اذهب إلى المحتوى
محاورات المصريين

حمص الطبيخ .. بيطبخوا بيه ازاي ؟؟


doha

Recommended Posts

كتير اوي بشوف واسمع عن اكلات مضاف لها الحمص زي مثلا السبانخ بالحمص او الكوسى بالحمص .. الخ

ولان تجربتي مع الحمص من سنين طويلة كانت فاشلة وطلع حاجه زي الحصى كده متتاكلش في وسط الاكل وبناء عليه توقفت عن استعماله نهائيا والى وقتنا هذا

بشوف اكلات جاهزه كتير عليها حمص زي الكشرى مثلا

وزوجي احيانا بيطلب مني اعمل الخضار بالحمص بس الغريب انه بيشتري حمص من بتاع القزقزه اظن اسمه ( مجوهر ) الي هو حبه صغير ومستوي جاهز وعلى حد علمي فحمص الطبخ هو الي حبه كبير اوي قريب من حجم البندق كده وبيحتاج تسويه زياده

ولاني ( ميح ) في المسائل الحمصية قلت اسألكم

لما احب اطبخ بحمص اجيب نوع حمص ايه وياترى بينقع قبل الطبخ مثلا ولا يسلق واخيرا بحطه من بدايه الطبخه ولا قبل النضج بشويه ؟

وطبعا اي خبرات حمامصية اخرى تحبوا تزودوها مرحب بها بكل تأكيد

..إذا دعتك قدرتك على ظلم الناس فتذكر قدرة الله عليك ..

رابط هذا التعليق
شارك

اخيييييييييييراا يا ضحى حاجه ما بتعرفييش فيها

بصى يا ست الكل : حمص الطبيخ مش هو الحمص اللى اتكلمتى عنه ولا هذا ولا ذاك

حمص القزقزه ده اخو اللب مالوش دعوه بالطبيخ

التانى حمص الشام او النخى بلغه الخليج او البليله لبعض الناس ...هو حمص الشام اللى بيتسلق مع الكمون والملح ووووووو لعمل حمص الشام ومرقته المعروفه

وانا باستعمله ايضا مع الكشرى المصرى ومع الفول المدمس على الطريقه اللبنانيه وممكن ناكله زى الترمس كده

وطبعا بيتنقع الاول زى اى نوع من انواع البقول وبعدين يتسلق كالعادة

اما حمص الطبيخ بقى ده معروف فى السوبر ماركت والجمعيات او العلافين ...هو اصغر من حمص القزقزه ومقسوم اتنبن يعنى شكله زى العدس الاصفر كده بس لونه مصفر مش برتقالى ...فاهمانى؟

وطريقه عمله بيتنقع قبل الاكل بساعه مثلا ويضاف للطبيخ مع التخديعه فى حالات الكوسه والسبانخ

وانا شخصيا باضيفه كمان للشكشوكه " بالبيض والبصل والطماطم "بيبقى حكااااايه

وكمان للكرشه المطبوخه " اللى هايقول ييييع ها أكلها له " :lol:

وايه كمااااااااان ؟؟؟؟

هافكر واقولك :lol:

294043709.gif
رابط هذا التعليق
شارك

الأخت ضحى

أنا بستعمل حمص الطبيخ مع الكوسة باللحم المفروم .........

هو حجمه وسط يعنى مش صغير اوى زى الحمص بتاع التسالى او حلاوة المولد ولا كبير بحجم البندق زى حمص الشام اللى حضرتك ذكرتيه اللى اخوانا الشوام بيحطوه على الفول او بيعملوا منه عجينة الطعمية بدل الفول المدشوش وسلطة الطحينة بالحمص ..........

حمص الطبيخ باغسله وانقعه الاول حوالى نصف ساعة وبعدين بسلقه نص سوى على اساس انه هيستوى تانى مع الكوسة.....

وبعد ما بقلب البصل والتوم فى قليل من الزيت والسمن بضيف الحمص المسلوق واقلبه معاهم تقليبتين وبعدين اضيف اللحم المفروم المعصج وعصير الطماطم والكوسة والتوابل كلها ومعلقتين صلصة وازود شوربة حسب الحاجة واسيبهم لحد ما الكوسة تستوى وبتطلع حلوة اوى...........

