من وحي التعديلات الدستورية

[bassem_2009]

قالوا هنعدّل قانون

قلت ده والله كلام موزون

بس فيه ناس راح يقولوا

دول أونطة ما تروحوش

رد عليهم دول وقالوا

فكرة سودا ماتسمعوش

دول جواسيس دولا عملا

جول كلامهم ف الفاشوش

وان دول شدوا دولا يرخوا

وانا هيصيبني ياناس جنون

**********

قلت انا أعرف ايه الحكاية

قمت فتحت التليفزيون

لقيت أغاني وطني دايرة

والسهتان عامل لي فيها

قال نصير المحرومين

قال بيغني للغلابة

ويسبل للمنهوشين

المهم ده مش حوارنا

من كتر الأغاني قلت

احنا أكيد رحنا نحارب

الأبالس الصهيون

ونرجع إلقدس تاني

ونحنّي غصون الزيتون

قالوا يا ابني أكيد بتحلم

دي الحكاية إن مصر

جتها لحظة

فيها كبرت

هتخطي العتبة بقدمها

طب يا اخويا ألف بركة

قالوا ما تتّريقش دا احنا

سايقين السفينة دايما

لحد ماتروح للأمان

*********

- طب يا اخويا قول لي طيب

= يا ابني الدعم دا كان زمان

بيضيّع فلوس كتير

والحكاية إنه لازم

واحدة واحدة قوام يطير

- والغلابة؟

= ياكلوا فينوا

- واللي معوش؟

= مايلزموش

- قول بقى كده م الأول

ده تخطيط شيطان مدهول

لاجل ما يملا الكروش

لاجل ما يعيش ف العلالي

بعيدا عن كل الهاموش

= انت بتخطط لداهية

- داهية ايه؟

= إرهابي انت

والقانون جديده يجعل

بالظنون الصايبة مني

ألفـّـفك على ميت لومان

وبعد بهدلة بلاوي

روح اشكيني لأي قاضي

ده إن كان لساك بتقدر

عالقدمين تسير وتمشي

- طب نغير الموضوع؟

الوريث؟

= الله يعينه

ويثبت ف الأرض دينه

- وان رفضنا ؟

= شعب خايب

قال بيفهم قال مثقف

انت شغلتك تسقف

- طب لمين قول لي طيب

وبأمارة ايه اسقف؟

= انت هتسأل برضه تاني؟

انت هتسقف لباشا

من زمان وهو باشا

وابنه بيه صغير لكن

بكرة ياكل م الفطيرة

ع العموم هي عزبة

وانتوا اللي بترعوا فيها

- هي دي الديمقراطية؟

= أيوة يا اخويا هيـّـة ديـّـة

ماتعملش انك بتفهم

دا انت يا ابني لسة طالب

اجري يالا على دروسك

وانسى جرايد المعارضه

دول دسايس دولا يبغوا

فرقة الشعب العطيم

المصارى الغلابة

اللي عايشين طيبين

يحميهم بارينا دايما

من عيون الشمتانين

باسم زكريا

وربنا يستر

[Ahmad Farahat]

قصيدة رائعة.........

وأروع ما فيها صراحتها.........

وكأنها صرخة في وجه التعديلات............

من شاعر صادق............

[النمر الأسود]

اخي كل ذالك كويس بس من تدخل في ملا يعنيه لقى مالا يرضيه

[nor fahmy]

اخي كل ذالك كويس بس من تدخل في ملا يعنيه لقى مالا يرضيه

ياجماعه المحاورات

خلونا فى حالنا

علشان سلومه الأقرع

ميعرفش أخوه

وهاتك ضرب على القفا

واللى يطرقع مايحسبش

أدعوكم لقراءه دستور جمهوريه بطيخستان

هيعجبكم قوى

قالها الزعيم من غير مايحلف

عمر الزعيم مافى يوم يخلف

[نهله الجيوشى]

اخي كل ذالك كويس بس من تدخل في ملا يعنيه لقى مالا يرضيه

ياجماعه المحاورات

خلونا فى حالنا

علشان سلومه الأقرع

ميعرفش أخوه

وهاتك ضرب على القفا

واللى يطرقع مايحسبش

أدعوكم لقراءه دستور جمهوريه بطيخستان

هيعجبكم قوى

قالها الزعيم من غير مايحلف

عمر الزعيم مافى يوم يخلف

يانور يابنت بلدى إسكندريه

مبروك على الشعب

تعديل الدستور

وبكده بقى عندنا

أحلى وأجدد نيو دستور

يوم الاستفتاء

فتحت الراديو

سمعت أحلى أغانى

فى حب مصر

ومن أجل التغيير تم اذاعتها

خدى عندك

نعم ياحبيبى نعم

أمه نعيمه 00 نعمين

وتم منع أغنيه الشحروره

لأ لأ يامدوبنى حبك

[DARWEEN]

دستور يا اسيادي دستور

ويارب اللي عمله يغور

و ياشعب امتى حتثور

وتشيل البقره والتور

ياشعب اطلع للنور

واصرخ في وش المغرور

عايزين نطلع بره السور

كفايه ضرب واهانات

وكفايه بقى معتقلات

وكفايه عساكر حراسات

وتعذبوا حتى الستات

لو على وشوشكم شنبات

مش لازقينها كده ديكورات

عاملين فيها ولاد باشوات

وانتوا حرامي على شحات

وياريت ينكشف المستور

دستور يا اسيادي دستور