اذهب إلى المحتوى
محاورات المصريين

استفسار من احد الاخوه عن مشكله مع كفيله


Recommended Posts

احد الاخوه ارسلي هذه الرساله علي الخاص ويطلب المساعده لكني للاسف معنديش علم اقدر اساعده ازاي

وهو عنده مشكله في فتح موضوع جديد فياريت اي حد من الاخوه يساعده

السلام عليكم ورحمة الله وبركاته

أخى العزيز فى البداية اذكرك بنفسى فقد ارسلت اليك قبل ذلك بخصوص مشكلة اختصاصى التسويق واليوم اكتب اليك هذا الرد بعد ان عجزت ان اكتب موضوع فى المنتدى لاسباب فنية او مشاكل بالمنتدى او ممكن المشكلة من عندى

ارجو منك ان يتسع صدرك للرد على مشكلتى وافادتى بالحل الامثل لمن هم فى مثل مشكلتى ايضا عرض الموضوع فى المنتدى ان امكن ليتسنى ان يدلى كل اخ بدلوه عسى الله ان يفرج عنا الكرب على يديكم

بعد ان سافرت الى السعودية واستلامى للعمل فى الرياض العاصمة منذ اول شهر7 لعام 2009 وحتى تاريخ اليوم 4/7/2009 وكانت الامور على ما يرام ولله الحمد باستثناء بعض الهفوات الصغيرة جدا فى المعاملة بينى وبين الكفيل وهى امور صغيرة وتافهة جدا لم تكن ابدا سبب مشكلة كبيرة الا انها لم ترقى ابدا لدرجة ان يخبرنى فى هذا اليوم بتوقيفى عن العمل وذلك منذ تاريخه 4/8/2009 وابلاغى ان لدى بعض السمات الشخصية التى لا تصلح معها ان اتولى مهام الوظيفة علما انى اعمل مترجم للمراسلات بين الشركة والمصدرين فضلا عن اعمال السكرتارية والتعامل مع اجهزة الكمبيوتر والاشراف على صيانتها وابلغنى بترتيب امورى فى اسرع وقت للبدأ فى تخريجى نهائى من السعودية وليس ذلك فحسب بل طلب منى ثمن الفيزة والتعقيب عليها 2500 ريال فضلا عن ايقافه لراتبى طوال شهر واربعة ايام والعجيب فى الامر انى فى اليوم الذى اخبرنى بذلك فيه كنت اتفق معه على السكن الذى سأسكن فيه وطلب من زميل لى البحث عن سيارة لتوصيلنا من والى العمل ولم يكن الامر فى الخاطر

حاولت ان اهادنه واستسمحه باعطائى فرصة وخاصة اننا فى فترة التجربة ولم يمض منها الا شهر ويبقى له شهرين ويستطيع اخراجى بعد ذلك الا انه رفض وعرضت ان اعمل فى اى قسم اخر لسد خانته ولا تضيع التكاليف التى تكلفتها ولا يتضرر هو ايضا من التكلفة التى تكلفها بدون الاستفادة منى مع العلم انه طلب من مكتب العمل 70 فيزة فقلت له اكون واحد منهم وبما انى درست لغات ولدى شهادات فى الكمبيوتر دولية ومحلية فعرضت عليه تدريس اولاده مثلا او اى حل وسط مثل نقل الكفالة او شراء الفيزة او اى شئ اخر لكن الرفض كان مصير كل هذه الطلبات

بعد محاولات عديدة متعثرة للتفاهم معه والمرونة واللين والهدوء فى طلب حل المشكلة ومحاولة طلب الوساطة والشفاعة الحسنة لجأت الى طلب ان يشترط لنفسه ما يريد كى ابقى معه فطلب منى كتابة ورقة ان اى خطأ ارتكبه تكون بمثابة كسر للعقد معى ولم اكن ادرى معنى الكلمة ولكن عرفت من زميل لى انها تعنى التنازل عن حقوقى ودفع تكاليف الاستقدام وخلافه

بالطبع لما عرض على ذلك رفضت من غير معرفتى للامر لخوفى من استغلال الورقة استغلال سئ لكنى عدت وطلبت منه طلب اخير وهو ان يتركنى لموسم الحج لاداء الفريضة وارضى من الله بذلك والله يعوضنى لكنه طلب منى الاغرب وهو ان ادفع تكاليف قدومى فضلا عن تكاليف استخراج الاقامة -التى لم تستخرج بعد- لأننى سأتأخر للحج فضلا عن دفع تكاليف الحملة للحج بما يعنى مبلغ وقدره يقارب7000 ريال وهو ما يتعذر لى طبعا دفعه

عرفت من زملائى بالطبع ان للمؤسسة تاريخ اسود فى التعامل مع كثير من العمل بهذا الشكل مما دعا مكتب العمل فى فترة من الفترات لايقاف التعامل معهم او وضعهم على البلاك ليست او ما يقارب ذلك وتعددت بلاغات الهروب من عمالها حتى ان زميلى الذى حضرت مكانه ولم اكن اعرفه الا بعد قبولى عن طريق اعلان فى النت اكتشفت انه كان يحاول ان يخرج من الشركة باى وسيلة وقطع جميع اتصالاته فى مصر بنا ولم يرد على او على المدير وكذا فعل المحاسب قال يا فكيك

فى النهاية اضع لك نسخة من عقدى علما انه من نسخة واحدة معى كانت ارسلت لمصر وهو على ما فهمت من زميلى عقد صورى ومكتوب لكل موظفى الشركة كبيرهم وصغيرهم باختلاف المهنة والمرتب فقط فما هى حقوقى عند اللجوء لكتب العمل وبم تنصحونى وارجو الرد فى اسرع ما يمكن لانى فى الرمق الاخير

جزاكم الله خير وسامحونى على الاطالة

نسخة من العقد وغير موقعة منى لكنها بامضاء المدير وختم المؤسسة وعلى ورق الشركة وهى عندى وليس عنده نسخة منه فهل تفيدنى ام هى ضدى

التاريخ :27/ 2/ 1429هـ

عـــقــد عــمــل

الطرف الأول السيد / xxxxxxxx

الطرف الثاني السيد / xxxxxxxxx .

الجنسية / مصري .

وقد تم الاتفاق بين الطرفين وهما بكامل أهليتهما المعتبرة شرعا على البنود آلاتية :-

(1) وافق الطرف الثاني على العمل لدى الطرف الأول تحت إدارته أو إدارة من ينوب عنه أو يقوم مقامة بكامل كفائتة ومؤهلاته بوظيفة ( اختصاصى تسويق ) والقيام بأي عمل يسنده إلية الطرف الأول من أعمال المؤسسة أو أي مشروع من مشاريعها بجميع مناطق المملكة دون أي زيادة في الراتب 0

(2) على الطرف الثاني أن يمارس أعباء وظيفته بنفسه ، وأن يراعى آداب العمل والمحافظة على أسراره و إطاعة رؤسائه وتنفيذ الأوامر المعطاة إليه من قبلهم والقيام بالأعمال الموكلة إليه على الوجه الأكمل ، وأن يلتزم بالتقيد بالأنظمة والتقاليد المتبعة في المملكة العربية السعودية ، وعدم الإتيان بأي عمل من شأنه المساس بمصالح أو سمعة الطرف الأول 0

(3) يدفع الطرف الأول للطرف الثاني راتبا شهريا وقدره (1125) ريال + (375) ريال عن ساعتين إضافي يوميا و نصف دوام يوم الجمعة + (--) ريال بدل أعاشه ليصبح المجموع (1500) ريال يصرف له في نهاية كل شهر ميلادي 0

