كيف تنجح فى"امتحان رخصه القياده"......(الرياض)

[خالد شحاته]

طيب سؤال للي عندهم خبرة في الرخص

هل الحكايه في مدرسة دلة زي ماهو في مدرسة المرور في مصر يعني مجرد مااشتركت في الدورة خلاص ناجح ناجح والعسكري الي جنبك بيسوق لك والسلام ولا فعلا في امتحان بجد وسقوط بجد

وكام بالظبط الرسوم حاليا يعني استخراج رخصة القياده بيكلف كام اجمالا في حالة التحقت بدورة او اختبرت بس .. وبالمناسبة لو بتعرف تسوق اصلا بيحتاج تدخل الدورة دي اجباري ولا الي مبيعرفش بس الي بيدخلها ؟

السلام عليكم

الاختبار هنا في الرياض غير مصر وللازم تنجح يعني هنا مش مجرد تحصيل فلوس ومش ممكن العسكري يسوق لك هنا وهو بيجالس جنبك وينظر كل تحركتك

اما بالنسبه للمدرسه هي كالاتي الا معه رخصه مصريه ساريه المفعول مش بيحتاج مدرسه الا لقدر الله سقط في القياده والا مش عنده رخصه مصريه بيدفع رسوم وقدره 450 ريال رسوم المدرسه و400 ريال رسوم رخصه القياده لانها اصبحت عشر سنوات

[mustafa]

لو معى رخصة امارتية ممكن استيدالها باخرى سعودية ارجو التوضيح

[amrlink]

انا كمان معى رخصة قيادة قطرية سارية حتى 9-2012 ممكن استبدلها باخرى سعودية ؟على فكرة ممكن اى رخصة خليجية تتغير وانت واقف فى قطر ب 75 ريال قطرى فقط من غير اى امتحان فهل دة ممكن هنا فى السعودية ؟

[مروان]

عن تجربتي الشخصية الموضوع ارزاق ونصيب وتوفيق من ربنا

انا رسبت اول مرة مع ان كان معي عسكري طيب والجميع كان يتمناه

لكن العربية عملتها ورفضت تقوم وقعدت تجعر كل ما اديها بنزين

صرخ العسكري في وقال لي انزل

وبالفعل سقطني

المرة التانية استغفرت كتير وقمت الثالثة قبل الفجر صليت ركعتين والشفع والوتر ودعوت ربنا يسترها معايا

جالي عسكري قاسي وصعب

مطوع الكل كان بيحكي عنه وعن شدته

حتى مدربين المدرسة كانوا ينصحونا بتحاشيه

لكن دوري كان معه

ركبت تاني واحد وسميت وانطلقت

ودارت العربة

كنت نسيت الغي اشارة الانتظار عملها العسكري

وبعد حوالي 50 متر لا اكثر ولا اقل قالي وقف

اخدت يمين ونسيت ادي الاشارة وهديت ووقفت

لم يبالي هو بي وعمل لي صح

واستجيبت دعوات الليل ودعوات امي

والدرس اللي تعلمته

اعلم ان الامة لو اجتمتعت على ان ينفعوك بشئ لن ينفعوك الا بشئ قد كتبه الله لك

والعكس

نصيحتي

ركعتين في جوف الليل!!

[OmarBak]

يا شباب ما احد رد

ينفع اتوماتيك فقط

[الأستاذ]

السلام عليكم ...

سأحاول ان اغطى كل الخطواط و الاوراق اللازمه لإستخراج رخصه القياده الخصوصى فى السعوديه ,فى الرياض , و احاول اعطيكم بعض النصائح و الارشادات اللتى بلأزن الله تنفعكم اثناء الامتحان ,,,

طبعا هذه النصائح ممكن استخدامها بصفه عامه لأنها قواعد اساسيه ,فى الامتحان او غيره ,,,,

بالنسبه للخظواط و الاوراق المطلوبه لمقيمى الرياض سأتكلم عن فئه الناس اللذين ليس لديهم رخصه دوليه و لا حتى رخصه من بلدهم :

