اذهب إلى المحتوى
محاورات المصريين

ما موضوع الألتراس؟


فــيــروز

Recommended Posts

كنت أقرأ فى إحدى الجرائد عمودا يكتبه "أحمد شوبير" و وجدته يتحدّث عن شئ اسمه "الألتراس" و يحذّر من سلوك أصحابه !!

كانت هذه هى المرّه الأولى التى أقرأ فيها هذه الكلمه لدرجة أنّى لا أعرف كيف تنطق .. المهم بحثت على النت و وجدت أنّها تشبه رابطة مشجّعى النادى .. أى نادى و ليس نادى بعينه لكن يبدو أنّها تحظى بامتيازات خاصه خلال حضور المباريات كما أن على سلوكها بعض التحفّظات لأنّه فيما يبدو يمتاز بالعنف و بعض التطرّف !!

ما موضوع الألتراس هذا و متى بدأ فى "مصر" و ما الذى يختلفوا فيه عن المشجّعين العاديين !!

"أَمْ مَنْ يُجِيبُ الْمُضْطَرَّ إِذَا دَعَاهُ وَيَكْشِفُ السُّوءَ وَيَجْعَلُكُمْ خُلَفَاءَ الْأَرْضِ أَإِلَهٌ مَعَ اللَّهِ قَلِيلًا مَا تَذَكَّرُونٌَ"

صدق الله العظيم

-----------------------------------

قال الصمت:

الحقائق الأكيده لا تحتاج إلى البلاغه

الحصان العائد بعد مصرع فارسه

يقول لنا كل شئ

دون أن يقول أى شئ

tiptoe.gif

مريد البرغوثى

رابط هذا التعليق
شارك

حسب علمي التراس يافيروزه يعني مشجعين...

.هو المعنى اللفظي بتاعها مختلف ....ULTRA يعني (فائق)

بس المشجعين الانجليز اول من اخترعو حاجة اسمها جماعة التراس....ودول ليهم قوانين خاصه بيهم في التشجيع...يعني مايتموش....ومايتخانقوش..يغنو اغاني سوا....يعملوا لوحات ..وحاجات زي كده

وبعدين انتشرت الحدوته بين فرق اوروبا....بقى في التراس برشولوني اسباني...وريال مدريدي...والتراس رومايي اطالي....والماني وفرنسي وبلجيكي و غيره وغيره

وبعد كده اتنقلت للعرب..ولمصر في التراس اهلاوي.. واسمعلاوي ...وزمالكاوي ....وحتى بقى عندنا التراس بني عبيدي :hearts:

والموضوع ليه فترة كبيره ف مصر....وعمال ينتشر ......وانا بشجع انتشاره...لانه بيعتمد على التشجيع المثالي الحضاري اللي بعتمد على الدخلات واللوحات والاغاني الجماعية.....

موضوع المقال بتاع شوبير مابيتهمش اللاتراس كجماعات....انما في شوية شباب مساخيط متهوريين كانوا ضمن اللاتراس بتاع فريق من الفرق وعملوا مشكلة.... واساسا اللي بيخرج عن النظام بينطرد من اللاتراس بتاع فريقه!!!

على فكره انا خلفت وجبت بنت وسميتها فيروز،،،،،وزعلان منك حيل حيل انك ماجتيش تهننيني...اخث عليكي اخث !!!

يارب الرحمه..!!

رابط هذا التعليق
شارك

الموضوع ابعد واعمق من ان يكون مجموعتة مشجعين

لكنه موضوع شباب ذو حماس وحميه ونشاط وطاقة ... كل هذا لم يُستغل بشكل سليم فبالتالي خرجت تلك الطاقات في شكل تعصب

نرجع للالتراس

بعد كأس الامم 2006 حدث تحولاً في طريقة التشجيع الكروي الحضاري بمصر وبقى في روابط للتشجيع محترمى قوي قوي وذات توجهات ايجابية وتشجع بإحترام

والظاهر ان ده ماعجبش ناس كتير فأنشقوا عن روابط التشجيع المعتادة السلمية وعملوا حاجه اسمها الالتراس وبقى لهم زي مميز وبقى لهم روابط بساهموا فيها بالمال الجهد وبقوا في كل مباراة هامة بيعملوا حاجه اسمها " دَخله " بفتح الدال ..

وبصراحة عيال مجانين وبيصرفوا مصاريف كتيرة جداً على مزاجهم وعشان يشجعوا فريقهم بطريقتهم

يعني على سبيل المثال .. هذا الصيف حضرت مباراة بين الاهلي والزمالك في كأس افريقيا .. وطبعاً كنت قاعد في مدرجات الاهلي .. وفجأة لقيت عشرات الشباب اللي زي الفل وكل واحد داخل وشايل كرتونة تقطم الوسط وعرقان وحالته حاله ..