(4) يخضع الطرف الثاني لأحكام نظام العمل والعمال السعودي والأنظمة والضرائب والرسومات الحكومية السائدة في البلاد حاليا والتي قد تطرأ مستقبلا خلال مدة تنفيذ العقد وتحسم تلك الضرائب والرسومات من مرتباته و مستحقاته لدى الطرف الأول وبواسطته 0

(5) للطرف الثاني الحق في إجازة مدتها (30 يوم ) عن كل سنتين من سنوات خدمته ويتم تحديد موعد للإجازة بموافقة الطرف الأول ويجوز للطرف الأول تأجيل منح الإجازة حسب مقتضيات العمل 0

(6) في حالة وقوع أسباب اضطرارية يقتنع بها الطرف الأول وتستدعى سفر الطرف الثاني إلى بلاده قبل انتهاء عقده أو استحقاقه الإجازة السنوية فأنه يعطى أجازه اضطرارية على حساب الطرف الثاني الخاص ويتحمل أيضا نفقات سفره ذهابا و إيابا ويبقى تأمين كافي حسب رؤية الطرف الأول حتى عودته من الإجازة 0

7) لا يجوز للطرف الثاني أن يقوم بأي عمل خلاف الأعمال التي يعهد بها إليه الطرف الأول سواء إن كان ذلك لحسابه الخاص أم لحساب الغير بأجر أو بدون أجر سواء إن كان في أوقات الدوام أو خارجها أو أثناء الإجازات الرسمية أو الاضطرارية طول مدة خدمته لدى الطرف الأول و إذا تبين انه قام بأي عمل مخالف لهذه الشروط يلغى عقده من أول مرة ويسافر على حسابه الخاص ويدفع غرامة مالية وقدرها (2000 ريال ) 0

(8) مدة هذا العقد سنتان تبدأ من تاريخ مباشرة الطرف الثاني لمهام عمله لدى الطرف الأول إذا كان موجودا داخل المملكة العربية السعودية ، وذلك بعد استكمال الإجراءات النظامية من تاريخ دخول المملكة العربية السعودية إذا كان مستقدما من الخارج على أن يتصل فور وصوله بالطرف الأول لإشعاره لتتمشى بموجب تعليماته 0

(9) إن كل من الطرفين ملم بتنفيذ بنود هذا العقد ، و لا يحق لأي منهما التحلل من التزاماته بموجب ذلك إلا بموافقة الطرف الأخر الخطية ، وفى حالة إقدام أحد الطرفين على الإخلال بالتزاماته أو إنهاء العقد بإرادته المنفردة ، فإنه يعطى الطرف الأخر فترة إنذار مدتها(30 يوم) وكذلك دفع شهر تعويضا لصالح الطرف الأخر 0

(10) في حالة إنهاء العقد بناء على رغبة الطرف الثاني خلال ثلاث أشهر من تاريخ استقدامه ومباشرة العمل ، فإن نفقات عودته إلى بلاده أو إلى مكان تعاقده تكون على حسابه الخاص ويتحمل أيضا قيمة تكاليف نفقات الاستقدام 0

(11) إذا أخل الطرف الثاني بالتزاماته المنصوص عليها في هذا العقد أو ارتكب أي مخالفة من المخالفات المنصوص عليها في المادة (83) من نظام العمل والعمال السعودي ، ولم يقم بعمله على الوجه المرضى كان من حق الطرف الأول فسخ العقد 0

(12) أن هذا العقد يلغى أي اتفاق أو اتفاقات سابقة بين الطرفين شفويا كانت أو خطيا ويحل محلها 0

(13) شروط إضافية 0

على الطرف الثاني مراعاة ساعات العمل والالتزام بها وتوظيفها لمصلحة العمل وإذا تأخر عن الحضور للعمل في الميعاد المحدد فللطرف الأول الحق في خصم ثلاث أيام على الطرف الثاني عن كل مرة يتأخر بها يخضع المتعاقد لفترة تجربيه مدتها ثلاث شهور ، وإذا لم يثبت جدارته في عمله يحق للطرف الأول إعادته إلى بلده دون قيد أو شرط وإنهاء عقده ، ويتحمل الطرف الثاني كافة المصاريف التي أنفقت على استقدامه ، يتحمل الطرف الثاني جميع الرسوم الخاصة للخروج والعودة والإقامة ورخصة العمل والتأمينات الاجتماعية وتجديد الجواز وتوثيق العقود و أي رسوم تطرأ من الدولة0

يحجز الطرف الأول راتب شهرين خلال الستة شهور الأولى كتامين لسير عمل الطرف الثاني مع المؤسسة وترد إليه عند نهاية عقده إلا في حالة مخالفته لأي بند من بنود هذا العقد فلا ترد له0

إذا لم يشعر أحد الطرفين الآخر برغبته في إنهاء العقد قبل شهرين يكون العقد ساري المفعول لمدة سنتين أخريين

على الطرف الثاني أن يحافظ على العهدة التي يتسلمها من ممتلكات الطرف الأول وفى حالة تلف العهدة أو فقدانها بسبب تقصير أو إهمال فإنه يلتزم بتعويضه عن كل ما أصابها من أضرار

في حالة المرض لا سمح الله يتعالج الطرف الثاني على حسابه الخاص إلا في حالة إصابات العمل 0

(14) يوفر الطرف الأول السكن الجماعي المناسب للطرف الثاني

(15) نظم هذا العقد من نسختين واحتفظ كل من الطرفين بنسخة منها .

الطرف الأول الطرف الثاني

XXXXXXXXXXXX الاســـــم /

البصـمة /

اللي اعرفه انك هاتلجأ لمكتب العمل لكن التفاصيل ازاي وايه حقوقك ماعنديش فكره انما اقدر اساعدك باني انشر موضوعك بالمنتدي مع حذف بياناتك من العقد

مع اني اعتقد ان الكفيل بيهتك وبيهددك بس عشان ترضي بطلباته

جزاكم الله خيرعلى ردك لكن الامر مش تهديد ولكنه جد وارجو نشر الموضوع وبامكانك حذف ماتراه مناسبا كالاسماء مثلا للخصوصية والستر

اطلب منكم انسب الحلول لى لكى أتم فترة عمل ولكن مع كفيل اخر او فى عمل اخر وليكن اخر الامر ان اتم الفريضة ثم اعود الى بلدى

رابط هذا التعليق
شارك

  • الردود 63
  • البداية
  • اخر رد

أكثر المشاركين في هذا الموضوع

أكثر المشاركين في هذا الموضوع

السلام عليكم ورحمة الله كل عام وانتم بخير

انا مش عايز اقول غير حسبى الله ونعم الوكيل فى الظالم ده

وفى الظالم الى كتبك واداك العقد ده من مصر ده شروط وبنود العقد والله لو بيستقدم بنجالى ولا هندى مش هيجيبو بالشروط ديه يا فندم انا مش شايف امامى اى حاجه لصالحك خالص فى العقد

يا فندم الراتب صغير جدا وبنقول رضينا بالقليل وربنا يبارك ويزده ان شاء الله

انما هو مش موفر اى شىء خالص غير السكن واكيد سكن مش محترم عشان صاحبة انسان ظالم مابيكرمش عزيز قوم ذل

ولا موفر التامين الصحى والمصيبة عاوز يدفعك حق الاقامة ورسوم الاستقدام الظالم ده

هو كان ليك مصلحة فى الاول انك ممضتش على العقد بس المشكلة التانية انك استلمت العمل بالفعل فى 1/7