• مدرسه تعليم القياده :
  مدرسه تعليم القياده فى الرياض و التابعه للمرور هى مدرسه "دله" ,و هى معروفه جدا فى الرياض و اى تاكسى يعرفها ,و تليفونها 4567777 , اول شى بتذهب للمدرسه و تشترى الملف ,هذا الملف هو اللذى سيكون فيه كل الاوراق الخاصه بيك و استماره الامتحان ,... , و بيكون فيه الاتى :
  • "تعريف الأجانب الذين على كفاله افراد" و النموزج كما هو موضح فى الصوره ,بتكمل البيانات االلتى فيه و بيمضيه الكفيل و تصدقه من الغرفه التجاريه.
    جزاك الله خيرا
    طيب السؤال هنا لو معايا رخصة قيادة مصري ممكن أمتحن على طول من غير الالتحاق بالمدرسة ؟؟؟؟
    
    
  • "طلب اصدار رخصه قياده"و النموزج كما هو موضح بالصوره ,هذه الاستماره بتكملها و بيكون فيها المعلومات اللى بتظهر على الرخصه ,بعد النجاح فى الامتحان انشاء الله.
    
    
  • و بتزود الملف بالأتى :
    - صوره بطاقه الكفيل
    - صوره من الباسبور
    - صوره من الاقامه (طبعا لازم يكون معاك اقامه)
    

  كل الاوراق اللى فوق دى لازم تكون جاهذه قبل ما تروح لإمتحان المستوى

  [*] إمتحان المستوى:

  إمتحان المستوى بيكون فى المدرسه ,و الممتحنيين هم المدربين ,و اهميه الامتحان انه يحدد فتره التعليم اللتى تحتاج لها,وتكون:

  • مجموعه أ : 4 ايام (من الساعه 3 عصرا الى 9 مساء)
    
  • مجموعه ب : 10 ايام (من الساعه 6 عصرا الى 9 مساء)
    
  • مجموعه ج : 15 ايام (من الساعه 3 عصرا الى 9 مساء)
    
  • مجموعه د : 20 ايام (من الساعه 3 عصرا الى 9 مساء)
    

  و الامتحان ليس صعبا ,ولكن للذين لم يسوقو من قبل ,سيحتاج تدريب قبلها ,و بيكون كالتالى كما هو موضح فى الصوره :

  

  بتحرك العربيه من النقطه 1 الى النقطه 2 و بعدين بترجع بظهرك الى النقطه و احد مره تانيه ,و خلى بالك عربيات الامتحان عندهم جيده جدا و دواسه البنزين حساسه جدا ,فا حاول الا يعلو صوت العربيه عند بدأ الحركه , و حاول تدرب على الامتحان مع احد اصدقائك .

  بعد الامتحان و تحديد المستوى ,بتدفع 450 ريال و و بتاخذ جدول الايام و المواعيد و لك 3 ايام غياب فقط ,و بتاخد وصل المبلغ و

  بتعطيهم الملف بالورق اللذى بالاعلى .. حافظ على الوصل لأن به ساتستلم ملفك كله بعد النجاح و تسلمه للمرور لإصدار رخصتك انشاء الله

  [*] الخطوات اللتى يجب ان تتقنها اثناء التدريب:

  هذه الخطواط يجب ان تتحول الى عادات عندك تعملها تلقائيا و بعضها ,الظابط اللى سيمتحنك فى الاخر سيتابعها معك اثناء الامتحان.

  • اول شىء ,اول ما تقعد على كرسى القياده قل "بسم الله الرحمن الرحيم"
    
  • خطوات بدايه الحركه:
    
    • عدل الكرسى على طولك,لأن ممكن الشخص الى قبلك كان اقصر او اطول منك.
      
    • شغل الموتور.
      
    • ظبط المريات ,حتى لو مظبوطه.
      
    • ارط حزام الامان.
      
    • لو هاتطلع فى البدايه على اليمين او اليسار ماتنساش الاشاره.
      
    • دوس الدبرياج (يسمى فى السعوديه كالتش) على الاخر.
      
    • هات الجيير على الاول.
      
    • نزل فرامل اليد.
      
