se_ Elsyed بتاريخ: 26 سبتمبر 2009 تقديم بلاغ مشاركة بتاريخ: 26 سبتمبر 2009 ده هم من الهموم التلاته اللي هما هم يضحك وهم يبكي وهَم يا جمل ----------- الهم ده بقى هو هم اكل الاطفال إيه يا جدعان ... ده احنا ما كناش عيال على كده والله العظيم أنا فاكر لما كنت صغير كنت أأكل كل ما يمشي على الارض الا البني أدمين ... وكل ما يطير بجناحين الا الطائرات ... وكل ما له 4 رجول الا الترابيزات بس للامانه لما كبرت وبقيت في مرحلة المراهقة ( يعني نقول 35 او 37 سنة ) بقيت متدلع واكل ده وما اكلش ده وما اشربش الشاي اشرب أزوزه انا لكن اطفال اليومين دول هما العذاب كله وبقت ساعة الاكل في البيت عندنا هي ساعة حرب ميليشات الشوارع وحاجات بتطير وطفي النوور طفي النوووووور وحاجه تقرف وعندي عيل كبير ... ربنا ما يوريكو ... أبويا الله يرحمه كان بيتريق على ده ويقول ( اصل العيال دي ما جاعتش ) فعلاً والله العظيم تلاته .. ذهبت الى قريتنا لبضع سويعات هذا الصيف وشوفت أطفال أصغر من أولادي أقسم بالله لو وجدوك انت شخصياً لقمه لياكلوك ما شاء الله ما شاء الله ... عديل أخويا .. عميد في القوات المسلحه لكن مقيم في قريتنا ... ما شاء الله رب العالمين عنده طفلين في خامسة أبتدائي وفي تانيه أبتدائي .. ربنا يحرسهم له .. أقسم بالله مش انا راجل طول بعرض أهو ... لكن بيتهيألي العيل من دول صحته أجدع مني يا مُرفه أنا هاحكي لكم على موقف هو ساكن في عمارة في الدور الرابع ... فحب يغير سيراميك الحمام والمطبخ والبانيو والحوض كمان بالصلاتو عالحبيب .... وسمعوني الصلاة عالنبي وعاوز 10 يكتفوني ... الطفلين نتعوا كراتين السيراميك والبانيو والحوض لوحدهم مع أبوهم للدور الرابع .... فين فيروز ؟ حد يجيبلي فيروز بنتنا هنا اللي عُمر إبني لو مشي من جنب كرتونه سيراميك ممكن يتعب ويرقد في السرير أسبوع وفعلاً عيال جاعت وبتاكل الظلط ... اختهم الكبيرة تقريباً كانت في سنة 6 ... وإحنا قاعدين لقيتها بتقول : عارف يا عمو ؟ في امتحانات السنة اللي فاتت كنت بأمسك جفوني وبأرفعهم عشان اعرف أشوف الكتاب .....!!!!!!!! أنا سمعت كده وموت من الضحك ... ما شاء الله من الأكل والصحة ... جفونها نزلت على عنيها وبقوا كيان واحد يالا ماحدش بياخد كل حاجه البهوات اللي عندي وصلت بيهم درجة الآنتخه إننا كنا بنضرب لهم اللحمه في الخلاط لإنهم يعععع ما بياكلوش اللحمه صاحيه .. وان ما كانش فراخ ما ياكلوش .... وعاوزين طول اليوم يضربوا بانجو وجانك فوود ... الواد البكري مسمي الجمبري ( صراصير ) صراصير يابن ........... سين سين ؟!!! ده أبوك ما وعاش على الجمبري الا في تالته جامعه ويوم ما كنت باشوف الهامبورجر كنت بأسورق وعمري ما حلمت إني أكل كاتشب او يبقى عندي مَج أشرب فيه ميسكوفيه اللي بيسموه نسكافيه ده احنا يابني كنا عيال معفنه اكلت من خشاش الأرض المهم ... كان نفسي ومُنى عيني قبل ما اموت الاقيه ياكل حاجه فيها حديد .. مسامير ... لوح أبلكاش .. اي حاجه فيها حديد والسلام لكن والله يا جماعه من وهو عنده سنتين كان يشم ريحة الكبدة من على بُعد كيلو ... ويصاب بتشنجات وحالة ترجيع متواصلة وكان مكرهنا في عيشتنا .. طب نعملها له بانيه .... إنسى يا آبيه طب مطبوخه ... والله لما تقف على راسك لحد ما حصلت المعجزة ونزلت عداله السماء على ستاد باليرمو كنت في مكتب الديكور في الزقازيق وأصر ييجي معايا أنا وعمه ... وقضينا وقت كبير هناك وفرفرنا كلنا من الجوع وما حوقش معانا شيبسي ولا هوهوز ولا كلام من ده فأخويا قال لي : إيه رأيك نضرب كبده جَملي يا معلم عند زيزو النتن اللي في بلبيس وإحنا راجعين ؟ .. قلت له ( الله يمسيك بالخير يا طفشان يا حبيب قلبي يا جهبز يا صاحب مُعجم الخفايا المبهمه في أصول الرمرمه ) قلت له معاك يا معلم بس بالراحه عليه حاكم اخوك بقى كوكو الضعيف وبقيت أخاف من الجوافه المهم حودنا على بلبيس وهناك محلا متخصصة في الكبده الجملي والمعلم عُمر أعجب قوي بالجو الأورينتال اللي مش نضيف ده ...وقلت له تاكل كبده جملي يا عمور ؟ قال لي : إيه ده هو الجمل عنده كبده يا بابا ؟ قلت له : طبعاً ده عنده كبده وفشه ولحمه .. وبيمشي عالحيط كمان صاحبنا ضرب الكبده من هنا وقال لي : إديني تُمنايه كمان يا معلم طلبت له تاني وقلت : صحيح الجوع كافر يا ولاد ومن ساعتها ... كل يوم اتصل بيه وانا في الشغل : ايه رأيك أجيب لك ساندوتشات كبده جملي ؟ ... يضحك ويتبسط قوي يوم العيد صلينا ورجعنا من الصلاة هفتانين من الجوع ... واللي من الرياض يعرف شارع الأحساء من ناحية كوبري الخليج ... هايلاقي ييجي عشروميت محل متخصصين في الكبده بس ... خلصنا الصلاة وروحنا لقينا أمة لا إله الا الله .. طلبت للمعلم دستة ساندوتشات كبده بالشطة ... وضربهم ما شاء الله وهي أساساً لا جملي ولا يحزنون لكن كبده عاديه لكن تقول ايه لنفس البني ادم الدنيئة وانا لست مع المقولة اللي بتقول : يا عم خلي الولد كده ولما الجوع يقرصه هاياكل لوحده والله يا جماعه كذا مره تحصل ويُغم عليه من قلة الاكل وإلتهاءه في اللعب وينسى نفسه طول اليوم ونجري بيه على المستشفى بعد ما ضغطه ينخفض تقولي سيبه ؟!!! الغرابه إنه بيعلم إخواته ده لأ واللحمه يعععععع والسمك ييييييييه وانا اعلم تماماً إن دي مشكلة كثير من البيوت وفعلاً عملية اكل الاطفال بتبقى أصعب من عملية القلب المفتوح وبالتالي أي حد عنده طفل مغلبه .. ياخده بلبيس على طول عند زيزو النتن وبإذن الله ربنا هايجعل على إيد الدكتور زيزو الشفا ولنا عوده الأحـــرار يؤمنون بمن معه الحق .. و العبيــد يؤمنون بمن معه القوة .. فلا تعجب من دفاع الأحرار عن الضحية دائماً .. و دفاع العبيد عن الجلاد دائماً رابط هذا التعليق شارك المزيد من خيارات المشاركة
Alrefaey بتاريخ: 26 سبتمبر 2009 تقديم بلاغ مشاركة بتاريخ: 26 سبتمبر 2009 ههههه كعادتك يا ابو الاسيان اسلوبك ولا اروع بقولك ايه جربت مع عمر فواتح الشهية والفيتامينات وخلافة ؟ "{وَمَن يَتَّقِ اللَّهَ يَجْعَل لَّهُ مَخْرَجًا وَيَرْزُقْهُ مِنْ حَيْثُ لَا يَحْتَسِبُ وَمَن يَتَوَكَّلْ عَلَى اللَّهِ فَهُوَ حَسْبُهُ إِنَّ اللَّهَ بَالِغُ أَمْرِهِ قَدْ جَعَلَ اللَّهُ لِكُلِّ شَيْءٍ قَدْرًا} " رابط هذا التعليق شارك المزيد من خيارات المشاركة
se_ Elsyed بتاريخ: 26 سبتمبر 2009 كاتب الموضوع تقديم بلاغ مشاركة بتاريخ: 26 سبتمبر 2009 بقولك ايه جربت مع عمر فواتح الشهية والفيتامينات وخلافة ؟ آه جربت كذا مره افتح له دماغه بصراحه يا عم رفاعي دي عيال مجرمه تقولي فواتح شهيه وفيتامينات وخلافات الأحـــرار يؤمنون بمن معه الحق .. و العبيــد يؤمنون بمن معه القوة .. فلا تعجب من دفاع الأحرار عن الضحية دائماً .. و دفاع العبيد عن الجلاد دائماً رابط هذا التعليق شارك المزيد من خيارات المشاركة
aimen بتاريخ: 26 سبتمبر 2009 تقديم بلاغ مشاركة بتاريخ: 26 سبتمبر 2009 ربنا يحرسهم لك يا سى السيد ...يارب طيب جربت تدخلهم الجيش ...العيال دى ما ينفعش معاه غير القوة .... افتكر اخى الأصغر كان بيعيش على المكرونة والبطاطس الشيبسى ...يا قلبى يابنى ...هى سنة واحدة بس مرمطة فى المدينة الجامعية ...وعينك ماتشوف الإ النور ...دلوقت بياكل كل حاجه واى حاجه تعلمها له المدام .... رابط هذا التعليق شارك المزيد من خيارات المشاركة
لولا بتاريخ: 26 سبتمبر 2009 تقديم بلاغ مشاركة بتاريخ: 26 سبتمبر 2009 بقولك ايه جربت مع عمر فواتح الشهية والفيتامينات وخلافة ؟ آه جربت كذا مره افتح له دماغه بصراحه يا عم رفاعي دي عيال مجرمه تقولي فواتح شهيه وفيتامينات وخلافات الواد عمر ده بيفكرنى بنفسي وانا صغيره :lol: جميل ان ربنا كرمك تشوفه بياكل كبده اخيرا .. ده انتو ماشاء الله مسعدين ياراجل . انا بقى فاكرة كويس قوى اول مره اطب فيها الحسين وطبق الحمام والكباب والكفته اللى مرضتش امد ايدى عليه وفضلت اقول يعععع ..