فهنا حتى لو اشتكيته فى مكتب العمل هيقول وهيتبلى عليك انك مقصر فى عملك وغير اهل للعمل عنده

ده من الكلام الى حضرتك بتقوله ان تاريخ المؤسسة اسود يعنى مفيش ضمير ولا رحمة بالبنى ادميين

اخى الفاضل لااكثر عليك الهم اللهم فرج كربك واذهب همك

المهم هو انك بدور على انك تقعد للحج ان شاء الله ربنا يكتبهولك وهيعوضك عن الظالم ده بالحج باحسن منه ورب ضرة نافعة وربنا يبدلك باحسن منه

المشكلة كمان حتى لقدر الله خرجلك نهائى يماطل معاك فى اخلاء الطرف على الاقل

فارجو من حضرتك انك ما تمضيلهوش على اى شىء فهو معدوم الضمير لان العهدة ووالاجهزة هيبالغ فى تمنها

والله ربنا يصبرك ان شاء الله معلش هو لازم يكون فى ابتلاء الاول كده وربنا يصبرك عليه ان شاء الله هيفرجها من عنده وانا بدعى على الظالم ده ربنا يهديه ويحببه فيك يمكن ربنا يكسره

وادعى من ربنا ان يكتبلك حج هذا العام ربنا يستر وميكونش فى تشديد ( جاااااامد ) على الحج السنة دى طبعا قصدى ( تصريح الحج )

ولا تياس من رحمة الله وان شاء الله اخوانى الكرام لن يبخلو عليك بالجواب الشافى حالا وهيفرجها ربنا فقط اكثر من الاستغفار

والاستخارة فان كان خيراً لك ييسره لك وان شر يصرفه عنك ان شاء الله يقدره لك حيث كان

رابط هذا التعليق
شارك

(3) يدفع الطرف الأول للطرف الثاني راتبا شهريا وقدره (1125) ريال + (375) ريال عن ساعتين إضافي يوميا و نصف دوام يوم الجمعة + (--) ريال بدل أعاشه ليصبح المجموع (1500) ريال يصرف له في نهاية كل شهر ميلادي 0

علما انى اعمل مترجم للمراسلات بين الشركة والمصدرين فضلا عن اعمال السكرتارية والتعامل مع اجهزة الكمبيوتر والاشراف على صيانتها

بصراحه شخص بالمواصفات دي و يقبل وضع زي ده انا بعتبره انتحار

كان الله في عونك و لعله درس يفيدك مستقبلا و تتعلم منه عدم التهوين من نفسك ابدا لهذا القدر

ربنا معاك

Vouloir, c'est pouvoir

اذا كنت لا تقرأ الا ما يعجبك فقط فإنك لن تتعلم ابدا

Merry Chris 2 all Orthodox brothers

Still songs r possible

رابط هذا التعليق
شارك

ربنا يكون ف عونك ودة مش وقت عتاب ولا تقطيم لك وربنا اعلم باحوال العباد

كان ليا زميل محاسب سب كفيلة وبعدين هرب 3 شهور وكان لية معارف هنا جابوا لة واحد سعودى

راح كلم كفيلة ومن الاخر ثبتة لان" اهل مكة ادرى بشعابها" وعملة نقل كفالة

حاول تشوف واحد سعودى معرفة زميل ليك او قريب او ... او...

ولازم حيقنعة ان شاء الله

عاشق النيل

رابط هذا التعليق
شارك

عاشق النيل فكرة كويسة بردة ....

بص يا باشا انا كنتزيك كدة بس مش للدرجة دي .. الإقامة والتأمين وووو كل المصاريف الإدارية عليا .. وكمان انته أحسن مني علي الأقل مع نسخة من العقد انا بقا مش معايا حتي صورة من العقد . وكفيلي مطلعشي ليا الإقامة غير من اسبوع تقريبا ً وكان بقالي 5 شهور وكان كل شوية يهددني انه يعملي خروج نهائي .. ويعمل فيا كذا وكذا وكذا ومع العلم انا دافعلة مقدم 5000 ريال ثمن التأشيرة

عارف دلوقتي وضعي اية

1- كل المصاريف الإدارية اتحملها هوه

2- الإقامة طلعت

3- الراتب زاد

4- المعاملة اتغيرت للأحسن

عارف عملت اية بقا اقرا موضوع كفيلي يهددني بالخروج النهائي ..

حسسه انك مش فارقة معاك في حاجة وعايز تنزلني نزلني هرجع تاني وكبر دماغك هيحس انك بايع القضية وقولة الجملة دي ( انا همشي انته هتجيب مليون واحد زيي وانا بردة هطلع من هنا هلاقي 10 مليون شركة تقبلني ) عايز تخرجلي نهائي براحتك , وعلي طول تتبع اسلوب اللين معاه تثبته بكلممتين حلوين ياعني شد وارخي واوعي يخليك تفلت أعصابك .. ولو مشاك الحق اعمل عمرة وانا لو منك هشتكيه في مكت العمل وافرج عليه امه لا اله الا الله وهفضحة علي النت وهشردة وهطلع الأفكار الإجرامية فيه لان ضربوا الأعور علي عينه قال خربانة خربانه ولع في أبوه

بس اهدي كدا وربنا هييسر ليك كل امورك .. وهيعوضك خير

جزاها الله كل خير الأخت ضحي نصحتني نصيحة كويسة اوي انك تذكرة بالله ذكرة باللي فوق

إذا لم تستطع أن تنظر امامك لأن مستقبلك مظلم ولم تستطع أن تنظر خلفك لأن ماضيك مؤلم فانظر إلى الأعلى تجد ربك تجاهك

رابط هذا التعليق
شارك

جزى الله خير كل من ساهم وساعد فى حل المشكلة وارجو من الله ان ييسر الامر ويشرح الصدر وينفث الكربة

أنا يا اخوانى حضرت الى هذه البلد ومن قبل قرأت كل تعليقاتكم على موضوع المرتبات القليلة والشروط غير المناسبة فى العقود لكن اخبرنى بعضهم بعد حضورى انه عقد صورى ليؤمن الكفيل نفسه بسبب شكوى موظف فى الشركة حصل بها على حقوقه كاملة من مكتب العمل من قبل وبالطبع غير عقود الشركة الى هذا العقد الذى بين يديكم

بالطبع لا يخفى عليكم الحال فى مصر فلم يكن لدى خيار الا القبول وفى نيتى كرغبة اولى للسفر هو حج بيت الله الحرام ثم بناء مستقبلى وبالطبع ليس فى هذه الشركة لكن اعتبرتها اول درجة على سلم النجاح والى افضل ان شاء الله

لكن والحمدلله كانت الامور كما ترون وانا متقبل بصدر رحب هذا الابتلاء ورزقنا الله الصبر الجميل ان شاء الله

سأحاول جاهدا فى البحث عمن يقنعه لكن الى ان يتيسر الامر ارجو الاستفسار عن بعض الامور الفنية فى عقد العمل:

1-علمت ان البنود المخالفة لعقد العمل فى قانون العمل لاغية ولا يعتد بها ومنها على سبيل المثال من عقدى تحمل كافة مصاريف استقدامى والفيزة وغيره من المصاريف مثل الاتصالات وخلافه

2- هل لى فعلا الحصول على 3شهور التجريبية كمرتب لانه طلب منى الرجوع ليس لاسباب فنية ولكن شخصية