وكمان بيستخدم مع الكرشة لو كان حد عندك بيحبها بنفس طريقة الكوسة بالضبط .........

عمرى ما استخدمته مع السبانخ واول مرة اعرف انه ممكن يستخدم معاها انا بعمل السبانخ مع معلقتين رز مصرى فقط........

ومؤخرا اتعلمت من شغالة هندية أكلة عبارة عن نوع من المقبلات الهندية شبه الطعمية بتاعتنا بس هما بيستخدموا اللوبيا بعد نقعها وإزالة قشرتها مع حمص الطبيخ وممكن بحمص الطبيخ فقط وفعلا هى اكلة لذيذة وخفيفة

دى كل استعملاتى للحمص ........

تم تعديل بواسطة طبيبة مصرية
an1cqgUFg2B0010Mjk0bHN8NTk4MDM5N3NhfFdlIGFyZSBpbiBsb3ZlIHNpbmNl.gif
رابط هذا التعليق
شارك

وانا شخصيا باضيفه كمان للشكشوكه " بالبيض والبصل والطماطم "بيبقى حكااااايه

وكمان للكرشه المطبوخه " اللى هايقول ييييع ها أكلها له " :lol:

وايه كمااااااااان ؟؟؟؟

قلب ابيض

حلوة اوى فكرة الحمص مع الشكشوكة برضه اول مرة اعرفها

الكرشة بالحمص بقى زوجى اللى بيحبها جدا والمرة اليتيمة اللى صمم يشترى فيها كرشة

هو اللى طبخها بنفسه

وبيقولى انها تحفة

بس انا ابدا لايمكن ولا فكرت ادوقها حتى.........

an1cqgUFg2B0010Mjk0bHN8NTk4MDM5N3NhfFdlIGFyZSBpbiBsb3ZlIHNpbmNl.gif
رابط هذا التعليق
شارك

قلب ابيض وطبيبة مصرية

الف الف شكر

انا كده تقريبا عرفت الطريقة

اراجع معاكم بقى الي تعلمته

دلوقت نجيب الحمص بتاع الطبيخ وبعدين ننقعه نصف ساعه بعدين نسلقه نصف سليق ( قد ايه تقريبا وقت ؟ ) وبعدين نحطه في الطبخه من اولها يستوي معاها لغايه الاخر .. صح كده ؟

===========

بس المشكلة اني تبلبلت شوية في اختيار الحمص نفسه

انا كنت فاكره ان حمص الاكل هو الكبير الي هو ده

16_1.jpg

وزوجي كان بيقول لاه وبيجيب حمص طبخ نفس بتاع القزقزه بس مقسوم اثنين .. هل يكون هو الي قلتي عليه ياقلب ابيض ؟

المشكلة اني مكنتش عارفه استعمله وبسيبه وبرضه زوجي قال بينحط على الكوسى بس كنت فاكره ده اختراع خاص بيه

بالمناسبة حمص القزقزه اقصد بيه حمص بيكون متحمص جاهز عند نفس مقلة اللب وبيتباع في اكياس العبوه نصف كيلو تقريبا وممكن يتاكل عادي بدون طبخ ..

ياريت لو حد عنده صورة لحمص الطبخ يحطها لنا عشان تزول البلبلة

============

بمناسبة الحديث عن الكرشة .. انا بموت في حاجه اسمها كرشة لكن للاسف قعدت سنين ماكلهاش عشان زوجي المصون زي حالات طبيبة مصرية كده رافض الفكرة من اساسه ومستنكر ان حد ياكل كرشة وبناء عليه مانع دخولها البيت

ياريت بقى طريقة الكرشه بالحمص بالتفصيل عشان اعملها في يوم و احطه قدام الامر الواقع

==========

على جنب بقى ..