امبوسيبل اكل من الأكل دوت :hi: وحياتك يوميها ماما خلالالالالالالالالاص فاااااااااااااض بيها وهددتنى باوضة الفيران لو مكلتش :lol: وهى اول مره بس .. مديت ايدى ومن ساعتها بقيت بحب الأكل فى الأماكن الأورينتال وسط القطط اللى بتحوم على روائح اللحمة فى الحسين :blink: بس الموضوع دوت على اعتاب المراهقه طبعا . اطفال كتير جدا كده متعبين قوى فى اكلهم والأهل لما بتتعب للأسف بتستسلم والطفل يتضرر من عينه الأكل اللى بيقى مصر ماياكلش غيره وهو اكل مش مفيد تعرف انا مره كنت بفكر فى الموضوع دوت انا وجوزى احنا ليه كنا واحنا صغيرين بنفضل الناجتس والفرنش فرايز والهمبورجر والبيتزا على اى حاجه.. مش لاقيين اجابه ، غريبه جدا جدا ان الذوق دوت فى الأكل اتغير بعد الجامعه وبقى مش مستحب كمان بعد الجواز معرفش والله هى خلايا التذوق بتنضج مع البنى ادم وتعقل ولا ايه :D مره كنت بتفرج فى برنامج اوبرا على حلقه بتتكلم فيها وحده عن طرق كتير ممكن تضيف بيها الخضار للأكل ويتطبخ من غير الطفل ما يشوفها فى الأكل ويرفض ياكلها اعتقد مثلا كانت بتطحن الخضار وتعمل بيهاصوص بالصلصه للمكرونه بدل الأطفال اللى بتاكل بس مكرونه بالكاتشب. وكانت بتعمل التاكو باللحمة/فراخ/جمبرى بطريقه ديليشيز جدا بالنسبه للطفل برضو بصوص افوكادو اعتقد وممكن يحط عليهاشويه كتشب بس تعتبر وجبة ممتازة وصحيه وبتجمع البروتين بالفيتامينات والنشويات شوف من الآخر للأسف للأسف مضطرين تدورو على طرق جديده لطبخ وتقديم صنف معين للطفل عشان يحبه. يعنى الكبده نفسها ممكن تتعمل سندوتشات فى العيش الفينو الصغير قوى دوت ويتقدم مع جزر ،خيار ، بطاطس متهيألى عشان العيش شكله صغير وجذاب ممكن يخليهم ياكلو. بالذات اخوات عمر الصغيرين.. لازم نحط نفسنا مكان الطفل، الإبتكار فى التقديم ممكن يغرى الطفل جدااااااااااااا عشان يجرب اصناف جديده . مكن حاجه بسيطه زى ان الطفل ياكل فى طبق عليه صورة شخصية كرتون بيحبها تأثر فيه ، ممكن تكون فى حاجات مناخدش بالنا منها او نحس انها صغيره لكن اعتقد طفل اليومين دول استدراجه للأكل محتاج انك تدور فى التفاصيل دى وتشوف انت طبقتها كلها ومانفعتش ولا لسه فى حاجات ممن تطبقها . لو عملت كل ده ومفيش امل انصحك تبعتهم البلد شهرين .. واهى البلد اصلاح وتهذيب برضو :hi: طائره ورقيه رياح شديده خيط قصير الطائره ليست بين السماء ولا الأرض ..هذه انا!! لولا رابط هذا التعليق شارك المزيد من خيارات المشاركة
se_ Elsyed بتاريخ: 26 سبتمبر 2009 كاتب الموضوع تقديم بلاغ مشاركة بتاريخ: 26 سبتمبر 2009 تعرف انا مره كنت بفكر فى الموضوع دوت انا وجوزى احنا ليه كنا واحنا صغيرين بنفضل الناجتس والفرنش فرايز والهمبورجر والبيتزا التاكو باللحمة[/quoteبصوص افوكادو ------------------ تصدقي بالله !!!!!!!!! انا مش هارد عليكي بقى عمال أقولك زيزو النتن ودي عيال معفنه وكنت بأسمع إسم الهمبورجر بيجيلي بعيد عنك تشنجات وسعادتك جايه تقوليلي صوصو بالأفوكاتو وتايكوندو باللحمه سيبينا في حالنا الله لا يسيئك يا ست هانم وخلينا نكمل بقيت عشانا نوم وصل الست هانم للعربية يا عبدو وشد الباب وراك الأحـــرار يؤمنون بمن معه الحق .. و العبيــد يؤمنون بمن معه القوة .. فلا تعجب من دفاع الأحرار عن الضحية دائماً .. و دفاع العبيد عن الجلاد دائماً رابط هذا التعليق شارك المزيد من خيارات المشاركة
Folana بتاريخ: 26 سبتمبر 2009 تقديم بلاغ مشاركة بتاريخ: 26 سبتمبر 2009 وسعادتك جايه تقوليلي صوصو بالأفوكاتو وتايكوندو باللحمه سيبينا في حالنا الله لا يسيئك يا ست هانم وخلينا نكمل بقيت عشانا نوم وصل الست هانم للعربية يا عبدو وشد الباب وراك السلام عليكم ورحمة الله.... :lol: أما انت يا ابو الاسيان مالكش حق ابدا...بالراحة شوية على لولو وانت يالولو...مافيش داعى من المصطلحات دى هنا الله لا يسيئك زى ماقال البيه... وخلى بالك احسن الحكومة بصدد اصدار قانون ضريبة المأكولات...يليه قانون ضريبة آكلى التاكو بالافوكاتو وده حيصدر فى حال ما اذا اتأكدوا ان الشعب لسه معاه فلوس بعد الضريبة العقارية....فبلاش احسن خلينا فى الكبدة الجملى... حقك على يا سنسن..وادى رأسك اهى mfb: كمل يامولانا...ولو عايز اى استشارة فى أكل الاطفال آآمرنى...:) :P { لَّقَدْ كُنتَ فِي غَفْلَةٍ مِّنْ هَـٰذَا فَكَشَفْنَا عَنكَ غِطَآءَكَ فَبَصَرُكَ ٱلْيَوْمَ حَدِيدٌ } رابط هذا التعليق شارك المزيد من خيارات المشاركة