3-ما هو افضل سيناريو استطيع به ان اطيل به فترة التقاضى مثلا او المماطلة فى الخروج للحاق بموسم الحج بمعنى(افترضنا انه خرج لى نهائى فهل يرسل الترحيلات مثلا لترحيلى وانا بالطبع فى سكنه ومتى اشتكيه وهل لى شكوى اصلا وانا لم استخرج اقامة مع علمى ان لى شهرين حق لى فى المملكة بعد تخرجى نهائى فهل هذا صحيح مع عدم وجود اقامة وماذا اعهمل فى هذه الفترة لسد الحاجات الاساسية على الاقل من مأكل ومشرب واقامة بمعنى ما هى الصيغة القانونية للمكث فى البلاد سواء اشتكيته ام لم اشتكيه وهل اذا اشتكيته سيعطينى فى النهاية اخلاء طرف بموجبه يمكننى العودة مرة اخرى دون مشاكل مع الجوازات)

كل هذه الاسئلة وزاكثر ارجو ان تجيبونى عليها واعتذر بشدة ان اثقلت عليكم ولكن ارجو ان تكونوا نعم العون وسبب تفريج كربتى واشكر لكم جميعا رحابة صدركم فى التعليق على الامر ولله الامر من قبل و من بعد

رابط هذا التعليق
شارك

شوف اي شغل إضافي لو انته في الرياض روح محلات قطع الغيار في صناعية العويضة تشتغل ساعتين يومين في الأسبوع تقفش 1000 ريال في الشهر شوفلك 3 او 4 محلات هتعمل خميرة حلوةوخليه يخبط دماغة في الحيط .. لو هوه خرجلك نهائي والله اعلم بمزاجة هوه هيتحمل هوه التكاليف دي لان مش مر 3 شهور اختبار .. والله اعلم

رابط هذا التعليق
شارك

السلام عليكم ورحمة الله وبركاته

أسعد الله أوقاتكم بالخير واليكم موجز باخر التطورات الجديدة مع كفيلى غفر الله له:

بعد تدخل وساطات لحل المشكلة كانت الحلول الاتية :

1-كتابة انذار وتعهد بعدم ارتكاب اى اخطاء مرة اخرى والا سيكون الطرد من العمل والسفر على حسابى وعدم اعطاء مستحقاتى

2- ايقاف الراتب خلال فترة الاختبار مع اعطائى مصروف 300 ريال الى ان اثبت جدارة فى عملى ولا اعمل اى اخطاء

3-صرف بدل مواصلات 300 ريال شهرى مع العلم انى اسكن فى الجنوب الرياض (الخالدية) والعمل شماله فى العليا وكان الامر على حساب العمل فى البداية والدوام من 9-2 و من 5-9 يعنى مرواح اربع مرات يوميا

4-للعلم تساهل معى فى الرد على موبيلى الخاص اذا جائنى مكالمة خاصة من زوجتى مثلا فى مصر ولكن لا يمكنى الاتصال بأحد خلال فترة الدوام

5- بالأضافة الى مجموعة من الشروط الاخرى المتعسفة لا داعى لذكرها وذلك للحرج

ما رأيكم يا أخوانى لو وافقت وأصبر لموسم الحج ان شاء الله لعل الله ان ييسر الامر بعد ذلك

رابط هذا التعليق
شارك

السلام عليكم ورحمة الله وبركاته

أسعد الله أوقاتكم بالخير واليكم موجز باخر التطورات الجديدة مع كفيلى غفر الله له:

بعد تدخل وساطات لحل المشكلة كانت الحلول الاتية :

1-كتابة انذار وتعهد بعدم ارتكاب اى اخطاء مرة اخرى والا سيكون الطرد من العمل والسفر على حسابى وعدم اعطاء مستحقاتى

2- ايقاف الراتب خلال فترة الاختبار مع اعطائى مصروف 300 ريال الى ان اثبت جدارة فى عملى ولا اعمل اى اخطاء

3-صرف بدل مواصلات 300 ريال شهرى مع العلم انى اسكن فى الجنوب الرياض (الخالدية) والعمل شماله فى العليا وكان الامر على حساب العمل فى البداية والدوام من 9-2 و من 5-9 يعنى مرواح اربع مرات يوميا

4-للعلم تساهل معى فى الرد على موبيلى الخاص اذا جائنى مكالمة خاصة من زوجتى مثلا فى مصر ولكن لا يمكنى الاتصال بأحد خلال فترة الدوام

5- بالأضافة الى مجموعة من الشروط الاخرى المتعسفة لا داعى لذكرها وذلك للحرج

ما رأيكم يا أخوانى لو وافقت وأصبر لموسم الحج ان شاء الله لعل الله ان ييسر الامر بعد ذلك

اخي الفاضل

كفيل ايه ده الا يحرق دم الانسان اشتغل ازي وانا مرتفع ضفطتي من حركات الكفيل ازي هيكون ليا نفس للشغل حتي الجوال منعه ليه ان شاء الله

رابط هذا التعليق
شارك

بصراحه انا راْيي من راْي الاخ ozoozo

ياريت ياجماعه اللي يعرف يدله يعمل ايه مع مكتب العمل ويشتكي فين يقول له

على راْي الحاج سي السيد ...الغائب ...الحاضر

مهو المشكله اننا مش بنبقى عارفين حقوقنا كويس .ومش بنطالب بيها

وانا اللي اعرفه ان ده صنف تديله على دماغه ..يتعدل معاك

وبالنسبه للحج

عايزه اقول لحضرتك ان ربنا ماقالش علشان تحجوا ترضوا ب .............(خلينا نقول .قلة ادب الكفيل وبلاش نقول حاجه تانيه )

ياعم خد بعضك وانزل مصر وخليه يديك نهائي

والله انا متاْكده انك لو وقفت صلب قصاده واْشعت (مجرد اشاعه بس )انك هاتشتكي في مكتب العمل

الكفيل ده هايكش ويرجع للوراء ...خصوصا ان بنود العقد بتاعته كلها (لامؤاخذه)غير .........خلينا نقول غير محترمه

ومخالفه لقانون العمل السعودي ولاتمت لها بصله

وفي مكتب العمل اي بند غير رسمي لايعتد به خالص

يعني بالمختصر بنود العقد بتاعتك دي كلها غير صحيحه ولا يعتد بيها وفي مره عضو هنا كان عنده مشكله وعميد المغتربين س س قال له اكتب شكوي لوزير العمل على الميل ده info@mol.gov.sa

وقال له انتظر رد منه وبسرعه

يعني الرد مش يتاْخر

شوف كده وطمنا على اخر التطورات وربنا معاك

407086_10150519470631088_583296087_9114843_428326208_n.jpg
رابط هذا التعليق
شارك

بص استخير ربنا في أمرين اما الإستمرار مع الكفيف دا او الرجوع الي مصر ...... دا بقا آخر حل وصدقني اللي ربنا هيختاروا ليك هيكون خير

أو تحطله سم فران وتخلص منه دا اية دا ؟؟ يا ابني ربنا يكون في عونك بجد وصدقني قول حسبي الله ونعم الوكيل واقرا عليع عدة ياسين وادعي عليه لانه ظلمك ودعوة المظلوم تستجاب ولو بعد حين ... وكل دا برده بقولك استخير الله سبحانه وتعالي في أمرك ... يمكن ربنا مش كتبلك رزق هنا وكتبهولك في حته تانية وبكرة تفتكر كلامي دا ..