قلب ابيض .. انتي لسه شفتي حاجه ده انا ههريكم اسئلة لسه في حاجات كتيرة موت عاوزه اعرف عنها بس نبدأ بالحمص الاول بعدين نخش على التقيل

طبيبة مصرية .. ياريت شرح لموضوع ملعقتين الرز على السبانخ ده لاني فاكره قريت زمان في كتاب اسمه الاكلات الشعبية المصرية الحكايه دي بس للاسف فقدت الكتاب وهموت من وقتها اعرف الطريقة تاني لان كانوا مادحينها اوي في الكتاب وبرضه والدي اكد على المعلومه وقتها وقال ان السبانخ بتبقى حاجه تانية مع وجود قليل من الرز فيها .. ياريت بعد اذنك الطريقة بالتفصيل ..

تم تعديل بواسطة doha

..إذا دعتك قدرتك على ظلم الناس فتذكر قدرة الله عليك ..

رابط هذا التعليق
شارك

وزوجي كان بيقول لاه وبيجيب حمص طبخ نفس بتاع القزقزه بس مقسوم اثنين .. هل يكون هو الي قلتي عليه ياقلب ابيض ؟

لاء طبعا مش هو ده خاااالص وماينفعش اصلا للطبخ او السلق

المشكلة اني مكنتش عارفه استعمله وبسيبه وبرضه زوجي قال بينحط على الكوسى بس كنت فاكره ده اختراع خاص بيه

بالمناسبة حمص القزقزه اقصد بيه حمص بيكون متحمص جاهز عند نفس مقلة اللب وبيتباع في اكياس العبوه نصف كيلو تقريبا وممكن يتاكل عادي بدون طبخ ..

ياريت لو حد عنده صورة لحمص الطبخ يحطها لنا عشان تزول البلبلة

وحياتك صورتها لك مخصوص من مطبخى

0512102305124ogce5j0qk6evizu88.jpg

وده بالكيس بتاعه وعليع السعر كمان اى خدعه

051310000506126xcnhubpcm0sj4gn.jpg

============

بمناسبة الحديث عن الكرشة .. انا بموت في حاجه اسمها كرشة لكن للاسف قعدت سنين ماكلهاش عشان زوجي المصون زي حالات طبيبة مصرية كده رافض الفكرة من اساسه ومستنكر ان حد ياكل كرشة وبناء عليه مانع دخولها البيت

ياريت بقى طريقة الكرشه بالحمص بالتفصيل عشان اعملها في يوم و احطه قدام الامر الواقع

انا عندى نفس الوضع فى البيت اساسا ممنوعه منعا باااااتا من طبيخها بالبيت ..لازوجى ولا اولادى بيقولوا لى كفايه اسمها بس!!!!!!!!!!!!1 :lol:

طريقتها هاكتبها لك فى المداخله الجايه بس انزل لك الصور الاول وبعدين اكتب لك الوصفه

==========

على جنب بقى ..

قلب ابيض .. انتي لسه شفتي حاجه ده انا ههريكم اسئلة لسه في حاجات كتيرة موت عاوزه اعرف عنها بس نبدأ بالحمص الاول بعدين نخش على التقيل

طبيبة مصرية .. ياريت شرح لموضوع ملعقتين الرز على السبانخ ده لاني فاكره قريت زمان في كتاب اسمه الاكلات الشعبية المصرية الحكايه دي بس للاسف فقدت الكتاب وهموت من وقتها اعرف الطريقة تاني لان كانوا مادحينها اوي في الكتاب وبرضه والدي اكد على المعلومه وقتها وقال ان السبانخ بتبقى حاجه تانية مع وجود قليل من الرز فيها .. ياريت بعد اذنك الطريقة بالتفصيل ..

انا انا انااااااااااا يا ميس اجاوب؟؟؟

مكان الحمص بنحط الرز بس طبعا مش منقوع زى الحمص لانه بيستوى اسرع منه وتقريبا معلقه او اتنين بس رز انا بحط بالويم كده

واترك المجال للحبيبه طبيبه مصريه :lol:

انا هانقع اللى صورته ده واديها شكشوكه النهارده على حسكم

294043709.gif
رابط هذا التعليق
شارك

صباح الخير يا ضحى

انا ممكن بقى اخد الميكرفون واخليه مع سيادتى شوية

واقولك على السبانخ

لانى بطبخها كويس وبحبها اوى

انا بحط فيها عدس اصفر او احمر (اوعى تقولى متلخبطة فيه وحطى صورته )