لولا بتاريخ: 26 سبتمبر 2009 تقديم بلاغ مشاركة بتاريخ: 26 سبتمبر 2009 تعرف انا مره كنت بفكر فى الموضوع دوت انا وجوزى احنا ليه كنا واحنا صغيرين بنفضل الناجتس والفرنش فرايز والهمبورجر والبيتزا التاكو باللحمة بصوص افوكادو ------------------ تصدقي بالله !!!!!!!!! انا مش هارد عليكي بقى عمال أقولك زيزو النتن ودي عيال معفنه وكنت بأسمع إسم الهمبورجر بيجيلي بعيد عنك تشنجات وسعادتك جايه تقوليلي صوصو بالأفوكاتو وتايكوندو باللحمه سيبينا في حالنا الله لا يسيئك يا ست هانم وخلينا نكمل بقيت عشانا نوم وصل الست هانم للعربية يا عبدو وشد الباب وراك :) :P :lol: خلاص انا غلطانه .. عنهم ماكلو .. خليك انت فى الطرق الأولد فاشن الفاشلة بتاعك mfb: خلى زيزو نتانه ينفعك mfb: طائره ورقيه رياح شديده خيط قصير الطائره ليست بين السماء ولا الأرض ..هذه انا!! لولا رابط هذا التعليق شارك المزيد من خيارات المشاركة
enjisultan بتاريخ: 26 سبتمبر 2009 تقديم بلاغ مشاركة بتاريخ: 26 سبتمبر 2009 اولا انا وجوزى موتنا بجد على نفسنا من الضحك والله كلامك بجد كأنة على بناتى قمة حاجة قمة فى الارف بجد وقت الاكل دا وقت عصيب فى بيتنا واحدة عندها 6 سنين والتانية 4 لو احكيلكوا هاصعب عليكوا الكبيرة مايتاكولش تقريبا ولا روز ولا مكرونة ولا بطاطس محمرمة ولا لحمة طبعا ولا خضار والفراخ بيضيقها بتقولى تدخول فى سنانى ناكول حتة ونقوم تغسل سنانها والحتة لايزيد قطرها عن طولها بافضل اقيف فيها يجى ربع ساعة وتتغدغ فى نص ساعة اة وعلى الا تزيد درجة حرارة الاكل عن 38 لازم دافى سخن لأ بارد لأ يا لهوى بنتى الكيرة انا اللى لازم اكلها اصل ايدها بتوجعها من المعلقة مع العلم انها بتبقى لسة قاعدة من المارثون اللى عاملينة فى البيت الصغيرة بقى لا يمكن تاكول حاجة جوة العيش ابدا ابدا جبنة لأ بيض لأ فول لأ حتى الناجتس والبطاطس لأ هى لما بتبقى جعانة بتتطلب شوربة وتقولى شيلى الوحشة دى منها اللسان عصفور يعنى ( يا بني إذا افتخر الناس بحسن كلامهم فافتخر بحسن صمتك ) . رابط هذا التعليق شارك المزيد من خيارات المشاركة
om marawan بتاريخ: 26 سبتمبر 2009 تقديم بلاغ مشاركة بتاريخ: 26 سبتمبر 2009 (معدل) يااااااااه فكرتنى والله ده ابو مروان واعدنى من زمان ببتاع الكفتة اللى فى ابو كبير ايون ابو بلاسى افتكرت وفيه واحد تانى جهبذ برضه فى ديرب بس لسه لا رحنا ده ولا ده بس انا بقا وصفتله بقا اسمه ايه اللى فى شارع الجيش فى مصر بالشبه كده ورحناله ولحد النهارده بيحلف بيه ده بأه مش محل ده يادوب مدخل كده وتاكل فى الصندرة وحاجة تمام اوى ممكن الاخوة القاهريين يدوك العنوان بالمظبوط وهيعجب عمور اوى ماعلينا المهم بقا الاولاد الحلوين هاقول لحضرتك ده مايطلق عليه بالطفل الانتقائى فى اكله وده محتاج حاجتين اولها بلاش حضرتك تلمح ولو من بعيد له بموضوع الاكل مش انك بس تسيبه ماياكلش لأ ده تتعامل مع الموضوع كانه مش موجود بدون تلميح او تصريح حتى لناس تانية من الاهل او الاصدقاء مثلا الطفل فى منتهى الذكاء لما بيحس ان دى حاجة شادة انتباه الاهل بيركز عليها جدا وبيفهم ده طبعا من تعليقاتهم و حكاويهم لاصحابهم واسألنى انا ..لانى كنت طفلة عنيدة جدا :P خصوصا ان الحكاية بتوصل لمستشفى وضغط واطى يعنى اهتمام اكبر ولهفة ومخضوضين عليه وكده تانى حاجة الاطفال بيحبوا التقليد جدا خصوصا لابوهم يعنى انا لو قلت لمروان شهر يجرب اكلة عمره ما بيجربها اول مايقعد ياكل مع باباه على طول يقلده وياكل بنفس طريقته زى ماحصل فى موضوع محل الكبدة هو حس ان ده نوع من النشاط الرجولى فحب يشارك فيه يعنى ممكن تلعبوا ماتش كورة خفيف او اى هزار فى البيت كده وييجى الاكل بعده فى وسط الهيصة تقعد حضرتك تاكل هتلاقيهم وراك على طول وأاكد عليك بلاش تعزم او تحسسه