حسبي الله ونعم الوكيل في كل ظالم .. حسبي الله ونعم الوكيل حسبي الله ونعم الوكيل

رابط هذا التعليق
شارك

إزاى يعنى يوقف الراتب و يديك مصروف .. هو حضرتك مش عندك أسرة فى مصر محتاجين مصاريف ( معلش يعنى لو دخلت فى امور شخصية ) بس ده استهبال

وبالنسبه للحج

عايزه اقول لحضرتك ان ربنا ماقالش علشان تحجوا ترضوا ب .............(خلينا نقول .قلة ادب الكفيل وبلاش نقول حاجه تانيه )

ياعم خد بعضك وانزل مصر وخليه يديك نهائي

انا أؤيد راى أختنا rewsha .. و لو مكانك هعمل كده .. و محدش عارف ممكن ربنا يكرمنى بسفرية تانية يكون كفيلى محترم شوية و فى شروط و عقد محترم ( الا لو عندك ظروف لم تذكرها تمنعك من الرجوع دلوقتى )

و ربنا يعوض عليك فى تمن الـتأشيرة اللى الله أعلم الواحد بيبقى جايبه إزاى .

أخى الفاضل لو ليك نصيب تحج هتحج غصب عن عين التخين .

ربنا ييسرلك أمرك .

كيف اصطباري وما في العمر متسع...!!

رابط هذا التعليق
شارك

انا شايفه رسالتك من بدري وحبيت ارد لكن فضلت الاحتفاظ برايي لنفسي ..

للاسف مقدرتش اسكت ورجعت تاني وقلت مليش دخل هقولك الي في ضميري وربنا يسامحني لو كنت غلطانه ويسامحك لو انك اجرمت في حق نفسك .. بس مش هقول يسامح كفيلك بل هقول يارب تديله على قدر نيته وبما هو اهل له .. ضعفين ..

نرجع لموضوعك ..

دلوقت انت راضي بالذل والهوان ومنتظر لغايه الحج على اساس ان متبقاش طلعت من المولد بلا حمص .. ماشي .. تعال نحسبها مع بعض عشان نتاكد من ان الحسبه مظبوطه ..

انت بتقول منتظر للحج يعني باذن الله ثلاث شهور من دلوقت تقريبا ..

الكفيل ـ عليه من الله مايستحقه ـ مانع عنك الراتب طوال التدريب .. هل ممكن نعرف الفترة دي قد ايه ؟ هل يقصد الثلاث شهور الاولى من العقد والي مر منها شهر تقريبا يعني باقي لك فيها شهرين ؟

طيب بعد ماتتم فترة التدريب دي هتاخذ راتب المده الي راحت ولا خلاص هو شغل بلوشي كده وعفى الله عما سلف وتبدأ معاه صفحه جديده براتب من اول وجديد؟

اذا فرضنا انك مش هتاخذ حاجه عن فترة الاختبار دي نهائيا غير مواصلاتك و ( البوكيت موني ) الي الله يوسعها عليه قدر ماهو موسعها عليك قدره كده بمزاجه 300 ريال ـ هل تقدر تقولي لما يجي الحج بأذن الله بعد ثلاث شهور من دلوقت هتجيب فلوس الحمله منين؟ مع العلم ان مفيش حاجه اسمها تطلع الحج لوحدك كده لازم تبع حمله , ومفيش حمله رخيصه يعني اقل شيء اربع الاف ريال ويمكن عشان انفلونزا الخنازير وميكونش في اقبال اوي يمكن تلاقي حاجه ارخص من كده شويه .. قول بالميت خالص هتطلع لك بحمله بالفين او ثلاثه .. هل معاك المبلغ ده مستعد توفره على الحج ولو حتى اهلك في مصر يرسلوه لك ؟

عشان تبقى الامور واضحه فياريت تقعد كده مع نفسك وتفكر بعقلانيه ( وصراحه ) وتجاوب على التالي :

هل انت فعلا محتاج تدريب أو ( اعاده تأهيل ) بحيث تبقى مناسب لوظيفتك ؟

هل كفيلك اعترض على حاجات معينه في شخصيتك وقالها لك صراحه بدون تغطيه يعني مثلا قالك يافلان لبسك مش عاجبني او طريقة كلامك مش واجهة او او .. الراجل ده حدد اعتراض على جزئية او جزئيات معينه ولا قالها لك كده بالعايم .. خلقتك غلط وخلاص ( استغفر الله العظيم ) ..

تكون شديد الصراحه مع نفسك وانت بتجاوب هل فعلا انت فيك عيوب تتعارض مع صلاحيتك للوظيفة دي وهل انت فعلا محتاج تدريب عشان تبقى كفء لها ؟ لو اجابتك نعم خلاص يابني خليك في الشغل ده وامرك لله وارضى بالظروف الي اجبرت عليها دي وانتظر لغايه الحج بعدين ربنا يعمل الي فيه الخير ..

اما لو الجابه لا .. وانت فعلا كويس وكفأ لوظيفتك دي وصاحب الشغل بيستهبل ومش مديلك مبرر مقنع لكونه غير راضي عنك يبقى معليش اسمح لي ..

لا يكلف الله نفسا الا وسعها والحج لمن استطاع اليه سبيلا .. متضحكش على نفسك وتوفر للـ .... ده راتبك شهرين تلاته ومصاريف عودتك كمان بحجه انك هتحج لان مش هينفع .. خاصه لو معندكش فلوس للحج ..

مايجب عمله هو التالي :

اولا : تستخير

ثانيا : تصلح اتفاقك مع البني آدم ده على انك مش عاوز فلوسك دلوقت او راتبك دلوقت وخليه منشال لك عنده يسلمه لك وقت الحج باذن الله .. باي حق وباي صفه يمتنع عن اعطاء الراتب لك والرسول عليه الصلاه والسلام بيقول اعطي الاجير اجره قبل ان يجف عرقه .. الي عمله ده لا يقره شرع ولا قانون .. وان كان خايف على شغله او مش عاوز يخسر خلاص قوله انا هشتغل واذا اثبت كفاءة فلي عندك راتبي ده هاخذه على الحج والا فانتظارك بلا معنى لان هيجي وقت الحج ومش معاك فلوس للحج ..

ثالثا : شليتني بسلبيتك ـ واسمح لي بس زي ماحرقت دمي بمشكلتك اعتقد من حقي افضفض شويه ولو فيها حرقة دم ليك .. عارفه انك مش ناقص بس معليش ـ دلوقت انت بتعتبر انه يسمح لك باستقبال المكالمات وقت العمل ده فضل من عنده ؟ اعتقد ان اوقات عملك ثابته ومعروفه فكان يجرى ايه لو بلغتهم في مصر بيها وان ياريت محدش يتصل بيك نهائيا في الاوقات دي ؟ لو ده حاصل فعلا وهم مش بيتصلوا او متصلوش غير مره او اثنين في الضروره القصوى يبقى كفيلك بيستهبل انه يعترض اما لو هم معتادين يتصلوا يبقى اسمح لي انت الي بتعمل في نفسك كده وانت الي بتدي للاشكال دي فرصه تمسك عليك غلطه وبالتالي مش هقولك غير امشي عدل يحتار عدوك فيك ..

اخيرا .. انت فرصتك افضل من غيرك في اخذ حقوقك لانك لسه في فترة الثلاث شهور الاولى لكن للاسف ضربت الفرصة دي بسكينه لما مضيت له على الورقه ولكن مازال عندي امل ان مثل هذه الورقة لا يعتد بيها .. او تقدر تنكر وتقول مش ورقتي ومش امضتي .. الله اعلم اكيد في مليون طريقة للخروج منها الفيصل في النهايه للعقد ده اولا وثانيا لان الـ ... الي انت على كفالته محتاجك اكتر ماانت محتاجه هيلاقي فين واحد عجينه طريه كده يشكله زي ماهو عاوز ويقوله يمين يقوله حاضر شمال حاضر .. ده لامؤاخذه ناقص يقولك تدخل الحمام امتى وامتى تمسك نفسك لغايه ماعظمته يسمح لك تفكها .. حسبنا الله ونعم الوكيل ..

