السمكة 3 كيلو او يمكن اكثر......

بحيرة ناصر اكبر بحيرة صناعية في العالم....مش هاقولك ان السمك ايلي فيها يكفي مصر... لا دة يكفي شمال افريقيا كلة....

البحيرة عليها مصنع اسماك (بيعمل فيلية) لاحد رجال الاعمال... زي ما تقول واخد البحيرة كلها لحسابة...حق انتفاع او ايجار..ايلي تسمية.

المهم ان اي صياد ينزل البحيرة يصطاد لازم يورد السمك بتاعة للمينا بتاعة البحيرة و هي تشترية منة ب حوالي 25 قرش الكيلو ايامها...و بعد كدة المصنع يجهز السمك تجهيز بسيط جدااا و يبيع الكيلوا ب 10 جنية.. :)

بعض الصيادين كانوا بينزلوا البحيرة و يروحوا بيبعوا السمك لمهربين سمك علي ضفاف البحيرة بعيد عن المينا بس للاسف في اماكن جبلية ناحية ابو سمبل ومش اي حد يعرف يوصلها...
المهم السمك الصياد كان بيبيعة بحوالي جنية او جنية وربع الكيلو.. يعني 4 أ ضعف سعر المينا...
السمك ايلي كان بيتهرب من اسوان كان بيعمل حوالي 5 جنية الكيلو وقتها (فيلية) يعني نص سعر المصنع..و المهرب بيكسب فية 4 جنية ...

في المكان ايلي كنت شغال فية كان معانا ناس بتعرف الامكان ايلي السمك المتهرب بيتباع فيها...
مش عايز اقولك اني كنت بافطر و اتغدي و ااتعشي سمك بلطي فيلية ما دوقتش زية في حياتي....و الكيلو بجينة... :)

قيس علي كدة نفس الوضع في كل سواحل مصر....
هاتلاقي ناس مسيطرة علي اماكن الصيد...
و في رجال اعمال كثير قوي من مصلحتهم ان الصيد في مصر يقف نهائيا علشان يعرف يسوق السمك المستورد بتاعة...او التونة المعلبة ايلي بيجيبها من برة...اوحتي يسوق للحوم و الفراخ ايلي شغال فيها...
وجود بروتين رخيص و نضيف و صحي زي السمك بسعر قليل ... هايقضي علي تجار مواشي و فراخ كتير...




رابط هذا التعليق
شارك

لازلت اؤكد أن مقولة

الحاجات متعددة و الموارد محدودة

هي مقولة خبيثة من شأنها زرع روح التنافس البغيض و الاحباط لمن لا تقبله طبيعتهم

و حيث أنني لا ارتاح لفكرة " محاربة" التجار السمان او ما يسمونهم الحيتان

أميل أكثر لمفهوم أننا نعيش في كون يمتاز بالوفرة

لدينا ثروات هائلة في مصر

و مهما حاول الحيتان السيطرة و وضع الخطط للاستيلاء على خيرات البلد

لازال هناك الكثير من الخيرات تكفي و تزيد عن أطماع الطامعين

لكنها

تحتاج للبحث و التنقيب

نحتاج ل " العمل "

العمل الذكي و ليس العمل الشاق

Don't work hard

Work smart

كما نحتاج ل " الثقة "

فلو صادفت في حياتك عشرة او عشرين مسؤول فاسد " و هو عدد مبالغ فيه بالطبع فكثير من الناس لم يلتقي في حياته كلها بواحد منهم شخصيا بل يعتمد على السمع من حكايات الناس أو أخبار الحوادث"