انك واخد بالك وطبعا ماتاكلوش بالمعلقة يا انجى خالص خلاص لو هى ايدها وجعتها قوليلها طب الحمد لله شبعتى ياللا قومى معلش والله انا مش باقسيكى عليها ربنا يحفظهم يارب بس صدقينى ده مهم جدا لصحتها وسنها مع الوقت و انا بنتى 3 سنين وباعمل معاها كده وهى بقت بتبسط جدا انها كبيرة وبتاكل لوحدها هى كان عندها مشكلة فى بعض الاصناف وكنت باعملها برضه واحطها من غير ماعزم عليها ابدا وشوية شوية بدات تجرب منهم حاجات والحمد لله طبعا هو فى الاول بيقاوحوا ويعاندوا شوية لانه الطفل مش متخيل انكم فعلا نسيتوا موضوع اكله لكن بعد شوية نفسه هتشتاق لانواع الاكل بتاعتكم وهيبقا عادى جدا المشكلة انه هيدور على حاجة تانية يحظى بيها باهتمامكم الزائد mfb: بس حضرتك عالج الموضوع ده بانك تخصصله مثلا وقت تخرج فيه معاهم خروجة رجالى كده بشكل منتظم اسبوعيا حاجة اخيرة معلش لو حضرتك عاوزه ياكل اى صنف بلاش حكاية اصله مفيد من غير توضيح يعنى مثلا تقول له اللحمة بتاعة العضلات والقوة السمك بتاع الذكاء والشطرنج السلطة للبنات طبعا تخلى شعرها طويل مش عارفة بقا الحاجات دى هتنفع معاكم فى التجربة ولا ايه جربوا وقولولى بس طولوا بالكم اوى وماتيأسوش يعنى ماتغيروش الخطة ابدا وترجعوا تتحايلوا او تلمحوا وكده كل ما يقل كلامنا وتركيزنا على الموضوع كل ماالنتيجة هتيجى اسرع وانا على فكرة انا أخدت الكلام ده من سوبر نانى وامى الحاجة :lol: ربنا يبارك في الاولاد جميعا يارب ويحفظهم والبنات طبعا سكر النبات :) تم تعديل 26 سبتمبر 2009 بواسطة om marawan يا بخت من يقدر يقول واللي ف ضميره يطلَّعه يا بخت من يقدر يفضفض بالكلام وكل واحد يسمعه يقف في وسط الناس ويصرخ : آه يا ناس ولا ملام ييجى الطبيب يحكي له ع اللي بيوجعه يكشف مكان الجرح ويحط الدوا ولو انكوى يقدر ينوح وأنا اللي مليان بالجروح ما اقدرش أقول ما اقدرش أبوح والسهم يسكن صدري ماقدرش أنزعه صلاح جاهين رابط هذا التعليق شارك المزيد من خيارات المشاركة
enjisultan بتاريخ: 27 سبتمبر 2009 تقديم بلاغ مشاركة بتاريخ: 27 سبتمبر 2009 شكرا ام مروان بس عندى لو قعدنا كلنا مع بعض غلى الاكل هما استحالة يأكلوا بيعملوا كل حاجة تتصوريها ما عدا انهم ياكلوا نحن نختلف عن الاخرين خالص لازم اقعد انا معاهم فى الليفنج اقعد ااكل قبل ما حنا ناكول انا وباباهم عشان احس انهم اكلوا وبعدين اية ....فى اللمة ما يكلوش نهائى ممكن نكون متجمعين انا واخواتى وولادهم يقولولى هايكلوا لما يشوفوا الباقين بياكلوا يا عينى باقى العيال اللى ما بتاكولش منتهى التسول صراحة وبنتى الكبيرة تقولى اصلى لما باكول باحس انى بادوخ دا لما بتاكول شوفى الاقناع بس على زكر الاكلات اللى العيال بتحبها مرة كنت فى شغل وباباهم اكلهم وراحت الايام وجت الايام وفى اسبوع باباهم كان مسافر بنتى تقولى ماما عايزة اكول حاجة كدة بابا جابهالنا فى علبة بلاستيك اقولهم ايس كريم تقولى لا اكل مش فاكرة اسمة اكل كدة اقولها اة ايس كريم وانسى اسئل باباهم وبعدين بعدها بيومين تقولى اكل كدة فى نقط واسمة كدة قريش اقولها مافيش حاجة فى بلاستيك الا الايس كريم يا حبيبتى ما خدتش فى بالى وقلت تخاريف قبل النوم وبعدين لقيتها بتصحينى ماما وجواة مكرونة ما صدقتش بقى يا عينى انها قصدها على الكشرى(قريش اسمه كدة فى بيتنا من ساعتها ) باباها قالى اصل دا كان من اكل الكفار عشان كدة سموة قريش من سا عتها وابو طارق صديقنا الصدوق ( يا بني إذا افتخر الناس بحسن كلامهم فافتخر بحسن صمتك ) . رابط هذا التعليق شارك المزيد من خيارات المشاركة
النجم الثاقب بتاريخ: 27 سبتمبر 2009 تقديم بلاغ مشاركة بتاريخ: 27 سبتمبر 2009 يااااااااه فكرتنى والله ده ابو مروان واعدنى من زمان ببتاع الكفتة اللى فى ابو كبير ايون ابو بلاسى ما شاء الله يا أم مروان إنتوا وصلتوا لأبو بلاسى mfb: .. عاشت أبو كبير حرة مستقلة :) .. فى واحد كمان اسمه الحاج عطية أنصحكم تجربوه :lol: و الله موضوعك يا سى السيد الناس كلها بتعانى منه جدا .. أنا عن نفسى مجربه مع إخواتى الصغيرين .. ممكن إحنا الكبار نخلص أكلنا و هما يفضلوا ياكلوا لمدة ساعتين مثلا و بالمحايلة .. رغم إن على ما أسمع إنى و أنا صغير كنت طول ما أنا شبعان قاعد ساكت و مبعيطش :P حاكم أنا بعز الأكل قوى mfb: كيف اصطباري وما في العمر متسع...!! رابط هذا التعليق شارك المزيد من خيارات المشاركة