انت ممكن تقول في نفسك ان ده كلام من ورا شاشه الكمبيوتر في الغرفه المكيفه وتقنع نفسك ان ليس بالامكان ابدع مما كان لكن انا بقولك الي يخلص ضميري من ربنا والي لو مكانك هعمله او حتى افكر اعمله .. وكون على ثقة انك مهما قدمت له من تنازلات هيفضل يطلب منك الاكثر ومش هيرضى ابدا غير لما يشوفك قدامه جثه هامده ولا تستبعد ان ده يحصل مهو الانسان ممكن لاقدر الله يخسر صحته في لحظة . بل ثانيه .. ومتفتكرش ان كل يوم ذل انت بتشوفه مع الندل ده هيمر كده ويروح .. اطلاقا .. انت ممكن تكسب ماديا لكن هتخسر كل شيء معنويا وماذا يفيد الانسان اذا كسب العالم وخسر نفسه ..

استخير ثم فكر بالتمرد واذا قررت تنقلب عليه فاياك تتراجع لان مش هينفع واثبت على موقفك وطول مامعاك الحق وطول ماانت متعلق بالله مستحيل هينتصر عليك الظالم ده والايام بيننا ..

..إذا دعتك قدرتك على ظلم الناس فتذكر قدرة الله عليك ..

رابط هذا التعليق
شارك

انا شايفه رسالتك من بدري وحبيت ارد لكن فضلت الاحتفاظ برايي لنفسي ..

للاسف مقدرتش اسكت ورجعت تاني وقلت مليش دخل هقولك الي في ضميري وربنا يسامحني لو كنت غلطانه ويسامحك لو انك اجرمت في حق نفسك .. بس مش هقول يسامح كفيلك بل هقول يارب تديله على قدر نيته وبما هو اهل له .. ضعفين ..

نرجع لموضوعك ..

دلوقت انت راضي بالذل والهوان ومنتظر لغايه الحج على اساس ان متبقاش طلعت من المولد بلا حمص .. ماشي .. تعال نحسبها مع بعض عشان نتاكد من ان الحسبه مظبوطه ..

انت بتقول منتظر للحج يعني باذن الله ثلاث شهور من دلوقت تقريبا ..

الكفيل ـ عليه من الله مايستحقه ـ مانع عنك الراتب طوال التدريب .. هل ممكن نعرف الفترة دي قد ايه ؟ هل يقصد الثلاث شهور الاولى من العقد والي مر منها شهر تقريبا يعني باقي لك فيها شهرين ؟

طيب بعد ماتتم فترة التدريب دي هتاخذ راتب المده الي راحت ولا خلاص هو شغل بلوشي كده وعفى الله عما سلف وتبدأ معاه صفحه جديده براتب من اول وجديد؟

اذا فرضنا انك مش هتاخذ حاجه عن فترة الاختبار دي نهائيا غير مواصلاتك و ( البوكيت موني ) الي الله يوسعها عليه قدر ماهو موسعها عليك قدره كده بمزاجه 300 ريال ـ هل تقدر تقولي لما يجي الحج بأذن الله بعد ثلاث شهور من دلوقت هتجيب فلوس الحمله منين؟ مع العلم ان مفيش حاجه اسمها تطلع الحج لوحدك كده لازم تبع حمله , ومفيش حمله رخيصه يعني اقل شيء اربع الاف ريال ويمكن عشان انفلونزا الخنازير وميكونش في اقبال اوي يمكن تلاقي حاجه ارخص من كده شويه .. قول بالميت خالص هتطلع لك بحمله بالفين او ثلاثه .. هل معاك المبلغ ده مستعد توفره على الحج ولو حتى اهلك في مصر يرسلوه لك ؟

عشان تبقى الامور واضحه فياريت تقعد كده مع نفسك وتفكر بعقلانيه ( وصراحه ) وتجاوب على التالي :

هل انت فعلا محتاج تدريب أو ( اعاده تأهيل ) بحيث تبقى مناسب لوظيفتك ؟

هل كفيلك اعترض على حاجات معينه في شخصيتك وقالها لك صراحه بدون تغطيه يعني مثلا قالك يافلان لبسك مش عاجبني او طريقة كلامك مش واجهة او او .. الراجل ده حدد اعتراض على جزئية او جزئيات معينه ولا قالها لك كده بالعايم .. خلقتك غلط وخلاص ( استغفر الله العظيم ) ..

تكون شديد الصراحه مع نفسك وانت بتجاوب هل فعلا انت فيك عيوب تتعارض مع صلاحيتك للوظيفة دي وهل انت فعلا محتاج تدريب عشان تبقى كفء لها ؟ لو اجابتك نعم خلاص يابني خليك في الشغل ده وامرك لله وارضى بالظروف الي اجبرت عليها دي وانتظر لغايه الحج بعدين ربنا يعمل الي فيه الخير ..

اما لو الجابه لا .. وانت فعلا كويس وكفأ لوظيفتك دي وصاحب الشغل بيستهبل ومش مديلك مبرر مقنع لكونه غير راضي عنك يبقى معليش اسمح لي ..

لا يكلف الله نفسا الا وسعها والحج لمن استطاع اليه سبيلا .. متضحكش على نفسك وتوفر للـ .... ده راتبك شهرين تلاته ومصاريف عودتك كمان بحجه انك هتحج لان مش هينفع .. خاصه لو معندكش فلوس للحج ..

مايجب عمله هو التالي :

اولا : تستخير

ثانيا : تصلح اتفاقك مع البني آدم ده على انك مش عاوز فلوسك دلوقت او راتبك دلوقت وخليه منشال لك عنده يسلمه لك وقت الحج باذن الله .. باي حق وباي صفه يمتنع عن اعطاء الراتب لك والرسول عليه الصلاه والسلام بيقول اعطي الاجير اجره قبل ان يجف عرقه .. الي عمله ده لا يقره شرع ولا قانون .. وان كان خايف على شغله او مش عاوز يخسر خلاص قوله انا هشتغل واذا اثبت كفاءة فلي عندك راتبي ده هاخذه على الحج والا فانتظارك بلا معنى لان هيجي وقت الحج ومش معاك فلوس للحج ..

ثالثا : شليتني بسلبيتك ـ واسمح لي بس زي ماحرقت دمي بمشكلتك اعتقد من حقي افضفض شويه ولو فيها حرقة دم ليك .. عارفه انك مش ناقص بس معليش ـ دلوقت انت بتعتبر انه يسمح لك باستقبال المكالمات وقت العمل ده فضل من عنده ؟ اعتقد ان اوقات عملك ثابته ومعروفه فكان يجرى ايه لو بلغتهم في مصر بيها وان ياريت محدش يتصل بيك نهائيا في الاوقات دي ؟ لو ده حاصل فعلا وهم مش بيتصلوا او متصلوش غير مره او اثنين في الضروره القصوى يبقى كفيلك بيستهبل انه يعترض اما لو هم معتادين يتصلوا يبقى اسمح لي انت الي بتعمل في نفسك كده وانت الي بتدي للاشكال دي فرصه تمسك عليك غلطه وبالتالي مش هقولك غير امشي عدل يحتار عدوك فيك ..