    • بص يميناك و شمالك لتتأكد ان لايوجد عربيات مقتربه.
      

    [*] كن و اثق من نفسك اثناء القياده و لا تخف.

    [*] حاول ان يكون تغييرك للجيير فى سلاسه.

    [*] يجب ان تغير الجيير تبعا للسرعه التى انت عليها ,فمثلا عندما تكون على الخامس و ماشى بسرعه 10 ولا 20 ,(لأنك كنت بتدخل شارع جانبى مثلا) ,فيجب تغيير الجيير بما يتناسب مع السرعه ,ايضا ليكون فى عزم فى العربيه.

    [*] اثناء القياده ,كل شويه تابع المريات.

    [*] خطوات التوقف:

    فى الغالب ها يطلب منك ان تتوقف فجأه ,لكى يرى الظابط كيف سستعامل ,و الخطواط هى:

    • 
      
    • اولا تبص على المريات و تتأكد انه لايوجد عربيه خلفك.
      
    • اعطى اشاره يمين (لانك هاتقف على اليمين مش فى نصف الشارع).
      
    • تبدأ تدوس على الفرامل و الدبرياج و تجعل السياره تهدى و حاول مايكنش التوقف فجأه.
      
    • عندا تتوقف العربيه تقف ,"ماور" العربيه (لا تنسى هذه الخطوه ,ناس كتير سقطو بسببها) .
      
    • ارفع فرامل اليد.
      
    • ارفع رجللك من الدبرياجو الفرامل.
      
    • اضغط على اشاره التوقف.
      

  [*] الامتحان النهائى:

  بعد الانتهاء من الدوره التدريبيه ,سيحدد معاد الامتحان ,عليك ان تذهب الى هناك فى يوم الامتحان مبكرا ,تكون هناك الساعه السابعه صباحا ,ويكون معك الوصل و الإقامه.

  ينقسم الامتحان اللى:

  • إمتحان القياده:
    طبعا الممتحنيين يكونون ظباط من المرور ,عند بدأ الامتحان يبدأ كل ظابط بأخذ 4 من المتقدميين للأمتحان ,واحد على مقعد القياده و اثنين فى الخلف,و يكون معه استماره امتحان لكل طالب (وهى احد الاوراق الهامه من الملف) كما فى الصوره التاليه:
    
    حاول ان تكون هادىء ولا تخف و لا تعطى الموضوع اهميه و ضع كل تركيزك فى القياده و تزكر دائما الخطوات التى ذكرتها بالأعلى ,و امشاء الله ستكون من الناجحين ,كما هو موضح فى الصوره ,يضع الظابط علامات امام نقاط الامتحان ,للنجاح يجب ان تحصل على 75% (هذا ما سمعناه من المدربين و لكنى لست متأكد) و اذا لا قدر الله رسبت يمكنك ان تعييد الامتحان بعد شهر بدون دوره اخرى.
    
  • إمتحان الإشارات:
    بعد الانتهاء من امتحان القياده بنجاح ,ستتوجه اللى امتحان الاشارات ,ويجب عليك ان تحفظ جميع الاشارات التى فى لوحه الاشارات اللتى تستلمها فى المدرسه ,وهى كالاتى:
    
    
    
    سيسألك الظابط عن 3 اشارات عشوائيه .فى الاغلب سيكونو : محطه البنزين ,المستشفى و المطعم.
    

بعد النجاح فى الامتحان سيختم الظابط على اوراقك بختم "ناجح" كما هو موضح على استماره الاختبار,و سيلحق الاستماره بالملف الخاص بك ,و بعدها ستتوجه الى غرفه استلام الملفات (غرفه 4) و لإستلام ملفك ,وقد تأخذ بعض الوقت فى الانتظار ,بعد استلام الملف ,ستبقى اخر خطوه و اخر ورقه لازمه لإكمال ملفك و هى التأمين على الرخصه ,فقد اصبح اجباريا ,ستجد شركه التعاونيه للتأمين فى نفس المدرسه ,و تصدر تأمين الرخصه و يكون بمبلغ 350 ريال ,و تصور وثيقه التأمين على الرخصه و تلحق الصوره بالملف ,و بهذا يكون الملف قد اكتمل تماما ,بعدها تتوجه الى غرفه استلام الرخصه (غرفه 1) ,و تسمهم الملف ,يقوم الظابط المختص بمراجعه الاوراق كلها و بعد فتره سينادى على اسمك لتستلم رخصتك,والف مبروك مقدما...