سكر بتاريخ: 27 سبتمبر 2009 تقديم بلاغ مشاركة بتاريخ: 27 سبتمبر 2009 ابنى البكرى وحش الوحوش من كتر حبه فى الاكل مرة اكل معلقة رز واحدة من الطبق ودة تقدر تعتبره الغدا بتاعه ونام وصحى من النوم قررنا نبدا حرب العشاء البيه بيفتح بقه لاينا لسة معلقة الرز فى بقه نام وقام وفضل الرز اكتر من 6 ساعات فى بقه الصبر يارب رابط هذا التعليق شارك المزيد من خيارات المشاركة
عنبو بتاريخ: 27 سبتمبر 2009 تقديم بلاغ مشاركة بتاريخ: 27 سبتمبر 2009 يااااااااه فكرتنى والله ده ابو مروان واعدنى من زمان ببتاع الكفتة اللى فى ابو كبير ايون ابو بلاسى افتكرت ابو كبير تنور يافندم طبعاً احلى واحد تاكلى عنده مشوى هو ابو بلاسى ممنوع على الكوابريه "" اهل ابوكبير يعنى "" انهم ياكلوا مشوى بره بلادهم اللى هو ابوكبير الا لظروف خاصه انا لما جيت اسافر رحت اخدت الاذن الاول ولو ليكم فى الرمرمه والحاجات دى فيه مطعم اسمه الاحرازى بيعمل اشطيطه حاجه فى منتهى الروعه وليها مفعول السحر على كل حاجه مره عزمت واحد صاحبى فافاى وانا مكنتش اعرف انه فافى هو يعنى كان مخبى علينا على العموم جاله حاله غريبه ومن يومها مبقاش له اكل عيش مع الشله بتاعتنا بالنسبه لموضوع اكل الاطفال انا بعتبره اصعب مهمه فى التاريخ هى اكل الاطفال المدلعين انا اختى لما بشوفها وهى بتاكل العيال المفاعيص هى بتصعب عليا والعيال بيصعبوا عليا بيحس انهم بيعملوا حاجه هم مش مقتنعين بيها بجد عيال اليومين دول حاجه تقرف انا شخصياً وانا صغير كنت باكل اى حاجه على عكس اختى مكنتش بتاكل اى حاجه خالص وكانت بتخاف من الاكل وكانوا بيجبوا ليها فاتح شهيه بس طبعاً ولا بيعمل معها حاجه وانا اللى كنت باخد فاتح الشهيه من باب انها حاجه بتدخل البق وخلاص والدى الله يرحمه كان بيقول يامحمد انا مش لازم لكفاتح شهيه انت عاوز تنظيم شهيه فعلاً التشرد للعيال نعمه بيخليهم يدوسوا فى الحياه ان شاء الله الواحد لو ربنا كرمه بولد هخليه فى الشارع ولو بنت هخليها فافى اصل انا بحس ان الموضه ان البنات تبقى فافى واكلها يكون ضعيف حتى لو قدام الناس لما الدنيا تقسى عليك اوعى تخاف منها وتكش تربس عترس فيها ياولدى هى كده متجش غير وش دوس فيها وجمد قلبك بس اياك على ضعيف تفش توصل فيها لاعلى مناصب بس اياك فى يوم تغش رابط هذا التعليق شارك المزيد من خيارات المشاركة
فــيــروز بتاريخ: 27 سبتمبر 2009 تقديم بلاغ مشاركة بتاريخ: 27 سبتمبر 2009 أيوننننننننن مين بينده أنا شفت موضوع السيراميك ده و قلت يا خراب أوضتك يا "سنبل" :P .. ما شاء الله لا قوة إلاّ بالله ربنا يحفظهم و يبارك فيهم أولادا و بناتا .. أنا فى موضوع اكل أحباب الله ده أؤمن جدّا بنظرية "هى الريحه يا كريمه" .. إبن أختى رِخِم بردو فى موضوع الأكل ده .. و مامته متخيّله إنّها امّا تعمل له أكل و تقول له كٌل هياكل كده بكل بساطه و من غير شقا !! ماكانتش تبقى الجنّه تحت أقدام الأمّهات يا جماعه !! :lol: أنا بقى ولا باعبّره .. أدخل أعمل طبق البسطرمه بالبيض -قبل هوجة أنفلونزا الخنازير- ولا أعزم عليه حتى !! و يبقى ماشى ورايا من المطبخ للسفره ولا القطّه المتشرّده لأ و أقول له إمشى ياه مفيش أكل ليك و هو هيكاكى على الأكل .. نفس القصه مع البيض الأومليت لازم يبقى له ريحه تجيبه من آخر الشقّه على ملا وشّه .. :P وحتى أمّا نحب نأكّله كشرى ناخده المحل نضرب كشرى هناك .. وسط الهيصه و الزمبليطه و الناس دى كلّها اللىّ بتاكل هو لوحده ومن نفسه بيمد إيده و ياكل و يتخانق معانا كمان .. و عاجباه أوى فكرة إنّه ياخد الدقّه و الصلصه من الأطباق اللىّ قصاده و يفضل يلغوص بس فى الآخر بياكل الحمد لله .. و كان الله فى عون الآباء و الأمّهات "أَمْ مَنْ يُجِيبُ الْمُضْطَرَّ إِذَا دَعَاهُ وَيَكْشِفُ السُّوءَ وَيَجْعَلُكُمْ خُلَفَاءَ الْأَرْضِ أَإِلَهٌ مَعَ اللَّهِ قَلِيلًا مَا تَذَكَّرُونٌَ" صدق الله العظيم ----------------------------------- قال الصمت: الحقائق الأكيده لا تحتاج إلى البلاغه الحصان العائد بعد مصرع فارسه يقول لنا كل شئ دون أن يقول أى شئ مريد البرغوثى رابط هذا التعليق شارك المزيد من خيارات المشاركة