اتاريهم جايبين اوراق بلاستيكية مختلفة الالوان حجمها حوالي 50 سم وبيفرقوها - بلوشي طبعاً - على كل من في الاستاد ( احنا هنا بنتكلم عن ييجي 30 الف مشجع مثلاً لفريق الاهلي ) وبعدين كل مجموعة بتشرح للناس ترفع الاوراق دي بطريقة وبترتيب معين في مناسبات معينة .. مثلاً لما اللعيبة تنزل تسخن وبعدين مش عارف امتى وهكذا ... واستغربت وسألت واحد فيهم ايه كل الكراتين دي وكلفتكو كام ؟

قال لي : والله العظيم مكلفانا 20 الف جنيه وبنقعد نجهز فيها قبل المباراة بأسابيع !!!! عشان مباراة واحدة فقط

طبعاً الاوراق البلاستيكية دي بتكلف ... وكل واحد بياخدها معاه وهو مروح او بتترمي َ!!!!!!!!!

كله كوم والدخله كوم تاني ...

فالدخلة عبارة عن لوحة ضخمة يبلغ عرضها ييجي 40 متر ... ودخل شوية عيال عتاولة .. يعني واكلين ومتغذيين وشايلين حاجات ملفوفة وشكلها تقيلة جادً ودول غير العيال اللي شايلين الكراتين لان الكرتونة مهما كانت مش هاتزيد عن 20 كج ..

لكن اللوحة دي كانت ملفوفة بطريقة معينة وفردوها في المدرجات من الاسفل وطلع العتاولة في المدرجات اللي فوق وهما رابطين اللوحة بأحبال ضخمه واول ما نزل اللعيبة راحوا شدين الحبال - شد القلع المركب هاتطلع يا ريسسسسسسس - وبانت لوحة الدخلة اللي اول ما شوفتها وقعت على الارض من الضحك

فكانت عبارة عن واحد على شكل احمس نافخ الهكسوس .. بس احمس ده لابس فانلة الاهلي .. وماسك واحد هكسوسي من شعره ومنيمه على الراض وعمال يعزق في دماغه بشومة صغيرة .. والهكسوسي ده كان زملكاوي طبعاً

ما عرفتش اجيب صور اللوحة دي

لكن دي لوحه دخله في الماتش اللي بعده بأسبوعين في كأس السوبر المحلي ( وكل مباراة بدخلة مختلفة )

اوعى وشك

9103-DSC03272.JPG

9103-DSC03267.JPG

9103-21.jpg

وغير اللوحات الاخرى الصغيرة طبعاً

9103-21.jpg

ودي دخلة الزمالك المؤدبة الغلبانة اللي بيقولوا فيها ... الاسطورة لن تنتهي ولكنها ستستمر !!!!!!

:hearts:

ما علينا

رويداً رويداً تحولت تلك الالتراسات الى قوى ضغط ولوبي لا يُستهان به وانسحبت من الساحة معظم الروابط اللي كانت بتشجع بعقل

وبالتالي اصبحنا نرى اشياءً لم نكن نراها من قبل

على سبيل المثال

من 4 ايام كانت هناك مباراة في كرة السلة بين الاهلي والزمالك ..

الزمالك داخل المباراة وهو في المركز الاول يليه الاهلي والاتحاد السكندري

وقدم الفريقان مباراة في منتهى القوة والمُتعة وانتهت المباراة بفوز الاهلي واستمر الزمالك اولاً بفارق نقطة واحدة

وفجأة كشر الالتراوسيون عن انيابهم وهاتك يا حدف كراسي بلاستيك على فريقهم المهزوم مع انه عمل مباراة في منتهى الجمال

وبالتالي كسروا صالة الاهلي واصبح الجميع يجري هنا وهناك خشية ان يصيبه كرسي التراساوي طائش

ولاول مرة ارى الدموع في عيون اللعيبة الزملكاوية اللي تكلم بعضهم وقال : ان كوننا في المركز الاول فهذا انجاز في ظل تخبط وعدم استقرار اداري بالنادي وفي ظل عدم حصولنا على مرتبات لعدة شهور يعني بنلعب بالمجان ومع ذلك نؤدي وننافس

على الجانب الاخر لقيت شوية عيال التراوسيون اهلاويون عاملين لوح كبيرة ... تخيلوا مكتوب عليها ايه ؟

NAZIS AHLY t_2_180px-Nazi_Swastika.svg.png

وتكرر الموقف بالامس من جماهير الاسماعيلي اللي كسرت ملعبهم بعد هزيمتهم المستحقة من الاهلي

وهكذا يستمر الانفلات الرياضي المستمد من الانفلات الاخلاقي والامني الموجود في مصر نتيجة عدم وجود رئيس يحكم مصر او حكومة تدير اموره

فهمتوا حاجه ؟

الأحـــرار يؤمنون بمن معه الحق ..

و العبيــد يؤمنون بمن معه القوة ..

فلا تعجب من دفاع الأحرار عن الضحية دائماً ..

و دفاع العبيد عن الجلاد دائماً

رابط هذا التعليق
شارك

بسم الله الرحمن الرحيم

صدقت يا سي السيد

مصر لم يعد بها حكومة

لم يعد بها أمن ... الأمر في مباراة الإسماعيلي أمس لم يتوقف عند حدود تكسير المدرجات بل امتد لتكسير المحال التجارية المحيطة بالاستاد والسيارات وخلافه.