وفيه ناس تحط ارز مصرى

وناس بتحط لسان عصفور

اى حاجة تخلى السبانخ متماسكة ومش سايبة

تقطعى بصلة وتحطيها مع شوية زيت لغاية ما تصفر وبعدين تضيفى العدس بعد ما تكونى غسلتيه كويس قبلها

ويا سلام بقى لو حبيتين بطاطس مقطعة مكعبات تضيفيهم عليه

العدس على حسب الكمية ال هتطبيخها من السبانخ ممكن نص كوب شاى كويس لاسرتك

وبعدين تضيفى كوب ماء وتسيبهم يستو نص سوا

فنفس الوقت قطعى بصلة تانية كبيرة شوية ومعاها شبت وكسبرة متقطعى صغير وملح وفلفل وادعكيها كويس لغاية ما البصل يبدأ ينزل ميته

تضيفى البصل ده للخليط تم صلصة الطماطم

سيبى الخليط ده لغاية ما تحسى انه باقى 5ق مثلا ويستوى

وقتها ضيفى السبانخ وقلبى كويس 10 ق بالكتير وبالهنا والشفا

بالنسبة بقى للسبانخ انا عارفه انك عاشقة للفريزرات والحاجات ال بتجمديها

انا بجيبها واغلسها كويس واقطعها ووعالفريزر عدل

شفت ناس تانية بتلوحها فالزيت الاول

انتى لك الاختيار فى طريقة الفرزنه بتاعتك

0329100703378vi4z91lu5pj76.gif
رابط هذا التعليق
شارك

الله يسعدك يارب ياماما نونه وقلب ابيض

كده فخمتو الطريقة وشكلي كده هعمل احلى شغل

باذن الله كمان شهر كده ولا حاجه لما انزل مصر هبقى فاضية بقى واتفرغ للاختراعات دي ان شاء الله اجرب السبانخ مرة بالعدس ومرة بالرز وباذن واحد احد بس تنزلي لي طريقة الكرشه بالحمص هجربها برضه .. يللله ان شاااله ماحد حوش

..إذا دعتك قدرتك على ظلم الناس فتذكر قدرة الله عليك ..

رابط هذا التعليق
شارك

وكمان للكرشه المطبوخه " اللى هايقول ييييع ها أكلها له " :lol:

\\كرشه ؟؟

مش هقول يعععع هخلى الولد اللطيف دوت يعبر عن شعورى :ninja:

طائره ورقيه

رياح شديده

خيط قصير

الطائره ليست بين السماء ولا الأرض

..هذه انا!!

لولا

رابط هذا التعليق
شارك

وكمان للكرشه المطبوخه " اللى هايقول ييييع ها أكلها له " :)

\\كرشه ؟؟

مش هقول يعععع هخلى الولد اللطيف دوت يعبر عن شعورى :lol:

على فكره يالولا الكرشة من الحاجات اللذيذة جدا الي مش هتندمي ابدا لو اكلتيها

سيبك من ريحتها هي دلوقت بتتباع متنظفة جاهزه

وسيبك من اسمها .. من هنا ورايح هنسميها كيرشيتو او كرشوتشيني

هاتي انتي بس الكرشة واغسليها كويس بعدين قطعيها قطع صغيره يادوب عشرة سنتي كده في عشرة سنتي او اقل كمان .. حطيها تنسلق عادي زي اللحمه العاديه في مية مش كتير.. بعدين طلعيها واعملي لها صلصة بالبصل والثوم وكل ماتشتهيه نفسك بعدين حطيها تكمل سوا معاهم

وكلي وادعي لي

والله يالولا يابنتي بتطلع روعه وتتاكل وارها الصوابع كل ده ولسه محطيناش الحمص امال بقى لما نعرف الطريقة ونحطه .. ده احنا هناكل اكل

على فكره يالولا لاااازم تكوني بتعرفي الطبيخ الجامد والطواجن والمحاشي والمحمرات والمشمرات

الست الي مبتعرفش تطبخ الحاجات دي بالظبط زي الست الي مبتعرفش تحط مكياج او تعمل شعرها .. الاثنين البعض بيعتبرهم , مش ستات

اتفقنا ياست الستات ؟

معاكي اسبوع واشوف تطبيقك في موضوع الكرشة ومنها ندخل على طول على القلقاس

:ninja:

..إذا دعتك قدرتك على ظلم الناس فتذكر قدرة الله عليك ..