حتى لو صادفت هذا العدد

فلازال هناك الاف المسؤولين الشرفاء

و الذين سيسعدهم القيام بدورهم في " تحجيم" فساد هؤلاء التجار و رجال الأعمال

دعوة لإعادة الثقة

في أن الكون له خالق لا يرضى بالظلم و إن طال وقته

و أن لهذا الخالق العظيم عباد في الأرض يستعملهم لخدمة عباده

أعد شحن طاقتك

حدد وجهتك

و اطلق قواك

رابط هذا التعليق
شارك

الفاضلة عبير. أتفق معك تماما في رؤيتك و كنت أقول لم يبعثر الإتهامات بالفساد على الجميع ، كنت أقول جرب تحدي الورقة و القلم و هي كتابة أسماء قل ثلاثين من معارفك و زملاءك و أقاربك و السؤال كم من هؤلاء فاسد ؟

ما سبق كان إستهلالا لابد منه

الفاضل سكوربيون أنا فعلا تسائلت أكثر من مرة لماذا يتم إحتجاز صيادين مصريين في المياه الإقليمية للآخرين. و لكني في الحقيقة لم أصل إلى وضوح الفاضلة أم جونيور. إيه اللي وداهم هناك ؟

كان يلفت نظري أخبار الجهود المبذولة لمنع تهريب السمك. بين المحافظات و كذلك تهريب بعض المنتجات و لم أفهم " الفولة " التي شرحها الفاضل. ( مهندس تحكم )

مواطنين لا متفرجين


رابط هذا التعليق
شارك

  • بعد 3 سنة...