se_ Elsyed بتاريخ: 27 سبتمبر 2009 كاتب الموضوع تقديم بلاغ مشاركة بتاريخ: 27 سبتمبر 2009 بس أنا لاحظت حاجتين تلاته يا ولاد ... وهما : 1- العيال الفقريه دي بتاكل وسط اللمه - بس لمه غير إخواتهم - .... والله اولادي بينزلوا عند عمهم يالكوا وسط ولاد عمهم ولا المفاجيع وفعلاً بيبقى شكلي وِحش وكأني معيشهم في الصومال 2- مطاعم الفاست فوود بالذات ... وكإن العيال دي متسلطه على خراب بيت أهاليها ... بيبقوا هناك زي القواشيط ... ما حدش لاحظ كده ؟ الأحـــرار يؤمنون بمن معه الحق .. و العبيــد يؤمنون بمن معه القوة .. فلا تعجب من دفاع الأحرار عن الضحية دائماً .. و دفاع العبيد عن الجلاد دائماً رابط هذا التعليق شارك المزيد من خيارات المشاركة
النجم الثاقب بتاريخ: 27 سبتمبر 2009 تقديم بلاغ مشاركة بتاريخ: 27 سبتمبر 2009 بس أنا لاحظت حاجتين تلاته يا ولاد ... وهما :1- العيال الفقريه دي بتاكل وسط اللمه - بس لمه غير إخواتهم - .... والله اولادي بينزلوا عند عمهم يالكوا وسط ولاد عمهم ولا المفاجيع وفعلاً بيبقى شكلي وِحش وكأني معيشهم في الصومال 2- مطاعم الفاست فوود بالذات ... وكإن العيال دي متسلطه على خراب بيت أهاليها ... بيبقوا هناك زي القواشيط ... ما حدش لاحظ كده ؟ فعلا و بتبقى حاجة تكسف و بتسبب حرج بالغ للأهل بس الموضوع ده يتفسر بإيه .. غيرة مثلا ؟؟ طب لو قلنا إن السبب غيرة فى حالة الأكل وسط الأهل .. طب فى حالة المطاعم يبقى إيه ؟ كيف اصطباري وما في العمر متسع...!! رابط هذا التعليق شارك المزيد من خيارات المشاركة
ذهبية بتاريخ: 27 سبتمبر 2009 تقديم بلاغ مشاركة بتاريخ: 27 سبتمبر 2009 اتذكر يا سين سين ان ابنى مكنش يحلى لة الاكل الا لما اشيل ساعدتة على ضهرى بالساعات علشان البية بيحب يلعب بكبس الكهربا يقفل النور و يفتحة و كل ما يفتح النور نقول هيهيهيهيه و يفتح بقى ياكل و هكذا لحد ما بعيد عنك يا سين سين جالى انزلاق غضروفى فى ظهرى اعانى منة حتى الان فى مرة من المرات جاءت بنت عمى لزيارتى كانت وقتها لم تتزوج و شافت البروجرام الجميل بتاع اكل ابنى قعدت تضحك و تقولى انا مش ممكن اعمل زيك كدة باقى انا اتذل باساعات و اشيلة علشان ياكل لقمة ما ان شاء الله ما كل لما يجوع ياكل غصب عنة اقولها يا بنتى لما تخلفى هتغيرى رايك تقولى ابدا و استحالة ابدا يحصل انتى بتتكلمى ازاى اتذل واعمل فى نفسى الى انتى بتعملية دة علشان ايةةةةةة هو اهلينا عملوا معانا كدة و ههههههه وبعدين بعد الجواز و الخلفة مرة زورتها لاقتها عاملة لابنها حمار و شايلها و عمالة تقولة شىىىى ححححح علشان لما يفتح بقى تلحق تحط اللقمة فى بقة بسرعة و عمالة تقولة يا يالله يا حبيبى اضرب الحمار و افتح بقك و علشان الحمار جعان و عايز ياكل هههههههه هى اول ما شافتنى هات يا ضحك وانا اقعدت اضحك ساعة و قالت اية فى اية انا عارفة هتقولى اية دة ابنى يا ولاد يعنى اسيبة يموت من الجوع حمارة حمارة بس ياكل [على اسم مصر التاريخ يقدر يقول ما شاء أنا مصر عندي أحب وأجمل الأشياء بحبها وهي مالكة الأرض شرق وغرب وبحبها وهي مرمية جريحة حرب بحبها بعنف وبرقة وعلى استحياء واكرهها وألعن أبوها بعشق زي الداء واسيبها واطفش في درب وتبقى هي ف درب وتلتفت تلاقيني جنبها في الكرب والنبض ينفض عروقي بألف نغمة وضرب على اسم مصر رابط هذا التعليق شارك المزيد من خيارات المشاركة