رابط هذا التعليق
شارك

وكمان للكرشه المطبوخه " اللى هايقول ييييع ها أكلها له " :happy:

\\كرشه ؟؟

مش هقول يعععع هخلى الولد اللطيف دوت يعبر عن شعورى :lol:

لولا اسكتي بقى عشان انا شايلة منك في قلبي جامد

من ساعة ما قولتلي اللي قولتيه على القلقاس

كمان الكرشة لا كده الوضع زاد عن حده اوي بصراحة و لازم تدخل جامد من نون كلهم :ninja:

(اقولك حاجه بس سر هاااااااااااا انا ما بحبش الكرشة مطبوخة ابداا بحبها بس بعد ما تتسلق و تتقلي اوعي تقولي لحد اتفقنا) :)

رابط هذا التعليق
شارك

(اقولك حاجه بس سر هاااااااااااا انا ما بحبش الكرشة مطبوخة ابداا بحبها بس بعد ما تتسلق و تتقلي اوعي تقولي لحد اتفقنا) :ninja:

اكفشششششش

ايه الكرشه المقلية دي ياريم ؟

لافيني بالطريقة

ملاحظة : حيث انه ومن الواضح ان في في اكتر من طريقة لعمل الكيرشوتشيني ياريت حد من النونات المدقرمات يفتح توبيك مخصوص للكرشة وماادراك مالكرشة نكاية في كل النونات المقطقطين الي حاطين مناكير ومبيعملوهاش

هتتاكل هتتاكل يالينا قصدي يالولا

..إذا دعتك قدرتك على ظلم الناس فتذكر قدرة الله عليك ..

رابط هذا التعليق
شارك

وكمان للكرشه المطبوخه " اللى هايقول ييييع ها أكلها له " :blink:

\\كرشه ؟؟

مش هقول يعععع هخلى الولد اللطيف دوت يعبر عن شعورى :)

لولا اسكتي بقى عشان انا شايلة منك في قلبي جامد

من ساعة ما قولتلي اللي قولتيه على القلقاس

كمان الكرشة لا كده الوضع زاد عن حده اوي بصراحة و لازم تدخل جامد من نون كلهم :lol:

(اقولك حاجه بس سر هاااااااااااا انا ما بحبش الكرشة مطبوخة ابداا بحبها بس بعد ما تتسلق و تتقلي اوعي تقولي لحد اتفقنا) :happy:

ايه دوت انتى من حزب القلقاس :ninja:

طب قلقاس اوكى ..بس كرشه .. طب يعنى طعمها مميز ؟؟ يعنى الخروف خلص خلاص يا ريمو عشان نطبخ كمان الكرشه ..اييييييييييه

فكرتينى بأيام الديليفرى.. ماما وبابا بياكلو كل الحاجات دى بس احنا كنا بنتصرف ونطلب مالذ وطاب من اكلات سريعه..

المشكله لما بابا كان يفضل قولنا انتو الخسرانين !!

خسرانين ايه بس مش قادره افهم لغايه دلوقتى :blink:

اييييه كانت اياااااااام .

طائره ورقيه

رياح شديده

خيط قصير

الطائره ليست بين السماء ولا الأرض

..هذه انا!!