يا رب يكون الموضوع افادكم و انشاء الله من الناجحين فى امتحان الرخصه.

[ozoozo]

يا شباب ما احد رد

ينفع اتوماتيك فقط

ماينفعش

الاتوماتيك للمواطنين فقط

[جديدة بالرياض]

انا زوجي كان بيسوق بمصر وادى الاختبار مرتين ورسب ثم حولوه لمدرسة تعليم لمدة 4 ايام ثم امتحن مرتين ورسب تاني وقبل كل ذلك اخذوا منه الرخصة المصرية واعلموه انه لن يأخذها الا مع اذن الخروج والعوده كما انه عمل كل التريكات اللى مكتوبه اعلاه

السؤال بقى : هل ينفع بعد ان يسحب الرخصة المصرية يقدم في مكان تاني ؟

لانهم تقريبا مستقصدينه في المدرسة ده

[خالد شحاته]

انا زوجي كان بيسوق بمصر وادى الاختبار مرتين ورسب ثم حولوه لمدرسة تعليم لمدة 4 ايام ثم امتحن مرتين ورسب تاني وقبل كل ذلك اخذوا منه الرخصة المصرية واعلموه انه لن يأخذها الا مع اذن الخروج والعوده كما انه عمل كل التريكات اللى مكتوبه اعلاه

السؤال بقى : هل ينفع بعد ان يسحب الرخصة المصرية يقدم في مكان تاني ؟

لانهم تقريبا مستقصدينه في المدرسة ده

السلام عليكم ورحمة الله وبركاته

نعم ينفع يقدم في اي مكان اخر بس للازم تكون معه الرخصه المصريه

[OmarBak]

وهي الرخصة المصرية تنفع في حاجة هنا

مظنش ليها قيمة هنا خالص

؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟

[خالد شحاته]

وهي الرخصة المصرية تنفع في حاجة هنا

مظنش ليها قيمة هنا خالص

؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟

نعم الرخصه المصريه بتوفر عليك 450 ريال مدرسه غير الشهر في المدرسه

[OmarBak]

يعني ينفع اعمل استبدال بالرخصة المصرية وامتحن بس

طيب لو رسبت هيقولو سجل مدرسة وادفع ولا انا فاهم غلط

[خالد شحاته]

يعني ينفع اعمل استبدال بالرخصة المصرية وامتحن بس

طيب لو رسبت هيقولو سجل مدرسة وادفع ولا انا فاهم غلط

لك فرصه بالرخصه المصريه لو رسبت بيعطيك اربع ايام تعيد فيهم لو معرفتش للازم مدرسه

[engmoh]

يا شباب ما احد رد

ينفع اتوماتيك فقط

ماينفعش

الاتوماتيك للمواطنين فقط

السلام عليكم

حبيت اشارك واوضح ينفع اتوماتيك فقط

انا لسه ممتحن اليوم والحمد لله نجحت وكان امتحانى اتوماتيك وان شاء الله هستلم الرخصه يوم الاربعاء القادم

يعنى مش شرط للمواطنين فقط ولكن لاى مقيم

[OmarBak]

انت امتحنت فين اى فرع لمدراس دلة

ولو واحدرسب ياخد فترة تعليم عندهم اتوماتيك برضه ولا هيكون النظام ازاى لو احد رسب

ومرسي جدا

دا خبر جميل

تم تعديل 6 يوليو 2009 بواسطة OmarBak

[engmoh]