أحد جماهير الإسماعيلي شاهد عيان قال بنفسه أنهم قاموا بقلب سيارة تحول لوحات ملاكي اسكندرية وكسروها تماما ... أي سيارة في محيط الاستاد كانت عرضة للتكسير والتلف .. في غياب الأمن ... الأمن الذي نرى جحافل أمنه المركزي فقط في حالة المظاهرات التي إن زادت لا تزيد عن ألف أو ألفين.

والسلام عليكم ورحمة الله وبركاته

اللهم احفظ مصر من الفتن؛ ما ظهر منها وما بطن

اللهم احفظ مصر من الفتن؛ ما ظهر منها وما بطن

رابط هذا التعليق
شارك

يا جنرال ابو الاسيان الموضوع ما يقتصرش علي كده....

انت بتقول حضرت ماتش واحد....

انا تقريبا حضرت كل ماتشات الأهلي الافريقية في القاهرة البطولة اللي فاتت ماعدا النهائي و ماتشين الزمالك...

يعني حوالي 5 ماتشات....

كل ماتش بدخلة مختلفة و غنوة مختلفة....الي جانب برده لافتات مختلفة و مصاريف مهولة....

و لازم زي ما قلت يختلفوا كل مرة و الا تبقي عيبة في حقهم....

يعني انحراف كامل عن مفهوم الاتراس الي ذكره أبو النسور في مداخلته.....

الي جانب طبعا التعصب في التعامل قبل و اثناء و بعد المبارة....

و شهدنا جميعا جماهير المصري البورسعيدي علي مر تاريخها....

و الاسمعلاوية و التعصب الاعمي ضد الاهلي....

معين الدمع لن يبقى معينا .... فمن اي المصائب تدمعينا

زمان هون الاحرار منا .... فديتِ وحكم الانذال فينا

ملأنا البر من قتلى كرام .... على غير الاهانةِ صابرينا

كأنهمُ اتوا سوق المنايا .... فصاروا ينظرونَ وينتقونا

لو ان الدهر يعرفُ حقَ قومٍ .... لقبل منهم اليدَ والجبينا

عرفنا الدهرَ في حاليهِ .... حتى تعودناهُ ما شدا ولينا

فما رد الرثاء لنا قتيلا .... ولا فك الرجاء لنا سجينا

سنبحث عن شهيد في قماطٍ .... نبايعه امير المؤمنينا

ونحمله على هام الرزايا .... لدهرٍ نشتهيهِ ويشتهينا

فأن الحق مشتاق الى ان .... يرى بعض الجبابر ساجدينا

رابط هذا التعليق
شارك

بالنسبة لى و ربما قدرى أنى لا أفهم فى كرة القدم بل ربما لا أفهم فى الرياضة عامة و الأرجح أفهم الرياضة كمعنى جميل و كمنافسة راقية كنت أشاهدها أيام صالح سليم و الكابتن لطيف .. الآن الكرة بالنسبة لى شيء ممل و رديء و لولا والدة زوجتى التى تبلغ من العمر ثمان و ثمانون عاما و التى تستمتع بالكرة و لولاها لما شاهدت أى شيء عن الكرة.

ما سبق كان إستهلالا لابد منه

لفت نظرى هذا الموضوع و شخصيا أضاف لمعلوماتى الضحلة فى مجال الكرة إنطباعى السابق أن ال ultras هم مجموعة من مشاغبى كرة القدم و بالذات الإنجليز منهم ، اليوم بهذا الموضوع عرفت المزيد.

اليوم فى جويدة الأخبار تحقيق عن ال ألتراس فى مصر ربما يضيف جديدا لهذا الموضوع

http://www.elakhbar.org.eg/issues/17698/0900.html

واضح أن التغطية الصحفية تركز على الجانب الأمنى و أتفق معهم فى ذلك

مواطنين لا متفرجين


رابط هذا التعليق
شارك

  • بعد 5 سنة...

معلوماتي أن الألتراس الإنجليز تحولوا إلى حزب سياسي يميني متطرف

مواطنين لا متفرجين


رابط هذا التعليق
شارك

معلوماتي أن الألتراس الإنجليز تحولوا إلى حزب سياسي يميني متطرف

فى مصر

تأسس يمينى متطرف

بقيادة خيرت الخايب ...

وكالريح لا يركن إلي جهه

إلا وهيأ لأخري راحله ...

 

رابط هذا التعليق
شارك

انشئ حساب جديد أو قم بتسجيل دخولك لتتمكن من إضافة تعليق جديد

يجب ان تكون عضوا لدينا لتتمكن من التعليق

انشئ حساب جديد

سجل حسابك الجديد لدينا في الموقع بمنتهي السهوله .

سجل حساب جديد

تسجيل دخول

هل تمتلك حساب بالفعل؟ سجل دخولك من هنا.

سجل دخولك الان
  • المتواجدون الآن   0 أعضاء متواجدين الان

    • لا يوجد أعضاء مسجلون يتصفحون هذه الصفحة
×
×
  • أضف...