موضوع يستحق الدراسه انقله لكم كما هو كوني غير متخصص ولكم اراءكم 
 

-مَن المستفيد من عدم صيد التماسيح في بحيرة ناصر ؟؟؟!!!-
تخيلوا.. سايبين ٤٣ ألف تمساح، و في دراسات أخرى ٨٠ ألف تمساح،
في بحيرة ناصر، إللى طولها ٣٥٠ كيلو متر ، و مساحتها «مليون فدان مائي»
تتغذى (بالهنا و الشفا) على أرقى و أغلى أنواع السمك،
و الشعب الغلبان مش لاقي الفول (كيلو الفول البلدي= عشرة جنيه)!!!..
لمعلومات سيادتك: نص هذه التماسيح (توحَّش)،
من أيام الفراعنة (كان التمساح رمز القوة)،
و التمساح المتوحش (طوله ٦ متر، و وزنه ٩٥٠ كيلو جرام،
و (أنثى التمساح تبيض من 40 إلى 60 بيضة سنوياً)،
و يأكل في المتوسط ٢٠ كيلو جرام سمك -يومياً-،
و بين المتوسط و الصغير، التمساح الواحد بياكل ١٠ كيلو جرام في اليوم!!!.
-بحسبة بسيطة:
------------------------
-نفترض أن:
عدد التماسيح ٤٠ ألفا X ١٠ كيلو جرام يومياً = ٤٠٠ طن سمك يومياً،
يلتهمها (أسيادنا) التماسيح !!!..
يبقى في السَّـنَة يأكلوا= ٤٠٠ طن X ٣٦٥ يوماً = ١٤٦ ألف طن !!!.
-السؤال:
-------------
إحنا بنصطاد من البحيرة، عشان الشعب يأكل، كم طن في السنة؟.
الإجابة:
-----------
٢٠ ألف طن !!!..
-اسألوا (هيئة الثروة السمكية)،
و معهد (أبحاث الأسماك)، و العشرين جهة التابعة في أسوان:
-حضراتكم بتصرفوا كم على:
(المفارخ -المباني الحكومية -الكهرباء المدعومة -الأسانسيرات -البوكسات-الأوتوبيسات- المرتبات- الحوافز- التليفونات- التكييفات، ... إلخ)،
على الـ ٢٠ ألف طن اللي بتطلَّعوهم من البحيرة؟؟؟!!! ..
يبقى الكيلو وقف بكام؟!..
و الخسائر كام مليون؟!..
-و الحل:
--------------
١- نصطاد التماسيح الـ ٤٠ ألفا،
(يوجد حول العالم شركات متخصصة في الصيد بدون استخدام الرصاص)،
حتى لا يتم (تخريم) الجلد،
و الجلد الواحد ثمنه ٤ آلاف دولار (للتمساح النيلي البالغ)..
٤٠ ألف تمساح X ٤ آلاف دولار = 160 مليون دولار ،
و بالمصري (1.232.000.000) مليار ..
لو موجود بقى 80 ألف تمساح X ٤ آلاف دولار= 320.000.000 دولار ،
و بالمصري (2.432.000.000) مليار* يعني فلوس و فوسفور* !!!..
-معلومات:
-------------------
-(ميزانية معاهد بحوث الصحراء) المسؤولة عن ٩٤% من مساحة مصر
نساوي ( ٢١ مليون جنيه) في السنة..
-و (ميزانية البحوث الزراعية) في مصر كلها ١٣٠ مليون في السنة..
-و لو رمينا زرّيعة أسماك -بحوالي 200 مليون مثلا في السنة-،
ده كيلو البلطي هيوصل للمستهلك بـ ( 6 جنيهات ) أو أقل !!!..
و (الـ 200 مليون) بالنسبة لاستثمار التماسيح لا يُذكَر..
٢ـ نحتفظ (بالوِلدَة) أي الأحجام الصغيرة، و ننشيء ٣ مزارع تماسيح،
في (الأقصر- أسوان- أبوسمبل) و نجعلها مزارات سياحية،
(و عندنا السُّيّاح هناك) الشباب يشتغل،
و نكسب من رسوم الدخول+ مقاهي+ مطاعم+بازارات ،
لبيع المصنوعات من جلد التماسيح (أحزمة-شنط يد-جواكت-أحذية)
هي الأغلى في العالم!!!..
-و الأهم:
--------------
بما أننا (أولى دول العالم) في استيراد (الأسماك المجمدة "النفايات")
من شرق آسيا و أوكرانيا ،
-(مصر تستورد ٤٢٠ ألف طن (سمك مجمد نفايات)- سنوياً!!!.
٣ـ هنوفر الدولارات (اللى بنستلفها)، و ثمن الأدوية اللي بنتعالج بها،
من سموم النفايات المستوردة!!!..
و الشعب يآكل السمك النظيف،
اللي التماسيح بتاكله (قشر بياض - بلطي نقي - بياض و...)،
و بما أن سمك البحيرة، يتغذى على الطحالب (مجاناً)،
يبقى تكلفة كيلو (البياض) أو البلطي هي:
(الحراسة + الصيد + التبريد + النقل حتى العواصم)= خمسة جنيهات (بالسرقة)، ممكن تبيعها المجمعات الحكومية بمكسب ٢٠% = كيلو قشر بياض أو بلطي نقي، للمستهلك بـ ٦ جنيهات، أرخص من الفول!!!..
-يا سيدي:
-----------------
عندنا بحيرات : (المنزلة-البرلس-البلاح-مريوط-إدكو-قارون-... إلخ)،
أصبحت مجاري للصرف الصحي، و تعرضت للتجفيف بالاعتداءات،
و لم يتم تطهيرها،
و تم غلق بواغيزها على البحر،
و لم يبقَ لنا نظيفا سوى (بحيرة البردويل)!!!..
-و الحل:
--------------
الكراكات و الأوناش و المعدات المستخدمة الآن في حفر قناة السويس،
تنتقل بعد نهاية المشروع في أغسطس،
بنفس المنظومة لتطهير البحيرات و إزالة التعديات،
على أن يتم تجهيز (الذريعة) في الوقت نفسه،
بعد ٦ أشهر لن نستورد كيلو جرام واحد!!!..
-باختصار:
--------------
في أيدينا، نأكل الشعب المصري سمك نقي و نظيف ،
و تصبح الوجبة الشعبية:
(سمك مشوي، مقلي، مملح، مدخن)،
مع البطاطس أم ٣٠ قرش الكيلو في الغيط،
و ناكل: "فش" أند "شبس"!!!..
grin رمز تعبيري
-ملحوظة:
--------------
المغرب (من غير بحيرات ولا أنهار، بتصدر بـ ٢ مليار يورو :
(سردين معلب، و أسماك مجففة -و كل ما تتخيله- حتى رؤوس و ذيل السمك)،
و إحنا بنستوردها منهم علف للدواجن.
-السؤال للتسعين مليون «كلامنجي»: (إنتي تشتغلي إيه)؟!!! ..
طالما بنستورد كل حاجة !!!..
السمك للتماسيح.. والفول للمصريين!!