Salwa بتاريخ: 27 سبتمبر 2009 تقديم بلاغ مشاركة بتاريخ: 27 سبتمبر 2009 صباح الفل عليكم .. شوف بقى ياسى السيد يارايق ....بدل الحكاوى الكتيررر قوى عن الموضوع ...الخلاصة يعنى . اللى مقدرتش اعمله مع اولادى اللى غلبونى ولهم معايا فى الموضوع ده حكايات تتكتب فى مجلدات..... وجدنا الحل الامثل مع حفيدى ....(( فى ديسمبر يقفل اربع سنوات )).. دلوقت بياكل وهو بيتفرج على برامج الاطفال ...ليزى تاون.. http://www.youtube.com/watch?v=EBDb2zG_8ug دى بقى بالذات....البطلة فيها طفلة دايما تقول ان البطل قوى لانه بياكل خضار كتيررر وفاكهة...ومش بياكل حلويات ملهاش لازمة ولا جيلاتى ..الا مرات قليلة وبيكون له مكونات مفيدة .. فيه برامج برضه بتتكلم عن الفوتبول اسمها ..اوليفر وبنجى...(( اكيد عندكم مترجمة بأسامى تانية ))... برضه نخليه يتفرج على البرامج دى ونسهيه ...وياكل من غير ما يحس ...!! http://www.youtube.com/view_play_list?p=E8...=oliver+y+benji يعنى مع ابنتى الكبرى (( ام الحفيد ))....والله العظيم كنت لما احب اأكلها اللحمة المفرومة لازم (( اخبيها ..!!))...يعنى اعمل مكرونة كبيرة نوعا ما...واحشيها لحمة مفرومة (( يعنى نظام كانيلونى وكدة ))...ده قبل ما يشتهر الكانيلونى بطريقته المعتادة .. وبرضه.. كنت اضرب مجموعة الخضار فى الخلاط ...واضعها على الأرز...وتقوللى عاوزة كاتشب...اضحك عليها واضع فوقه شوية كاتشب ..!! على فكرة ابنها زيها....لازم الأرز بالكاتشب ...!! كل شوية اقول له...شايف؟؟ اوليفر قوى علشان بياكل سمك...وكمان استيفانيا ..( اللى فى ليزى تاون )) دلوقت.. يومياااا....بيطلب من امه انه يتعشى سمك علشان يبقى قوى ..مع انه مكانش بيطيق السمك . اضحك على الطفل ياسى السيد...وفى السن دى ممكن تضحك عليه من الناحية دى .. يعنى سوبر مان وهو صغير كان بيحب الاومليت...وسبيدر مان كان غاوى ياكل تفاحة كل يوم الصبح ....او زبادى ...او...عصير ولازم مامته هى اللى تعمله ... كدة يعنى .. وربنا يوفق الجميع .. بس محدش يزهق ويقول ....لما الطفل يجوع حاياكل ..!! ممكن لما يجوع ياكل اى كلام وده غلط.. سلام كبير لكم جميعااا.. (وَمَنْ يَقْتُلْ مُؤْمِناً مُتَعَمِّداً فَجَزَاؤُهُ جَهَنَّمُ خَالِداً فِيهَا وَغَضِبَ اللَّهُ عَلَيْهِ وَلَعَنَهُ وَأَعَدَّ لَهُ عَذَاباً عَظِيماً) [النساء : 93] رابط هذا التعليق شارك المزيد من خيارات المشاركة
mama nona بتاريخ: 27 سبتمبر 2009 تقديم بلاغ مشاركة بتاريخ: 27 سبتمبر 2009 انا بنتى بقى مدمنة حلاوة طحينية لازم سندوتش حلاوة عالفطار والسناكس لازم تكون سندوتش حلاوة والغدا سندوتش حلاوة واما العشا فطبعا سندوتش حلاوة احنا بقى طبعا قربنا نستورد الحلاوة الطحينية من كترما بنشتريها اشى حلاوة سادة..... واشى بالفستق ,,,,,,, واشى بالشيكولاته ولا تقولى بقى كبده النتن .... ولا شارع الاحسا انا بحط الاكل واستنى اشوف هتعمل ايه هتاكلى ؟؟؟؟ هترد طبعا لا خلاص مفيش ملاهى .... ولا ايس كريم .... ولا فستان جديد .... ولا مرواح مدرسة .... ولاماما هتحبك ..... ولا بابا هيحبك ..... ولا الناس كلها هتحبك واشيل الاكل وال عاوز التانى بيدورعليه لما طلعت البت مصلحجية كبيرة متاكلش الا بشرط انها عاوزة حاجة معينة بس بتاكل فالاخر لما الجوع يقرصها او لما تلاقينى بأكل اخوها تغير وتيجى جرى تاكل بنتى عمرها اربع سنوات متاكلش المحشى مثلا الا لما تلف فيه وتلاقيها ماسكة المحشى صابع صابع تدور على اللى هى لفته علشان تاكله حاول تنوع فالاكل يعنى مثلا الفراخ خليها بانية او مشوية او شاورمة واللحمة مرة بفتيك ومرة شاورمة ومرة بارده الجمبرى ممكن بقى يتعمل كفته وممكن فشوربة كريمة ومش لازم تقوله الصنف ده ايه قوله اسم صنف بيكون بيعزه اوى بس بلاش حكاية كبدة النتن دى الله يكرمك رابط هذا التعليق شارك المزيد من خيارات المشاركة
Recommended Posts
انشئ حساب جديد أو قم بتسجيل دخولك لتتمكن من إضافة تعليق جديد
يجب ان تكون عضوا لدينا لتتمكن من التعليق
انشئ حساب جديد
سجل حسابك الجديد لدينا في الموقع بمنتهي السهوله .
سجل حساب جديدتسجيل دخول
هل تمتلك حساب بالفعل؟ سجل دخولك من هنا.
سجل دخولك الان