لولا

رابط هذا التعليق
شارك

(اقولك حاجه بس سر هاااااااااااا انا ما بحبش الكرشة مطبوخة ابداا بحبها بس بعد ما تتسلق و تتقلي اوعي تقولي لحد اتفقنا) :)

اكفشششششش

ايه الكرشه المقلية دي ياريم ؟

لافيني بالطريقة

ملاحظة : حيث انه ومن الواضح ان في في اكتر من طريقة لعمل الكيرشوتشيني ياريت حد من النونات المدقرمات يفتح توبيك مخصوص للكرشة وماادراك مالكرشة نكاية في كل النونات المقطقطين الي حاطين مناكير ومبيعملوهاش

هتتاكل هتتاكل يالينا قصدي يالولا

بتتغسل كويس جد لحد ما تبقي ناصعة البياض و اسيبها في شوية مايا بخل عشان ريحة الزفارة تروح

و بعدين اسلقها و لما تستوي اطلعها و اقطعها حتت متوسطة كده لا كبيرة و لا صغيرة

و بعدين اقليها في شوية زيت بس ايه هبابة كده عشان ما تنشفش

و تتاكل كده و يكون جنبها المخفي اللي باموت فيه الممبار :ninja: :lol:

رابط هذا التعليق
شارك

(اقولك حاجه بس سر هاااااااااااا انا ما بحبش الكرشة مطبوخة ابداا بحبها بس بعد ما تتسلق و تتقلي اوعي تقولي لحد اتفقنا) :)

اكفشششششش

ايه الكرشه المقلية دي ياريم ؟

لافيني بالطريقة

ملاحظة : حيث انه ومن الواضح ان في في اكتر من طريقة لعمل الكيرشوتشيني ياريت حد من النونات المدقرمات يفتح توبيك مخصوص للكرشة وماادراك مالكرشة نكاية في كل النونات المقطقطين الي حاطين مناكير ومبيعملوهاش

هتتاكل هتتاكل يالينا قصدي يالولا

ليييييه يا ضحى ؟؟ ليه يا حبيبتى :lol: كمان عايزه موضوع منفصل ومُفصل ومخصوص ..

طب ابقو حطوا صورتها بليز قبل الطبخ وخطوات التنظيف عشان الناس اللى بتاكل عميانى كده تعرف ان الموضوع فظيع فظظظيع فظظظظيع :happy:

:ninja:

لولا

طائره ورقيه

رياح شديده

خيط قصير

الطائره ليست بين السماء ولا الأرض

..هذه انا!!

لولا

رابط هذا التعليق
شارك

بالله عليكم ...

استحلفكم بالله ...

بلاش .....الريحة جايبة لاخر المنتدى ....

خليها علية انا دى المرة دى ...

خلى الكلام فى الموضوع ده على الخاص ....

كفاية موضوع البوتى يا ضحى ...ارجوكى ....

وليكى عليا تعهد اول ماتنزلى مصر هاخلى ماما توضبلك عزومة من الكلام اللى فوق ده ...

خلينا بقى فى الحمص...

انا جدتى كانت بتحطه على الكوسة ...والخبيزة تقريبا ..او السبانخ موش عارفة

لانى اصلا مابعرفش افرق بينهم ... :ninja:

18344710.jpg

رابط هذا التعليق
شارك

بالله عليكم ...

استحلفكم بالله ...

بلاش .....الريحة جايبة لاخر المنتدى ....

خليها علية انا دى المرة دى ...

خلى الكلام فى الموضوع ده على الخاص ....

كفاية موضوع البوتى يا ضحى ...ارجوكى ....

وليكى عليا تعهد اول ماتنزلى مصر هاخلى ماما توضبلك عزومة من الكلام اللى فوق ده ...

خلينا بقى فى الحمص...

انا جدتى كانت بتحطه على الكوسة ...والخبيزة تقريبا ..او السبانخ موش عارفة

لانى اصلا مابعرفش افرق بينهم ... :ninja:

ايوه يا شيكو يا اختى خلينا فى الحمص احسن ..

فعلا الحمص ممكن يتحط فى الحاجات اللى انتى قلتيها دى وفى ناس بشوفها بتحطه مع اللحمة المفرومه فى المسقعه

وطعمه لذيذ فى السبانخ.

جربى كده تحطيه فى الحاجات دى يا ضحى بس اسلقى الحمص الأول نص سوا عشان يبقى طرى جدا فى الأكل او لو اكل مش هيعقد على النار كتير خليها سلق كامل .

لولا

طائره ورقيه

رياح شديده

خيط قصير

الطائره ليست بين السماء ولا الأرض

..هذه انا!!