انت امتحنت فين اى فرع لمدراس دلة

ولو واحدرسب ياخد فترة تعليم عندهم اتوماتيك برضه ولا هيكون النظام ازاى لو احد رسب

ومرسي جدا

دا خبر جميل

أنا امتحنت فى فرع جده

انا هقول لك على اللى حصل معايا

انا فى البدايه ذهبت استبدل رخصتى فى الاول عملوا لى امتحان تحديد مستوى( مانيوال) فطبعا انا مش كويس فيه

فاخذت مستوى (ب) يعنى دوره 5 ايام فقط فى المدرسه

دفعت 435 رسوم مدرسه واخدت اول حصه تمام

فى الحصه التانيه العربيه بطلت منى اثناء التمرين فقالوا لى هنحولك لدوره لمدة 15 يوم لان مستواك مش تمام فانا اعترضت

المهم بعد كلام كتير معاهم عرفوا انى بعرف اقود اتوماتيك فقالوا لى ينفع تحول لاتوماتيك ( انا ماكنتش اعرف ان فيه رخصه اتوماتيك من الاول )

فذهبت تانى يوم الصبح للضابط وطلبت تحويلى لاتوماتيك فوافق فكملت المدرسه ( ال 3 ايام الباقيه) تدريب على اتوماتيك

والحمد لله اليوم امتحنت اوتوماتيك ونجحت وعقبالك ان شاء الله

نسيت اقولك انى لما حضرتك مع مجموعة الاتوماتيك اكتشفت مجموعه غيرى من المقيمين ايضا بس هم من الاول لما امتحنوا مانيوال ورسبوا اعادوا الامتحان على الاتوماتيك وبداوا المدرسه من الاول على الاتوماتيك

[OmarBak]

يعني انا اول ما اروح اطلب اتوماتيك على طول

بس انا معى رخصة مصرية عادى بس طبعا كوسة

انا مش بعرف عادي

[solimannour]

انا بكتب اللي حصل معايا علشان اشجع اي واحد عاوز يطلع رخصه

انا كمان معايا رخصه مصريه كنت طلعتها بعد اخد اربع حصص وكنت بسوق بالعافيه وكان الامتحان في مصر سهل يعني تقريبا نصف حرف سي وخلاص

روحت دبي ومفكرتش اطلع رخصه لاني عارف نفسي والدنيا هناك صعبه يعني الواحد ممكن يقعد سبع او ثماني شهور لاستخراج الرخصه

واول ماجيت السعوديه قدمت في مدرسه شمال الرياض وطلبت اخد 15 يوم وفعلا ابديت اتعلم ودخلت الامتحان وكان العسكري محترم ولكن انا عملت كام غلطه مثلا دوست علي الفرامل جامد ومكنتش متحكم في عجله القياده المهم كان قدامي اسبوع روحت ادور علي اي عربيه خاصه اتعلم عليها وفعلا لقيت واحد معاه عربيه قديمه ائوي وقعدت اسوق واتعلم لحد ماربنا سهل ودخلت الامتحان هادي ومركز الحمد الله ونجحت وكانت الدنيا تمام وان شاءالله قريب هقول ليكو عملت ايه لما استلمت العربيه مكنش قدامي حل غير ان امشي في طريق الملك فهد والدائري وكمان كان مساء وعمري ما سقت في طريق سريع

[واثق الخطوة]

شكرا اخ مصطفى

ادعولي يا جماعة لاني مقدم على هذا الخطوة الجرئية بعد شهر تقريبا ..

ان شاء الله

[herohero]

مفيش مجال للمقارنة بين السواقه هنا والسواقه ف مصر يعني لو بتسوق ف مصر كويس هتنجح وانت مغمض هنا ف الامتحان لان امتحان هنا اسهل من مصر انا بتكلم ع مرور زي الوايلي ولا مدينة نصر وانت راجل ماشي من غير كوسة لان ف مصر الواحد بيشوف حركات غريبة ف الامتحان لو مع اي حد رخصة مصرية وكان بيسوق ف مصر كويس يبقى توكل ع الله وهتنجح

ولو انت كنت بتسوق اتوماتيك كم يوم صغيرين تعود رجلك ع المانيوال وتوكل ع الله ، طبعا السواقة مش رخصة وبس يعني واحده واحده وهتبقى كل حاجه تمام