اخيرا .. انت فرصتك افضل من غيرك في اخذ حقوقك لانك لسه في فترة الثلاث شهور الاولى لكن للاسف ضربت الفرصة دي بسكينه لما مضيت له على الورقه ولكن مازال عندي امل ان مثل هذه الورقة لا يعتد بيها .. او تقدر تنكر وتقول مش ورقتي ومش امضتي .. الله اعلم اكيد في مليون طريقة للخروج منها الفيصل في النهايه للعقد ده اولا وثانيا لان الـ ... الي انت على كفالته محتاجك اكتر ماانت محتاجه هيلاقي فين واحد عجينه طريه كده يشكله زي ماهو عاوز ويقوله يمين يقوله حاضر شمال حاضر .. ده لامؤاخذه ناقص يقولك تدخل الحمام امتى وامتى تمسك نفسك لغايه ماعظمته يسمح لك تفكها .. حسبنا الله ونعم الوكيل ..

انت ممكن تقول في نفسك ان ده كلام من ورا شاشه الكمبيوتر في الغرفه المكيفه وتقنع نفسك ان ليس بالامكان ابدع مما كان لكن انا بقولك الي يخلص ضميري من ربنا والي لو مكانك هعمله او حتى افكر اعمله .. وكون على ثقة انك مهما قدمت له من تنازلات هيفضل يطلب منك الاكثر ومش هيرضى ابدا غير لما يشوفك قدامه جثه هامده ولا تستبعد ان ده يحصل مهو الانسان ممكن لاقدر الله يخسر صحته في لحظة . بل ثانيه .. ومتفتكرش ان كل يوم ذل انت بتشوفه مع الندل ده هيمر كده ويروح .. اطلاقا .. انت ممكن تكسب ماديا لكن هتخسر كل شيء معنويا وماذا يفيد الانسان اذا كسب العالم وخسر نفسه ..

استخير ثم فكر بالتمرد واذا قررت تنقلب عليه فاياك تتراجع لان مش هينفع واثبت على موقفك وطول مامعاك الحق وطول ماانت متعلق بالله مستحيل هينتصر عليك الظالم ده والايام بيننا ..

السلام عليكم ورحمة الله

اشكر لكى ردك ورغبتك فى الافادة وجزاكى الله خير على نصحك لى واتشرف بذلك من كل اخوانى فى المنتدى وانا والله يا اخوانى خدعت بمعسول كلامه لى فى الهاتف ولمحت من طريقته انه ذكى ولماح لكن ليس المخبر كالمعاين فضلا عن غش الاخ اللى كان بينى وبينه اتصال وفهمنى ان الشغل كويس ومريح عرفت بعد كدة انه كان عاوز ينفد بجلده منه لدرجة انه قال لى لو ماخلصتش ورقك بسرعة هايلغى الفيزة والموضوع كان لانه مستعجل ينزل وأكون مكانه وبالرغم من ذلك حجز بسرعة وفهم الكفيل انى فى الطريق ولم يكن الامر كذلك

والموضوع يطول شرحه وارجع أرد على كلام حضرتك فى نقاط كالتالى:

1-انا فهمت من الكفيل ان التدريب 3شهور وبالفعل فات منهم شهروالمرتب محجوز خلال هذه الفترة وارجو استلمه بعد اثبات جدارتى بالعمل على حد قوله وطبعا ولله الحمد الامر ليس له علاقة بالناحية الفنية ولكن للأسف انى من طبعى الجدال شوية لكن فى الحق وكان بينى وبينه بعض الامور التى تجادلنا فيها ولكن ليست فى صميم العمل او فنياته اكثر منها وجهات نظر وهو قلق جدا من هذا الامر بسبب الناحية الامنية مثلا وقال لى خليك فى حالك ولا تدخل فى نقاشات مع احد وبالتالى كان امضائى على انذار بالتعهد بعدم الجدال والقاش والتدخل فيما لا يعنينى (تقريبا بيخاف من امن الدولة!!!)

هذه اعتراضاته ولولا سخافة الخلافات التى حدثت بينى وبينه لسطرتها بين ايديكم لكن الامر برمته ترهات وسخافات ليس لها علاقة بالعمل وفنياته

وفترة التدريب ستكون محل اختبار هل انا ممكن اسمع واطنش ولا لأ بمعنى عدم الجدال والتسليم له بوجهات نظره حتى لو لم تتفق مع الصحيح والمتعارف عليه وهو ما صرحت له بصعوبته بالنسبة لى لان الطبع فى النهاية يغلب تطبعى لذلك لكنى قلت له ساعدنى على ذلك وانا اصبر واتعلم ان شاء الله

2- بالفعل الحج لمن استطاع اليه سبيل وقد أكون ممن لم يكن بوسعهم الحج لعدم الاستطاعة ولم اذل له ولله الحمد وعرفته اذا لم يكن بد من الرحيل فاتركنى لموسم الحج كي يستشعر هو الاثم اذا فوت على هذه الفرصة وانا اعتبر ذلك المكسب الوحيد لى اذا تم تخريجى نهائى لذلك اسعى جاهدا فى تحقيق ذلك مع علمى انه ليس فرض لعدم استطاعتى ولكن بينى وبين الحرم كيلومترات وسأجاهد لعبورها واذا لم استطع فلى العذر أمام الله يوم القيامة فقط كل ما فى الامر هو استفراغ الوسع فى ذلك

3-بالفعل استخرت الله عدة مرات ولجأت اليه بتفريج الكرب وكانت المطالب السابق ذكرها فالتبس على الامر هل هى فرجة لحل المشكلة ام انه ذل وظننت كما اشار بعض الاخوة انه يفعل ذلك ليرى منى اذا كنت سأجادله ام سأقبل مختارا كدليل على انصلاح حالى واخترت الثانية وقبلت لان زميل لى فى العمل قال لى اعتبر هذا الاتفاق ارضية لك قد كسبتها ولا تفرط فيها وان الكفيل لو اراد ان يخرجك من البلد بلا اى شئ سيفعل ذلك ان اراد فاقتنعت بالامر

4-وقت العمل كما يزعم وقت مقدس وليس منطقى ان استقبل فيه مكالمة من اهلى لكنه تجاوز فى ذلك مع تحذيره لى الا أكون انا المتصل حتى انه منع عنى استخدام الكمبيوتر والنترنت الا للعمل وقال لى تحريك الماوس اذا لم يكن للعمل فلا تفعله وكل هذا من ام رأسه ولم اتصل بأحد ولم يتصل بى أحد (بند الاتصالات محدود جدا نظرا لظروف المرتب بالطبع واعتمد على الانترنت ) حتى الانترنت اجلس الان فى سيبر وانا اكتب هذه السطور وهو بالفعل بيستهبل غفر الله لنا وله

طبعا انا ولله الحمد راضى بالفرصة دية لانها بتقربنى خطوات من تحقيق رغبتى الاخيرة فى البلد وهاحاول اصلح فيها حالى على طلبه ايضا ولو هو بيتلكك هاعمل اللى يرضى ربنا فيه وهاشتغل معاه باخلاص

بالنسبة لتصريح الحج الكفيل موافق انى احج والاخ اللى ساكن معايا قال لى انه حج العام الماضى بدون حملة ونفس الامر ان شاء الله يكرره معايا من غير مصاريف حملة او اى شئ ان شاء الله والله المستعان

ولو كانت التنازلات فى ذات الله فبها ونعمة لكن دون اهانة واذكركم بصلح الحديبية وغيره من الاتفاقات بين النبى صلى الله عليه وسلم وكفار قريش لما ذهب واصحابه للبيت الحرام وكان ما كان من القصة التى تعرفونها جميعا

وفى الاخير جزاكم الله خير جميعا على ردودكم وانتظر المزيد من نصائحكم

والسلام عليكم ورحمة الله وبركاته

رابط هذا التعليق
شارك

إزاى يعنى يوقف الراتب و يديك مصروف .. هو حضرتك مش عندك أسرة فى مصر محتاجين مصاريف ( معلش يعنى لو دخلت فى امور شخصية ) بس ده استهبال
وبالنسبه للحج

عايزه اقول لحضرتك ان ربنا ماقالش علشان تحجوا ترضوا ب .............(خلينا نقول .قلة ادب الكفيل وبلاش نقول حاجه تانيه )

ياعم خد بعضك وانزل مصر وخليه يديك نهائي

انا أؤيد راى أختنا rewsha .. و لو مكانك هعمل كده .. و محدش عارف ممكن ربنا يكرمنى بسفرية تانية يكون كفيلى محترم شوية و فى شروط و عقد محترم ( الا لو عندك ظروف لم تذكرها تمنعك من الرجوع دلوقتى )

و ربنا يعوض عليك فى تمن الـتأشيرة اللى الله أعلم الواحد بيبقى جايبه إزاى .