 

 

-محمود عمارة

  • شكراً 2

كل اللي حيلتي زمزمية أمل... و إزاي تكفيني لباب القبر


"صلاح جاهين"


رابط هذا التعليق
شارك

فعلا يا سيدي الفاضل المستخبي لازم يبان  و فعلا الأغلبية شرفاء و جرب تحدي الورقة و القلم.

ازاي كل يوم و التاني اسعار السمك تغلى ازاي السمك يتحول لسلعة استفزازية  في مصر ذات البحرين و النيل و البحيرات ،  جاء قراءة الموضوع كاملا … ما هو معني تهريب السمك ؟ ما هو معنى وجود عشرات الالوف من التماسيح دون استغلال  

مواطنين لا متفرجين


رابط هذا التعليق
شارك

انشئ حساب جديد أو قم بتسجيل دخولك لتتمكن من إضافة تعليق جديد

يجب ان تكون عضوا لدينا لتتمكن من التعليق

انشئ حساب جديد

سجل حسابك الجديد لدينا في الموقع بمنتهي السهوله .

سجل حساب جديد

تسجيل دخول

هل تمتلك حساب بالفعل؟ سجل دخولك من هنا.

سجل دخولك الان
  • المتواجدون الآن   0 أعضاء متواجدين الان

    • لا يوجد أعضاء مسجلون يتصفحون هذه الصفحة
  • الموضوعات المشابهه

    • 0
      تولى الدولة المصرية اهتماما كبيرا بمشروعات الثروة السمكية خلال 10 سنوات باعتبار أن مصر تمتلك أكثر من 10 بحيرعرض المقال كاملاً
    • 1
      مؤكد حضرتك سمعت  هذا العذر "أدفع صيانة ليه ؟ أنا مش موجود" من أحد جيرانك في العمارة التمليك التي تقطن أحد شققها. ما سبق كان إستهلالا لابد منه هذا العذر  يتكرر كثيرا  إما على بلاطة  بنصه  عاليه و إما بقدر كبير من الملاوعة ، و النتيجة أن صيانة المبنى  لا تتم على أصولها أو لا يتم منها إلا الضروري جدا. و تتدهور حالة العمارة و خاصة إذا كانت عمارة كبيرة  هل زار أحدكم عمارة الدكاترة  في وسط البلد بالقاهرة   عمارة مزرية أشبه ما تكون بعقار في منطقة عشوائية. من الناحية القانونية - نظري
    • 1
      من اجل ثمار ثورة 25 يناير هى علو قيمة الانسان المصرى بالخارج والداخل بعد ان كان الشباب خجولا من جنسيته المصرية له ان يعتز ويفخر بمصريته لانه اصبح فخرا لشباب العالم http://www.youtube.com/watch?v=h4jl3BdUP3U
    • 0
      أوعى حد يقول احترام الكبيرإديلو ا يا ثورجي إديلوا ولا يهمك كبار إيه وبتاع إيه وجيش إيه وشعب إيه إحنا بتوع الثورة إحنا بتوع الشهدا السيد الأستاذ الدكتور العلامة دومة يطالب برحيل المجلس العسكري فورا سر يا دومة و كلنا ورائك واحد اسمة أحمد دومة من الشباب مع عمرو اديب ومداخلة من اللواء اسماعيل عثمان و دومة بيقولة انا مش بعد معاكو و بهتف ضدكو من شهر و اللواء بيقولة اهتف حد عملك حاجة ؟؟!!! قاله ايوه و أنا طالع من عند البرادعى اتقبض علية و غموا عنيه اللواء قالة أنت كذاب اللواء بيقول إحنا نفسن
×
×
  • أضف...