لولا

رابط هذا التعليق
شارك

الموضوع طبعاً في باب المطبخ و نسائي 100% بس انا هاقول حاجه و أجري

واحد زميلنا كان عامل عقيقه و عزمنا عليها و كان عامل كبسه و حاطط معاها حمص الطبيخ و بصراحة و الله طعم الكبسه كان تحفه

دي بس إضافة بسيطه لإستخدامات حمص الطبيخ

dddkl.gif

من أقوال الشيخ الشعراوي رحمه الله

الثائر الحق من يثور ليهدم الفساد ثم يهدأ ليبني الأمجاد

رابط هذا التعليق
شارك

ريمو .. تسلم ايدك حفظت الطريقة عندي وباذن الله هجربها في اقرب فرصة ..

شيكوز .. ضربتيني في مقتل يامضروبه

بجد الربط الهايل مابين الكرشة والبوتي خلاني اعيد تفكيري فيها

والله مالها علاقه .. احنا بنستلمها من بتاع الكرشة نظيفة وزي الفل .. ولكن ..

والله قرفت ياشيكو

حرام عليكي الي عملتيه في ده :ninja:

لولاز

وعد مني ليكي بس لما تروح مني حالة القرفة السابق الحديث عنها اني اعمل لك اكلة كرشة مخصوص واصورها خطوة خطوة من اول الفاتحه ولحد الكتاب واحتمال اصور اجزاء من الدخلة كمان

هتحبيها بجد يالولا لو جربتيها انا كنت زيك كده الاول في اكلات معينة مستحيل نوهاااائي اكلها او اقرب منها على سبيل المثال الكوارع والكابوريا مكنتش باكلهم ابدا بل وبقرف منهم كمان .. واتفرجي علي دلوقت

ومش هتصدقي . عارفه الوز ؟ كنت بقرف اكل منه ومكنتش كيفة بط اوي ومستحيل بقى كنت اكل من الديك الرومي تخيلي

حاليا مازلت بقنع نفسي باكل الوز اذا ماتوافر وطبعا بموت في البط وشوربة البط واكتشفت مؤخرا ان لا شيء يعلى على طعم الشوربة الرومي

والغريب ان كان في حاجات بموت فيها وانا صغيره زي الحلويات مثلا دلوقت عادي بالنسبة لي بل احيانا مبرضاش اكلها من اساسه ..

الواحد من وقت للتاني بيراجع الاشياء الي بيحبها والي بيكرها وبيكتشف تغير ذوقه مع تغير مرحلته العمرية ..

جربي يالولا مش هتخسري حاجه وبالمناسبة في مسمط في مصر اسمه الركيب في ممر الكونتيننتال اختي الي عرفتني عليه ودي كانت بداية قصة غرامي مع المخلفات الضاني الي بقيت من عشاقها بعد زيارة واحده الى هناك

جربي تروحي وتطلبي واحد مشكل وكليه بدون ماتحطي في بالك فكرة مسبقة او محاولة لتقريف نفسك فيه .. وهتدعي لي

..إذا دعتك قدرتك على ظلم الناس فتذكر قدرة الله عليك ..

رابط هذا التعليق
شارك

الموضوع طبعاً في باب المطبخ و نسائي 100% بس انا هاقول حاجه و أجري

واحد زميلنا كان عامل عقيقه و عزمنا عليها و كان عامل كبسه و حاطط معاها حمص الطبيخ و بصراحة و الله طعم الكبسه كان تحفه

دي بس إضافة بسيطه لإستخدامات حمص الطبيخ

استاااااذ ورئيس قسم .. كنت ناسياها دى كمان حلوه اوى

في مسمط في مصر اسمه الركيب في ممر الكونتيننتال

اسم الله علييييك هو ده الركيب وله فروع فى السيده زينب والهرم واكتوبر اعتقد

ولو زنقت اوى يالولا تعالى لى المعادى هاعمل احلى شغل ينسييك الباتيه والباتون ساليه هاخليكى تغمسى الكربوتشينى بالكوراعتشينى عدل

بجد بقى الموضوع كده قلب لمواضيع تانيه كعادتنا كمحاورين ومحاورات .....عاتى يعنى

ولهذا وجب فتح موضوع خاااااص به

294043709.gif
رابط هذا التعليق
شارك

انشئ حساب جديد أو قم بتسجيل دخولك لتتمكن من إضافة تعليق جديد

يجب ان تكون عضوا لدينا لتتمكن من التعليق

انشئ حساب جديد

سجل حسابك الجديد لدينا في الموقع بمنتهي السهوله .