أخى الفاضل لو ليك نصيب تحج هتحج غصب عن عين التخين .

ربنا ييسرلك أمرك .

.

بالفعل يا اخوانى فى اسرة وولد ان شاء الله بعد كام يوم ولله الحمد والمنة وطبعا ان رديت عليه لكن قال لى اثبت جدارة بمعنى زى ما قلت لا تجادل ولا تناقش يا أخ محمد

الحمدلله انا مادفعتش حاجة غير مصاريف سفرى لكن اتكلفت بالفعل تعب ومشقة وترك اهلى وغيره

وارجو ان اوفق ان شاء الله لكفيل اخر وعمل اخر لكنى اصبر ان شاء الله

فى النهاية اشكركم واشكر لكم وسامحونى ان قلت لكم انى اذا خيرت بين هذا العمل وبين بقائى فى مصر لاخترت هذا العمل وامرى الى الله لحسابات كثيرة ومعقدة لا يتسع المجال لذكرها الان ولعلى اعاود النظر فى طرحها بعد حين ان شاءالله

رابط هذا التعليق
شارك

خلاص طالما انت مقتنع فمقدرش غير اقلك ربنا يوفقك بس ارجوا انك تكون مؤمن بالي بتقوله لو كده يبقى يابختك دي نعمه من ربنا وهي نعمه الرضى ربنا يثبتك عليها .

لا املك غير الدعاء لك ربنا يفرجها عليك من اوسع الابواب ويرزقك بخير ما تتمنى ..

..إذا دعتك قدرتك على ظلم الناس فتذكر قدرة الله عليك ..

رابط هذا التعليق
شارك

والله العظيم قلبي يعتصر الماً لما يفعله شباب مصر بأنفسهم

واحد مؤهل عالي ومترجم وسكرتير وفني صيانه وبتاع كله ويطلع على تأشيرة بمرتب 1125 ؟!!!!!!!!!!!!!!!!!!!!!!!

والكفيل يفحته ساعتين اضافي كل يوم يعني شغل 10 ساعات او اكتر بـ 1500 ملطوش

وشركات كتيرة بتدلل وتعمل اعلانات ومن ضمنها شركتنا عشان نعين عامل شاي بـ 1500 ريال ويتنططوا علينا البنجلاديشين وما بنلاقيش حد في الاخر

بدون تبكيت لك يا اخي الحبيب ولا لوم

هاناقش مشكلتك وهانشوف لك حل بإذن الله

لكن اقول لك على حاجه ظريفة

والله العظيم يا جماعه .. اعرف واحد بياع سريح كان بيبيع بطيخ وشمام .. فلما المره دي وانا في مصر ما لقتوش .. سألت اخويا عليه .. فقال لي انه غير نشاطة

واشترى .. سوري في الكلمة .. عربية بحمار وبقى يدور في الشوارع يجمع العيش الناشف من البيوت ويشترية بالكيلو ويبيعه لتجار ومربي المواشي اللي بيستخدموه علف رخيص لمواشيهم ويتهافتون عليه ... ومن بؤ الراجل ... دخله كام بقى ؟

بالصلاتو عالحبيب ... 15 الف جنيه شهرياً

مكسب صافي 500 ج يومياً

ولا تعليق

حد فهم انا عاوز اقول ايه ؟

الأحـــرار يؤمنون بمن معه الحق ..

و العبيــد يؤمنون بمن معه القوة ..

فلا تعجب من دفاع الأحرار عن الضحية دائماً ..

و دفاع العبيد عن الجلاد دائماً

رابط هذا التعليق
شارك

انشئ حساب جديد أو قم بتسجيل دخولك لتتمكن من إضافة تعليق جديد

يجب ان تكون عضوا لدينا لتتمكن من التعليق

انشئ حساب جديد

سجل حسابك الجديد لدينا في الموقع بمنتهي السهوله .

سجل حساب جديد

تسجيل دخول

هل تمتلك حساب بالفعل؟ سجل دخولك من هنا.

سجل دخولك الان
  • المتواجدون الآن   0 أعضاء متواجدين الان

    • لا يوجد أعضاء مسجلون يتصفحون هذه الصفحة

  • الموضوعات المشابهه

    • 0
      السلام عليكم, حد يعرف نظام العمل فى شركة سدانة لمستحضرات التجميل ومستزلمات الاطفال, هو مقرهم فى الرياض, س للاسف مش عارف معلومات عن نظام الشركة ومنتجاتها وهل هى منتجاتها مطلوبة ولا لا, شكرا جزيلا.
    • 1
      السلام عليكم انا مدرسة ومعروض عليا عمل في مدرسة اسمها التهذيب القسم العامي بمرتب 6500 شامل السكن والمواصلات هل حد عنده معلومات عن المدرسه دي او اذا كان الراتب هيكفي المعيشة فرد واحد اقدر اصرف واحوش منه؟ لكم جزيل الشكر
    • 10
      السلام عليكم جالى عقد فى سلطنه عمان خارج مسقط ب 650 ريال عمانى اسرتى 4 افراد ايه رأيكم؟ برجاء الرد سريعا و كل عام وانتم بخير
    • 16
      ان شاء الله سيرزقنا المولى عز وجل بطفل عما قريب ...... وكنت اتسأل هل يمكن عمل باسبوره الجديد فى مصر ام لا ............عن طريق توكيل من الاب لاخوه فى مصر فيستخرج به شهاده ميلاد بها الرقم القومى واللى على أساسها يستخرج الباسبور ام ان هذا الامر يستدعى وجود الاب ................... واننا لازم ننزل مصر علشان نعمله باسبور واجراءات اقامته ..............؟؟؟؟ واتمنى الافاده بالاجراءات اللازم عملها اذا كان ممكنا بدأ من شهاده الميلاد الكويتيه اللى سهل استخراج
    • 6
      السلام عليكم ورحمة الله وبركاته عندي استفسار لأستاذ خالد شحاته جزاه الله خيراً أو لأي حد عنده أي معلومة يقدر يفدني جزاه الله خير زيارة عائلية لزوجتي وابنتي 3 شهور وأردت أجددها وذهبت لجوازات الرياض ولكن صادف انتهائها وقت العيد والدنيا اصبحت زحمة جدا في الجوازات وقتها شاء الله ان الزيارة تنتهي وتتطوف بعد ما مر ال 3 ايام السماح السؤال الآن بعد ما دفعت الغرامة 500 ريال عن كل جواز - هل فيه مده سماح جديدة (شهر مثلا او اسبوع) ؟ ولا لازم اروح اجدد الزيارة علي طول واقدر اروح بعد قد ايه لأن الفترة دي
×
×
  • أضف...