سجل حساب جديد

تسجيل دخول

هل تمتلك حساب بالفعل؟ سجل دخولك من هنا.

سجل دخولك الان
  • المتواجدون الآن   0 أعضاء متواجدين الان

    • لا يوجد أعضاء مسجلون يتصفحون هذه الصفحة
  • الموضوعات المشابهه

    • 1
      السلام عليكم انا زوجي مهندس ميكانيكا لحام و كنا في السعوديه سوا بولادنا و حصلت مشكله مع المكتب من تأخير رواتب لتعطيل مصالح و اترفعت قضايا كتير عشان ناخد مستحقاتنا و نزلنا مصر كلنا و بنتمني نرجع تاني  هل السعوديه الشغل فتح فيها و لا لسه و ممكن نلاقي فرصه عمل بتخصصه دا مع انه خبره 13 سنه مع العلم احنا بعتنا السي في لمعظم مكاتب سفريات في مصر و متوفرتش فرصه لحد الان و بقالنا 3 سنين بنعافر و مش لاقين
    • 2
      من صباحية ربنا لغاية أخر الليل  و تقريبا كل قنوات التليفزين شغالة وصفات أكل و طرق طبيخ  ستات و رجالة  الكل بيطبخ  و الكل يتغزل فيما يقوم به يا سلام على الروايح و يا سلام على الطعامة و كل المؤثرات الصوتية البلد كلها طبيخ و إحنا الرجالة الغلابة نتذوق و نأكل و نأكل و نزداد وزنا أكيد شوية كدة و سنصاب بسدة النفس
    • 0
      سلام عليكم  لو سمحتوا يا جماعه انا عايزة ادور علي فرصة سفر لدبي انا خريجة تجارة انجلش جيدجدا وfluent ف الانجلش ممكن الاقي فرصة كويسه هنا ولا ايه النظام؟   والناس اللي عرفت تسافر سافرت ازاي حد يعرف مكاتب سفريات كويسة ومضمونة اقدر اسافر من خلالها او ازاي اقدر اسافر وابتدي هناك؟  يايت بعد، اذنكوا لة حد يقدر يفيدني بمعلومة وشكرا مقدما ليكم 
    • 4
      النظرية الاولى هي نظرية (كله على كله مش ها تفرق) المحترفين بيحبكوها بيقولك قلب اللحوم في البصل المقطع لغاية ما يتغير لونه وبعدين ضيف البهارات واحد واحد وبعدين الفلفل الأخضر المقطع وقلب كل حاجة ضيف وقلب وده قبل ده وقلب واللون بيتغير والبهارات بالترتيب لا وايه أكلة فيها البصل قطع صغيرة وأخرى مفروم خشن وأخرى مفروم ناعم وتانية التوم كامل وأخرى مفروم وتانية مهروس خد مني الاكتشاف الجديد سعادتك مش ها تفرق قلب في الزيت أو حط كله فوق بعضه وبعدين الزيت فوق كل ده حط كله كله في نفس
    • 0
      بص يا سيدي خلينا نفهم ماهو الشحن البري الى مصر ! تعريف الشحن البري من السعودية الى مصر هي عملية نقل اي شيء من مكان الى مكان او من شخص الى شخص وفي حالة الشحن البري يعني عن طريق شاحنات بتتحرك على الحدود بين مصر والسعودية وممكن كمان الاردن من خلال خطين شحن بيستعملهم الخليج كلة : خط ضباء سفاجا خط حقل العقبة نويبع لما تقرر تستخدم الطريقة دي لازم تعرف مين هو المسؤول عن اغراضك طول الرحلة   من المسؤول عن الرحلة ؟ من لحظة التحرك بالشاحنة الرحلة في عهدة السائق غالبا
×
×
  • أضف...